Tjenn Kò Zòt Byen Lwen Nwèsè-a​—Èk Wèsté An Klèté-a

1-2. (a) Lè zapòt Pòl ékwi sé Kwityen-an ki té an vil Èfésòs, an ki sitiwasyon i té yé, èk pouki i té ékwi yo? (b) Ki kwèstyon nou kay konsidiwé?

PADITAN zapòt Pòl té an pwizon adan an kay an vil Ronm, i té vlé ankouwajé sé fwè èk sè-a. Mé i pa té sa alé wè yo fas a fas, konsa i ékwi yo lèt. Yonn sé lèt sala, sé lèt-la i té ékwi bay sé Kwityen-an ki té ka viv an vil Èfésòs. I ékwi lèt sala owon lanné 60 ében lanné 61 an lépòk nou.​—Èfés. 1:1; 4:1.

² Pwèskè dis (10) lanné avan sa, zapòt Pòl té pasé an pil tan an vil Èfésòs ka pwéché èk enstwi Bon Nouvèl-la. (Twav. 19:1, 8-10; 20:20, 21) I té enmen sé fwè èk sè-a an chay, èvèk i té vlé édé yo wèsté fidèl pou Jéhova. Mé sé fwè èk sè-a sété Kwityen ki té annonté. Konsa, pou ki wézon zapòt Pòl ékwi yo konsèné nwèsè épi klèté? Èk ki lison nou tout sa apwann an sa i ékwi-a? Annou konsidiwé sé wépons-lan pou sé kwèstyon sala.

YO KITÉ NWÈSÈ-A ÈK YO VINI AN KLÈTÉ-A

3. Ki diféwan mò pawòl zapòt Pòl sèvi an lèt-la i ékwi bay sé Kwityen-an an vil Èfésòs?

³ Zapòt Pòl té di sé Kwityen-an a vil Èfésòs: “I té ni an tan lè zòt té an nwèsè, mé apwézan zòt sé klèté.” (Èfés. 5:8) An vèwsé sala, zapòt Pòl ka sèvi sé mo pawòl-la nwèsè épi klèté, pou moutwé mannyè sé Kwityen sala té fè gwo chanjman an lavi yo. Mé, annou konsidiwé pouki zapòt Pòl té sa di yo, la “té ni an tan lè [yo] té an nwèsè.”

4. Lè’y vini pou adowasyon, pouki zapòt Pòl té sa di, moun Èfésòs té an nwèsè?

⁴ Yo té an nwèsè lè yo té an fo wilizyon. Avan yo té vini Kwityen, sé fwè èk sè-a an vil Èfésòs té ka swiv enstwiksyon ki sòti an fo wilizyon, èk yo té ka kwè an bagay ki ni pou fè épi tjenbwa. Moun Èfésòs té ni on tanp pou fo dyé-a Artémis, èk tanp sala té èstòdinè. Anfen, a lè sala an chay moun té ka kwè, tanp sala sété yonn an sé sèt (7) bagay-la ki té pli èstòdinè an latè-a. Moun té ka alé an tanp sala pou adowé idòl. La té ni moun ki té ka fè mòdèl tanp Artémis-la pou vann, èk twavay sala té ka mennen yo an chay pwofi. (Twav. 19:23-27) Osi, an chay an sé moun-lan an vil Èfésòs té ka fè tjenbwa.​—Twav. 19:19.

5. Lè’y vini pou pwensip mowal Jéhova, pouki zapòt Pòl té sa di, moun an vil Èfésòs té an nwèsè?

⁵ Yo té an nwèsè lè yo pa té ka swiv pwensip mowal Jéhova. Moun an vil Èfésòs té ka kouwi vyé lavi, èvèk yo pa té ka menm hont pou mové kondwit yo. Souvan, ou té ka tann pawòl sal an sa yo té ka jwé an sé tiyéta-a pou anmizé kò yo, épi an sé sélébwasyon-an yo té ka ni an sé fo wilizyon yo-a. (Èfés. 5:3) Zapòt Pòl sèvi yon èkspwèsyon pou dékwi an chay moun an vil Èfésòs. I di: “Anyen pa té ka fè yo hont.” Èkspwèsyon sala sòti adan an mò pawòl Gwik ki vlé di, “konsyans yo té pa ka bat yo ankò.” (Èfés. 4:17-19) Konsa avan sé fwè èk sè-a an vil Èfésòs té apwann pwensip mowal Jéhova, konsyans yo pa té ka bat yo lè yo té fè bagay ki pa bon. Èk yo pa té mélé ki mannyè kondwit yo té ka afèkté Jéhova. Sé pou sa zapòt Pòl té sa di, “lidé yo [té] an nwèsè, épi lè’y vini pou lavi nèf-la Bondyé ka bay-la, yo [té] étwanjé toujou.”

6. Pouki zapòt Pòl té sa di sé fwè èk sè-a an vil Èfésòs, “apwézan [yo] sé klèté”?

⁶ Kanmenm, adan sé moun-lan an vil Èfésòs pa té wèsté an nwèsè-a. Zapòt Pòl té di yo, “apwézan zòt sé klèté an Senyè-a.” (Èfés. 5:8) Sé moun sala té aksèpté lavéwité-a, èk yo té ka viv an ling épi pwensip Jéhova. Konsa, Pawòl Bondyé té menm kon on klèté ki té ka djidé yo. (Sam 119:105) Wi, yo kité fò wilizyon, yo doubout kouwi vyé lavi, yo koumansé ‘swiv ègzanp Bondyé,’ èvèk yo té ka fè tout sa yo té pé pou adowé Jéhova, épi pou fè sa ki dwèt an zyé’y.​—Èfés. 5:1.

7. Ki mannyè nou adan an sitiwasyon ki menm kon sa sé Kwityen-an an vil Èfésòs té adan?

⁷ Menm kon sé Kwityen-an an vil Èfésòs, avan nou apwann lavéwité-a nou té an nwèsè an fo wilizyon, èvèk nou pa té ka swiv pwensip mowal Jéhova. Adan di nou té ka patisipé an sélébwasyon ki bazé an fo wilizyon, èk adan di nou té ka kouwi vyé lavi. Mé lè nou apwann pwensip mowal Jéhova, nou kité nwèsè-a. Nou fè sé chanjman-an ki té nésésè, èk nou koumansé viv lavi nou mannyè-a Jéhova vlé nou viv. An wézilta di sa, nou ka enjwi an chay bennéfis. (Izay. 48:17) Kanmenm, i pa toujou ézé pou wèsté lwen nwèsè-a nou kité-a, èk kontiné maché “kon manmay ki an klèté.” Konsa, ki mannyè nou sa fè sa?

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

TJENN KÒ’W BYEN LWEN NWÈSÈ-A

8. Silon Èfésòs 5:3-5, kisa sé Kwityen-an an vil Èfésòs té ni pou widjèkté?

⁸ Li Èfésòs 5:3-5. Pou tjenn kò yo lwen nwèsè-a, sé Kwityen-an an vil Èfésòs té ni pou swiv pwensip mowal Jéhova an lavi yo, èk yo té ni pou kontiné widjèkté sé vyé pwatik-la ki té ka déplè Jéhova. Wi, yo té ni pou widjèkté tout sé pwatik-la ki ni pou fè épi vyé lavi, èk yo té ni pou widjèkté vyé konvézasyon sal osi. Èvèk zapòt Pòl té fè yo chonjé pouki yo té ni pou widjèkté tout sé bagay sala. I di yo, sé paski “pyès moun kon sa pa sa janmen jwenn an plas anpami sé moun-an Bondyé épi Jézi menm kay kondwi-a.”

9. Pouki nou sipozé wifizé gadé, kouté, ében palé konsèné bagay ki imowal?

⁹ Nou menm ni pou pwan bon pokosyon pou nou pa fè “sé twavay-la ki ka fèt an nwèsè-a, [èk] ki pa ni pyès valè-a.” (Èfés. 5:11) Lavéwité-a sé sa, pli on moun gadé, kouté, ében palé konsèné bagay ki imowal, sé pli i ka ézé pou moun sala fè sa ki pa bon an zyé Jéhova. (Jen. 3:6; Jémz 1:14, 15) Annou gadé yon ègzanp ki ka moutwé sa. An yon péyi, an gwo gwoup fwè èk sè koumansé palé épi yonn a lòt asou intannèt-la. An koumansman-an, an chay di yo té ka palé konsèné Jéhova épi lavéwité-a. Mé piti an piti yo koumansé palé konsèné bagay ki pa té ka plè Jéhova. Yo té ka pli palé konsèné sèks. Pli ta, an chay an sé fwè èk sè sala di, sé vyé konvézasyon-an yo té ka ni-an pousé yo pou tonbé an vyé lavi.

10. Kisa Satan vlé nou kwè? (Èfésòs 5:6)

¹⁰ Satan épi vyé latè’y-la vlé kwennen nou. Yo vlé nou kwè, sé bagay-la Jéhova di ki imowal èk ki pa bon-an, sé bagay ki bon. (2 Pita 2:19) Mé sa pa ka sipwi nou, paski yonn sé bagay-la Satan pli kontan fè sé twoublé moun, èk anpéché yo wè diféwans-lan ant sa ki dwèt, èk sa ki pa dwèt. (Izay. 5:20; 2 Kòr. 4:4) Sé pou wézon sala, an chay wèbsayt, pòtwé, èk lòt bagay moun ka gadé asou télévizyon, sé bagay ki pa an ling épi pwensip Jéhova. Satan vlé nou kwè, sé vyé pwatik-la épi vyé lavi-a an chay moun an latè-a ka kouwi-a, sé bagay ki bon èk ki ka ban nou plézi. I pa vlé nou kwè yo mové.​—Li Èfésòs 5:6.

11. Ki mannyè èspéyans Angela ka moutwé mannyè i enpòtan pou nou swiv konsèy-la nou jwenn an Èfésòs 5:7? (Gadé pòtwé-a osi.)

¹¹ Satan vlé nou asosiyé épi moun ki ka fè’y pli difisil pou nou obéyi pwensip Jéhova. Sé pou wézon sala zapòt Pòl té di sé Kwityen-an an vil Èfésòs, lè’y vini pou moun ki ka pwatiké sa ki pa bon an zyé Jéhova, “bay sé moun sala gwan lè.” (Èfés. 5:7) Mé, nou jis ni pou pwan pli pokosyon pasé sé fwè èk sè-a an vil Èfésòs, paski jòdi jou, sé pa sèlman lè nou fas a fas épi moun nou ka asosiyé épi yo. Nou sa osi asosiyé épi moun asou intannèt-la. Annou pwan ègzanp yon sè yo ka kwiyé Angela.a I ka viv an Asia, èk sè sala apwann mannyè asosiyasyon épi moun asou intannèt danjéwé. I di: “Sa menm kon an zatwap. Piti an piti i sa chanjé mannyè-a ou ka katjilé. Apwé an lè, i pa té ka anbété konsyans mwen, pou ni moun ki pa té ka wèspèkté pwensip Bib kon ‘jan’ mwen. Èvèk mwen koumansé katjilé, si mwen ka viv on lavi ki pa ka plè Jéhova, la pa ni anyen an sa.” Mé gwanmèsi èd sé ansyen-an, Angela té sa fè sé chanjman-an ki té nésésè. I di: “Apwézan mwen ka fiksé lidé mwen asou Jéhova épi pwensip li, pito mwen fiksé asou sé bagay-la ki asou intannèt-la.”

12. Kisa ki kay édé nou pou kontiné swiv pwensip Jéhova?

¹² Moun an latè-a anba pouvwa Satan ka kwè, pou viv vyé lavi sé pa anyen ki mové. Mé nou ni pou goumen kont katjil sala, paski nou sav sa pa vwé. (Èfés. 4:19, 20) I bon pou nou mandé kò nou sé kwèstyon sala: ‘Ès mwen ka pwan bon pokosyon pou mwen pa asosiyé épi moun mwen ka twavay épi, moun mwen ka alé lékòl épi, ében lòt moun ki pa ka wèspèkté pwensip Jéhova, lè’y pa nésésè pou mwen asosiyé épi yo? Ès mwen ni kouwaj pou fè sa Jéhova di ki dwèt, èk widjèkté sé bagay-la i di ki pa bon, menm si moun ka ban mwen chalè pou sa?’ Kon lévanjil-la an 2 Timòfi 2:20-22 ka moutwé, nou pé jis ni pou pwan pokosyon lè nou ka chwazi moun pou bon jan nou an kongwigasyon-an. Nou ni pou chonjé, la ni moun ki pa kay édé nou pou wèsté fidèl pou Jéhova.

MACHÉ “KON MANMAY KI AN KLÈTÉ”

13. Kisa’y vlé di pou kontiné maché “kon manmay ki an klèté”? (Èfésòs 5:7-9)

¹³ Zapòt Pòl té ankouwajé sé Kwityen-an an vil Èfésòs pou kontiné widjèkté nwèsè-a. Mé, i osi ankouwajé yo pou kontiné maché “kon manmay ki an klèté.” (Li Èfésòs 5:7-9.) Mé, kisa sa vlé di? Ében sa vlé di, nou ni pou konpòté kò nou kon Kwityen ki vwé a tout lè, èk an tout sitiwasyon. Yon bagay ki kay édé nou fè sa, sé si nou ka toujou li ében kouté Bib-la, èvèk si nou ka toujou étidyé’y ansanm épi sé piblikasyon nou-an. Osi, i byen enpòtan pou nou swiv ègzanp Jézi Kwi épi enstwiksyon’y, paski kon lévanjil-la di, sé li ki “klèté-a ki ka kléwé tout moun an latè-a.”​—Jan 8:12; Pwov. 6:23.

14. Kisa lisentèspwi Jéhova sa fè ban nou?

¹⁴ Nou osi bizwen lisentèspwi Bondyé pou édé nou kontiné konpòté kò nou “kon manmay ki ka maché an klèté.” Pouki nou sa di sa? Sé paski, i pa ézé pou wèsté nèt an zyé Jéhova an vyé latè imowal sala. (1 Tèsa. 4:3-5, 7, 8) Mé, lisentèspwi Jéhova sa édé nou goumen kont katjil moun an latè-a ki pa an ling épi katjil Jéhova. Lisentèspwi sa osi édé nou pou fè “bonté [èk viv] on lavi ki nèt,” an zyé Bondyé.​—Èfés. 5:9.

15. Kisa nou sa fè pou nou wisouvwè lisentèspwi Bondyé? (Èfésòs 5:19, 20)

¹⁵ Jézi té di, Jéhova té “kay bay [Lèspwi’y] pou sa ki mandéʼy li.” Konsa, yon mannyè nou sa wisouvwè lisentèspwi, sé pou nou pwédyé èk mandé Jéhova pou ban nou’y.” (Louk 11:13) Èk lè nou ka glowifyé Jéhova ansanm épi yonn a lòt an sé mitin nou-an, nou ka osi wisouvwè lisentèspwi. (Li Èfésòs 5:19, 20.) Lèspwi Bondyé ni an bon enflouwans asou nou, èk sa kay édé nou pou viv andan an mannyè ki ka plè Bondyé.

16. Kisa ki kay édé nou pou fè bon disizyon? (Èfésòs 5:10, 17)

¹⁶ Lè nou ni disizyon ki enpòtan pou fè, nou bizwen “gadé ki sa Bondyé vlé [nou] fè,” èk fè’y. (Li Èfésòs 5:10, 17.) Lè nou pwan tan pou gadé pou pwensip Bib nou sa sèvi andan an sitiwasyon nou ni, nou ka moutwé nou ka éséyé pou konnèt katjil Jéhova an sitiwasyon-an. Èvèk si nou sèvi pwensip Bondyé, nou kay sa fè bon disizyon.

17. Kisa’y vlé di, pou byen sèvi tan nou? (Èfésòs 5:15, 16) (Gadé pòtwé-a osi.)

¹⁷ Zapòt Pòl té osi di sé Kwityen-an an vil Èfésòs, pou sèvi tan yo byen. (Li Èfésòs 5:15, 16.) Mé, lèlmi nou “Denmou-an” vlé tjenn nou byen anbawasé épi bagay latè-a, pou nou pa ni pyès tan pou sèvis Jéhova. (1 Jan 5:19) Èvèk i byen ézé pou on Kwityen koumansé fiksé asou mannyè pou fè lajan, gwo endikasyon, ében twavay li, pito i fiksé asou mannyè i sa fè pli an sèvis Jéhova. Mé si on Kwityen fè sa, sa ka moutwé moun sala ka koumansé katjilé kon moun an latè-a ki pa vlé adowé Jéhova. Èk nou pa ka di, on Kwityen pa sipozé ni lajan, gwo endikasyon, ében on bon twavay. Sa nou ka di sé sa, sé bagay sala pa janmen sipozé vini pwèmyé an lavi nou. Pou kontiné maché “kon manmay ki an klèté,” nou ni pou byen sèvi tan nou. Sa vlé di, nou ni pou fiksé asou sé bagay-la ki vwéman enpòtan.

18. Kisa fwè Donald té fè pou’y sèvi tan’y pli mèyè?

¹⁸ Sé pou nou toujou gadé pou mannyè pou nou fè pli an sèvis Jéhova. Sé sa yon fwè ki ka wèsté an soud Afwik té fè. Non fwè-a sé Donald, èk i di: “Mwen gadé sitiwasyon mwen, èk mwen sipliyé Jéhova pou’y édé mwen fè pli an minis-la. Osi, mwen pwédyé pou Jéhova édé mwen jwenn twavay ki té kay fè’y posib pou mwen ni pli tan pou pwéché. Gwanmèsi èd Jéhova, mwen jwenn an twavay ki té ka édé mwen fè sa. Konsa mwen épi madanm mwen koumansé wann sèvis an plen.”

19. Ki mannyè nou sa kontiné maché “kon manmay ki an klèté”?

¹⁹ Lèt-la zapòt Pòl té ékwi bay sé Kwityen-an an vil Èfésòs, té édé yo wèsté fidèl pou Jéhova. Wi, enfòmasyon an lèt sala sété diwèksyon hòd Jéhova, konsa i sa édé nou wèsté fidèl tou. Kon nou apwann, enfòmasyon-an an liv Èfésòs sa édé nou pou fè bon disizyon lè nou ka chwazi anmizman nou, épi jan nou. I sa motivé nou pou toujou étidyé Bib-la. Èk lè sala, Pawòl Bondyé kay menm kon an klèté an lavi nou, paski i kay kontiné djidé nou an tout sa nou ka fè. Osi, liv Èfésòs ka moutwé nou mannyè i enpòtan pou nou ni lisentèspwi Jéhova, paski lisentèspwi-a sa édé nou pou dévlopé bon kawaktè Kwityen. Vwéman, si nou sèvi enfòmasyon-an zapòt Pòl té ékwi bay sé Kwityen-an an vil Èfésòs, nou kay sa fè bon disizyon. Sa vlé di, disizyon ki an ling épi katjil Jéhova. Konsa, annou fè sé bagay sala, paski si nou fè sa, nou kay sa kontiné widjèkté nwèsè-a ki an latè sala, èk kontiné maché an klèté-a!