April

Be ko nɛ be ɔ, huɛ bɔmi kpakpa ngɛ e kɛ Yehowa a kpɛti. Se pee se ɔ, bɔfo nɛ ɔ suɔ kaa adesahi nɛ ja lɛ. Jinɛ e sa kaa e je e juɛmi kɛ je akɔnɔ yaya nɛ ɔ nɔ, se e pee we jã, mohu ɔ, e ha nɛ akɔnɔ yaya nɛ ɔ wa ngɛ e mi kɛ ya si benɛ e pee yayami. (Yak. 1:14, 15) Wa li e biɛ nitsɛnitsɛ, se amlɔ nɛ ɔ lɛɛ, wa le kaa a tsɛɛ lɛ ke Satan. E “kɛ anɔkuale yi gblegbleegble.” E tsɔ Yehowa hɛ mi atua nɛ e ba plɛ “lakpatsɛ kpanaku.” (Yoh. 8:44) Kɛ je benɛ Satan tsɔ Yehowa hɛ mi atua a, e ba pee Yehowa kɛ adesahi tsuo a he nyɛlɔ kpanaku. Ke wa kane bɔ nɛ Baiblo ɔ tu Satan he munyu ha a, lɔ ɔ haa nɛ wa naa su yayahi nɛ Satan ngɛ. Satan sisi ji “Nɔ Nɛ Teɔ Si Kɛ Woɔ Nɔ.” Enɛ ɔ tsɔɔ kaa bɔfo yiwutsotsɛ nɛ ɔ sume Mawu nɔ yemi ɔ, nɛ e ngɛ mɔde bɔe kaa e maa hwu kɛ si Mawu nɔ yemi ɔ. Satan ngɛ hlae nɛ Yehowa nɔ yemi ɔ nɛ ba nyagbe. w15 5/15 1:1, 2

Ke wa kaseɔ Baiblo ɔ, lɔ ɔ yeɔ bua wɔ nɛ wa naa hehi nɛ e sa kaa waa pee tsakemihi ngɛ konɛ wa nyɛ nɛ wa sɔmɔ Yehowa saminya. Jehanɛ se hu ɔ, wa naa níhi nɛ e jeɔ e suɔmi mi nɛ e peeɔ ɔ, nɛ wa kaseɔ e su kpakpa amɛ hu a he ní. Enɛ ɔ haa nɛ suɔmi nɛ wa ngɛ kɛ ha lɛ ɔ mi waa. Be mi nɛ suɔmi nɛ wa ngɛ kɛ ha lɛ ɔ mi ngɛ wae ɔ, lɛ hu suɔmi nɛ e ngɛ kɛ ha wɔ ɔ mi waa. Enɛ ɔ haa nɛ huɛ bɔmi nɛ ngɛ waa kɛ lɛ wa kpɛti ɔ mi waa. Ke wa suɔ nɛ waa hɛ wɔ kɛ su Yehowa he ɔ, lɛɛ e he hia nɛ waa kɛ juɛmi kpakpa nɛ kase Baiblo ɔ. Yohane 17:3 ɔ de ke: ‘Ke a ná le kaa mo ji anɔkuale Mawu ɔ, nɛ a le Yesu Kristo, nɔ nɛ o tsɔ ɔ, a ma ná neneene wami.’ E ngɛ mi kaa ke wa kane Baiblo ɔ, wa ma nyɛ maa kase ní ehehi nɛ a ngɛ bua jɔmi mohu lɛɛ, se oti nɛ e sa kaa wa kɛ ma wa hɛ mi ji, nɛ wa maa “le” Yehowa kaa e ji Nɔ ko nɛ e ngɛ nitsɛnitsɛ. (2 Mose 33:13; La 25:4) Yehowa pee ní komɛ nɛ a bɔ he amaniɛ ngɛ Baiblo ɔ mi nɛ wa nui sisi. Ke wa naa Yehowa kaa wa Huɛ nɛ nyu bi ngɛ waa kɛ lɛ wa kpɛti ɔ, wa be haoe tsɔ ngɛ jamɛ a Baiblo mi munyu ɔmɛ a he. w15 4/15 3:6-8

Asafo mi nikɔtɔma komɛ nyɛ nɛ a tsɔse nyɛmimɛ nyumuhi nɛ a ngɛ babauu tsue ngɛ asafo ɔ mi. Lingmi nɛ ɔ, a bi mɛ blɔ nɔ nɛ a gu kɛ pee jã. E ngɛ mi kaa a je ma ekpaekpahi a nɔ mohu lɛɛ, se mɛ tsuo a gbi kɔ. Mɛni enɛ ɔ tsɔɔ? E tsɔɔ kaa ngɛ ‘asafo tsuaa asafo mi ngɛ he tsuaa he’ ɔ, ke a da Baiblo ɔ nɔ kɛ tsɔse nɔ ko ɔ, nɔ ɔ náa he se. E he hia nɛ tsɔɔlɔ ɔ nɛ dla ní kaselɔ ɔ tsui. Mɛni he je nɛ enɛ ɔ he hia a? Kaa bɔ nɛ e he hia kaa ngmɔ hulɔ nɛ dla zugba a loko e du ní ɔ, jã kɛ̃ nɛ e he hia nɛ tsɔɔlɔ ɔ hu nɛ dla ní kaselɔ ɔ tsui loko e tsɔɔ lɛ ní hehi. Mɛni blɔ nɔ tsɔɔlɔ ko maa gu kɛ dla e ní kaselɔ ko tsui? E ma nyɛ maa kase bɔ nɛ Samuel plɛ kɛ dla Saul tsui ha konɛ Saul nɛ e nyɛ nɛ e nyɛɛ Israel bi ɔmɛ a hɛ mi ɔ.​—1 Sam. 9:15-27; 10:1. w15 4/15 1:11, 12

Níhi fuu nɛ je ɔ woɔ nihi he wami kaa a pee ɔ kɛ Baiblo mlaahi kɔ we. Ngɛ anɔkuale mi ɔ, tsa pi nɔ́ tsuaa nɔ́ nɛ ngɛ je ɔ mi ɔ ji nɔ́ yaya. Se e sa nɛ waa le kaa Satan ma nyɛ maa da níhi nɛ ngɛ je ɔ mi nɛ peeɔ wɔ akɔnɔ ɔ nɔ kɛ sisi wɔ konɛ waa pee yayami. Aloo e maa bɔ mɔde kaa e ma ha nɛ waa suɔ je ɔ konɛ wa ma wa hɛ kɛ fɔ Yehowa jami nɔ. (1 Yoh. 2:15, 16) Ngɛ kaseli ɔmɛ a be ɔ mi ɔ, Kristo se nyɛɛli komɛ ná suɔmi kɛ ha je ɔ. Kaa nɔ hyɛmi nɔ́ ɔ, Paulo ngma ke: ‘Dema je ye he, ejakaa lɛɛ e ya suɔ mwɔnɛmwɔnɛ je nɛ ɔ.’ (2 Tim. 4:10) Baiblo ɔ tsɔɔ we wɔ nɔ́ pɔtɛɛ nɛ Dema suɔ ngɛ je ɔ mi, nɛ lɔ ɔ ha nɛ e je Paulo he ɔ. Eko ɔ, Dema suɔ he lo nya níhi pe Yehowa sɔmɔmi. Ke jã a, lɛɛ he blɔhi nɛ Dema ko ná ngɛ Mawu sɔmɔmi mi ɔ ngmɛɛ lɛ. Anɛ se nami ngɛ nɔ́ nɛ e pee ɔ he lo? Dɛbi. Jinɛ e sa kaa Dema ko ya nɔ nɛ e ko ye bua Paulo. Nɔ́ ko be nɛ Dema ná ngɛ je ɔ mi nɛ e kɛ nɔ́ nɛ jinɛ e ko ná ngɛ Yehowa ngɔ ɔ ko sɔ!​—Abɛ 10:22. w15 5/15 2:10, 11

Ke Yesu na kaa nihi ngɛ nɔ́ nae ɔ, e nuɔ he ha mɛ, e ngɛ mi kaa e kɛ jamɛ a si himi ɔ eko kpi hyɛ mohu. Kaa nɔ hyɛmi nɔ́ ɔ, e le kaa nihi fuu kɛ si himi nɛ mi wa ngɛ kpee. Jami nya dali ɔmɛ sisiɔ mɛ, nɛ a woɔ mɛ mlaahi fuu nɛ ji Mawu ngɔ. Nihi yeɔ jami nya dali nɛ ɔmɛ gbeye. (Mat. 23:4; Mar. 7:1-5; Yoh. 7:13) E ngɛ mi kaa Yesu lɛɛ e yi mɛ gbeye nɛ e he we a lakpa munyu ɔmɛ yi mohu lɛɛ, se e nu ni ɔmɛ sisi. Benɛ Yesu na kaa a ngɛ ni ɔmɛ yi mi wae ɔ, e hao lɛ wawɛɛ. A be yemi kɛ bualɔ ko. A ngɛ “kaa tohi nɛ be hyɛlɔ.” (Mat. 9:36) Yesu kase e Tsɛ ɔ, enɛ ɔ he ɔ, e suɔ nihi, nɛ e jeɔ ‘mɔbɔ nami kɛ mi mi himi’ kpo kɛ haa mɛ. Benɛ Yesu na kaa nihi ngɛ nɔ́ nae ɔ, e ye bua mɛ, ejakaa e suɔ mɛ. Yesu pee e ní kaa e Tsɛ ɔ pɛpɛɛpɛ. Kaa nɔ hyɛmi nɔ́ ɔ, be ko ɔ, Yesu bɔfo ɔmɛ ya fiɛɛ ngɛ he ko tsitsaa nɛ pɔ tɔ a he, nɛ e he hia kaa a jɔɔ a he ngɛ he ko nɛ ngɛ dii. Se Yesu na nihi fuu nɛ a ngɛ lɛ mlɛe. E na kaa e sa nɛ e ye bua mɛ. Enɛ ɔ he ɔ, “e bɔni mɛ níhi fuu tsɔɔmi.”​—Mar. 6:30, 31, 34. w15 5/15 4:3, 4

Mawu Bitɛte ɔ ha nɛ wa na kaa Yehowa ngɛ juɛmi wawɛɛ nitsɛ. Lɛ ji e Tsɛ ɔ “ga ní tsulɔ kpanaa.” Hyɛ bɔ nɛ Yesu bua maa jɔ ha benɛ e Tsɛ ɔ “ngɔ hiɔwe kɛ to e blɔ he,” “nɛ e to je ɔ sisi ɔ.” Se ngɛ níhi tsuo nɛ e Tsɛ ɔ bɔ ɔ a kpɛti ɔ, Yesu ‘náa nimli adesahi tsuo a he bua jɔmi titli.’ (Abɛ 8:22-31) Niinɛ, Yesu suɔ adesahi kɛ je blema tɔɔ. Pee se ɔ, Yesu tsɔɔ kaa e yeɔ e Tsɛ ɔ anɔkuale nɛ e suɔ lɛ, nɛ e suɔ adesahi tsuo wawɛɛ. Enɛ ɔ he ɔ, e je suɔmi mi nɛ e si hiɔwe nɛ e ba zugba a nɔ kaa adesa. Yesu je suɔmi mi nɛ e pee jã konɛ e nyɛ nɛ e ngɔ e wami kɛ ha konɛ e “kɛ he nihi fuu a yi wami.” (Filip. 2:5-8; Mat. 20:28) Yesu suɔ nɔmlɔ wawɛɛ! w15 6/15 2:1, 2

Anɛ o bua jɔ nɔ́ nɛ Yehowa pee ha mo ɔ he lo? Ke jã a, lɛɛ e sa nɛ o jɔɔ o he nɔ kɛ ha Yehowa nɛ o ha nɛ a baptisi mo. Ke o jɔɔ o he nɔ ha Mawu ɔ, lɔ ɔ tsɔɔ kaa o wo lɛ si kaa o ma sɔmɔ lɛ o wami be tsuo. Anɛ e sa kaa o ye gbeye kaa o maa pee jã lo? Dɛbi! Yehowa suɔ nɛ e hi ha mo, nɛ e maa jɔɔ nihi nɛ a peeɔ e suɔmi nya ní ɔ. (Heb. 11:6) Ke o jɔɔ o he nɔ ha Yehowa nɛ o ha nɛ a baptisi mo ɔ, o si himi maa pee kpakpa! Yehowa suɔ nɛ e hi ha mo. Se Satan foɔ lɛ pɛ e nɔ́ mi, nɛ e susuu we o he. Ke o nyɛɛ e se ɔ, e be mo nɔ́ kpakpa ko hae. E be sane kpakpa ko, nɛ e be hɛ nɔ kami ko hulɔ. E be hae nɛ o ná si himi kpakpa hwɔɔ se, ejakaa lɛ nitsɛ hu e be si himi kpakpa náe hwɔɔ se! w16.03 2:16, 18, 19

Loko huɛ bɔmi gbagbanii maa hi o kɛ Yehowa nyɛ kpɛti ɔ, e sa nɛ o ná nɔ mi mami kaa e buɔ sɔlemi tue. Mo susu nɔ́ nɛ ɔ he nɛ o hyɛ: Loko Yesu maa ba zugba a nɔ ɔ, e na kaa Yehowa haa adesahi nɛ a sɔmɔɔ lɛ ɔ, a sɔlemihi a heto. Benɛ e ba zugba a nɔ ɔ, e sɔle kɛ ha e Tsɛ ɔ ngɛ hiɔwe nɛ e de lɛ e susumihi, kɛ bɔ nɛ e peeɔ lɛ ngɛ níhi a he ha. Be ko po ɔ, e sɔle nyɔnyɔɔnyɔ. (Luka 6:12; 22:40-46) Ke Yesu le kaa Yehowa bui sɔlemi tue ɔ, anɛ e ko sɔle nyɔnyɔɔnyɔ lo? Jehanɛ se hu ɔ, Yesu tsɔɔ e se nyɛɛli ɔmɛ bɔ nɛ a sɔleɔ ha. Ke Yesu le kaa Yehowa bui sɔlemi tue ɔ, anɛ e ko tsɔɔ e kaseli ɔmɛ bɔ nɛ a sɔleɔ ha lo? E ngɛ heii kaa Yesu le kaa Yehowa buɔ sɔlemi tue saminya. Wɔ hu wa ma nyɛ ma ná nɔ mi mami kaa Yehowa buɔ sɔlemi tue.​—La 65:2. w15 4/15 3:11, 13

Ke o bimɛ ɔmɛ nuɔ níhi nɛ o deɔ ke o ngɛ sɔlee ɔ, lɔ ɔ ma ha nɛ a kɛ a hɛ maa fɔ Yehowa nɔ. Ke o ngɛ sɔlee ɔ, ko de Yehowa kaa e ye bua o bimɛ ɔmɛ pɛ, mohu ɔ, de lɛ kaa e ye bua mo nitsɛ hulɔ. Ana nɛ e je Brazil ɔ de ke: “Ke waa kɛ nyagbahi ngɛ kpee kaa eko ɔ, ye na loo ye nɛ be he wami ɔ, ye fɔli ɔmɛ sɔleɔ ha Yehowa kaa e ye bua mɛ nɛ a da si himi ɔ nya, nɛ́ e ha mɛ juɛmi konɛ a nyɛ nɛ a mwɔ a yi mi kpɔ ngɛ blɔ nɛ da nɔ. Ke a kɛ haomi nɛ mi wa wawɛɛ ngɛ kpee po ɔ, a ngɔɔ a hɛ kɛ fɔɔ Yehowa nɔ konɛ e ye bua mɛ. Enɛ ɔ ha nɛ i kase kaa ma ngɔ ye hɛ kɛ fɔ Yehowa nɔ.” Ke o bimɛ ɔmɛ nuɔ nɛ o deɔ Yehowa kaa e wo mo kã konɛ o nyɛ nɛ o ye nyɛ kpɔ mi bimɛ ɔmɛ odase, aloo konɛ o nyɛ nɛ o de o nitsumitsɛ ɔ nɛ e ha mo blɔ nɛ o ya kpokpa nɔ kpe ko ɔ, lɔ ɔ ma ha nɛ a maa na kaa o kɛ o hɛ fɔɔ Yehowa nɔ kaa e ye bua mo, nɛ mɛ hu a maa pee jã. w15 11/15 1:7, 8

Níhi nɛ o ma nyɛ maa pee konɛ suɔmi nɛ o ngɛ ha Yehowa a mi nɛ wa a a kpɛti kake ji kpɔmi nɔ́ ɔ he nɛ o ma susu saminya. Kpɔmi nɔ́ ɔ ji nike ní nɛ pe kulaa nɛ Mawu kɛ ha adesahi. (2 Kor. 5:14, 15; 1 Yoh. 4:9, 19) Ke o pee jã a, o maa na kaa o bua maa jɔ nike ní nɛ se be nɛ ɔ he. Nɔ́ hetomi nɔ́ nɛ nyɛɛ se nɛ ɔ ma ha nɛ o na bɔ nɛ e sa kaa o pee o ní ngɛ kpɔmi nɔ́ ɔ he ha: Moo ngɔ lɛ kaa o ngɛ mue ngɛ pa ko mi nɛ nɔ ko ba je mo. Ke e je mo kɛ ba kpo ta a, anɛ nɔ́ nɛ o maa pee kɛkɛ ji kaa o maa ho we mi ya, nɛ o ma ya tsu o he, nɛ o hɛ maa je nɔ́ nɛ nɔ ɔ pee ha mo ɔ nɔ lo? Dɛbi! O bua maa jɔ kaa jamɛatsɛ ɔ he o yi wami, nɛ o maa na lɛ si! Jã kɛ̃ nɛ e sa kaa waa na Yehowa kɛ Yesu si wawɛɛ ngɛ kpɔmi nɔ́ ɔ he je. Wa maa pee mɛ pɛ a suɔmi nya ní! Akɛnɛ Yehowa kɛ Yesu suɔ wɔ he je ɔ, amlɔ nɛ ɔ, wa ngɛ hɛ kɛ nɔ fɔmi kaa wa maa hi zugba a nɔ ngɛ paradeiso mi kɛ ya neneene! w16.03 2:16, 17

Benɛ Yesu ngɛ hiɔwe ɔ, e kɛ jehahi fuu ye Yehowa anɔkuale. Enɛ ɔ he ɔ, Yehowa ná hɛ kɛ nɔ fɔmi ngɛ e mi wawɛɛ. Benɛ Yesu ba zugba a nɔ ɔ, e kɛ kahi nɛ mi wa pe kulaa kpe, se e ye Mawu anɔkuale, nɛ e fĩ Yehowa se kaa lɛ nɛ e ngɛ he blɔ nɛ e yeɔ adebɔ níhi a nɔ. E sa nɛ wa bua nɛ jɔ kaa Yesu ba gbo kɛ kpɔ̃ wɔ, ejakaa lɔ ɔ ha adesahi he blɔ kaa a ma nyɛ maa hi si kɛ ya neneene ngɛ Mawu je ehe ɔ mi! Bɔfo Yohane ngma ke: “Blɔ nɔ nɛ Mawu gu kɛ je e suɔmi ɔ kpo kɛ tsɔɔ wɔ ji nɛ ɔ nɛ; e tsɔ e Bi kake too ɔ kɛ ba je ɔ mi, konɛ kɛ gu e Bi ɔ nɔ ɔ, wa ná wami. Bɔ nɛ suɔmi ngɛ ji nɛ ɔ nɛ; pi wɔ nɛ wa sɛ hlami kɛ suɔ Mawu; Mawu mohu lɛ suɔ wɔ. Enɛ ɔ he je ɔ, e tsɔ e Bi ɔ kɛ ba, konɛ e ba dla waa kɛ Mawu wa kpɛti, nɛ a ngɔ wa he yayami ɔmɛ ngɔ pa wɔ.”​—1 Yoh. 4:9, 10. w15 11/15 3:13, 14

Adam ngɔ yayami kɛ gbenɔ kɛ sã wɔ tsuo, lɔ ɔ he ɔ, nɔ ko be nyɛe ma de ke, “Imi lɛɛ kpɔmi nɔ́ ɔ he hia we mi.” Mawu sɔmɔlɔ nɛ e yeɔ anɔkuale pe nɔ tsuaa nɔ po hia kpɔmi nɔ́ ɔ. A kɛ hiɔ ngua ko ke wa ti nɔ tsuaa nɔ! Mɛni e sa kaa suɔmi kɛ mɔbɔ nami nɛ Yehowa ngɛ ha wɔ ɔ nɛ wo wɔ he wami nɛ waa pee? ‘Anɛ ye nyɛmi Odasefo no ko tɔ̃ ye nɔ lo? Anɛ e yee ha mi kaa ma kɛ pa lɛ lo?’ E sa kaa waa kase Yehowa nɛ e “kɛ yayami paa nɔ” ɔ. (Neh. 9:17; La 86:5) Ke wa bua jɔ mɔbɔ nami nɛ Yehowa je kpo ha wɔ ɔ he ɔ, wa maa na nihi mɔbɔ, nɛ waa kɛ a tɔmihi maa pa mɛ kɛ je wa tsui mi. Ke wa sume wa nyɛmimɛ, nɛ waa kɛ a tɔmihi pɛ mɛ ɔ, wa be nyɛe maa hyɛ blɔ kaa Yehowa nɛ suɔ wɔ, nɛ e ngɔ wa tɔmihi kɛ pa wɔ. (Mat. 6:14, 15) Ke waa kɛ nihi a tɔmihi pa mɛ ɔ, lɔ ɔ tsɔɔ we kaa nɔ́ nɛ a pee ɔ dɔɛ wɔ, mohu ɔ, e ma ha nɛ wa ma ná bua jɔmi. w16.01 2:5, 15-17

Yesu tu munyu nɛ ɔ, ejakaa e suɔ kaa Petro kɛ kaseli kpa amɛ nɛ a piɛɛ e he ɔ nɛ susu ní kpakpahi nɛ a ma ná hwɔɔ se ɔ a he. A ma nyɛ maa po he foni ngɛ a juɛmi mi kaa a piɛɛ Yesu he kɛ ngɛ matsɛ yee ngɛ hiɔwe nɛ a ngɛ adesahi nɛ a peeɔ tue bumi ngɛ zugba a nɔ ɔ ye buae konɛ a ye mluku. Wa na nɔ́ nɛ ye bua Yehowa sɔmɔli nɛ a hemi kɛ yemi ɔ mi wa a. Habel susu si nɛ Yehowa wo kaa si himi kpakpa ko maa ba hwɔɔ se ɔ he, nɛ akɛnɛ e ná hemi kɛ yemi ngɛ si womi nɛ ɔ mi he je ɔ, Yehowa bua jɔ e he. Abraham susu be nɛ si nɛ Yehowa wo kɛ kɔ “nina” a he ɔ maa ba mi ɔ he, enɛ ɔ ha nɛ e bu Yehowa tue ngɛ si himi nɛ mi wa po mi. (1 Mose 3:15) Mose hyɛ jɔɔmi nɛ Yehowa wo lɛ he si ɔ blɔ, nɛ enɛ ɔ ye bua lɛ nɛ e ná suɔmi kɛ ha Yehowa, nɛ e ye lɛ anɔkuale. (Heb. 11:26) Ke wa ngɛ hemi kɛ yemi ngɛ Yehowa mi, nɛ wa suɔ lɛ ɔ, lɔ ɔ ma ha nɛ wa maa susu e si womi ɔmɛ a he. w15 5/15 3:17, 18

Ke nɔ ko suɔ kaa e maa pee Kristofo no nɛ e wa a, e kaseɔ Yesu nɔ hyɛmi nɔ́ ɔ, nɛ e bɔɔ mɔde wawɛɛ kaa e maa nu Baiblo ɔ sisi. E hlaa níhi a mi ngɛ Ngmami ɔ mi daa konɛ e nu anɔkualehi nɛ a mi kuɔ ɔ a sisi, ejakaa e le kaa “nihi nɛ a wa a, a nɔ́ ji niye ní nitsɛ.” (Heb. 5:14) Kristofo no nɛ e wa a suɔ kaa e maa ‘le Baiblo ɔ mi saminya.’ (Efe. 4:13) Enɛ ɔ he ɔ, mo bi o he ke: ‘Anɛ i kaneɔ Baiblo ɔ daa ligbi lo? Anɛ i to blɔ nya kɛ ha dɛ he ní kasemi peemi lo? Anɛ i kɛ ye weku ɔ wa peeɔ weku Mawu jami daa otsi lo?’ Ke o ngɛ Baiblo ɔ kasee ɔ, mo hla sisi tomi mlaahi nɛ ma nyɛ maa ye bua mo konɛ o le bɔ nɛ Yehowa susuɔ aloo e peeɔ e ní ngɛ níhi a he ha. Lɔ ɔ se ɔ, ke e he hia kaa o mwɔ o yi mi kpɔ ɔ, moo da sisi tomi mlaa nɛ ɔmɛ a nɔ kɛ pee jã. Enɛ ɔ ma ha nɛ o maa hɛ mo kɛ su Yehowa he haa. w15 9/15 1:5, 9, 10

Yesu le nɔ́ tsuaa nɔ́ nɛ kɔɔ zugba a he fitsofitso. E le bɔ nɛ e kɛ níhi nɛ ngɛ zugba a nɔ ɔ ma tsu ní, kɛ bɔ nɛ e ma kudɔ mɛ ha. Benɛ Yesu ngɛ zugba a nɔ ɔ, e jɔɔ wo kɛ kɔɔhiɔ he kɛ tsɔɔ kaa Mawu ha lɛ he wami. Mo susu nɔ́ nɛ ya nɔ ɔ he nɛ o hyɛ: Oslɔke ɔ ngɛ kue kɛ ngɛ lɛ ɔ fiae, nɛ e ngɛ nyu muɔe kɛ ngɛ lɛ ɔ mi woe. Ngɛ kɔɔhiɔ vuguvugu nɛ ɔ nɛ ngɛ fiae, kɛ lɛ ɔ nɛ ngɛ kpae kɛ ngɛ yae kɛ ngɛ bae nɛ ɔ tsuo se ɔ, Yesu hwɔ mahe pɔ̃pɔ̃ɔpɔ̃, ejakaa pɔ tɔ e he. Se Yesu kaseli ɔmɛ a tsui po nɛ a tsɛ̃ɛ lɛ nɛ a de lɛ ke: “Wa gbo oo!” (Mat. 8:25) Mɛni Yesu pee? E te si nɛ e de kɔɔhiɔ ɔ kɛ wo ɔ ke: “Ngmɛɛ dii!” (Mar. 4:39) Kɔɔhiɔ ɔ jɔɔ fiami nɛ wo ɔ “ngmɛ dii.” Nyakpɛ nɔ́ nɛ ɔ nɛ Yesu peeɔ tsɔɔ kaa e ngɛ he wami ngɛ kɔɔhiɔ, wo, kɛ ní kpahi a nɔ niinɛ! w15 6/15 1:12-14

Benɛ Yesu tu sɔlemi he nɔ hyɛmi nɔ́ ɔ he munyu ta a, e tsɔɔ kaa e sɛ nɛ waa kɛ wa juɛmi nɛ ma he lo nya níhi a nɔ. E tsɔɔ kaa ke Yehowa hyɛɔ nga nɔ mɔmɔhi po a nɔ ɔ, ‘Anɛ Mawu be nyɛe maa pee jã kɛ be nɔ ha nyɛ lo! Oo, nyɛ hemi kɛ yemi pi sãasãa!’ Lɔ ɔ se ɔ, e kpale tĩ mi ke: “Nyɛ ko hao nyɛ he ha hwɔɔ.” (Mat. 6:30-34) E he hia we nɛ waa hao wa he ngɛ níhi nɛ maa hia wɔ hwɔɔ se ɔ a he. Mohu ɔ, ke wa nine su wa daa ligbi hiami níhi a nɔ ɔ, e sa nɛ wa bua nɛ jɔ lɔ ɔ he. Kaa nɔ hyɛmi nɔ́ ɔ, wa ma nyɛ maa sɔle konɛ wa ná he ko nɛ waa kɛ wa yi nɛ fɔ, nɛ wa ná ní tsumi nɛ wa tsu kɛ hyɛ wa weku mi bimɛ. Ke wa be he wami hu ɔ, wa ma nyɛ maa sɔle konɛ Yehowa nɛ ha wɔ juɛmi nɛ wa kɛ mwɔ wa yi mi kpɔ ngɛ nile mi. Se nɔ́ ko ngɛ nɛ e he hia wawɛɛ nɛ e sa kaa waa sɔle kɛ bi. “Pi abolo kɛkɛ nɛ haa nɔmlɔ yi náa wami, se mohu munyu tsuaa munyu nɛ jee Mawu nya a.” (Mat. 4:4) Lɔ ɔ he ɔ, e sa nɛ waa sɔle konɛ Yehowa nɛ ya nɔ nɛ e tsɔɔ wɔ ní, nɛ e ha wɔ níhi nɛ wa hia konɛ huɛ bɔmi gbagbanii nɛ hi waa kɛ lɛ wa kpɛti daa. w15 6/15 5:4, 7, 8

Ke o ya je si himi nɛ mi wa mi po ɔ, moo ya nɔ nɛ o sɔle ha Yehowa nɛ e ye bua mo konɛ o yu o he ngɛ je mi bami yaya ní peepeehi a he nɛ o pee nɔ́ nɛ da. Benɛ wa ba kase we Yehowa he ní lolo ɔ, eko ɔ, wa peeɔ níhi nɛ e sume, nɛ eko ɔ, loloolo ɔ, wa ngɛ mɔde bɔe konɛ waa hwu kɛ si akɔnɔ yaya nɛ ɔmɛ. Se Yehowa ma nyɛ maa ye bua wɔ konɛ waa pee tsakemihi nɛ waa pee níhi nɛ maa sa e hɛ mi. Kaa nɔ hyɛmi nɔ́ ɔ, benɛ Matsɛ David kɛ Batsheba ya ná bɔmi se ɔ, David tsake e tsui nɛ e kpa Yehowa pɛɛ konɛ e bɔ “tsui nɛ he tsɔ” ha lɛ. E bi hu kaa Yehowa nɛ ye bua lɛ konɛ e bu Yehowa tue. (La 51:10, 12) Enɛ ɔ he ɔ, ke be ko nɛ be ɔ, wa ná akɔnɔ yayahi nɛ nya wa, nɛ loloolo ɔ, wa ngɛ mɔde bɔe kaa wa maa yu wa he ngɛ he ɔ, Yehowa ma nyɛ maa wo wɔ he wami wawɛɛ konɛ wa nyɛ nɛ waa bu lɛ tue nɛ waa pee nɔ́ nɛ da. Yehowa ma nyɛ maa ye bua wɔ konɛ wa susu ní kpakpahi a he.​—La 119:133. w15 6/15 3:5, 6

Nihi nɛ a wa ngɛ jeha mi nɛ a ngɛ asafo ɔ mi ɔ kaiɔ benɛ asafo sɔmɔlɔ pɛ lɛ hyɛɛ asafo ɔ nɔ se tsa pi nikɔtɔmahi a kuu ɔ, kɛ benɛ asafo ɔ ní tsumi kɔni ɔ sɔmɔlɔ lɛ hyɛɔ asafo ɔ ní tsumi kɔni ɔ nɔ se pi Asafo ɔ Ní Tsumi Kɔni Ajla Toli ɔmɛ ɔ. A kaiɔ benɛ Watch Tower Society ɔ nya dalɔ ɔ pɛ lɛ e kɛ blɔ tsɔɔmi haa Yehowa Odasefohi tsuo se pi Yehowa Odasefohi A Blɔ Tsɔɔmi Ajla Toli ɔmɛ ɔ. E ngɛ mi kaa nyɛmimɛ nyumu nɛ ɔmɛ tsuo ngɛ a se yeli mohu lɛɛ, se nɔ kake pɛ lɛ mwɔɔ yi mi kpɔ ngɛ asafohi a mi, ngɛ asafo ɔ ní tsumi kɔnihi, kɛ asafo ɔ ní tsumi yi ɔ. Ngɛ jeha 1970 ɔ se ɔ, a pee tsakemihi konɛ nikɔtɔmahi a kuuhi nɛ a mwɔ yi mi kpɔ, se pi nɔ kake. A da Ngmami ɔ sisi nɛ a ba nu saminya a nɔ kɛ pee jã. Tsa pi nɔ kake pɛ nɛ daa nɔ́ tsuaa nɔ́ nya ngɛ asafo ɔ mi, mohu ɔ, asafo mi nikɔtɔma amɛ tsuo, nɛ ji ‘nimli adesahi nɛ Yehowa kɛ ha kaa nike ní’ ɔ. Asafo ɔ náa su kpakpahi nɛ nikɔtɔma amɛ tsuo ngɛ ɔ he se.​—Efe. 4:8. w15 7/15 1:14, 15

Yehowa sɔmɔli kɛ a he wui níhi nɛ ngɔɔ mi gbami kɛ baa a mi. Ní nɛ ɔmɛ ekomɛ ji ma he suɔmi, nihi a hɛ mi hyɛmi, kɛ nihi a ní peepee kpahi. Mɛni he je? Ejakaa wa suɔ Yehowa, wa yeɔ lɛ anɔkuale, nɛ wa buɔ lɛ tue. (1 Yoh. 5:3) Ngɛ he saisaa nɛ wa je, kɛ he saisaa nɛ wa ngɛ ɔ tsuo se ɔ, wa suɔ kaa waa kɛ Mawu mlaahi ma tsu ní. Yehowa kɛ e Matsɛ Yemi ɔ se nɛ wa ma fĩ ɔ he hia pe nɔ́ tsuaa nɔ́. (Mat. 6:33) Enɛ ɔ he ɔ, wa ma nyɛ ma de ke, ‘pi je ɔ mi bi ji wɔ.’ (Yes. 2:4; Yoh. 17:11, 15, 16) Nihi babauu ngɛ je kɛ wɛ ɔ kɛ anɔkuale yemi fĩɔ ma, wɛtso, kusumihi, aloo a ma mi bɔɔlu fiami kuuhi po a se. Aywilɛho sane ji kaa enɛ ɔ ha nɛ nihi fuu kɛ a he siɔ koli, a nyɛɔ nihi, nɛ be komɛ ɔ, a gbeɔ nihi nɛ a fĩ ma kpahi a se ɔ po. Anɛ o kɛ o he woɔ ma sanehi a mi, aloo o yuɔ o he ngɛ níhi kaa jã a a he? w15 7/15 3:1, 2

Yehowa ji Mawu nɛ e he tsɔ nɛ e ngɛ klɔuklɔu. E peeɔ e ní ngɛ blɔ nya tomi nya. Enɛ ɔ he je nɛ e sa kaa wa ha nɛ wa Matsɛ Yemi Asa a nɔ kɛ e he nɛ tsɔ ɔ nɛ. (1 Kor. 14:33) Ke wa suɔ nɛ wa he nɛ tsɔ nɛ waa pee wa he klɔuklɔu kaa bɔ nɛ Yehowa ngɛ ɔ, e sa nɛ jami nɛ wa jaa lɛ, wa susumi, kɛ wa ní peepeehi a he nɛ tsɔ. Se pi lɔ ɔ pɛ. E sa kaa wa nɔmlɔ tso hu he nɛ tsɔ. (Kpoj. 19:8) Ke wa ha nɛ wa Matsɛ Yemi Asa a nɔ kɛ e he tsɔ ɔ, e be yee ha wɔ kaa wa maa fɔ nihi nine kɛ ba wa asafo mi kpehi a sisi. Ke e ba jã a, nihi maa na kaa wa yeɔ munyu nɛ wa fiɛɛɔ kaa je ehe nɛ mi tsɔ maa ba hwɔɔ se ɔ nɔ. A maa na kaa Mawu nɛ wa jaa a ngɛ klɔuklɔu nɛ e he tsɔ, nɛ e maa pee zugba nɛ ɔ paradeiso nɛ ngɛ fɛu. (Yes. 6:1-3; Kpoj. 11:18) Mɔsɔ kɛ bunyuku ngɛ he nɛ wa ngɛ ɔ jio, eko be jio, nihi a he tsɔ ngɛ he nɛ wa ngɛ ɔ jio, a he tsɔ we jio, wɔɔ lɛɛ e sa kaa wa ha nɛ wa Matsɛ Yemi Asa a nɔ kɛ e he nɛ tsɔ nyaii, ejakaa lejɛ ɔ nɛ wa jaa Yehowa ngɛ.​—5 Mose 23:14. w15 7/15 4:13-15

Benɛ Yesu se nyɛɛli ɔmɛ na kaa Yesu bɔni matsɛ yemi kɛ je jeha 1914 ɔ, a na kaa nyagbe ɔ ma nyɛ maa ba be fɛɛ be. Enɛ ɔ he ɔ, a ngɛ fiɛɛe kɛ tsɔɔ kaa a dla a he kɛ to. Yesu tsɔɔ kaa e ma nyɛ maa ba ngɛ “kungwɔ nɔ́ kpami be, loo mɔtu.” Ke e ba jã a, mɛni e he hia nɛ Yesu se nyɛɛli ɔmɛ nɛ a pee? Yesu de ke: ‘Nyɛɛ ya nɔ nɛ nyɛɛ hwɔɔ.’ Enɛ ɔ he ɔ, ke o ngɛ mlɛe jehahi babauu ji nɛ ɔ po ɔ, lɔ ɔ tsɔɔ we kaa nyagbe ɔ be bae piɔ, aloo e be bae ngɛ wa yi nɔ nɛ ɔ. Ngɔɔ lɛ kaa o ngɛ je ehe ɔ mi, nɛ gbamihi tsuo nɛ Yehowa gba kɛ kɔ nyagbe ɔ he ɔ ba mi. Hɛ kɛ nɔ fɔmi nɛ o ngɛ ngɛ Yehowa mi ɔ mi wa pe sa a, nɛ o ma ná nɔ mi mami kaa e maa pee nɔ́ fɛɛ nɔ́ nɛ e wo si kaa e maa pee ɔ. (Yosh. 23:14) O bua maa jɔ kaa Yehowa to be nɛ sa, nɛ e kpata je ɔ hɛ mi. O bua maa jɔ hu kaa e bɔ e we bi kɔkɔ kaa a ya nɔ nɛ a hyɛ nyagbe ɔ blɔ.​—Níts. 1:7; 1 Pet. 4:7. w15 8/15 2:10, 11, 14

Ngɛ hɛja jemi blɔ fa mi ɔ, nihi fuu hyɛɔ yi wu tso, ajuama bɔmi, kunya yemi, aloo daimoniohi a ní peepeehi aloo a kɛ a he woɔ níhi kaa jã a mi kɛ jeɔ a hɛja. Kaa nɔ hyɛmi nɔ́ ɔ, behi fuu ɔ, níhi nɛ nihi naa ngɛ Intanɛti ɔ kɛ tiivi nɔ, kɛ níhi nɛ a naa ngɛ sinihi, womihi, kɛ womi tɛtlɛɛhi a mi ɔ, ha nɛ e peeɔ mɛ kaa tɔmi ko be yi wu tso kɛ ajuama bɔmi ní peepeehi a he. Je mi bami komɛ nɛ be ko nɛ be ɔ, e peeɔ nihi nyakpɛ ɔ, mwɔnɛ ɔ lɛɛ nihi a bua jɔ he, nɛ mlaa kplɛɛ nɔ ngɛ he komɛ. Se lɔ ɔ tsɔɔ we kaa Yehowa kplɛɛ jamɛ a je mi bami ɔmɛ a nɔ. (Rom. 1:28-32) Ngɛ kaseli ɔmɛ a be ɔ mi hu ɔ, nihi ngɔɔ yi wu tso kɛ ajuama bɔmi níhi kɛ jeɔ a hɛja. Se Yesu se nyɛɛli ɔmɛ lɛɛ a pee we jã, ejakaa a baa a je mi ngɛ Mawu sisi tomi mlaahi a nya. Enɛ ɔ ‘peeɔ nihi nɛ bɔle mɛ ɔ nyakpɛ.’ Mɛni je mi kɛ ba? Nihi ye Kristo se nyɛɛli ɔmɛ a he fɛu, nɛ a wa mɛ yi mi.—1 Pet. 4:4. w15 8/15 4:2, 3

Kristofo no nɛ e wa a peeɔ níhi nɛ ma ha nɛ kake peemi maa hi asafo ɔ mi. (Efe. 4:1-6, 15) Kaa bɔ nɛ nɔmlɔ tso ɔ “kpɔ nya kpɔ nya amɛ tsuo tsa a sibi nya” a, jã kɛ̃ nɛ oti nɛ wɔ Kristofohi waa kɛ ma wa hɛ mi ji kaa wa maa pee kake kɛ tsu ní. Loko kake peemi maa hi Kristofo no ko kɛ e nyɛmimɛ Kristofohi a kpɛti ɔ, e sa nɛ e ba e he si. Lɔ ɔ he ɔ, ke nihi a gbɔjɔmi ha nɛ a pee nɔ́ ko nɛ e gba Kristofo no ko nɛ e wa a nya po ɔ, e bɔɔ mɔde wawɛɛ nɛ e haa nɛ kake peemi hii asafo ɔ mi. Enɛ ɔ he ɔ, mo bi o he ke: ‘Ke nyɛmi ko pee nɔ́ ko nɛ ye bua jɔɛ he ɔ, kɛ i peeɔ ye ní ha kɛɛ? Ke nɔ ko pee mi nɔdɔ nɔ́ ko ɔ, kɛ i nuɔ he ha kɛɛ? Anɛ i hiɔ nɔ ɔ nya lo? Aloo i bɔɔ mɔde kaa ma dla i kɛ lɛ wa kpɛti?’ Kristofo no nɛ e wa a, bɔɔ mɔde kaa e ma tsu nyagbahi a he ní mohu pe nɛ e maa ngɔ nyagbahi kɛ ba. Anɛ o ma o juɛmi nya si kaa o ma ha kake peemi maa hi asafo ɔ mi lo? w15 9/15 1:12, 13

Yesu ngɛ nɔ mi mami kaa Baiblo ɔ ji Mawu Munyu, nɛ ga womi kpakpahi ngɛ mi kɛ ha wɔ. Loko wa ma nyɛ maa kase Yesu ɔ, e sa nɛ waa kane Baiblo ɔ daa ligbi, nɛ waa kase, nɛ wa pue wa yi mi tɛ ngɛ ní kasemi nɛ ngɛ mi ɔ he. E sa nɛ wa hla sane bimihi nɛ wa nui a sisi ɔ a heto hulɔ. Kaa nɔ hyɛmi nɔ́ ɔ, anɛ o he ye niinɛ kaa wa ngɛ nyagbe ligbi ɔmɛ a mi lo? Baiblo gbamihi maa nɔ mi kaa wa ngɛ nyagbe ligbi ɔmɛ a mi. Enɛ ɔ he ɔ, moo kase Baiblo gbami nɛ ɔmɛ a he ní, konɛ hemi kɛ yemi nɛ o ngɛ kaa nyagbe ɔ su si ta a mi nɛ wa. Mawu wo si kaa e maa pee ní komɛ ha wɔ hwɔɔ se. Anɛ o suɔ kaa hemi kɛ yemi nɛ o ngɛ ngɛ si womi nɛ ɔmɛ a mi ɔ mi nɛ wa lo? Ke jã a, lɛɛ moo kase Baiblo gbamihi nɛ a ba mi momo ɔ a he ní. Anɛ o he ye nitsɛnitsɛ kaa Baiblo ɔ ma nyɛ maa ye bua wɔ mwɔnɛ ɔ lo? O ma nyɛ maa kane nyɛmimɛ nyumuhi kɛ yihi nɛ Baiblo ɔ ye bua mɛ, nɛ a pee tsakemihi ngɛ a si himi mi, nɛ a baa a je mi saminya a a he ní. (1 Tes. 2:13) Kɛ wa ma plɛ kɛ kase Yesu kɛɛ? Mo pue o yi mi tɛ ngɛ ní kpakpahi nɛ Yehowa wo si kaa e maa pee ha wɔ ɔ he. (Heb. 12:2) E sa nɛ o na kaa mo tutuutu si nɛ Mawu wo ɔ nɛ, se pi adesahi tsuo kɛkɛ. w15 9/15 3:16, 17

Mɛni ji blɔ komɛ a nɔ nɛ wa maa gu kɛ tsɔɔ Yehowa kaa wa suɔ lɛ? Wa peeɔ jã kɛ gu níhi nɛ wa ngɛ nɛ waa kɛ woɔ e hɛ mi nyami ɔ nɔ. Kaa nɔ hyɛmi nɔ́ ɔ, wa ma nyɛ ma ha yemi kɛ buami konɛ wa kɛ fĩ Matsɛ Yemi ní tsumi ɔ se ngɛ je kɛ wɛ, kɛ wa we asafo ɔmɛ a mi. Wa ngɛ sika fuu jio, bɔɔ ko nɛ wa ngɛ jio, wɔ tsuo wa ma nyɛ maa ngɔ nɔ́ nɛ wa ngɛ ɔ kɛ ha Yehowa kɛ tsɔɔ kaa wa suɔ lɛ. (2 Kor. 8:12) Se wa ma nyɛ maa gu blɔ kpahi hu a nɔ kɛ tsɔɔ kaa wa suɔ Yehowa. Yesu tsɔɔ wɔ kaa wa hla Matsɛ Yemi ɔ kekle, nɛ wa ko pee yeyeeye ngɛ nya mi ngma kɛ heha nɔ́ he. Wa Tsɛ ɔ wo wɔ si kaa e ma ha wɔ wa hiami níhi. (Mat. 6:31-33) Wa ngɛ hɛ kɛ nɔ fɔmi ngɛ Yehowa mi, nɛ wa le kaa e maa ye si nɛ e wo ɔ nɔ. Ke o suɔ nɔ ko wawɛɛ ɔ, o náa hɛ kɛ nɔ fɔmi ngɛ e mi. Niinɛ, ke wa yaa nɔ nɛ wa náa hɛ kɛ nɔ fɔmi ngɛ Yehowa mi ɔ, lɔ ɔ haa nɛ e naa kaa wa suɔ lɛ. (La 143:8) Enɛ ɔ he ɔ, e sa nɛ wa bi wa he sanehi nɛ nyɛɛ se nɛ ɔ: ‘Anɛ otihi nɛ i kɛ ma ye hɛ mi, kɛ bɔ nɛ i kɛ ye be kɛ ye he wami tsuɔ ní ha a tsɔɔ kaa i suɔ Yehowa niinɛ lo? Anɛ i kɛ ye hɛ fɔɔ Yehowa nɔ kaa e ma ha mi ye hiami níhi daa lo?’ w15 9/15 5:7, 8

O bi o he hyɛ ke, ‘Anɛ Yehowa maa suɔ kaa e ma he ye yi wami ngɛ haomi ngua a mi lo?’ Su kake nɛ he hia wawɛɛ nɛ maa ye bua wɔ nɛ wa ná yi baami ji hemi kɛ yemi. E he hia nɛ wa ha nɛ wa hemi kɛ yemi ɔ mi nɛ wa. Bɔfo Petro tu hemi kɛ yemi nɛ a “ka” nɛ a hyɛ ɔ he munyu. (1 Pet. 1:7) Amanehlu ngua a su si ta, enɛ ɔ he ɔ, wa suɔ nɛ waa “piɛɛ ni nɛmɛ nɛ hɛɛ hemi kɛ yemi ɔ mi ɔ a he, nɛ a he wa yi wami.” (Heb. 10:39) Ke jã a, lɛɛ e sa nɛ waa bɔ mɔde wawɛɛ nɛ wa ha nɛ wa hemi kɛ yemi ɔ mi nɛ wa. Ke Yesu Kristo nɛ ji wa Matsɛ ɔ je e he kpo ɔ, e maa jɔɔ ni komɛ. Wa suɔ kaa wa maa piɛɛ jamɛatsɛmɛ ɔmɛ a he. Lɔ ɔ he ɔ, nyɛ ha nɛ waa pee wa ní kaa nyumu ɔ nɛ e kpa Yesu pɛɛ ɔ. E de ke: “Ye hemi kɛ yemi ɔ pi. Piɛɛ he ha mi!” (Mar. 9:24) Aloo, eko ɔ, wɔ hu wa ma de kaa bɔ nɛ bɔfo ɔmɛ de kɛ nyɛɛ se nɛ ɔ: “Ha nɛ wa hemi kɛ yemi ɔ mi nɛ wa!”​—Luka 17:5. w15 10/15 2:1, 2

Paulo kɛ e juɛmi ma “níhi nɛ a he hia wawɛɛ” ɔ a nɔ. E tsu fiɛɛmi ní tsumi ɔ wawɛɛ, nɛ e hia blɔ kɛ ya Siria, Asia Nyafii, Makedonia, Yudea, kɛ he kpahi fuu. Paulo de ke: “Nɔ́ kake nɛ i peeɔ ji kaa níhi nɛ be ɔ, ma je hɛ ngɛ a nɔ, nɛ ma tiu níhi nɛ ngɛ hɛ mi ɔ. Lɔ ɔ he ɔ, i ngɔ hɛ kɛ pi oti ɔ, konɛ ye nine nɛ su jlasi ɔ nɔ.” (Filip. 1:10; 3:8, 13, 14) Paulo sɛ we gba si himi mi, nɛ lɔ ɔ ye bua lɛ nɛ e nyɛ ‘ngɔ e he tsuo kɛ wo Nyɔmtsɛ ɔ ní tsumi ɔ mi nɛ e yɛ se.’ (1 Kor. 7:32-35) Kaa bɔ nɛ Paulo pee ɔ, mwɔnɛ ɔ, Yehowa sɔmɔli fuu ma a juɛmi nya si kaa a be gba si himi mi sɛe konɛ a nyɛ nɛ a pee fuu ngɛ Yehowa sɔmɔmi mi. (Mat. 19:11, 12) Behi fuu ɔ, blɔ nya ní tsumihi fuu be nihi nɛ a sɛ we gba si himi mi ɔ a kuɛ nɔ. Se wa sɛ gba si himi mi jio, wa sɛ we mi jio, wɔ tsuo wa ma nyɛ maa ‘ngmɛɛ níhi tsuo nɛ tsiɔ wɔ blɔ,’ nɛ ma nyɛ ma je wa juɛmi ngɛ Yehowa sɔmɔmi nɔ ɔ a he. Eko ɔ, e he maa hia nɛ waa pee tsakemi ngɛ níhi nɛ wa peeɔ ɔ he konɛ wa ko puɛ be, nɛ́ wa nyɛ nɛ waa pee fuu ngɛ Yehowa sɔmɔmi mi. w15 10/15 3:15, 16

Baiblo ɔ de ke: ‘Yehowa, i le kaa nɔmlɔ adesa ko be he wami ngɛ lɛ nitsɛ e wami nɔ. Pi nɔmlɔ adesa nitsɛ he wami nya ji kaa e maa pee kikɛ nɛ ɔ, loo kikɛ nɛ ɔ.’ (Yer. 10:23) Níhi nɛ ya nɔ ngɛ yi nɔ sane mi ɔ ma munyu nɛ ɔ nɔ mi. Yehowa bɔɛ adesahi kaa mɛ nitsɛmɛ nɛ a ye a he nɔ nɛ e he be mi. Blɔ nɛ Yehowa ngmɛ konɛ ní yayahi nɛ ya nɔ kɛ ya si be ko ɔ hu tsɔɔ kaa e nɔ yemi ɔ pɛ lɛ hi. Hwɔɔ se ɔ, Mawu ma kpata nimli yayamihi tsuo a hɛ mi. Lɔ ɔ se ɔ, ke nɔ ko li peemi nɛ e te si kɛ si Mawu nɔ yemi nɛ suɔmi ngɛ mi ɔ, e ma kpata jamɛatsɛ ɔ hɛ mi nɔuu. E ma nyɛ maa da níhi nɛ ya nɔ ngɛ adesahi a yi nɔ sane mi ɔ nɔ kɛ tsɔɔ kaa e sa nɛ e kpata atua tsɔli a hɛ mi amlɔ nɔuu. E be blɔ ngmɛe nɛ ní yayamihi nɛ ya nɔ hu kɔkɔɔkɔ. w15 11/15 3:5, 6

Yesu suɔ kaa e kɛ nihi maa sɛɛ Mawu Matsɛ Yemi ɔ he ní. Benɛ Yesu ngɛ zugba a nɔ ɔ, e tu Matsɛ Yemi ɔ he munyu pe ní kpahi. E wo Matsɛ Yemi ɔ ta pe si 100 ngɛ e fiɛɛmi ní tsumi ɔ mi. Matsɛ Yemi ɔ he hia Yesu wawɛɛ nitsɛ. (Mat. 12:34) Benɛ a tle Yesu si pɛ ɔ, e je e he kpo kɛ tsɔɔ nimli maa pee 500 kɛ se. Pee se ɔ nimli nɛ ɔmɛ ba pee e kaseli. (1 Kor. 15:6) Eko ɔ, jamɛ a be ɔ mi nɛ Yesu kɛ fami ha kaa a ya fiɛɛ ngɛ ‘je ma a mɛ tsuo a mi ngɛ he tsuaa he’ ɔ nɛ. A be ní tsumi nɛ ɔ nae gbɔjɔɔ. E de mɛ ke a maa fiɛɛ hluu kɛ yaa su “je mi nyagbe.” Ke o ngɛ sane kpakpa a fiɛɛe mwɔnɛ ɔ, lɛɛ mo hu o ha nɛ gbami nɛ ɔ ngɛ mi bae. (Mat. 28:19, 20) Yehowa ha wɔ ‘ní kpakpahi’ tsuo nɛ maa ye bua wɔ konɛ wa nyɛ nɛ waa fiɛɛ. w15 11/15 5:1-3

A kɛ Hebri ningma okadi eywiɛ nɛ ngma Mawu biɛ ɔ. A tsɛɛ Hebri ningma okadi eywiɛ nɛ daa si kɛ ha Mawu biɛ ɔ ke Tetragrammaton. Wa ma nyɛ maa na Tetragrammaton ɔ ngɛ blema Hebri Baiblohi nɛ a kɛ nine ngma a a mi. Ekomɛ ji womi kpohi nɛ a na ngɛ Ngo Wo ɔ kasa nya a nɛ. Wa ma nyɛ maa na Tetragrammaton ɔ ngɛ Hela Septuagint ɔ ekomɛ a mi hulɔ. A pee Septuagint nɛ ɔmɛ ekomɛ maa pee jeha 200 loko a fɔ Kristo, nɛ a pee ekomɛ hu jeha 100 ngɛ Kristo fɔmi se. Nihi fuu ngɛ nɛ ke a na bɔ nɛ Mawu biɛ ɔ je kpo si abɔ ha ngɛ blema Baiblohi nɛ a kɛ nine ngma amɛ a mi ɔ, a nya kpɛɔ a he. E ngɛ heii kaa e sa nɛ Mawu biɛ ɔ nɛ hi Baiblo ɔ mi. Se kɛ̃ ɔ, Baiblo sisi tsɔɔmihi fuu kɛ Mawu biɛ ɔ tsu we ní. A tsake Baiblo nɛ ji American Standard Version ɔ hɛ mi nɛ a je kpo ngɛ jeha 1952 ɔ mi. American Standard Version ɔ nɛ a pee ngɛ jeha 1901 ɔ mi ɔ kɛ Mawu biɛ ɔ tsu ní, se nɔ́ nɛ a pee ngɛ jeha 1952 ɔ mi ɔ kɛ Mawu biɛ ɔ tsu we ní. Mɛni he je? Nihi nɛ a tsɔɔ jamɛ a Baiblo ɔ sisi ɔ susu kaa “e dɛ kulaa” kaa a kɛ Mawu biɛ ɔ ma tsu ní. Baiblo sisi tsɔɔmi kpahi nɛ a pee ngɛ Blɛfo gbi kɛ gbi kpahi a mi ɔ hu pee jã. w15 12/15 2:3-5