Mannyè Pou Twapé Wilizyon-an Ki Vwé-a

Si ou vlé fè jan épi Bondyé, ou ni pou pwaktiké wilizyon-an ki Bondyé ka apwouvé-a. Jézi di ki “sé adowatè-a ki vwé-a” kay adowé Bondyé an lilyon épi “lavéwité.” (Jan 4:23, 24) La ni yon sèl mannyè ki vwé pou adowé Bondyé. (Èfésòs 4:4-6) Wilizyon ki vwé ka djidé’w pou lavi étonnèl, èvèk wilizyon ki fo ka djidé’w pou distwòksyon.—Mafyou 7:13, 14.

Ou sa wèkògnizé wilizyon ki vwé lè’w gadé sé moun-an ki ka pwaktiké’y-la. Paski Jehovah bon, adowatè’y ki vwé ni pou bon moun osi. Menm kon an bon pyé zowanj ka pwodwi bon zowanj, wilizyon-an ki vwé-a ka pwodwi bon moun.—Mafyou 7:15-20.

Jan Jehovah ni wèspé ki fon pou Bib-la. Yo sav sé Bondyé ki annékòz nou pou ni Bib-la. Yo ka kité sa’y di djidé lavi yo, wanjé pwòblenm yo, èvèk édé yo apwann konsèné Bondyé. (2 Timòfi 3:16) Yo ka éséyé pwaktiké sa yo ka pwéché.

Jan Jehovah ka moutwé lanmityé bay yonn a lòt. Jézi moutwé lanmityé bay moun lè’y enstwi yo konsèné Bondyé, èvèk lè’y djéwi sa ki té malad. Sa ki ka pwaktiké wilizyon-an ki vwé-a ka moutwé lanmityé bay lézòt osi. Kon Jézi, yo pa ka tousé né yo asou moun paski yo pòv ében yo sòti adan an diféwan nasyon. Jézi di moun kay konnèt disip li pa lanmityé-a yo ka moutwé bay yonn a lòt.—Jan 13:35.

Jan Bondyé ka onnowé non’y, Jehovah. Si an moun wifizé sèvi non’w, ès si moun sala sé bon jan’w? Non! Lè nou ni an jan, nou ka sèvi non’y èvèk nou ka di lézòt moun bon bagay konsèné’y. Kon sa moun ki vlé fè jan épi Bondyé ni pou sèvi non’y èvèk palé bay lézòt moun konsèné’y. Jehovah vlé nou fè sa.—Mafyou 6:9; Ronm 10:13, 14.

Kon Jézi, jan Bondyé ka enstwi moun konsèné Wéyòm Bondyé. Wéyòm Bondyé sé gouvèdman-an ki an syèl ki kay fè latè-a an pawadi. Jan Bondyé ka patajé bon nouvèl sala konsèné Wéyòm Bondyé épi lézòt.—Mafyou 24:14.

Témwen Jehovah ka éséyé fè jan épi Bondyé. Yo ni wèspé pou Bib-la èvèk yo ni lanmityé anpami kò yo. Osi yo ka sèvi èvèk onnowé non Bondyé èvèk yo ka enstwi lézòt konsèné Wéyòm li. Témwen Jehovah ka pwaktiké wilizyon-an ki vwé-a asou latè an tan jòdi.