Fè Disizyon Ki Ka Moutwé Ou Ni Lafwa An Jéhova

1. Pouki zapòt Pòl té satisfè épi mannyè-a i té viv lavi’y?

ZAPÒT PÒL té fè bon disizyon an lavi’y. I té sèvi lavi’y pou fè volonté Jéhova, èk i té asiwé Jéhova té plè épi’y. Konsa, menm si i té konnèt yo té kay tjwé’y touswit, i té ni tjè kontan èk i té satisfè épi mannyè-a i té viv lavi’y. Anfen, mi sé sa i di: “Mwen ja fini kous-la, mwen tjenn lafwa mwen an Bondyé.” (2 Tim. 4:6-8) Menm kon zapòt Pòl, nou sa fè bon disizyon ki ka plè Bondyé. Mé ki mannyè nou sa fè sa?

2. Kisa’y vlé di pou viv asou sa nou kwè?

² Zapòt Pòl té di: ‘Nou ka viv asou sa nou kwè, pa asou sa nou wè.’ (2 Kòr. 5:7) Mé, kisa sa vlé di? Ében, moun ki pa ni lafwa an Bondyé ka viv asou sa yo sa wè. Sa vlé di, yo ka dépan sèlman asou katjil yo épi santiman yo, lè yo ni pou fè on disizyon. Yo pa ka konsidiwé mannyè disizyon yo kay afèkté wilasyon yo épi Bondyé. Mé moun ki ni lafwa an Bondyé pa ka fè sa. Yo ka viv asou sa yo ka kwè. Sa vlé di, yo ni konfyans ki, Bondyé kay benni yo atjwèlman èk pou tout tan, si yo swiv konsèy li ki an Bib-la. (Sam 119:66; Hib. 11:6) Konsa, yo ka chwazi pou fè sa Bondyé vlé yo fè, menm si i pa toujou ézé pou fè sa.

3. Lè nou fè disizyon ki bazé asou Pawòl Bondyé, ki bennéfis sa ka pòté nou? (2 Kòrint 4:18)

³ Lavéwité-a sé sa, délè nou tout ka fè disizyon ki bazé asou katjil nou épi santiman nou. Sa sé on bagay ki nòmal. Mé i bon pou chonjé, katjil nou, zyé nou épi zòwèy nou, sa kwennen nou. Konsa, lè nou ni disizyon ki enpòtan pou fè, si nou dépan sèlman asou katjil nou épi santiman nou, èk asou sa nou wè ében tann, nou kay twapé kò nou an gwo pwòblènm. An plis di sa, nou pé jis twapé kò nou ka fè bagay ki ka déplè Papa nou Jéhova. (Éklé. 11:9; Maf. 24:37-39) Mé si nou ka swiv konsèy Bib lè nou ka fè disizyon, sa kay pòté nou an chay bennéfis. Pou ègzanp, nou kay sa fè disizyon “ki ka plè Bondyé.” (Èfés. 5:10) Osi, nou kay ni tjè kontan, èk nou kay ni lapé an tjè nou épi an lidé nou. (Sam 16:8, 9; Izay. 48:17, 18) Èvèk si nou kontiné fè disizyon ki bazé asou Pawòl Bondyé, nou kay enjwi lavi pou tout tan.​—Li 2 Kòrint 4:18.

4. Ki mannyè nou sa konnèt si nou ka fè disizyon ki bazé asou Bib-la, ében nou ka fè disizyon ki bazé asou katjil nou?

⁴ Bon, ki mannyè nou sa konnèt si nou ka fè disizyon ki bazé asou Pawòl Bondyé, ében nou ka fè disizyon ki bazé asou katjil nou? Ében, i kay bon pou nou mandé kò nou sé kwèstyon sala: Kisa mwen ka dépan asou lè mwen ka fè disizyon? Ès mwen ka swiv katjil mwen, èk sa mwen wè èk tann? Ében ès mwen ka swiv konsèy Jéhova? An atik sala, nou kay diskité mannyè nou sa fè disizyon ki ka plè Jéhova an sé twa (3) sitiwasyon sala: lè nou ka gadé pou twavay, lè nou ka gadé pou on moun pou nou mayé, èk lè nou wisouvwè diwèksyon hòd ògannizasyon Jéhova.

SWIV KÒNSÈY BIB LÈ’W KA GADÉ POU TWAVAY

5. Lè nou ka gadé pou twavay, kisa nou pé katjilé asou?

⁵ Nou tout té kay kontan pou konnèt, nou sa otjipé kò nou èk potjiwé sa fanmi nou bizwen. Anfen, si nou pa ka potjiwé bay fanmi nou, sa sé on bagay ki byen sèwyé an zyé Jéhova. (Éklé. 7:12; 1 Tim. 5:8) Konsa nou ni pou twavay. Mé lè’y vini pou twavay, la ni an chay diféwan kalité twavay. Pou ègzanp, la ni twavay ki ka péyé tèlman byen, ou ka ni asé lajan pou’w otjipé fanmi’w, èk ou ka jis ni on ti lavi ou sa mété asou koté. Mé la ni lòt twavay koté, ti lajan-an tèlman piti, ou pwèskè pa sa achté sa fanmi’w bizwen. Konsa, lè on moun ka gadé pou twavay i nòmal pou’y katjilé asou konmen lajan i kay twapé. Kanmenm, si sé sa tousèl nou ka konsidiwé avan nou désidé ki twavay pou nou fè, sa kay moutwé nou ka viv pa sa nou ka wè.

6. Lè nou ka gadé pou twavay, ki mannyè nou sa moutwé nou ni lafwa? (Hibrou 13:5)

⁶ Mé si nou ka vwéman maché pa sa nou ka kwè, nou kay katjilé asou mannyè twavay nou kay afèkté wilasyon nou épi Jéhova. Konsa avan nou aksèpté on twavay, nou sa mandé kò nou: ‘Ès mwen kay ni pou fè bagay Jéhova hayi pou mwen sa tjenn twavay sala?’ (Pwov. 6:16-19) ‘Ès twavay sala kay annékòz mwen pou mantjé mitin mwen, minis-la, èk létid pèsonnèl mwen? Ès i kay anpéché mwen pasé tan épi fanmi mwen?’ (Filip. 1:10) Si wépons ou pou népòt sé kwèstyon sala sé wi, i kay bon pou’w pa aksèpté on twavay kon sa. Èk non, sa pa on bagay ki alèz pou’w fè, sitou jòdi jou lè’y ja tèlman wèd pou twapé twavay. Mé lè’w byen bizwen on twavay, èk ou chwazi pou mété wilasyon’w épi Jéhova pwèmyé, sa ka moutwé ou ni lafwa. Wi, ou vwéman ni konfyans ki, Jéhova kay otjipé’w si’w swiv pwensip li.​—Maf. 6:33; li Hibrou 13:5.

7-8. Ki mannyè on fwè an Lanméwik Soud té moutwé i ka viv pa sa i ka kwè? (Gadé pòtwé-a osi.)

⁷ Annou pwan ègzanp yon fwè ki ka wèsté an Lanméwik Soud. Non’y sé Javier.a Fwè sala té vwéman vlé wann sèvis kon yon piyonnè, èk i té konnèt mannyè i té enpòtan pou’y maché pa sa i ka kwè. Mi sé sa i di: “Mwen té ka gadé pou on gwo twavay mwen té kontan, èk ki té kay péyé mwen dé (2) fwa salè mwen. Konsa yo fè awanjman pou mwen palé épi bòs-la. Mé avan mwen alé palé épi’y, mwen pwédyé èk mwen mandé Jéhova pou èd, paskè mwen té asiwé Jéhova té konnèt kisa ki té pli mèyè pou mwen. Wi, mwen té vlé on bon twavay, èk mwen té kay kontan pou fè pli lajan, mé si twavay-la té kay anpéché mwen fè pli an sèvis Jéhova, mwen pa té vlé’y.”

⁸ Fwè Javier di: “Bòs-la di mwen, mwen té kay ni pou twavay ta touléjou. Ében mwen di’y m’a té kay sa fè sa, paskè sa té kay anpéché mwen fè minis mwen.” Konsa, fwè Javier pa aksèpté twavay-la. Dé (2) simen apwé sa, i koumansé wann sèvis kon yon piyonnè, èk pli ta an lanné-a i twapé on ti twavay i té sa fè lè’y pa an minis-la. Fwè Javier di: “Jéhova tann lapwiyè mwen, èk i ban mwen on twavay ki té ka pèwmité mwen pou piyonnè. Gwan mèsi twavay sala, mwen ni pli tan pou sèvi Jéhova, èk pou édé sé fwè èk sè mwen-an. Sa ka ban mwen an chay tjè kontan.”

9. Kisa’w apwann an èspéwéyans fwè Trésor?

⁹ Bon, si’w wéyalizé twavay ou ka fè’y pli difisil pou’w wèsté pwé Jéhova, kisa’w sa fè? Ében annou wè kisa nou sa apwann an ègzanp Trésor. I sé on fwè hòd péyi Congo, èk mi sé sa i di: “Twavay nèf-la mwen té ni-an té èstòdinè. Sa sété ègzaktiman kalité twavay-la mwen té toujou vlé fè. Mwen té ka fè twa (3) fwa salè-a mwen té ni avan. Èk lè’w ka fè twavay sala, tout moun ka gadé’w kon on moun ki enpòtan.” Mé, twavay-la té ka annékòz fwè Trésor pou mantjé sé mitin-lan, paskè i té ka toujou twavay ta. Osi, jan twavay li té ka fè bagay ki pa onnèt délè, èk yo pa té vlé moun konnèt sa. Konsa yo té ka bay fwè nou-an chalè, pou fè’y manti bay moun. Fwè Trésor té vlé kité twavay-la mé i té pè, paskè i pa té sav ki mannyè i té kay sa otjipé kò’y si’y pa ka twavay. Kisa ki édé fwè nou-an pou fè on bon disizyon? Mi sé sa i di: “Habakòk 3:17-19 édé mwen pou konpwann, menm si mwen pèdi twavay sala, Jéhova té kay otjipé mwen. Konsa, mwen kité twavay-la.” Fwè nou-an di: “La ni an chay moun ki ka kwè, dépi on twavay ka péyé’w gwo lajan, ou kay fè népòt bagay pou’w tjenn twavay-la. Yo ka jis kwè ou kay inyowé fanmi’w épi Dyé’w pou lapéti twavay ou. Ében, mwen kontan mwen té sa pwèzèvé wilasyon mwen épi Jéhova èk, épi fanmi mwen. Èvèk yon lanné apwé sa, Jéhova édé mwen pou jwenn on bon ti twavay. Mwen ka fè asé lajan pou otjipé kò mwen, èk mwen ni pli tan pou mwen fè sèvis Jéhova. Lé nou mété Jéhova pwèmyé an lavi nou, délè nou pé pa ni an chay lajan mé nou sa asiwé, Jéhova kay otjipé nou.” Wi, si nou swiv konsèy Jéhova, èk nou mété konfyans nou an sa’y pwonmèt pou fè ban nou, nou kay sa kontiné fè bon disizyon ki ka moutwé nou ni lafwa.

SWIV KONSÈY BIB LÈ’W KA GADÉ POU ON MOUN POU’W MAYÉ

10. Lè’w ka gadé pou on moun pou’w mayé, kisa ou pé katjilé asou? Mé pouki i pa bon pou katjilé asou sé bagay sala tousèl?

¹⁰ Mawiyaj sé on kado hòd Jéhova. Konsa, si on moun vlé mayé, sa sé on bagay ki byen nòmal. Bon, annou di ou sè on sè ki ka gadé pou on fwè pou’w mayé. Pitèt ou kay katjilé asou bagay tèl kon, kawaktè fwè-a, lapawans li, mannyè i ka twété moun, mannyè i yé épi lajan, èk ki wèskonsabilité i ni.b Èk vwéman, tout sé bagay sala enpòtan. Mé, si sé sa tousèl sè-a ka konsidiwé avan’y fè on disizyon, sa ka moutwé sè sala ka viv pa sa’y ka wè.

11. Lè’w ka gadé pou on moun pou’w mayé, ki mannyè ou sa moutwé ou ka viv pa sa’w ka kwè? (1 Kòrint 7:39)

¹¹ Ès ou sa imajiné mannyè Jéhova ka kontan, lè’y wè sé fwè èk sè nou-an ka swiv konsèy li, lè yo ka gadé pou on moun pou yo mayé! Annou gadé yonndé pwensip Bib yo ka swiv: Yo pa ka mayé lè yo twòp jenn. (1 Kòr. 7:36) Yo ka gadé pou on moun ki ni sé kawaktè-a Jéhova vlé on bon madanm, ében on bon mawi ni. (Pwov. 31:10-13, 26-28; Èfés. 5:33; 1 Tim. 5:8) Osi, yo vlé obéyi Jéhova, konsa si on moun ki pa on Tèmwen Jéhova ka moutwé lantéwé an yo, yo pa ka aksèpté’y. Pito sa, yo ka swiv konsèy-la Bib-la ka ban nou an 1 Kòrint 7:39 (Li’y), èk yo ka chwazi on moun ki ka adowé Jéhova èk ki ka imité Jézi, pou yo mayé. Sé fwè èk sè sala ka fè sa paskè yo ni lafwa ki, Jéhova kay toujou sipòté yo.​—Sam 55:22.

12. Kisa’w apwann an ègzanp sè Rosa?

¹² Annou pwan ègzanp yon sè yo ka kwiyé Rosa. Sè sala ka wann sèvis kon yon piyonnè an péyi Columbia. I té jwenn on nonm an twavay li, èk nonm-lan koumansé moutwé lantéwé an li. Sé Rosa menm té kontan nonm-lan. Mi sé sa i di: “Nonm-lan té ka gadé kon on bon moun. I té ka édé moun an konmin li, i té ka otjipé kò’y byen, èvèk mwen té kontan mannyè i té ka twété mwen. Pou mwen, nonm sala té ni tout sa mwen té vlé adan on mawi. Sèl défo i té ni sé sa, i pa té on Tèmwen Jéhova.” Sè-a di ankò, “Mwen té kontan nonm-lan, konsa i pa té ézé pou mwen di’y, mwen pa té vlé ni anyen épi’y. An plis di sa, a lè sala mwen té ka santi akwèdi mwen té pa kò mwen, èk mwen té vwéman vlé mayé. Mé, mwen p’òkò té jwenn on fwè pou mwen mayé.” Kanmenm, sè Rosa pa té fiksé sèlman asou sa i té sa wè. I katjilé asou sa ki té kay wivé wilasyon’y épi Jéhova, si’y té koumansé on bagay épi nonm-lan. Konsa, i doubout konminiké épi nonm-lan, èk i kontiné twavay wèd an sèvis Jéhova. On ti tan apwé sa, sè Rosa wisouvwè on envitasyon pou’y atandé Lékòl-la Pou Pwoklanmatè Wéyòm-lan. Èk atjwèlman, i ka wann sèvis kon yon piyonnè spésyal. Sè Rosa di: “Jéhova ja ban mwen tèlman bennédiksyon, i plen tjè mwen épi lakontantman.” Wi, i pa toujou ézé pou obéyi Jéhova, mé lè nou swiv konsèy Bib an lavi nou, sa ka pòté nou an chay bennéfis.

SWIV KONSÈY BIB LÈ’W WISOUVWÈ DIWÈKSYON HÒD ÒGANNIZASYON JÉHOVA

13. Délè, lè nou wisouvwè diwèksyon hòd ògannizasyon Jéhova, kisa ki pé fèt?

¹³ Souvan, Jéhova ka sèvi sé ansyen-an an kongwigasyon-an, ansyen-an pou sékyout-la, lofis bwanch-lan, ében Pwensipal Konmité-a pou ban nou sé diwèksyon-an nou bizwen, pou nou sa sèvi’y pli mèyè. Èvèk nou kontan pou wisouvwè sé diwèksyon sala. Mé délè, nou pé twapé’y wèd pou konpwann pouki sé fwè-a ka mandé nou pou fè sèten bagay, èk nou pé koumansé katjilé si i bon pou nou swiv sé diwèksyon-an yo ban nou-an. Osi, nou pé jis twapé kò nou ka kwititjé sé fwè-a ki ka ban nou diwèksyon-an, pito nou obéyi yo.

14. Kisa ki kay édé nou pou obéyi diwèksyon nou wisouvwè hòd ògannizasyon Jéhova? (Hibrou 13:17)

¹⁴ Mé lè nou ka vwéman kwè sé Jéhova ki ka djidé ògannizasyon’y, nou pa ka tadé pou obéyi sé diwèksyon-an nou ka wisouvwè-a. Èk nou pa ka obéyi senpliman paski nou ni pou obéyi. Non. Lè nou ni lafwa, nou ka obéyi sé fwè-a paski nou ka konfyé yo, èk paski nou asiwé, sé Jéhova ki ka sèvi yo pou ban nou diwèksyon. (Li Hibrou 13:17.) Wi, nou sav, si nou tout swiv sé diwèksyon-an nou ka wisouvwè-a, kongwigasyon-an kay wèsté an lilyon. (Èfés. 4:2, 3) Èk nou sav, sé fwè-a ki ka pwan douvan-an pa pawfé, konsa yo ka fè lèwè. Mé si nou obéyi yo, Jéhova kay benni nou. (1 Sm 15:22) Èvèk si la ni on bagay ki bizwen chanjé, nou asiwé, Jéhova kay chanjé’y a bon lè-a.​—Mayk. 7:7.

15-16. Magwé fwè Kevin té ni dout konsèné diwèksyon i té wisouvwè, kisa ki édé’y pou obéyi? (Gadé pòtwé-a osi.)

¹⁵ Bon, annou konsidiwé yon èspéyans ki ka moutwé yonn an sé bennéfis-la nou ka twapé lè nou ni lafwa, èk lè nou obéyi sé diwèksyon-an nou ka wisouvwè-a. Péyi Peru sé on plas koté an chay moun ka palé langaj Èspannyòl, mé la osi ni an chay moun ki ka palé sé langaj-la yo lévé ka palé an konmin yo, tèl kon langaj Quechua. Konsa, pou plizyè lanné, sé fwè èk sè-a té ja abitwé ka gadé pou moun ki ka palé langaj Quechua an tèwitwa-a. Mé, gouvèdman-an mété lwa nèf an plas, èk akòz di sa, sé fwè èk sè-a té ni pou fè chanjman an mannyè-a yo té ka gadé pou moun ki ka palé langaj sala an tèwitwa-a. (Ronm 13:1) Ében, adan sé fwè èk sè-a té ka katjilé, si yo swiv sé diwèksyon nèf-la, pitèt sa té kay fè’y pli difisil pou yo jwenn moun ki ka palé langaj-la. Mé, yo obéyi sé diwèksyon-an, èk Jéhova benni yo an chay. I édé yo pou jwenn plizyè moun ki ka palé langaj-la.

¹⁶ Yonn an sé fwè-a ki té ka kwè awanjman nèf-la pitèt té kay jennen twavay-la, sé on fwè yo ka kwiyé Kevin. Fwè sala ka wann sèvis kon yon ansyen adan on kongwigasyon ki ka palé langaj Quechua. Èk i di: “Lè mwen tann sé diwèksyon nèf-la, mwen di an lidé mwen, mé ki mannyè nou kay sa jwenn sé moun-lan ki ka palé langaj Quechua?” Kanmenm, fwè-a di: “Mwen katjilé asou sa Bib-la ka di an Pwovèb 3:5, èk mwen katjilé asou ègzanp Moziz. Paskè lè’y té ka djidé pèp Bondyé pou tiwé yo an péyi Éjip, Jéhova té ba’y diwèksyon ki té ka gadé on ti mannyè dwòl. Jéhova té di’y pou mennen sé moun-lan bò Lanmè Wouj-la. Lè yo wivé la, i té sanm jan Izwayèl pa té ni pyès koté yo té sa kouwi pou yo chapé anba lanmen sé Éjipsyen-an ki té ka kouwi dèyè yo-a. Mé, Moziz obéyi sé diwèksyon-an i té wisouvwè-a, èk Jéhova benni’y adan on mannyè ki té èstòdinè.” (Ègz. 14:1, 2, 9-11, 21, 22) Konsa, fwè Kevin désidé pou obéyi sé diwèksyon nèf-la, èk i di: “Mwen té étonnen pou wè mannyè Jéhova benni nou. Avan nou twapé diwèksyon nèf-la, mizi maché nou té ka maché an tèwitwa-a, èk sé délè kon sa nou té ka jwenn yonn ében dé moun ki ka palé langaj Quechua. Mé atjwèlman, nou ka alé pwéché an sé tèwitwa-a ki ni an chay moun ki ka palé langaj-la. Èk akòz di sa, nou ka palé épi pli moun, èk nou ka kondwi pli létid Bib. Osi, la ni pli moun ki ka atandé mitin nou apwézan.” Wi, lè nou ni lafwa, èk nou ka obéyi sé diwèksyon-an nou ka wisouvwè-a, Jéhova ka toujou benni nou.

17. Kisa’w apwann an atik sala?

¹⁷ An atik sala nou diskité mannyè nou sa fè disizyon ki ka plè Jéhova an twa (3) sitiwasyon ki byen enpòtan. Mé, lavéwité-a sé sa, nou ni pou fè disizyon ki ka plè Jéhova an tout sa nou ka fè. Jis an bagay tèl kon, sa nou ka chwazi pou anmizman, mannyè nou ka sèvi tan nou, disizyon nou ka fè lè’y vini pou endikasyon, èk mannyè nou ka lévé ich nou. Èk nou pa ka fè disizyon ki bazé sèlman asou sa nou sa wè. Pito sa, nou ka katjilé asou wilasyon nou épi Jéhova. Konsa, lè nou ka fè disizyon, nou ka obéyi konsèy Bib, menm si i pa toujou ézé pou fè sa. Osi, nou ni konfyans ki, Jéhova kay otjipé nou. Èvèk si nou kontiné fè bon disizyon ki ka plè Bondyé, nou kay sa ‘maché an non Dyé nou Jéhova, pou tout tan.’​—Mayk. 4:5.