LAVI NOU KON KWITYEN
Mannyè Nou Sa Sèvi Sé Vidiyo-a Ògannizasyon-an Pwépawé Pou Létid Bib
La ni kat (4) vidiyo ògannizasyon-an pwépawé ki ni pou fè épi létid Bib, nou sa sèvi an minis-la. Mé pou ki wézon ògannizasyon-an pwépawé sé vidiyo sala?
Yo pwépawé vidiyo-a, Pouki Nou Sipozé Apwann Sa Bib-la Ka Di?—Sa Ki Pli Lonng-la pou édé moun vini antéwésé an Bib-la menm si moun-lan wilizyèz opa. Osi vidiyo sala ka enkouwajé moun pou fouyé Bib-la pou twapé sé wépons-lan pou sé kwèsyon-an yo ni. Èk i ka èspliké mannyè on moun sa mandé pou on létid Bib.
Vidiyo-a Pouki Nou Sipozé Apwann Sa Bib-la Ka Di? (pli kout-la) ni menm enfòmasyon-an ki an vidiyo-a ki pli lonng-la, mé i pli kout. An sèten tèwitwa moun pa ni djè tan pou palé, konsa i kay pli mèyè pou sèvi vidiyo kout sala.
Yo pwépawé vidiyo-a, Ki Mannyè An Létid Bib Ka Fèt? pou enkouwajé moun pou étidyé Bib-la épi pou wéponn déotwa kwèsyon moun ka toujou mandé. Tèl kon mannyè pou mandé pou on létid Bib.
Yo pwépawé vidiyo-a, Byenvini Pou Létid Bib Ou èspwèsman pou étidyan Bib. Magwé vidiyo-a asou paj 2 an liv-la, Ou Sa Ni On Bon Lavi Pou Tout Tan! nou sa moutwé moun vidiyo sala lè nou ka diskité ti liv-la Ou Sa Ni On Bon Lavi Pou Tout Tan! Vidiyo-a ka moutwé sé sijé-a ki an liv-la èvèk sa étidyan-an kay étidyé.
Magwé ògannizasyon-an pwépawé chak vidiyo pou on wézon, nou sa moutwé ében voyé sé vidiyo-a bay népòt moun lèʼy nésésè. Konsa sé pwoklanmatè-a sipozé byen konnèt sé vidiyo-a èk toujou éséyé pou sèvi yo an minis-la.