Èspwa-a Ou Ni Pou Tan Ki Ka Vini Kay Fèt Vwé

1. Pouki nou sa di, èspwa-a Abrahanm té ni-an pa té an ven?

JÉHOVA té bay kanmawad li Abrahanm on bèl pwonmèt. I té di’y, i té kay ni on gason, èk gwanmèsi gason sala, tout nasyon asou latè-a té kay jwenn bennédiksyon. (Jen. 15:5; 22:18) Abrahanm té ni lafwa ki té byen fò an Jéhova, èk sé pou wézon sala i té asiwé, pwonmèt Bondyé té kay fèt vwé. Kanmenm, lè Abrahanm té ni yon san (100) lanné, èk madanm li té ni katwiven dis (90) lanné, yo p’òkò té ni on gason. (Jen. 21:​1-7) Mé Bib-la di: “Abrahanm kontiné ni èspwa an Bondyé, épi sé kon sa i vini papa plizyè nasyon, kon Bondyé té diʼy.” (Ronm 4:18) Kon ou sav, èspwa-a Abrahanm té ni-an té fèt vwé. Apwé an chay tan, i té ni on gason èk yo kwiyé gason sala Ayzak. Mé, pouki Abrahanm té tèlman asiwé Jéhova té kay fè sa’y té pwonmèt pou fè-a?

2. Pouki Abrahanm té tèlman asiwé Jéhova té kay fè sa’y té pwonmèt pou fè-a?

² Abrahanm té konnèt Jéhova tèlman byen, i “té asiwé Bondyé té kay sa tjenn pwonmèt li.” (Ronm 4:21) Wi, Abrahanm té ni lafwa ki té byen fò an Bondyé, èk pou lapéti lafwa sala, Bondyé aksèpté’y kon on nonm ki té dwèt douvan’y. (Jémz 2:23) Mé silon sa nou li an Ronm 4:​18, Abrahanm pa té sèlman ni lafwa, i té osi ni èspwa. Alò apwézan, annou konsidiwé sa zapòt Pòl té di konsèné èspwa an Ronm chapit 5.

3. An Ronm chapit 5 kisa zapòt Pòl ka èspliké konsèné èspwa?

³ An Ronm chapit 5 zapòt Pòl ka èspliké pouki nou sa asiwé, èspwa-a nou ni-an “pa kay fè nou hont.” (Ronm 5:5) I ka osi édé nou pou konpwann mannyè èspwa-a nou ni-an sa vini pli fò. Konsa kon nou ègzanminé sa zapòt Pòl di an Ronm 5:​1-5, katjilé asou èspéyans ou, èk mannyè èspwa-a ou ni-an ja vini pli fò kon tan ka pasé. Atik sala kay osi édé’w pou wè, mannyè ou sa fè èspwa-a ou ni-an vini pli fò pasé i yé apwézan. Mé pwèmyéman, annou konsidiwé bèl èspwa-a zapòt Pòl di ki pa kay fè nou hont.

BÈL ÈSPWA-A NOU NI-AN

4. An Ronm 5:​1, 2, kisa zapòt Pòl ka palé konsèné?

⁴ Li Ronm 5:​1, 2. Zapòt Pòl té ékwi sé pawòl sala bay sé fwè-a ki té an kongwigasyon-an an vil Ronm. Sé fwè èk sè sala té apwann konsèné Jéhova épi Jézi, yo té moutwé yo té ni lafwa, èk yo té vini Kwityen. Lafwa-a yo té ni-an “mété [yo] dwèt épi Bondyé.” Sa vlé di, Bondyé konsidiwé yo kon moun ki jis pou lapéti lafwa yo, èvèk i annonté yo épi lisentèspwi’y. Wi, sé fwè èk sè sala té ni on bèl èspwa, èk yo té sa asiwé èspwa sala té kay vini vwé.

5. Ki èspwa sé moun-lan ki annonté ni?

⁵ Pli ta, zapòt Pòl ékwi sé Kwityen annonté-a an vil Èfésòs, konsèné èspwa-a Bondyé té ba yo-a. I di yo, yo té kay wisouvwè “tout sé bèl bennédiksyon-an Bondyé pwonmèt sé moun li-an.” (Èfés. 1:18) Osi, zapòt Pòl té di sé Kwityen-an an vil Kòlòsé, ki koté yo té kay wisouvwè wékonpans yo lè’y di yo, yo “té ni èspwa adan sa Bondyé ka tjenn an syèl [ba yo].” (Kòl. 1:​4, 5) Konsa, sé moun-lan ki annonté-a ni èspwa yo kay wésisité, èk yo kay wisouvwè lavi étonnèl an syèl, koté yo kay kondwi épi Jézi.—1 Tèsa. 4:​13-17; Wév. 20:6.

6. Kisa yon fwè ki té annonté té di konsèné èspwa-a i té ni-an?

⁶ Sé moun-lan ki annonté-a ka chéwi èspwa-a yo ni-an. Pou ègzanp, fwè Frederick Franz sé on fwè ki té annonté, èvèk mi sé sa i té di ofon tjè’y, an lanné mil nèf san katwiven wonz (1991): “Èspwa-a nou ni-an sé on bagay ki asiwé. I kay vini vwé pou tout san kawant kat mil-la (144,000), èvèk i kay fèt adan an mannyè nou pa té sa imajiné.” Apwé fwè Franz té wèsté fidèl pou Jéhova pou plizyè lanné, i di: “[Nou] ka apwésyé èspwa-a nou ni-an an chay. . . . Pli nou èspéyé pou èspwa nou vini vwé, sé pli nou ka apwésyé èspwa-a. Menm si nou ni pou èspéyé pou yon mil (1,000) lanné, i vo’y. Mwen ka chéwi èspwa-a nou ni-an pli pasé avan.”

7-8. Ki bèl èspwa pwèskè nou tout ni? (Ronm 8:​20, 21)

⁷ Pwèskè tout moun ki ka adowé Jéhova jòdi, pa ni èspwa pou viv an syèl. Yo ni menm èspwa-a Abrahanm té ni-an. Sa sé, pou viv pou tout tan asou latè-a anba kondwit Wéyòm Bondyé. (Hib. 11:​8-10, 13) Zapòt Pòl té ékwi konsèné sé bèl bagay-la Bondyé kay fè bay sé ich li-a ki ni èspwa pou viv asou latè-a. (Li Ronm 8:​20, 21.) Lè’w apwann konsèné sé bèl bagay-la Jéhova pwonmèt pou fè ban nou an tan ki ka vini, kisa ki té touché tjè’w pli? Ès sé èspwa-a ki, yon jou ou kay vini pawfé? Èben èspwa-a ki, ou kay wè moun ou enmen ki ja mò lè yo wésisité pou viv an pawadi-a? San dout, la ni an chay bon bagay ou ka èspéyé akòz di bèl èspwa-a Jéhova ban nou-an.

⁸ Konsa, ki nou ni èspwa pou enjwi lavi étonnèl an syèl, ében asou latè-a, nou ni on bèl èspwa. Èk èspwa-a nou ni-an ka ban nou an chay wézon pou widjèwté. Mé sa zapòt Pòl ékwi apwé sa, ka édé nou pou wè mannyè èspwa-a nou ni-an sa vini pli fò ankò. Konsa, annou konsidiwé sa zapòt Pòl té ékwi konsèné èspwa-a nou ni-an, èk sa kay édé nou pou ni pli konfyans ki, èspwa nou kay vwéman vini vwè.

MANNYÈ NOU SA VINI PLI ASIWÉ ÈSPWA NOU KAY VINI VWÉ

9-10. Kon nou wè an ègzanp zapòt Pòl, kisa tout Kwityen sa èspéwé yo kay èspéyansé? (Ronm 5:3) (Gadé sé pòtwé-a osi.)

⁹ Li Ronm 5:3. Silon sa zapòt Pòl di an vèwsé sala, lè nou ka soufè sa pé fè lafwa nou vini pli fò. Paskè i di, soufwans ka moutwé nou mannyè pou tjenbé wèd. Èkspwèsyon sala pé sipwi nou, mé vwéman, tout moun ki ka swiv Jézi sa èspéyé yo kay soufè. Pou ègzanp, konsidiwé èspéyans zapòt Pòl. I té di sé Kwityen-an an vil Tèsalonnika: “Paditan nou té épi [zòt] toujou, nou té ja di [zòt] andavans yo té kay pèsikité nou, épi kon [zòt] sav byen, sé sa ki fèt.” (1 Tèsa. 3:4) Èvèk i di sé Kwityen-an an vil Kòrint: “Mwen vlé zòt sav, fwè épi sè, mizi soufè nou soufé . . . Sé twaka-a nou té ni-an té tèlman mové, . . . nou té jik kwè nou té kay mò.”—2 Kòr. 1:8; 11:​23-27.

¹⁰ Konsa, tout moun ki ka swiv Jézi an tan nou jòdi, sa osi èspéwé yo kay jwenn pèsikasyon. (2 Tim. 3:12) Ès ou ja èspéyansé pèsikasyon paski ou mété lafwa an Jézi, èk ou ka swiv ègzanp li? Pitèt jan’w épi fanmi’w ja pwan’w sèvi wizib, èben jis maltwété’w. Ében pitèt bòs ou épi jan twavay ou ja pèsikité’w, paski ou sé on moun ki onnèt. (Hib. 13:18) Ès ou ja èspéyansé òpozisyon hòd gouvèdman paski ou ka pwéché, èk ou ka di moun konsèné bèl èspwa-a ou ni-an? Chonjé, népòt kalité soufwans nou pé èspéyansé pou lapéti Jézi, zapòt Pòl di, nou sipozé widjèwté lè nou ka soufè sé bagay sala. Mé pou ki wézon i di sa?

11. Pouki nou ni pou fè lidé nou pou tjébé fò anba népòt difikilté nou pé èspéyansé?

¹¹ Nou sa widjèwté lè nou ka soufè paski soufwans ka édé nou pou kiltivé on kawaktè ki byen enpòtan. Kon Ronm 5:3 di: “Soufwans ka moutwé nou mannyè pou tjébé wèd.” Èk kon nou ja wè, tout Kwityen kay èspéyansé difikilté. Konsa, nou ni pou fè lidé nou pou tjébé fò anba népòt difikilté nou pé èspéyansé. Anfen, sèl mannyè nou kay wisouvwè sa Jéhova pwonmèt, sé si nou tjébé fò èk kontiné sèvi’y jis o bout-la. An yon ilistwasyon, Jézi té palé konsèné sé gwenn-lan ki té tonbé asou kayè-a. Èvèk pli ta Jézi di, sé gwenn-lan ki té tonbé asou kayè-a sé menm kon moun ki jwenn konmisyon-an épi yo té kontan lè yo jwenn li. Mé “lè pèsikasyon ében twaka lévé pou lapéti konmisyon-an, la menm yo viwé an péché yo.” Èben, nou pa vlé fè menm kon sé moun sala. (Maf. 13:​5, 6, 20, 21) Èk non, nou pa ka di i sé on bon bagay pou èspéyansé difikilté, èk nou pa ka di i alèz pou tjébé fò anba twaka. Mé sa nou ka di-a sé sa, si nou tjébé fò lè nou ka èspéyansé difikilté pou lapéti Jézi, sa kay pòté nou an chay bennéfis. Ki mannyè?

12. Ki bennéfis nou ka twapé lè nou tjébé fò anba difikilté?

¹² Jémz sété yonn an sé disip Jézi-a, èk i mansyonnen sé bennéfis-la nou sa twapé lè nou tjébé fò anba difikilté. I di: “Sé pa pouʼw kité pasyans-lan ou ni-an janmen vini fèb, mé sé pouʼw kité pasyans kontiné twavay andidanʼw pouʼw sa vini moun ki san fòt, byen doubout, san mantjé anyen.” (Jémz 1:​2-4) Wi, Jémz di, sé pa pou nou janmen kité pasyans-lan nou ni-an vini fèb. Sa vlé di, nou bizwen tjébé fò jis o bout-la. Si nou fè sa, kisa ki kay wézilta-a? Ében kon nou kontiné tjébé fò, nou kay dévlopé lòt bèl kawaktè Kwityen pli. Kawaktè tèl kon, pasyans épi lafwa, èk nou kay apwann pou dépan asou Jéhova pli. Mé la ni on lòt bennéfis ki byen enpòtan nou sa twapé lè nou kontiné tjébé fò.

13-14. Lè nou tjébé fò anba difikilté kisa ki ka fèt, èk kisa sa ni pou fè épi èspwa? (Ronm 5:4)

¹³ Li Ronm 5:4 NWT. Wi, zapòt Pòl di, lè nou tjébé fò, ‘Bondyé ka plè épi nou.’ Konsa lè’w tjébé fò anba difikilté, ou kay ni favè Jéhova. Kanmenm, sa pa vlé di Jéhova ka kontan lè’w ka èspéyansé difikilté, ében twaka an lavi’w. Sa’y vlé di sé sa, Jéhova ka kontan paski ou ka tjébé fò èk ou ka wèsté fidèl. Imajiné sa, lè’w tjébé fò, ou ka bay Jéhova tjè kontan. Sa sé on katjil ki sa ankouwajé nou an chay.—Sam 5:12.

¹⁴ Chonjé, Abrahanm té èspéyansé difikilté an lavi’y. Kanmenm, i wèsté fidèl anba tout sé difikilté sala, èk Bondyé té plè épi’y. Anfen, lafwa Abrahanm té tèlman fò, Bondyé konsidiwé’y kon an jan, èk i aksèpté Abrahanm kon on nonm ki té dwèt douvan’y. (Jen. 15:6; Ronm 4:​13, 22) Jéhova sa fè menm bagay-la ban nou. Èvèk Jéhova pa ka ban nou favè’y pou lapéti kantité twavay nou ka fè ba li, ében pou sé pwivilaj-la nou pé ni an sèvis li. Pito sa, Jéhova ka plè épi nou lè nou ka wèsté fidèl pou li, magwé nou ka èspéyansé difikilté. Èk sé lè sala i ka ban nou favè’y. Konsa népòt laj, sitiwasyon, ében abilité nou pé ni, nou tout sa wèsté fidèl pou Jéhova anba difikilté. Ès ou ka tjébé fò anba an difikilté apwézan? Si sa sé sitiwasyon’w, chonjé ou ka bay Jéhova tjè kontan. Èk lè nou sav Bondyé plè épi nou, sa ka fòtifyé èspwa-a nou ni, an sé bèl bagay-la Jéhova pwonmèt-la.

YON ÈSPWA KI PLI FÒ

15. Ki lòt pwen zapòt Pòl té fè, èk ki kwèsyon adan moun pé mandé?

¹⁵ Kon zapòt Pòl èspliké, Jéhova ka plè épi nou lè nou wèsté fidèl pou li, èk tjébé fò anba difikilté. Apwé i di sa, zapòt Pòl fè on lòt pwen. I di: ‘Lè Bondyé plè épi nou, sa ka ban nou èspwa. Épi èspwa pa kay fè nou hont.’ (Ronm 5:​4, 5 NWT) Mé touswit avan sa, an Ronm 5:​2, zapòt Pòl té ja di, sé Kwityen-an an vil Ronm té ni yon èspwa. I di, yo té ni èspwa yo té “kay jwenn adan lonnè-a Bondyé ni-an.” Konsa on moun pé mandé, ‘Si sé Kwityen-an té ja ni yon èspwa, pou ki wézon zapòt Pòl ka viwé mansyonnen èspwa an vèwsé 4 épi 5?’

16. Ba yon ègzanp ki ka moutwé mannyè èspwa sa vini pli fò? (Gadé sé pòtwé-a osi.)

¹⁶ Ében, nou sa konpwann sa zapòt Pòl té vlé di si nou chonjé, èspwa sé on bagay ki ka pwofité. Wi, i sa vini pli fò. Pou ègzanp, ès ou ka chonjé pwèmyé fwa-a ou apwann konsèné sé bèl bagay-la Jéhova kay fè ban nou an tan pou vini? A lè sala, pitèt ou té ka di an lidé’w, ‘i té kay bon pou moun viv an pawadi pou tout tan.’ Mé, ou pa té asiwé sé bagay sala té kay vwéman fèt. Kanmenm, pli ou apwann konsèné Jéhova épi sé bèl pwonmèt sala, sé pli ou vini asiwé èspwa sala kay vwéman fèt.

17. Ki mannyè èspwa’w ka kontiné pwofité apwé ou batizé?

¹⁷ Apwé ou té ja batizé, ou kontiné apwann konsèné Jéhova, lanmityé’w pou li vini pli fò, èk ou vini pli asiwé èspwa-a ou ni-an kay vini vwé. (Hib. 5:13–6:1) San dout, ou ja èspéyansé sé bagay-la zapòt Pòl palé konsèné an Ronm 5:​2-4. Pitèt ou ja pasé anba tout kalité twaka, mé ou tjébé fò anba tout. Konsa ou sav, Jéhova plè épi’w. Èk paski ou asiwé Jéhova enmen’w èk ou ni favè’y, sa fòtifyé konfyans ou ki, ou kay wisouvwè sé bèl bagay-la i pwonmèt-la. Wi, èspwa’w vini pli fò pasé i té yé avan. Pou ou, èspwa’w sé an bagay wéyal èk ou ka apwésyé’y pli. Anfen, ou tèlman asiwé i kay vini vwé, ou ka bazé tout sa’w ka fè an lavi’w asou èspwa sala. I ka afèkté mannyè ou ka twété fanmi’w, mannyè ou ka fè disizyon, èk i ka jis afèkté mannyè ou ka sèvi tan’w.

18. Ki asiwans Jéhova ka ban nou?

¹⁸ Zapòt Pòl té fè on lòt pwen ki byen enpòtan konsèné kalité èspwa-a ou ka ni, lè’w sav ou ni favè Bondyé. Jéhova ka ba’w asiwans-lan ki, èspwa-a ou ni-an kay vini vwé. Pouki ou sa asiwé sa kay fèt? Sé paski Bondyé ban nou asiwans-lan. Èk zapòt Pòl palé konsèné asiwans sala lè’y di: “[Èspwa-a] pa kay fè nou hont, paski nou sav mizi lanmityé Bondyé ni pou nou, épi i ja moutwé sa lè i ban nou Lèspwiʼy.” (Ronm 5:5) Konsa, ou sa asiwé èspwa sala—wi, èspwa-a ou ni-an, kay vini vwé.

19. Lè’y vini pou èspwa-a ou ni-an, kisa ou sa asiwé?

¹⁹ Katjilé asou sa Jéhova té pwonmèt Abrahanm, mannyè i té plè èpi Abrahanm, èk mannyè i té konsidiwé Abrahanm kon yon jan. Mé sa Abrahanm té ka èspéyé-a té vini vwé, paski Bib-la di: “Abrahanm té ni pasyans, kon sa i wisivwè tout sa Bondyé té pwonmèt li.” (Hib. 6:15; 11:​9, 18; Ronm 4:​20-22) Konsa, èspwa-a Abrahanm té ni-an pa té an ven. Menm kon Abrahanm, ou sa asiwé, si’w wèsté fidèl pou Jéhova, èspwa’w kay vini vwé. Wi, ou ni yon èspwa ki wéyal, i pa kay an ven. Èk, ou ni an chay wézon pou widjèwté an èspwa-a ou ni-an, paskè ou sav, i kay vini vwé. (Ronm 12:12) Kon zapòt Pòl té di: “Mwen ka pwédyé, pou Bondyé ki ka fè zòt ni èspwa, bay zòt an chay djèwté épi lapé paski zòt ka kwè an Jézi Kwi. Mannyè sala Bondyé kay sèvi Lèspwiʼy pou fè èspwa zòt pwofité pli an pli.”—Ronm 15:13.