¿Saʼ katoʼw e laa chaʼ kakʼam laa ri kʼutunik re ri Biblia y na kaya ta kan laa?

E kʼo jujun tikaweex lik kʼayew chike kakikʼam ri kʼutunik re ri Biblia. Pero lik chirajawaxik kaqaʼan qachuqʼabʼ, ma ri kaqariqo lik utz che ri qakʼaslemaal. Laj tzʼonoom chibʼil iibʼ laa: «¿Kanchʼij nawi ri in chaʼ na kanya ta kan ri kʼutunik re ri Biblia? ¿Suʼchaak nawi lik chirajawaxik kanʼan ri chuqʼabʼ?». ¿Saʼ katoʼw e laa chaʼ na kaya ta kan laa rumajik ri Biblia, tobʼ kariq laa kʼaxkʼoliil pa ri kʼaslemaal laa?

1. ¿Suʼchaak nawi lik chirajawaxik kakʼam laa ri kʼutunik re ri Biblia y na kaya ta kan laa?

«Ruchʼaʼtem ri Dios lik kʼaslik y lik kʼo uchuqʼabʼ» (Hebreos 4:12). Ri Biblia e jun wuuj lik chirajawaxik wi ma kubʼiʼij ri kuchʼobʼ ri Dios y ri kunaʼ che laa. Na xew ta kajawaxik chaʼ kuya ri naʼoj laa, e mismo kutoʼ laa pa ri bʼinik silabʼik laa chaʼ kabʼin laa pa ri bʼee jusukʼ y kuya ri oyeʼem laa chiqawach panoq. Ri kʼutunik re ri Biblia kutoʼ laa, pero ri más chirajawaxik e kaʼan laa ramigo ri Jehová. Rutziij upixabʼ ri Dios lik kʼo uchuqʼabʼ, echiriʼ kakʼam laa ri kʼutunik re ri Biblia, kaya laa luwar che ri Dios kuʼan utz che ri kʼaslemaal laa.

2. ¿Suʼchaak nawi lik chirajawaxik kaqatzukuj ri naʼoj kʼo chupa ri Biblia?

Ri kʼutunik kʼo chupa ri Biblia e junaam ruukʼ juna nimalaj bʼeyomaliil. Ri Biblia kubʼiʼij, chaloqʼo ri qatziij y makʼayij (Proverbios 23:23). We ri oj kaqilo e ri Biblia lik kʼo kajawax wi chaqe chwach juna nimalaj bʼeyomaliil, na kaqaya ta kan ri kʼutunik re ri Biblia tobʼ kakʼun lo kʼaxkʼoliil pa ri qakʼaslemaal (chila laa Proverbios 2:4, 5).

3. ¿Saʼ toʼik laa kuʼan ri Jehová chaʼ kakʼam laa ri kʼutunik re ri Biblia y na kaya ta kan laa?

Jehová lik nim uchuqʼabʼ, e rire xʼanaw re ronoje ri kʼolik y rire amigo e laa. Jehová retaʼam ri kʼo chupa ri animaʼ laa y karaaj kutoʼ laa chaʼ jelaʼ kamaj laa puwiʼ rire. E ri Dios kaʼanaw che laa lik kacha kʼuʼx laa che uʼanik ri utz chwach y e rire ri katoʼw e laa che uʼanik ri karaaj rire (chila laa Filipenses 2:13). Ruma laʼ we na kaʼaj ta laa kakʼam laa ri kʼutunik re ri Biblia, e ri Dios kuya chuqʼabʼ laa. Laj lik kʼayew che laa kakoj laa tziij che ri kubʼiʼij ri Biblia, pero ri Jehová kutoʼ laa che uʼanik. We kʼo laa pa juna kʼaxkʼoliil o kʼo junoq katernabʼeem e laa, e ri Jehová kuya chuqʼabʼ laa chaʼ jelaʼ kachʼij laa ri kʼaxkʼoliil. Lik chirajawaxik katzʼonoj laa che ri Jehová kutoʼ laa chaʼ kakʼam laa ri kʼutunik re ri Biblia y na kaya ta kan laa (1 Tesalonicenses 5:17).

NIMARISAJ RI NAʼOJ LAA

4. Lik chirajawaxik kesaj laa tiempo chaʼ kamaj laa más puwiʼ ri Biblia

Lik kʼo kaqaʼano y kaqachʼobʼo na jamal ta qawach, laj lik kʼayew kaqesaj tiempo che ukʼamik ri kʼutunik re ri Biblia. ¿Saʼ nawi kaʼan laa? Chila alaaq Filipenses 1:10 y chʼaʼta alaaq puwiʼ ri taq tzʼonobʼenik:

• ¿Saʼ «ri lik taqal» che laa pa ri kʼaslemaal laa?

• ¿Saʼ ruʼanik kaʼan laa chaʼ na jinta kaqʼaten e laa chaʼ kakʼam laa ri kʼutunik re ri Biblia ma e más chirajawaxik pa ri kʼaslemaal laa?

1. We nabʼe kakoj laa ri sanyeebʼ chupa rukʼolibʼal y tekʼuchiriʼ kakoj laa rabʼaj puwiʼ ri sanyeebʼ, rabʼaj na kok ta chik.

2. Pero, we nabʼe kakoj laa rabʼaj, ya laj kok ronoje ri sanyeebʼ. E mismo kaʼan laa, we nabʼe kaya laa «ri lik taqal» che laa pa ri kʼaslemaal laa, jelaʼ kariq laa ri tiempo che uʼanik ronoje ri kaʼan laa.

Lik chirajawaxik kaqetaʼmaj uwach ri Dios y kaqayak uqʼiij. Ri kʼutunik re ri Biblia kojutoʼo chaʼ kaqetaʼmaj uwach y kaqayak uqʼiij ri Dios. Chila alaaq Mateo 5:3 y chʼaʼta alaaq puwiʼ ri tzʼonobʼenik:

• We kaqesaj tiempo che chaʼ kaqakʼam ri kʼutunik re ri Biblia, ¿saʼ kojutoʼ wi pa ri qakʼaslemaal?

5. Maya kan laa uk’amik ri kʼutunik re ri Biblia tobʼ kʼo junoq katernabʼeem e laa

VIDEO: Xinriq ri utz ma na xinya ta kanoq (5:22)

• Echiriʼ ri Francesco xubʼiʼij chike ri ramigo y rupamilia rire katajin che umajik puwiʼ ri Biblia, ¿saʼ xkiʼan rike?

• ¿Suʼchaak lik utz xuʼan ri Francesco ma na xuya ta kan umajik puwiʼ ri Biblia?

Chila alaaq 2 Timoteo 2:24, 25 y chʼaʼta alaaq puwiʼ ri taq tzʼonobʼenik:

• ¿Saʼ kakichʼobʼ ri taq amigo laa y ri pamilia laa e katajin laa che umajik ri kʼo chupa ri Biblia?

• ¿Saʼ kaʼan laa echiriʼ junoq na karaaj taj kakʼam laa ri kʼutunik re ri Biblia? ¿Y suʼchaak nawi kaʼan laa waʼ?

6. Lik kubʼaʼ kʼuʼx laa che ri Jehová e rire katoʼw e laa

VIDEO: Jehová kojutoʼo chaʼ kaqajalkʼatij ri qabʼinik qasilabʼik (3:56)

• Chupa ri video, ¿saʼ ri jalkʼatinik xuʼan ri Jim pa rukʼaslemaal chaʼ kukoj utziij ri Jehová?

• Che ri xuʼan ri Jim, ¿saʼ lik kukʼul kʼuʼx laa?

Chila alaaq Hebreos 11:6 y chʼaʼta alaaq puwiʼ ri taq tzʼonobʼenik:

• E kʼo tikaweex kakiʼan kichuqʼabʼ chaʼ kaketaʼmaj uwach y kakiʼan ri kukʼul ukʼuʼx ri Jehová, ¿saʼ kuʼan ri Jehová chike ri «ketzukuw re»?

• Echiriʼ kaʼan laa ri chuqʼabʼ chaʼ kakʼam laa ri kʼutunik re ri Biblia, ¿saʼ kunaʼ ri Jehová?

RI XMAJ LAA

Tobʼ lik kʼayew kakʼam laa ri kʼutunik re ri Biblia, pero we na kaya ta kan laa, kutoʼ laa chaʼ kariq laa kiʼkotemal pa ri kʼaslemaal laa na jinta ukʼisik. We kakubʼaʼ kʼuʼx laa che ri Jehová, e rire kayaʼw ukʼaxel che laa.

Kojchʼaʼt che ri xmaj laa

• ¿Suʼchaak nawi lik chirajawaxik che laa ri kukʼut ri Biblia?

• ¿Saʼ ruʼanik kaqʼalajisaj laa ri kukʼut ri Biblia e «ri lik taqal» pa ri kʼaslemaal laa?

• ¿Suʼchaak nawi lik chirajawaxik katzʼonoj laa che ri Jehová chaʼ kakʼam laa ri kʼutunik re ri Biblia y na kaya ta kan laa?

KAMAJ LAA MÁS

Chila laa kajibʼ toʼbʼal, saʼ e toʼtajinaq wi ukʼiyal tikaweex che uchapabʼexik chi utz ri ki-tiempo.

“Cómo invertir sabiamente el tiempo” (¡Despertad!, febrero de 2014)

Jun ixoq lik karaaj kukiʼkotisaj ri ranimaʼ ri Dios. Pero, ri rachijiil na karaaj taj e ri rixoqiil kukʼam ri kʼutunik re ri Biblia. Chila laa saʼ ri toʼbʼal xuya ri Jehová che rixoq.

Jehová kuya qachuqʼabʼ echiriʼ ojkʼo pa kʼaxkʼoliil 5:05

Chila laa ri chuqʼabʼ xuʼan jun ixoq chaʼ xutoʼ ri rachijiil.

Lik xuchʼobʼ raqan pachike ri religión kuqʼalajisaj ri qʼiijsaq 6:30

Laj katzʼaq kichiʼ ri testigo re Jehová e jachal kipa ri pamilia, ¿qatziij nawi laʼ?

“¿Separan los testigos de Jehová a las familias, o las unen?” (Chila laa pa jw.org)