Jéhova Sa Ban Nou “Tjè Kontan”

1-2. (a) Ki mannyè an chay moun ka santi jòdi jou? (b) Kisa nou kay diskité an atik sala?

JÒDI jou an chay moun ka fè népòt bagay pou ni tjè kontan. Mé magwé sa, yo pa ni djèwté. Anfen, an chay di yo byen twis. Èk yo pa kwè bagay kay vini pli mèyè. Èk délè jis pèp Jéhova ka santi kon sa. Èvèk sa sé paski nou ka viv “an dènyé tan-an”. Alò, tanzantan nou kay èséyansé pwòblenm ki kay fè nou twis.​—2 Tim. 3:1.

² Bon an atik sala, nou kay diskité bagay ki sa fè nou pèd lajwa nou, èk sa nou sa fè pou ni lajwa ankò. Mé pwèmyéman, annou wè ki moun ki sa vwéman ban nou tjè kontan.

JÉHOVA SA VWÉMAN BAN NOU TJÈ KONTAN

3. Kisa nou sa apwann konsèné Jéhova hòd sé bagay-la i fè-a? (Gadé sé pòtwé-a osi.)

³ Jéhova toujou ni tjè kontan, èk i vlé nou ni tjè kontan tou. Èvèk sa sé wézon-an i ban nou bèl bagay ki ka ban nou tjè kontan. Pou ègzanp, ès nou pa ni tjè kontan lè nou wè tout sé bèl koulè-a an kwiyasyon, lè nou wè sé zannimo-a ka jwé, èk lè nou ka manjé bon kalté manjé? Wi, Jéhova vwéman enmen nou èk i vlé nou enjwi lavi!

An ti léfan: Image © Romi Gamit/​Shutterstock; ti penngwin: Vladimir Seliverstov/​500px via Getty Images; dé ti kabwit: Rita Kochmarjova/​stock.adobe.com; dé ti dowad: georgeclerk/​E+ via Getty Images

4. (a) Pouki Jéhova toujou ni tjè kontan? (b) An ki mannyè Jéhova ka édé nou? (Sam 16:11)

⁴ I ka fè Jéhova twis pou wè tout soufwans-lan an latè-a, sitou soufwans pèp li. Mé Bib-la di, Jéhova sé ‘Bondyé-a ki ni tjè kontan-an’. (1 Tim. 1:11 NWT) Bon, pouki Jéhova toujou ni tjè kontan? Èben yon wézon sé paski, i ja mété yon jou pou’y doubout tout twistès èk soufwans pou tout tan. Kanmenm, Jéhova ka byen konpwann soufwans-lan nou ka èspéyansé apwézan, èk i vlé édé nou. Èvèk yon mannyè i ka fè sa, sé lè’y ka ban nou tjè kontan. (Li Sam 16:11.) Bon, annou wè pouki Jézi ni tjè kontan.

5-6. Pouki Jézi ni tjè kontan?

⁵ Bon, anpami tout kwiyasyon Jéhova, sé Jézi ki ni pli tjè kontan. Alò, annou konsidiwé diféwan wézon pou sa. Pwèmyéman, i menm kon Papa’y, konsa i ni kawaktè Papa’y. (Kòl. 1:15; 1 Tim. 6:15) Dézyenmman, sé Jéhova ki Sous djèwté, èk sé Jézi sèlman ki ha pasé pli tan épi’y.

⁶ Bon, twazyenman, Jézi ni an chay djèwté paski i ka toujou fè sa Papa’y vlé’y fè. (Pwov. 8:30, 31; Jan 8:29) Èvèk sa sé wézon-an Jéhova enmen’y si tèlman, èk i byen plè épi’y.​—Maf. 3:17.

7. Ki mannyè nou sa ni tjè kontan?

⁷ Bon, menm kon Jézi nou osi sa ni tjè kontan si nou kontiné vansé pwé Jéhova. Wi, lè nou pasé tan ka apwann mannyè Jéhova ka katjilé èk mannyè i ka santi, nou sa swiv ègzanp li. Èk lè nou fè sa, sa ka ban nou tjè kontan. An plis di sa, nou ka ni tjè kontan lè nou fè sa Jéhova vlé nou fè, èvèk lè nou konnèt Jéhova byen plè épi nou.a (Sam 33:12) Bon, sé vwé, délè nou pé santi twis, pitèt pou an chay tan. Mé lè sa fèt, nou pa janmen vlé kwè Jéhova pa plè épi nou. Wi, Jéhova sav an latè sala, délè nou kay santi twis èk nou kay ni penn. (Sam 103:14) Alò, annou wè sé bagay-la ki sa fè nou pèd djèwté nou, èvèk sa nou fè pou ni djèwté ankò.

PA KITÉ ANYEN FÈ’W PÈD LAJWA’W

8. Kisa ki sa wivé nou lè nou ni pwòblenm?

⁸ Sitiwasyon ki difisil sa fè nou pèd lajwa nou. Pitèt moun ka maltéwé’w paski ou sé yon sèvant Jéhova, ében pitèt ou ka soufè a kòz di pwòblenm lajan, a kòz di dézas, ében paski ou malad ében ou an laj. Wi, sé pwòblenm sala sa fè nou santi byen twis, èspwèsman si nou pa sa chanjé sitiwasyon nou. Anfen Bib-la ka di, nou sa vini si tèlman twis, nou pé jis santi nou pa sa janmen ni lajwa ankò. (Pwov. 15:13) Pou ègzanp, yon ansyen yo ka kwiyé Babis, pèd ni fwè’y ni pawan’y an kat «4» lanné. I di: “Délè mwen té ka santi twis paski mwen pa té sa pasé pli tan épi yo avan yo mò. Èvèk mwen té ka santi mwen té pa kò mwen èk pyèsonn pa té sa édé mwen.” Wi, délè menm kon fwè Babis, sitiwasyon ki difisil sa lasé nou èk dékouwajé nou.

9. Kisa ki sa édé nou pou ni lajwa ankò? (Jérémaya 29:4-7, 10)

⁹ Sa ki sa édé nou pou ni lajwa ankò. Nou sa ni lajwa ankò si nou doubout ba kò nou tèt cho konsèné bagay nou pa sa chanjé, èk si nou ka apwésyé sa nou ni. Bon, latè-a vlé nou kwè nou sa ni lajwa sèlman si nou ni an lavi ki pawfé. Mé sa pa vwé. Anfen, Bib-la ka di nou ki, nou sa ni djèwté menm si sitiwasyon nou pa tèlman bon. Pou ègzanp, Jéhova té di sé jan Izwayèl-la ki té alé Babilonn, pou fè tout sa yo pé pou enjwi lavi yo, magwé lavi yo té difisil. (Li Jérémaya 29:4-7, 10.) Bon, kisa ki lison-an pou nou? Èben, lison-an sé sa: Éséyé pou aksèpté sitiwasyon’w, èvèk apwésyé sé bon bagay-la ou ni an lavi’w. Chonjé, Jéhova kay toujou édé’w, èk i pa kay janmen tounen do’y asou’w. (Sam 63:7; 146:5) Pou ègzanp konsidiwé èspéyans sésé Effie, i pa sa maché a kòz di yon aksidan. Mé tann sa’y di: “Jéhova, fanmi mwen, èk sé fwè èk sè-a an kongwigasyon-an ha édé mwen èk ankouwajé mwen an chay. Èvèk mwen vlé moutwé ki otan mwen ka apwésyé tout sa yo ha fè èk ka kontiné fè ban mwen. Konsa mwen ka fè tout sa mwen pé pou pa pèd djèwté mwen.”

10. Pouki nou sa ni djèwté menm si nou ni pwòblenm?

¹⁰ Bon. Menm si nou ka èspéyansé sitiwasyon ki difisil, ében mové bagay ka wivé nou ében fanmi nou, nou sa ni djèwté.b (Sam 126:5) Mé pouki nou ka di sa? Ében sa sé paski, lajwa pa ka dépan asou sitiwasyon nou. Pou ègzanp, tann sa sésé Maria ki ka wann sèvis kon yon piyonnè di: “Lè nou ka èspéyansé pwòblenm, nou sa ni djèwté lè nou chonjé tout sé bèl bagay-la Jéhova ha pwonmèt nou. Bon, sa pa vlé di nou pa ka pléwé ében èspéyansé penn. Mé, Papa nou ka édé nou ni djèwté an népòt difikilté nou ka èspéyansé.” Alò chonjé, menm si sitiwasyon nou byen difisil, i pa kay toujou wèsté kon sa. Paski touswit, Jéhova kay tiwé tout bagay ki ka annékòz soufwans èk twistès.

11. Ki mannyè ègzanp zapòt Pòl sa ankouwajé’w?

¹¹ Délè nou pé santi nou ni pwòblenm, paski Jéhova pa plè épi nou. Mé, si nou ka santi kon sa, i bon pou katjilé asou sèvant Jéhova ki té ni an chay pwòblenm an lavi yo. Bon, annou konsidiwé ègzanp zapòt Pòl. Jézi chwazi zapòt Pòl pou pwéché bon nouvèl-la bay “lòt nasyon épi wa yo, ansanm épi sé jan Izwayèl-la”. (Twav. 9:15) Wi, sa vwéman sété an bèl pwivilaj. Mé lavi zapòt Pòl pa té ézé. (2 Kòr. 11:23-27) Kanmenm magwé lavi’y pa té ézé, i a klè Jéhova té ka benni’y. Anfen, zapòt Pòl pa té kay sa wèsté fidèl bay Jéhova si Jéhova pa té ka édé’y. (Ronm 5:3-5) Bon, katjilé asou sitiwasyon’w, menm kon zapòt Pòl ou osi ka kontiné wèsté fidèl bay Jéhova, menm si ou ni pwòblenm. Alò ou sa ni asiwans-lan ki, Jéhova ka édé’w èk i plè épi’w.

12. Kisa ki sa fèt si nou pa sa sèvi Jéhova mannyè-a nou vlé?

¹² Nou sa pèd lajwa nou lè nou pa sa sèvi Jéhova mannyè-a nou vlé. (Pwov. 13:12) Wi, nou enmen Jéhova èk nou ka apwésyé tout sa i ka fè ban nou. Konsa nou ka katjilé asou diféwan mannyè nou sa fè pli mèyè nou ba li. Kanmenm, si nou éséyé fè bagay nou pa sa vwéman fè, nou sa vin dékouwajé. (Pwov. 17:22) Pou ègzanp, Holly, yon sè ki ka wann sèvis kon an piyonnè di: “Mwen té vlé atandé Lékòl-la Pou Pwoklanmatè Wéyòm-lan pou mwen sa alé pwéché adan an lòt péyi, ében mwen té vlé twavay asou an pwojé konstwiksyon. Kanmenm, sitiwasyon mwen chanjé èk mwen pa té sa fè pyès an sé bagay sala. Mwen té vwéman dézapwenté.” Wi, an chay sèvant Jéhova ka santi mwen mannyè-a, lè yo pa sa fè sa yo vwéman vlé fè an sèvis Jéhova.

13. Kisa nou sa fè si nou pa sa sèvi Jéhova mannyè-a nou vlé?

¹³ Sa ki sa édé nou pou ni lajwa ankò. Wi, i bon pou chonjé, Jéhova pa ka mandé pou fè pli pasé nou sa fè. Èk Jéhova enmen nou menm si nou pa sa fè sa lézòt moun sa fè. Anfen, Jéhova vlé nou konnèt limitasyon nou èk pou wèsté fidèl pou li. (Mayk. 6:8; 1 Kòr. 4:2) Lavéwité-a sé sa, Jéhova pli mélé épi sa ki an tjè nou èk sé bèl kawaktè nou-an, menm si nou pa sa fè tout sa nou vlé an sèvis li.c Konsa i pa kay bon pou nou éséyé fè bagay nou pa sa fè. Bon, menm si ou pa sa fè tout sa ou vlé fè bay Jéhova, i kay bon pou fiksé asou sé bagay-la ou sa fè. Pou ègzanp, ou sa entwennen an jenn moun, ében ou sa ankouwajé an fwè ében an sè ki an laj; pitèt ou sa visité yo, kwiyé yo, ében voyé yo an tèks pou ankouwajé yo. Wi, sé pa dé kontan Jéhova ka kontan lè nou fè sa nou sa fè an sèvis li. Èk i kay ban nou djèwté pou sa. Èvèk chonjé, an pawadi-a, nou kay sa sèvi Jéhova an plizyè diféwan bèl mannyè nou pa sa menm imajiné. Èk sé sa ki ka ankouwajé sésé Holly. I di: “Lè mwen ka santi dékouwajé, mwen ka pwan an ti pòz, èk mwen ka chonjé, mwen kay viv pou tout tan, èk a lè sala mwen kay sa fè tout sa mwen vlé fè bay Jéhova, épi èd li.”

14. Ki lòt bagay ki sa fè nou pèd djèwté nou?

¹⁴ Nou sa pèd djèwté nou si nou ka dépan asou lajan èk plézi pou ni djèwté. Délè lè nou asou intannèt-la, nou ka wè an chay moun ka enjwi an chay bèl bagay. Èk i ka sanm konmsi yo ni djèwté, èk nou pé jis koumansé kwè, si nou fè sé bagay-la yo ka fè-a, tèl kon; achté sa nou vlé èvèk voyajé diféwan koté, nou kay ni djèwté. Bon, sé pa an péché pou enjwi bèl bagay. Anfen, Jéhova vlé nou enjwi sé bèl bagay-la i fè ban nou. Mé, an chay moun ki ka viv pou plè kò you tousèl, ka wéyalizé pli ta yo pa té twapé djèwté an sé bagay-la yo té ka kouwi dèyè-a. Yon sésé ki ka wann sèvis kon yon piyonnè, non’y sé Eva, di: “Lè’w ka viv pou plè kò’w tousèl ou pa ka janmen satisfè.” Wi, si nou viv pou plè kò nou tousèl nou kay èspéyansé an chay twistès èk dézapwentman.

15. Ki lison nou sa apwann hòd Wa Sòlomonn?

¹⁵ Bon, èspéyans Wa Sòlomonn ka moutwé a klè, nou sa pèd djèwté nou si nou ka dépan asou lajan, èk plézi pou jwenn djèwté. Wi, Wa Sòlomonn éséyé fè plizyè diféwan bagay pou wè si yo té sa ba’y djèwté. Pou ègzanp, i manjé tout diféwan kalté manjé, i kouté an chay bèl mizik, èk i achté an chay bèl bagay. Mé sé bagay sala pa té ba’y djèwté. Tann sa’y di an Éklésiyastis 1:8: ‘Zyé-a pa ka janmen satisfè épi sa’y ka wè, èk zòwèy-la pa ka janmen plen épi sa’y ka tann.’ (Éklé. 2:1-11) Wi, adan moun ka kwè, si yo ni lajan, èk yo sa fè sa yo vlé, yo kay ni djèwté. Mé sa sé an mansonj, paski sé bagay sala pa sa ban nou djèwté ki wéyèl.

16. Pouki nou ka ni djèwté lè nou fè bagay bay lézòt? (Gadé sé pòtwé-a osi.)

¹⁶ Sa ki sa édé nou pou ni lajwa ankò. Bon, Jézi di: “Tjèʼw ka pli kontan lè ou bay pasé lè ou wisivwè.” (Twav. 20:35) Yon ansyen non’y sé Alekos di: “Mwen ka éséyé fè ti bagay pou édé lézòt. Èk lè mwen édé lézòt, mwen pa ka katjilé asou kò mwen, èk sa ka ban mwen djèwté.” Alò kisa ou sa fè pou édé lézòt? Ében, pitèt ou òbzòvé an fwè ében an sè ka gadé twis. Konsa, ou sa palé épi’y pou ankouwajé’y. Pitèt ou pa kay sa wanjé pwòblenm-lan, mé ou sa byen kouté’y, èk fè’y chonjé i sa ladjé tout twaka’y asou Jéhova. (Sam 55:22; 68:19) Osi, ou sa édé’y apwésyé ki, Jéhova pa abandonnen’y. (Sam 37:28; Izay. 59:1) Anfen, ou sa jis fè an bagay pou édé’y. Pou ègzanp, ou sa pwépawé an ti wipa ba li, ou sa vizité’y lakay li, ében ou sa alé pwan an ti maché épi’y. Ou sa osi envité’y pou alé pwéché épi’w, èvèk sa kay ba’y an chay lajwa. Wi, kité Jéhova sèvi’w pou ankouwajé lézòt, èvèk lè nou fè sa nou kay vwéman ni djèwté!​—Pwov. 11:25.

17. Si nou vlé djèwté, kisa nou ni pou fè? (Sam 43:4)

¹⁷ Nou sa vwéman ni djèwté si nou kontiné vansé pwé Jéhova, èk fè sa ki ka plè’y. Chonjé, Bib-la ka pwonmèt nou ki, sé Jéhova ki sa ban nou djèwté ki wéyèl. (Li Sam 43:4.) Wi, menm si nou ni pwòblenm, nou pa bizwen ba kò nou tèt cho ében santi pè. Konsa annou tjenn Jéhova kon pli bon jan nou, èk si nou fè sa Jéhova kay ban nou djèwté pou tout tan!​—Sam 144:15.