Fè Fòs Kò’w Pou’w Pa Tonbé Anba Tantasyon

1-2. (a) Ki avètisman Jézi té bay sé disip li-a? (b) Pouki sé disip-la té abandonnen Jézi? (Gadé sé pòtwé-a osi.)

JÉZI DI: “Lèspwiʼw vlé fè bagay-la ki bon-an, mé kòʼw pa fò asé pou sa.”a (Mafyou 26:41b) Wi, sa Jézi di-a ka moutwé i ka konpwann ki nou pa pawfé èk nou kay fè lèwè. Mé i osi di sa, pou vèti nou pou nou pa kwè nou toujou kay fè sa ki dwèt. Pou ègzanp, détwa nèditan avan Jézi di pawòl sala, sé disip li-a di’y, yo pa kay janmen kité’y. (Mafyou 26:35) Alò, yo té vlé fè sa ki dwèt. Mé yo pa té wéyalizé ki, lè moun ni tèt cho, i kay pli ézé pou yo fè sa ki pa bon. Èk pou wézon sala Jézi vèti yo: “Pa kité sonmèy pwanʼw, épi pwédyé pouʼw pa tonbé anba tantasyon.”​—Mafyou 26:41a.

² Malèwèzman, yo pa té fè sa Jézi té di yo pou fè èk sa annékòz yo pou tonbé anba tantasyon. Ou wè, lè sé moun-lan vini awété Jézi, yo té pè tèlman yo tout kité’y épi yo kouwi. Wi, yo fè ègzaktiman sa yo di yo pa té kay janmen fè-a—yo abandonnen Jézi.​—Mafyou 26:56.

3. (a) Pou ki wézon nou pa vlé kwè nou kay toujou fò asé pou fè sa ki dwèt? (b) Kisa nou kay diskité an atik sala?

³ Nou pa vlé fè anyen ki kay déplè Jéhova. Mé sé pa pou nou kwè nou kay toujou fò asé pou fè sa ki dwèt. Chonjé, nou pa pawfé èk i byen ézé pou nou tonbé anba tantasyon èk fè on péché. (Ronm 5:12; 7:21-23) Délè, nou sa twapé kò nou an sitiwasyon ki sa fè nou tonbé. Konsa, pou nou sa wèsté fidèl pou Jéhova èk Jézi, nou ni pou swiv konsèy Jézi pou véyé pou sé bagay-la ki sa fè nou tonbé anba tantasyon pou fè péché. Atik sala kay édé nou pou fè sa. Pwèmyé, nou kay konsidiwé kisa ki enpòtan pou nou konnèt si nou vlé swiv konsèy sala. Apwé, nou kay diskité mannyè pou pwotèkté kò nou pou nou pa tonbé anba tantasyon. Èk finalman, nou kay konsidiwé mannyè nou sa kontiné pwotèkté kò nou.

SÉ POU OU KONNÈT FÈBLÈS OU

4-5. Menm si péché-a pa tèlman gwav, pouki i enpòtan pou pa fè’y?

⁴ La ni péché ki pa tèlman gwav. Kanmenm, yo sa afébli wilasyon nou épi Jéhova èk annékòz nou pou fè on péché ki pli gwav. Konsa, i enpòtan pou nou pa fè sé péché sala.

⁵ Mé i pa kay toujou ézé pou nou fè sa ki dwèt paski nou tout kay twapé tantasyon pou fè sa ki pa bon. Anplis di sa, nou tout ni diféwan fèblès. Konsa, la kay ni bagay ki kay tanté yon moun èk pa tanté on lòt moun. Pou ègzanp, yon moun pé ka goumen pou pa fè imowalité sèksyouwal. An lòt moun pé ni pou lité épi dézi-a pou touché kò’y èben gadé pòtwé ki sal tèl kon pònografi. Épi la ni lòt moun ki ka lité épi bagay tèl kon pèwèz lézonm, twòp lògèy, dispozisyon-an pou vini faché vit, èben on lòt bagay. Konsa i byen ézé pou wè pouki zapòt Jémz té di: “Tantasyon ka vini anlè an moun lè i kité sé vyé dézi-a ki andidan tjèʼy-la tjenbéʼy èk mennenʼy alé fè bagay ki pa bon.”​—Jémz 1:14.

6. Kisa nou ni pou konnèt konsèné kò nou?

⁶ Ès ou konnèt sé bagay-la ki sa tanté’w byen ézé? Sa sé on kwèstyon nou chak ni pou wéponn pou kò nou, paski i danjéwé pou nou inyowé fèblès nou, èben pou nou kwè nou fò asé konsa nou pa sa fè on péché. (1 Jan 1:8) Alò, sé pou nou konnèt kò nou èk aksèpté, la ni koté nou tout fèb. (2 Kòrint 13:5) Chonjé zapòt Pòl té di, jis sé moun-lan ki “matwité-a” pé “tonbé an péché” si yo pa “véyé kò” yo.​—Galécha 6:1

7. Kisa nou ni pou bay pli atansyon? Ba yon ègzanp.

⁷ Lè nou vini konnèt sé bagay-la ki sa tanté nou byen ézé, kisa nou sipozé fè? Èben, nou ni pou fòtifyé kò nou, an sé koté-a nou fèb-la. An tan Bib-la, sé vil-la té ka ni bawad pou pwotéjé yo èk koté-a an bawad-la ki té pli fèb sété bayè-a. Alò, pou wézon sala yo té ni pli gad bò bayè-a pou pwotéjé vil-la. An menm mannyè-a, nou ni pou bay fèblès nou pli atansyon pou nou wézisté tantasyon.​—1 Kòrint 9:27.

MANNYÈ POU PWOTÈKTÉ KÒ’W POU’W PA TONBÉ ANBA TANTASYON ÈK PÉCHÉ

8-9. Kisa jenn nonm-lan té sa fè pou’y pwotèkté kò’y pou’y pa tonbé anba tantasyon èk péché? (Pwovèb 7:8, 9, 13, 14, 21)

⁸ Ki mannyè nou sa pwotèkté kò nou pou nou pa tonbé anba tantasyon èk péché? Èben, pou édé nou wéponn kèstyon sala, annou konsidiwé sa nou sa apwann an ègzanp jenn nonm-lan an Pwovèb chapit 7. Jenn nonm-lan fè on péché ki gwav. Wi, i dòmi épi on madanm ki té ka kouché épi plizyè diféwan nonm. Vèwsé 22 di nou, jenn nonm-lan alé dèyè madanm-lan “sibitman”. Mé kon sé vèwsé-a avan sala moutwé, i té ja fè détwa disizyon ki pa té bon, èk mizi an mizi sa fè’y péché.

⁹ Ann wè sa i té fè. Pwèmyé; li swè-a i té “pasé asou chimen-an ki pwé kay madanm-lan.” Èk apwé, “i maché an diwèksyon kay madanm-lan.” (Li Pwovèb 7:8, 9.) Lè i wè madanm-lan, i pa té chapé dé pyé’y. Mé pito, i kité madanm-lan hédi’y èk bo’y. Épi i wèsté ka kouté kon madanm-lan té ka di’y konsèné sakwifis lapé-a i té ni pou ofè. Pitèt madanm-lan té vlé jenn nonm-lan kwè i pa té on mové moun. (Li Pwovèb 7:13, 14, 21.) Alò, si jenn nonm-lan pa té fè tout sé mové disizyon sala, i pa té kay tonbé anba tantasyon pou fè sa ki pa bon.

10. Menm kon jenn nonm-lan, ki mové disizyon nou sa fè ki sa annékòz nou pou tonbé anba tantasyon èk fè on péché ki gwav?

¹⁰ Wakont Sòlomonn ka moutwé kisa ki sa wivé népòt moun ki ka adowé Jéhova. Pou ègzanp, on moun pé fè on péché ki gwav èk pli ta i sa di: “M’a sav sa ki wivé mwen la-a, sa fèt sibitman.” Mé si i pwan tan pou katjilé, i kay wéyalizé pitèt sa pa té fèt sibitman kon i té kwè. Mé pito, pitèt i té fè déotwa disizyon ki pa té bon èk sa annékòz li pou fè péché sala. Pou ègzanp, pitèt i té chwazi jan ki pa enmen Jéhova, èben anmizman ki pa bon. Èben, pitèt i té ka alé plas ki pa bon pou kwityen. Osi byen, pitèt i té doubout fè sé bagay sala wéglé tèl kon: pwédyé, li Bib-la, atandé mitin èben alé an minis-la. Konsa, menm kon jenn nonm-lan, pitèt i pa té fè péché-a “sibitman”. Wi, pitèt i té ja fè an chay mové disizyon avan i fè péché gwav-la.

11. Kisa ki lison-an pou nou?

¹¹ Konsa, kisa ki lison-an pou nou? Lison-an sé sa: Sé pa péché tousèl nou vlé évité. Nou osi pa vlé fè disizyon ki pa bon ki sa annékòz nou pou péché. Anfen, sé vwéman sa Sòlomonn té ka èspliké apwé i dékwi sa ki té wivé jenn nonm-lan épi madanm-lan. I di: ‘Pa kité tjè’w swiv mannyè madanm sala. Pa alé asou chimen’y.’ (Pwovèb 7:25) Sòlomonn jis di pou ‘wèsté lwen madanm sala. Pa alé twò pwé kay li.’ (Pwovèb 5:3, 8) Wi, pou nou pwotèkté kò nou hòd péché, sé pou nou wèsté lwen sé bagay-la èk sé sitiwasyon-an ki sa annékòz nou pou fè péché.b Konsa, menm si la ni bagay on kwityen sa fè ki pa ka kasé lwa Jéhova, nou menm pa kay fè’y, si nou sav yo kay annékòz nou tonbé anba tantasyon èk péché.​—Mafyou 5:29, 30.

12. Ki disizyon Jòb té fè? Èk ki mannyè sa édé’y pou’y pa tonbé anba tantasyon? (Jòb 31:1)

¹² La ni an chay bagay ki sa tanté nou pou fè péché. Mé nou ni pou fè lidé nou pou fè bon disizyon ki sa édé nou wèsté lwen sé tantasyon sala. Bon. Sé sa Jòb té détèminé pou fè. I ‘fè yon agwéman épi zyé’y’ pou’y pa gadé on lòt fanm ‘jistan i vlé anvi kouché épi’y.’ (Li Jòb 31:1.) Paski Jòb té ni détèminasyon sala, sa édé’y pou pa fè adiltè. Alò, jòdi jou, nou sa ni menm détèminasyon sala, pou pa fè anyen ki sa mennen nou anba tantasyon.

13. Pouki wézon nou ni pou véyé sa nou ka katjilé asou? (Gadé sé pòtwé-a osi.)

¹³ Nou osi ni pou véyé kisa nou ka katjilé asou. (Ègzodòs 20:17) Ou wè, adan moun kwè, menm si yo ka imajiné kò yo ka fè on bagay ki pa bon, dépi yo pa fè’y, la pa ni pyès danjé an sa. Mé sé katjil sala pa bon. Anfen, si on moun ka toujou katjilé asou on bagay ki pa bon, sé pli i kay vlé fè’y. Épi a lè sa-a, i kay pli wèd pou’y wézisté tantasyon sala. Wi i vwé, vyé katjil kay vini an lidé nou, mé lè sa fèt, sa ki pli enpòtan sé nou ni pou widjèkté yo. Tiwé yo an lidé nou lamenm èk wiplasé yo épi bon katjil. Alò, menm kon ou ka déwasiné zèb pou anpéché yo viwé lévé, nou menm ni pou tiwé mové katjil an lidé nou. Nou pa ni pou kité yo kontiné pwofité, jis lè yo fè nou fè on péché ki gwav.​—Filipay 4:8; Kòlòsé 3:2; Jémz 1:13-15.

14. Ki lòt bagay nou sa fè pou nou pa tonbé anba tantasyon?

¹⁴ Si nou pa vlé tonbé anba tantasyon, ki lòt bagay nou sa fè? Èben, nou ni pou fòtifyé konfyans nou ki nou kay toujou twapé bennéfis lè nou obéyi lwa Jéhova. Mé délè, i pé difisil pou nou mété katjil nou, èk dézi nou a ling épi sa Jéhova vlé nou fè. Mé lè nou fè tout sa nou pé pou fè sa Jéhova vlé nou fè, nou kay vwéman ni lakontantman.

15. Ki mannyè on dézi ki fò pou fè sa ki dwèt kay édé nou pou doubout fò?

¹⁵ Nou bizwen on dézi ki fò pou fè sa ki dwèt. Konsa, si nou apwann pou ‘hayi sa ki mové èk enmen sa ki dwèt’, nou kay vini pli détèminé pou fè sa ki bon épi wèsté lwen népòt sitiwasyon ki sa fè nou péché. (Amòs 5:15) Lè nou ni on dézi ki fò pou fè sa ki dwèt, sa ka fòtifyé nou pou doubout fò, si nou twouvé kò nou adan on sitiwasyon nou pa té ka èspéwé, èben on sitiwasyon nou pa sa anpéché.

16. Ki mannyè sé bagay sala kay édé nou pou pa tonbé anba tantasyon: (1) lè nou atandé mitin ében alé an minis-la? (2) lè nou li èk étidyé Pawòl Bondyé? (3) lè nou pwédyé? (Gadé sé pòtwé-a osi.)

¹⁶ Kisa nou sa fè pou dévèlopé on dézi ki fò pou fè sa ki dwèt? Èben, nou sa fè bagay ki sa fòtifyé lanmityé nou pou Jéhova. Pou ègzanp, lè nou atandé mitin èben alé an minis-la, sa ka édé nou pou pa tonbé anba tantasyon. Anfen, sa ka fòtifyé dézi nou pou plè Jéhova. (Mafyou 28:19, 20; Hibrou 10:24, 25) Mi on lòt bagay nou sa fè. Nou sa li èk étidyé Bib-la èk mèdité asou’y. Sa kay édé nou pou enmen sa ki bon èk hayi sa ki mové. (Jòchwa 1:8; Sam 1:2, 3; 119:97, 101) Mi on lòt bagay ankò. Sé pou nou toujou chonjé sa Jézi té di sé disip li-a: “Pwédyé pouʼw pa tonbé anba tantasyon.” (Mafyou 26:41) Bon. Lè nou fè tan pou palé épi Papa nou an lapwiyè, nou ka aksèpté èd li èk nou ka fòtifyé détèminasyon nou pou plè’y.​—Jémz 4:8.

KONTINÉ PWOTÈKTÉ KÒ’W POU’W PA TONBÉ ANBA TANTASYON

17. Ki fèblès Pita té ni pou lité épi?

¹⁷ Pitèt nou sa ganyen an bout adan sé fèblès nou-a konplètman. Mé la pé ni sa nou kay ni pou goumen kont pou an chay tan avan nou sa ganyen a bout yo. Pou ègzanp, ès ou chonjé zapòt Pita? Fwiyè lézonm annékòz li pou di i pa konnèt Jézi twa fwa. (Mafyou 26:69-75) Mé i té sanm Pita té ganyen a bout fèblès sala lè i té doubout douvan Konsèy sé Jwif-la, èk épi kouwaj, i palé konsèné Jézi. (Twavay 5:27-29) Kanmenm, détwa lanné apwé, i doubout manjé épi sé kwityen-an ki pa té Jwif paski i té pè sa sé kwityen ki té Jwif-la té kay katjilé èk di konsèné’y. (Galécha 2:11, 12) Wi, fèblès Pita té la toujou. I sanm Pita p’òkò té ganyen an bout fèblès sala konplètman.

18. Menm kon Pita, kisa ki sa wivé nou? Ba yon ègzanp.

¹⁸ Nou pé twapé kò nou adan on sitiwasyon ki menm kon sitiwasyon Pita. Pouki nou ka di sa? Èben, pitèt nou té ka goumen épi on fèblès, èk nou kwè nou ja ganyen a bout li. Mé fèblès sala sa viwé ankò. Pou ègzanp, yon fwè di: “Mwen té ja doubout gadé vyé pòtwé sal pou dis (10) nanné. Èk mwen té asiwé mwen pa té ni pwòblenm sala ankò. Mé sa pa té vwé. I té la menm kon on mové chyen, ki twèt, ki kouché la tou dous ka èspéwé on bon lè pou ataké.” Bon, sa ki té bèl konsèné fwè sala sé sa: i kontiné goumen kont fèblès li. Wi, fwè-a wéyalizé, i ni pou fè on bagay toulé jou pou goumen kont fèblès li. Èk pitèt sa sé on bagay i ni pou goumen épi pou tout lèwèstan lavi’y an vyé sistèm sala. Kanmenm, épi èd Jéhova, madanm li, èpi sé ansyen-an, i ka fè an pil éfò pou pa gadé sé vyé pòtwé sal-la.

19. Kisa nou sa fè si nou p’òkò ganyen a bout yon fèblès ki sa fè nou péché?

¹⁹ Kisa nou sa fè si nou p’òkò ganyen a bout yon fèblès ki sa fè nou péché? Èben, i kay bon pou nou swiv konsèy Jézi lè i di nou: “Pa kité sonmèy pwanʼw”. Menm si ou santi ou kay sa doubout fò, ou ni pou kontiné wèsté lwen sitiwasyon ki sa tanté’w èk fè’w péché. (1 Kòrint 10:12) Wi, sé pou ou kontiné fè sé bagay-la ki ja édé’w goumen kont fèblès ou. Épi sé pou ou ‘fè fòs kò’w pou Bondyé jwenn ou san ni tach ében défo mé épi lapé an tjè’w.’​—2 Pita 3:14, Pwovèb 28:14.

OU KAY TWAPÉ BENNÉFIS LÈ OU KONTINÉ PWOTÈKTÉ KÒ’W POU’W PA TONBÉ ANBA TANTASYON

20-21. (a) Pouki i vo èfò-a pou kontiné pwotèkté kò nou pou nou pa tonbé anba tantasyon? (b) Pou édé nou épi fèblès nou, kisa Jéhova pawé pou ban nou? (2 Kòrint 4:7)

²⁰ Nou asiwé i vo èfò-a nou ka mété-a pou kontiné pwotèkté kò nou pou nou pa tonbé anba tantasyon. Ou wè, “ti tak bon tan-an” péché ka ofè nou-a pa anyen lè ou konpawé’y épi sé bennéfis-la nou kay enjwi lè nou tjenn wèg Jéhova. (Hibrou 11:25; Sam 19:8) Wi, Jéhova té fè nou pou obéyi’y. (Jennésis 1:27) Èk lè nou obéyi’y, nou kay ni an pil tjè kontan, on konsyans ki nèt, èk èspwa-a pou viv pou tout tan an latè nèf-la.​—1 Timòfi 6:12; 2 Timòfi 1:3; Joud 20, 21.

²¹ I vwé, ‘kò-a pa fò asé’. Mé ès sa vlé di nou pa sa fè anyen épi fèblès nou? Mé non. Anfen, Jéhova pawé pou ban nou “pouvwa” èben kouway-la ki nésésè pou nou goumen kont fèblès nou. (Li 2 Kòrint 4:7.) Wi, magwé nou sé vésèl ki pa fò, nou sa goumen kont tantasyon èk éwisi, pis Bondyé ka ban nou tout pouvwa-a. Kanmenm, nou pa sa anni asid èk pa fè anyen. Nou bizwen mété èfò touléjou èk fè tout sa nou pé pou goumen kont fèblès nou. Si nou fè sa nou sipozé fè, nou kay ni konfyans-lan ki, Jéhova kay wéponn lapwiyè nou èk ban nou pli fòs lè nou bouzwen’y. (1 Kòrint 10:13) Asiwéman, épi èd Jéhova nou sa pwotèkté kò nou pou nou pa tonbé anba tantasyon èk péché.