Koumannyè Ou Sa Ni Asiwans-lan Ki, Jéhova Plè Épi’w?

1. Kisa adan di nou pé katjilé?

PA DÉ kontan nou kontan pou konnèt Jéhova plè épi nou kon on gwoup. Wi, Sam 149:4 ka ban nou asiwans-lan ki, ‘Jéhova ka pwan plézi an pèp li’. Mé, délè, adan di nou pé santi dékouwajé èk katjilé: ‘Ès Jéhova vwéman plè épi mwen?’ Pou ègzanp, plizyè moun ki té fidèl pou Jéhova an tan Bib-la té twapé’y difisil pou kwè Jéhova té plè épi yo.—1 Sm 1:6-10; Jòb 29:2, 4; Sam 51:11.

2. Kisa nou ni pou fè pou Jéhova plè épi nou?

² Bib-la ka moutwé nou a klè ki, Jéhova sa byen plè épi lézòm, magwé nou pa pawfé. Alò, kisa nou ni pou fè pou Jéhova byen plè épi nou? Ében pwèmyé bagay-la nou ni pou fè sé sa; ni lafwa an Jézi èk batizé. (Jan 3:16) An mannyè sala nou kay moutwé lézòt moun nou wépanti hòd péché nou, èk nou pwonmèt Jéhova nou kay fè divwa’y. (Twav. 2:38; 3:19) Bon. Jéhova ka byen kontan lè nou fè sé bagay sala pou vini bon jan épi’y. Konsa, si nou fè tout sa nou pé pou sèvi Jéhova, i kay byen plè épi nou èk gadé nou kon bon jan’y.​—Sam 25:14.

3. Ki twa (3) kwèsyon nou kay diskité an atik sala?

³ Alò, kisa nou kay diskité an atik sala? Ében an atik sala nou kay diskité sé twa (3) kwèsyon sala: (1) Pouki adan di nou ka kwè Jéhova pa plè épi nou? (2) An ki mannyè Jéhova ka moutwé nou i plè épi nou? Èvèk (3), ki mannyè on Kwityen sa ni asiwans-lan ki, Jéhova plè épi’y?

POUKI ADAN MOUN PÉ SANTI JÉHOVA PA PLÈ ÉPI YO?

4-5. Menm si nou kwè nou pa vo anyen, ki asiwans nou sa ni?

⁴ Dépi nou tou piti an chay di nou ka santi nou pa vo anyen. (Sam 88:15) Pou ègzanp, on fwè, non’y sé Adrián di: “Mwen té ka toujou santi m’a té vo anyen. Lè mwen té an tibway mwen té ka pwédyé pou fanmi mwen viv an Pawadi-a, mé, m’a té kwè mwen té bon asé pou mwen viv la.” An lòt fwè, Tony, pa té lévé adan an fanmi Témwen Jéhova. I di: “Pawan mwen pa té janmen aplodi mwen ében di mwen yo enmen mwen. Sa fè mwen santi mwen pa té sa janmen plè yo, ében ba yo tjè kontan.”

⁵ Si délè nou ka santi nou pa vo anyen, kisa nou sa fè? Ében, i bon pou chonjé sé Jéhova menm ki fè nou vansé pwé’y. (Jan 6:44) Alò, menm si nou pa ka wè sé bèl kawaktè-a nou ni-an, Jéhova ka wè tjè nou èk i konnèt nou pli mèyè pasé nou konnèt kò nou. (1 Sm 16:7; 2 Kw. 6:30) Konsa, nou sa konfyé Jéhova lè’y di, nou ni an chay valè an zyé’y.—1 Jan 3:19, 20.

6. Ki mannyè zapòt Pòl té ka santi lè’y chonjé sé péché-a i té fè avan i apwann lavéwité-a?

⁶ Avan nou té apwann lavéwité-a, adan di nou té fè bagay ki ka fè nou santi koupab toujou. (1 Pita 4:3) Èk la osi ni fwè èk sè ki ka sèvi Jéhova pou an chay lanné, mé yo ka goumen épi fèblès yo toujou. Konsa, délè, ès ou ka santi Jéhova pa sa janmen pawdonnen’w? Ében, si’w ka santi kon sa, i kay soulajé’w pou konnèt adan sèvant fidèl Jéhova ja santi menm kon ou. Pou ègzanp, zapòt Pòl té di i té ka santi mizéwab lè’y chonjé péché’y. (Ronm 7:24) Kanmenm, Pòl wépanti hòd sé péché sala èk i batizé. Mé magwé sa i di, “sé mwen ki pli ba an sé zapòt-la”, èk “sé mwen ki pli mové anpami sé péchè-a”.—1 Kòr. 15:9; 1 Tim. 1:15.

7. Kisa nou ni pou chonjé konsèné sé lèwè-a nou té fè an tan pasé?

⁷ Jéhova pwonmèt nou ki, i kay pawdonnen péché nou si nou wépanti. (Sam 86:5) Alò, i bon pou nou chonjé, si nou vwéman wigwété sé péché-a nou té fè-a, nou sa ni konfyans-lan ki, Jéhova ja pawdonnen nou.​—Kòl. 2:13.

8-9. Ki mannyè nou sa ganyen a bout katjil-la ki, nou pa sa janmen fè asé pou plè Jéhova?

⁸ Nou tout vlé fè tout sa nou pé an sèvis nou pou Jéhova. Kanmenm, adan di nou pé santi nou pa sa janmen fè asé pou plè Jéhova. An sésé, non’y sé Amanda di: “Mwen té ka toujou katjilé, pou bay Jéhova pli mèyè mwen vlé di, mwen toujou ni pou fè pli bay Jéhova. Alò, byen souvan mwen ka éséyé fè pli pasé mwen sa vwéman fè. Èk lè mwen pa sa fè tout sa mwen vlé fè, mwen ka santi dézapwenté. Épi mwen ka kwè Jéhova dézapwenté épi mwen osi.”

⁹ Alò, ki mannyè nou sa ganyen a bout katjil-la ki, nou pa sa janmen fè asé pou plè Jéhova? Ében nou ni pou chonjé Jéhova sé an Dyé ki wézonnab, èk i pa ka janmen mandé nou pou fè pli pasé nou sa fè. Dépi nou ka ba li pli mèyè nou, i ka apwésyé sa. Osi, i kay bon pou wéfléchi asou bèl ègzanp moun an Bib-la ki té sèvi Jéhova épi tout tjè yo. Pou ègzanp, katjilé asou ègzanp zapòt Pòl. Pou plizyè lanné i té twavay byen wèd an sèvis Jéhova. I voyajé plizyè mil lyé èk i établi an chay kongwigasyon osi. Kanmenm, lè sitiwasyon’y chanjé èk i pa té sa pwéché kon’y té ka fè avan, ès sa té vlé di Jéhova pa té plè épi’y ankò? Awa. Pòl kontiné fè sa’y té pé èk Jéhova té byen kontan épi’y. (Twav. 28:30, 31) An menm mannyè-a, sa nou sa fè an sèvis nou pou Jéhova pé chanjé, mé sa ki enpòtan pou Jéhova sé, lè nou sèvi’y épi tout tjè nou. Apwézan, annou konsidiwé détwa mannyè Jéhova ka moutwé i plè épi nou.

KOUMANNYÈ JÉHOVA KA MOUTWÉ I PLÈ ÉPI NOU?

10. Ki mannyè nou sa “tann” Jéhova ka di nou i plè épi nou? (Jan 16:27)

¹⁰ Jéhova ban nou Bib-la. Jéhova ka toujou gadé pou diféwan mannyè pou moutwé pèp li i enmen yo, èk i byen plè épi yo. Pou ègzanp, Bib-la ban nou dé (2) lokazyon koté Jéhova té di Jézi i enmen’y èk i byen plè épi’y. (Maf. 3:17; 17:5) Alò, ès ou té kay kontan tann Jéhova di’w i plè épi’w? Ében, magwé nou pa sa tann vwa Jéhova ka palé ban nou hòd syèl, i ka sèvi Bib-la pou palé ban nou. Konsa, lè nou li sa Jézi té di an liv Mafyou, Mak, Louk, èk Jan, sé konmsi nou sa tann vwa Jéhova ka di nou i plè épi nou. (Li Jan 16: 27.) Wi, Jézi imité kawaktè Papa’y byen. Konsa, lè nou li konsèné mannyè Jézi té ka di sé disip li-a i enmen yo, nou sa imajiné Jéhova ka di nou menm bagay-la.—Jan 15:9, 15.

11. Lè nou ka èspéyansé pwòblenm, sa pa vlé di Jéhova pa plè épi nou. Poutji nou sa di sa? (Jémz 1:12)

¹¹ Jéhova ka ban nou sa nou bouzwen. Jéhova toujou pawé pou édé nou. Pou ègzanp, i ka toujou ban nou sa nou bouzwen. Mé délè, menm kon Jòb, Jéhova ka kité bagay ki mové wivé nou. (Jòb 1:8-11) Alò toujou chonjé, lè nou ka èspéyansé pwòblenm, sa pa vlé di Jéhova pa plè épi nou. Pito sa, nou ni òpòtyounité-a pou moutwé Jéhova ki mizi nou enmen’y èk nou ka konfyé’y. (Li Jémz 1:12.) Èk diwan tan difikilté nou, nou kay wè ki mizi Jéhova enmen nou, èk mannyè i ka édé nou pou tjenbé fò.

12. Kisa nou sa apwann an èspéyans Dmitrii?

¹² Annou katjilé asou sa ki té wivé on fwè an Asia. Non’y sé Dmitrii. I pèd twavay li èk pou plizyè mwa i pa té sa twapé twavay. Konsa pou moutwé i ka konfyé Jéhova, i désidé pou pasé pli tan an minis-la. Kanmenm, plizyè mwa pasé, èk i pa té sa twapé on twavay. An plis di sa, i tonbé malad èk i pa té sa sòti an kabann li. Èvèk i koumansé katjilé i pa té on bon mawi, ében on bon papa, èvèk Jéhova pa té plè épi’y ankò. Alò yon swè, fi’y ékwi Izaya 30:15 asou on papyé ba li, koté i di: ‘Si zò wété dous èk konfyé mwen, zò kay ni fòs.’ I mennen lévanjil-la ba papa’y èk i di’y: “Papa, lè’w ka santi dékouwajé, ou sa chonjé lévanjil sala.” Konsa Dmitrii wéyalizé ki, gwanmèsi Jéhova, fanmi’y té toujou ni had, manjé, èk on plas pou wèsté. I di: “Sa mwen té ni pou fè sé sa; wété dous èk kontiné konfyé Bondyé mwen.” Alò, si’w ka aji épi on sitiwasyon menm kon Dmitrii, ni asiwans-lan ki, Jéhova konsèné épi’w, èk i kay édé’w tjenbé fò.

13. Ki moun Jéhova ka sèvi pou moutwé nou i plè épi nou, èk an ki mannyè i ka fè sa?

¹³ Jéhova ka ban nou fwè èk sè. Jéhova ka ban nou fwè èk sè pou moutwé nou i plè épi nou. Pou ègzanp, i ka sèvi yo pou enkouwajé nou lè nou bouzwen’y pli. An sésé an Asia té èspéyansé sa lè’y té ni an chay tèt cho. I té pèd twavay li, èk i tonbé byen malad. An plis di sa, mawi’y fè an péché ki gwav, èk i pèd pwivilaj li kon yon ansyen. Sè-a di: “M’a té sa konpwann poutji sé bagay sala té ka wivé mwen. Mwen té jis kwè mwen té fè on bagay ki pa té bon, èk mwen pèd favè Jéhova.” Alò, sésé nou plédé épi Jéhova pou moutwé’y i té enmen’y toujou. Èk Jéhova wéponn lapwiyè’y. Ki mannyè i fè sa? Ében sésé-a di: “Sé ansyen-an vizité mwen èk yo fè mwen wè a klè Jéhova vwéman enmen mwen.” Kanmenm, pli ta i koumansé santi menm mannyè-a, èk i pwédyé bay Jéhova ankò. Èk Jéhova wéponn lapwiyè’y adan an bèl mannyè. Sè-a di: “Menm jou sala mwen wisivwè an lèt hòd on gwoup fwè èk sè an kongwigasyon-an. Kon mwen té ka li lèt-la, sa soulajé mwen tèlman, mwen santi Jéhova wéponn lapwiyè mwen.” Wi, byen souvan Jéhova ka sèvi sé fwè èk sè nou-an pou moutwé ki otan i enmen nou.​—Sam 10:17.

14. An ki lòt mannyè Jéhova ka moutwé nou i plè épi nou?

¹⁴ An lòt mannyè Jéhova ka moutwé i plè épi nou, sé lè i sèvi fwè èk sè pou ban nou konsèy. Pou ègzanp, an pwèmyé syèk-la, Jéhova sèvi zapòt Pòl pou ékwi sé fwè èk sè-a katòz (14) lèt. An sé lèt sala Pòl bay sé fwè èk sè-a konsèy ki té fwanch, mé i fè sa épi lanmityé. Alò, pouki Jéhova té sèvi Pòl pou bay sé fwè-a sé konsèy sala? Ében, sa sé paski Jéhova sé on bon Papa ki ka kowijé ich li paski i enmen yo. (Pwov. 3:11, 12) Konsa, lè nou wisivwè konsèy, pito nou kwè Jéhova faché épi nou, nou vlé chonjé Jéhova ka ban nou konsèy paski i enmen nou. (Hib. 12:6) Bon. An ki lòt mannyè Jéhova ka moutwé i plè épi nou?

LÒT MANNYÈ NOU SA KONNÈT JÉHOVA PLÈ ÉPI NOU

15. Ki moun Jéhova ka bay lisentèspwi’y, èk pouki sa sipozé ban nou konfyans?

¹⁵ Jéhova ka bay moun ki ka plè’y lisentèspwi’y. (Maf. 12:18) Alò, nou sa mandé kò nou: ‘Ès mwen ka moutwé adan kawaktè di lisentèspwi Bondyé an lavi mwen?’ Pou ègzanp, ès ou ni pli pasyans apwézan pasé avan ou té vini konnèt Jéhova? Ou wè, pli ou dévlopé kawaktè lisentèspwi Bondyé, sé pli ou kay wéyalizé ou ka plè Jéhova!​—Osi, gadé enfòmasyon-an ki an bwèt-la: ‘Kawaktè Lisentèspwi Bondyé Ka Ba’w . . .’

16. Ki moun Jéhova ka sèvi pou pwéché bon nouvèl-la, èk ki mannyè sa ka fè’w santi? (1 Tèsalonnika 2:4)

¹⁶ Jéhova kontan sèvi moun i plè épi pou pwéché bon nouvèl-la. (Li 1 Tèsalonnika 2:4.) An sè, non’y sé Jocelyn wè sa a klè lè’y té ka pwéché bon nouvèl-la. Yon jou lè’y lévé i té dékonpòté. I di: “Mwen santi mwen pa té ni pyès kouway èk mwen pa té vo anyen. Mé mwen té ka piyonnè, èk sa sété jou sèvis mwen. Konsa, mwen di an lapwiyè èk mwen alé an sèvis-la.” Menm bonmaten sala Jocelyn jwenn épi Mary, èk i aksèpté an létid Bib. Détwa mwa apwé, Mary di Jocelyn menm lè-a i té konyen lapòt li, i té ka mandé Bondyé pou édé’y. Kisa Jocelyn apwann an èspéyans sala? Ében i di: “Mwen santi konmsi Jéhova té ka di mwen, ‘Mwen enmen’w.’” Sé vwé, sé pa tout moun ki kay kouté konmisyon-an nou ka pwéché-a. Mé nou sa asiwé, Jéhova ka ni tjè kontan lè nou fè tout sa nou pé pou pwéché bon nouvèl-la.

17. Kisa nou apwann an sa Vicky di konsèné wanson-an? (Sam 5:12)

¹⁷ Sé sèlman moun Jéhova enmen ki kay twapé bennéfis hòd wanson-an. (1 Tim. 2:5, 6) Mé, menm si nou ni lafwa an wanson-an èk nou batizé, pitèt nou ka santi Jéhova pa enmen nou. Alò, si nou ka santi konsa, kisa nou sa fè? Ében toujou chonjé, nou pa sa konfyé tjè nou, mé nou sa toujou konfyé Jéhova. Èk moun ki ka mété lafwa an wanson-an, Jéhova ka gadé yo kon moun ki dwèt, èk i pwonmèt pou benni yo. (Li Sam 5:12; Ronm 3:26) On sésé non’y sé Vicky té twapé bennéfis lè’y mèdité asou wanson-an. I di: “Yon jou apwé mwen byen katjilé asou wanson-an, mwen wéyalizé pou an chay tan Jéhova té ka moutwé i enmen mwen. Mé, mwen té ka di Jéhova: ‘Ou pa sa janmen enmen on moun kon mwen. Sakwifis Gason’w pa sa kouvè péché mwen.’” Alò, lè Vicky koumansé mèdité asou wanson-an, i koumansé wè Jéhova vwéman enmen’y. Wi, si nou mèdité asou wanson-an, nou osi kay ni asiwans-lan ki, Jéhova vwéman enmen nou.

18. Si nou kontiné moutwé Jéhova nou enmen’y, ki asiwans nou sa ni?

¹⁸ Magwé nou pé twavay wèd pou mété an pwatik sa nou apwann an atik sala, tanzantan nou pé santi dékouwajé, èk nou pé katjilé Jéhova pa enmen nou. Alò, si nou janmen santi kon sa, kisa i bon pou chonjé? Ében, i bon pou toujou chonjé, Jéhova plè épi ‘moun ki enmen’y’. (Jémz 1:12) Konsa, kontiné vansé pwé Jéhova, èk toujou gadé pou sé diféwan mannyè-a i ka moutwé i enmen’w. Èk pa janmen obliyé, papa nou Jéhova “pa lwen nou pyès.”​—Twav. 17:27.