ATIK LIMOWO 8
CHANSON 130 Pawdonnen Lézòt
Ki Mannyè Nou Sa Pawdonnen Menm Kon Jéhova?
“Pawdonnen yonn a lòt menm kon Bondyé pawdonnen nou.”—ÈFÉSÒS 4:32.
SA ATIK-LA KA FIKSÉ ASOU
Atik sala kay diskité déotwa bagay nou sa fè pou nou sa pawdonnen yon moun ki ofwansé nou.
1-2. (a) An ki sitiwasyon nou pitèt ka twapé’y difisil pou pawdonnen an moun? (b) Ki mannyè Denise té moutwé pawdonnasyon?
ÈS DÉLÈ i difisil pou’w pawdonnen lézòt? Wi, délè adan di nou ka twapé’y difisil pou pawdonnen lézòt, èspwèsman lè moun-lan di èben fè an bagay ki ka blésé tjè nou. Kanmenm, la ni déotwa bagay nou sa fè ki kay édé nou pou pawdonnen moun ki ofwansé nou menm si i wèd. Pou ègzanp, annou konsidiwé èspéyans sésé Denise.a An lanné dé mil disèt (2017), Denise èk fanmi’y té vizité Pwensipal Òfis Témwen Jéhova. Padan yo té ka witounen kay yo, an chofè konyen motoka yo. Bon. Lè Denise lévé hòd aksidan-an, i apwann ki, sé ich li-a té blésé mové, èk Brian, mawi’y, mò. Denise di, “sa kasé tjè mwen èk mwen pa té sav sa pou fè.” Pli ta, Denise apwann ki, aksidan-an pa té fòt chofè-a, paski i pa té sou, i pa té asou dwòg, èk i pa té asou pòtab li. Konsa, Denise pwédyé bay Jéhova pou ba’y lapé, pou’y pa wèsté faché épi nonm-lan ki tjwé mawi’y.
2 Kanmenm nonm-lan té ni pou alé lodyans èk si yo té twapé’y koupab, yo té sa mété’y an pwizon. Mé sa té kay dépan asou sa Denise di an lodyans-lan. Denise di: “Paski mwen té ni pou palé konsèné pli mové bagay-la ki ha fèt an lavi mwen, sa sété konmsi an moun té ka vidé sèl adan an bobo mwen té ni ki p’òkò té djéwi.” Déotwa simenn apwé, Denise alé lodyans, èk tann sa; Denise mandé jij-la pou moutwé nonm-lan mizéwikòd.b Èk lè Denise fini palé, jij-la koumansé pléwé. Jij-la di: “Mwen sé an jij pou vennsenk (25) lanné, èk sa sé pwèmyé fwa-a mwen ka tann fanmi yon moun plédé pou moutwé moun-lan ki fè yo ditò mizéwikòd. M’òkò janmen wè Ianmityé èk pawdonnasyon kon sa.”
3. Kisa ki édé Denise pou pawdonnen nonm-lan?
3 Bon. Kisa ki édé Denise pou pawdonnen nonm-lan? Ében i katjilé asou mannyè Jéhova ka pawdonnen. (Mayk. 7:18) Wi, lè nou apwésyé mannyè Jéhova ha pawdonnen nou, sa ka édé nou pou pawdonnen lézòt.
4. An ling épi Èfésòs 4:32, kisa Jéhova vlé nou fè?
4 Bon. Jéhova vlé nou pawdonnen lézòt menm kon i ha pawdonnen nou. (Li Èfésòs 4:32.) Wi, Jéhova vlé nou toujou pawé pou pawdonnen moun ki fè nou ditò. (Sam 86:5; Louk 17:4) Konsa, an atik sala nou kay diskité twa (3) bagay nou sa fè ki kay édé nou pou pawdonnen lézòt.
ÉSÉYÉ KOPWANN MANNYÈ OU KA SANTI
5. Silon Pwovèb 12:18, ki mannyè nou pé santi lè an moun ofwansé nou?
5 Bon. Lè an moun ofwansé nou, sitou si moun-lan sé an bon jan, ében fanmi nou, sa sa kasé tjè nou. (Sam 55:12-14) Ében nou pé jis santi, sé konmsi an moun sèvi an kouto pou pitjé nou. (Li Pwovèb 12:18.) Délè nou pé fè konmsidi sa moun-lan fè-a pa ka afèkté nou. Mé si nou fè sa, sa pa kay édé nou djéwi. Anfen, sa té kay akonmsi an moun pitjé nou épi an kouto, èk nou ka kité kouto-a menm koté-a moun-lan pitjé nou-an.
6. Kisa ki pé fèt lè an moun ofwansé nou?
6 Bon. Lè an moun ofwansé nou, nou pé vini faché. Anfen, Bib-la ka di sa ézé pou fèt. Kanmenm, Bib-la ka osi vèti nou pou pa wèsté faché. (Sam 4:4; Èfés. 4:26) Èvèk sa sé paski, si nou wèsté faché, i kay byen ézé pou fè sa ki pa bon. (Jémz 1:20) Alò sé vwé, i ézé pou vini faché lè an moun ofwansé nou, mé lè nou wèsté faché sa sé an chwa nou menm ka fè.
I ézé pou vini faché lè an moun ofwansé nou, mé lè nou wèsté faché sa sé an chwa nou menm ka fè
7. Ki lòt mannyè nou pé santi lè on moun pa twété nou byen?
7 Bon. Apa di fè nou santi faché, lè an moun pa twété nou byen i pé afèkté nou adan lòt mannyè. Pou ègzanp, tann sa Ann, yon sésé di: “Lè mwen té an ti manmay, papa mwen kité manman mwen èk i mayé madanm-lan yo té ka péyé pou otjipé mwen. Mwen té santi papa mwen tounen do’y asou mwen. Èk lè i épi madanm-lan té ni ich, mwen santi ich yo wiplasé mwen, èvèk mwen lévé ka santi papa mwen pa té vlé mwen. Osi nou ni ègzanp an lòt sésé, non’y sé Georgette. I ka di nou mannyè i té ka santi lè’y apwann ki, mawi’y fè adiltè. I di: “Dépi nou té ti manmay nou té bon jan, nou té piyonnè ansanm! Alò, sa kasé tjè mwen.” Èk apwé an tan Georgette èk mawi’y dévosé. Èk nou ni ègzanp an lòt sésé, non’y sé Naomi. I di: “Mawi mwen konfèsé i té ka gadé pònografi. Mé, m’a té janmen kwè i té kay fè an bagay kon sa. Èvèk mwen santi i kwennen mwen èk i twayi mwen. Sa blésé tjè mwen.”
8. (a) Pouki nou sipozé pawdonnen lézòt? (b) Ki bennéfis nou ka twapé lè nou pawdonnen lézòt? (Osi, gadé enfòmasyon-an anba sijé-a: “Kisa Ou Sa Fè Si Sa Moun-lan Fè Èben Di Vwéman Soukwé’w?”)
8 Bon. Sé vwé, nou pa sa kontwolé sa lézòt ka fè èben di, mé nou sa kontwolé sa nou kay fè. Èk byen souvan, i pli mèyè pou pawdonnen moun-lan. Mé pouki? Ében sa sé paski Jéhova vlé nou pawdonnen, èk nou enmen Jéhova. An plis di sa, si nou wèsté faché épi moun-lan èk nou pa pawdonnen’y, nou pé fè an bagay ki kouyon èk nou pé jis donmajé santé nou. (Pwov. 14:17, 29, 30) Tann sa yon sésé di, non’y sé Christine. I di: “Lè moun ofwansé mwen èk mwen faché, m’a ka souwi, èk mwen pa ka manjé byen. Osi, sa ka anpéché mwen dòmi byen, èk sa ka afèkté mannyè mwen ka twété mawi mwen èk lézòt moun.”
9. Pouki nou pa vlé wèsté faché?
9 Menm si moun-lan ki ofwansé nou-an pa janmen di nou padon, sa pa oblijé fè nou pèd lapé nou. Pouki nou ka di sa? Èben Georgette nou té palé konsèné an pawagwaf sèt (7) di: “I té pwan mwen tan, mé mwen ladjé waj-la mwen té ni pou mawi mwen. Èk a kòz di sa, mwen té sa ni lapé an lidé mwen èk tjè mwen.” Wi, lè nou pa wèsté faché, sa kay anpéché tjè nou vini wèd èk nou kay kontiné twété moun byen. Èk osi, nou kay sa enjwi lavi nou an lapé ankò. (Pwov. 11:17) Mé kisa ou sa fè si apwé ou kopwann mannyè ou ka santi, ou wéyalizé ou pa pawé pou pawdonnen moun-lan?
MANNYÈ NOU SA DOUBOUT SANTI FACHÉ ÉBEN OFWANSÉ
10. Lè an moun ofwansé nou, pouki nou ni pou ba kò nou tan pou nou sa doubout santi faché? (Gadé sé pòtwé-a osi.)
10 Bon, ki mannyè nou sa doubout santi faché lè an moun ofwansé nou? Èben, nou ni pou ba kò nou asé tan pou nou sa djéwi. Pou ègzanp, lè an moun blésé, èk i wisivwè twètman médikal, i bizwen tan pou djéwi. Èk an menm mannyè-a, lè an moun ofwansé nou, nou pé bizwen tan pou nou djéwi èk doubout santi faché, avan nou sa vwéman pawdonnen moun-lan.—Éklé. 3:3; 1 Pita 1:22.
Menm kon an moun ki blésé bizwen tan pou’y sa djéwi, nou bizwen tan pou nou djéwi èk doubout santi faché lè an moun ofwansé nou. (Gadé pawagwaf 10)
11. Ki mannyè lapwiyè sa édé’w pou pawdonnen?
11 Bon. Annou konsidiwé ègzanp Ann nou té mansyonnen an pawagwaf sèt (7). Sa kay édé nou wè mannyè lapwiyè sa édé nou pou pawdonnen. Ann, di: “Mwen mandé Jéhova pou pawdonnen chak di nou an fanmi-an pou bagay nou té fè èk di ki pa té bon. Èk apwé sa, mwen ékwi papa mwen èk madanm li an lèt, èk mwen di yo mwen pawdonnen yo.” Bon, sa pa té ézé pou Ann fè, mé tann sa i di: “Paski mwen fè éfò-a pou swiv ègzanp Jéhova an mannyè-a i ka pawdonnen, mwen ni èspwa ki, sa kay pousé papa mwen èk madanm li pou apwann pli konsèné Jéhova.” Wi, lè nou mandé Jéhova pou édé nou pou pawdonnen, i sa ban nou fòs-la nou bizwen pou nou fè sa.c
12. Pouki nou sipozé konfyé Jéhova, pito santiman nou? (Pwovèb 3:5, 6)
12 Bon, i enpòtan pou nou konfyé Jéhova pito santiman nou. (Li Pwovèb 3:5, 6.) Wi Jéhova toujou konnèt sa ki pli mèyè pou nou. (Izay. 55:8, 9) Èk i pa kay janmen mandé nou pou fè an bagay ki pa kay bon pou nou. Alò lè Jéhova enkouwajé nou pou pawdonnen, nou sa ni konfyans-lan ki, lè nou fè sa, i kay an bennéfis nou. (Sam 40:4; Izay. 48:17, 18) Kanmenm, si nou dépan asou santiman nou, nou pa kay janmen pawdonnen moun-lan. (Pwov. 14:12; Jér. 17:9) Naomi, nou té mansyonnen an pawagwaf sèt (7) di: “An koumansman-an, mwen té kwè mwen pa té ni pou pawdonnen mawi mwen. Paski mwen té pè i té kay blésé mwen ankò, ében i té kay obliyé tout penn-lan i té annékòz mwen. Èk mwen di kò mwen, Jéhova ka kopwann mannyè mwen ka santi. Kanmenm mwen wéyalizé ki, menm si Jéhova ka kopwann santiman mwen, sa pa vlé di i ka dakò épi’y.” Wi Jéhova sav, i kay pwan tan pou mwen djéwi, mé i osi vlé mwen pawdonnen.d
GADÉ POU BONTÉ-A AN MOUN-LAN
13. Silon Ronm 12:18-21, kisa nou ni pou fè?
13 Bon, lè nou pawdonnen yon moun ki blésé nou, nou pa sèlman vlé doubout palé konsèné sa ki té fèt. Non, nou osi vlé fè lapé, èspwèsman si moun-lan sé an fwè ében an sè. (Maf. 5:23, 24) Mé pou nou fè sa, nou ni pou doubout wèsté faché kont moun-lan èk moutwé’y mizéwikòd èk pawdonnen’y. Alò, kisa ki sa édé nou pou fè sa? (Li Ronm 12:18-21; 1 Pita 3:9)
14. Kisa nou sipozé éséyé pou fè, èk pouki?
14 Bon, Jéhova ka gadé pou bon kawaktè an moun. Alò, nou vlé swiv ègzanp li èk gadé pou sé bon kawaktè-a an moun-lan ki ofwansé nou-an. (2 Kw. 16:9; Sam 130:3) Anfen lè nou fè sa, i kay pli ézé pou nou pawdonnen moun-lan. Pou ègzanp, yon fwè yo ka kwiyé Jarrod di: “I pli ézé pou mwen pawdonnen yon fwè lè mwen fè éfò-a pou fiksé asou tout sé bèl kawaktè fwè-a, pito mwen fiksé asou lèwè’y.”
15. Pouki i bon pou di moun-lan ki ofwansé’w-lan ou pawdonnen’y?
15 Bon. An lòt bagay ou sa fè sé pou di moun-lan ki ofwansé’w-lan ou pawdonnen’y. Mé pouki? Ében annou konsidiwé èspéyans Naomi nou té palé konsèné an pawagwaf sèt (7). I di: “Mawi mwen mandé mwen, ‘Ès ou ha pawdonnen mwen?’ Mé lè mwen ouvè bouch mwen pou di, ‘Wi, mwen ha pawdonnen’w,’ sé konmsi an bagay té pwi an gòj mwen. Èk mwen wéyalizé mwen pa té vwéman pawdonnen’y. Kanmenm apwé tjèk tan, mwen té sa di’y, ‘Wi, mwen pawdonnen’w.’ Èk lè mwen pawdonnen mawi mwen sa fè’y pléwé. Èk mwen té si tèlman sipwi pou wè ki otan lapé nou toulédé té ni. Apwézan mwen ka konfyé’y èk nou sé bon jan ankò.”
16. Kisa ou ha apwann konsèné pawdonnasyon?
16 Jéhova vlé nou pawdonnen moun ki ofwansé nou. (Kòl. 3:13) Kanmenm, délè i wèd pou nou fè sa. Mé nou sa pawdonnen moun si nou éséyé kopwann mannyè nou ka santi, èk si nou fè éfò-a pou doubout wèsté faché épi moun-lan. Èk sa kay édé nou pou gadé pou bonté-a an moun-lan.—Gadé bwèt-la, “Twa Bagay Nou Sa Fè Ki Sa Édé Nou Pou Pawdonnen Moun Ki Ofwansé Nou.”
KATJILÉ ASOU SÉ BENNÉFIS-LA NOU KAY TWAPÉ LÈ NOU PAWDONNEN MOUN
17. Ki bennéfis nou ka twapé lè nou pawdonnen moun?
17 Bon. La ni an chay bennéfis nou ka èspéyansé lè nou pawdonnen moun. Annou konsidiwé twa. (1) Nou ka swiv ègzanp Papa nou Jéhova, èk nou ka ba’y tjè kontan. (Louk 6:36) (2) Lè nou pawdonnen moun, nou ka moutwé ki otan nou ka apwésyé pawdonnasyon Jéhova. (Maf. 6:12) Èk (3), nou ka ni bon santé èk nou kay sa tjenn bon jan.
18-19. Kisa ki sa fèt lè nou pawdonnen moun?
18 Lè nou pawdonnen lézòt nou sa èspéyansé bennédiksyon nou pa té ka èspéwé. Pou ègzanp, ann’ pwan ègzanp Denise nou té mansyonnen an pawagwaf yonn èk dé. Magwé i pa té sav, chofè-a ki fè aksidan-an té désidé pou tjwé kò’y apwé kés-la. Kanmenm pawdonnasyon Denise touché’y si tèlman, i koumansé étidyé Bib-la épi Témwen Jéhova.
19 Sé vwé, délè i byen wèd pou pawdonnen yon moun. Mé lè nou pawdonnen moun-lan nou ka jwenn an chay bennédiksyon. (Maf. 5:7) Alò, annou fè tout sa nou pé pou pawdonnen moun menm kon Jéhova.
CHANSON 125 “Pa Dé Bon I Bon Pou Moun Ki Ni Konpasyon!”
a Nou chanjé adan sé non-an.
b Adan an sitiwasyon kon sa, chak Kwityen kay ni pou désidé pou kò’y, sa’y kay fè.
c Gadé sé vidiyo-a pou sé chanson sala asou jw.org, “Forgive One Another,” “Forgive Freely,” èk “Friends Again.”
d Lè an moun mayé ka gadé ponògrafi, sa sé an péché kisa vwéman blésé moun-lan i mayé épi-a, kanmenm Bib-la pa ka ba moun-lan ki inosan-an dwa-a pou dévosé.