Widjèkté Wilizyon Ki Fo!

Satan èvèk sé vyé lèspwi’y-la pa vlé’w sèvi Bondyé. Yo vlé tounen tout moun kont Bondyé si yo sa. Ki mannyè yo ka éséyé fè sa? Yon mannyè sé pa wilizyon ki fo. (2 Kòrint 11:13-15) An wilizyon fo, si I pa ka enstwi lavéwité-a ki an Bib-la. Wilizyon ki fo menm kon lajan ki fo—I pé gadé konmsi I wéyèl, mé I pa vo valè. I sa annékòz ou an chay twaka.

Enstwit wilizyon ki fo pa sa janmen plè Jehovah, Dyé lavéwité-a. Lè Jézi té asou latè, la té ni an gwoup wilizyèz ki té vlé tjwé’y. Yo té kwè mòd adowasyon yo té dwèt. Yo di: “Nou ni yon sèl Papa, Bondyé.” Ès si Jézi dakò? Non! I di yo: “Zòt sé ich papa zòt Denmou-an.” (Jan 8:41, 44) An tan jòdi an chay moun kwè yo ka adowé Bondyé, mé yo ka vwéman sèvi Satan èvèk sé vyé lèspwi’y-la!—1 Kòrint 10:20.

Menm kon an vyé pyé fwi ka pwodwi vyé fwi, wilizyon ki fo ka pwodwi moun ki ka fè mové bagay. Latè-a plen twaka paski moun ka fè mové bagay. La ni imowalité, goumen, vòlè, moun ki abizan, moun ki ka tjwé, èvèk anvyolé. An chay moun ki ka fè sé mové bagay sala ni an wilizyon, mé wilizyon yo pa ka motivé yo pou fè sa ki bon. Yo pa sa fè jan épi Bondyé tout tan yo pa doubout fè mové bagay.—Mafyou 7:17, 18.

Wilizyon ki fo ka enstwi moun pou pwédyé bay imaj. Bondyé di pa pwédyé bay imaj. Sa wézonnab. Ès si’w té kay kontan si yon moun pa janmen palé ba ou mé I ka palé bay pòtwé’w sèlman? Ès si moun sala sa bon jan’w? Non, I pa sa. Jehovah vlé moun palé ba li, pa bay an èstati ében an pòtwé, ki pa ni pyès lavi.—Ègzodòs 20:4, 5.

Wilizyon ki fo ka enstwi ki I pa anyen mal pou tjwé lézòt moun an tan ladjè. Jézi di jan Bondyé té kay ni lanmityé anpami kò yo. Nou pa ka tjwé moun nou kontan. (Jan 13:35) I pa menm bon pou nou tjwé mové moun. Lè lèlmi Jézi vini awété’y, I pa té kité sé disip li-a goumen pou pwotéjé’y.—Mafyou 26:51, 52.

Wilizyon ki fo ka enstwi ki lé méchan kay soufè an difé lanfè. Mé, Bib-la ka enstwi ki péyiman péché sé lanmò. (Ronm 6:23) Jehovah sé an Dyé lanmityé. Ès si an Dyé lanmityé kay tòmanté moun pou tout tan? Mé non! An Pawadi, la kay ni yon sèl wilizyon, yonn-an Jehovah apwouvé-a. (Wévélasyon 15:4) Tout wilizyon ki établi asou mansonj Satan kay dispawèt.