Ki Sa Ki Bon Nouvèl-la Konsèné Wilizyon?

1. Ès tout wilizyon bon?

La ni moun ki onnèt an tout wilizyon. Sa vwéman sé bon nouvèl pou sav ki Bondyé ka wè sé moun sala èk I konsèné épi yo. Mé malèwèzman, moun ja sèvi wilizyon pou fè movèzté. (2 Kòrint 4:3, 4; 11:13-15) Silon sa ki wapòté an nouvèl, adan wilizyon ka abizé manmay, yo ka antwimélé an ladjè, yo ka tjwé an chay moun pou lapéti was yo, èk yo ka fè bagay pou annékòz moun pou viv an pèwèz. Pa dé lapenn sa ka fè moun ki ka vwéman kwè an Bondyé!​—Li Mafyou 24:3-5, 11, 12.

Wilizyon ki vwé ka glowifyé Bondyé, mé fo wilizyon ka déplè’y. Fo wilizyon ka enstwi bagay ki pa an Bib-la, tèl kon fo lésisyon konsèné Bondyé, èk konsèné lé mò. Mé Jéhova vlé moun konnèt lavéwité-a konsèné’y.​—Li Izikèl 18:4; 1 Timòfi 2:3-5.

2. Ki sa ki bon nouvèl-la konsèné wilizyon?

Wilizyon ki ka di yo enmen Bondyé lè sé latè Satan yo vwéman enmen pa ka kwennen Bondyé. (Jémz 4:4) Pawòl Bondyé ka kwiyé tout fo wilizyon “Babilonn li Gwan.” Babilonn sété an vil an tan lontan koté fo wilizyon té koumansé apwé Déliz-la an tan Nowa. Touswit, Bondyé kay mennen an bout sibitman pou wilizyon ki ka kwennen lézòm épi ki ka manstipé asou yo.​—Li Wévélasyon 17:1, 2, 5, 16, 17; 18:8.

Mé la ni lòt bon nouvèl. Jéhova p’òkò obliyé moun ki ni tjè onnèt ki an diféwan fo wilizyon owon latè-a. I ka enstwi moun kon sa lavéwité-a èk sa ka mennen yo an lilyon.​—Li Mayka 4:2, 5.

3. Ki sa moun ki ni tjè onnèt sipozé fè?

Jéhova konsèné épi moun ki enmen sa ki vwé èk sa ki bon. I ka ankouwajé yo pou kité fo wilizyon dèyè. Moun ki enmen Bondyé toujou pawé pou fè chanjman pou yo sa plè’y.​—Li Wévélasyon 18:4.

An pwèmyé syèk-la, lè moun ki ni tjè onnèt té tann bon nouvèl-la sé zapòt-la té ka pwéché-a, yo wéponn épi lajwa. Jéhova enstwi yo an mannyè nèf pou viv. Sa mennen yo pli lakontantman èk sa bay yo an èspwa épi an wézon pou viv. Yo sé an bon ègzanp pou nou an tan jòdi paski lè yo tann bon nouvèl-la, yo mété Jéhova pwèmyé an lavi yo.​—Li 1 Tèsalonnika 1:8, 9; 2:13.

I ka fè Jéhova plézi pou mennen moun ki tounen do yo asou fo wilizyon an fanmi’y. Si ou aksèpté bèl envitasyon Jéhova, ou kay fè jan épi’y, lòt adowatè Jéhova kay vini fanmi’w, èk ou kay jwenn lavi étonnèl.​—Li Mak 10:​29, 30; 2 Kòrint 6:​17, 18.

4. Ki mannyè Bondyé kay mennen lajwa an tout péyi?

Jijman-an ki ka vini asou fo wilizyon sé vwéman bon nouvèl. I kay mennen libéwasyon bay moun toupatou. Fo wilizyon pa kay janmen kwennen lézòm épi divizé yo ankò. A lè sala, tout moun kay adowé Jéhova an lilyon.​—Li Wévélasyon 18:20, 21; 21:3, 4.