LISON 56
Fè Éfò Pou Tjenn Lilyon An Kongwigasyon-an
Lè nou anpami sé fè èk sè-a nou ka santi menm mannyè-a Wa David té ka santi. I té di: ‘Pa dé bon i bon èk bèl lè fwè ka viv ansanm an lilyon!ʼ (Sam 133:1) Mé lilyon-an nou ni-an pa ka fèt djòs kon sa. Chak di nou ni pou twavay pou tjenn lilyon an kongwigasyon-an.
1. Kisa ki byen spésyal anpami pèp Bondyé?
Si ou atandé an mitin adan an lòt péyi pitèt ou pa kay konpwann langaj-la. Mé la ni plizyè diféwan bagay ki byen spésyal anpami pèp Bondyé ki kay fèʼw santi konfòtab. Kisa yo yé? Èben, Témwen Jéhova oliwon latè-a ka sèvi sé menm piblikasyon-an pou étidyé Bib-la. Osi, yo ka fè éfò pou moutwé lanmityé pou yonn a lòt. Èvèk népòt koté nou ka wèsté asou latè-a, nou ‘tout [ka] kwiyé asou non Jéhova, èk sèviʼy ansanm an lilyon.ʼ—Zèfannaya 3:9.
2. Kisa ou sa fè pou tjenn lilyon an kongwigasyon-an?
Lèʼy vini pou mannyè nou sa tjenn lilyon an kongwigasyon-an, Bib-la ka di nou: “Toujou ni lanmityé . . . pou yonn a lòt épi tout tjè zòt.” (1 Pita 1:22) Ki mannyè ou sa swiv konsèy sala? Pito ou fiksé asou défo sé fwè èk sè-a, fiksé asou sé bèl kawaktè-a yo ni-an. Osi, pito ou pasé tan sèlman épi fwè èk sè ki menm laj épiʼw èben ki kontan menm bagay épiʼw, fè éfò pou konnèt tout sé fwè èk sè-a. Apa di sa, ou ni pou twavay wèd pou tiwé tout hayisans ou pé ni pou moun ki pa ni gwo endikasyon èben ki sòti adan an diféwan was èben ki ni an diféwan kilti.—Li 1 Pita 2:17.a
3. Kisa ou kay fè si ou ni an ti pwoblenm épi an moun an kongwigasyon-an?
Nou ni lilyon, mé nou pa pawfé. Konsa, délè nou pé fè èben di an bagay ki blésé tjè yon moun. Sé pou wézon sala, pawòl Bondyé ka di nou pou “pawdonnen . . . yonn a lòt,” èk osi i di nou: “Pawdonnen yonn a lòt menm kon Senyè-a pawdonnen zòt-la.” (Li Kòlòsé 3:13.) Katjilé asou sa: Ki mizi fwa nou ka fè èben di bagay ki ka blésé tjè Jéhova mé i ka pawdonnen nou? Konsa, i vlé nou pawdonnen yonn a lòt. Si ou wéyalizé ou di èben fè an bagay ki blésé tjè an moun, fè tout sa ou pé pou fè lapé épi moun-lan.—Li Mafyou 5:23, 24.b
ANNOU APWANN PLI
Apwézan, annou gadé diféwan bagay ou sa fè pou tjenn lilyon èk lapé an kongwigasyon-an.
Kisa ou kay fè pou fè lapé?
4. Ganyen a bout népòt hayisans ou pé ni
Nou vlé enmen tout sé fwè èk sè nou-an. Mé, délè pitèt nou pé twapé i difisil pou aji épi an moun ki ni an diféwan kilti èben ki sòti adan an diféwan was. Kisa ki sa édé nou? Annou li Twavay 10:34, 35, èk apwé nou kay kozé asou sé kwèsyon sala:
Jéhova enmen moun ki sòti an tout nasyon èk i ka aksèpté népòt moun ki ka adowéʼy. Ki mannyè ou sa imité Jéhova an mannyè-a ou ka aji épi moun ki ni an diféwan kilti èben ki sòti adan an diféwan was?
An ki vyé mannyè moun an konmin ou ka twété moun ki ni an diféwan kilti èben ki sòti adan an diféwan was? Ès ou kwè ou sipozé twété yo menm mannyè-a moun an konmin ou ka twété yo?
Annou li 2 Kòrint 6:11-13, èk apwé nou kay kozé asou kwèsyon sala:
Kisa ou sa fè pou enmen tout sé fwè èk sè-a pli an pli?
5. Pawdonnen lézòt épi tout tjèʼw èvèk fè lapé
Jéhova ka pawdonnen nou épi tout tjèʼy menm si i pa kay janmen bizwen nou pou pawdonnenʼy. Annou li Sam 86:5, èk apwé nou kay kozé asou sé kwèsyon sala:
Kisa ou apwann an lévanjil sala konsèné mannyè-a Jéhova ka pawdonnen?
Pouki ou kontan Jéhova ka pawdonnen nou?
Ki diféwan bagay ki pé fèʼy difisil pou nou viv an lapé épi yonn a lòt?
Ki mannyè nou sa imité Jéhova èk wèsté an lilyon épi sé fwè èk sè nou-an? Annou li Pwovèb 19:11, èk apwé nou kay kozé asou kwèsyon sala:
Lè an moun di èben fè an bagay ki distwéʼw èben ofwanséʼw, kisa ou sa fè pou wanjé sitiwasyon-an?
Délè nou ka ofwansé lézòt. Lè sa fèt, kisa nou sipozé fè? Annou gadé VIDIYO-A, Jéhova Ka Benni Nou Lè Nou Fè Lapé èk apwé nou kay kozé asou sé kwèsyon sala:
An vidiyo-a, kisa sè-a té fè pou fè lapé?
6. Gadé pou sé bèl kawaktè-a sé fwè èk sè nou-an ni
Kon nou ka vini pli pwé sé fwè èk sè nou-an, nou ka vini konnèt bèl kawaktè yo. Mé osi, nou ka vini konnèt défo yo. Kisa nou sa fè pou fiksé asou bèl kawaktè yo pito nou fiksé asou défo yo? Annou gadé VIDIYO-A, Vini Pli Bèl! èk apwé nou kay kozé asou kwèsyon sala:
Kisa ki sa édéʼw fiksé asou bèl kawaktè sé fwè èk sè-a?
Jéhova ka fiksé asou bèl kawaktè nou. Annou li pwèmyé pa-a an 2 Kwonnikèl 16:9, èk apwé nou kay kozé asou kwèsyon sala:
Ki mannyè ou ka santi pou konnèt Jéhova ka fiksé asou bèl kawaktèʼw?
Jis an bèl dyanman ki ka ni défo, mé sa pa vlé di i pa valowab. An menm mannyè-a, sé fwè èk sè nou-an pa pawfé, mé yo ni an chay valè an zyé Jéhova
ADAN MOUN KA DI: “Mwen kay pawdonnenʼy, mé mwen pa kay janmen obliyé saʼy té fè mwen.”
Pouki nou sipozé pawdonnen lézòt épi tout tjè nou?
CHONJÉ SÉ PWEN SALA
Lèʼw pawdonnen lézòt èk ou moutwé lanmityé pou tout sé fwè èk sè-a, ou ka édé pou tjenn lilyon an kongwigasyon-an.
Annou Wivizé Sa Nou Ja Apwann
Ki mannyè ou sa ganyen a bout népòt hayisans ou pé ni?
Kisa ou sa fè si ou ni an ti pwoblenm épi an moun an kongwigasyon-an?
Pouki ou vlé imité ègzanp Jéhova èk pawdonnen lézòt?
LÒT ENFÒMASYON OU SA GADÉ
Apwann mannyè yon ilistwasyon Jézi té bay sa édé nou pou pa jijé lézòt.
Ès nou ni pou mandé padon si nou ka santi nou pa té fè anyen mal?
“Mandé Padon, Sa Sé Yon Bagay Ki Enpòtan Pou Fè Lapé” (Gad-la, li 1 Novanm, 2002)
Gadé mannyè adan moun apwann pou pa moutwé pwéféwans.
Si ou ni an ti pwoblenm épi yon moun an kongwigasyon-an, apwann mannyè ou sa wanjéʼy avan sa afèkté lilyon-an an kongwigasyon-an.
“Moutwé Lanmityé Kon Ou Ka Éséyé Pou Fè Lapé” (Gad-la, Mé 2016)