Ilaydja Wésisité Gason On Vèv 

Diwan tan-an lapli pa té ka tonbé an Izwayèl, Jéhova di Ilaydja: ‘Alé an vil Zarapat, èk on vèv ki ka wèsté la kay ba’w manjé.’ Konsa Ilaydja alé. Lé’y wivé bò bayè vil-la, i wè on madanm ka anmasé bwa. Madanm-lan sété on vèv, èk i té maléwé. Ilaydja mandé madanm sala pou ba’y tak dlo pou’y bwè. Mé kon madanm-lan té ka alé pwan dlo-a, Ilaydja di’y: ‘Lè’w ka vini épi dlo-a, mennen an mòso pen ban mwen souplé.’ Madanm-lan di’y: ‘M’a ka manti pou di’w, mwen pa ni pen. Sèl sa mwen ni sé ti tak fawin fwans, épi tizing lwil pou mwen fè on bagay pou mwen épi gason mwen manjé.’ Ilaydja di madanm-lan: ‘Jéhova pwomèt, si’w fè on ti pen ban mwen, fawin fwans-lan èk lwil-la ou ni-an pa kay janmen fini, jistan lapli koumansé tonbé an plas-la ankò.’

Konsa vèv-la alé fè pen-an bay pwofèt Ilaydja. Èvèk diwan tout tan-an lapli pa té ka tonbé-a, madanm sala épi gason’y té toujou ni manjé pou yo manjé. Jè fawin fwans-lan èk jè lwil-la té toujou plen, menm kon Jéhova té pwonmèt.

Mé apwé sa, gason madanm-lan tonbé malad èk tibway-la mò. Vèv-la plédé épi Ilaydja pou édé’y. Konsa Ilaydja pwan tibway-la an bwa manman’y, i mété’y kouché adan on cham ki té asou dézyenm étay kay-la, èk i pwédyé. I di: ‘Jéhova tanpwi souplé, fè tibway sala viwé vivan.’ Bon, si Jéhova té wésisité tibway-la, sa té kay on bagay ki té byen èstòdinè. Mé ès ou konnèt pouki? Ében, silon sa nou konnèt, la pa té ni pyèsonn ki té ja wésisité avan sa. Anplis di sa, vèv-la épi gason’y pa té jan Izwayèl.

Apwé Ilaydja pwédyé, tibway-la koumansé pwan lèspiwasyon. Ilaydja di vèv-la: ‘Gadé sa, gason’w vivan.’ Wi, Jéhova wésisité tibway-la. Èk sé pa dé kontan madanm-lan té kontan. I di Ilaydja: ‘Apwézan mwen asiwé, ou sé pwofèt Bondyé pou vwé. Èk pawòl Jéhova ki ka sòti an bouch ou, sé lavéwité.’