September

Ngɛ Yesu be ɔ mi ɔ, níhi nɛ e tsɔɔ ɔ kɛkɛ pɛ pi ha e tue buli ɔmɛ. A suɔ nɛ e pee ní kpahi kɛ piɛɛ he. Benɛ e kua kaa e maa pee nyakpɛ ní nɛ a ngɛ lɛ bie kaa e pee ɔ, a nane tɔ̃tɔ̃. (Mat. 16:4) Mɛni Ngmami ɔ de? Gbalɔ Yesaya de ngɛ Mesia a he ke: “E be ngmlaa kpae, nɛ e be munyu tue boboobo nɛ a nu ngɛ gbɛjegbɛ ɔmɛ a nɔ hulɔ.” (Yes. 42:1, 2) Benɛ Yesu ngɛ fiɛɛmi ní tsumi ɔ tsue ɔ, e gblɛ nihi a juɛmi kɛ ba e nɔ. E mɛ sɔlemi tsu ko, e wui jami hɛ mi nyɛɛli a tadehi, nɛ e ha we nɛ a ngɔ biɛ nguahi kɛ tsɛ lɛ hulɔ. Benɛ a ngɛ Yesu kojoe ɔ, e ngɛ mi kaa e wami ngɛ oslaa mi mohu lɛɛ, se e kua kaa e maa pee nyakpɛ ní kɛ sa Matsɛ Herode hɛ mi. (Luka 23:8-11) Yesu pee nyakpɛ ní komɛ, se sane kpakpa a nɛ e maa fiɛɛ ɔ pee oti ngɛ e si himi mi. E de e kaseli ɔmɛ ke: “Lɔ ɔ he je nɛ i ba ngɛ.”​—Maak. 1:38. w21.05 4 ¶9-10

Wa ngɛ nihi nɛ a “ngɛ su kpakpa nɛ ma ha nɛ a ná neneene wami ɔ” a se blɔ hlae. (Níts. 13:48) Loko nimli nɛ ɔmɛ ma ba pee kaseli ɔ, e sa nɛ waa ye bua mɛ nɛ (1) a nu nɔ́ nɛ a ngɛ kasee ngɛ Baiblo ɔ mi ɔ sisi, (2) a kplɛɛ nɔ, kɛ (3) a kɛ tsu ní ngɛ a si himi mi. (Kol. 2:6, 7; 1 Tɛs. 2:13) Nihi tsuo nɛ a ngɛ asafo ɔ mi ɔ ma nyɛ maa ye bua Baiblo kaseli kɛ gu suɔmi kpo nɛ a ma je kɛ tsɔɔ ni he nɛ ɔmɛ kɛ a he nɛ a ma nya ke a ba asafo mi kpe ɔ nɔ. (Yoh. 13:35) Eko ɔ, e he maa hia nɛ nɔ nɛ e ngɛ ní kasemi ɔ nɔ hyɛe ɔ nɛ e ná be fuu kɛ ha Baiblo kaselɔ ɔ nɛ e ye bua lɛ nɛ e ngmɛɛ ní komɛ nɛ e heɔ yeɔ nɛ a “du si wawɛɛ” ngɛ e mi ɔ a he, loo e ye bua lɛ nɛ e kpa ní peepee komɛ. (2 Kor. 10:4, 5) Eko ɔ, e ma he nyɔhiɔhi fuu loko wa ma nyɛ maa ye bua nɔ ko nɛ́ e pee tsakemi nɛ ɔmɛ ngɛ e si himi mi konɛ e he nɛ su kɛ ha baptisimi. Se tsakemi nɛ ɔmɛ nɛ e maa pee ɔ he hia wawɛɛ. w21.07 3 ¶6

Anɛ wɔ nɛ wa ji Yehowa Odasefohi ɔ ngɛ nɔ mi mami kaa wa tsɔɔ nihi anɔkuale ɔ, nɛ blɔ nɛ wa guɔ nɔ kɛ sɔmɔɔ Yehowa a ji blɔ nɛ sa e hɛ mi lo? Anɛ wa ma nyɛ ma ná jamɛ a nɔ mi mami ɔ lo? Bɔfo Paulo ná nɔ mi mami nɛ mi wa kaa e na anɔkuale ɔ. (1 Tɛs. 1:5) Anɔkuale ɔ nɛ e na a ha nɛ e bua jɔ. Se pi bua jɔmi ɔ nɛ e ná a nɛ ha nɛ e ná nɔ mi mami kaa e na anɔkuale ɔ. Mohu ɔ, e kase Mawu Munyu ɔ saminya. E he ye kaa “Ngmami ɔ tsuo je Mawu mumi mi.” (2 Tim. 3:16) Mɛni nɛ e kase ngɛ Ngmami ɔ mi? Paulo na odase nɛ tsɔɔ heii kaa Yesu ji Mesia a nɛ a wo e he si ɔ ngɛ Ngmami ɔ mi, se Yuda jami hɛ mi nyɛɛli ɔmɛ ma a hɛ kɛ fɔ odase nɛ ɔ nɔ. Jamɛ a osatotsɛmɛ nɛ ɔmɛ tsɔɔ kaa a ngɛ nihi Mawu he anɔkuale ɔ tsɔɔe, se a peeɔ níhi nɛ Mawu sume. (Tito 1:16) A hyɛɛ Ngmami ɔ mi nɛ a hlaa níhi nɛ a suɔ nɛ a he ye kɛ níhi nɛ a sume nɛ a he ye. Se Paulo be kaa jamɛ a nyumu ɔmɛ. E pee klaalo kaa e maa tsɔɔ nihi “Mawu ga womi ɔmɛ tsuo,” nɛ́ lɛ nitsɛ hu e kɛ tsu ní.​—Níts. 20:27. w21.10 18 ¶1-2

Be mi nɛ wa ngɛ due nɛ wa ngɛ nɔ nyu puee ɔ, e sa nɛ wa yɔse kaa Mawu lɛ haa nɛ e waa. (1 Kor. 3:6, 7) Adesahi tsuo a wami he jua wa ha Yehowa. E ha wɔ he blɔ kaa waa piɛɛ e Bi ɔ he kɛ bua nihi tsuo nɛ a ngɛ je ma amɛ tsuo a mi ɔ a nya loko Satan je yaya nɛ ɔ nɛ ba nyagbe. (Hag. 2:7) Wa ma nyɛ maa ngɔ wa fiɛɛmi ní tsumi ɔ kɛ to yi wami hemi ní tsumi ko he. Nɛ wa ngɛ kaa nihi nɛ a tsɔ mɛ kaa a ya he sika tsu tsuali komɛ nɛ zu ku pue a nɔ ɔ a yi wami. E ngɛ mi kaa nihi nɛ a tsɔ ɔ a kpɛti nihi bɔɔ pɛ nɛ a ma nyɛ ma he nɔ ko yi wami mohu lɛɛ, se lɔ ɔ tsɔɔ we kaa ní nɛ ni kpa amɛ tsu ɔ he be se nami. Ja kɛ̃ nɛ e ji ngɛ wa fiɛɛmi ní tsumi ɔ hu blɔ fa mi. Wa li nihi abɔ nɛ wa ma nyɛ ma kpɔ̃ mɛ ngɛ Satan je yaya nɛ ɔ mi. Se Yehowa ma nyɛ maa gu wa kpɛti nɔ fɛɛ nɔ nɔ kɛ ye bua nihi. Andreas nɛ e ngɛ Bolivia a de ke: “Ke nɔ ko ba kase anɔkuale ɔ nɛ a baptisi lɛ ɔ, i le kaa nihi fuu nɛ a ye bua lɛ.” Nyɛ ha nɛ wɔ tsuo waa ya nɔ nɛ wa ná juɛmi nɛ da ngɛ fiɛɛmi ní tsumi ɔ he. Ke wa pee jã a, Yehowa maa jɔɔ wɔ, nɛ wa fiɛɛmi ní tsumi ɔ ma ha nɛ wa ná bua jɔmi nitsɛnitsɛ. w21.05 19 ¶19-20

Oti nɛ detsɛ kɛ maa e hɛ mi ji kaa e maa gbe lohwe ko loo e maa nu lohwe ko. Kaa bɔ nɛ Hiob huɛ yaya amɛ a kpɛti nɔ kake tsɔɔ ɔ, detsɛ ma nyɛ maa ngɔ klama slɔɔtohi kɛ tsu ní. (Hiob 18:8-10) Mɛni blɔ nɔ detsɛ ma nyɛ maa gu kɛ da lohwe ko konɛ e du klama nɛ e tsɔ̃ lɛ ɔ? E hyɛɛ bɔ nɛ lohwe ɔ peeɔ e ní ha. Jije lohwe ɔ hii yae? Mɛni nɛ e bua jɔ he? Nɛ mɛni klama nɛ ma nyɛ maa du lɛ? Satan ngɛ kaa detsɛ. E hyɛɛ bɔ nɛ wa peeɔ wa ní ha, e toɔ hehi nɛ wa yaa kɛ níhi nɛ wa bua jɔ he ɔ a he hɛ, kɛkɛ ɔ, e tsɔ̃ klama kɛ juɛmi ɔ kaa e maa du wɔ be mi nɛ wa hɛ be wa he nɔ. Se Baiblo ɔ ha nɛ wa ná nɔ mi mami kaa ke wa du e klama a po ɔ, wa ma nyɛ maa je mi. Jehanɛ hu ɔ, Baiblo ɔ tsɔɔ wɔ nɔ́ nɛ wa ma nyɛ maa pee konɛ wa ko du e klama amɛ kulaa. Klama enyɔ nɛ Satan kɛ tsuɔ ní wawɛɛ nɛ e yeɔ manye ji he nɔ womi kɛ hɛkɔ. Jeha akpehi abɔ ji nɛ ɔ nɛ Satan kɛ klama nɛ ɔmɛ tsu ní nɛ e ye manye. E ngɛ kaa nɔ ko nɛ e tsɔ̃ɔ lohwe pɛlitsɛmɛ klama. E ngɔɔ ya loo klama kpa komɛ kɛ daa lohwe ɔmɛ. (La 91:3) Se e sɛ nɛ wa ha nɛ Satan klama amɛ nɛ du wɔ. Mɛni he je? Ejakaa Yehowa tsɔɔ wɔ Satan ga tsɔmi ɔmɛ.​—2 Kor. 2:11. w21.06 14 ¶1-2

Wa nyɛmimɛ anɔkualetsɛmɛ nɛ a wa ngɛ jeha mi ɔ ngɛ kaa juetlihi nɛ a he jua wa. Mawu Munyu ɔ ngɔ mua nɛ ngɛ a yi mi ɔ kɛ to jlasi he. (Abɛ 20:29) Se be komɛ ɔ, wa nɛ mɛ kaa juetlihi nɛ a he jua wa. Ke nihewi kɛ yihewi naa nyɛmimɛ nɛ a wa ngɛ jeha mi ɔ kaa a he jua wa a, a ma nyɛ ma ná he se wawɛɛ pe je nɛ ɔ mi ní nɛ a ma ná. Nyɛmimɛ anɔkualetsɛmɛ nɛ a wa ngɛ jeha mi ɔ a he jua wa kɛ ha Yehowa Mawu. E le bɔ nɛ a ngɛ ha tutuutu, e le a su kpakpa amɛ, nɛ e bua jɔ a he. Yehowa bua jɔɔ ke nyɛmimɛ nɛ a wa ngɛ jeha mi ɔ kɛ níhi nɛ a kase ngɛ Yehowa sɔmɔmi mi loo nile nɛ a ngɛ ɔ ye bua nihewi kɛ yihewi. (Hiob 12:12; Abɛ 1:1-4) Jehanɛ hu ɔ, Yehowa bua jɔɔ a si fimi ɔ he. (Mal. 3:16) A kɛ haomihi kpe ngɛ a si himi mi, se kɛ̃ ɔ, a ha we nɛ hemi kɛ yemi nɛ a ngɛ ngɛ Yehowa mi ɔ nɛ mimiɛɛ. Hɛ kɛ nɔ fɔmi nɛ a ngɛ kɛ ha hwɔɔ se ɔ mi wa pe benɛ a ba kase anɔkuale ɔ po. Yehowa suɔ mɛ, ejakaa a yaa nɔ nɛ a fiɛɛɔ e biɛ ɔ ngɛ a “bwɔmi be mi tete po.”​—La 92:12-15. w21.09 2 ¶2-3

Be komɛ ɔ, e he hia nɛ waa kpa wa mi nɛ waa le nɔ́ he je nɛ wa peeɔ ní komɛ. Wa ma nyɛ ma bi wa he ke: ‘Jã i ngɔ ye he kɛ to ni kpahi a he loko i naa kaa i bɔɔ mɔde lo? Anɛ i tsuɔ ní wawɛɛ ngɛ asafo ɔ mi akɛnɛ i ngɛ hlae nɛ ma nu he kaa i bɔɔ mɔde wawɛɛ pe nyɛmimɛ tsuo aloo nyɛmimɛ komɛ ngɛ asafo ɔ mi lo? Aloo nɔ́ pɛ nɛ i ngɛ hlae ji kaa ma ngɔ ye nyɛmi tsuo kɛ tsu ní kɛ sa Yehowa hɛ mi?’ Baiblo ɔ deɔ wɔ kaa wa ko ngɔ wa he kɛ to ni kpahi a he. Mɛni he je? Ke wa susu kaa wa bɔɔ mɔde pe wa nyɛmimɛ ɔ, lɔ ɔ ma nyɛ ma ha nɛ wa wo wa he nɔ. Nɛ ke wa nuɔ he kaa wa nyɛmimɛ bɔɔ mɔde pe wɔ ɔ, wa kɔni mi ma nyɛ ma jɔ̃. (Rom. 12:3) Se nyɛ ha nɛ wa kai kaa tsa pi wa he fɛu, bɔ nɛ wa nya mi tsɔ ha loo bɔ nɛ nihi le wɔ ha a nɔ nɛ Yehowa da kɛ gbla wɔ kɛ ba e ngɔ. Mohu ɔ, e gbla wɔ akɛnɛ wa suɔ lɛ nɛ wa suɔ nɛ waa bu e Bi ɔ tue ɔ he je.​—Yoh. 6:44; 1 Kor. 1:26-31. w21.07 14-15 ¶3-4

Loko wa ma nyɛ ma ma tsake bɔ nɛ wa susuɔ níhi a he ha a, ja wa sɔleɔ, wa kaneɔ Mawu Munyu ɔ, nɛ wa pueɔ wa yi mi tɛ ngɛ he. Yaa nɔ nɛ o pee ní nɛ ɔmɛ, nɛ o bi Yehowa nɛ e wo mo he wami. Yehowa mumi klɔuklɔu ɔ maa ye bua mo nɛ o kɛ o he be ni kpahi a he toe. Jehanɛ ɔ, ke o hɛ kɔ̃ɔ aloo o woɔ o he nɔ ɔ, Yehowa maa ye bua mo nɛ o na. E maa ye bua mo nɛ o pee tsakemi mlamlaamla. (2 Kron. 6:29, 30) Yehowa le wa tsui mi susumihi. Jehanɛ hu ɔ, e le bɔ nɛ wa ngɛ mɔde bɔe ha konɛ je ɔ mumi ɔ kɛ wɔ nitsɛmɛ wa gbɔjɔmihi nɛ ko ná wa nɔ he wami. Ke Yehowa na bɔ nɛ wa ngɛ mɔde bɔe kaa wa maa da nyagba nɛ ɔmɛ a nya ha a, e haa nɛ suɔmi nɛ e ngɛ kɛ ha wɔ ɔ mi waa. Yehowa ngɔ suɔmi nɛ ngɛ binyɛ kɛ e bi a kpɛti ɔ kɛ to bɔ nɛ e nuɔ he ha wɔ ha a he. (Yes. 49:15) Wa bua jɔ kaa Yehowa suɔ wa ti nɔ fɛɛ nɔ ngɛ mɔde nɛ wa ngɛ bɔe kaa wa ma sɔmɔ lɛ ɔ he! w21.07 24-25 ¶17-19

Wɔ hu wa ma nyɛ ma ná bua jɔmi wawɛɛ ke wa bua jɔ nɔ́ nɛ wa ngɛ tsue ngɛ Yehowa sɔmɔmi mi ɔ he. Moo ngɔ o “be tsuo” kɛ tsu fiɛɛmi ní tsumi ɔ nɛ o ngɔ o he kɛ wo asafo ɔ ní tsumihi a mi. (Níts. 18:5; Heb. 10:24, 25) Dla o he saminya loko o ya asafo mi kpehi konɛ o nyɛ nɛ o ha hetohi nɛ woɔ nɔ he wami. Moo na ní tsumi nɛ a kɛ maa wo o dɛ ngɛ otsi kpɛti kpe ɔ mi ɔ kaa e he hia saminya. Ke a ngɔ ní tsumi ko kɛ wo o dɛ ngɛ asafo ɔ mi ɔ, tsu ngɛ be nya nɛ a na kaa a ma nyɛ maa ngɔ hɛ kɛ fɔ o nɔ. Ke a ngɔ ní tsumi ko kɛ wo o dɛ ɔ, koo bu lɛ kaa e he hia we, lɔ ɔ he ɔ, o be be puɛe ngɛ he. Bɔɔ mɔde kaa o ma tsu lɛ saminya. (Abɛ 22:29) Ke o tsu ní wawɛɛ kɛ ha Yehowa a, lɔ ɔ ma ha nɛ o ma ba pee e huɛ nɛ o bua maa jɔ wawɛɛ. (Gal. 6:4) Ke ni kpahi a nine su he blɔ ko nɛ o ngɛ blɔ hyɛe kaa o ma ná nɔ po ɔ, e be yee ha mo kaa o kɛ mɛ ma nya.​—Gal. 5:26. w21.08 22 ¶11

E sɛ nɛ wa wo wa he nɔ, mohu ɔ, e sa nɛ wa ha nɛ Yehowa nɛ tsɔɔ wɔ ní. Kaa bɔ nɛ hiɔ ma nyɛ ma ha nɛ wa tsui ɔ be ní tsue saminya a, jã kɛ̃ nɛ he nɔ womi hu be hae nɛ waa kɛ Yehowa blɔ tsɔɔmi nɛ tsu ní. Farisi bi ɔmɛ wo a he nɔ, nɛ lɔ ɔ ha nɛ a kua odase nɛ ngɛ heii nɛ tsɔɔ kaa Mawu mumi ɔ ngɛ Yesu nɔ, nɛ lɛ ji Mawu Bi ɔ. (Yoh. 12:37-40) A he nɔ womi ɔ hí kulaa, ejakaa lɔ ɔ ha nɛ neneene wami ɔ bɔ mɛ. (Mat. 23:13, 33) E he hia wawɛɛ kaa wa ma ha nɛ Mawu Munyu ɔ kɛ e mumi ɔ nɛ kudɔ wɔ nɛ e kudɔ wa susumi kɛ wa yi mi kpɔ mwɔmi tsuo. Akɛnɛ Yakobo baa e he si he je ɔ, e ngmɛ blɔ nɛ Yehowa tsɔse lɛ. Nɛ e he si bami ɔ ha nɛ e ba pee tsɔɔlɔ nɛ e he be. w22.01 10 ¶7

Ke wa “hɛɛ sɔlemi mi” ɔ, wa ma nyɛ ma ná nɔ mi mami kaa wa hiɔwe Tsɛ ɔ maa bu wɔ tue. (Kol. 4:2) Eko ɔ, e maa pee wɔ kaa heto ɔ se ngɛ kɛe, se Yehowa wo si kaa e ma ha wa sɔlemihi a heto “ngɛ be nɛ sa mi.” (Heb. 4:16) Enɛ ɔ he ɔ, e sɛ nɛ wa pia Yehowa kɔkɔɔkɔ ke e ha we wa sɔlemihi a heto mla kaa bɔ nɛ wa ngɛ hlae ɔ. Kaa nɔ hyɛmi nɔ́ ɔ, nihi fuu sɔle jeha babauu kaa Mawu Matsɛ Yemi ɔ nɛ ngɔ níhi a blɔ nya tomi nɛ ɔ kɛ ba nyagbe. Yesu po de kaa waa sɔle ngɛ enɛ ɔ he. (Mat. 6:10) Se nile be mi kaa nɔ ko ma ha nɛ hemi kɛ yemi nɛ e ngɛ ngɛ Mawu mi ɔ mi ma gbɔjɔ akɛnɛ Mawu ngɔɛ níhi a blɔ nya tomi nɛ ɔ kɛ bɛ nyagbe ngɛ be nɛ adesahi ngɛ blɔ hyɛe ɔ mi. (Hab. 2:3; Mat. 24:44) Enɛ ɔ he ɔ, nile ngɛ mi kaa wa maa to wa tsui si kɛ hyɛ Yehowa blɔ, nɛ waa sɔle ha lɛ nɛ wa ná hemi kɛ yemi kaa e ma ha wa sɔlemi ɔ heto. Nyagbe ɔ maa ba ngɛ be nɛ Yehowa to ɔ mi pɛpɛɛpɛ, ejakaa Yehowa sɛ hlami hla “ligbi ɔ kɛ ngmlɛfia a” kɛ to momo. Jamɛ a be ɔ maa pee be nɛ sa wawɛɛ kɛ ha nɔ fɛɛ nɔ.​—Mat. 24:36; 2 Pet. 3:15. w21.08 10 ¶10-11

Nyɛmimɛ nɛ a wa ngɛ jeha mi nɛ a baa a he si ɔ le kaa a be nyɛe maa pee babauu kaa sa a. Kaa nɔ hyɛmi nɔ́ ɔ, mo susu wa kpɔ mi nɔ hyɛli ɔmɛ a he nɛ o hyɛ. Ke a ye jeha 70 ɔ, a tsakeɔ a ní tsumi ha mɛ. Tsakemi nɛ ɔ he ma nyɛ maa wa ha mɛ. A bua jɔ he blɔ nɛ a ngɛ kaa a ma sɔmɔ a nyɛmimɛ ɔ he wawɛɛ. Se a le kaa e he hia nɛ nihewi kɛ yihewi nɛ a tsu jamɛ a ní tsumi ɔ. Enɛ ɔ he ɔ, a peeɔ a ní kaa Levi bi nɛ a hi si ngɛ blema Israel ɔ. Ke Levi bi nɛ ɔmɛ ye jeha 50 ɔ, a sɔmɔ we ngɛ kpe he bo tsu ɔ mi hu. Pi he blɔ nɛ Levi bi nɛ a wa ngɛ jeha mi ɔ ngɛ ɔ nɛ haa mɛ bua jɔmi wawɛɛ. A bua jɔ ní tsumi fɛɛ ní tsumi nɛ a kɛ ha mɛ kaa a tsu ɔ he. A kɛ kã tsuɔ ní tsumi fɛɛ ní tsumi nɛ a kɛ wo a dɛ ɔ, nɛ a yeɔ bua nihewi kɛ yihewi hulɔ. (4 Mose 8:25, 26) Mwɔnɛ ɔ, ke kpɔ mi nɔ hyɛli ye jeha 70 ɔ, a sɔmɔ we kaa kpɔ mi nɔ hyɛli hu, se a peeɔ nɔ́ fɛɛ nɔ́ nɛ a ma nyɛ kɛ yeɔ bua ngɛ a we asafo ɔ mi, nɛ a woɔ nyɛmimɛ ɔmɛ he wami. w21.09 8-9 ¶3-4

Ngɛ Luka 15:11-32 ɔ, Yesu kɛ nɔ́ he tomi nɔ́ ko nɛ woɔ nɔ he wami nɛ kɔɔ bi ko bɔlɔ ko he ɔ tsu ní. Niheyo ko te si kɛ wo e tsɛ, nɛ e hia blɔ kɛ ho “ma ko nɔ ya ngɛ tsitsaa lokoo.” Lejɛ ɔ nɛ e ya ba e je mi basabasa ngɛ. Benɛ níhi a mi ba wa ha lɛ ɔ, e susu e yi mi saminya. E kai bɔ nɛ níhi a mi hi ha lɛ benɛ e ngɛ e papaa we ɔ mi ɔ. Yesu de ke, niheyo ɔ “hɛ mi ba tsɔ lɛ.” Lɔ ɔ se ɔ, e ma e juɛmi nya si kaa e maa kpale kɛ ho we mi ya, nɛ e ya bi e tsɛ ɔ nɛ e ngɔ e tɔmi kɛ ke lɛ. E hi kaa niheyo ɔ ba yɔse kaa e mwɔ yi mi kpɔhi nɛ a dɛ. E he hia nɛ e pee nɔ́ ko ngɛ e si fɔfɔɛ ɔ he! E je e tsui mi nɛ e pia e he. Pi kaa nɔ́ he tomi nɔ́ nɛ ɔ haa nɛ nɔ tsui nɔɔ e mi kɛkɛ. Sisi tomi mlaahi nɛ ngɛ mi ɔ ma nyɛ maa ye bua asafo mi nikɔtɔmahi nɛ a hyɛ kaa Kristofo no ko nɛ e pee yayami nɛ hɛdɔ ngɛ he ɔ tsake e tsui aloo e tsakee we e tsui. w21.10 5 ¶14-15

Mɛni nɛ e be mimiɛɛe loo e maa hi si daa ke a mimiɛɛ je ma amɛ? Bɔfo Paulo ngma ke: “Akɛnɛ wa na kaa wa nine maa su Matsɛ Yemi nɛ a be nyɛe ma mimiɛɛ lɛ ɔ nɔ he je ɔ, nyɛ ha nɛ waa ya nɔ nɛ . . . waa kɛ Mawu gbeye yemi kɛ bumi nɛ mi kuɔ ma sɔmɔ Mawu ngɛ blɔ nɛ ngɛ klɔuu nɔ ɔ nɛ.” (Heb. 12:28) Ke a mimiɛɛ je ma amɛ ta a, Mawu Matsɛ Yemi ɔ pɛ nɛ e maa piɛ. (La 110:5, 6; Dan. 2:44) Be be kulaa! E sa nɛ nihi nɛ a mwɔ yi mi kpɔ. Ke a ya nɔ nɛ a fĩ je nɛ ɔ se ɔ, a hɛ mi ma kpata, se ke a hla kaa a ma sɔmɔ Yehowa nɛ a pee tsakemihi nɛ he hia ngɛ a si himi mi ɔ, a ma ná neneene wami. (Heb. 12:25) Wa ma nyɛ maa ye bua nihi nɛ a mwɔ yi mi kpɔ nɛ da kɛ gu wa fiɛɛmi ní tsumi ɔ nɔ. Nyɛ ha nɛ wa Nyɔmtsɛ Yesu munyu nɛ ɔ nɛ hi wa juɛmi mi be fɛɛ be. E de ke: “Sane kpakpa nɛ ɔ nɛ kɔɔ Matsɛ Yemi ɔ he ɔ, a maa fiɛɛ ngɛ zugba a nɔ hehi tsuo nɛ nimli ngɛ ɔ nɛ a kɛ maa ye je ma amɛ tsuo odase, nɛ lɔ ɔ se loko nyagbe ɔ maa ba.”​—Mat. 24:14. w21.09 19 ¶18-20

Asafo mi nikɔtɔmahi, blɔ nya ní tsumi nɛ he hia nɛ a kɛ wo nyɛ dɛ ji kaa nyɛ maa wo nihi nɛ a weku li kpa Yehowa sɔmɔmi ɔ a bua. (1 Tɛs. 5:14) Nyɛɛ bɔ mɔde nɛ nyɛɛ wo mɛ he wami loko a je asafo mi kpe sisi kɛ jehanɛ hu ke a kpa asafo mi kpe. Nyɛ ya slaa mɛ ngɛ a wehi a mi nɛ nyɛɛ kɛ mɛ nɛ sɔle. Nyɛɛ fɔ mɛ nine nɛ nyɛɛ kɛ mɛ nɛ ya fiɛɛmi loo a ba piɛɛ nyɛ weku ɔ he kɛ pee weku Mawu jami. E sa nɛ asafo mi nikɔtɔmahi nɛ a hyɛ nyɛmimɛ nɛ a hao ɔ a nɔ, nɛ a je mi mi sami kɛ suɔmi kpo kɛ tsɔɔ mɛ. (1 Tɛs. 2:7, 8) Yehowa “sume nɛ a kpata nɔ ko nɔ ko hɛ mi, mohu ɔ, e suɔ kaa nihi tsuo nɛ a tsake a tsui.” (2 Pet. 3:9) Nɔ ko ma nyɛ maa pee yayami nɛ hɛdɔ ngɛ he, se kɛ̃ ɔ, e wami he jua wa ha Mawu. Mo kai kaa Yehowa ngɔ nɔ́ ko nɛ he jua wa nɛ ji e Bi nɛ e suɔ lɛ ɔ wami kɛ he wa ti nɔ fɛɛ nɔ. Yehowa bɔɔ mɔde kaa e maa je suɔmi mi kɛ ye bua nihi nɛ a kpa lɛ sɔmɔmi ɔ konɛ a kpale kɛ ba e ngɔ ekohu. Kaa bɔ nɛ Yesu tsɔɔ ngɛ e nɔ́ he tomi nɔ́ nɛ kɔɔ bi nɛ laa a he ɔ mi ɔ, Yehowa hyɛɛ blɔ kaa nihi nɛ a kpa lɛ sɔmɔmi ɔ maa hla kaa a ma sɔmɔ lɛ ekohu.​—Luka 15:11-32. w21.09 30-31 ¶17-19

Eko ɔ, o nyɛ we nɛ o fiɛɛɔ nɛ o tsɔɔ nihi ní kaa bɔ nɛ o pee be ko nɛ be ɔ akɛnɛ o be nɔmlɔ tso mi he wami kpakpa he je. Se kɛ̃ ɔ, o bua ma nyɛ maa jɔ ngɛ nɔ́ nɛ o nyɛɔ peeɔ he. Mo susu Matsɛ David nɔ hyɛmi nɔ́ ɔ he nɛ o hyɛ. E kɛ e we bi ɔmɛ ya kpɔ̃ a weku ɔ kɛ a weto níhi ngɛ Amalek bi ɔmɛ a dɛ. David we bi ɔmɛ a kpɛti nihi lafa enyɔ nyɛ we nɛ a piɛɛ a he kɛ ya ta a, mohu ɔ, a hi si nɛ a bu níhi nɛ piɛ ngɛ se ɔ he. Se benɛ a ye kunimi ɔ, David fã kaa a kɛ nihi nɛ a yɛ ta a eko ɔ nɛ gba ta yi bu ní ɔmɛ pɛpɛɛpɛ. (1 Sam. 30:21-25) Sane nɛ ɔ tsɔɔ wɔ nɔ́ ko ngɛ kaselɔ peemi ní tsumi ɔ he. Eko ɔ, o be nyɛe maa pee babauu ngɛ fiɛɛmi ní tsumi ɔ mi kaa bɔ nɛ o ngɛ hlae ɔ. Se ke o pee nɔ́ nɛ o ma nyɛ ɔ, be fɛɛ be nɛ nɔ ko ma ba le Yehowa nɛ e ma ha nɛ a baptisi lɛ ɔ, o ma ná bua jɔmi wawɛɛ. Yehowa naa bɔ nɛ wa tsuɔ fiɛɛmi ní tsumi ɔ kɛ bɔ nɛ wa suɔ lɛ ha a, nɛ e jɔɔ wɔ ngɛ he. Jehanɛ hu ɔ, e tsɔɔ wɔ nɔ́ nɛ wa ma nyɛ maa pee konɛ wa bua nɛ jɔ nɔ́ nɛ wa nyɛɔ peeɔ ngɛ fiɛɛmi ní tsumi ɔ mi ɔ he. (Yoh. 14:12) Ke wa kɔni mi jɔ̃ we ɔ, wa ma nyɛ ma ná nɔ mi mami kaa Mawu bua maa jɔ wa he! w21.10 28 ¶15-17

Ke wa ngɛ wae ɔ, wa ma nyɛ maa ye gbeye kaa Yehowa kɛ wɔ be nyɛe ma tsu ní kaa bɔ nɛ e kɛ wɔ tsu ní benɛ wa ji nihewi kɛ yihewi ɔ. E ma nyɛ maa ba kaa wa he wami maa ba si, se wa ma nyɛ maa ngɔ nile kɛ níhi a si kpami nɛ wa ngɛ ɔ kɛ ye bua nihewi kɛ yihewi nɛ a su otihi nɛ a kɛ ma a hɛ mi ɔ a he, konɛ a nine nɛ su sɔmɔmi he blɔ kpahi a nɔ. Ke nihi nɛ a wa ngɛ jeha mi ɔ suɔ nɛ a ye bua nihewi kɛ yihewi ɔ, jã a ba a he si. Nɔ nɛ baa e he si ɔ naa ni kpahi kaa a nɔ kuɔ pe lɛ. (Filip. 2:3, 4) Nyɛmimɛ nɛ a wa ngɛ jeha mi nɛ a baa a he si ɔ yɔseɔ kaa blɔ slɔɔtohi ngɛ nɛ a ma nyɛ maa gu nɔ kɛ tsu níhi a he ní nɛ e kɛ Baiblo ɔ kpa gbi, nɛ́ maa ye manye hulɔ. Enɛ ɔ he ɔ, a hyɛ we blɔ kaa nɔ fɛɛ nɔ nɛ tsu níhi a he ní kaa bɔ nɛ a pee be ko nɛ be ɔ. (Fiɛlɔ 7:10) A ma nyɛ maa ye bua nihewi kɛ yihewi ke a de mɛ a níhi a si kpamihi, se a le hu kaa “níhi nɛ yaa nɔ ngɛ je nɛ ɔ mi ɔ ngɛ tsakee,” nɛ eko ɔ, e he maa hia nɛ a pee tsakemi komɛ ngɛ si fɔfɔɛ komɛ a mi.​—1 Kor. 7:31. w21.09 8 ¶1, 3

Yehowa be e sɔmɔli dee ke a pee nɔ́ ko nɛ he tsɔ we kɔkɔɔkɔ ejakaa e ngɛ klɔuklɔu. Wa naa enɛ ɔ ngɛ nɔ́ nɛ a ngma ngɛ yi fimi nɔ́ nɛ a kɛ sika tsu pee nɛ osɔfɔ nɔkɔtɔma pe kulaa a kɛ fiɔ e yi ɔ nɔ. A ngma ngɛ yi fimi nɔ́ nɛ ɔ nɔ ke, Klɔuklɔu ji Yehowa. (2 Mose 28:36-38) Nɔ fɛɛ nɔ nɛ maa na nɔ́ nɛ a ngma ngɛ yi fimi nɔ́ ɔ nɔ ɔ maa na kaa Yehowa ngɛ kluɔkluɔ niinɛ. Nɛ ke e ba kaa Israel nɔ ko nɛ́ nɔ́ nɛ a ngma ngɛ yi fimi nɔ́ ɔ nɔ akɛnɛ e nyɛ we nɛ e su osɔfɔ nɔkɔtɔma pe kulaa a he hu nɛɛ? Anɛ e maa le kaa Yehowa ngɛ klɔuklɔu lo? Ee! A kane Mlaa a kɛ tsɔɔ Israel bi ɔmɛ tsuo, nɛ nyumuhi, yihi kɛ jokuɛwi tsuo nu. (5 Mose 31:9-12) Kaa o ngɛ lejɛ ɔ jinɛ o ko nu munyu nɛ nyɛɛ se nɛ ɔ: ‘Imi ji Yehowa, nyɛ Mawu ɔ nɛ. Nyɛɛ pee nyɛ he klɔuklɔu; ejakaa Nɔ klɔuklɔu ji mi.’ ‘Nyɛɛ pee nyɛ he klɔuklɔu, ejakaa imi Yehowa, i ngɛ klɔuklɔu.’​—3 Mose 11:44, 45; 20:7, 26. w21.12 3 ¶6-7

Ni komɛ ma nyɛ maa pee yeyeeye ngɛ a he lo nya hiami níhi a he. Eko ɔ, ngɛ ma nɛ a ngɛ mi ɔ, nihi fuu yeɔ ohia nɛ e he wa kaa a ma ná ní tsumi ma tsu ngɛ lejɛ ɔ. Eko ɔ, e he waa ha mɛ kaa a ma ná sika bɔ nɛ sa konɛ a kɛ hyɛ a weku ɔmɛ a nɔ. Aloo eko ɔ, nɔ nɛ tsuɔ ní nɛ e naa sika kɛ hyɛɔ weku ɔ nɔ ɔ gbo, enɛ ɔ he ɔ weku ɔ nɛ sika kɛ hyɛ a he. E sɛ nɛ waa pee yeyeeye ngɛ nyagbahi nɛ waa kɛ kpeɔ ɔ a he. Mohu ɔ, e sa nɛ waa ngɔ wa hɛ kɛ fɔ Yehowa nɔ. Mo kai kaa Yehowa wo wɔ si kaa ke wa ngɔ e jami kɛ ye kekleekle blɔ he ngɛ wa si himi mi ɔ, e ma ha wɔ níhi tsuo nɛ wa hia a. (Mat. 6:32, 33) E yeɔ e si womi nɛ ɔ nɔ be fɛɛ be. (5 Mose 8:4, 15, 16; La 37:25) Ke Yehowa hyɛɔ lohwe pɛlitsɛmɛ kɛ mɔmɔhi a nɔ ɔ, lɛɛ e sɛ kaa wa peeɔ yeyeeye kɔkɔɔkɔ ngɛ nɔ́ nɛ wa maa ye kɛ nɔ́ nɛ wa maa wo ɔ he! (Mat. 6:26-30; Filip. 4:6, 7) Kaa bɔ nɛ fɔli haa a bimɛ a hiami ní akɛnɛ a suɔ mɛ he je ɔ, jã kɛ nɛ wa hiɔwe Tsɛ ɔ hu tsuɔ e sɔmɔli a hiami níhi a he ní kɛ haa mɛ akɛnɛ e suɔ mɛ ɔ he je. w21.12 17 ¶4-5; 18 ¶8

Anɛ nɔ ko pee mo nɔdɔ nɔ́ hyɛ, titli ɔ, nɔ ko nɛ o kɛ lɛ ngɛ asafo ɔ mi ɔ lo? Kadi Yosef nɔ hyɛmi nɔ́ ɔ, e nyɛmimɛ ɔmɛ tɔ̃ e nɔ, se e ngɔ e juɛmi kɛ ma Yehowa sɔmɔmi nɔ, nɛ Yehowa jɔɔ lɛ wawɛɛ ngɛ e tsui si nɛ e to kɛ fĩ si ɔ he. Benɛ be pue mi ɔ, Yosef je e juɛmi ngɛ tɔmi nɛ e nyɛmimɛ ɔmɛ tɔ̃ e nɔ ɔ nɔ, nɛ e ngɔ e juɛmi kɛ ma jɔɔmihi nɛ Yehowa jɔɔ lɛ ɔ nɔ. (1 Mose 45:5) Kaa bɔ nɛ Yosef pee ɔ, ke wa hɛ kɛ su Yehowa he, nɛ wa ngɔ wa hɛ kɛ fɔ e nɔ kaa e ye dami sane ha wɔ ngɛ be nɛ sa mi ɔ, wa tsui maa nɔ wa mi. (La 7:17; 73:28) Ke nɔ ko yi mo dami sane ɔ, e ma nyɛ maa dɔ mo wawɛɛ, se mo kai kaa Yehowa hɛɛ kɛ suɔ “nihi nɛ a kɔni mi jɔ̃” ɔ a he. (La 34:18) Yehowa suɔ mo akɛnɛ o toɔ o tsui si nɛ o ngɔɔ o haomi ɔmɛ kɛ fɔɔ e nɔ ɔ he je. (La 55:22) Lɛ ji je ɔ tsuo Kojolɔ. Nɔ́ ko nɔ́ ko bi e hɛ mi. (1 Petro 3:12) Ke o kɛ nyagbahi nɛ o be nyɛe ma tsu a he ní ngɛ kpee ɔ, mo kai kaa e he hia nɛ o to o tsui si kɛ hyɛ Yehowa blɔ kaa e ma tsu he ní ngɛ be nɛ sa mi. w21.08 11 ¶14; 12 ¶16

Nile ngɛ mi kaa waa kɛ wa be maa pee níhi nɛ ma ha Yehowa bua jɔmi. E sa nɛ waa pee níhi nɛ a he hia wawɛɛ ɔ. Bɔ nɛ pee nɛ waa kɛ wa be nɛ tsu ní saminya a, be komɛ ɔ, e ma bi nɛ waa hla níhi enyɔ nɛ tɔmi be a he ɔ a kpɛti kake. Wa na enɛ ɔ ngɛ nɔ́ nɛ ya nɔ benɛ Yesu ya slaa Maria kɛ Marta a mi. Marta bua jɔ kaa Yesu ba slaa mɛ, nɛ e pee niye ní fuu kɛ ha lɛ. Se e nyɛmiyo Maria lɛɛ, e ngɔ jamɛ a he blɔ ɔ kɛ hɛ kɛ su e Nyɔmtsɛ ɔ he nɛ e bu e tsɔɔmi ɔmɛ tue. Tɔmi be nɔ́ nɛ Marta pee ɔ he, se Yesu de ke: Maria “hla nɔ́ nɛ hi pe kulaa a.” (Luka 10:38-42, sisi ningma.) Eko ɔ, be komɛ a se ɔ, Maria hɛ je niye ní nɛ e ye jamɛ a ligbi ɔ nɔ, se wa ma nyɛ ma ná nɔ mi mami kaa e hɛ ji nɔ́ nɛ e kase ngɛ Yesu ngɔ ɔ nɔ. Kaa bɔ nɛ Maria bua jɔ be bɔɔ nɛ e ná kɛ ha Yesu ɔ he ɔ, wɔ hu wa bua jɔɔ be nɛ wa náa kɛ tsuɔ Yehowa sɔmɔmi mi níhi a he ní ɔ he. w22.01 27 ¶5-6

E ngɛ mi kaa Ahab ba e he si ngɛ Yehowa hɛ mi mohu lɛɛ, se bɔ nɛ e pee e ní ha pee se ɔ tsɔɔ we kaa e tsake e tsui niinɛ. E bɔɛ mɔde kaa e ma ha nɛ a kpa Baal jami ngɛ e nɔ yemi ɔ mi. Nɛ e bɔɛ mɔde kaa e maa wo nihi he wami nɛ a sɔmɔ Yehowa hulɔ. Benɛ Ahab gbo ɔ, Yehowa tsɔɔ bɔ nɛ e naa lɛ ha. Mawu gbalɔ Yehu de ke ‘yiwutsotsɛ’ ji lɛ. (2 Kron. 19:1, 2) Mo susu he nɛ o hyɛ: Ke Ahab tsake e tsui niinɛ ɔ, jinɛ gbalɔ ɔ ko de ke e ji yiwutsotsɛ nɛ e sume Yehowa lo? Ngɛ anɔkuale mi ɔ, Ahab pee nɔ́ ko nɛ tsɔɔ kaa e pia e he, se e tsakee we e tsui tsuo. Mɛni wa ma nyɛ maa kase ngɛ Ahab sane ɔ mi? Benɛ Eliya de lɛ tue gblami nɛ maa ba e weku ɔ nɔ ɔ, sisije ɔ, e ba e he si. Nɔ́ nɛ e pee ɔ hi. Se nɔ́ nɛ e pee sekpɛ kulaa a tsɔɔ kaa e tsakee we e tsui. Tsui tsakemi biɔ nɛ waa pee babauu pe nɛ wa maa ye aywilɛho ngɛ nɔ́ nɛ wa pee ɔ he be kpiti ko. w21.10 3 ¶4-5, 7-8

Yesaya ji gbalɔ, nɛ eko ɔ, e yo ɔ hu ji gbalɔyo, ejakaa Baiblo ɔ tsɛ lɛ ke “gbalɔ yo ɔ.” (Yes. 8:1-4) Yesaya kɛ e yo ɔ ngɔ a juɛmi kɛ ma Yehowa sɔmɔmi nɔ. Mwɔnɛ ɔ, nihi nɛ a sɛ gba si himi mi ɔ hu ma nyɛ maa ngɔ Yehowa sɔmɔmi kɛ pee oti ngɛ a si himi mi kɛ gu a nyɛmi tsuo nɛ a kɛ ma sɔmɔ Yehowa a nɔ. A ma nyɛ maa wo hɛ kɛ nɔ fɔmi nɛ a ngɛ ngɛ Yehowa mi ɔ mi he wami ke a bla kɛ kase Baiblo gbamihi, nɛ a na bɔ nɛ gbami nɛ ɔmɛ baa mi be fɛɛ be ha a. (Tito 1:2) A ma nyɛ ma susu nɔ́ nɛ a ma nyɛ maa pee kɛ ye bua konɛ Baiblo gbami komɛ nɛ a ba mi ɔ he. Kaa nɔ hyɛmi nɔ́ ɔ, a ma nyɛ ma susu bɔ nɛ a maa ye bua ha kɛ ha nɛ Yesu gbami nɛ kɔɔ sane kpakpa a nɛ a maa fiɛɛ kɛ kpa je ɔ mi tsuo loko nyagbe ɔ nɛ ba a he. Ke nihi nɛ a sɛ gba si himi mi ɔ ná nɔ mi mami kaa Baiblo gbami komɛ ngɛ mi bae ɔ, lɔ ɔ maa wo mɛ he wami konɛ a pee babauu ngɛ Yehowa sɔmɔmi mi. w21.11 16 ¶9-10

Yesu ngɛ e yayo nɛ eko ɔ, e ji yalɔyo ɔ he susue. Akɛnɛ Yesu suɔ Maria nɛ e susuɔ e he he je ɔ, e de Yohane kaa e hyɛ Maria nɔ, ejakaa e le kaa Yohane ma ha Maria e mumi mi hiami níhi. Kɛ je jamɛ a ligbi ɔ kɛ yaa a, Yohane ba pee kaa bi kɛ ha Maria, nɛ e hyɛ e nɔ kaa bɔ nɛ e maa hyɛ lɛ nitsɛ e yayo nɔ. Yesu je suɔmi kpo kɛ tsɔɔ yo nɛ fɔ lɛ ɔ, kɛ yo nɛ daa si ngɛ e kasa nya benɛ e yaa gbo ɔ! Mɛni wa ma nyɛ maa kase ngɛ Yesu munyu ɔmɛ a mi? Huɛ bɔmi nɛ ngɛ waa kɛ wa nyɛmimɛ nɛ a ngɛ asafo ɔ mi ɔ wa kpɛti ɔ mi ma nyɛ maa wa pe huɛ bɔmi nɛ ngɛ waa kɛ wa weku li wa kpɛti ɔ. Wa weku li ma nyɛ maa te si kɛ wo wɔ loo a ma kua wɔ, se kaa bɔ nɛ Yesu wo si ɔ, ke wa ya nɔ nɛ waa kɛ Yehowa kɛ e we asafo ɔ bɔ ɔ, wa nine maa su nɔ́ nɛ laa wɔ ɔ nɔ “kɛ bɔ he si 100.” Wa ma ná binyumuhi, biyihi, nyɛmɛ kɛ tsɛmɛ babauu. (Maak. 10:29, 30) Amlɔ nɛ ɔ nɛ o piɛɛ weku ko nɛ a hɛɛ hemi kɛ yemi kake nɛ a suɔ a sibi ɔ a he ɔ, kɛ lɔ ɔ haa nɛ o nuɔ he ha kɛɛ?​—Kol. 3:14; 1 Pet. 2:17. w21.04 9-11 ¶7-8

Ke wa jeɔ suɔmi nɛ se pui kpo ɔ, wa peeɔ nɔ́ fɛɛ nɔ́ nɛ wa ma nyɛ kɛ yeɔ bua ni kpahi. Mwɔnɛ ɔ, wa nyɛmimɛ fuu hla kaa a ma je suɔmi nɛ se pui kpo kɛ tsɔɔ a nyɛmimɛ, nɛ́ nihi nɛ a li mɛ ɔ po piɛɛ he. Kaa nɔ hyɛmi nɔ́ ɔ, ke a nu kaa adebɔ oslaa ko ba a, a suɔ nɛ a kɛ oya yemi nɛ le nɔ́ nɛ a ma nyɛ maa pee kɛ ye bua. Ke nyɛmi ko ngɛ asafo ɔ mi ɔ kɛ sika he nyagba ngɛ kpee ɔ, a suɔ nɛ a le níhi nɛ e hia konɛ a ye bua lɛ. Kaa bɔ nɛ Kristofohi nɛ a hi Makedonia a pee ɔ, nyɛmimɛ ɔmɛ bɔɔ mɔde kaa a maa pee níhi nɛ nihi hyɛ we blɔ po. A kɛ níhi sãa afɔle, nɛ a haa “pe bɔ nɛ a ngɛ ɔ po” konɛ a nyɛ nɛ a ye bua a nyɛmimɛ nɛ a hia yemi kɛ buami ɔ. (2 Kor. 8:3) Asafo mi nikɔtɔmahi toɔ nyɛmimɛ nɛ a bɔɔ mɔde kaa a maa ye bua ni kpahi ɔ a he hɛ, nɛ a jeɔ a yi. Nyɛmimɛ nɛ ɔmɛ a yi nɛ a jeɔ ɔ woɔ mɛ he wami nɛ a yaa nɔ nɛ a yeɔ bua nihi.​—Yes. 32:1, 2. w21.11 11 ¶14; 12 ¶21

Wɔ tsuo wa hia ga womi be komɛ. Ngɛ si fɔfɔɛ komɛ a mi ɔ, wa ma nyɛ ma bi nɔ ko nɛ wa buɔ lɛ wawɛɛ ɔ kaa e wo wɔ ga ngɛ nɔ́ ko he. Be komɛ ɔ, nyɛminyumu ko nɛ e susuɔ wa he wawɛɛ ɔ ma nyɛ maa hɛ kɛ su wa he konɛ e ha nɛ waa le kaa wa ngɛ ‘nane yaya ko hiae’ loo wa ngɛ nɔ́ ko pee nɛ ma ha nɛ wa ma pia wa he pee se. (Gal. 6:1) Ke wa pee yayami nɛ hɛdɔ ngɛ he ɔ, eko ɔ, a maa wo wɔ ga konɛ a kɛ dla wɔ. Ke a wo wɔ ga a, e sa nɛ waa bu tue nɛ wa ko hyɛ blɔ nɔ nɛ a gu kɛ wo wɔ ga a. Ke wa pee jã a, e maa hi ha wɔ, nɛ wa maa baa wa wami yi! (Abɛ 6:23) Wa mwɔnɛ ɔ ngmami ɔ woɔ wɔ he wami kaa waa ‘bu munyuhi nɛ ní leli tuɔ ɔ tue.’ Adesa ko be nɛ e le nɔ́ fɛɛ nɔ́. Be fɛɛ be ɔ, nɔ ko ngɛ nɛ e ngɛ nile loo níhi a si kpami pe wɔ. (Abɛ 12:15) Enɛ ɔ he ɔ, ke wa buɔ ga womi tue ɔ, lɔ ɔ tsɔɔ kaa wa baa wa he si. E tsɔɔ hu kaa wa le níhi nɛ wa ngɛ he blɔ kaa wa peeɔ kɛ níhi nɛ wa be he blɔ kaa wa peeɔ. Jehanɛ hu ɔ, wa yɔseɔ kaa wa maa hia yemi kɛ buami loko wa ma nyɛ maa su otihi nɛ waa kɛ ma wa hɛ mi ɔ a he. Matsɛ Salomo ngma ke: “He nɛ ga woli hiɛ ngɛ ɔ, níhi yaa nɔ pɛpɛɛpɛ.”​—Abɛ 15:22. w22.02 8 ¶1-2

Tsui tsakemi nitsɛnitsɛ biɔ babauu pe nɛ nɔ ko ma pia e he ngɛ e tɔmi he, nɛ e maa ye aywilɛho kɛkɛ. E biɔ nɛ nɔ ɔ nɛ e tsake e susumi kɛ e tsui. Enɛ ɔ tsɔɔ kaa e sa nɛ e yu e he ngɛ ní yayahi a he, nɛ e nyɛɛ Yehowa blɔ ɔ nɔ ekohu. (Eze. 33:14-16) Nɔ́ nɛ he hia nɛ nɔ nɛ e tɔ̃ ɔ nɛ pee ji kaa e ma dla e kɛ Yehowa a kpɛti huɛ bɔmi ɔ. Ke o ná le kaa o huɛ ko pee yayami ko nɛ hɛdɔ ngɛ he ɔ, mɛni o maa pee? O maa ye o huɛ ɔ awi ke o bɔ mɔde kaa o maa laa sane ɔ nɔ konɛ asafo mi nikɔtɔma amɛ nɛ a ko le. Wa be nyɛe maa laa tɔmi ko nɔ, ejakaa Yehowa ngɛ nɔ́ fɛɛ nɔ́ hyɛe. (Abɛ 5:21, 22) O ma nyɛ maa ye bua o huɛ ɔ ke o de lɛ ke asafo mi nikɔtɔma amɛ suɔ nɛ a ye bua lɛ. Ke o huɛ ɔ kua kaa e ma de asafo mi nikɔtɔma amɛ ɔ, o ma nyɛ ma ya de asafo mi nikɔtɔma amɛ nɔ́ nɛ ba a, nɛ lɔ ɔ tsɔɔ kaa o suɔ nɛ o ye bua lɛ. w21.10 7 ¶19-21

Wɔ tsuo wa ma nyɛ maa kase he kɛ afɔle sami su nɛ Yesu je kpo ɔ. Baiblo ɔ tsɔɔ kaa e “ngɔ nyɔguɛ su kɛ fɔ e nɔ.” (Filip. 2:7) Nyɔguɛ loo sɔmɔlɔ kpakpa suɔ nɛ e sa e nyɔmtsɛ hɛ mi. Akɛnɛ wa ji Yehowa nyɔguɛhi nɛ wa sɔmɔɔ wa nyɛmimɛ hulɔ he je ɔ, wa suɔ nɛ wa he nɛ ba se nami kɛ ha Yehowa kɛ wa nyɛmimɛ nyumuhi kɛ yihi tsuo. Mo bi o he ke: ‘Anɛ i suɔ nɛ ma ngɔ ye be kɛ ye he wami kɛ tsu ní kɛ ye bua ni kpahi lo? Ke a hia nihi nɛ a dla kpe peemi asahi a nɔ loo a tsu ní ngɛ Matsɛ Yemi Asahi a nɔ ɔ, anɛ i ngɔɔ ye he kɛ haa oya nɔuu lo?’ Eko ɔ, o na kaa e sa nɛ o ngɔ níhi kɛ sã afɔle ngɛ o nyɛmimɛ a he nɛ o ye bua mɛ wawɛɛ, se o nyɛ we nɛ o pee jã. Ke e ba jã a, moo je o tsui mi nɛ o sɔle ha Yehowa. Mo de Yehowa bɔ nɛ o ngɛ he nue ha nɛ o bi lɛ nɛ e ha mo ‘suɔmi ɔ kɛ he wami ɔ konɛ [o] kɛ pee.’​—Filip. 2:13. w22.02 22-23 ¶9-11

Yesu jeɔ mi mi jɔmi kpo kɛ tsɔɔ nihi, nɛ e pee we kpɛii ngɛ si fɔfɔɛhi nɛ a mi wa po mi. (Mat. 11:29, 30) Kaa nɔ hyɛmi nɔ́ ɔ, benɛ Foinike yo ɔ ya kpa lɛ pɛɛ konɛ e tsa e bi ɔ, sisije ɔ, e tsa we lɛ. Se benɛ yo ɔ je hemi kɛ yemi nɛ mi wa kpo ɔ, Yesu je mi mi jɔmi mi nɛ e tsa jokuɛ ɔ. (Mat. 15:22-28) Akɛnɛ Yesu mi mi jɔ he je ɔ, e yaa nɔ nɛ e woɔ nihi ga. Be komɛ ɔ, e kɛ e nane maa si nɛ e jeɔ mi mi jɔmi kpo kɛ tsɔɔ nihi nɛ e suɔ mɛ ɔ. Kaa nɔ hyɛmi nɔ́ ɔ, benɛ Petro ngɛ mɔde bɔe kaa e ma jɔ̃ Yesu kɔni mi konɛ e ko pee Yehowa suɔmi nya ní ɔ, e kã Petro hɛ mi ngɛ kaseli kpa amɛ a hɛ mi. (Maak. 8:32, 33) E pee we jã nɛ e kɛ pue Petro hɛ mi si, se mohu konɛ e kɛ tsɔse lɛ. Jehanɛ hu ɔ, e suɔ nɛ e bɔ bɔfo kpa amɛ kɔkɔ kaa e sa nɛ a fĩ e se ngɛ Mawu suɔmi nya ní peemi mi, se pi kaa a maa tsi e nya. Ngɛ anɔkuale mi ɔ, zo gbe Petro, se e ná tsɔsemi ɔ he se. Be komɛ ɔ, blɔ nɔ nɛ o maa gu kɛ je mi mi jɔmi nitsɛ kpo kɛ tsɔɔ nihi nɛ o suɔ mɛ ɔ ji kaa o maa wo mɛ ga. Ke o maa pee jã a, moo kase Yesu nɛ o ngɔ o ga womi ɔ kɛ da Baiblo sisi tomi mlaahi nɛ ngɛ Mawu Munyu ɔ mi ɔ a nɔ. w22.03 11 ¶12-13

Ke wa je Yehowa yi ɔ, lɔ ɔ tsɔɔ kaa wa ngɛ lɛ jae. (La 34:1) Ke wa de nihi bɔ nɛ wa bua jɔ Yehowa su ɔmɛ a he ha a, lɔ ɔ tsɔɔ kaa wa ngɛ e yi jee. Ke wa hɛ sa níhi nɛ Yehowa pee ha wɔ ɔ, wa ma nyɛ maa na ní kpakpahi fuu nɛ wa ma de ngɛ e he. Ke wa susu ní kpakpahi tsuo nɛ Yehowa pee kɛ ha wɔ ɔ he ɔ, wa maa na níhi fuu nɛ wa maa da nɔ kɛ je e yi. Fiɛɛmi ní tsumi ɔ ji nɔ́ titli nɛ haa nɛ wa náa he blɔ kɛ ‘sãa yi jemi afɔle kɛ haa Mawu be fɛɛ be, lɔ ɔ ji yiblii nɛ wa nya woɔ.’ Kaa bɔ nɛ e sa nɛ wa susu nɔ́ nɛ wa ma de Yehowa ngɛ sɔlemi mi he loko waa sɔle ɔ, jã kɛ̃ nɛ e sa nɛ wa susu nɔ́ nɛ wa ma de nihi nɛ waa kɛ mɛ kpeɔ ngɛ fiɛɛmi mi ɔ he saminya. Wa suɔ nɛ wa “yi jemi afɔle” ɔ nɛ pee nɔ́ nɛ waa kɛ wa nyɛmi tsuo lɛ ngɛ sãe. Lɔ ɔ he je nɛ waa kɛ bua jɔmi tuɔ munyu ke wa ngɛ fiɛɛe ɔ nɛ. w22.03 21 ¶8