Katjilé Dwèt Lè Sitiwasyon Lévé Ki Sa Mété Fidèlitéʼw Anba Tès

1. Kisa i vlé di pou “katjilé dwèt”? (2 Timòfi 4:5)

LÈ on bagay fèt an kongwigasyon-an ki twakasé nou, fidèlité nou pou Jéhova èk ògannizasyonʼy sa vini anba tès. Ki mannyè nou sa ganyen a bout sé tès sala? Mi sé sa nou ni pou fè: katjilé dwèt, véyé byen èk doubout fò an lafwa-a. (Li 2 Timòfi 4:5.) Mé kisa i vlé di lè lévanjil-la di nou pou “katjilé dwèt”? Èben sa vlé di, nou ni pou wèsté dous, byen gadé sitiwasyon-an, katjilé asou sa ki enpòtan, èk éséyé pou wè bagay mannyè-a Jéhova ka wèʼy. Konsa, lè nou fè sa, imosyon nou pa kay kontwolé katjil nou.

2. Kisa nou kay diskité an atik sala?

² An dènyé atik-la, nou té diskité twa (3) sitiwasyon Satan ka sèvi pou éséyé kasé konfyans nou. Mé kon nou kay wè, la ni lòt sitiwasyon ki pé lévé adan kongwigasyon-an menm, ki sa mété fidèlité nou anba tès. An atik sala, nou kay diskité twa (3) adan sé sitiwasyon sala, ki sa mété fidèlité nou pou Jéhova anba tès. Pwèmyé-a sé, lè nou santi on fwè èben on sè maltwété nou. Dézyenm-lan sé, lè nou wisouvwé kowijman. Èk twazyenm-lan sé, lè nou santi i wèd pou aksèpté chanjman an ògannizasyon-an. Koumannyè nou kay sa katjilé dwèt èk wèsté fidèl pou Jéhova èk ògannizasyonʼy lè nou èspéyansé tès kon sa?

LÈ NOU SANTI ON FWÈ ÈBEN ON SÈ MALTWÉTÉ NOU

3. Si nou santi on fwè èben on sè té maltwété nou, kisa nou pa vlé fè?

³ Ès ou janmen santi on fwè èben on sè, èben pitèt jis on moun ki ni wèskonsabilité an kongwigasyon-an té maltwétéʼw? Pitèt moun sala pa té ni atansyon pou maltwétéʼw èben fèʼw ditò. (Ronm 3:23; Jémz 3:2) Mé sa dout, aksyonʼy afèktéʼw. Épi pitèt sitiwasyon sala ka annékòz ou pou pèd sonmèy ou. Épi pitèt ou koumansé ka katjilé: ‘Si moun sala sa aji an mannyè sala, ès ou vwéman kwè sa sé ògannizasyon Bondyé?ʼ Nou sav, sa sé ègzaktiman sa Satan vlé! (2 Kòr. 2:11) I vlé plen tèt nou épi katjil négatif; paski i sav sé katjil négatif sala, sa fè nou doubout sèvi Jéhova, èk kité ògannizasyonʼy. Konsa, si nou santi on fwè èben on sè maltwété nou, koumannyè nou sa katjilé dwèt, èk pa katjilé mannyè-a Satan vlé nou katjilé-a?

4. Kisa Jozèf té fè lè sé fwèʼy-la té maltwétéʼy? Èk ki lison nou sa apwann hòd ègzanp li? (Jennésis 50:19-21)

⁴ Pa vini faché épi Jéhova. Lè Jozèf té a jenn gason, sé fwèʼy-la pa té twétéʼy byen pyès. Anfen, yo té hayiʼy. Èk adan di yo, té jik pawé pou tjwéʼy. (Jen. 37:4, 18-22) Mé yo pa té tjwèʼy. Pito, yo vann li kon yon èslav. Kon wézilta, Jozèf té pasé an chay pas pou twèz (13) lanné. Sa vwéman sété an chay tan èk sa pa té ézé pou Jozèf pyès! Jozèf té sa katjilé: ‘Ès ou kwè Jéhova vwéman enmen mwen? Ès ou kwè i abandonnen mwen lè mwen byen bouzwenʼy?ʼ Mé Jozèf pa té lévé faché kont Jéhova èk i pa té tounen doʼy asouʼy. Mé pito sa, i wété kam èk dous. I té ka toujou katjilé dwèt. Pou ègzanp, i té ni òpòtyounité-a pou pwan wivanj asou sé fwèʼy-la. Mé i pa fè sa. Okontwè, i moutwé yo lanmityé èk i pawdonnen yo. (Jen. 45:4, 5) Jozèf té sa fè sa paski i té byen gadé sitiwasyon-an. Èk i té vlé fè sa Jéhova té vlé ý fè pito i fiksé asou sa yo té fèʼy. (Li Jennésis 50:19-21.) Ki lison nou sa apwann hòd Jozèf? Si moun maltwété nou, pa vini faché kont Jéhova èk pa janmen kwè i abandonnen nou. Mé sé pou nou toujou mèdité asou mannyè Jéhova ka édé nou anba tout twaka nou. Épi sé pou nou éséyé moutwé yo lanmityé èk pawdonnen yo.​—1 Pita 4:8.

5. Kisa Miqueas fè ki édéʼy lè i santi sé fwè-a té maltwétéʼy? Èk kisa ki lison-an pou nou?

⁵ Konsidiwé ègzanp on ansyen ki sòti péyi Soud Lanméwik. Nonʼy sé Miqueas.b I di i chonjé lèʼy té santi ki détwa fwè ki ni wèskonsabilité an ògannizasyon Jéhova, té maltwétéʼy toubonnman. Miqueas di: “Mʼa janmen èspéyansé tèt cho kon sa. Mwen té ni tjè antjèt. Mʼa té sa dòmi lé swè. Glo sòti an zyé mwen, paski mwen té ka santi akonmsi mʼa té sa fè anyen.” Mé kanmenm, Miqueas twavay wèd pou kontwolé imosyonʼy. Èk i kontiné katjilé dwèt. I té ka pwédyé souvan, èk i té ka mandé Bondyé pou baʼy lisentèspwiʼy pouʼy sa kontiné tjébé fò. I osi té ka gadé enfòmasyon an sé piblikasyon nou-an pou édéʼy. Kisa nou kay di ki lison-an? Si ou santi on fwè ében on sè maltwétéʼw, wété dous èk éséyé pou kontwolé népòt santiman négatif ou pé ni. Chonjé, ou pé pa konnèt sitiwasyon-an ki fè moun-lan palé èben aji épiʼw an mannyè-a yo té fè-a. Konsa éséyé pou palé bay Jéhova an lapwiyè. Èk mandéʼy pouʼy édéʼw wè bagay mannyè lòt moun-lan ka wèʼy. Lèʼw fè sa, sa ka édéʼw wè ki fwè-a èben sè-a pa té ni antansyon pou fèʼw anyen ki mové. Èk sa kay édéʼw padonnen yo. (Pwov. 19:11) Chonjé, Jéhova konnèt sitiwasyonʼw, èk i kay baʼw fòs-la ou bizwen-an pou tjenbé fò.​—2 Kw. 16:9; Éklé. 5:8.

LÈ NOU WISOUVWÈ KOWIJMAN

6. (a) Silon Hibrou 12:5, 6, 11, pou ki wézon Bondyé ka kowijé nou? (b) Pouki nou pa vlé fiksé asou mannyè-a kowijman ka fè nou santi?

⁶ Kowijman pa toujou dou. Èk lè nou wisouvwè kowijman, sa sa fè nou lapenn. Mé si nou fiksé asou mannyè nou ka santi tousèl, nou pé kwè kowijman-an pa té jis, èk i pa pou nou. Ében nou pé santi kowijman-an té twò wèd. Mé si nou katjilé kon sa, sa pé anpéché nou konpwann kéchòy ki byen enpòtan. Èk sa sé, Jéhova ka kowijé nou paski i enmen nou. (Li Hibrou 12:5, 6, 11.) Alò nou pa vlé fiksé asou mannyè kowijman-an ka fè nou santi, paski sa ka ba Satan on chans pou ataké nou. I vlé détwi konfyans nou èk lafwa nou an Jéhova èk ògannizasyonʼy. Èk i vlé nou widjèkté kowijman-an èk wèsté lwen kongwigasyon-an. Èk pli mové pasé sa, i vlé nou doubout sèvi Jéhova. Si ou twapé kowijman, ki mannyè ou sa kontiné katjilé dwèt?

7. (a) Kon nou ka wè an pòtwé-a, apwé Pita té aksèpté kowijman, ki mannyè Jéhova té sèviʼy? (b) Kisa nou sa apwann an ègzanp Pita?

⁷ Aksèpté kowijman, épi fè népòt chanjman ki nésésè. Plis pasé yon fwa, Jézi kowijé Pita douvan sé lézòt zapòt-la. (Mak 8:33; Louk 22:31-34) Sa pitèt té fè Pita santi kòʼy byen hont! Kanmenm, sa pa té anpéché Pita wèsté fidèl pou Jézi. I aksèpté kowijman-an èk i apwann hòd lèwèʼy. Épi ou sav kisa? Jéhova pa té obliyé fidèlité Pita. Èk nou sav sa, paski I kontiné bay Pita lòt wèskonsabilité ki té byen enpòtan an kongwigasyon-an. (Jan 21:15-17; Twav. 10:24-33; 1 Pita 1:1) Kisa nou sa apwann an ègzanp Pita? Lè nou jwenn kowijman, nou ni pou aksèptéʼy menm si i ka fè nou hont. Épi osi, nou ni pou éséyé fè tout chanjman ki nésésè. Paski lè nou fè sa, nou menm kay twapé bennéfis, èk lézòt moun kay twapé bennéfis osi. Épi a lè sa-a, Jéhova kay sa sèvi nou pli an kongwigasyon-an.

8-9. Apwé fwè Bernardo té wésouvwé kowijman, ki mannyè i té ka santi? Èk kisa ki édéʼy chanjé atitid li?

⁸ Annou konsidiwé sa ki wivé Bernardo, on fwè ki ka wété Mozambique. Bernardo té ka wann sèvis kon ansyen. Mé i pèd pwivilaj sala. Ki mannyè i santi lè yo tiwéʼy kon on ansyen? Mi sé sa I di: “Mwen té faché. Mwen pa té kontan kowijman-an mwen té wisouvwè-a. . . Èk mwen konsèné épi mannyè -a sé fwè èk sè-a té kay gadé mwen. . . Mwen sa diʼw, i pwan mwen détwa mwa pou wè, kowijman-an té dwèt, épi pou mwen konfyé Jéhova épi ògannizasyonʼy ankò.” Kisa ki édé Bernardo pou chanjé atitid li?

⁹ Mi sé sa i di: “Lè mwen té an ansyen, mwen té ka sèvi lévanjil-la an Hibrou 12:7 pou édé sé fwè èk sè-a wè wézon-an Jéhova ka kowijé yo. Konsa apwézan, mwen ka mandé kò mwen, ‘ki moun ki bizwen apliké lévanjil sala?ʼ Èben, nou tout kon sèvant Jéhova​—jik mwen menm ki ni pou aplikéʼy.” Konsa, Bernardo koumansé pwan démach pouʼy konfyé Jéhova épi ògannizasyonʼy ankò. Kisa i fè? I koumansé pasé pli tan ka li Bib-la, èk pli tan ka mèdité asou sa i té ka li-a. Magwé i pa té asiwé mannyè sé fwè èk sè-a té ka santi, i kontiné twavay épi yo an minis-la. Èk i kontiné patisipé an sé mitin-lan. Épi pli ta, fwè Bernardo té ni djwèté-a pou wann sèvis kon on ansyen ankò. Kon fwè Bernardo, si ou ja wésouvwé kowijman, pa gadé hontèz-la. Mé aksèpté kowijman-an èk fè népòt chanjman ki nésésè.c (Pwov. 8:33; 22:4) Si ou fè sa, ou kay ni asiwans-lan ki Jéhova kay benniʼw paski ou wèsté fidèl pou li èk ògannizasyonʼy.

LÈ NOU SANTI I WÈD POU AKSÈPTÉ CHANJMAN AN ÒGANNIZASYON-AN

10. Lè jan Izwayèl vini anba Lwa Moziz-la, ki mannyè sa mété fidèlité adan di yo anba tès?

¹⁰ Chanjman an ògannizasyon-an sa mété fidèlité nou anba tès. Si nou pa pwan pwokosyon, nou sa kité sé chanjman sala fè nou doubout sèvi Jéhova. Pou ègzanp, annou konsidiwé mannyè bagay chanjé pou jan Izwayèl, lè yo té vini anba Lwa Moziz-la. Avan Jéhova té ba yo lwa-a, an tèt fanmi té sa fè twavay pwèt-la. I té sa bati lotèl, èk fè sakwifis bay Jéhova pou kòʼy èk fanmiʼy. (Jen. 8:20, 21; 12:7; 26:25; 35:1, 6, 7; Jòb 1:5) Mé, lè lwa-a té établi, tèt fanmi pa té ni dwa-a pou fè sé bagay sala ankò; paski Jéhova té apwenté pwèt ki sòti an lafanmi Éronn pou fè sé bagay sala. Épi sé konsa bagay té ni pou kontiné. Si on tèt fanmi ki pa té on désandan Éronn té fè sa sé pwèt-la sipozé fè, i té sa jwenn lanmòʼy.d (Livi. 17:3-6, 8, 9) Mé mi on kèstyon nou sa katjilé asou: Ès sé chanjman sala sé yonn adan sé wézon-an pouki Kora, Défann, Abayranm, èk sé dé san senkant (250) chèf an lafanmi Izwayèl té wébèl kont lotowité Moziz èk Éronn? (Lim. 16:1-3) Èben, nou pa asiwé. Mé nou sav Kora épi sé lézòt nonm-lan ki té épiʼy-la, pa té wèsté fidèl pou Jéhova. Alò, si chanjman an ògannizasyon-an ka mété fidèlité nou anba tès, kisa ou kwè nou sa fè?

11. Ki lison nou sa apwann an ègzanp adan sé Kohafayt-la?

¹¹ Sipòté sé chanjman-an ògannizasyon-an ka fè épi tout tjè nou. Paditan jan Izwayèl té ka maché an savann syèk-la, adan sé Kohafayt-la té ni yon asaynman ki té byen spésyal. Yo té ni pwivilaj-la pou chayé bwèt agwéman-an èk maché douvan tout moun, chak kou Izwayèl té ni pou chanjé kanp yo. (Lim. 3:29, 31; 10:33; Jòch. 3:2-4) Sa té on bèl pwivilaj! Mé bagay pa té wété kon sa. Lè Jan Izawayèl antwé an Tè Pwonmèt-la, bwèt agwéman-an té yon sèl koté, yo pa té ni pou chayéʼy ankò. Kanmenm, diwan tan-an Sòlomonn té ka kondwi kon wa, adan sé Kohafayt-la té ni on asayman nèf. Adan té ni asayman-an pou chanté, adan té ni pou gad bayè-a, èk adan té ni pou pwan ka dépo-a. (1 Kw. 6:31-33; 26:1, 24) Menm si sé asayman nèf sala pa té ni djè valè an zyé lézòm kon lòt asayman yo, nou pa ka wè pyès koté ki di sé Kohafayt-la té ka bougonnen èben démandé on asayman ki ni plis valè. Ki lison nou sa apwann an ègzanp adan sé Kohafayt-la? Èben, nou ni pou sipòté tout sé chanjman-an ògannizasyon-an ka fè épi tout tjè nou; menm si sé chanjman sala pé afèkté asayman nou. Alò, éséyé pou twapé lajwa an népòt asayman ou wisouvwè. Èk toujou chonjé, sé pa asaymanʼw ki ka fèʼw pwésyé an zyé Jéhova. Non. Sa ki ka ban nou valè an zyé Jéhova sé obéyisans nou. Èk sa ni twòp pli valè pasé népòt asaynman!​—1 Sm 15:22.

12. Ki mannyè Zaina té santi lè yo chanjé asayman-an i té ka chéwi-a?

¹² Annou konsidiwé ègzanp on sésé; nonʼy sé Zaina. Zaina té ka wann sèvis an Bèfèl pou plis pasé venntwa (23) nanné. Épi i té ka chéwi asayman spésyal sala. Mé lè i wésouvwé on chanjman an asaynmanʼy pou wann sèvis an minis-la, i di: “Sa sipwi mwen an chay. Mwen té ka santi konmsi mʼa té ni pyès valè. Épi mwen té ka mandé kò mwen, ‘Kisa mon fè ki annékòz sa?ʼ” An plis di sa, adan sé fwè èk sè-a té ka bay pli lapenn, paski yo té ka diʼy: “Siʼw té bon asé, ou té kay an Bèfèl toujou!” Pou on tan, pawòl sala té ka bay Zaina an chay lapenn èk i té ka pléwé toulé swè. Mé i di: “Mʼa janmen kité sa mété pyès dout an lidé mwen lè i vini pou lanmityé Jéhova èk ògannizasyonʼy.” Konsa, kisa ki édé Zaina pou kontiné katjilé dwèt?

13. Ki mannyè Zaina ganyen a bout sé santiman négatif-la?

¹³ Ki mannyè Zaina ganyen a bout sé santiman négatif-la? I li sé piblikasyon nou-a ki té ka aji épi menm sitiwasyon-an i té ka èspéyansé-a. Èk sa édéʼy. Pou ègzanp, i twouvé yon atik ki té ka diskité mannyè moun-lan ki ékwi liv Mak, té ka lité épi sé menm santiman sala, lè i wésouvwé on chanjman an asaymanʼy. e Zaina di: “Lè mwen li konsèné ègzanp Mak, sa té ègzaktiman sa mwen té bizwen pou ganyen a bout dékouwajman mwen.” Zaina pa té santi lapenn pou kòʼy, konsa i pa té doubout asosiyé èk pwéché épi sé fwè èk sèʼy-la. Zaina wéyalizé ki sé lisentèspwi Jéhova ki ka djidé ògannizasyon-an, èk sé fwè èk sè-a vwéman mélé épiʼy. I osi wéyalizé, ògannizasyon Bondyé ni pou fè sa ki pli mèyè pou wè ki twavay Jéhova fèt.

14. (a) Ki chanjman ki té fèt ki té afèkté fwè Vlado? (b) Ki mannyè i té ka santi, mé kisa ki té édéʼy?

14 Annou konsidiwé èspéyans yon ansyen, nonʼy sé Vlado, ki té ni swasant twèz (73) lanné, ki sòti an péyi Slovenia. Mi on sitiwasyon ki té difisil pouʼy. Ògannizasyon-an té ni pou fè on chanjman koté ki dé (2) kongwigasyon té ni pou vini ansanm pou fòmé yon sèl kongwigasyon. Èk annékòz di sa, Sal di Wéyòm-lan i té ka atandé-a té ni pou fèmé. Mé i pa té kontan sa pyès. I di: “Mʼa té konpwann pouki on bèl Sal di Wéyòm kon sa té ni pou fèmé. Sa fè mwen lapenn paski i pa té djè lontan dépi nou té wanjé Sal Wéyòm-lan. Mwen sé on chapantyé èk mwen té édé bati adan sé mèb-la ki té an Sal Wéyòm sala. Osi, sé chanjman nèf sala pa té ézé pou pwoklanmatè kon nou ki té ja an laj.” Kisa ki édé fwè Vlado pou sipòté sé chanjman nèf sala? I di: “Mwen wéyalizé, lè nou sipòté sé chanjman-an ògannizasyon Jéhova ka fè, sa ka toujou mennen bennédiksyon. Épi sé ti chanjman sala ka pwépawé nou pou pli gwo chanjman an tan pwochen.” Ès i ka twakaséʼw an chay lè chanjman fèt pou dé (2) kongwigasyon vini ansanm ében lè ou wisouvwé on chanjman an asaymanʼw? Èben pa pèd tjè. Jéhova ka konpwann mannyè ou ka santi. Konsa, lè ou sipòté sé ti chanjman sala, menm si i pé difisil pouʼw, épi ou wèsté fidèl pou Jéhova épi ògannizasyonʼy, ou kay vwéman jwenn bennédiksyon!​—Sam 18:25.

SÉ POU OU TOUJOU KATJILÉ DWÈT

15. Lè bagay fèt an kongwigasyon-an ki ka twakasé nou, ki mannyè nou sa kontiné katjilé dwèt?

¹⁵ Kon nou ka vini pli pwé bout vyé sistenm sala, la kay ni bagay ki kay fèt an kongwigasyon-an ki kay twakasé nou. Sé bagay sala sa mété fidèlité nou pou Jéhova anba tès. Alò, sé pou nou toujou katjilé dwèt. Si nou santi on fwè èben on sè maltwété nou, pa vini faché épi Jéhova. Èben si ou wésouvwé kowijman, pa gadé hontèz-la, mé aksèpté kowijman-an èk fè népòt chanjman ki nésésè. Épi lè ògannizasyon Jéhova fè chanjman ki ka afèktéʼw pèwsonnèlman, aksèpté yo épi tout tjèʼw, èk obéyi sé diwèksyon-an.

16. Kisa ou sa fè pou tjenn konfyans on an Jéhova épi ògannizasyonʼy?

¹⁶ Ou sa tjenn konfyans on an Jéhova épi ògannizasyonʼy lè fidèlitéʼw anba tès. Mé pou fè sa, ou ni pou katjilé dwèt. Sa vlé di, ou ni pou wèsté dous, byen gadé sitiwasyon-an, katjilé asou sa ki enpòtan, èk éséyé pou wè bagay mannyè Jéhova ka wèʼy. Osi ou ni pou mèdité asou ègzanp sé moun-nan ki an Bib-la, ki té ni sitiwasyon menm kon sa ou, mé yo aji épiʼy épi yo té ni siksé. Osi ou bizwen pwédyé bay Jéhova pou èd. Épi on lòt bagay ankò, pa janmen doubout asosiyé épi sé fwè èk sè-a. Konsa, si nou fè sé bagay sala, népòt sa ki pé fèt, Satan pa kay sa fèʼw doubout sèvi Jéhova, èben fèʼw pèd konfyans an ògannizasyonʼy.​—Jémz 4:7.