Pouki Témwen Jéhova Pa Ka Goumen Ladjè?
Mi kat «4» wézon pouki Témwen Jéhova pa ka goumen ladjè:
Yo ka obéyi Bondyé. An Izaya 2:4 Bib-la di, sèvant Bondyé ‘kay bat sab yo pou fè yo tounen fak’ èk ‘yo pa kay fè ladjè ankò’.
Yo ka obéyi Jézi. Jézi té di zapòt Pita: “Mété sab-la viwé an plas li, paski tout moun ki sèvi sab-la pou tjwé moun kay mò pa sab-la.” (Mafyou 26:52) Konsa Jézi moutwé a klè, sé disip li-a pa kay goumen ladjè.
Osi, lè disip Jézi pa mélé kò yo an bagay pòlitiks, yo ka obéyi koumand li an Jan 17:16 lè’y di, sé disip li-a “pa menm èk sé jan latè-a.” Konsa yo pa ka pwotèsté lè gouvèdman-an désidé pou goumen ladjè, èk yo pa ka anpéché moun antwé lawmé-a.
Yo enmen yonn a lòt. Jézi koumandé sé disip li-a pou “enmen yonn a lòt.” (Jan 13:34, 35) Wi, tout Témwen Jéhova sé fwè èk sè, èk yo sé yon fanmi. Konsa yo pyès pa kay janmen goumen kont yonn a lòt.—1 Jan 3:10-12.
Yo ka swiv ègzanp sé Kwityen-an an pwèmyé syèk-la. Encyclopedia of Religion and War di: “Sé disip Jézi-a an pwèmyé syèk-la, pa té ka goumen ladjè èk yo pa té ka vini sòlda, paski Jézi té di yo pou enmen yonn a lòt, jis lèlmi yo.” Osi, Peter Meinhold, yon nonm ki té ka étidyé listwa wilizyon té palé konsèné sé disip Jézi-a an pwèmyé syèk-la, èk i di: “Lè’w sé an Kwityen ou pa sa vini an sòlda.”
Témwen Jéhova ka édé moun an péyi yo
Témwen Jéhova ka édé moun an péyi yo, èk yo ka viv an lapé épi moun. Osi nou ka wèspèkté lwa sé gouvèdman-an paski Bib-la ka ankouwajé nou pou fè sa:
“Wèspèkté lwa gouvèdman péyi-a.”—Ronm 13:1.
“Bay Siza sa ki pou Siza épi bay Bondyé sa ki pou Bondyé.”—Mafyou 22:21.
Wi, Témwen Jéhova ka obéyi sé lwa péyi-a. Nou ka péyé taks nou, èk nou ka sipòté éfò-a gouvèdman-an ka fè pou potjiwé bay moun ki ka wèsté an péyi-a.