SIJÉ POU LÉTID 17
Jéhova Kay Édéʼw Lèʼw Ka Èspéyansé Pwoblenm Ou Pa Té Ka Èspéwé
“Nonm-lan ki dwèt-la ka pasé an pil soufwans, mé Bondyé Senyè-a ka tiwéʼy an tout.”—SAM 34:19.
CHANSON 44 Siplikasyon On Moun Ki Dékouwajé
SA NOU KAY DISKITÉ AN ATIK SALAa
1. Ki asiwans nou ni?
NOU SÉ pèp Jéhova, konsa nou asiwé i enmen nou èk i vlé nou ni pli mèyè lavi-a ki posib. (Ronm 8:35-39) Osi, nou asiwé pwensip Bib ka toujou pòté nou bennéfis lè nou swiv yo an lavi nou. (Izay. 48:17, 18) Mé kisa nou sipozé fè lè nou ka èspéyansé pwoblenm nou pa té ka èspéwé?
2. Ki diféwan pwoblenm nou pé èspéyansé? Èk a kòz di sé pwoblenm sala, kisa nou pé katjilé?
2 Tout sèvant Jéhova ka èspéyansé pwoblenm. Pou ègzanp an moun an fanmi nou pé di ében fè an bagay ki dézapwenté nou. Nou pé ni mové pwoblenm santé ki ka anpéché nou fè tout sa nou vlé fè bay Jéhova. Nou pé soufè pou lapéti dézas natiwèl. Ében nou pé èspéyansé pèsikasyon. Lé nou ka èspéyansé pwoblenm kon sa, nou pé katjilé: ‘Pouki sé mwen sé bagay sala ka wivé? Ès mwen fè an bagay ki pa bon? Ès sa vlé di Jéhova tounen doʼy asou mwen?ʼ Ès ou janmen katjilé konsa? Èben pa kité sa dékouwajéʼy. An chay sèvant Jéhova té ni sé menm katjil sala.—Sam 22:1, 2; Hab. 1:2, 3.
3. Kisa nou sa apwann an Sam 34:19?
3 Li Sam 34:19. Sam sala ka di nou dé (2) bagay ki enpòtan. Yonn (1), moun ki dwèt ka èspéyansé pwoblenm, èk dé (2), Jéhova ka délivwé nou lè nou ka èspéyansé pwoblenm. Mé ki mannyè Jéhova ka délivwé nou? Yon mannyè i ka fè sa sé lèʼy édé nou konpwann mannyè lavi vwéman yé an vyé sistenm sala. Paski magwé Jéhova pwonmèt nou kay ni lajwa an sèvis li, i pa janmen di, nou pa kay èspéyansé pwoblenm an lavi nou apwézan. (Izay. 66:14) Pito sa, i ka ankouwajé nou pou fiksé asou tan ki ka vini. Sé a lè sala nou kay enjwi kalité lavi-a i vlé nou ni pou tout tan. (2 Kòr. 4:16-18) Èvèk paditan nou ka èspéwé bèl lavi sala, i ka édé nou pou nou kontiné sèviʼy chak jou.—Lama. 3:22-24.
4. Kisa nou kay diskité an atik sala?
4 Bon, annou diskité sa nou sa apwann an ègzanp moun ki té ka adowé Jéhova épi fidèlité, ni an tan pasé épi jòdi jou. Kon nou kay wè, nou pé èspéyansé pwoblenm nou pa té ka èspéwé. Mé lè nou apiyé asou Jéhova, i kay toujou édé nou. (Sam 55:22) Kon nou konsidiwé sé ègzanp sala, mandé kòʼw sé kwèstyon sala: ‘Si mwen té adan an sitiwasyon menm kon tèl moun, kisa mwen té kay fè? Ki mannyè sé ègzanp sala ka fòtifyé konfyans mwen an Jéhova? Èk, ki mannyè mwen sa sèvi sa mwen apwann an lavi mwen?ʼ
AN TAN PASÉ
Jéhova benni Jakòb diwan sé ven (20) lanné-a i té ka twavay wèd bay tontonʼy Lébann, an nonm ki pa té onnèt (Gadé pawagwaf 5)
5. Ki difikilté Jakòb té èspéyansé a kòz di Lébann? (Gadé pòtwé-a ki asou kouvèti-a.)
5 Sèvant Jéhova an tan pasé té èspéyansé pwoblenm yo pa té ka èspéwé. Annou konsidiwé ègzanp Jakòb. Papa Jakòb té koumandéʼy pou mayé épi fi Lébann, an fanmiʼy ki té ka adowé Jéhova. Èvèk papa Jakòb té bay asiwans-lan Jéhova té kay benniʼy an chay. (Jen. 28:1-4) Konsa Jakòb fè sa ki té dwèt. I kité péyi Kénann èk i alé lakay Lébann. Lébann té ni dé fi—Liya épi Rétjèl. Jakòb té enmen pli jenn fi-a, Rétjèl, èk i dakò pou twavay sèt (7) lanné bay Lébann avan i mayé Rétjèl. (Jen. 29:18) Mé bagay pa té fèt mannyè Jakòb té ka èspéwé. Lébann kwennenʼy èk i fèʼy mayé pli gwan fi-a, Liya. Yon simenn apwé sa, Lébann kité Jakòb mayé Rétjèl, mé Jakòb té ni pou twavay bay Lébann pou sèt (7) lanné ankò. (Jen. 29:25-27) An plis di sa, Lébann pa té onnèt épi Jakòb an mannyè-a i té ka fè biznis épiʼy. An tout, Lébann pwan lavantaj asou Jakòb pou ven (20) lanné.—Jen. 31:41, 42.
6. Ki lòt pwoblenm Jakòb té ni?
6 Jakòb té ni lòt pwoblenm asou sa. I té ni an gwan fanmi, èk sé gasonʼy-lan pa té ka toujou dakò épi yonn a lòt. Yo jis vann fwè yo Jozèf, kon yon èslav. Dé (2) gason Jakòb, Siméyon épi Livay, fè bagay ki mennen hontèz asou fanmi-an èk wipwòch asou non Jéhova. On lòt pwoblenm Jakòb té ni sé sa i pèd Rétjèl, madanm-lan i té pli enmen-an. Rétjèl mò lèʼy té ka akouché dézyenm gason yo. Èk akòz di an mové lafen, Jakòb té ni pou alé wèsté an péyi Éjip lèʼy té ja an laj.—Jen. 34:30; 35:16-19; 37:28; 45:9-11, 28.
7. Ki mannyè Jéhova té moutwé Jakòb i té ni favèʼy?
7 Magwé Jakòb èspéyansé tout sé pwoblenm sala, i pa janmen pèd lafwa an Jéhova èk an sé pwonmèt li-a. Èvèk Jéhova té moutwé Jakòb i té ni favèʼy. Pou ègzanp, magwé Lébann pa té onnèt épi Jakòb, Jéhova benni Jakòb épi an chay byen. Èk katjilé djèwté-a Jakòb té ni lèʼy jwenn épi Jozèf ankò—gasonʼy-lan i kwè ki té mò dépi lontan-an. Jakòb té ni an bon wilasyon épi Jéhova, èk sé sa ki édéʼy pou tjébé fò anba tout sé pwoblenm-lan i èspéyansé-a. (Jen. 30:43; 32:9, 10; 46:28-30) Konsa si kon Jakòb, nou tjenn wilasyon nou épi Jéhova fò, nou kay sa tjébé fò lè nou ka èspéyansé pwoblenm nou pa té ka èspéwé.
8. Ki sa Wa David té vlé fè bay Jéhova?
8 Wa David pa té sa fè tout sa i té vlé fè an sèvis Jéhova. Pou ègzanp i té vwéman vlé bati an tanp bay Jéhova, èvèk i di pwofèt Nafann sa. Pwofèt Nafann wéponn li: ‘Fè népòt sa ki an tjèʼw, paski Dyé vwé-a épiʼw.’ (1 Kw. 17:1, 2) Nou sa imajiné mannyè sé pawòl sala té ankouwajé David. Pitèt la menm, i koumansé fè plan pou gwo pwojé sala.
9. Kisa Wa David té fè lèʼy wisouvwè nouvèl i pa té ka èspéwé?
9 Touswit apwé sa, pwofèt Nafann viwé pou bay David nouvèl i pa té ka èspéwé. ‘Menm swè sala,ʼ Jéhova di Nafann sé pa David ki té kay bati tanp-lan. Pito, sé yonn sé gasonʼy-lan ki té kay batiʼy. (1 Kw. 17:3, 4, 11, 12) Kisa David fè lèʼy wisouvwè nouvèl sala? Ében pito i kité nouvèl-la dékouwajéʼy, i fiksé asou sa i té sa fè, èk i koumansé sanblé lajan-an èk matwiyo-a gasonʼy Sòlomonn té kay bizwen pou fè pwojé-a.—1 Kw. 29:1-5.
10. Ki agwéman Jéhova té fè épi David?
10 Apwé Jéhova di David sé pa li ki té kay bati tanp-lan, Jéhova fè on agwéman épiʼy la menm. I pwonmèt David, yonn an sé désandanʼy-lan té kay kondwi pou tout tan. (2 Sm 7:16) An latè nèf-la, imajiné kantité djèwté David kay ni lèʼy apwann Wa-a ki ka kondwi pou Mil (1000) Lanné-a sé Jézi, yon Wa ki sòti an lafanmiʼy. Wakont sala ka ankouwajé nou paski i ka moutwé nou, menm si nou pa sa fè tout sa nou vlé fè bay Jéhova, Dyé nou pé ba nou lòt bon bagay nou pa té ka èspéwé.
11. Magwé Wéyòm-lan pa té koumansé kondwi a lè-a yo té ka èspéwé, kisa sé Kwityen-an an pwèmyé syèk-la kontiné fè, èk kisa Jéhova fè ba yo? (Twav. 6:7)
11 Sé Kwityen-an an pwèmyé syèk-la té èspéyansé difikilté paski la té ni sèten bagay yo pa té konnèt. Pou ègzanp yo té anvi pou Wéyòm Bondyé koumansé kondwi, mé yo pa té konnèt ki tan sa té kay fèt. (Twav. 1:6, 7) Mé kisa yo fè? Ében yo kontiné fè tout sa yo té pé pou pwéché bon nouvèl Wéyòm-lan. Èk kon yo kontiné pwéché an yon plas apwé an lòt, yo té ka wè a klè mannyè Jéhova té ka benni éfò yo.—Li Twav. 6:7.
12. Kisa sé Kwityen-an an pwèmyé syèk-la té fè lè la té ni an gwo lafen?
12 An pwèmyé syèk-la, la té ni “an gwo lafen an tout latè-a.” (Twav. 11:28) Èvèk sé Kwityen-an ki té ka viv a lè sala, té soufè anba lafen sala osi. Ès ou sa imajiné sitiwasyon yo? San dout, pawan té ka katjilé ki mannyè yo té kay jwenn manjé pou swen ich yo. Èk, ki mannyè lafen-an té afèkté jenn moun ki té vlé fè pli an minis yo? Pitèt yo té ka katjilé, i pli mèyè pou yo èspéwé lafen-an fini, avan yo koumansé fè pli bay Jéhova? Mé népòt sitiwasyon yo té ni, sé Kwityen-an fè sé chanjman-an ki té nésésè. Yo kontiné fè tout sa yo té pé pou pwéché, èk yo té byen kontan pou sépawé sa yo té ni épi sé fwè èk sè-a an vil Joudiya.—Twav. 11:29, 30.
13. Ki bennédiksyon sé Kwityen-an té wisouvwè diwan gwo lafen-an?
13 Bon, ki bennédiksyon sé Kwityen-an an pwèmyé syèk-la té wisouvwè diwan gwo lafen-an? Ében sé fwè èk sè-a ki té wisouvwè èd té sa wè a klè, mannyè Jéhova té ka sipòté yo. (Maf. 6:31-33) Èvèk san dout yo té vini pli pwé sé fwè èk sè-a ki té édé yo a lè sala. Osi, fwè èk sè ki té fè donnasyon, ében ki té pwan pa an twavay-la pou pòté soukou té èspéyansé kalité tjè kontan-an moun ki ka bay ka wisouvwè. (Twav. 20:35) Vwéman, Jéhova té benni yo tout, paski yo té fè sé chanjman-an ki té nésésè pou aji épi pwoblenm yo té ka èspéyansé, lè sitiwasyon yo chanjé.
14. Kisa zapòt Pòl épi Bannabas té fè lè yo èspéyansé pèsikasyon yo pa té ka èspéwé? Èk kisa ki té wézilta-a? (Twav. 14:21, 22)
14 Byen souvan, sé Kwityen-an an pwèmyé syèk-la té ka èspéyansé pèsikasyon. Délè, sa té ka fèt lè yo pa té ka èspéwé. Pou ègzanp, annou konsidiwé sa ki té wivé Bannabas épi zapòt Pòl, lè yo té ka pwéché an vil Listra. An koumansman-an, sé moun-lan té byen vini Pòl épi Bannabas èk yo té ka kouté yo. Mé pli ta, moun ki té ka opozé Pòl fé jan Listra tounen kont Pòl. Èk adan sé menm moun-lan ki té ka kouté Pòl avan, bay koul “wòch épi yo twennenʼy alé dèwò vil-la paski yo kwè i té mò.” (Twav. 14:19) Mé Pòl épi Bannabas kontiné pwéché an lòt plas. Kisa ki té wézilta-a? Ében “an chay moun vini kwè an Jézi.” Èvèk, pa pawòl yo épi bon ègzanp yo, Pòl èk Bannabas té fòtifyé lafwa sé fwè èk sè-a. (Li Twav. 14:21, 22.) Wi, Pòl épi Bannabas kontiné pwéché magwé yo èspéyansé pèsikasyon yo pa té ka èspéwé. Pou lapéti sa, an chay fwè èk sè twapé bennéfis. An menm mannyè-a, dépi nou pa doubout fè twavay-la Jéhova ban nou pou fè-a, nou kay wisouvwè bennédiksyonʼy.
AN TAN NOU JÒDI
15. Kisa ou apwann an ègzanp fwè A. H. Macmillan?
15 Yonndé lanné avan lanné mil nèf san katòz (1914), pèp Jéhova té ka èspéwé pou sèten bagay fèt. Konsidiwé pou ègzanp, fwè A. H. Macmillan. Menm kon an chay fwè a lè sala, fwè Macmilan té ka kwè i té kay alé an syèl touswit. Lè i té ka bay an diskou an mwa Sèptanm lanné mil nèf san katòz (1914) i di: “Sa pitèt sé dènyé diskou piblik-la mwen kay bay.” Mé vwéman sa pa té dènyé diskou-a i té bay. Pli ta fwè Macmillan ékwi: “Pitèt andan di nou té twò pwésé pou kwè nou té kay alé an syèl la menm.” Èk i di ankò, “Sa nou té bizwen fè, sé kontiné fè tout sa nou pé an sèvis Senyè-a.” Èvèk Fwè Macmillan té vwéman fè sa. I té zélé an minis-la. I osi té ni pwivilaj-la pou ankouwajé an chay fwè ki té an pwizon paski yo wifizé pou antwé an lawmé-a. Èk fwè Macmillan té ka toujou atandé sé mitin-lan, magwé i té an laj. Wi, pandan fwè Macmillan té ka èspéwé pou alé an syèl, i sèvi tanʼy byen an sèvis Jéhova. Ki mannyè sa té édéʼy? Touswit avan i mò an lanné mil nèf san swasant sis (1966) i ékwi: “Lafwa mwen pa janmen vin fèb.” Sa sé an bon ègzanp pou nou tout imité, èspwèsman si nou ka èspéyansé pwoblenm ki ka diwé pli lonng pasé nou té ka èspéwé.—Hib. 13:7.
16. Ki difikilté fwè Jennings épi madanm li èspéyansé san yo té ka èspéyé? (Jémz 4:14)
16 Jòdi, la ni an chay sèvant Jéhova ki ka débat épi maladi yo pa té ka èspéwé. Pou ègzanp, lè fwè Herbert Jenningsb té ka palé konsèné laviʼy, i di mannyè i épi madanm li té ka enjwi ansayman yo kon misyonnè an péyi Ghana. Mé apwé an lè, fwè Jennings twapé an maladi ki té ka afèkté imosyonʼy. Yon lè i té ka ni an chay tjè kontan, èk an lòt lè i té ka twis an chay. Maladi-a té byen sèwyé èk an ling épi Jémz 4:14 fwè Jennings kwiyé maladi-a an “denmen.” Sa vlé maladi-a sété an bagay yo pa té ka èspéyé. (Liʼy.) Fwè Jennings di: “Nou aksèpté sitiwasyon nou pou sa i té yé. Konsa nou fè wanjman pou kité péyi Ghana. Nou kité dèyè an chay bon jan nou, èk nou viwé Canada [pou twètman mèdikal].” Jéhova édé fwè Jennings épi madanm li pou kontiné sèviʼy épi fidèlité magwé yo té ka èspéyansé difikilté sala.
17. Ki mannyè ègzanp fwè Jennings té édé lòt fwè épi sè?
17 Fwè Jennings palé konsèné laviʼy adan an mannyè ki té fwan. Èvèk listwaʼy édé an chay lòt moun. Yon sè di: “Sa sété pwèmyé fwa-a mwen li yon atik ki touché tjè mwen kon sa. . . . Lè mwen li konsèné mannyè fwè Jennings té ni pou kité ansaymanʼy pou lapéti maladiʼy, sa édé mwen pou gadé sitiwasyon mwen adan an mannyè ki pli wézonnab.” Èk an fwè di: “Mwen wann sèvis kon yon ansyen pou dis (10) lanné. Mé mwen té ni pou kité pwivilaj sala paski mwen té malad an tèt. Mwen té ka santi mwen pa té vo anyen. Sé santiman sala té tèlman fò, byen souvan mwen pa té sa li atik konsèné listwa lézòt moun. . . . Mé lè mwen li konsèné mannyè fwè Jennings té ni kouwaj, sa ankouwajé mwen.” Konsa, lè nou ka tjébé fò anba pwoblenm nou pa té ka èspéwé sé pou nou chonjé, ègzanp nou sa ankouwajé lézòt. Èvèk menm si bagay an lavi nou pa fèt mannyè-a nou té kay kontan, nou sa kontiné andiwé èk nou sa kontiné moutwé nou ni lafwa.—1 Pita 5:9.
Lè nou ka dépan asou Jéhova, sé pwoblenm-lan nou ka èspéyansé lè nou pa ka èspéwé-a, sa édé nou pou vini pli pwéʼy (Gadé pawagwaf 18)
18. Kisa nou sa apwann an ègzanp vèv-la ki sòti péyi Nigeria? (Gadé pòtwé-a osi.)
18 Dézas tèl kon panndèmik COVID-19-lan ja afèkté an chay sèvant Jéhova. Pou ègzanp, an vèv ki ka wèsté an péyi Nigeria, pwèskè pa té ni anyen pou manjé. Yon bonmaten fiʼy mandéʼy kisa yo té kay manjé apwé yo tjwit dènyé tikwas diwi-a yo té ni-an. Sè-a di fiʼy, yo pa té wèsté ni lajan ni manjé mé, yo té kay ni pou fè menm kon vèv-la an vil Zarapat. Sa vlé di, yo té kay ni pou pwépawé dènyé wipa yo èk mété tout konfyans yo an Jéhova. (1 Wa 17:8-16) Mé avan yo té sa katjilé kisa yo té kay manjé pou déjiné jou sala, sé fwè-a voyé an bwèt manjé ba yo. Bwèt-la té ni asé manjé pou diwé yo pli pasé dé simenn. Sé-a di i pa té wéyalizé Jéhova té ka byen kouté saʼy té ka di fiʼy. Konsa, lè nou ka dépan asou Jéhova, sé pwoblenm-lan nou ka èspéyansé lè nou pa ka èspéwé-a, sa édé nou pou vini pli pwéʼy.—1 Pita 5:6, 7.
19. Ki pèsikasyon fwè Aleksey Yershov èspéyansé?
19 An sé lanné-a ki pasé-a, an chay an sé fwè èk sè nou-an té ni pou tjébé fò anba pèsikasyon yo pitèt pa té ka èspéwé. Annou pwan ègzanp fwè Aleksey Yershov ki ka wèsté an péyi Russia. Fwè sala batizé an lanné mil nèf san katwiven katòz (1994). A lè sala Témwen Jéhova an péyi Russia té ni libèté pou fè sèten bagay. Mé tjèk tan apwé, sitiwasyon-an chanjé. Èk an lanné dé mil ven (2020), moun an lotowité antwé kay fwè-a, yo fouyé, èk yo pwan an chay bagay li. Plizyè mwa apwé sa, gouvèdman-an akizéʼy kon an kwiminèl. Sa ki té pli mové sé sa, akizasyon-an té bazé asou an vidiyo. Èvèk moun-lan ki fè vidiyo-a sé an moun ki té ka fè akwèdi i té antéwésé an lavéwité-a pou pli pasé yon lanné. Sa sété an méchansté!
20. Kisa Fwè Yershov ka fè pou fòtifyé wilasyonʼy épi Jéhova?
20 Ès pèsikasyon-an mennen pyès bon wézilta bay fwè Yershov? Wi. Wilasyonʼy épi Jéhova vini pli fò. I di: “Mwen épi madanm mwen ka pwédyé ansanm pli pasé avan. Mwen wéyalizé mwen pa té kay sa tjébé fò anba sitiwasyon sala san éd Jéhova.” Èk i di ankò: “Lètid pèsonnèl mwen ka édé mwen pou pa vini dékouwajé. Mwen ka mèdité asou ègzanp sèvant fidèl Jéhova an tan pasé. La ni an chay wakont an Bib-la ki ka moutwé mannyè i enpòtan pou nou wèsté dous èk konfyé an Jéhova.”
21. Kisa nou apwann an atik sala?
21 Bon, kisa nou apwann an atik sala? Délè, nou ka èspéyansé pwoblènm nou pa té ka èspéwé an vyé sistenm sala. Kanmenm nou asiwé, Jéhova ka toujou édé sévant li lè yo dépan asouʼy. Kon lévanjil-la an Sam 34:19 di, “nonm-lan ki dwèt-la ka pasé an pil soufwans, mé Bondyé Senyè-a ka tiwéʼy an tout.” (Sam 34:19) Konsa annou kontiné fiksé asou sa Jéhova ka fè pou édé nou, pito nou fiksé asou sé pwoblènm-lan nou ka èspéyansé-a. Si nou fè sa, nou kay sa di menm sa zapòt Pòl té di an 2 Kòr. 4:7: “Tout pouvwa-a menm sé an Bondyé i yé épi sé pa adan nou.”
CHANSON 38 I Kay Fòtifyéʼw
a An sistèm sala, délè nou ka èspéyansé pwoblenm nou pa té ka èspéwé. Mé nou sa asiwé Jéhova kay sipòté sèvant fidèl li. Ki mannyè Jéhova té édé sèvant li an tan pasé? Èk ki mannyè i ka édé nou jòdi? Lè nou konsidiwé mannyè Jéhova édé sèvant li an tan pasé épi an tan nou jòdi, sa kay fòtifyé konfyans nou ki, si nou dépan asou Jéhova, i kay édé nou osi.