Kisa Ki Pwensipal Konmité Témwen Jéhova?

Pwensipal Konmité Témwen Jéhova sé on ti gwoup fwè ki ni wèskonsabilité-a pou bay pèp Jéhova oliwon latè-a diwèksyon. Tout sé fwè-a ki asou Pwensipal Konmité-a sé Kwityen ki annonté. Twavay-la Pwensipal Konmité-a ka fè-a ni dé (2) pa:

• Pwépawé manjé spiwityouèl-la nou ka wisouvwè an sé piblikasyon nou-an, an sé mitin-lan, èk an sé lékòl-la pou Témwen Jéhova. Tout manjé spiwityouèl sala bazé asou Bib-la.​—Louk 12:42.

• Ògannizé aktivité Témwen Jéhova oliwon latè-a. Sa vlé di, yo ka diwèkté twavay-la pou pwéché bon nouvèl Wéyòm Bondyé owon latè-a, èvèk yo ka désidé kisa pou fè épi donnasyon ògannizasyon-an wisouvwè.

An pwèmyé syèk-la, ‘sé zapòt-la épi sé ansyen-an an Jérouzalèm’ té ni wèskonsabilité-a pou fè disizyon enpòtan pou tout sé kongwigasyon-an. Jòdi jou, Pwensipal Konmité-a ka swiv menm ègzanp sala. (Twav. 15:2 NWT.) Mé sé zapòt-la èk sé ansyen-an pa té mèt sé kongwigasyon-an an pwèmyé syèk-la, èk Pwensipal Konmité-a sé pa mèt sé kongwigasyon-an jòdi jou nonplis. Yo dakò, sé Jézi Jéhova apwenté kon mèt kongwigasyon-an. Konsa, yo ka li Bib-la pou apwann sa Jéhova vlé yo fè, èk yo ka swiv diwèksyon Jézi.​—1 Kòrint 11:3; Èfésòs 5:​23.

Kisa ki non sé fwè-a ki asou Pwensipal Konmité-a?

Sé fwè-a ki asou Pwensipal Konmité-a sé, Kenneth Cook, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, épi Jeffrey Winder. Sé fwè sala ka wann sèvis an pwensipal lofis Témwen Jéhova an Warwick, New York, U.S.A.

Ki mannyè Pwensipal Konmité-a ògannizé pou akonpli twavay yo?

Pwensipal Konmité-a établi sis (6) konmité pou ògannizé aktivité Témwen Jéhova owon latè-a. Èk chak sé fwè-a ki asou Pwensipal Konmité-a ka wann sèvis asou yonn (1), èben asou plizyé an sé konmité sala.

• Konmité-a Ki Ka Kòdiné: Konmité sala wèskonsab pou bagay ki ni pou fè épi lalwa. Èk sé yo ki ka fè disizyon asou ki mannyè pou édé sé fwè èk sè-a lè on dézas fèt, lè yo ka èspéyansé pèsikasyon pou lafwa yo, èk lòt sitiwasyon ki ka afèkté Témwen Jéhova.

• Konmité-a Pou Moun Ki Ka Twavay An Bèfèl: Konmité sala ka gadé apwé sé fwè èk sè-a ki ka wann sèvis an Bèfèl.

• Konmité-a Ki Ka Pibliyé: Konmité sala wèskonsab pou enpwimé sé piblikasyon nou-an. Èk sé yo ki ka ògannizé pou voyé sé piblikasyon-an an sé diféwan péyi-a owon latè-a. Osi, yo ka ògannizé twavay konstwiksyon pou bati plas pou adowé Jéhova, pou bati lofis twadiksyon, èk pou bati lofis bwanch.

• Konmité-a Pou Sèvis: Konmité sala wèskonsab pou ògannizé twavay-la pou pwéché “Bon Nouvèl [Wéyòm Bondyé.]”​—Mafyou 24:14.

• Konmité-a pou Enstwiksyon: Konmité sala wèskonsab pou pwépawé enstwiksyon spiwityouèl-la nou ka wisouvwè an sé mitin-lan, an sé lékòl-la pou Témwen Jéhova, èk an sé pwogwanm-lan ki asou òdiyo èk vidéyo.

• Konmité-a Pou Ékwiti: Konmité sala wèskonsab pou pwépawé enstwiksyon spiwityouèl-la ki an sé piblikasyon nou-an, ki enpwimé, èk ki asou wèbsayt nou. Osi, yo ka diwèkté twavay-la pou twadwi sé piblikasyon nou-an an diféwan langaj.

Bon, apa di twavay-la yo ka fè asou sé diféwan konmité sala, Pwensipal Konmité-a ka ni on mitin yon fwa pa simenn pou konsidiwé labizwen ògannizasyon-an. Lè yo vini ansanm an mitin sala, sé fwè-a ka konsidiwé sa Bib-la ka di pou yo apwann sa Jéhova vlé yo fè. Yo ka kité lèspwi Bondyé djidé yo pou yo fè bon disizyon, èk yo tout ka fè éfò pou dakò épi disizyon-an.​—Twav. 15:25.

Sé fwè-a ki ka asisté Pwensipal Konmité-a, ki moun yo yé?

Sé fwè-a ki ka asisté Pwensipal Konmité-a asou sé diféwan konmité-a, sé fwè moun sa konfyé. (1 Kòrint 4:2) Sé fwè sala ni abilité épi èspéyans an twavay-la konmité-a yo ka asisté-a wèskonsab pou. Chak simenn, yo ka atandé mitin-lan pou konmité-a yo ka asisté-a. Magwé yo pa ka fè disizyon, yo ka bay konsèy èk enfòmasyon ki byen valowab. Osi, yo ka fè éfò pou mété disizyon-an konmité-a fè-a an plas, èk yo ka òbzòvé pwogwé-a. Pwensipal Konmité-a pé osi voyé sé fwè-a ki ka asisté yo-a pou vizité Témwen Jéhova an diféwan péyi owon latè-a. Ében yo sa mandé yo pou bay on pa asou pwogwanm spésyal, tèl kon Mitin-lan pou Lanné, ében gradyouésyon pou lékòl Giliyad.