Ès Ou Pwépawé Pou Lè Moun Wévòlté An Péyiʼw?

Kon bout sistèm-lan ka apwoché nou ka èkspèkté pli vyolans, moun kay lévé wévòt pli, èk la kay ni pli ladjè. (Wév. 6:4) Ki mannyè nou sa pwépawé pou sé bagay sala?

• Pwépawé kò’w pou wèsté fidèl: Gadé pou pwensip Bib èk wakont ki an Bib-la ki sa fòtifyé lafwa’w an Jéhova èk an ògannizasyon’y. Èk sa kay édé’w pou pa pwan pa an zafè latè-a. (Pwov. 12:5; jr-E 125-126 ¶23-24) Konsa, apwézan sé lè-a pou fòtifyé wilasyon’w épi sé fwè èk sè-a ki an kongwigasyon-an.—1 Pita 4:7, 8

• Pwépawé sa ou bizwen pou tjenn kò’w sòv, pou ni bon santé èk pou wèsté vivan: Fè pwépawasyon pou wèsté sòv èk pou ni tout sa ou bizwen si ou pa sa kité kay ou. Osi, désidé sa’w kay fè si ou ni pou kouwi hòd kay ou. Fè asiwé sak ou ni tout sa ou bizwen tèl kon: dòkyouman ki enpòtan, lajan èk bagay pou pwotèkté’w, tèl kon glòv èk mas. Fè asiwé ou ni limowo téléfòn sé ansyen-an, èk osi fè asiwé yo ni limowo téléfòn ou.—Izay. 32:2; g17.5-E 3-7

Lè moun ka lévé wévòt an péyi’w, fè asiwé ou ka fè sé bagay-la ou té akoutimé fè pou adowé Jéhova. Bagay tèl kon: pwédyé, étidyé èk atandé sé mitin-an. (Filip. 1:10) Si’y pa nésésè, pa kité plas-la ou yé-a pou alé adan an lòt plas. (Maf. 10:16) Èk osi, sépawé sa ou ni épi sé fwè èk sè-a.—Ronm 12:13.

GADÉ VIDIYO-A ÈS OU JA FÈ PWÉPAWASYON POU AN DÉZAS? ÈK APWÉ WÉPONN SÉ KWÈSYON SALA:

• Ki mannyè Jéhova sa édé nou diwan an dézas?

• Kisa nou sa fè pou pwépawé pou an dézas?

• Ki mannyè nou sa édé lézòt moun apwé an dézas?