Wèsté Jan Bondyé Pou Tout Tan!

I ka pwan éfò pou fè an jan; I ka pwan éfò pou tjenn an jan. Éfò’w pou vini jan Bondyé èvèk wèsté jan’y kay ni gwan bennédiksyon. Jézi di moun ki ka kwè an li: “Lavéwité-a kay libéwé’w.” (Jan 8:32) Ki sa sa vlé di?

Ou sa enjwi libèté apwézan. Ou sa twapé libéwé anba enstwit ki fo èvèk mansonj Satan ja simen. Ou sa jwenn libéwé anba lavi san èspwa ki milyon di moun ki pa konnèt Jehovah ka èspéyansé. (Ronm 8:22) Jan Bondyé ka jis twapé libéwé anba “lapèwèz di lanmò.”—Hibrou 2:14, 15.

Ou sa enjwi libèté an latè nèf Bondyé-a. Mi an libèté ki èstòdinè ou kay sa enjwi an tan pwochen-an! An pawadi-a asou latè, la kay ni libèté anba ladjè, maladi, èvèk kwim. Libèté anba pòvté èvèk lafen. Libèté anba vyéyès èvèk lanmò. Libèté anba pèwèz, moun ki ka manstipé, èvèk pasdwa. Konsèné Bondyé Bib-la di: “Ou ka ouvè lanmen’w èvèk ou ka satisfè dézi tout bagay ki vivan.”—Sam 145:16.

Jan Bondyé kay viv pou tout tan. Lavi étonnèl sé an kado ki pwésyé Bondyé kay bay pou tout sa ki chaché pou vini jan’y. (Ronm 6:23) Annèk katjilé ki sa lavi san bout kay vlé di pou ou!

Ou kay ni tan pou fè an chay bagay. Pitèt ou kay kontan pou apwann jwé mizik. Ében pitèt ou kay vlé apwann mannyè pou pentiwé pòtwé ében fè an chapantyé. Pitèt ou kay kontan pou apwann konsèné zannimo ében diféwan pyé bwa. Ében pitèt ou kay vlé voyajé an diféwan péyi èvèk wè diféwan moun. Lavi étonnèl kay fè tout sé bagay sala posib!

Ou kay ni tan pou fè an chay jan. Lavi pou tout tan kay fè’y posib pou ou sa vini konnèt an chay lòt moun ki ja vini jan Bondyé. Ou kay vini konnèt talan yo èvèk bon kawaktè yo, èvèk yo kay vini jan’w osi. Ou kay ni lanmityé pou yo èvèk yo kay ni lanmityé pou ou osi. (1 Kòrint 13:8) Lavi san bout kay ba ou tan pou’w sa fè jan épi tout moun asou latè! Pli mèyè toujou, wilasyon’w épi Jehovah kay vini pli fò kon sé lanné-a ka pasé. Annou wèsté jan Bondyé pou tout tan!