February

Moo bɔ mɔde kaa o maa le o nyɛmimɛ ɔmɛ saminya. Loko a maa je asafo mi kpe sisi ɔ, o kɛ mɛ nɛ sɛɛ ní, nɛ ke a kpa hu moo pee jã, o kɛ mɛ nɛ ya fiɛɛmi, nɛ ke e maa hiɔ, moo fɔ mɛ nine kɛ ha ní yemi. Ke o pee jã a, e maa pee mo nyakpɛ kaa o maa le níhi babauu. Kaa nɔ hyɛmi nɔ́ ɔ, eko ɔ, o ma ba na kaa nyɛmiyo ko nɛ o susu kaa e je we huɛ bɔmi su kpo ɔ gboɔ zo, nyɛminyumu ɔ nɛ e ngɛ ní babauu ɔ, pi kaa e suɔ he lo nya ní se mohu, e peeɔ nihi nibwɔ, aloo eko ɔ, weku ko nɛ a pɔɔ se kpɛmi kɛ baa asafo mi kpe ɔ kɛ si temi kɛ womi ngɛ kpee. (Hiob 6:29) Se e sɛ nɛ waa pee wa he ‘nihi nɛ a ngɔɔ a he kɛ woɔ ni kpahi a sanehi a mi.’ (1 Tim. 5:13) Se kɛ̃ ɔ, e maa hi kaa wa maa le wa nyɛmimɛ a he sanehi komɛ kɛ a níhi a si kpamihi, nɛ lɔ ɔ ma ha nɛ waa nu mɛ sisi saminya. Ke o le he nɛ a tsɔse o nyɛmi Kristofo no ko nɛ e ní peepee woɔ o mi mi la a ngɛ ɔ, lɔ ɔ maa ye bua mo konɛ o mi mi nɛ sã mo ngɛ e he. E biɔ mɔde bɔmi loko wa ma nyɛ maa le wa nyɛmimɛ ɔmɛ saminya. Se kɛ̃ ɔ, ke waa kɛ Baiblo mi ga womi nɛ tsɔɔ kaa wa bli wa tsui mi gbajaa a tsu ní ɔ, lɔ ɔ tsɔɔ kaa wa ngɛ Yehowa nɛ e suɔ “nimli slɔɔtohi tsuo” ɔ kasee.​—1 Tim. 2:3, 4; 2 Kor. 6:11-13. w20.04 16-17 ¶10-12

Nyɔ mi nɛ e nɔ jena Yesu ma gbo ɔ, e kai e se nyɛɛli ɔmɛ kaa a suɔ a sibi. E le kaa ke a suɔ a sibi nɛ a ngɔɔ níhi kɛ sãa afɔle ngɛ a sibi a he ɔ, e ma ha nɛ kake peemi maa hi a kpɛti nɛ a ma nyɛ maa da ninyɛ nɛ je ɔ kɛ maa ba a nɔ ɔ nya. Nyɛ ha nɛ wa susu asafo nɛ ngɛ Tɛsalonika a he nɛ waa hyɛ. Kɛ je benɛ a to asafo ɔ sisi ɔ, yi mi wami sɔuu nɛ a kɛ ngɛ kpee. Se nyɛmimɛ ɔmɛ ye anɔkuale nɛ a je suɔmi kpo kɛ tsɔɔ a sibi. (1 Tɛs. 1:3, 6, 7) Paulo wo mɛ he wami kaa a ya nɔ nɛ a je suɔmi “babauu pe jã” kpo. (1 Tɛs. 4:9, 10) Suɔmi lɛ maa wo mɛ he wami nɛ a wo nihi nɛ a hao ɔ a bua nɛ a ye bua nihi nɛ a gbɔjɔ ɔ. (1 Tɛs. 5:14) Atsinyɛ jemi ko be he kaa a kɛ Paulo ga womi ɔ tsu ní, ejakaa ngɛ jeha kake se ɔ, e ngma sɛ womi enyɔne kɛ ya ha mɛ nɛ e de ke: “Suɔmi nɛ nyɛ ti nɔ fɛɛ nɔ ngɛ kɛ ha e sibi ɔ ngɛ hiɛe.” (2 Tɛs. 1:3-5) Suɔmi nɛ a ngɛ kɛ ha a sibi ɔ lɛ ye bua mɛ nɛ a nyɛ da si fɔfɔɛ nɛ mi wa kɛ yi mi wami nya. w21.03 22 ¶11

Ke wa suɔ kaa wa nine nɛ su kunimi yemi jlasi nɛ ji neneene wami ɔ nɔ ɔ, lɛɛ e sa nɛ waa nyɛɛ ngɛ Kristofohi a blɔ ɔ nɔ loo waa ba wa je mi kaa Kristofohi. (Níts. 20:24; 1 Pet. 2:21) Se Satan kɛ nihi nɛ a fĩ e se ɔ sume nɛ waa pee wa ní kaa Kristofohi, mohu ɔ, a suɔ nɛ waa “kɛ mɛ nɛ hi fo tue.” (1 Pet. 4:4) A yeɔ wa he fɛu kaa blɔ nɛ wa ngɛ nɔ nyɛɛe ɔ hí, se blɔ nɛ mɛɛ a ngɛ nɔ nyɛɛe ɔ hi, ejakaa a ngɛ he yemi. Se munyu nɛ ɔ ji lakpa. (2 Pet. 2:19) Ngɛ anɔkuale mi ɔ, e sa nɛ waa hla blɔ nɛ da nɛ waa tu fo ɔ ngɛ nɔ! Satan suɔ nɛ wɔ tsuo wa kpa fo ɔ tumi ngɛ blɔ nɛ e nɔ nyɛɛmi yee nɛ e “kɛ nɔ yaa wami mi” ɔ nɔ, nɛ́ waa ba blɔ nɛ ngɛ gbajaa nɛ nihi babauu ngɛ nɔ nyɛɛe ngɛ je ɔ mi ɔ nɔ. Jamɛ a blɔ ɔ nami yi nɛ e nɔ nyɛɛmi hu yi. Se e “kɛ nɔ yaa hɛ mi kpatami mi.” (Mat. 7:13, 14) Ke wa suɔ nɛ waa ya nɔ nɛ waa tu fo ɔ ngɛ blɔ nɛ da a nɔ nɛ nɔ́ ko kó gbla wa juɛmi ɔ, lɛɛ e sa nɛ waa ngɔ wa hɛ kɛ fɔ Yehowa nɔ nɛ waa bu lɛ tue. w20.04 26 ¶1; 27 ¶5, 7

Lingmi nɛ ɔ, Russia kɛ mahi nɛ a piɛɛ e he ɔ hu ya “zugba nɛ a wo he si ɔ” nɔ. (Dan. 11:41) Ngɛ mɛni blɔ nɔ? Ngɛ jeha 2017 ɔ mi ɔ, omleyi je matsɛ ehe nɛ ɔ tsi Yehowa we bi a ní tsumi ɔ nya, nɛ e wo wa nyɛmimɛ ɔmɛ ekomɛ tsu. Jehanɛ hu ɔ, e tsi wa womi ɔmɛ nɛ New World Translation ɔ hu piɛɛ he ɔ kɛ ní tsumi nya. E nga wa asafo ɔ ní tsumi kɔni ɔ, Matsɛ Yemi Asahi kɛ Kpe Peemi Asahi hu a nya ngɛ Russia. Ní nɛ ɔmɛ ha nɛ Blɔ Tsɔɔmi Ajla Toli ɔmɛ ba le ngɛ 2018 ɔ mi kaa Russia kɛ mahi nɛ a piɛɛ e he ɔ ji omleyi je matsɛ ɔ nɛ. E ngɛ mi kaa a ngɛ Yehowa we bi yi mi wae mohu lɛɛ, se a ti si kɛ wui nɔ yemi ko, nɛ a bɔɛ mɔde hu kaa a maa pee nɔ́ ko kɛ tsake lɛ. Nɔ́ nɛ a ngɛ pee mohu ji kaa a kɛ Baiblo ga womi nɛ tsɔɔ kaa waa sɔle ha “nihi tsuo nɛ a hɛɛ blɔ nya nguahi” ɔ ngɛ ní tsue. Wa sɔleɔ ha mɛ, titli ɔ, ke nimli nɛ ɔmɛ maa mwɔ yi mi kpɔ ko nɛ ma ha nɛ eko ɔ, wa be he blɔ náe kɛ ja Yehowa faa. w20.05 14 ¶9

Fɔli, loko nyɛ bimɛ ɔmɛ ma nyɛ ma ná nɔ mi mami kaa a na anɔkuale ɔ, e sa nɛ huɛ bɔmi kpakpa nɛ hi a kɛ Mawu a kpɛti, nɛ a nyɛ nɛ a ná nɔ mi mami kaa Baiblo tsɔɔmi ɔmɛ ji anɔkuale. Loko nyɛ maa tsɔɔ nyɛ bimɛ Mawu he anɔkuale ɔ, e sa nɛ nyɛ nitsɛmɛ nyɛɛ pee nɔ hyɛmi nɔ́ kpakpa kɛ gu Baiblo ɔ nɛ nyɛ maa kase ɔ nɔ. E sa nɛ nyɛ he be kɛ pue nyɛ yi mi tɛ ngɛ níhi nɛ nyɛ kaseɔ ɔ he. Ke nyɛ peeɔ jã a, nyɛ ma nyɛ maa ye bua nyɛ bimɛ ɔmɛ konɛ mɛ hu a pee jã. E sa nɛ nyɛɛ ye bua nyɛ bimɛ ɔmɛ konɛ a nyɛ nɛ a ngɔ Baiblo kasemi ga dade ɔmɛ kɛ tsu ní kaa bɔ nɛ nyɛ yeɔ bua nyɛ Baiblo kaseli ɔmɛ ɔ. Ke nyɛ pee jã a, e maa ye bua nyɛ bimɛ ɔmɛ konɛ a suɔ Yehowa, nɛ jehanɛ hu, a ma ná nɔ mi mami kaa Yehowa guɔ “tsɔlɔ anɔkualetsɛ kɛ ní lelɔ ɔ” nɔ kɛ yeɔ bua wɔ konɛ waa nu Baiblo ɔ sisi. (Mat. 24:45-47) Fɔli, e sa nɛ nyɛɛ pee babauu pe sisije tsɔɔmihi nɛ nyɛ maa tsɔɔ nyɛ bimɛ ɔmɛ kɛkɛ. Moo da jeha nɛ o bimɛ ɔmɛ ye ɔ nɔ kɛ ye bua mɛ konɛ a hemi kɛ yemi ɔ mi nɛ wa kɛ gu “Mawu níhi nɛ a mi kuɔ” nɛ o maa tsɔɔ mɛ ɔ nɔ.​—1 Kor. 2:10. w20.07 11 ¶10, 12-13

Adesahi nɛ a yi mluku ɔ a kpɛti nihi enyɛmɛ nɛ huɛ bɔmi kpakpa ngɛ a kɛ Mawu a kpɛti? Nihi ayɔhi abɔ. A nyɛ nɛ a kɛ Mawu pee huɛ kɛ gu hemi kɛ yemi nɛ a ná ngɛ Yesu kpɔmi afɔle sami ɔ mi ɔ nɔ. Kɛ gu kpɔmi afɔle sami ɔ nɔ ɔ, wa ma nyɛ maa pee Yehowa huɛmɛ, nɛ́ waa jɔɔ wa he nɔ kɛ ha lɛ nɛ wa ha nɛ a baptisi wɔ. Ke wa pee jã a, wa ma ba piɛɛ nihi ayɔhi abɔ nɛ a jɔɔ a he nɔ nɛ a ha nɛ a baptisi mɛ kaa Kristofohi nɛ huɛ bɔmi kpakpa ngɛ a kɛ Nɔ nɛ pe kulaa ngɛ je ɔ mi ɔ a kpɛti ɔ he! Mɛni wa ma nyɛ maa pee kɛ tsɔɔ kaa wa bua jɔ huɛ bɔmi nɛ ngɛ waa kɛ Mawu wa kpɛti ɔ he? Kaa bɔ nɛ Abraham kɛ Hiob ya nɔ nɛ a ye Mawu anɔkuale jeha lafa kɛ se ɔ, wa ngɛ Yehowa sɔmɔe be kɛkɛɛ jio, lingmi nɛ ɔ pɛ nɛ wa bɔni lɛ sɔmɔe jio, e sa nɛ waa ya nɔ nɛ wɔ hu waa ye lɛ anɔkuale ngɛ Satan je yaya nɛ ɔ mi. Kaa bɔ nɛ Daniel hu pee ɔ, e sa nɛ huɛ bɔmi nɛ ngɛ waa kɛ Mawu wa kpɛti ɔ he nɛ hia wɔ wawɛɛ pe wa wami po. (Dan. 6:7, 10, 16, 22) Ngɛ Yehowa yemi kɛ buami nya a, wa ma nyɛ ma fĩ si ngɛ kahi tsuo nɛ waa kɛ ngɛ kpee ɔ mi nɛ waa ya nɔ nɛ wa ha nɛ huɛ bɔmi kpakpa nɛ hi waa kɛ lɛ wa kpɛti.​—Filip. 4:13. w20.05 27 ¶5-6

Matsɛ David na nɔ ko yo nɛ e ngɛ e he due. E le Yehowa mlaa nɛ ji: “O hɛ ko kɔ o nyɛmi e yo . . . nɔ.” (2 Mose 20:17) Se kɛ̃ ɔ, e ya nɔ nɛ e hyɛ lɛ. E ná Batsheba nɛ ji nɔ kpa yo ɔ he akɔnɔ, nɛ ngɛ jamɛ a be ɔ mi nɔuu ɔ, e suɔ nɛ e pee Yehowa suɔmi nya ní. David tsui mi gba. E ngɛ mi kaa David suɔ Yehowa, nɛ e yee lɛ gbeye mohu lɛɛ, se e ya nyɛɛ e we akɔnɔ se. Nɛ enɛ ɔ ha nɛ David pee yayamihi nɛ hɛdɔ ngɛ a he. E gbe Yehowa biɛ ɔ he guɛ. Jehanɛ hu ɔ, David ngɔ haomi kɛ ba e weku ɔ kɛ ni kpahi nɛ a li sane ɔ he nɔ́ ko ɔ a nɔ. (2 Sam. 11:1-5, 14-17; 12:7-12) Yehowa tsɔse David, nɛ lɔ ɔ ha nɛ huɛ bɔmi kpakpa ba hi e kɛ lɛ a kpɛti ekohu. (2 Sam. 12:13; La 51:2-4, 17) David kai nyagbahi kɛ haomihi nɛ ba e nɔ benɛ e ha nɛ e tsui mi gba a. Eko ɔ, wa ma nyɛ maa tsɔɔ e munyu nɛ ngɛ La 86:11 ɔ sisi ke: “Ha mi tsui nɛ mi gba we.” Anɛ Yehowa ye bua David nɛ e tsui pee kake lo? Ee, Yehowa Munyu nɛ ji Baiblo ɔ tu David he munyu kaa e ji nyumu nɛ “e kɛ e tsui tsuo ha . . . Yehowa e Mawu ɔ.”​—1 Ma. 11:4; 15:3, NW. w20.06 11 ¶12-13

Baiblo ɔ ngɔ bɔ nɛ Yehowa suɔ e we bi ha a kɛ to kpa he. Ngɛ mɛni blɔ nɔ nɛ Mawu suɔmi ɔ ngɛ kaa kpa? Mo susu nɔ́ he tomi nɔ́ nɛ ɔ he nɛ o hyɛ: Ngɔɔ lɛ kaa o ngɛ mue ngɛ wo nɛ mi jɔ nɛ e pee hamahama mi, nɛ nɔ ko nɛ ngɛ mele mi ngɛ wo ɔ nɔ ɔ fɔ tade nɛ ma ha nɛ o hi nyu hɛ ɔ kɛ ha mo. Atsinyɛ jemi ko be he kaa o bua maa jɔ wawɛɛ. Se o maa hia yemi kɛ buami kpa loko o yi ma ná wami. E he maa hia nɛ nihi nɛ a ngɛ mele ɔ mi ɔ nɛ a fɔ kpa kɛ ha mo konɛ a kɛ gbla mo kɛ ya he nɛ mele ɔ ngɛ ɔ. Kaa bɔ nɛ wa mwɔnɛ ɔ ngmami ɔ de kɛ kɔ Yehowa he ɔ, e je suɔmi mi nɛ e “ya nɔ nɛ [e] gbla” Israel bi nɛ a je e se ɔ kɛ ba e ngɔ. Mwɔnɛ ɔ, Yehowa nuɔ he jã nɔuu ngɛ nihi nɛ nyagbahi kɛ yeyeeye peemi ha nɛ a kpa lɛ sɔmɔmi ɔ a he. E ngɛ hlae nɛ a le kaa e suɔ mɛ, nɛ e suɔ nɛ e gbla mɛ kɛ ba e ngɔ. Yehowa ma nyɛ maa gu o nɔ kɛ je e suɔmi ɔ kpo kɛ tsɔɔ mɛ. E he hia nɛ o ya nɔ nɛ o de nihi nɛ a kɛ asafo ɔ kpa bɔmi ɔ kaa Yehowa suɔ mɛ, nɛ́ o ha nɛ a na kaa wɔ hu wa suɔ mɛ. w20.06 27 ¶12-13

Benɛ a gbe Steven ɔ, Kristofo ɔmɛ fuu tu fo kɛ je Yerusalem nɛ a “gbɛ fĩa Yudea kɛ Samaria kpokpa amɛ a nɔ,” nɛ nyagbenyagbe ɔ, a ho Kipro kɛ Antiokia ya. (Níts. 7:58–8:1; 11:19) Ngɛ anɔkuale mi ɔ, kaseli ɔmɛ kɛ haomihi kpe wawɛɛ. Se kɛ̃ ɔ, a kɛ kã fiɛɛ sane kpakpa a ngɛ he fɛɛ he nɛ a ya a, nɛ a ye bua kɛ to asafohi a sisi ngɛ mahi nɛ Roma Nɔ Yemi ɔ yeɔ a nɔ ɔ a mi. (1 Pet. 1:1) Se ngɛ lɔ ɔ se ɔ, a kɛ nyagbahi fuu kpe ekohu. Kaa nɔ hyɛmi nɔ́ ɔ, loko jeha 50 ɔ maa su ɔ, Roma Nɔ Yelɔ Klaudio fã Yuda bi tsuo kaa a je Roma. Enɛ ɔ he ɔ, e sa nɛ Yuda bi nɛ a ba pee Kristofohi kɛ we ɔ nɛ a si a wehi nɛ a hia kɛ ho he kpa ya. (Níts. 18:1-3) Maa pee jeha 61 ɔ mi ɔ, bɔfo Paulo ngma kaa nihi pue e nyɛmimɛ Kristofo ɔmɛ a hɛ mi si ngɛ ma hɛ mi, a wo mɛ tsu, nɛ a kpɔ̃ a weto níhi ngɛ a dɛ. (Heb. 10:32-34) Nɛ kaa bɔ nɛ e ji ngɛ ni kpahi a blɔ fã mi ɔ, Kristofo ɔmɛ ye ohia nɛ a nu hiɔ hulɔ.​—Rom. 15:26; Filip. 2:25-27. w21.02 26-27 ¶2-4

Ke wa bɔ mɔde wawɛɛ nɛ wa ha nɛ wa hemi kɛ yemi ɔ mi wa a, e he maa wa ha Satan loo nihi nɛ a fĩ e se ɔ kaa a maa tsi wa nya nɛ wa ko nyɛɛ ngɛ anɔkuale ɔ nya. (2 Yoh. 8, 9) E sa nɛ waa hyɛ blɔ kaa je ɔ maa nyɛ wɔ. (1 Yoh. 3:13) Yohane ha nɛ wa le kaa “je ɔ tsuo lɛɛ, nɔ yayami ɔ nɛ ngɛ lɛ kudɔe.” (1 Yoh. 5:19) Akɛnɛ níhi a blɔ nya tomi nɛ ɔ nyagbe su ta he je ɔ, Satan mi mi ngɛ fue wawɛɛ pe daa. Pi je mi bami yaya kɛ lakpa munyuhi nɛ hemi kɛ yemi kuali tuɔ ɔ pɛ a nɔ nɛ Satan guɔ kɛ tuaa wɔ. E guɔ yi mi wami nɔ hulɔ. Satan le kaa be nɛ e piɛ kɛ ha lɛ nɛ e kɛ maa tsi wa fiɛɛmi ní tsumi ɔ nya aloo e kɛ gbɔjɔ wa hemi kɛ yemi mi ɔ pi hu. Enɛ ɔ he ɔ, e be nyakpɛ kaa a tsi wa ní tsumi ɔ fã ko nya ngɛ ma komɛ a nɔ, nɛ a tsi tsuo nya ngɛ ma komɛ hu a nɔ. Se ngɛ enɛ ɔmɛ tsuo a mi ɔ, wa nyɛmimɛ ɔmɛ nɛ a ngɛ ma nɛ ɔmɛ a mi ɔ ngɛ si fĩe. A kɛ a ní peepee ngɛ tsɔɔe kaa nɔ́ fɛɛ nɔ́ ko nɛ nɔ yayami ɔ kɛ maa ba wa nɔ ɔ, wa ma nyɛ maa da nya! w20.07 24 ¶12-13

Yehowa yi mi tomi ji kaa adesahi nɛ a ná bua jɔmi ngɛ si himi mi kɛ ya neneene ngɛ zugba nɛ nɔ ngɛ fɛu ɔ nɔ. Se benɛ Adam kɛ Hawa tsɔ atua kɛ si a Tsɛ nɛ ngɛ suɔmi ɔ, yayami kɛ gbenɔ ngɔ a kɛ a bimɛ tsuo nyɔguɛ. (Rom. 5:12) Kɛ Yehowa pee e ní ha kɛɛ? Amlɔ nɔuu nɛ e to blɔ nya konɛ e kɛ kpɔ̃ adesahi. (1 Mose 3:15) Yehowa to kpɔmi nɔ́ ɔ he blɔ nya konɛ e kɛ ha nɛ Adam kɛ Hawa a bimɛ nɛ a ma fɔ ɔ nɛ a ye a he ngɛ yayami kɛ gbenɔ he. Nɛ e to blɔ nya konɛ adesahi nɛ a hla kaa a ma sɔmɔ lɛ ɔ nɛ a ná neneene wami. (Yoh. 3:16; 1 Kor. 15:21, 22) Yehowa maa gu e Bi ɔ nɔ kɛ tle nihi babauu si, se wa ma nyɛ ma de kaa a be mɛ tsuo si tlee kɛ ba wami mi si kake. Mɛni he je? Ejakaa ke tlukaa nɛ nihi babauu hyi zugba a nɔ ɔ, níhi maa pee basaa. Se Yehowa ji Mawu nɛ e peeɔ e ní ngɛ blɔ nya tomi nya. E le kaa loko tue mi jɔmi maa ba a, jã a to níhi a he blɔ nya saminya.​—1 Kor. 14:33. w20.08 14 ¶3; 15 ¶5

E sa nɛ wa ha nɛ Baiblo kaselɔ ko nɛ nu sisi kaa yi mi tomi he je nɛ waa kɛ lɛ ngɛ Baiblo ɔ kasee ji kaa e ba sɔmɔ Yehowa kaa e we Odasefo no. E sa nɛ Baiblo kaselɔ ko nɛ e pee ní komɛ konɛ e nyɛ nɛ e su baptisimi he. Kekleekle ɔ, e sa nɛ e le Yehowa, e suɔ lɛ, nɛ e he lɛ nɛ e ye. (Yoh. 3:16; 17:3) Jehanɛ hu ɔ, e sa nɛ huɛ bɔmi nɛ hi e kɛ Yehowa a kpɛti, nɛ e kɛ asafo ɔ nɛ bɔni bɔmi. (Heb. 10:24, 25; Yak. 4:8) Lɔ ɔ se ɔ, e sa nɛ e kua su yayahi nɛ e pia e he ngɛ e yayamihi a he. (Níts. 3:19) Se e sa nɛ hemi kɛ yemi nɛ e ná a nɛ ha nɛ e kɛ nihi nɛ sɛɛ anɔkuale ɔ he ní. (2 Kor. 4:13) Lɔ ɔ se ɔ, e sa nɛ e jɔɔ e he nɔ kɛ ha Yehowa, nɛ e kɛ baptisimi nɛ ma e he nɔ jɔɔmi ɔ nɔ mi. (1 Pet. 3:21; 4:2) Ke e pee jã a, hyɛ bɔ nɛ nɔ fɛɛ nɔ bua maa jɔ ha! Ke Baiblo kaselɔ ɔ ngɛ mɔde bɔe konɛ e su oti nɛ ɔmɛ eko fɛɛ eko he ɔ, mo je e yi nɛ o wo lɛ he wami nɛ e tsa nɔ nɛ e pee ní nɛ ɔmɛ. w20.10 17-18 ¶12-13

Ke o ngɔɔ o he kɛ toɔ ni kpahi a he ngɛ asafo ɔ mi ɔ, lɔ ɔ ma ha nɛ o bɔni he numi kaa o he hia we. Nihi nɛ a ngɛ asafo ɔ mi ɔ a ti ni komɛ le ní tsɔɔmi wawɛɛ, a ti ni komɛ hu le níhi a he blɔ nya tomi saminya, nɛ a ti ni komɛ hu le bɔ nɛ a woɔ nɔ he wami wawɛɛ ha. Enɛ ɔ he ɔ, eko ɔ, o maa nu he kaa moo lɛɛ o nyɛ we mɔde bɔmi kaa mɛ. Ke o nuɔ he jã a, lɔ ɔ tsɔɔ kaa o baa o he si nɛ o peeɔ o he humi. (Filip. 2:3) Se e sa nɛ o hyɛ nɛ hi. Ke kpamisaa nɛ ɔ o ngɔ o he kɛ ngɛ nihi nɛ a ngɛ nyɛmi pɔtɛɛ komɛ a he toe ɔ, o kɔni mi ma jɔ̃. Kaa bɔ nɛ bɔfo Paulo tsɔɔ ɔ, e ma ha nɛ o nu he kaa o he hia we ngɛ asafo ɔ mi. Yehowa gu mumi klɔuklɔu ɔ nɔ kɛ ha Kristofohi nɛ a hi si ngɛ kaseli ɔmɛ a be ɔ mi ɔ dloomi nike níhi, se e slo nɔ fɛɛ nɔ kɛ e nike ní. (1 Kor. 12:4-11) Kristofohi tsuo a he jua wa. Mwɔnɛ ɔ, Yehowa gui nyakpɛ blɔ nɔ kɛ ha wɔ mumi klɔuklɔu ɔ kaa bɔ nɛ e ha Kristofohi nɛ a hi si ngɛ kaseli ɔmɛ a be ɔ mi ɔ. Se wa ma nyɛ maa kase nɔ́ ko kɛ je a sane ɔ mi. E ngɛ mi kaa wɔ tsuo wa be nyɛe ma tsu ní tsumi kake ngɛ asafo ɔ mi mohu lɛɛ, se wɔ tsuo wa he jua wa ha Yehowa. w20.08 23 ¶13-15

Moo sɔle konɛ o nyɛ nɛ o pee kã. Yehowa be mo kuae, e ma ha o sɔlemihi tsuo a heto. (Níts. 4:29, 31) E maa ye bua mo be fɛɛ be. Mo susu bɔ nɛ Yehowa ye bua mo kɛ da si fɔfɔɛhi nɛ a mi wa nya ha, kɛ bɔ nɛ e ye bua mo nɛ o pee tsakemihi ngɛ o si himi mi ha a he. Ngɛ anɔkuale mi ɔ, Nɔ nɛ e nyɛɛ e we bi a hɛ mi kɛ nyɛɛ Wo Tsutsu ɔ mi ɔ ma nyɛ maa ye bua mo konɛ o nyɛ nɛ o pee Kristo kaselɔ. (2 Mose 14:13) Mo hu o ma nyɛ ma ná hemi kɛ yemi nɛ mi wa ngɛ Yehowa mi kaa la polɔ ɔ nɛ e tu munyuhi nɛ ngɛ mwɔnɛ ɔ ngmami ɔ mi ɔ. Yehowa ma nyɛ maa ye bua fiɛɛli hehi nɛ a pee kã. Mo susu nyɛmiyo ko nɛ a tsɛɛ lɛ ke Tomoyo níhi a si kpami ɔ he nɛ o hyɛ. Ligbi ko nɛ e ngɛ fiɛɛe ngɛ wehi a mi ɔ, wetsɛ ko ya kpa ngmlaa kɛ wo e yi nɛ e de ke: “I sume nɛ i kɛ Yehowa Odasefohi maa sɛɛ ní!” nɛ e nga sinya a. Tomoyo kɛ kã de nɔ nɛ e kɛ lɛ ya fiɛɛmi ɔ ke: “Tse o nu nɔ́ nɛ e de ɔ, i tu we munyu po nɛ e yɔse kaa Yehowa Odasefo no ji mi. Ye bua jɔ wawɛɛ!” Amlɔ nɛ ɔ, Tomoyo ngɛ sɔmɔe kaa daa blɔ gbalɔ. w20.09 6 ¶13-14

Asa de Yuda bi ɔmɛ kaa Yehowa lɛ ha mɛ “tue mi jɔmi ngɛ he tsuaa he kɛ bɔle si” ɔ nɛ. (2 Kron. 14:6, 7) Asa nui he kaa tue mi jɔmi be nɛ e kɛ Yuda bi ɔmɛ ná a ji be nɛ e sa nɛ a kɛ ye si himi mi ngɔɔmi. Mohu ɔ, e ha nɛ a po mahi, a fia gbogbohi, a ma mɔhi nɛ a ma agbohi hulɔ. Asa de Yuda bi ɔmɛ ke: “Zugba a fɔɔ si ha wɔ.” Mɛni nɛ Asa ngɛ tsɔɔe? E ngɛ tsɔɔe kaa a ma nyɛ maa ya nɛ a ba faa ngɛ zugba nɛ Mawu kɛ ha mɛ ɔ nɔ nɛ a po mahi nɛ he nyɛli be nyɛe maa te si kɛ wo mɛ. Enɛ ɔ he ɔ, e wo Yuda bi ɔmɛ he wami konɛ a ngɔ tue mi jɔmi be nɛ ɔ kɛ tsu ní saminya. Jehanɛ hu ɔ, Asa ngɔ tue mi jɔmi be nɛ e kɛ e we bi ɔmɛ ná a kɛ tsɔse e ta buli ɔmɛ saminya. (2 Kron. 14:8) Anɛ enɛ ɔ nɛ Asa pee ɔ tsɔɔ kaa e be hɛ kɛ nɔ fɔmi ngɛ Yehowa mi lo? Dɛbi. Asa le kaa e ji matsɛ fɛɛ matsɛ ní tsumi kaa e ma dla e we bi kɛ to konɛ a nyɛ nɛ a da haomi nɛ eko ɔ, a kɛ maa kpe ɔ nya. Asa le kaa tue mi jɔmi be nɛ a ná a be si hie daa, nɛ e ba mi jã hu niinɛ. w20.09 15 ¶4-5

Asafo mi nɔkɔtɔma ko ma susu kaa e ma nyɛ maa wo nihi nɛ a ngɛ asafo ɔ mi ɔ mlaahi kɛ susumi ɔ kaa e kɛ maa po Mawu jijɔ ɔmɛ a he piɛ. Se kɛ̃ ɔ, slɔɔto komɛ ngɛ he blɔ nɛ asafo mi nɔkɔtɔma ngɛ kɛ he blɔ nɛ wekuyi ngɛ ɔ a kpɛti. Kaa nɔ hyɛmi nɔ́ ɔ, Yehowa hla asafo mi nikɔtɔmahi kaa a sɔmɔ kaa kojoli, nɛ e ha mɛ he blɔ kaa a je yayami peeli nɛ a tsakee we a tsui ɔ ngɛ asafo ɔ mi. (1 Kor. 5:11-13) Se kɛ̃ ɔ, Yehowa ha wekuyihi he blɔ komɛ nɛ e ha we asafo mi nikɔtɔmahi. Kaa nɔ hyɛmi nɔ́ ɔ, e ha wekuyi he blɔ kaa e wo mlaahi ngɛ weku ɔ mi, nɛ e hyɛ kaa e weku ɔ kɛ mlaa amɛ ngɛ ní tsue lo. (Rom. 7:2) Kaa nɔ hyɛmi nɔ́ ɔ, wekuyi ngɛ he blɔ kaa e tsɔɔ e bimɛ be nɛ e sa nɛ a ba su we mi gbɔkuɛ. Nɛ ke e bi ɔmɛ kɛ mlaa nɛ ɔ tsu we ní ɔ, e ngɛ he blɔ nɛ e gblaa a tue. (Efe. 6:1) Ngɛ anɔkuale mi ɔ, wekuyi nɛ e suɔ e yo ɔ, biɔ e yo ɔ juɛmi loko e woɔ e weku mi bimɛ mlaahi, ejakaa mɛ ni enyɔ ɔmɛ a ji “he lo kake.”​—Mat. 19:6. w21.02 16-18 ¶10-13

Yi mi tomi kake he je nɛ anɔkualehi nɛ a ngɛ Mawu Munyu ɔ mi ɔ a he jua wa ji kaa Yehowa jeɔ mɛ kpo kɛ tsɔɔ nihi nɛ a baa a he si nɛ a ngɛ “su kpakpa” a pɛ. (Níts. 13:48) Nimli nɛ ɔmɛ kplɛɔ nɔ kaa Yehowa guɔ tsɔlɔ anɔkualetsɛ kɛ nile lɔ ɔ nɔ kɛ tsɔɔ wɔ ní. (Mat. 11:25; 24:45) Wa be nyɛe maa kase anɔkuale ɔ ngɛ wa dɛ he, nɛ wa be nyɛe maa ngɔ nɔ́ ko kɛ to anɔkuale ɔ he kɔkɔɔkɔ. (Abɛ 3:13) Jehanɛ hu ɔ, Yehowa ha wɔ he blɔ konɛ waa tsɔɔ nihi anɔkuale nɛ kɔɔ e he kɛ e yi mi tomihi a he ɔ. (Mat. 24:14) Sɛ gbi nɛ wa fiɛɛɔ he jua wa wawɛɛ, ejakaa e yeɔ bua nihi nɛ a ba piɛɛɔ Yehowa weku ɔ he, konɛ a nyɛ nɛ a ná neneene wami. (1 Tim. 4:16) Ke waa kɛ be babauu tsuɔ fiɛɛmi ní tsumi ɔ jio, waa kɛ be bɔɔ ko pɛ lɛ tsuɔ jio, wɔ tsuo wa ngɛ yee buae kɛ tsu ní tsumi nɛ he hia wawɛɛ ngɛ wa be nɛ ɔ mi ɔ. (1 Tim. 2:3, 4) E ji he blɔ ngua nɛ wa ná kaa wa piɛɛ Mawu he kɛ ngɛ ní tsue!​—1 Kor. 3:9. w20.09 26-27 ¶4-5

Benɛ Paulo yaa Roma a, Yehowa gu e nyɛmimɛ ɔmɛ a nɔ kɛ ye bua lɛ si abɔ. Kaa nɔ hyɛmi nɔ́ ɔ, Paulo huɛmɛ anɔkualetsɛmɛ nɛ ji Aristako kɛ Luka mwɔ a yi mi kpɔ kaa a kɛ Paulo maa ya Roma. Baiblo ɔ tsɔɔ we kaa Yesu wo Aristako kɛ Luka si kaa a ma ya su Roma slɔkee. Enɛ ɔ he ɔ, a ngɔ a wami kɛ wo oslaa mi benɛ a kɛ Paulo hia blɔ ɔ. Se pee se ɔ, a ná le kaa nɔ́ ko be a he kɔe benɛ mele nɛ a ngɛ mi ɔ ya ná oslaa ngɛ blɔ ɔ nɔ ɔ. Benɛ a ba kple si ngɛ Sidon ma a mi ɔ, Yulio ngmɛ Paulo blɔ kaa “e ya e huɛmɛ ɔmɛ a ngɔ konɛ a ya hyɛ e nɔ.” (Níts. 27:1-3) Nɛ pee se benɛ a ba Puteoli ma a mi ɔ, Paulo kɛ e huɛmɛ ɔmɛ “na nyɛmimɛ ngɛ [lejɛ ɔ], nɛ a kpa [mɛ] pɛɛ kaa [a] ye ligbi kpaago ngɛ a ngɔ.” Benɛ nyɛmimɛ ɔmɛ ngɛ Paulo kɛ e huɛmɛ ɔmɛ a hiami níhi hae ɔ, Paulo hu de mɛ e níhi a si kpamihi nɛ woɔ nɔ he wami ɔ ekomɛ nɛ lɔ ɔ ha nɛ a bua jɔ wawɛɛ.​—Kɛ to Ní Tsumi 15:2, 3 ɔ he. w20.11 15-16 ¶15-17

Fɔli, nyɛɛ ngɔ nyɛ munyu tutui kɛ nyɛ ní peepee kɛ ha nɛ nyɛ bimɛ nɛ a na kaa nyɛ suɔ Yehowa wawɛɛ. Nyɛ kadi kaa nike ní nɛ se be nɛ nyɛɛ kɛ ma nyɛ ma ha nyɛ bimɛ ɔmɛ ji kaa nyɛ maa ye bua mɛ nɛ a suɔ Yehowa. Jehanɛ hu ɔ, e he hia nɛ nyɛ tsɔse nyɛ bimɛ ɔmɛ konɛ a kase Baiblo ɔ, a sɔle, nɛ a ya asafo mi kpehi kɛ fiɛɛmi be fɛɛ be. (1 Tim. 6:6) Ngɛ anɔkuale mi ɔ, e sa nɛ fɔli nɛ a ha a bimɛ a he lo nya hiami níhi. (1 Tim. 5:8) Se nyɛ kai hu kaa huɛ bɔmi kpakpa nɛ maa hi nyɛ bimɛ ɔmɛ kɛ Yehowa a kpɛti ɔ ji nɔ́ nɛ ma ha nɛ a he a yi wami ke Satan je yaya nɛ ɔ ba nyagbe, se pi he lo nya níhi nɛ a ngɛ ɔ. (Eze. 7:19) E ji bua jɔmi sane kaa fɔli babauu ngɛ mɔde bɔe kaa a maa ye bua a bimɛ nɛ huɛ bɔmi kpakpa nɛ hi a kɛ Yehowa a kpɛti! Bimɛ nɛ a tsɔse mɛ ngɛ wekuhi kaa jã a mi ɔ kɛ a he woɔ ní tsumi nɛ ɔmɛ ekomɛ a mi, nɛ a bua jɔɔ kaa a fɔli ɔmɛ tsɔse mɛ ngɛ jamɛ a blɔ ɔ nɔ!​—Abɛ 10:22. w20.10 28-29 ¶10-11

Be ko ɔ, bɔfo Petro de ní komɛ nɛ e pee ní komɛ nɛ e susuu we he, nɛ pee se ɔ, e pia e he kaa e de aloo e pee jamɛ a ní ɔmɛ. Kaa nɔ hyɛmi nɔ́ ɔ, benɛ Yesu de e bɔfo ɔmɛ kaa e maa na nɔ́, nɛ e ma gbo ɔ, Petro kã e hɛ mi, nɛ e tu munyu nɛ ngɛ mwɔnɛ ɔ ngmami ɔ mi ɔ. (Mat. 16:21-23) Se Yesu dla Petro juɛmi. Pee se benɛ ni komɛ ma nɛ a ba nu Yesu ɔ, Petro he sɔ nɛ e po osɔfo nɔkɔtɔma a nyɔguɛ ko tue. (Yoh. 18:10, 11) Si kake ekohu ɔ, Yesu dla Petro juɛmi. Jehanɛ hu ɔ, Petro fĩa nɛ e tsɔɔ kaa ke bɔfo kpa amɛ ma si Yesu po ɔ, lɛɛ lɛɛ e be jã pee kɔkɔɔkɔ! (Mat. 26:33) Petro ngɔ e hɛ kɛ fɔ lɛ nitsɛ e nɔ tsɔ, nɛ lɔ ɔ ha nɛ e ye adesa hɛ mi gbeye, nɛ e kua e Nyɔmtsɛ ɔ si etɛ. Enɛ ɔ ha nɛ Petro kɔni mi jɔ̃, nɛ e “je kpo kɛ ya we ɔ se nɛ e ya fo ya yuuyuuyuu.” (Mat. 26:69-75) Eko ɔ, e susu kaa Yesu kɛ e tɔmi ɔ be lɛ kee kɔkɔɔkɔ. Se Petro ha we nɛ e kɔni mi nɛ jɔ̃ ɔ nɛ ha nɛ e kpa Yehowa sɔmɔmi. Benɛ e tɔ̃ se po ɔ, e ya nɔ nɛ e piɛɛ bɔfo kpa amɛ a he kɛ sɔmɔ Yehowa.​—Yoh. 21:1-3; Níts. 1:15, 16. w20.12 20 ¶17-18

Weku yi ma nyɛ ma je he si bami kpo ngɛ blɔ slɔɔtohi a nɔ. Kaa nɔ hyɛmi nɔ́ ɔ, e hyɛ we blɔ kaa e yo kɛ e bimɛ maa pee a ní kaa nihi nɛ a ye mluku. Ke e yo kɛ e bimɛ ngɛ a juɛmi tsɔɔe ngɛ nɔ́ ko he, nɛ e kɛ mɛ kpa we gbi po ɔ, e buɔ mɛ tue nɛ e susuɔ he. Jehanɛ hu ɔ, huno nɛ baa e he si ɔ suɔ nɛ e tsu we mi ní tsumihi ke nihi nɛ a ngɛ e kpɔ ɔ mi ɔ susu kaa yihi a ní tsumi ji lɔ ɔ po. Enɛ ɔ ma nyɛ maa pee nyagba wawɛɛ. Mɛni he je? Nyɛmiyo ko nɛ a tsɛɛ lɛ ke Rachel ɔ de ke: “Ngɛ he nɛ i je ɔ, ke huno ko ye bua e yo kɛ sa tsesihi a mi loo kɛ dla we mi ɔ, e kpɔ mi bi kɛ e weku li ma susu kaa tsa pi ‘nyumu’ ji lɛ. A ma susu kaa e yo ɔ ngɛ e nɔ yee.” Ke susumi nɛ ɔ nɛ nihi fuu hɛɛ ngɛ he nɛ o ngɛ ɔ, lɛɛ mo kai kaa Yesu fɔ e kaseli ɔmɛ a nane he, e ngɛ mi kaa a naa ní tsumi nɛ ɔ kaa nyɔguɛhi a ní tsumi. Weku yi kpakpa be níhi nɛ ma ha nɛ nihi nɛ a susu kaa e ngɛ he wami loo e he hia a pee, mohu ɔ, e peeɔ níhi nɛ ma ha nɛ e yo ɔ kɛ e bimɛ a bua maa jɔ. w21.02 2 ¶3; 4 ¶11

Ní kpakpahi nɛ wa ma kai ɔ ji nike ní nɛ je Yehowa ngɔ, se hwɔɔ se si himi ngɛ je ehe ɔ mi ɔ maa pee kpakpa kulaa pe be kpakpa nɛ wa ná be ko nɛ be ɔ. Nihi maa pee níhi nɛ maa dɔ wɔ, se ke wa hla kaa waa kɛ nihi a tɔmihi maa ke mɛ ɔ, waa kɛ wa juɛmi ma nyɛ maa ma Yehowa sɔmɔmi nɔ amlɔ nɛ ɔ. Ke wa he nile ngɛ wɔ fɔ bue tsɔ ɔ, e ma nyɛ ma ha nɛ wa be Yehowa sɔmɔe kɛ bua jɔmi. Se kaa bɔ nɛ bɔfo Paulo pee ɔ, e sa nɛ wɔ hu wa he ye kaa Yehowa ngɔ wa tɔmihi kɛ ke wɔ. (1 Tim. 1:12-15) Wa ma nyɛ maa hi si kɛ ya neneene. Nɛ ngɛ je ehe ɔ mi ɔ, wa be níhi nɛ ha nɛ wa ye aywilɛho ɔ kaie. Baiblo ɔ de ke: “A be blema ní ɔmɛ kaie hu.” (Yes. 65:17) Moo po he foni nɛ o hyɛ: Wa ti ni komɛ ngɛ Yehowa asafo ɔ mi nɛ wa bwɔ, se ngɛ je ehe ɔ mi ɔ, wa maa pee nihewi kɛ yihewi ekohu. (Hiob 33:25) Enɛ ɔ he ɔ, nyɛ ha nɛ waa fia wa pɛɛ si kaa wa ma je wa juɛmi kɛ je níhi nɛ a ya nɔ ngɛ wa si himi mi be ko nɛ be ɔ nɔ, nɛ waa kɛ wa juɛmi nɛ ma je ehe ɔ, kɛ nɔ́ nɛ wa ma nyɛ maa pee konɛ wa nyɛ nɛ waa su je ehe ɔ mi ɔ nɔ! w20.11 24 ¶4; 29 ¶18-19

Mɛni nɛ ngɛ wa hɛ mi kɛ ma? Ngɛ amanehlu ngua a mi ɔ, Yehowa maa gu nyakpɛ blɔ enyɔ komɛ a nɔ kɛ he wa yi wami. Kekleekle ɔ, ke Yehowa ha nɛ matsɛmɛ nɛ a ngɛ zugba a nɔ ɔ kpata lakpa jamihi tsuo a nyɛ nɛ ji Babilon Ngua a hɛ mi ɔ, e ma he e sɔmɔli anɔkualetsɛmɛ a yi wami. (Kpoj. 17:16-18; 18:2, 4) Kɛkɛ lɔ ɔ se ɔ, ke e kpata nihi nɛ a piɛ ngɛ Satan je ɔ mi ɔ a hɛ mi ngɛ Harmagedon ta a mi se ɔ, e ma he e we bi a yi wami. (Kpoj. 16:14, 16) Ke wa ya nɔ nɛ wa ha nɛ huɛ bɔmi kpakpa hi waa kɛ Yehowa wa kpɛti ɔ, Satan be nyɛe maa ye wɔ awi kɛ ya neneene, mohu ɔ, lɛ nɛ a ma kpata e hɛ mi kɛ ya neneene. (Rom. 16:20) Lɔ ɔ he ɔ, moo wo ta buli a he piɛ pomi ní ɔmɛ tsuo, nɛ o ko je kɔkɔɔkɔ! Koo bɔ mɔde kaa o maa hwu ta a ngɛ o dɛ he. Moo ye bua o nyɛmimɛ nyumuhi kɛ yihi, nɛ o kɛ Yehowa blɔ tsɔɔmi nɛ tsu ní. Ke o pee jã a, o ma nyɛ ma ná nɔ mi mami kaa o hiɔwe Tsɛ ɔ maa wo mo he wami nɛ e maa po o he piɛ.​—Yes. 41:10. w21.03 30 ¶16-17

Mɛni wa ma nyɛ maa pee kɛ tsɔɔ kaa wa ngɛ hɛ kɛ nɔ fɔmi ngɛ Yehowa mi? Kɛ gu e blɔ tsɔɔmihi nɛ waa kɛ ma tsu ní ɔ nɔ. Nɔ hyɛmi níhi fuu ngɛ Baiblo ɔ mi nɛ tsɔɔ se nami nɛ ngɛ kpoo nɛ wa maa pee nɛ waa ngɔ wa hɛ kɛ fɔ Yehowa nɔ ɔ he. Ke wa ngɛ nɔ hyɛmi ní nɛ ɔmɛ a he susue ɔ, mo kadi nɔ́ nɛ ye bua Mawu sɔmɔli nɛ a pee kpoo benɛ a he nyɛli te si kɛ wo mɛ ɔ. Kaa nɔ hyɛmi nɔ́ ɔ, benɛ Yuda kojoli ɔmɛ bɔ Yesu bɔfo ɔmɛ kɔkɔ kaa a kpa fiɛɛmi ɔ, a yi gbeye. Mohu ɔ, a kɛ kã de ke: “E sa nɛ waa bu Mawu tue kaa nɔ yelɔ mohu pe adesahi.” (Níts. 5:29) Benɛ a fiaa bɔfo ɔmɛ kpa se po ɔ, a yi gbeye. Mɛni he je? Ejakaa a le kaa Yehowa kɛ mɛ ngɛ. E bua jɔ a he wawɛɛ. Enɛ ɔ he ɔ, a ya nɔ nɛ a fiɛɛ sane kpakpa a. (Níts. 5:40-42) Jã nɔuu kɛ̃ nɛ benɛ Steven kɛ gbenɔ kpe hɛ mi kɛ hɛ mi ɔ, e ya nɔ nɛ e pee kpoo nɛ e “hɛ mi pee kaa Mawu bɔfo ko hɛ mi.” (Níts. 6:12-15) Mɛni he je? Ejakaa e ngɛ nɔ mi mami kaa Yehowa kplɛɛ e nɔ. w21.01 4 ¶10-11

Enɛ ɔ tsɔɔ kaa a ngɛ he nile kpakpa nɛ a ji dali ngɛ Yehowa hɛ mi. (Yes. 1:18) Nimli nɛ ɔmɛ ji Kristofohi nɛ a jɔɔ a he nɔ kɛ ha Yehowa nɛ a ha nɛ a baptisi mɛ. Nɛ jehanɛ hu ɔ, a ngɛ hemi kɛ yemi nɛ mi wa ngɛ Yesu kpɔmi afɔle sami ɔ mi, nɛ huɛ bɔmi kpakpa ngɛ a kɛ Yehowa a kpɛti. (Yoh. 3:36; 1 Pet. 3:21) Enɛ ɔ he je nɛ a he su kaa a maa da si ngɛ Mawu matsɛ sɛ ɔ hɛ mi nɛ a sɔmɔ lɛ ngɛ “blɔ nɛ ngɛ klɔuu nɔ nyɔ kɛ pia” ngɛ zugba a nɔ ɔ nɛ. (Kpoj. 7:15) Amlɔ nɛ ɔ po ɔ, a kɛ kã tsuɔ Matsɛ Yemi ɔ kɛ kaselɔ peemi ní tsumi ɔ hiɛhiɛɛ kɛ tsɔɔ kaa a kɛ Mawu Matsɛ Yemi ɔ yeɔ kekle blɔ he ngɛ a si himi mi pe nɔ́ fɛɛ nɔ́. (Mat. 6:33; 24:14; 28:19, 20) Asafo kuu ngua a nɛ a ma he a yi wami ngɛ amanehlu ngua a mi ɔ ngɛ nɔ mi mami kaa Mawu maa ya nɔ maa hyɛ a nɔ, ejakaa “Nɔ nɛ e hii si ngɛ matsɛ sɛ ɔ nɔ ɔ ma bli e bo tsu ɔ mi ngɛ a nɔ.” Jamɛ a be ɔ, si womi nɛ jijɔ kpa amɛ ngɛ blɔ hyɛe ɔ maa ba mi. “[Mawu] ma tsu vo nyu fɛɛ vo nyu ngɛ a hɛ mi, nɛ gbenɔ be si hie hu, jã kɛ̃ nɛ kɔmɔ yemi aloo ya fomi aloo nɔ́ yeyee ko hu be si hie hu.”​—Kpoj. 21:3, 4. w21.01 16 ¶9-10

Wa bua jɔ kaa wa piɛɛ Yehowa weku ɔ he, nɛ wa bɔɔ mɔde kaa waa kɛ yi yemi he blɔ nya nɛ Yehowa to ɔ ma tsu ní. Baiblo ɔ tsɔɔ kaa Yehowa naa yihi kɛ nyumuhi tsuo kaa a he jua wa. Baiblo ɔ tsɔɔ kaa ngɛ kaseli ɔmɛ a be ɔ mi ɔ, Yehowa ha nyumuhi kɛ yihi tsuo mumi klɔuklɔu ɔ nɛ e ha nɛ a tsu nyakpɛ níhi. Kaa nɔ hyɛmi nɔ́ ɔ, e ha nɛ a tu gbi slɔɔtoslɔɔtohi. (Níts. 2:1-4, 15-18) A ngɔ mumi klɔuklɔu ɔ kɛ pɔ nyumuhi kɛ yihi tsuo nu konɛ a piɛɛ Kristo he kɛ ye matsɛ ngɛ hiɔwe. (Gal. 3:26-29) Nyumuhi kɛ yihi tsuo ma ná neneene wami ngɛ zugba a nɔ hwɔɔ se. (Kpoj. 7:9, 10, 13-15) Nɛ a fã nyumuhi kɛ yihi tsuo kaa a fiɛɛ sane kpakpa a nɛ a tsɔɔ nihi ní. (Mat. 28:19, 20) Kaa nɔ hyɛmi nɔ́ ɔ, Baiblo mi womi nɛ ji Ní Tsumi ɔ tu nyɛmiyo ko nɛ a tsɛɛ lɛ ke Priskila a he munyu. E kɛ e huno Akuila tsɔɔ Apolo nɛ e ya sukuu kɛ ya tsitsaa a Baiblo mi anɔkuale ɔ heii.​—Níts. 18:24-26. w21.02 14 ¶1; 15 ¶4

Asafo mi nikɔtɔmahi, e ji nyɛ blɔ nya ní tsumi kaa nyɛ maa ye bua fiɛɛli tsuo konɛ a pee fiɛɛli kɛ tsɔɔli kpakpahi. Ke nɔ ko ngɛ zo gboe kaa e kɛ nɔ ko maa kase Baiblo ɔ be mi nɛ o ngɛ lejɛ ɔ, moo hyɛ ní kasemi ɔ nɔ. Asafo mi nikɔtɔmahi ma nyɛ maa pee níhi fuu kɛ wo Baiblo tsɔɔli he wami. (1 Tɛs. 5:11) Ke waa kɛ nɔ ko kase we Baiblo ɔ po ɔ, loloolo ɔ, wa ma nyɛ maa ye bua nɔ ko konɛ e ya e hɛ mi kɛ su baptisimi he. Wa ma nyɛ ma dla wa he saminya konɛ wa de níhi nɛ maa ye bua Baiblo kaselɔ ke wa piɛɛ fiɛɛlɔ ko he kɛ ya fiɛɛmi. Se e sa nɛ waa hyɛ nɛ hi nɛ wa ko tu munyu fuu. Ke Baiblo kaseli ba Matsɛ Yemi Asa a nɔ ɔ, waa kɛ mɛ ma nyɛ maa pee huɛ nɛ waa pee nɔ hyɛmi nɔ́ kpakpa kɛ ha mɛ. Asafo mi nikɔtɔmahi hu ma nyɛ maa wo Baiblo kaseli he wami kɛ gu be nɛ a ma ná kɛ ha mɛ ɔ nɔ. A ma nyɛ maa wo tsɔɔli ɔmɛ hu he wami kɛ gu a yi nɛ a ma je kɛ tsɔsemi nɛ a kɛ ma ha mɛ ɔ nɔ. Ke wa pee nɔ́ nyafii ko po kɛ ye bua nɔ ko nɛ e ba suɔ Yehowa nɛ ji wa hiɔwe Tsɛ ɔ, nɛ e ngɛ lɛ sɔmɔe ɔ, anɛ lɔ ɔ ha we nɛ wa bua jɔɔ lo? w21.03 13 ¶18-19

Níhi nɛ David pee daa ligbi ngɛ e si himi mi ɔ tsɔɔ kaa a ma nyɛ maa ngɔ hɛ kɛ fɔ e nɔ. Kaa nɔ hyɛmi nɔ́ ɔ, benɛ e ji niheyo ɔ, e hyɛ e papaa to ɔmɛ a nɔ saminya. Oslaa ngɛ ní tsumi nɛ ɔ he wawɛɛ. Pee se ɔ, David de Matsɛ Saul ke: “I hyɛɛ tsaatsɛ tohi; nɛ ke e ba mi kaa jata, loo osisiblisi ko ba nu to bi ko ngɛ to ɔmɛ a kpɛti ɔ, i nyɛɛɔ e se nɛ i ya fiaa lɛ nɔ, nɛ i jeɔ to bi ɔ ngɛ e nya mi.” (1 Sam. 17:34, 35) David le kaa e sa nɛ e bu to ɔmɛ a he. Nihewi hu ma nyɛ maa kase David kɛ gu ní tsumi nɛ a kɛ wo a dɛ nɛ a ma tsu lɛ saminya a nɔ. Benɛ David ji niheyo ɔ, e ha nɛ huɛ bɔmi kpakpa hi e kɛ Yehowa a kpɛti. Huɛ bɔmi kpakpa nɛ ngɛ David kɛ Yehowa a kpɛti ɔ he hia lɛ kulaa pe kã nɛ e peeɔ, kɛ nyɛmi nɛ e ngɛ nɛ e kɛ fiaa saku ɔ. Yehowa ba pee David Mawu kɛ e huɛ kpakpa. Nihewi, nɔ́ nɛ he hia nɛ nyɛ ma nyɛ maa pee ji kaa nyɛ ma ha nɛ huɛ bɔmi kpakpa nɛ hi nyɛɛ kɛ nyɛ hiɔwe Tsɛ ɔ nyɛ kpɛti. Jã nɛ nyɛ maa pee ɔ ma nyɛ ma ha nɛ nyɛ ná he blɔ slɔɔtohi. w21.03 3 ¶4-5