July

Jã huɛ bɔmi ngɛ waa kɛ Yesu wa kpɛti loko a ma ha wa sɔlemihi a heto. Enɛ ɔ biɔ nɛ waa pee babauu pe munyu nɛ ji “ngɛ Yesu biɛ mi” nɛ waa kɛ maa gbe wa sɔlemi nya a kɛkɛ. E sa nɛ waa nu bɔ nɛ Yehowa kɛ Yesu tsuɔ ní ha kɛ haa wa sɔlemihi a heto ɔ sisi saminya. Yesu de e bɔfo ɔmɛ ke: “Nɔ́ fɛɛ nɔ́ nɛ nyɛ ma bi ngɛ ye biɛ mi ɔ, lɔ ɔ nɛ ma pee.” (Yoh. 14:13) E ngɛ mi kaa Yehowa nɛ buɔ wa sɔlemihi tue, nɛ e haa heto mohu lɛɛ, se e ha Yesu he blɔ konɛ e tsu e yi mi tomi ɔmɛ a he ní ha lɛ. Loko Mawu maa bu wa sɔlemi tue ɔ, e hyɛɛ kaa waa kɛ ga womi nɛ Yesu kɛ ha a tsu ní lo. Kaa nɔ hyɛmi nɔ́ ɔ, Yesu de ke: “Ke nyɛ ngɔɔ nihi a tɔmihi kɛ paa mɛ ɔ, nyɛ Tsɛ nɛ e ngɛ hiɔwe ɔ hu maa ngɔ nyɛ tɔmihi kɛ pa nyɛ; se ke nyɛ ngɔɛ nihi a tɔmihi kɛ pɛ mɛ ɔ, nyɛ Tsɛ ɔ hu kɛ nyɛ tɔmihi be nyɛ pae.” (Mat. 6:14, 15) E he hia wawɛɛ kaa waa kɛ nihi maa hi si ngɛ mi mi jɔmi mi kaa bɔ nɛ Yehowa kɛ Yesu kɛ wɔ hiɔ si ha a! w20.04 22 ¶6

Bɔfo Paulo susu níhi nɛ e tue buli ɔmɛ a bua jɔ he ɔ he, nɛ e tsake e munyu ɔ hɛ mi. Kaa nɔ hyɛmi nɔ́ ɔ, nihi nɛ e fiɛɛ kɛ ha mɛ ngɛ Listra a le Ngmami ɔ mi bɔɔ, loo a li mi nɔ́ ko kulaa. Lɔ ɔ he ɔ, Paulo kɛ mɛ tu munyu ngɛ blɔ nɛ a maa nu sisi ɔ nɔ. E tu be nɛ a kpaa ní kɛ bua jɔmi nɛ a náa ngɛ si himi mi ɔ he munyu. Bɔfo Paulo ngɔ munyuhi kɛ nɔ hyɛmi níhi nɛ e tue buli ɔmɛ ma nyɛ maa nu sisi kɛ tsu ní. Mo kɔ nɔ́ se konɛ o le níhi nɛ nihi nɛ a ngɛ o zugba kpɔ ɔ mi ɔ a bua jɔ he, nɛ́ o tsake o munyu ɔ hɛ mi. Ke o yaa su nɔ ko he, aloo o yaa sɛ e we mi ɔ, kɛ o ma plɛ kɛ le níhi nɛ e bua jɔ he ha kɛɛ? Moo to níhi a he hɛ. Eko ɔ, e ngɛ abɔɔ ko mi dlae, e ngɛ womi ko kanee, e ngɛ lɔle dlae, aloo e ngɛ nɔ́ kpa ko pee. Ke e maa hi ɔ, moo da nɔ́ nɛ e ngɛ pee ɔ nɔ nɛ o kɛ lɛ nɛ je ní sɛɛmi sisi. (Yoh. 4:7) Eko ɔ, tade nɛ nɔ ko wo ɔ ma nyɛ maa tsɔɔ ma nɛ e je mi, ní nɛ e tsuɔ, aloo bɔɔlu fiami kuu nɛ e bua jɔ he. w20.04 11 ¶11-12

Wa nyɛmimɛ nyumuhi kɛ yihi komɛ peeɔ yeyeeye tsɔ, enɛ ɔ he ɔ, a haoɔ daa ligbi ngɛ si fɔfɔɛ nɛ a kɛ ngɛ kpee ɔ mi. Eko ɔ, e he waa ha mɛ kaa a maa ya he nɛ nihi babauu bua a he nya ngɛ, se kɛ̃ ɔ, a yaa nɔ nɛ a yaa asafo mi kpehi, kpɔ mi kpehi, kɛ kpokpa nɔ kpehi. E he waa ha mɛ kaa a kɛ nɔ ko nɛ a li lɛ maa sɛɛ ní, se kɛ̃ ɔ, a kɛ nihi sɛɛɔ ní ngɛ fiɛɛmi mi. Ke jã nɛ e ji ngɛ o blɔ fa mi ɔ, lɛɛ mo ná nɔ mi mami kaa pi mo pɛ nɛ o ngɛ jamɛ a si fɔfɔɛ ɔ mi. Nihi babauu hu nuɔ he jã. Mo kai kaa Yehowa bua jɔ kaa o je o tsui mi tsuo kɛ ngɛ lɛ sɔmɔe. O kɔni mi nɛ jɔ̃ we ɔ tsɔɔ kaa Yehowa ngɛ mo jɔɔe nɛ e ngɛ mo he wami woe niinɛ. (Filip. 4:6, 7) Ke o ngɛ Yehowa sɔmɔe ngɛ nɔmlɔ tso mi he wami kpakpa nɛ o be loo gbɔjɔmi kpahi nɛ o ngɛ tsuo se ɔ, lɛɛ o ma nyɛ ma ná nɔ mi mami kaa Yehowa bua jɔ o he. Wa ti nihi fuu be nɔmlɔ tso mi he wami kpakpa, se kɛ̃ ɔ, wa ngɛ si fĩe. (2 Kor. 4:16) Ngɛ Yehowa yemi kɛ buami nya a, wɔ tsuo wa ma nyɛ maa tu fo ɔ kɛ ya su nyagbe! w20.04 31 ¶20-21

Ke wa hyɛ bɔ nɛ Mawu bɔ zugba a ha a, wa naa kaa e ji ní lelɔ. (Heb. 3:4) Ngɛ zugba a se ɔ, si bɔlemi dodoe kpahi ngɛ nɛ bɔleɔ pu ɔ, se zugba a je ekpa, ejakaa lɔ ɔ pɛ nɛ adesa ma nyɛ maa hi nɔ. Wa ma nyɛ maa ngɔ zugba a kɛ to mele nɛ ngɛ wo nɔ ɔ he. Se e slo mele nɛ nihi hyi lɛ ngɛ zugba a he kulaa. Kaa nɔ hyɛmi nɔ́ ɔ, ke e ba kaa nihi nɛ a ngɛ mele mi ngɛ́ wo nɔ ɔ ma hla mɛ nitsɛmɛ a kɔɔhiɔ nɛ a maa mu, niye ní kɛ nyu, nɛ a be mu nɛ ngɛ mele ɔ mi hu jee kɛ pue he ɔ, jinɛ kɛ a si himi maa pee kɛɛ? Jinɛ a ma gbo mla. Se zugba a lɛɛ e nyɛɔ nɛ e baa adesahi ayɔ akpehi abɔ kɛ lohwehi a yi. E toɔ kɔɔhiɔ nɛ wa muɔ, nyu, kɛ wa niye ní tsuo he blɔ nya, nɛ ní nɛ ɔmɛ tɛ gblee. Zugba a je we mu nɛ ngɛ nɔ ɔ kɛ yɛ he ko, se kɛ̃ ɔ, e yaa nɔ nɛ e hiɔ fɛu nɛ adesahi nyɛɔ nɛ a hiɔ nɔ. Mɛni blɔ nɔ nɛ e guɔ kɛ peeɔ enɛ ɔ? Yehowa bɔ zugba a konɛ e nyɛ nɛ e tsake níhi nɛ a puɛ ngɛ nɔ ɔ kɛ pee ní kpahi nɛ a he maa ba se nami ekohu. w20.05 20 ¶3-4

Satan ngɛ Hawa dee kaa Yehowa ji lakpatsɛ. Enɛ ɔ he ɔ, Satan ba pee Abosiami aloo nɔ he guɛ gbelɔ. Satan sisi Hawa nitsɛnitsɛ, nɛ Hawa he Satan ye. (1 Tim. 2:14) Hawa ya he Satan ye pe Yehowa. Enɛ ɔ ha nɛ Hawa nitsɛ pee juɛmi nɛ dɛ kulaa. E mwɔ yi mi kpɔ kaa e ma gbo Yehowa nɔ tue. E bɔni tso yiblii ɔ nɛ Yehowa de mɛ ke a ko ye ɔ yemi. Lɔ ɔ se ɔ, e ha Adam hu eko nɛ e ye. (1 Mose 3:6) Mo susu he bɔɔ nɛ o hyɛ nɔ́ nɛ e sa nɛ Hawa ko de Satan. E ko nyɛ ko de lɛ ke: “I li mo, se i le ye Tsɛ Yehowa, i suɔ lɛ nɛ i he lɛ ye. Lɛ ji Nɔ nɛ ha i kɛ Adam nɔ́ fɛɛ nɔ ko nɛ wa ngɛ ɔ. O be he blɔ nɛ o deɔ nɔ́ yaya ko ngɛ e he! Jee hiɛ ɔ kɛ ho!” Kaa Hawa de Satan nɔ́ ko kaa kikɛ nɛ ɔ, jinɛ moo hyɛ bɔ nɛ Yehowa bua maa jɔ ha kaa e biyo nɛ e suɔ lɛ ɔ fã e he! (Abɛ 27:11) Se Hawa je we suɔmi nɛ se pui gblegbleegble ɔ kpo kɛ tsɔɔ Yehowa, nɛ Adam hu pee we jã. Akɛnɛ Adam kɛ Hawa be suɔmi nɛ ɔ kɛ ha a Tsɛ ɔ he je ɔ, a nyɛ we nɛ a fã e biɛ nɛ a gbe he guɛ ɔ he. w20.06 4 ¶10-11

Wa nyɛmimɛ yi ɔmɛ sa yi jemi wawɛɛ ngɛ mɔde nɛ a ngɛ bɔe ngɛ Yehowa sɔmɔmi mi ɔ he. Nyɛmimɛ yihi yeɔ bua ngɛ asafo ɔ tsuhi a mami kɛ a dlami mi, a yeɔ bua ngɛ kuuhi nɛ a tuɔ gbi kpahi a mi, nɛ a yeɔ bua kɛ tsuɔ ní tsumi slɔɔtohi ngɛ Betel. Jehanɛ hu ɔ, a yeɔ bua ngɛ oslaa behi a mi, a yeɔ bua kɛ tsɔɔ wa womi ɔmɛ a sisi, nɛ a kpɛti ni komɛ hu sɔmɔɔ kaa blɔ gbali kɛ ma se sane kpakpa fiɛɛli. Jehanɛ hu ɔ, nyɛmimɛ yigbayi hu yeɔ bua a hunomɛ nɛ a nyɛɔ nɛ a tsuɔ ní tsumihi nɛ a he hia wawɛɛ ngɛ Yehowa asafo ɔ mi. Nyɛmimɛ nyumu nɛ ɔmɛ ji “nike níhi [nɛ a] kɛ ha ngɛ adesahi a mi,” nɛ a tsuɔ níhi babauu a he ní ngɛ asafo ɔ mi. Ke pi a yi ɔmɛ a yemi kɛ buami nya a, jinɛ a ko nyɛ we ní tsumi ɔ tsumi saminya. (Efe. 4:8) Asafo mi nikɔtɔma komɛ yɔse kaa nyɛmimɛ ‘yihi babauu’ ji nihi nɛ a tsuɔ fiɛɛmi ní tsumi ɔ wawɛɛ, nɛ a he be hulɔ. Jehanɛ hu ɔ, asafo mi nikɔtɔmahi yɔse kaa nyɛmimɛ yi anɔkualetsɛmɛ nɛ a ngɛ níhi a si kpami ɔ nyɛɔ nɛ a yeɔ bua yihewi nɛ a ngɛ asafo ɔ mi ɔ nɛ a daa nyagbahi nɛ a kɛ kpeɔ ɔ a nya. (Tito 2:3-5) Ngɛ anɔkuale mi ɔ, nyɛmimɛ yi nɛ ɔmɛ sa yi jemi wawɛɛ! w20.09 23-24 ¶13-14

Nihi nɛ a kɛ anɔkuale yemi sɔmɔ Yehowa se a kɛ asafo ɔ kpa bɔmi be bɔɔ ko ɔ, Yehowa hɛ ji a nɔ; nɛ e hɛ ji ní nɛ a tsu ngɛ e sɔmɔmi mi ɔ nɔ. (Heb. 6:10) Gbalɔ Yesaya ngma nɔ́ he tomi nɔ́ ko nɛ sa wawɛɛ kɛ fɔ si. Nɔ́ he tomi nɔ́ nɛ ɔ tsɔɔ kaa Yehowa susuɔ e we bi a he. Yesaya ngma ke: “E maa lɛ e to kuu ɔ kaa to hyɛlɔ kpakpa; e ma bua e to bi ɔmɛ a nya, nɛ e maa hɛɛ mɛ ngɛ e bɔkɔ mi.” (Yes. 40:11) Ke Yehowa to ko laa a, kɛ Yehowa nɛ e ji To Hyɛlɔ Ngua a nuɔ he ha kɛɛ? Sane ko nɛ Yesu bi e kaseli ɔmɛ ɔ haa nɛ wa naa bɔ nɛ Yehowa nuɔ he ha. E bi mɛ ke: “Kɛ nyɛ susu kɛɛ? Ke nyumu ko ngɛ jijɔ 100 nɛ kake laa a, anɛ e be 99 ɔ sie ngɛ yoku ɔmɛ a nɔ nɛ e sɛ mi konɛ e ya hla nɔ́ nɛ laa a lo? Nɛ ke e na lɛ ɔ, ngɛ anɔkuale mi ɔ, i ngɛ nyɛ dee ke, e nyaa ngɛ lɔ ɔ he kulaa pe 99 nɛ a laa we ɔ he.”​—Mat. 18:12, 13. w20.06 19-20 ¶8-9

E ji he blɔ nɛ wa ná kaa wa ma sɔmɔ Yehowa ngɛ blɔ slɔɔtohi a nɔ. (La 27:4; 84:10) Ke nyɛminyumu ko suɔ nɛ e pee babauu ngɛ asafo ɔ mi ɔ, e sa yi jemi. Se ke e nine su sɔmɔmi he blɔ ko nɔ ɔ, e sɛ nɛ lɔ ɔ nɛ ha nɛ e bu e he pe bɔ nɛ e sa nɛ e bu e he. (Luka 17:7-10) Oti nɛ e sa nɛ e kɛ ma e hɛ mi ji kaa e kɛ he blɔ nɛ e ná a ma sɔmɔ ni kpahi. (2 Kor. 12:15) Baiblo ɔ tu ni komɛ nɛ a bu a he tsɔ pe bɔ nɛ e sa nɛ a bu a he ɔ he munyu. Diotrefe pee we e he humi. E suɔ kaa e maa ye “kekleekle blɔ he” ngɛ asafo ɔ mi. (3 Yoh. 9) Uzia bɔ mɔde kaa e ma tsu ní tsumi ko nɛ Yehowa kɛ wui e dɛ ɔ he ní. (2 Kron. 26:16-21) Absalom hu suɔ nɛ e ye matsɛ, lɔ ɔ he ɔ, e pee kaa nɔ́ nɛ e suɔ ma bi ɔmɛ bɔ nɛ pee nɛ a fĩ e se. (2 Sam. 15:2-6) Nimli nɛ ɔmɛ a sane ɔ tsɔɔ heii kaa Yehowa sume nihi nɛ a hlaa hɛ mi nyami kɛ haa a he. (Abɛ 25:27, NW) Nihi nɛ a woɔ a he nɔ nɛ a hlaa hɛ mi nyami kɛ haa a he ɔ a nyagbe hí sãasãa.​—Abɛ 16:18. w20.07 4 ¶7-8

Weku komɛ nɛ a ji Kristofohi ɔ hiaa kɛ yaa ma kpa nɔ konɛ a ya sa we ngɛ lejɛ ɔ loo a ya hla ní tsumi. Ke e ba lɛ jã a, a bimɛ ɔmɛ yaa sukuu ngɛ ma nɛ a ya sa we ngɛ mi ɔ mi, nɛ a kaseɔ a gbi ɔ. Eko ɔ, a fɔli hu ma nyɛ maa kase ma a mi gbi ɔ bɔ nɛ pee nɛ a ná ní tsumi. Nɛ ke asafo ko aloo kuu ko nɛ a to sisi ɔ tuɔ gbi nɛ weku ɔ tuɔ ɔ hu nɛɛ? Mɛni asafo mi lɛ e sa nɛ weku nɛ ɔ nɛ ya? Anɛ e sa nɛ a ya je asafo nɛ a tuɔ ma a mi gbi ɔ aloo a ya je asafo nɛ a tuɔ mɛ nitsɛmɛ a je gbi ɔ mi? E sa nɛ weku yi ɔ nɛ tsɔɔ asafo nɛ weku ɔ ma ya je mi. Mɛni he je? Ejakaa nɔ ko be nyɛe maa mwɔ jamɛ a yi mi kpɔ ɔ ha lɛ, nɛ lɛ nɛ e maa le nɔ́ tutuutu nɛ maa hi ha e weku ɔ. E sa nɛ wa je bumi kpo ngɛ yi mi kpɔ nɛ weku yi ko maa mwɔ ɔ he. Ke weku yi ko mwɔ yi mi kpɔ ko ɔ, nyɛ ha nɛ wɔ tsuo waa kplɛɛ yi mi kpɔ mwɔmi ɔ nɔ, nɛ wa he mɛ atuu, nɛ wa je suɔmi kpo kɛ tsɔɔ mɛ ngɛ asafo ɔ mi.​—Rom. 15:7. w20.08 30 ¶17-18

Ke wa ngɛ hlae nɛ Yehowa nɛ ye bua wɔ ɔ, e sɛ nɛ wa susu kaa he wami nɛ wa ngɛ, sukuu nɛ wa ya, he nɛ a tsɔse wɔ ngɛ, aloo he lo nya níhi nɛ wa ngɛ ɔ lɛ maa tsɔɔ bɔ nɛ wa he hia ha. Tsa pi ní nɛ ɔmɛ nɛ ma ha nɛ Yehowa kɛ wɔ nɛ tsu ní. Ngɛ anɔkuale mi ɔ, ngɛ Yehowa we bi fuu a blɔ fa mi ɔ, ‘pi a kpɛti nihi fuu ji juɛmitsɛmɛ ngɛ he lo nya, pi a kpɛti nihi fuu nɛ a he wa, pi a kpɛti nihi fuu nɛ a fɔ mɛ kaa odehehi.’ (1 Kor. 1:26) Enɛ ɔ he ɔ, koo na níhi nɛ o nyɛ we peemi ɔ kaa a ji níhi nɛ be hae nɛ o nyɛ nɛ o sɔmɔ Yehowa. Mohu ɔ, moo na mɛ kaa a ji he blɔhi nɛ o ná nɛ o kɛ maa na Yehowa he wami ɔ. Kaa nɔ hyɛmi nɔ́ ɔ, ke o yeɔ nihi nɛ a teɔ si kɛ woɔ o hemi kɛ yemi ɔ gbeye ɔ, moo sɔle ha Yehowa konɛ e ha mo kã nɛ o kɛ tsɔɔ mɛ o hemi kɛ yemi ɔ mi. (Efe. 6:19, 20) Ke hiɔ nɛ nya wa ha nɛ o kɛ nyagbahi ngɛ kpee ɔ, mo bi Yehowa nɛ e ha mo he wami nɛ o hia a konɛ o nyɛ nɛ o ya nɔ nɛ o sɔmɔ lɛ. Be fɛɛ be nɛ o maa na kaa Yehowa ye bua mo ɔ, lɔ ɔ ma ha nɛ o hemi kɛ yemi ɔ mi nɛ wa wawɛɛ. w20.07 16 ¶9

Ke wa suɔ nɛ waa ngɔ Matsɛ Yemi ɔ kɛ ye kekle blɔ he ngɛ wa si himi mi ɔ, lɛɛ e sa nɛ waa kase Abraham nɛ e je e tsui mi nɛ e ngɔ níhi kɛ sã afɔle konɛ e sa Mawu hɛ mi ɔ. (Maak. 10:28-30; Heb. 11:8-10) Moo hyɛ blɔ kaa o kɛ nyagbahi maa kpe ngɛ o si himi mi. Nihi nɛ a yeɔ Yehowa anɔkuale ngɛ nɔ́ fɛɛ nɔ́ mi po kɛ nyagbahi maa kpe. (Yak. 1:2; 1 Pet. 5:9) Mwɔnɛ ɔ, wa ngɛ yi mi tomi fuu a he je nɛ e sa nɛ waa ngɔ wa juɛmi kɛ ma níhi nɛ maa ba hwɔɔ se ɔ a nɔ. Níhi nɛ ngɛ nɔ yae ngɛ je ɔ mi ɔ tsɔɔ heii kaa wa ngɛ nyagbe ligbi ɔmɛ a nyagbe ɔ mi. Jɔɔmihi babauu nɛ wa ma ná ngɛ Matsɛ Yemi ɔ mi ɔ a kpɛti kake ji kaa a ma tle wa suɔli nɛ a gbo ɔ si kɛ ba wami mi ekohu. Jamɛ a be ɔ, Yehowa maa jɔɔ Abraham ngɛ e hemi kɛ yemi ɔ kɛ e tsui si nɛ e to ɔ he, nɛ e ma tle e kɛ e weku ɔ si kɛ ba wami mi ngɛ zugba a nɔ. Anɛ o maa hi lejɛ ɔ konɛ o nya a he lo? Ke o kase Abraham, nɛ o pee klaalo kaa o kɛ níhi maa sã afɔle ngɛ Mawu Matsɛ Yemi ɔ he, o ná hemi kɛ yemi nɛ mi wa ngɛ nyagbahi nɛ o kɛ ngɛ kpee ɔ tsuo se, nɛ o to o tsui si kɛ mlɛ Yehowa a, o ma nyɛ maa hi lejɛ ɔ.​—Mika 7:7. w20.08 5-6 ¶13-14; 7 ¶17

Wa le kaa ke wa he nyɛli ɔmɛ gbe wɔ po ɔ, Yehowa ma tle wɔ si kɛ ba wami mi ekohu. Wa le kaa nɔ́ ko be nyɛe ma ha nɛ wa kpa Yehowa sɔmɔmi. (Rom. 8:35-39) Gbogboehi a si tlemi he hɛ nɔ kami nɛ Yehowa ha wɔ ɔ tsɔɔ kaa e le ní wawɛɛ! Hɛ nɔ kami nɛ ɔ nɛ e ha wɔ ɔ ha nɛ wa yi Satan we bi nɛ a woɔ wa he gbeye kaa a maa gbe wɔ ɔ gbeye. Jehanɛ hu ɔ, e haa nɛ wa peeɔ kã, nɛ wa yaa nɔ nɛ wa yeɔ Yehowa anɔkuale. Ke Yehowa he nyɛli kɛ gbenɔ wo o he gbeye ɔ, anɛ o ma ná hɛ kɛ nɔ fɔmi ngɛ Yehowa mi kaa e ma tle mo si kɛ ba wami mi ekohu lo? Kɛ o ma plɛ kɛ le kaa o ma ná hɛ kɛ nɔ fɔmi ngɛ Yehowa mi ha kɛɛ? Mo bi o he sane nɛ ɔmɛ: ‘Anɛ yi mi kpɔ nyafinyafihi nɛ i mwɔɔ ngɛ ye si himi mi daa ligbi ɔ tsɔɔ kaa i ngɔ ye hɛ kɛ fɔ Yehowa nɔ lo?’ (Luka 16:10) ‘Anɛ bɔ nɛ i peeɔ ye ní ngɛ si himi mi ha a tsɔɔ kaa i ngɛ hɛ kɛ nɔ fɔmi ngɛ Yehowa mi kaa e ma ha mi ye he lo nya hiami níhi ke i ngɔ e Matsɛ Yemi ɔ kɛ ye kekle blɔ he lo?’ (Mat. 6:31-33) Ke o ha sane bimi nɛ ɔmɛ a heto ke ee ɔ, lɛɛ lɔ ɔ tsɔɔ kaa o dla o he kɛ ha ka fɛɛ ka nɛ o kɛ maa kpe ngɛ o si himi mi ɔ.​—Abɛ 3:5, 6. w20.08 17-18 ¶15-16

E sa nɛ waa le bɔ nɛ waa kɛ Mawu Munyu ɔ ma tsu ní ha saminya. Ngɛ wa kpe ɔmɛ a sisi ɔ, wa kaseɔ blɔ slɔɔtohi a nɔ nɛ wa ma nyɛ maa gu konɛ waa kɛ Mawu Munyu ɔ nɛ tsu ní saminya. Se loko wa ma nyɛ ma plɛ nihi a yi mi nɛ a he ye kaa Baiblo mi anɔkuale ɔ he jua wa niinɛ ɔ, e sa nɛ waa kase Baiblo ɔ be fɛɛ be. E sa nɛ waa ngɔ Mawu Munyu ɔ kɛ wo wa hemi kɛ yemi ɔ mi he wami. Enɛ ɔ biɔ nɛ waa pee Babauu pe Baiblo ɔ kɛkɛ nɛ wa maa kane. E sa nɛ wa pue wa yi mi tɛ ngɛ níhi nɛ wa kaneɔ ɔ he, nɛ wa hla níhi a mi ngɛ wa womi ɔmɛ a mi bɔ nɛ pee nɛ waa nu Ngmami ɔ sisi saminya konɛ wa kɛ tsu ní. (1 Tim. 4:13-15) Ke wa pee jã a, wa ma nyɛ maa ngɔ Mawu Munyu ɔ kɛ tsɔɔ nihi ní. Se jã peemi biɔ babauu pe ngmami ko nɛ wa maa kane kɛ ha nihi kɛkɛ. Wa suɔ nɛ waa ye bua wa tue buli ɔmɛ nɛ a nu ngmami fɛɛ ngmami nɛ wa kaneɔ kɛ haa mɛ ɔ sisi nɛ a le bɔ nɛ e kɔɔ a he ha. Ke wa kaseɔ Baiblo ɔ be fɛɛ be ɔ, lɔ ɔ ma nyɛ maa ye bua wɔ nɛ waa ngɔ Mawu Munyu ɔ kɛ tsɔɔ ni kpahi ní saminya.​—2 Tim. 3:16, 17. w20.09 28 ¶12

Ke wa susu níhi tsuo nɛ Yehowa ngɛ pee kɛ ngɛ wɔ yee buae ɔ he ɔ, lɔ ɔ maa ye bua wɔ konɛ waa ya nɔ nɛ waa ngɔ wa juɛmi kɛ ma fiɛɛmi ní tsumi ɔ nɔ. Kaa nɔ hyɛmi nɔ́ ɔ, e to mumi mi níhi fuu a he blɔ nya kɛ ha wɔ. Ní nɛ ɔmɛ ekomɛ ji: Womihi, níhi nɛ a fiaa nɛ a buɔ tue, videohi kɛ Intanɛti nɔ níhi. Mo susu he nɛ o hyɛ: Ngɛ wa wɛbsaiti ɔ nɔ ɔ, wa ngɛ níhi slɔɔtohi ngɛ gbihi maa pee 1,000 kɛ se mi! (Mat. 24:45-47) Nɔ́ kpa ko hu nɛ wa ma nyɛ maa pee konɛ waa ngɔ wa juɛmi kɛ ma fiɛɛmi ní tsumi ɔ nɔ ji kaa wa maa kase Yesu nɔ hyɛmi nɔ́ ɔ. Yesu ha we nɛ nɔ́ ko nɛ je e juɛmi ngɛ Matsɛ Yemi ɔ he sane kpakpa a nɛ e maa fiɛɛ ɔ nɔ. (Yoh. 18:37) E ha we nɛ “je ɔ mi matsɛ yemi ɔmɛ tsuo kɛ a hɛ mi nyami ɔ” nɛ Satan kɛ tsɔɔ lɛ ɔ nɛ pee lɛ akɔnɔ, nɛ e ha we nɛ matsɛ nɛ a ngɛ hlae maa wo lɛ ɔ hu nɛ pee ka kɛ ha lɛ. (Mat. 4:8, 9; Yoh. 6:15) E ha we nɛ he lo nya níhi nɛ sisi lɛ, nɛ e ha we nɛ si temi kɛ womi hu nɛ wo e he gbeye. (Luka 9:58; Yoh. 8:59) Ke waa kɛ wa hemi kɛ yemi ɔ he kahi kpe, nɛ wa kai ga womi nɛ bɔfo Paulo kɛ ha ngɛ mwɔnɛ ɔ ngmami ɔ mi ɔ, e maa ye bua wɔ nɛ waa kɛ wa juɛmi nɛ ma fiɛɛmi ní tsumi ɔ nɔ. w20.09 9-10 ¶6-7

Wa bua jɔ kaa wa ngɛ nyɛmimɛ yihi babauu nɛ a tsuɔ ní wawɛɛ ngɛ asafo ɔ mi! Ke a ba asafo mi kpe ɔ, a kɛ a he woɔ ní kasemi ɔ mi, nɛ a kɛ a he woɔ fiɛɛmi ní tsumi ɔ mi hulɔ. A kpɛti ni komɛ hu yeɔ bua kɛ dlaa níhi nɛ puɛ ngɛ wa Matsɛ Yemi Asahi a he ɔ, nɛ a ngɔɔ a ní peepee kɛ tsɔɔ kaa a susuɔ nyɛmimɛ a he. Se ngɛ anɔkuale mi ɔ, a kɛ nyagbahi kpeɔ. A kpɛti ni komɛ hyɛɛ a fɔli nɛ a wa ngɛ jeha mi ɔ a nɔ. Ni komɛ hu ngɛ nɛ a weku li teɔ si kɛ woɔ mɛ. A kpɛti ni komɛ hu nɛ a ji fɔlɔ kake ɔ ngɛ ní tsue wawɛɛ konɛ a kɛ hyɛ a bimɛ a nɔ. Mɛni he je nɛ e sa nɛ waa ye bua wa nyɛmimɛ yihi nɛ wa fĩ a se ɔ? E sa nɛ waa pee jã, ejakaa je ɔ bui yihi. Jehanɛ hu ɔ, Baiblo ɔ woɔ wɔ he wami kaa waa ye bua wa nyɛmimɛ yihi. Kaa nɔ hyɛmi nɔ́ ɔ, bɔfo Paulo wo asafo nɛ ngɛ Roma a he wami kaa a he Fiibi atuu, nɛ “nɔ́ fɛɛ nɔ́ nɛ he maa hia lɛ ɔ,” a ha lɛ. (Rom. 16:1, 2) Paulo  piɛɛ nihi nɛ a susu kaa yihi a he hia we nɛ a bui mɛ ɔ a he. Se benɛ e ba pee Kristofo no ɔ, e kase Yesu nɔ hyɛmi nɔ́ ɔ nɛ e pee yihi kpakpa, nɛ e je bu kpo kɛ tsɔɔ mɛ. w20.09 20 ¶1-2

Bɔ nɛ pee nɛ waa ye bua wa Baiblo kaseli konɛ mɛ hu a ná suɔmi ɔ kaa a maa fiɛɛ sane kpakpa a,wa ma nyɛ ma bi mɛ sane bimi nɛ ɔmɛ: “Kɛ níhi nɛ o kase ngɛ Baiblo ɔ mi nɛ o kɛ tsu ní ɔ tsake o si himi ha kɛɛ? Anɛ o susu kaa e he hia nɛ ni kpahi nɛ a nu Baiblo mi sɛ gbi ɔ lo? Mɛni o ma nyɛ maa pee kɛ ye bua mɛ?” (Abɛ 3:27; Mat. 9:37, 38) Kai kaa Yesu fã wɔ kaa waa tsɔɔ nihi ní konɛ a “ye níhi tsuo” nɛ e fã wɔ ɔ a nɔ. Ngɛ anɔkuale mi ɔ, kita enyɔ nɛ pe kulaa nɛ tsɔɔ kaa waa suɔ Mawu kɛ wa nyɛmi nɔmlɔ ɔ piɛɛ fami nɛ ɔ he. (Mat. 22:37-39) Ngɛ anɔkuale mi ɔ, suɔmi ji nɔ́ titli nɛ woɔ wɔ he wami nɛ wa fiɛɛɔ. Ngɛ Baiblo kaseli komɛ a blɔ fa mi ɔ, a maa ye gbeye kaa a kɛ a he maa wo fiɛɛmi ní tsumi ɔ mi. Se wa ma nyɛ ma ha nɛ a ná nɔ mi mami kaa Yehowa maa ye bua mɛ konɛ a nyɛ nɛ a fiɛɛ.​—La 18:1-3; Abɛ 29:25. w20.11 3 ¶6-8

Ke o ngɛ o he dlae kɛ ha Baiblo ní kasemi ɔ, moo sɔle kɛ ha o Baiblo kaselɔ ɔ, nɛ o sɔle ngɛ e hiami níhi hu a he. Mo bi Yehowa nɛ e ye bua mo konɛ o ngɔ Baiblo ɔ kɛ tsɔɔ Baiblo kaselɔ ɔ ní ngɛ blɔ nɔ nɛ maa ta e tsui he. Oti nɛ e sa nɛ o kɛ ma o hɛ mi ji kaa o maa ye bua lɛ nɛ e ya e hɛ mi konɛ e ha nɛ a baptisi lɛ. E sa kaa Baiblo kaselɔ ɔ kɛ Yehowa nɛ sɛɛ ní. Ngɛ mɛni blɔ nɔ? Enɛ ɔ ma bi nɛ e kɛ Yehowa nɛ tu munyu nɛ e bu lɛ tue hulɔ. Ke e kaneɔ Baiblo ɔ daa ligbi ɔ, lɔ ɔ tsɔɔ kaa e ngɛ Yehowa tue bue. (Yosh. 1:8; La 1:1-3) E ma nyɛ maa sɔle kɛ ha Yehowa daa ligbi. Lɔ ɔ he ɔ, loko nyɛ maa kase ní ɔ, moo je o tsui mi nɛ o sɔle, nɛ ke nyɛ gbe nya hu ɔ, moo pee jã nɔuu, nɛ́ o sɔle kɛ ha o Baiblo kaselɔ ɔ hulɔ. Ke e na bɔ nɛ o jeɔ o tsui mi kɛ sɔleɔ ha a, e maa kase bɔ nɛ a sɔleɔ ha, nɛ lɛ hu e maa je e tsui mi kɛ sɔle ha Yehowa Mawu ngɛ Yesu Kristo biɛ mi. (Mat. 6:9; Yoh. 15:16) Mo susu bɔ nɛ Baiblo ɔ nɛ e maa kane daa ligbi (Yehowa tue nɛ e maa bu) kɛ bɔ nɛ sɔlemi (Yehowa nɛ e kɛ maa sɛɛ ní ɔ) maa ye bua lɛ ha konɛ huɛ bɔmi nɛ hi e kɛ Mawu a kpɛti ɔ he!​—Yak. 4:8. w20.10 8 ¶8; 9 ¶10-11

Yehowa asafo ɔ bɔɔ mɔde wawɛɛ kɛ toɔ níhi a he blɔ nya konɛ tue mi jɔmi nɛ hi asafo ɔmɛ a mi kaa bɔ nɛ e ji ngɛ kaseli ɔmɛ a be ɔ mi ɔ. (Níts. 16:4, 5) Kaa nɔ hyɛmi nɔ́ ɔ, ke o ya asafo mi kpe ngɛ ma kpa nɔ nɛ a ngɛ Hwɔɔmi Mɔ ɔ Mi Ní Kasemi pee ɔ, o leɔ bɔ nɛ ní kasemi ɔ maa ya lɛ ha kɛ nɔ́ nɛ a maa kase. Enɛ ɔ haa nɛ o hɛwi! Mawu mumi klɔuklɔu ɔ pɛ lɛ ma nyɛ ma ha nɛ kake peemi nɛ ɔ nɛ ya nɔ. (Zef. 3:9) Mɛni o ma nyɛ maa pee? Mo bi o he ke: ‘Anɛ i peeɔ níhi nɛ ma ha nɛ kake peemi kɛ tue mi jɔmi nɛ hi asafo ɔ mi lo? Anɛ i buɔ nihi nɛ a nyɛɛɔ hɛ mi ɔ a blɔ tsɔɔmi tue lo? Ke i ngɛ blɔ nya ní tsumihi ngɛ asafo ɔ mi ɔ, anɛ ni kpahi ma nyɛ maa ngɔ a hɛ kɛ fɔ ye nɔ lo? Anɛ i yaa asafo mi kpe be fɛɛ be, i yeɔ bua ni kpahi, nɛ i pee klaalo kaa ma sɔmɔ mɛ lo?’ (Yak. 3:17) Ke o na kaa e he hia nɛ o bɔ o he mɔde ngɛ ní nɛ ɔmɛ ekomɛ a peemi mi ɔ, moo sɔle nɛ Mawu mumi klɔuklɔu ɔ nɛ ye bua mo. Ke o ya nɔ nɛ o ha nɛ Mawu mumi klɔuklɔu ɔ ná o su kɛ o ní peepee nɔ he wami ɔ, lɔ ɔ ma ha nɛ nyɛmimɛ ɔmɛ maa suɔ mo nɛ a maa bu mo. w20.10 23 ¶12-13

Mawu Munyu ɔ ma nyɛ maa pee kaa ahuhuɛ kɛ ha wɔ. (Yak. 1:23-25) Wa kpɛti nihi fuu wa hyɛɛ ahuhuɛ mi loko wa jeɔ we mi. Jã nɛ wa peeɔ ɔ haa nɛ wa naa níhi nɛ e sa nɛ wa dla ngɛ wa he loko ni kpahi nɛ a na. Jã kɛ̃ nɛ ke wa kaneɔ Baiblo ɔ daa ligbi ɔ, wa maa na blɔhi a nɔ nɛ wa ma nyɛ maa gu kɛ dla wa susumi kɛ wa ní peepee. Nihi fuu yɔse kaa ke a kane daa ligbi ngmami ɔ loko a je we mi mɔtu ɔ, e yeɔ bua mɛ wawɛɛ. A haa nɛ nɔ́ nɛ a kaneɔ ɔ náa a susumi nɔ he wami. Nɛ ngɛ ligbi ɔ mi tsuo ɔ, a hlaa blɔhi a nɔ nɛ a maa gu konɛ a kɛ ga womi nɛ ngɛ Mawu Munyu ɔ mi ɔ nɛ tsu ní. Jehanɛ hu ɔ, e sa nɛ waa kase Mawu Munyu ɔ daa ligbi nɛ wa pue wa yi mi tɛ ngɛ nɔ́ nɛ wa kase ɔ he. Eko ɔ, enɛ ɔ peemi maa ye ha wɔ, se e ji nɔ́ ko nɛ he hia wawɛɛ nɛ maa ye bua wɔ konɛ wa nyɛ nɛ waa nyɛɛ blɔ nɛ kɛ nɔ yaa wami mi ɔ nɔ. Ngɛ blɔ ko nɔ ɔ, Mawu Munyu ɔ ngɛ kaa X-ray machine nɛ haa nɛ wa naa nɔ́ nɛ ngɛ nɔ yae ngɛ wa mi blɔ. Se jã wa baa wa he si loko wa ma ná ga womi nɛ Mawu Munyu ɔ loo nihi nɛ a ngɛ hɛ mi nyɛɛe ɔ kɛ haa a he se. w20.11 18 ¶3; 20 ¶8

E ngɛ mi kaa Kristofohi nɛ a hi si ngɛ kaseli ɔmɛ a be ɔ mi ɔ kɛ yi mi wami kpe mohu lɛɛ, se a ná tue mi jɔmi behi hulɔ. Kɛ kaseli ɔmɛ kɛ tue mi jɔmi behi nɛ a ná a tsu ní ha kɛɛ? Kristofohi nɛ ɔmɛ kɛ be nɛ ɔ fiɛɛ sane kpakpa a wawɛɛ. Baiblo ɔ de ke: A nyɛɛ “ngɛ Yehowa gbeye yemi mi.” Kristofohi nɛ ɔmɛ ya nɔ nɛ a fiɛɛ sane kpakpa a. Mɛni lɛ je mi kɛ ba? Baiblo ɔ de ke: ‘Asafo ɔ yi bli.’ E ngɛ heii kaa Yehowa jɔɔ kã nɛ nyɛmimɛ nɛ ɔmɛ kɛ fiɛɛ ngɛ tue mi jɔmi be mi ɔ nɔ. (Níts. 9:26-31) Kristofohi nɛ a hi si ngɛ kaseli ɔmɛ a be ɔ mi ɔ ngɔ he blɔhi tsuo nɛ a ná a kɛ fiɛɛ sane kpakpa a. Kaa nɔ hyɛmi nɔ́ ɔ, benɛ bɔfo Paulo ná he blɔ kaa e maa fiɛɛ ha nihi babauu ngɛ Efeso ɔ, e fiɛɛ sane kpakpa a, nɛ e pee nihi kaseli ngɛ ma a mi. (1 Kor. 16:8, 9) Kaseli ɔmɛ tsuo bɔ mɔde wawɛɛ nɛ a fiɛɛ “Yehowa munyu ɔ he sane kpakpa a.” (Níts. 15:30-35) Mɛni lɛ je mi kɛ ba? Lɔ ɔ ji nɔ́ nɛ mwɔnɛ ɔ ngmami de ɔ nɛ. w20.09 16 ¶6-8

Benɛ Adam pee yayami ɔ, e ngɔ haomi kɛ ba lɛ nitsɛ kɛ e sisi bimɛ a nɔ. Loloolo ɔ, wa ngɛ Adam tue gbomi ɔ mi nɔ́ nae. Se akɛnɛ Mawu tle e Bi ɔ si kɛ ba wami mi he je ɔ, wa ma nyɛ maa hyɛ be kpakpa blɔ hwɔɔ se. Bɔfo Paulo de ke: “Gbogboehi a si tlemi hu maa gu adesa [Yesu] nɔ kɛ ba. Ejakaa kaa bɔ nɛ nihi tsuo ngɛ gboe ngɛ Adam mi ɔ, jã kɛ̃ nɛ a ma ha nɛ nihi tsuo maa ba wami mi ngɛ Kristo mi.” (1 Kor. 15:22) Mɛni Paulo ngɛ tsɔɔe benɛ e de ke “nihi tsuo ngɛ gboe ngɛ Adam mi ɔ?” Adam sisi bimɛ nɛ Adam yayami ɔ ha nɛ a yi mluku nɛ lɔ ɔ he je a ngɛ gboe ɔ a he munyu nɛ Paulo ngɛ tue. (Rom. 5:12) Adam piɛɛ we nihi nɛ a “maa ba wami mi” ɔ a he. Kristo kpɔmi nɔ́ ɔ be nyɛe ma kpɔ̃ lɛ, ejakaa e ji nɔ ko nɛ e ye mluku nɛ e je blɔ gbo Mawu nɔ tue. Nɔ́ nɛ ba Adam nɔ ɔ nɔuu nɛ maa ba nihi nɛ “nɔmlɔ Bi ɔ” maa kojo mɛ kaa “apletsihi” ɔ a nɔ. A maa ‘po mɛ ngɔ fɔ he kɛ ya neneene.’​—Mat. 25:31-33, 46; Heb. 5:9. w20.12 5 ¶13-14

Ke wa nine sui sɔmɔmi he blɔ pɔtɛɛ ko nɔ ɔ, wa ma nyɛ ma susu bɔfohi anɔkualetsɛmɛ ɔmɛ a nɔ hyɛmi nɔ́ ɔ he. Benɛ Matsɛ Ahab ngɛ nɔ yee ɔ, Yehowa bi bɔfo ɔmɛ kaa a tsɔɔ nɔ́ nɛ a maa pee kɛ sisi Matsɛ Ahab. Bɔfo ɔmɛ a kpɛti ni komɛ tsɔɔ a juɛmi. Se Mawu kplɛɛ bɔfo kake susumi nɔ, nɛ e de lɛ kaa juɛmi nɛ e tsɔɔ ɔ maa ye manye. (1 Ma. 22:19-22) Anɛ lɔ ɔ ha nɛ bɔfo anɔkualetsɛmɛ kpa amɛ a kɔni mi jɔ̃, nɛ a de a he ke, ‘Mɛni he je nɛ i puɛ ye be, nɛ i tsɔɔ ye juɛmi ɔ?’ A pee we jã kɔkɔɔkɔ. Bɔfo ɔmɛ baa a he si nitsɛnitsɛ, nɛ a suɔ nɛ hɛ mi nyami tsuo nɛ ya Yehowa ngɔ. (Many. 13:16-18; Kpoj. 19:10) O hɛ ko je nɔ kaa he blɔ nɛ pe kulaa nɛ wa ngɛ ji Mawu biɛ nɛ maa hi wa nɔ kɛ Mawu Matsɛ Yemi ɔ he sane kpakpa a nɛ wa maa fiɛɛ. Tsa pi sɔmɔmi he blɔhi nɛ peeɔ wɔ nihi nɛ a he jua wa ngɛ Mawu hɛ mi. Ke wa baa wa he si, nɛ wa peeɔ wa he humi ɔ, lɔ ɔ haa nɛ wa he jua waa kɛ haa Yehowa kɛ wa nyɛmimɛ. Enɛ ɔ he ɔ, moo sɔle ha Yehowa nɛ e ye bua mo nɛ o ba o he si, nɛ o pee o he humi. Mo susu nihi nɛ a ba a he si nɛ a pee a he humi nɛ a ngma a he sane ngɛ Baiblo ɔ mi ɔ a nɔ hyɛmi ní ɔmɛ a he. Moo je o tsui mi nɛ o pee nɔ́ fɛɛ nɔ́ nɛ o ma nyɛ kɛ sɔmɔ o nyɛmimɛ.​—1 Pet. 5:5. w20.12 26 ¶16-17

Yi wami hemi nɛ ji dade pɛɛ ɔ ji hɛ kɛ nɔ fɔmi nɛ Yehowa ha wɔ. Wa ngɛ hɛ kɛ nɔ fɔmi kaa Yehowa maa jɔɔ e sɔmɔli tsuo, nɛ ke a gbo po ɔ, e ma tle mɛ si kɛ ba wami mi. (1 Tɛs. 5:8; 1 Tim. 4:10; Tito 1:1, 2) Yi wami hemi nɛ ji dade pɛɛ ɔ poɔ wa susumi he piɛ. E yeɔ bua wɔ nɛ wa ngɔɔ wa hɛ kɛ fɔɔ Mawu si womihi a nɔ, nɛ e yeɔ bua wɔ nɛ wa náa juɛmi nɛ da ngɛ nyagbahi nɛ waa kɛ ngɛ kpee ɔmɛ a he. Wa buɔ dade pɛɛ ɔ ke wa ha nɛ wa susumi kɛ Yehowa susumi kpa gbi be fɛɛ be ɔ. Kaa nɔ hyɛmi nɔ́ ɔ, wa hɛ kɛ nɔ fɔmi ɔ dɛ si ngɛ ní nami nɛ be si hie daa a nɔ, mohu ɔ, e daa si ngɛ Mawu si womi ɔmɛ a nɔ. (La 26:2; 104:34; 1 Tim. 6:17) Mumi ɔ klaate ɔ nɛ ji Mawu Munyu ɔ ji Baiblo ɔ nɛ. Jamɛ a klaate ɔ nyɛɔ kpaa lakpa tsɔɔmi fɛɛ lakpa tsɔɔmi he bo, nɛ e haa nɛ nihi yeɔ a he ngɛ lakpa tsɔɔmihi kɛ je mi bami nɛ ma nyɛ maa ye mɛ awi ɔ he. (2 Kor. 10:4, 5; 2 Tim. 3:16, 17; Heb. 4:12) Wa kaseɔ bɔ nɛ a kɛ klaate nɛ ɔ tsuɔ ní saminya ha kɛ gu dɛ he ní kasemi kɛ tsɔsemi nɛ wa nine suɔ nɔ ngɛ Mawu asafo ɔ mi ɔ nɔ.​—2 Tim. 2:15. w21.03 27 ¶4; 29 ¶10-11

Benɛ a wo Yohane tsu kaa e ngɛ fiɛɛe kɛ kɔ Yesu he po ɔ, e ya nɔ nɛ e je suɔmi kpo kɛ tsɔɔ ni kpahi. Kaa nɔ hyɛmi nɔ́ ɔ, e ngma Kpo Jemi womi ɔ nɛ e kɛ mane asafohi bɔ nɛ pee nɛ a le níhi nɛ “e sa kaa a ba mi ngɛ be kpiti mi.” (Kpoj. 1:1) Lɔ ɔ se ɔ, e ma nyɛ maa ba kaa benɛ a je Yohane ngɛ tsu womi mi ngɛ Patmɔs ɔ, e ngma Sane Kpakpa a nɛ kɔɔ Yesu si himi kɛ fiɛɛmi ní tsumi ɔ he ɔ. Jehanɛ hu ɔ, e ngma sɛ womi etɛ nɛ e kɛ wo e nyɛmimɛ ɔmɛ he wami. O ma nyɛ maa kase Yohane he kɛ afɔle sami su ɔ, nɛ o kɛ níhi nɛ o maa pee ngɛ o si himi mi ɔ nɛ tsɔɔ kaa o suɔ nihi. Satan je ɔ suɔ kaa o ngɔ o be tsuo kɛ tsu ní konɛ o ná sika aloo o he biɛ. Se Kristofohi tsuo ngɔɔ a he kɛ haa faa nɛ a bɔɔ mɔde tsuo nɛ a ma nyɛ konɛ a fiɛɛ sane kpakpa a nɛ a ye bua nihi konɛ a hɛ kɛ su Yehowa he. w21.01 10 ¶9-10

Yonatan ko nyɛ ko je David he hunga. Akɛnɛ Yonatan ji Matsɛ Saul binyumu he je ɔ, eko ɔ, e ko nyɛ ko de ke lɛ ji nɔ nɛ e sa nɛ e ye matsɛ ngɛ e tsɛ ɔ se. (1 Sam. 20:31) Se Yonatan baa e he si nɛ e yeɔ Yehowa anɔkuale. Lɔ ɔ he ɔ, e fĩ Yehowa se nɛ e kplɛɛ nɔ kaa David nɛ ba ye matsɛ. Jehanɛ hu ɔ, Yonatan ye David anɔkuale, nɛ enɛ ɔ ha nɛ Saul muklii mi fu wawɛɛ. (1 Sam. 20:32-34) Yonatan suɔ David sane wawɛɛ, lɔ ɔ he ɔ, e ji e he hunga. Yonatan ji tatsɛ nɛ ngɛ kã, nɛ e le bɔ nɛ a tsɛ̃ɔ kɛ̃ɛ̃ ha saminya. A le e kɛ e tsɛ Saul kaa “a he sɔɔ pe kɔle; nɛ a he wa pe jata.” (2 Sam. 1:22, 23) Enɛ ɔ he ɔ, Yonatan ko nyɛ ko ngɔ níhi nɛ e pee ɔ kɛ ko fĩa. Se Yonatan kɛ e he tui David he nɛ e ji e he hunga hulɔ, mohu ɔ, Yonatan bua jɔ kã nɛ David pee kɛ e hɛ nɛ e kɛ fɔ Yehowa nɔ ɔ he. Kaa nɔ hyɛmi nɔ́ ɔ, benɛ David gbe Goliat ɔ Yonatan ba bɔni David suɔmi kaa lɛ nitsɛ e he. w21.01 21 ¶6; 22 ¶8-9

Kristofohi tsuo ngɛ Yesu Kristo nɛ ye mluku nɛ ji asafo ɔ yi ɔ sisi. Se ke yo ko nɛ ji Kristofo no sɛ gba si himi mi ɔ, e huno ɔ nɛ e yi mluku ɔ ba peeɔ e yi. Enɛ ɔ ma nyɛ maa ngɔ nyagba kɛ ba. Enɛ ɔ he ɔ, ke nyɛmiyo ko ngɛ hlae nɛ e sɛ gba si himi mi ɔ, e sa nɛ e bi e he ke: ‘Mɛni tsɔɔ kaa nyɛminyumu nɛ ɔ ma nyɛ maa pee wekuyi kpakpa? Anɛ mumi mi níhi a he hia lɛ ngɛ e si himi mi lo? Ke heto ɔ ji dɛbi ɔ, lɛɛ mɛni tsɔɔ kaa e ma nyɛ maa ye bua nɛ huɛ bɔmi kpakpa nɛ hi waa kɛ Yehowa wa kpɛti ke wa sɛ gba si himi mi?’ Jehanɛ hu ɔ, e sa nɛ nyɛmiyo ɔ nɛ bi e he ke: ‘Mɛni suhi nɛ i ngɛ nɛ maa ye bua wa gba a? Anɛ i toɔ ye tsui si, nɛ i haa nɔ nɔ́ lo? Anɛ huɛ bɔmi kpakpa ngɛ i kɛ Yehowa wa kpɛti lo?’ (Fiɛlɔ 4:9, 12) Ke nyɛmiyo ko mwɔ yi mi kpɔhi nɛ da loko e sɛ gba si himi mi ɔ, lɔ ɔ maa ye bua lɛ nɛ e gba si himi ɔ nɛ ye manye nɛ e ma ná bua jɔmi. Yihi nɛ a ji Kristofohi ayɔhi abɔ peeɔ nɔ hyɛmi nɔ́ kpakpa kɛ gu a he si nɛ a baa kɛ haa a hunomɛ ɔ nɔ. A sa yi jemi wawɛɛ! w21.02 8 ¶1-2

Lingmi nɛ ɔ, fiɛɛli babauu kɛ pee oti kaa a maa kase gbi kpa konɛ a nyɛ nɛ a bli a sɔmɔmi ní tsumi ɔ mi nɛ a sɔmɔ ngɛ asafo nɛ a hia fiɛɛli babauu ɔ mi. Nyɛmimɛ ɔmɛ mwɔ yi mi kpɔ nɛ ɔ konɛ a nyɛ nɛ a pee babauu ngɛ Yehowa sɔmɔmi mi. E ngɛ mi kaa e ma he be babauu loko a maa nu gbi ɔ saminya mohu lɛɛ, se a yeɔ bua asafo ɔ ngɛ blɔhi fuu a nɔ. Su kpakpahi nɛ a ngɛ kɛ níhi a si kpami nɛ a ná a woɔ nyɛmimɛ nɛ a ngɛ asafo ɔ mi ɔ he wami. Wa bua jɔɔ he kɛ afɔle sami su nɛ nyɛmimɛ nɛ ɔmɛ jeɔ kpo ɔ he! Ke nyɛminyumu ko nyɛ we nɛ e tu gbi nɛ a tuɔ ngɛ asafo nɛ e ngɛ sɔmɔe ngɛ mi ɔ saminya a, e sɛ nɛ asafo mi nikɔtɔma amɛ nɛ a da lɔ ɔ nɔ kɛ tsi e nya ngɛ he blɔ nɛ e ma ná kaa asafo mi nɔkɔtɔma loo asafo mi sɔmɔlɔ ɔ he. E sa nɛ asafo mi nikɔtɔma amɛ nɛ a da Ngmami ɔ nɔ kɛ hyɛ kaa nyɛmi ko he su kɛ ha sɔmɔmi he blɔ ko, se pi a je gbi ɔ nɛ e nyɛ we nɛ e tu saminya a.​—1 Tim. 3:1-10, 12, 13; Tito 1:5-9. w20.08 30 ¶15-16

Eko ɔ, nihi fuu ma susu kaa jã a ná nɔmlɔ tso mi he wami kpakpa, a ná sika fuu, nɛ tue mi jɔmi ngɛ a weku mi loko a bua maa jɔ. Se bua jɔmi nɛ Yakobo tu he munyu ɔ piɛɛ Mawu mumi klɔuklɔu ɔ yiblii ɔ he, nɛ bɔ fɛɛ bɔ nɛ wa si fɔfɔɛ ji ha po ɔ, wa ma nyɛ ma ná jamɛ a bua jɔmi ɔ. (Gal. 5:22) Kristofo no ko nyaa aloo e náa bua jɔmi nitsɛnitsɛ akɛnɛ e le kaa e ngɛ Yehowa suɔmi nya ní pee, nɛ e ngɛ Yesu nɔ hyɛmi nɔ́ ɔ kasee ɔ he je. (Luka 6:22, 23; Kol. 1:10, 11) Wa ma nyɛ maa ngɔ bua jɔmi nɛ ɔ kɛ to la nɛ ngɛ tsoe ngɛ kane mi ɔ he. Kane tɔ ɔ poɔ la nɛ ngɛ tsoe ɔ he piɛ ngɛ kɔɔhiɔ loo hiɔmi he konɛ la a nɛ ko gbo. Jã kɛ̃ nɛ wɔ hu ke waa kɛ si fɔfɔɛhi nɛ a mi wa ngɛ kpee ngɛ si himi mi po ɔ, wa ma nyɛ maa ya nɔ ma ná bua jɔmi. Ke wa be he wami loo sika po ɔ, bua jɔmi nɛ wa ngɛ ɔ bɛ si. Nɛ ke wa weku li kɛ ni kpahi ye wa he fɛu loo a te si kɛ wo wɔ po ɔ, loloolo ɔ, wa bua jɔɔ. Wa ma nyɛ maa ya nɔ ma ná buɔ jɔmi ke nihi bɔ mɔde kaa a ma puɛ wa bua jɔmi po. Wa hemi kɛ yemi ɔ he kahi nɛ waa kɛ kpeɔ ɔ maa nɔ mi kaa wa ji Kristo kaseli niinɛ. (Mat. 10:22; 24:9; Yoh. 15:20) Enɛ ɔ he je nɛ Yakobo ngma munyuhi nɛ ngɛ mwɔnɛ ɔ ngmami ɔ mi ɔ nɛ. w21.02 28 ¶6

Ke o ngɛ Baiblo ɔ kanee nɛ o na ngmami komɛ nɛ tsɔɔ bɔ nɛ se nami ngɛ he kaa wa maa pee kpoo nɛ waa ngɔ wa hɛ kɛ fɔ Yehowa nɔ ɔ, bɔɔ mɔde nɛ o kase ngmami nɛ ɔmɛ kɛ wo o yi mi. E maa hi kaa o maa kane ngmami ɔ nɛ e je kpo aloo o maa ngma kɛ fɔ si konɛ o pɔ kanemi. Yehowa de Yoshua kaa e kɛ gbi blɛuu nɛ kane Mlaa womi ɔ be fɛɛ be konɛ e pee ní lelɔ. Nɔ́ nɛ e kane ɔ maa ye bua lɛ nɛ e ko ye gbeye, mohu ɔ, e maa pee kã nɛ e nyɛɛ Mawu we bi a hɛ mi. (Yosh. 1:8, 9) Munyuhi fuu ngɛ Mawu Munyu ɔ mi nɛ ma nyɛ maa ye bua mo nɛ o pee kpoo ngɛ si fɔfɔɛhi nɛ ma nyɛ ma ha nɛ o hao loo o ye gbeye ɔ a mi. (La 27:1-3; Abɛ 3:25, 26) Ke wa ya asafo mi kpe ɔ, nyɛmimɛ nyumuhi tuɔ munyuhi kɛ woɔ wɔ he wami, nyɛmimɛ haa sanehi a heto, nɛ waa kɛ wa nyɛmimɛ sɛɛɔ ní. Enɛ ɔmɛ tsuo fiaa wɔ kɛ maa si. (Heb. 10:24, 25) Jehanɛ hu ɔ, ke waa kɛ wa huɛmɛ nɛ a ngɛ asafo ɔ mi nɛ wa he mɛ ye ɔ sɛɛ wa nyagbahi a he ní ɔ, a woɔ wɔ he wami wawɛɛ. w21.01 6 ¶15-16

Benɛ a baptisi mo ɔ, o tsɔɔ kaa o he Yehowa ye, nɛ o ngɔ o hɛ kɛ fɔ e nɔ. Nɛ Yehowa hu kɛ bua jɔmi kplɛɛ o nɔ nɛ o ba piɛɛ e weku ɔ he. Lɔ ɔ he ɔ, yaa nɔ nɛ o ngɔ o hɛ kɛ fɔ Yehowa nɔ. Eko ɔ, ke o ngɛ yi mi kpɔ mwɔe ngɛ níhi nɛ a he hia ngɛ si himi mi he ɔ, e he be wae kaa o maa ngɔ o hɛ kɛ fɔ Yehowa nɔ. Se ngɛ si fɔfɔɛ kpahi a mi hu nɛɛ? Ke wa ngɛ yi mi kpɔhi mwɔe ngɛ hɛ ja jemi, ní tsumi kɛ ní kpahi nɛ wa suɔ nɛ waa pee ngɛ wa si himi mi a he ɔ, e sa nɛ waa ngɔ wa hɛ kɛ fɔ Yehowa nɔ. Koo ngɔ o hɛ kɛ fɔ mo nitsɛ o nile nɔ, mohu ɔ, mo hla Baiblo sisi tomi mlaahi nɛ kɔɔ o si fɔfɔɛ ɔ he ɔ nɛ o kɛ tsu ní. (Abɛ 3:5, 6) Ke o pee jã a, o ma ha nɛ Yehowa bua maa jɔ, nɛ nihi nɛ a ngɛ asafo ɔ mi ɔ hu maa bu mo. Ngɛ anɔkuale mi ɔ, mo hu o yi mluku kaa adesahi tsuo, nɛ be komɛ ɔ, o ma nyɛ ma tɔ̃. Se ko ha nɛ lɔ ɔ nɛ tsi mo blɔ nɛ o ko pee nɔ́ nɛ o ma nyɛ ngɛ Yehowa sɔmɔmi mi. w21.03 6 ¶14-15

Anɛ o weku li teɔ si kɛ woɔ mo lo? Aloo o ngɛ ma nɛ a tsi Yehowa we bi a ní tsumi ɔ fã ko aloo tsuo nya ngɛ mi ɔ mi lo? Ke jã a, lɛɛ ngmami komɛ kaa 2 Timoteo 1:12-16 kɛ 4:6-11, 17-22 ɔ ma nyɛ maa wo mo he wami. Benɛ Paulo ngma munyu nɛ ɔmɛ ɔ, jamɛ a be ɔ, a wo lɛ tsu. Loko o maa kane ngmami nɛ ɔmɛ ɔ, moo sɔle nɛ o de Yehowa o nyagba a, kɛ bɔ nɛ o ngɛ he nue ha. Mo de lɛ nyagba tutuutu nɛ o kɛ ngɛ kpee. Mo de lɛ nɛ e ye bua mo nɛ o na sisi tomi mlaahi nɛ ngɛ Paulo sane ɔ mi nɛ maa ye bua mo konɛ o na nɔ́ tutuutu nɛ e sa nɛ o pee ngɛ o nyagba a he. Yehowa bɔ Paulo kɔkɔ kaa akɛnɛ e ji Kristofo no he je ɔ, a maa wa lɛ yi mi, nɛ e ma bi nɛ e fĩ si. (Níts. 21:11-13) Kɛ Yehowa ye bua Paulo ha kɛɛ? E ha Paulo sɔlemi ɔmɛ a heto, nɛ e wo lɛ he wami ngɛ be nɛ sa mi. E ha nɛ Paulo ná nɔ mi mami kaa a maa jɔɔ lɛ ngɛ ní nɛ e tsu ɔ he. Yehowa hu gu Paulo huɛmɛ anɔkualetsɛmɛ a nɔ kɛ ye bua lɛ. w21.03 17-18 ¶14-15, 19