A young man observes people walking into a Kingdom Hall

KWÈSYON JENN MOUN KA MANDÉ

Pouki I Bon Pou Atandé Sé Mitin-lan?

Témwen Jéhova ka vini ansanm pou adowé Bondyé dé (2) fwa chak simenn, an plas yo ka kwiyé Lasal Wéyòm ében Kingdonm Hòl. Ès ou janmen mandé kò’w, kisa ki ka pwan kou an sé mitin sala? Èk ki bennéfis mwen sa twapé si mwen atandé sé mitin sala?

Kisa ki ka pwan kou an sé mitin-lan?

Lasal Wéyòm-lan sé an plas ou kay apwann bagay an Bib-la ou sa sèvi an lavi’w touléjou. Sé mitin-lan kay édé’w:

apwann lavéwité-a konsèné Bondyé.
apwann wézon-an latè-a tèt anba.
vini an pli mèyè moun.
twapé bon jan.

Ès ou té sav? Wézon-an nou ka kwiyé sé plas-la nou ka tjenn sé mitin nou-an Lasal Wéyòm, sé paski nou ka toujou diskité Wéyòm Bondyé an sé mitin nou-an.—Mafyou 6:9, 10; 24:14; Louk 4:43.

Ki bennéfis ou kay twapé lè’w atandé sé mitin-lan?

Lè’w atandé sé mitin-lan, sa ou apwann kay édé’w. Sé pwensip Bib-la nou ka diskité an sé mitin-lan kay édé’w ‘twapé lasajès’. (Pwovèb 4:5) Sa vlé di Bib-la sa édé’w fè bon disizyon an lavi’w. Èk déIè la ni kwèsyon ou pé katjilé asou èk Bib-la sa édé’w twapé sé wépons-lan. Pou ègzanp, kwèsyon tèl kon:

Èk osi, mi yonn dé sijé nou ka diskité an mitin-lan an bout simenn-lan:

Ki Lè Nou Kay Vwéman Santi Sòv Èvèk Enjwi Lapé Ki Wéyal?
Koté Nou Sa Twapé Èd Lè Nou Ka Èspéyansé Difikilté?
Kisa Wéyòm Bondyé Ka Fè Ban Nou Apwézan?

“An jan lékòl mwen atandé yonn an sé mitin-lan. I asid èk fanmi mwen, épi nou ba’y piblikasyon nou pou édé’y swiv mitin-lan. Apwé sa, i di mwen i vwéman apwésyé sé wimak-la sé moun-lan an mitin-lan té bay. I osi di mwen an légliz yo, yo pa ni piblikasyon pou étidyé Bib-la kon nou.”—Brenda.

Ès ou té sav? Ou pa ni pou péyé pou atandé sé mitin-lan, èk nou pa ka anmasé latjèt.

Lè’w atandé sé mitin-lan asosiyason-an épi sé fwè èk sè-a kay ankouwajé’w. Lè ou pasé tan épi moun ki vwéman enmen Bondyé, èk vwéman enmen pwochen yo, sa ka fè’w santi bon. Konsa, Bib-la ka ankouwajé Kwityen pou asanblé ansanm pou yo sa “ankouwajé yonn a lòt”. (Hibrou 10:24, 25)

“Délè apwé an lonng jounen an lékòl, mwen ka santi las. Mé lè mwen atandé mitin, sé fwè èk sè-a ka toujou fè mwen santi pli mèyè. Èk apwé mitin, mwen ka santi si tèlman kontan èk pawé pou an lòt jou an lékòl.”—Elisa.

Ès ou té sav? La ni pli pasé yon san ven mil (120,000) kongwigasyon Témwen Jéhova oliwon latè-a, èk yo ka asanblé ansanm an pli pasé swasant mil (60,000) diféwan plas. Chak lanné nou ka bati apipwé yon mil senk san (1,500) Lasal Wéyòm paski pli èk pli moun ka atandé sé mitin nou-an.a

Sa kopawans ou ka di

“Lè mwen té an gwan lékòl, an jan lékòl mwen atandé déotwa mitin épi mwen. Épi i té kontan pou wè ni moun ki jenn ni moun ki an laj ka étidyé Bib-la ansanm. Osi lè mwen koumansé twavay, bòs mwen atandé yonn an sé mitin-lan, èk i té byen kontan pou wè mannyè nou té ka sèvi Bib-la souvan an mitin-lan. Lè mwen wè mannyè i té apwésyé mitin-lan, sa fè mwen apwésyé sé mitin-lan pli!”—Jessica.

“Mwen twouvé lè mwen alé mitin mwen ka santi kam èk mwen pa ka katjilé asou sé pwoblenm mwen-an. An sé mitin-lan nou ka apwann an chay bagay. Bagay tèl kon, mannyè pou ni an bon lavi èk mannyè pou vini pli mèyè moun. Lè mwen kité mitin mwen ka toujou santi bon.”—Timothy.

“Mwen té envité an nonm pou atandé an mitin. Èk apwé mitin-lan i di mwen: ‘Mwen té atandé mitin sala annèk pou twapé pwèv ki, sa zòt ka kwè adan sé pa lavéwité-a. Mé mwen wéyalizé sé sa mwen ka kwè adan ki pa lavéwité-a!’ Osi i té kontan pou wè mannyè Témwen Jéhova té ka palé épi tout moun. I di: ‘Magwé yo té jwenn mwen pou pwèmyé fwa-a, yo twété mwen konmsi yo té toujou konnèt mwen!’”—Jacob.

“Délè mwen ka di: ‘Dépi mitin fini, mwen kay pati.’ Mé diwan mitin-lan, katjil sala ka dispawèt. Èk apwé mitin, n’a palé épi moun, èk ou sav mwen pa ka menm chonjé pouki mwen té vlé pati kon mitin fini. Si mwen pa té ka atandé mitin, mwen pa té kay ni tout sé bon jan-an mwen ni apwézan.”—Madison.

a Pou twouvé an plas koté nou ka tjenn sé mitin nou-an, chwazi “Ki Moun Nou Yé” apwé sa, chwazi “Mitin” èk anba “Mitin Kongwigasyon di Témwen Jéhova” chwazi “Twouvé On Plas Ki Pwé’w”.