Sé Pouʼw Toujou Tjenn Èspwaʼw Fò

1. Ki èspwa Jéhova ja ban nou?

JÉHOVA ja ban nou on bèl èspwa pou tan ki ka vini. Kisa sa yé? Èspwa sala sé lavi étonnèl. Adan di nou ni èspwa pou viv an syèl kon lèspwi ki pa kay janmen mò. (1 Kòr. 15:50, 53) Mé an pil di nou ni èspwa-a pou viv asou latè-a an bon santé; koté nou pa kay ni lapenn, lanmò, pléwé èben soufwans ankò. Kon di Wévélasyon 21: “Tout sé vyé bagay sala [kay] dispawèt.” (Wév. 21:3, 4) Sé pa dé kontan nou kontan nou ni èspwa sala Jéhova ban nou-a. Ki èspwa nou sé pou viv an syèl, ki sé pou viv asou latè an pawadi, sa sé on bagay ki pwé tjè nou.

2. Pouki nou asiwé èspwa-a nou ni-a kay fèt vwé?

² Nou ka èspéwé épi konfyans, sé pwonmèt-la Bondyé té fè an Bib-la. Nou asiwé sé pwonmèt-lan ki an Bib-la kay fèt vwé. Pouki? Paskè sé Jéhova ki fè sé pwonmèt sala èk nou sav i pa sa janmen manti. (Ronm 15:13, Lim. 23:19) Nou sav Jéhova ni pouvwa-a èk dézi-a pou akonpli tout sa i vlé fè. Épi i kay fè sa pou vwé. Sé pa wévé nou ka wévé sa. Èk sa pa listwa ti manmay. Tout sé pwonmèt-la bazé asou évidans nou sav ki vwé. Konsa, nou ka èspéwé épi konfyans.

3. Kisa nou kay diskité an atik sala? (Sam 27:14)

³ Papa nou an syèl enmen nou an chay èk i vlé nou ni konfyans an li. (Li Sam 27:14.) Lè konfyans nou an Jéhova byen fò, sa ka édé nou pou andiwé anba twaka èk tèt cho nou pé ni an lavi nou ki sé apwézan ki sé an tan pou vini. Konsa, annou konsidiwé mannyè èspwa nou ka pwotèkté nou. Épi pou fè sa, nou kay konpawéʼy épi yon lank èk on kastò. Nou osi kay diskité koumannyè nou sa fòtifyé èspwa nou.

ÈSPWA NOU MENM KON ON LANK

4. An ki mannyè èspwa nou menm kon on lank? (Hibrou 6:19)

⁴ Lè zapòt Pòl té ékwi sé Hibrou-a, i konpawé èspwa nou épi on lank. Pouki wézon zapòt Pòl konpawé èspwa nou épi on lank? Èben, on lank sé on tjò fè ki ka tjébé on batiman an plas asou lanmè-a. Pòl té sav lank-lan ka tjenbé batiman-an asou lanmè-a pou anpéchéʼy alé ladwiv. (Li Hibrou 6:19.) Asou yon lokazyon, zapòt Pòl té on pasajè asou on batiman, èk la té ni on mové tan. Lè van-an té ka malmennen batiman-an, zapòt Pòl tè wè yo ladjé lank-lan an glo-a pou anpéché batiman-an kwazé asou sé kayè-a. (Twav. 27:29, 39-41) Menm kon lank-lan ka tjébé batiman-an asou lanmè-a pou anpéchéʼy alé ladwiv, sé konsa èspwa nou ka tjébé nou pwé Jéhova lè nou ni pwòblenm. Sa pa vlé di lavi kay toujou dou. Sé pou nou chonjé, Jézi té di moun kay pèsikité nou. (Jan 15:20) Èspwa sala nou ni-a, kay édé nou tjenbé fò anba tout twaka nou. Pouki? Paski nou sav nou kay èspéyansé on pli mèyè lavi an tan pou vini. Alò, lè nou mèdité asou sa tan ki ka vini kay mennen ban nou, sa ka fè nou wèsté kam èk dous lè nou ka èspéyansé pwòblenm. Èk osi, i ka fè nou kontiné an sèvis nou pou Jéhova.

5. Ki mannyè èspwa Jézi té édéʼy pou tjébé fò menm si i té sav i té kay mò?

⁵ Apwézan, annou gadé mannyè èspwa Jézi té édéʼy pou tjébé fò magwé i té sav i té kay mò. Asou jou Pentikòs-la, lanné twant twa (33) an lépòk nou, zapòt Pita mansyonnen on pwofèsi ki sòti an liv Samz. Pwofèsi sala té byen détayé èspwa Jézi lè i di: “Mwen ka èspéyé èk konfyans an sa Bondyé kay fè ban mwen. Ou pa kay kité lam mwen koté sé mò-a yé-a, épi ou pa kay kité kò sèvant-lan ki ka viv baʼw tousèl-la pouwi an twou-a. . . . Épi mwen kay ni tjè kontan, paski ou toujou la épi mwen.” (Twav. 2:25-28; Sam 16:8-11) A ling épi pwofèsi sala, nou ka wè Jézi té ni èspwa-a ki, menm si i mò Papaʼy té kay wésisitéʼy. Épi i té kay ni an pil lajwa pouʼy té ansanm épi Papaʼy ankò an syèl. Konsa, èspwa sa-a té édé Jézi pou ni konfyans épi wèsté fidèl pou Jéhova.​—Hib. 12:2, 3.

6. Kisa yon fwè di konsèné èspwa?

⁶ Èspwa-a nou ni-a ja édé an chay fwè èk sè pou tjébé fò. Annou konsidiwé ègzanp on fwè ki té byen fidèl. Nonʼy sé Leonard Chinn, ki té ka wété an Langlitè. Diwan Pwèmyé Gwo Ladjè-a, yo awétéʼy èk yo météʼy an lajòl paski i té wifizé fè sèvis militè. Yo météʼy andan on kalabous pa kòʼy pou dé mwa, koté i pa té sa wè pyèsonn. Èk apwé sa, yo fèʼy twavay byen wèd. I di: “Èspéyans sala édé mwen wéyalizé, nou byen bouzwen èspwa sala pou nou sa tjenbé fò anba difikilté. Èk nou ni an chay bagay ki ka fòtifyé èspwa nou pou tan ki ka vini èk ki ka édé nou tjenbé fò. Pou ègzanp, nou ni ègzanp Jézi Kwi, ègzanp sé zapòt-la èk sé pwòfèt-la, èk nou ni tout sé bèl pwonmèt-la ki an Bib-la.” Èspwa Leonard té an lank pou li. Épi èspwa nou sa vini menm kon on lank pou nou osi.

7. Kisa ki ka édé èspwa nou vini pli fò? (Ronm 5:3-5; Jémz 1:12)

⁷ Lè nou andiwé anba twaka èk nou èspéyansé èd Jéhova, nou ka fè tjèʼy kontan èk nou ka plèʼy. Èk lè nou wéyalizé sa, sa ka fè èspwa nou vini pli fò. (Li Ronm 5:3-5; Jémz 1:12.) Konsa wi! Èspwa nou kay twòp pli fò pasé lè nou té pwèmyé aksèpté bon nouvèl-la. Bon. Mé kisa Satan vlé? Satan vlé afébli lafwa nou lè kou èspéyansé twaka. Mé épi èd Jéhova, nou tout sa andiwé épi ni siksé.

ÈSPWA NOU MENM KON ON KASTÒ

8. An ki mannyè èspwa nou menm kon on kastò? (1 Tèsalonnika 5:8)

⁸ Bib-la ka osi konpawé èspwa nou épi on kastò. (Li 1 Tèsalonnika 5:8.) Anpanmi yonn an sé bagay-la on sòlda ka mété asouʼy pou pwotéjé kòʼy sé on kastò. Kastò-a ka pwotéjé tèt li. Si lèlmiʼy voyé anyen dèyèʼy, i pa kay donmajé tèt li. Jòdi jou, nou ka goumen adan on ladjè. Épi gwo lèlmi nou, Satan, ka ataké nou. Alò, nou ni pou pwotéjé lidé nou kont sa i ka voyé dèyè nou. Èk i ka voyé bagay en! Wi, Satan ka sèvi an chay diféwan bagay pou tanté nou, épi pou fè nou aksèpté katjil latè-a. Alò, nou bizwen èspwa nou pou pwotèkté katjil nou, pou nou sa wèsté fidèl pou Jéhova; menm kon on sòlda bizwen on kastò pou pwotéjé tèt li.

9. Ki mannyè moun ki pa ni èspwa ka viv lavi yo?

⁹ Èspwa nou pou lavi étonnèl ka fè nou aji épi lasajès èk fè bon disizyon. Mé kanmenm, si nou kité èspwa nou vini fèb èk nou koumansé katjilé asou dézi nou tousèl, sa sa fè nou obliyé èspwa-a nou ni-a. Pou ègzanp, annou konsidiwé sa ki té wivé adan sé Kwityen-an an Kòrint. Yo pèd èspwa an on pwonmèt ki byen enpòtan Bondyé té fè. Bondyé té pwonmèt, i kay wésisité moun ki mò. (1 Kòr. 15:12) Zapòt Pòl té di, moun ki pa ka kwè an èspwa wézèwèksyon-an, ka di: ‘Annou manjé épi bwè paski anba latè-a pa ni pléziʼ. (1 Kòr. 15:32) Jòdi jou, la ni an pil moun ki ni menm dispozisyon sala paski yo pa ni èspwa pou tan ki ka vini. Wi, yo an tout fèt i ni, ka enjwi kò yo. Mé nou, nou diféwan. Nou ka mété tout konfyans nou an pwonmèt Bondyé pou tan ki ka vini. Épi èspwa-a nou ni-a, ka pwotéjé katjil nou èk lidé nou èk ka édé nou pou pa donmajé wilasyon nou épi Jéhova. Wi, nou sa di, èspwa nou menm kon on kastò ki ka pwotéjé tèt on sòlda.​—1 Kòr. 15:33, 34.

10. Èspwa nou ka pwotéjé nou kont ki kalté vyé katjil?

¹⁰ La ni an chay moun ki ka kwè i pa ka fè sans pou éséyé plè Jéhova. Pou ègzanp, adan moun pé di: ‘Mwen pa kay anpanmi sé moun-nan ki kay viv pou tout tan. Sé pa mwen ki pli bon. Ni non plis, mwen pa kwè mwen sa fè tout sa Bondyé vlé mwen fè-a.ʼ Mé sa pa pwèmyé fwa nou tann pawòl kon sa. Nou ni ègzanp Jòb ki té ni on kanmawad, nonʼy sété Élifaz. Élifaz di i té ka konfòté Jòb. Mé tann sa i di: ‘Kisa lézòm yé pou yo kwè yo nèt an zyé Bondyé? . . . Gadé! Pa menm an sé nanj li-a, i ka mété konfyans adan. Épi pa menm syèl-la ki nèt an zyéʼy.ʼ (Jòb 15:14, 15) Ès sa Élifaz té di té sa konfòté Jòb? Non. Mé pli mové pasé sa, Élifaz té manti asou Bondyé toubonnman! Sé Satan ki annékòz Élifaz pou katjilé mannyè sala èk i vlé nou katjilé kon sa tou. I vlé nou katjilé ki, nou pa sa janmen plè Bondyé. Pouki? Satan sav si nou katjilé kon sa, èspwa nou kay vini fèb. Alò, nou ni pou widjèkté tout sé vyé katjil sala èk fiksé asou sé pwonmèt Jéhova-a. Sé pou nou toujou chonjé, Jéhova vlé nou viv pou tout tan èk i kay édé nou twapé lavi étonnèl. (1 Tim. 2:3, 4.) Wi, èspwa nou ka pwotéjé nou kont tout vyé katjil Satan.

TJENN ÈSPWAʼW FÒ

11. Pouki nou sipozé éspéwé asou Jéhova épi pasyans?

¹¹ I pa toujou ézé pou nou tjenn èspwa nou fò. Èk délè nou pé pèd pasyans patan nou ka èspéwé sé pwonmèt Jéhova-a. Konsa, sé pou nou chonjé, Jéhova té toujou la èk i kay toujou la. Épi mannyè Jéhova ka gadé tan, sé pa kon sa nou ka gadé tan. Pou ègzanp, yon mil lanné pou nou, sé konmsi sé yon jou ki pasé pou Jéhova. (2 Pita 3:8, 9) Konsa nou ni pou chonjé ki, Jéhova kay fè sa i pwonmèt pou fè-a an pli mèyè mannyè-a ki posib. Épi nou sav i pa kay tadé. Osi, Jéhova kay pwan aksyon lè i vlé èk pa lè nou vlé. Alò nou ni pou kontiné moutwé pasyans. Mé mi on kèstyon nou vlé wépons-la pou: Kisa ki sa édé nou pou tjenn èspwa nou fò paditan nou ka èspéwé èk pasyans pou Jéhova fè sa i té pwonmèt-la?​—Jémz 5:7, 8.

12. Silon Hibrou 11:1, 6, kisa i vlé di lè on moun ni lafwa an Bondyé?

¹² Jéhova kay vwéman fè saʼy té pwonmèt pou fè. Èk si nou wèsté pwéʼy, nou sa tjenn èspwa nou an sa i té pwonmèt-la fò. Mé pou nou ni èspwa, nou ni pou ni lafwa an Bondyé. Èk nou sav lafwa nou kay byen plasé paski Bondyé sé on moun “ki kay bay bon bagay pou tout moun ki ka chaché pou li.” (Li Hibrou 11:1, 6.) Si nou vwéman kwè la ni on Bondyé, nou kay ni pli konfyans an pwonmèt li. Alò apwézan, annou konsidiwé sa nou sa fè pou fòtifyé wilasyon nou épi Jéhova. Èk nou kay wè, lè nou fè sé bagay sala, sa ka tjenn èspwa nou fò.

13. Kisa nou sa fè pou ni on bon wilasyon épi Jéhova?

¹³ Nou vlé pwédyé ba Jéhova, èk li Pawòl Li. Wi sa vwé, nou pyès pa sa wè Jéhova. Mé sa pa ka anpéché nou ni on bon wilasyon épiʼy. Pouki? Paski nou sa palé ba Jéhova an lapwiyè. Èk lè nou fè sa, nou ni tout konfyans-lan ki Jéhova kay kouté nou. (Jér. 29:11, 12) Èk nou osi sa kouté Jéhova, lè nou li èben kouté pawòl li ki an Bib-la, èk mèdité asouʼy. Ronm 15:4 ka di nou: “Sé bagay-la ki té ékwi an lévanjil avan-an té ékwi pou enstwi nou. Paski i ka ankouwajé nou épi moutwé nou mannyè pou tjenbé fò kon sa nou pé ni èspwa.” Wi, lè nou tann konsèné mannyè Jéhova té otjipé moun ki té fidèl pou li an tan pasé, èben mannyè i té tjenn sé pwonmèt li-a an tan pasé, sa ka fè èspwa nou fò. Anfen, tout sa nou li an pawòl Bondyé sa édé nou tjenn èspwa nou fò.

14. Pouki i bon pou mèdité asou mannyè Jéhova ja tjenn sé pwonmèt li-a?

¹⁴ Nou vlé mèdité asou mannyè Jéhova ja tjenn sé pwonmèt li-a. Pouki i bon pou fè sa? Ében annou konsidiwé ègzanp Abrahanm èk Sara. Ès ou ka chonjé sa Jéhova té pwonmèt yo? Wi Jéhova té pwonmèt yo kay ni on zanfan. (Jen. 18:10) Mé Abrahanm èk Sara té ja an laj, èk Sara té bwanhany. Konsa, ki mannyè yo té sa fè on ich? Ès Abrahanm té ni lafwa an pwonmèt sala? Bib-la di nou: “Abrahanm kontiné ni èspwa an Bondyé, épi . . . i vini papa plizyè nasyon.” (Ronm 4:18) Magwé Abrahanm pa té sav ki mannyè pwonmèt Jéhova té kay vini vwé, i té ni konfyans-lan ki, Jéhova té kay tjenn pwonmèt li. Èk Jéhova pa té dézapwenté Abrahanm. I té tjenn pwonmèt li! (Ronm 4:19-21) Konsa, lè nou mèdité asou wakont kon sa Abrahanm, nou ka apwann ki: Menm si sitiwasyon-an ka gadé enposib an zyé nou, nou sa ni konfyans-lan ki, Jéhova kay toujou tjenn sé pwonmèt li-a. Èk sa sé yonn an sé wézon-an i bon pou mèdité asou mannyè Jéhova ja tjenn sé pwonmèt li-a.

15. Pouki i bon pou mèdité asou sa Jéhova ja fè ba ou?

¹⁵ Mèdité asou sa Jéhova ja fè baʼw. Nou asiwé ou ja twapé bennéfis an sé pwonmèt-la ki an Bib-la ki ja fèt vwé. Konsa, pwan tan pou mèdité asou sé bennéfis-la ou ja twapé. Pou ègzanp, Jézi té pwonmèt ki Papaʼy, Bondyé, kay baʼw sa ou bizwen. (Maf. 6:32, 33) Èk osi, i té pwonmèt ki, si ou mandé Bondyé pou lisentèspwiʼy, i kay ba ouʼy. (Louk 11:13) San pyès dout, Jéhova ja tjenn sé pwonmèt sala. Èk nou asiwé, la ni plizyè lòt bagay Jéhova ja fè baʼw. Pou ègzanp, i ja pawdonnenʼw, i ja konfòtéʼw, èk i ja baʼw tout sa ou bizwen pou tjenn on bon wilasyon épiʼy. (Maf. 6:14; 24:45; 2 Kòr. 1:3) Jéhova té ja pwonmèt i té kay fè sé bagay sala, èk tjenn pwonmèt li. Konsa, lèʼw mèdité asou sa Jéhova ja fè baʼw, sa ka fòtifyé èspwaʼw pou saʼy kay fè baʼw an tan ki ka vini.

WIDJÈWTÉ AN ÈSPWA-A OU NI-A

16. Pouki nou sa di, èspwa-a nou ni-a sé on kado ki byen spésyal hòd Jéhova?

¹⁶ Èspwa-a nou ni pou lavi étonnèl, sé an kado ki byen spésyal hòd Jéhova. Wi, nou ka gadé pou enjwi on bon lavi an tan ki ka vini an pawadi èk nou asiwé sa kay vwéman fèt. Kon nou ja diskité, èspwa nou menm kon on lank. I ka édé nou wèsté pwé Jéhova lè nou ni pwòblenm. I ka édé nou andiwé pèsikasyon. Èk i ka édé nou tjenbé fò lè nou fas a fas épi lanmò. Osi, nou diskité, èspwa nou menm kon on kastò. I ka pwotèkté katjil nou pou nou wèsté fidèl pou Jéhova. Èk èspwa-a nou ni pou tan ki ka vini, ka édé nou vansé pli pwé Bondyé, èk ka moutwé nou ki mizi enmen Bondyé enmen nou. Alò, nou ka twapé an chay bennéfis, lè nou tjenn èspwa nou fò.

17. Pouki nou sa widjèwté an èspwa-a nou ni-a?

¹⁷ Lè Pòl té ékwi sé kwityen-an an Ronm, i di yo: “Sé pou ou toujou widjèwté an èspwa-a ou ni-an.” (Ronm 12:12) Zapòt Pòl té ni bon wézon pou wéjwi, paski i té sav, si i té wèsté fidèl, i té kay viv pou tout tan an syèl. Nou osi sa widjèwté an èspwa-a nou ni-a, paski nou asiwé Jéhova kay tjenn pwonmèt li. Bib-la di nou an Sam 146:5, 6, “Pa dé bon i bon pou moun-lan . . . ki mété èspwaʼy an Jéhova Bondyéʼy-la. . . Moun-lan ki toujou fidèl-la.”