Pouki Témwen Jéhova Pa Ka Pwan San?

Sa moun ka di konsèné Témwen Jéhova èk san

Sa moun ka di: Témwen Jéhova pa ka aksèpté twètman mèdikal, paski yo pa ka kwè sé dòktè-a sa édé yo.

Lavéwité-a: Témwen Jéhova vlé bon twètman mèdikal ni pou kò yo ni pou fanmi yo. Konsa lè nou malad, nou ka alé oti dòktè ki sa édé nou san yo ban nou san. Èvèk nou ka apwésyé tout sé pwogwé-a sé dòktè-a ha fè pou édé nou. Anfen, la ni an chay lòt moun ki ha twapé bennéfis a kòz di sé pwogwé sala. Pou ègzanp, an plizyè péyi, népòt moun sa chwazi pou wisivwè twètman mèdikal san yo pwan san. Èk sa ka pwotéjé yo hòd diféwan maladi, èk lòt mové wézilta.

Sa moun ka di: Témwen Jéhova ka kwè si yo ni lafwa sa kay djéwi maladi yo.

Lavéwité-a: Témwen Jéhova pa ka dépan asou lafwa pou djéwi maladi yo.

Sa moun ka di: Lè’w pa aksèpté san, ou ka dépansé pli lajan.

Lavéwité-a: Lè’w wisivwè twètman mèdikal èk ou pa aksèpté san, ou ka dépansé mwens lajan.a

Sa moun ka di: An chay Témwen Jéhova èk ich yo ka mò toulé lanné paski yo pa ka aksèpté san.

Lavéwité-a: La pa ni pyès èvidans pou sipòté sa. Anfen sé dòktè-a ka toujou fè gwo lopowasyon san yo bay moun san. Pou ègzanp, yo ka fè lopowasyon asou tjè-a, asou sé zo-a, èk yo ka osi wiplasé sèten pa an ko-a tèl kon, nwa-a, tjè-a, èk fwa-a san yo bay moun san.b Osi ni gwan moun ni manmay ki pa aksèpté san, ka djéwi menm kon moun ki aksèpté san. Anfen, souvan moun ki pa aksèpté san, ka jis djéwi pli vit pasé moun ki aksèpté san.c Mé, pyèsonn pa sa vwéman di, an moun kay viv si’y aksèpté san, ében i kay mò si’y pa pwan san.

Pouki Témwen Jéhova pa ka pwan san?

Bondyé di nou a klè an Bib-la pou pa pwan san. Konsa, nou pa ka pwan san paski nou vlé obéyi Bondyé. (Jennésis 9:4; Livitikòs 17:10; Ditonronnonmi 12:23; Twavay 15:28, 29) Osi, Bib-la di nou san ka wépwézanté lavi, konsa lè nou pa pwan san, nou ka wèspèkté Bondyé, paski sé li ki ban nou lavi.—Livitikòs 17:14.

Sé chanjman-an sé dòktè-a ja fè lè’y vini pou san

An tan pasé, an chay dòktè té kwè i té byen danjéwé pou twété moun si yo pa ba yo san. Mé plizyè dòktè ja chanjé katjil yo asou sa. Pou ègzanp, an lanné dé mil kat «2004», yon atik mèdikal di: “An tan pou vini tout moun kay sa sèvi an chay an sé bagay-la nou ja dévlopé pou twété Témwen Jéhova”.d Osi an lanné dé mil dis «2010», yon atik an liv-la, Heart, Lung and Circulation di: “Dòktè ka fè lopowasyon bay Témwen Jéhova san yo ba yo san. Mé dòktè sipozé éséyé fè menm bagay-la ba tout moun.”

La ni plizyè mil dòktè owon latè-a ki ka fè gwo lopowasyon san yo bay moun san. Sé dòktè sala ka pwan bon pokosyon diwan sé lopowasyon-an, èk yo ka fè lòt bagay pou anpéché moun-lan pèd twòp san. Anfen an plizyè péyi, an chay moun ki pa Témwen Jéhova ka mandé pou sé diféwan kalté twètman sala.