LISON 6

Édé Moun Konpwann Sa Vèwsé-a Ka Di

Jan 10:33-36

WÉZIMÉ: Pa annèk li an lévanjil èk apwé alé asou an lòt pwen. Fè asiwé ki, moun wè konnèksyon-an ant vèwsé-a ou ka li-a èk pwen-an ou ka diskité-a.

MANNYÈ POU FÈ’Y:

Pézé fò asou sèten mo pawòl. Apwé ou li an vèwsé, pézé fò asou sèten mo pawòl ki ka sipòté pwen-an ou vlé fè. Ou pé wépété sé mo pawòl-la ou té pézé fò asou. Èben, ou pé mandé an kwèsyon ki ka ankouwajé moun pou idantifyé mo pawòl-la ou té pézé fò asou.

Si ou sèvi diféwan mo pawòl pou èspliké lévanjil-la, fè asiwé ki, moun ka wè konnèksyon-an ant vèwsé-a ou ka li-a èk pwen-an ou ka diskité-a.
Pézé fò asou pwen-an ou vlé moun chonjé. Si ou di wézon-an pouki ou kay li an lévanjil, èspliké mannyè sèten mo pawòl an lévanjil-la ka sipòté wézon sala.

Tjenn Bib ou ouvè kon ou ka diskité lévanjil-la. Sa sa édé moun wè konnèksyon-an ant pwen-an ou ka fè-a èk vèwsé-a ou fini li-a.
Èspliké sa moun ni pou fè adan an mannyè ki senp. Pa diskité pwen ki an vèwsé-a ki pa ka sipòté pwen-an ou vlé fè-a. Katjilé asou ki sa moun ja konnèt konsèné sijé-a, èk désidé ki kantité enfòmasyon ki vwéman nésésè pou moun byen konpwann pwen-an.