Lanmen Jéhova Pa Janmen Twò Kout

1. Ki mannyè Moziz moutwé i té ka konfyé Jéhova lè’y té ka djidé nasyon Izwayèl hòd péyi Éjip?

LIV HIBROU ka mansyonnen non plizyè moun ki té ni lafwa an Jéhova. Yonn an sé moun sala sété Moziz, èk i té ni an chay lafwa. (Hib. 3:2-5; 11:23-25) Pou ègzanp, lè’y té ni pou fè jan Izwayèl kité péyi Éjip, i pa té kité wa péyi-a ében lawmé’y doubout li. Osi i té mété tout konfyans li an Jéhova lè’y té djidé pèp Izwayèl hòd Lanmè Wouj-la èk pli ta an savann sèk-la. (Hib. 11:27-29) Bon, plizyè an sé jan Izwayèl-la té koumansé pèd konfyans yo ki, Jéhova té kay otjipé yo. Mé Moziz kontiné konfyé Jéhova. Èk i pa té dézapwenté, paski Jéhova potjiwé manjé èk glo pou yo té sa kontiné viv an savann sèk-la.​—Ègz. 15:22-25; Sam 78:23-25.

2. Pouki Bondyé mandé Moziz: ‘Ès lanmen Jéhova twò kout?’ (Limowo 11:21-23)

² Bon. Magwé Moziz té ni an chay lafwa, apipwé yon lanné apwé Jéhova délivwé jan Izwayèl hòd péyi Éjip, Moziz koumansé katjilé, si Jéhova té kay vwéman ba yo vyann. Chonjé, la té ni sis san mil (600, 000) nonm apa di fanm èk manmay, èk yo té adan savann sèk-la. Alò Moziz koumansé katjilé, ki mannyè Jéhova sa potjiwé asé vyann bay tout sé moun sala. Konsa Jéhova mandé Moziz: ‘Ès lanmen Jéhova twò kout?’ (Li Limowo 11:21-23.) Bon, èspwèsyon-an ‘lanmen Jéhova’ vlé di lisentèspwi’y, èben pouvwa-a i ka sèvi pou akonpli divwa’y. Konsa, Jéhova té ka di Moziz: ‘Mwen ni asé pouvwa pou mwen fè sa mwen di mwen kay fè.’

3. Pouki i enpòtan pou nou katjilé asou èspéyans Moziz èk sé jan Izwayèl-la?

³ Bon, pitèt ou ha èspéyansé tèt cho paski ou pa asiwé Jéhova kay potjiwé sa ou èk fanmi’w bizwen. Alò annou konsidiwé poutji Moziz èk sé jan Izwayèl-la pa té ni konfyans ki, Jéhova té sa potjiwé sa yo té bizwen. Èk nou kay osi gadé déotwa lévanjil ki kay fòtifyé konfyans nou ki, Jéhova kay toujou wédé nou.

APWANN HÒD ÈSPÉYANS MOZIZ ÈK SÉ JAN IZWAYÈL-LA

4. Pouki nasyon Izwayèl té koumansé pèd konfyans-lan ki, Jéhova té sa potjiwé ba yo?

⁴ Bon. Pouki nasyon Izwayèl té koumansé pèd konfyans-lan ki, Jéhova té sa potjiwé sa yo té bizwen? Ében nasyon Izwayèl épi sé lézòt moun-lan ki té kité péyi Éjip épi yo, té an savann sèk-la pou an lonng tan avan yo té wivé Tè Pwonmèt-la. (Ègz. 12:38; Dito. 8:15) Kanmenm, sé moun-lan ki té kité Éjip ansanm épi nasyon Izwayèl té las manjé manna, èk adan sé pèp Izwayèl-la té ka santi menm kon yo. (Lim. 11:4-6) Konsa yo tout koumansé bougonnen ba Moziz, èk yo té ka toujou palé konsèné manjé-a yo té ka enjwi an Éjip. Èvèk a kòz di sa, Moziz santi i té ni pou twapé vyann ba yo. Mé i pa té sav ki koté pou twapé vyann-lan.​—Lim. 11:13, 14.

5-6. (a) Kisa nou sa apwann hòd mannyè sé moun-lan ki pa té jan Izwayèl té enflouwansé sé jan Izwayèl-la? (b) Ki mannyè sa ki té wivé jan Izwayèl sa wivé nou?

⁵ Sé moun-lan ki pa té jan Izwayèl pa té ka apwésyé sa Jéhova té ka ba yo, èk adan sé jan Izwayèl-la koumansé katjilé menm kon yo. Èk wi, menm bagay-la sa wivé nou. Paski lè moun oliwon nou pa ka moutwé apwésiyasyon, sa pé annékòz nou pou doubout moutwé apwésiyasyon pou sa Jéhova ka ban nou. Pou ègzanp, si nou koumansé mantjé sa nou té ni an tan pasé, èben si nou koumansé jalou sa lézòt moun ni, nou sa pèd apwésiyasyon nou tou. Mé si nou satisfè épi népòt sa nou ni, nou kay ni pli djèwté.

⁶ Bon. Nasyon Izwayèl té sipozé katjilé asou sa Jéhova té pwonmèt yo. Wi, Jéhova té di yo i té kay ba yo otan pli pasé yo té bizwen lè yo wivé an Tè Pwonmèt-la, mé pa an savann sèk-la. Èk an menm mannyè-a, nou vlé toujou chonjé ki, Jéhova pwonmèt pou ban nou otan pli pasé nou bizwen an latè nèf-la, mé pa an vyé sistèm sala. Osi, i kay bon pou mèdité asou vèwsé an Bib-la ki kay édé nou pou ni pli konfyans an Jéhova.

7. Pouki nou sa asiwé Jéhova kay toujou édé nou?

⁷ Bon. Pitèt ou ka katjilé pouki Jéhova té mandé Moziz: ‘Ès lanmen Jéhova twò kout?’ Èben Jéhova mandé Moziz kèstyon sala paski i té vlé Moziz katjilé asou sé dé bagay sala: ‘Pwèmyéman, sé li ki ni tout pouvwa. Èk dézyenman, i ni abilité-a pou sèvi pouvwa’y népòt plas i vlé.’ Alò, magwé nasyon Izwayèl té an savann sèk-la, Jéhova té sa potjiwé asé vyann ba yo. Wi, lè Jéhova lonjé bwa’y, èk an lanmen fò, i moutwé a klè i té sa édé pèp li népòt plas yo té yé. (Sam 136:11, 12) Konsa lè nou anba sitiwasyon ki difisil, nou sa ni asiwans-lan ki, Jéhova kay édé chak di nou népòt koté nou yé.​—Sam 138:6, 7.

8. Kisa ki kay anpéché nou fè menm kon sé jan Izwayèl-la? (Gadé pòtwé-a osi.)

⁸ Bon. Jéhova tjenn pwonmèt li èk i bay sé moun-lan an chay vyann. Kanmenm, sé jan Izwayèl-la pa té wimèsyé Bondyé pou miwak sala. Okontwè, yo moutwé vowasité, èk yo té vlé anmasé pli jibyé pasé yo té bizwen. Anfen, pou yon jou é dimi yo té ka anmasé jibyé. Èk Jéhova té byen faché paski yo té ‘moutwé vowasité’, konsa i pini yo. (Lim. 11:31-34) Bon. Si nou pa vlé swiv mové ègzanp sala, nou ni pou pwan bon pwokosyon pou pa vlé plis pasé nou bizwen. Wi, ki nou wich ki nou pòv, nou ni pou “mété wichès [nou] an syèl”. Èk pou fè sa, nou ni pou kontiné fòtifyé wilasyon nou épi Jéhova èk Jézi, pou nou sa vini pli pwé yo. (Maf. 6:19, 20; Louk 16:9) Wi lè nou fè sa, Jéhova kay potjiwé sa nou bizwen.

9. Lè’y vini pou sipò Jéhova, ki asiwans nou sa ni?  

⁹ Bon. Jéhova toujou pawé pou édé pèp li jòdi jou. Mé, sa pa vlé di nou kay toujou ni asé lajan ében manjé.a Kanmenm, nou sa asiwé Jéhova kay toujou la pou sipòté nou. Wi, i kay ban nou fòs-la nou bizwen an népòt sitiwasyon nou adan. Bon. Ki mannyè nou sa moutwé nou ni konfyans Jéhova kay sipòté nou? Ében annou gadé dé (2) sitiwasyon: ‘(1) Lè nou bizwen lajan èben nou ka chaché twavay pou pwan ka fanmi nou. Èk (2), lè nou ni tèt cho paski nou pa sav ki mannyè nou kay otjipé kò nou lè nou an laj.’

LÈ NOU PA NI ASÉ LAJAN ÈBEN NOU KA CHACHÉ POU TWAVAY

10. Ki difikilté nou pé èspéyansé lè’y vini pou lajan?

¹⁰ Kon bout sistenm sala ka vansé pli pwé, bagay kay vini pli mové. Pitèt pou lapéti chanjman an gouvèdman, ladjè, dézas, èk maladi, nou pé pèd twavay nou, pozèsyon nou, ében nou pé ni pou kité kay nou. Konsa, i kay pli difisil pou nou potjiwé sa nou èk fanmi nou bizwen. Bon. A lè sala, kisa ki kay édé nou fè bon disizyon ki ka moutwé nou asiwé, lanmen Jéhova pa twò kout? 

11. Kisa ou sa fè lè ou pa ni asé lajan? (Louk 12:29-31)

¹¹ Bon. Lè nou ni tèt cho konsèné lajan, i byen enpòtan pou nou palé bay Jéhova konsèné sé pwòblenm nou-an. Èk sa sa édé’w an chay. (Pwov. 16:3) Wi, mandé’y pou ba’w lasajès pou’w sa fè bon disizyon, pou’w sa wèsté kam, èk pou’w pa ni tèt cho. (Li Louk 12:29-31.) Osi, toujou mandé Jéhova pou édé’w satisfè épi sa ou ni. (1 Tim. 6:7, 8) Èk ou sa fè wichach an sé piblikasyon nou-an pou twapé bèl sijèsyon konsèné sa ou sa fè lè ou pa ni asé lajan. Anfen plizyè moun ha di, yo twapé an chay bennéfis hòd sé vidiyo-a èk sé atik-la asou jw.org, ki ka diskité pwòblenm lajan.

12. Ki kèstyon an moun sa mandé kò’y pou’y sa fè pli mèyè disizyon-an pou fanmi’y?

¹² Bon. Adan moun ha aksèpté twavay ki annékòz yo pou kité fanmi yo dèyè. Mé pli ta yo wéyalizé, sa pa té an bon disizyon. Konsa avan an moun aksèpté an twavay, i ni pou pwan tan pou katjilé asou si twavay sala kay édé’y èvèk fanmi’y wèsté pwé Jéhova. (Louk 14:28) Konsa mi twa kwèsyon ou sa mandé kò’w: ‘(1) Si mwen aksèpté twavay sala, ki mannyè sa kay afèkté madanm mwen, èben mawi mwen? (2) Ès mwen kay sa atandé sé mitin-lan, alé an sèvis-la, èk pasé tan épi sé fwè èk sè-a? Èk (3), ès mwen kay sa édé ich mwen pou vansé pli pwé Jéhova èk pou obéyi’y?’ (Èfés. 6:4) Wi, lè nou ni pou fè an disizyon, i enpòtan pou swiv konsèy Jéhova, pito nou swiv konsèy lòt moun ki pa ka swiv pwensip Bib.b Tony sé an fwè ki ka viv an Écha. Yo té ofè’y plizyè twavay adan an lòt péyi, ki té kay péyé’y an chay lajan. Kanmenm apwé i pwédyé bay Jéhova, èk i palé épi madanm li, i pa aksèpté sé twavay-la. Pito sa, i katjilé asou mannyè yo té sa fè chanjman an lavi yo pou yo té sa viv asou mwens lajan. Tony di: “Paski nou fè disizyon sala, mwen té sa édé plizyè moun vin konnèt Jéhova. Èk manmay nou enmen Jéhova toubonnman. Wi, fanmi nou apwann ki, dépi nou konfyé sa Jézi di an Mafyou 6:33, Jéhova kay potjiwé sa nou bizwen.”

LÈ NOU NI TÈT CHO KONSÈNÉ KI MANNYÈ NOU KAY TWAPÉ SA NOU BIZWEN LÈ NOU AN LAJ

13. Kisa nou sa fè apwézan pou nou sa ni sa nou bizwen lè nou an laj?

¹³ Nou sa osi moutwé ki otan nou ka konfyé Jéhova, an mannyè-a nou ka pwépawé pou sa nou kay bizwen lè nou vini an laj. Bon, Bib-la ka ankouwajé nou pou twavay wèd pou nou sa ni sa nou bizwen pli ta an lavi. (Pwov. 6:6-11) Konsa, si’y posib, i kay bon pou sové an ti lajan pou pli ta. Sé vwé, Ékléziyastis 7:12 di, ‘lajan sé an pwotèksyon’, mé kanmenm, nou pa janmen vlé fè lajan bagay-la ki pli enpòtan an lavi nou.

14. Ki mannyè Hibrou 13:5 sa édé nou pou pa twakasé kò nou twòp?

¹⁴ Bon. Jézi bay an bèl pawabòl ki ka moutwé, yon moun ki ka sové lajan, mé ki pa ni pyès konfyans an Bondyé kouyon. (Louk 12:16-21) Chonjé, pyèsonn pa sav sa ki kay fèt denmen. (Pwov. 23:4, 5; Jémz 4:13-15) Mé Jézi di, si nou vlé vini disip li, nou sipozé pawé pou pèdi tout sa nou ni pou swiv li. (Louk 14:33) Pou ègzanp sé kwityen-an an Joudiya té pèdi tout sa yo té ni, mé yo té ni djèwté. (Hib. 10:34) Èk jòdi jou, an chay fwè èk sè ha pèd twavay yo èben pozèsyon yo, paski yo pa ka vot èben sipòté pyès pati politik. (Wév. 13:16, 17) Konsa, kisa ki ka édé yo pou fè sa? Ében yo ka mété tout konfyans yo an pwonmèt Jéhova lè i di: “Mwen pa kay janmen kité zòt, mwen pa kay janmen tounen do mwen alè zòt.” (Li Hibrou 13:5.) Konsa, magwé nou ka fè tout sa nou pé pou pwépawé sa nou kay bizwen lè nou vini an laj, nou ni tout konfyans-lan ki, Jéhova kay potjiwé sa nou bizwen si antouka an bagay nou pa ka èspéwé fèt.

15. Kisa pawan ki ka konfyé Jéhova ka fè? (Gadé pòtwé-a osi.)

¹⁵ Bon. Adan sèten péyi, pli gwo wézon-an moun vlé fè ich sé pou ich yo otjipé yo lè yo vini an laj. Mé Bib-la ka di, sé pawan ki ni wèskonsabilité-a pou otjipé ich yo. (2 Kòr. 12:14) Sé vwé, lè pawan vini an laj, yo bizwen ich yo pou édé yo épi lajan èben lòt bagay. Èk an chay manmay byen kontan pou fè sa. (1 Tim. 5:4) Kanmenm, pawan ki ka konfyé Jéhova ni asiwans-lan ki, lè yo lévé ich yo pou vini sèvant Jéhova, yo kay ni pli djèwté, pito yo lévé ich yo pou annèk fè lajan pou otjipé yo lè yo vini an laj.​—3 Jan 4.

16. Ki mannyè pawan sa édé ich yo pou potjiwé ba kò yo lè yo vini gwan? (Èfésòs 4:28)

¹⁶ Bon. Pawan, lè’w ka édé ich ou apwann mannyè pou potjiwé ba kò yo, sèvi ègzanp ou pou moutwé yo mannyè pou konfyé Jéhova. Anfen dépi yo tou piti enstwi yo pou wè ki, twavay wèd sé an bon bagay. (Pwov. 29:21; li Èfésòs 4:28.) Osi kon yo ka pwofité, édé yo pou fè pli mèyè yo an lékòl. Èk ou sa osi fè wichach pou twapé pwensip Bib, èvèk apwé édé ich ou pou swiv sé pwensip sala lè yo ka fè disizyon konsèné ki kalité endikasyon yo kay chwazi. Anfen sa kay édé ich ou pou sipòté kò yo èk osi pou ni asé tan pou pwéché ében jis piyonnè.

17. Ki konfyans nou sa ni?

¹⁷ Sèvant fidèl Jéhova sa ni konfyans-lan ki, Jéhova ni abilité-a èk dézi-a pou potjiwé sa yo bizwen. Konsa, kon nou ka vini pli pwé bout sistèm sala, nou kay ni pou konfyé Jéhova pli. Kanmenm toujou chonjé, népòt sa ki fèt, Jéhova kay potjiwé sa nou bizwen. Wi, nou sa ni konfyans-lan ki, Jéhova kay toujou sèvi pouvwa’y pou édé nou népòt plas nou yé.