October

Níhi nɛ wa tsɔɔ kɛ níhi nɛ wa heɔ yeɔ ɔ daa si ngɛ Baiblo ɔ nɔ. Se enɛ ɔ tsuo se ɔ, nihi kuaa wa sɛ gbi ɔ, ejakaa wa yi gbijlɔ komɛ, nɛ pi níhi nɛ wa tsɔɔ ɔ hu nɛ a ngɛ hlae maa nu. Mɛni wa ma nyɛ maa pee konɛ wa nane nɛ ko tɔ̃tɔ̃? Bɔfo Paulo de Kristofohi nɛ a ngɛ Roma a ke: “Hemi kɛ yemi nyɛɛɔ nɔ́ nɛ a nu ɔ se. Nɛ nɔ́ nɛ a nu ɔ guɔ Kristo he munyu ɔ nɔ.” (Rom. 10:17) Enɛ ɔ he ɔ, Baiblo ɔ nɛ wa kaseɔ ɔ nɛ haa nɛ wa hemi kɛ yemi ɔ mi waa, se pi gbijlɔhi nɛ dɛ Baiblo ɔ nɔ nɛ jami ɔmɛ kɛ a he woɔ mi ɔ. E sa nɛ wa hemi kɛ yemi ɔ nɛ da anɔkuale nile nitsɛnitsɛ nɔ, ejakaa “ke nɔ ko be hemi kɛ yemi ɔ, e be nyɛe maa sa Mawu hɛ mi saminya.” (Heb. 11:1, 6) Enɛ ɔ he ɔ, e he hia we nɛ waa na nyakpɛ nɔ́ ko nɛ je hiɔwe loko wa ná nɔ mi mami kaa wa na anɔkuale ɔ. E sa nɛ Baiblo mi munyuhi nɛ woɔ nɔ hemi kɛ yemi mi he wami nɛ wa maa kase ɔ nɛ ha nɛ wa ná nɔ mi mami kaa wa na anɔkuale ɔ, nɛ́ wa yi mi ko pee wɔ enyɔɔnyɔ. w21.05 4-5 ¶11-12

Bɔfo Paulo kɛ nyagbahi fuu kpe. A kongo lɛ, a fiaa lɛ tɛ, nɛ a wo lɛ tsu; be nɛ ɔ mi ji be nɛ e hia he wami womi wawɛɛ. (2 Kor. 11:23-25) Paulo tsɔɔ kaa be komɛ ɔ, e kɔni mi jɔ̃ɔ, nɛ e he waa ha lɛ kaa e maa da nya. (Rom. 7:18, 19, 24) Jehanɛ hu ɔ, hiɔ ko nɛ ngɛ kaa ‘mio ko ngɛ e he lo ɔ mi’ nɛ e ná nɛ Mawu je ha lɛ. (2 Kor. 12:7, 8) Ngɛ nyagbahi tsuo nɛ Paulo kɛ kpe ɔ mi ɔ, Yehowa wo lɛ he wami nɛ e nyɛ tsu e sɔmɔmi ní tsumi ɔ. Nyɛ ha nɛ waa hyɛ bɔ nɛ Paulo tsu e sɔmɔmi ní tsumi ɔ kɛ pi si ha. Benɛ a wo lɛ tsu ngɛ we mi ngɛ Roma a, e kɛ kã fiɛɛ kɛ ha nihi fuu, nɛ eko ɔ, e fiɛɛ kɛ ha amlaalohi po. (Níts. 28:17; Filip. 4:21, 22) Jehanɛ hu ɔ, e fiɛɛ kɛ ha Matsɛ Ngua a He Buli Ɔmɛ a kpɛti nihi fuu, nɛ e ye nihi tsuo nɛ a ba slaa lɛ ɔ odase. (Níts. 28:30, 31; Filip. 1:13) Ngɛ jamɛ a be ɔ mi nɔuu ɔ, Mawu gu Paulo nɔ kɛ ngma sɛ womihi kɛ ye bua anɔkuale Kristofohi nɛ a hi si ngɛ e be ɔ mi ɔ kɛ Kristofohi nɛ a ngɛ mwɔnɛ ɔ tsuo. w21.05 21 ¶4-5

He nɔ womi ha nɛ Yuda Matsɛ Uzia bui ga womi tue, nɛ e pee nɔ́ ko nɛ e be he blɔ kaa e peeɔ. Uzia pee ní kpakpahi fuu. E ye manye ngɛ tahi a mi, e ma mɔhi nɛ e fia gbogbo kɛ wo ma a he. E lɛ lohwehi babauu nɛ e pee ngmɔhi fuu hulɔ. ‘Yehowa hu gbaa lɛ.’ (2 Kron. 26:3-7, 10) Baiblo ɔ de ke: “Se benɛ Uzia tsɛ yemi ɔ ba he si ɔ, e wo e he nɔ, nɛ nɔ́ nɛ ɔ ha nɛ e hɛ mi kpata.” Yehowa sɛ hlami fã kaa osɔfo ɔmɛ pɛ nɛ a ngɛ he blɔ kaa a sãa tsopa kɛ e he via ngɛ sɔlemi we ɔ. Se Matsɛ Uzia ya sɔlemi we ɔ nɛ e ya sã tsopa kɛ e he via be mi nɛ e be he blɔ kaa e peeɔ jã. Yehowa bua jɔɛ nɔ́ nɛ nyumu he nɔ wolɔ nɛ ɔ pee ɔ he, nɛ e ha nɛ kpiti pue lɛ. (2 Kron. 26:16-21) Anɛ wɔ hu wa ma nyɛ ma wo wa he nɔ nɛ waa pee yayami kaa Uzia lo? Ee, e ma nyɛ maa ba jã ke wa ngɔɔ wa juɛmi kɛ maa níhi nɛ wa nyɛɔ peeɔ ɔ a nɔ tsɔ. Nyɛ ha nɛ wa kai kaa nyɛmi fɛɛ nyɛmi nɛ wa ngɛ, kɛ he blɔ fɛɛ he blɔ nɛ wa ma ná ngɛ asafo ɔ mi ɔ je Yehowa ngɔ. (1 Kor. 4:6, 7) Ke wa woɔ wa he nɔ ɔ, Yehowa kɛ wɔ be ní tsue. w21.06 16 ¶7-8

Yesu le kaa níhi be nɔ yae ha e kaseli ɔmɛ jã daa ngɛ a fiɛɛmi ní tsumi ɔ mi. Ngɛ anɔkuale mi ɔ, wa li nihi nɛ Yesu kaseli ɔmɛ fiɛɛ kɛ ha mɛ sisije ɔ a kpɛti nihi abɔ nɛ a ba pee Kristofohi. Pi níhi nɛ kaseli ɔmɛ tsu ɔ pɛ nɛ e sa nɛ e ha nɛ a ná bua jɔmi, se mohu ɔ, nɔ́ nɛ he hia ji lemi nɛ a le kaa Yehowa bua jɔ a mɔde bɔmi ɔ he ɔ. Ke wa fĩ si ngɛ wa fiɛɛmi ní tsumi ɔ mi ɔ, wa ma ná neneene wami. Ke wa pee nɔ́ fɛɛ nɔ́ nɛ wa ma nyɛ ngɛ Matsɛ Yemi ɔ he sane kpakpa fiɛɛ ní tsumi ɔ mi ɔ, e tsɔɔ kaa wa “ngɛ due kɛ ngɛ mumi ɔ hae,” nɛ Mawu mumi klɔuklɔu ɔ ma tsu ní ngɛ wa si himi mi. Yehowa wo si kaa ke ‘wa kɔni mi jɔ̃ we’ loo “pɔ tɔɛ wa he ɔ,” e ma ha wɔ neneene wami ke wa nyɛ we nɛ waa ye bua nɔ ko nɛ e ya e hɛ mi kɛ su baptisimi he po.​—Gal. 6:7-9. w21.10 26 ¶8-9

Ligbi ko ɔ, Yesu kɛ e kaseli ɔmɛ ya fiɛɛ wawɛɛ ngɛ he ko nɛ pɔtɔ a he. A suɔ nɛ a jɔɔ a he ngɛ he ko, se asafo kuu ko na mɛ. Ni ɔmɛ a he pee Yesu mɔbɔ, lɔ ɔ he ɔ, e bɔni mɛ “níhi fuu” tsɔɔmi. Yesu ngɔ e he kɛ wo ni ɔmɛ a si fɔfɔɛ ɔ mi. E suɔ nɛ e ye bua mɛ, ejakaa e na kaa a ngɛ nɔ́ nae nɛ a hia hɛ kɛ nɔ fɔmi. Mwɔnɛ ɔ hu ɔ, e ngɛ kaa nɔ́ nɛ nihi ngɛ bua jɔmi nɛ a ngɛ manye yee ngɛ si himi mi, se a ngɛ nyagbahi, nɛ a hia hɛ kɛ nɔ fɔmi. A ngɛ kaa jijɔhi nɛ a laa nɛ a be nɔ hyɛlɔ. Bɔfo Paulo kale nimli nɛ ɔmɛ kaa nihi nɛ a li Mawu nɛ a be hɛ kɛ nɔ fɔmi ko. (Efe. 2:12) Ke wa susu bɔ nɛ e he hia kaa nihi nɛ a ngɛ wa zugba kpɔ ɔ mi ɔ nɛ a le Mawu ɔ he ɔ, suɔmi kɛ mi mi sami maa wo wɔ he wami nɛ waa ye bua mɛ. Blɔ nɛ hi nɛ wa ma nyɛ maa gu nɔ kɛ ye bua mɛ ji kaa waa kɛ mɛ maa kase Baiblo ɔ. w21.07 5 ¶8

Nɔ nɛ hlaa yaka hɛ mi nyami ɔ woɔ e he nɔ nɛ e foɔ lɛ pɛ e nɔ́ mi. Nɔ nɛ e hɛ kɔ̃ɔ ɔ suɔ nɛ e ná níhi nɛ nɔ ko ngɛ ɔ, se pi lɔ ɔ pɛ, e suɔ nɛ nɔ́ nɛ nɔ ɔ ngɛ ɔ hu nɛ je e dɛ. Ngɛ anɔkuale mi ɔ, hɛkɔ kɛ ninyɛ lɛ nyɛɛ. Wa ma nyɛ maa ngɔ yaka hɛ mi nyami hlami kɛ hɛkɔ kɛ to mu nɛ sɛɛ nu nɛ a kɛ woɔ ɛloplee mi konɛ e nyɛ nɛ e te ɔ he. Eko ɔ, ɛloplee ɔ maa te mohu lɛɛ, se mu nɛ ngɛ nu ɔ mi ɔ ma nyɛ maa tsi puɔhi nɛ nu ɔ guɔ mi kɛ sɛɛ engine ɔ mi ɔ, nɛ e ma nyɛ ma ná oslaa po. Jã nɔuu kɛ̃ nɛ eko ɔ, nɔ ko kɛ jeha babauu ma sɔmɔ Yehowa, se ke yaka hɛ mi nyami hlami kɛ hɛkɔ nɛ e kɛ peeɔ jã a, e hɛ mi ma kpata. (Abɛ 16:18) E ma kpa Yehowa sɔmɔmi, nɛ e maa ye lɛ nitsɛ e he kɛ ni kpahi awi. Wa ma nyɛ maa hwu kɛ si yaka hɛ mi nyami hlami ke wa hɛ ji kɔkɔ bɔmi nɛ bɔfo Paulo kɛ ha a nɔ. E de ke: “Nyɛ ko ngɔ pɛ aloo yaka hɛ mi nyami hlami kɛ pee nɔ́ ko nɔ́ ko, mohu ɔ, nyɛɛ je he si bami mi nɛ nyɛɛ bu ni kpahi kaa a nɔ kuɔ pe nyɛ.”​—Filip. 2:3. w21.07 15-16 ¶6-8

Ni komɛ susu kaa e sa nɛ nihi nɛ a ngɛ anɔkuale jami mi ɔ a nyɛ nɛ a ha sane bimi fɛɛ sane bimi heto, nɛ sane bimihi nɛ Baiblo ɔ tui he munyu po, e sa nɛ a nyɛ nɛ a ha heto. Anɛ e maa hi peemi jã lo? Mo susu Bɔfo Paulo nɔ hyɛmi nɔ́ ɔ he nɛ o hyɛ. E wo e nyɛmimɛ Kristofo ɔmɛ he wami kaa a “ná níhi tsuo a nɔ mi mami,” se e tsɔɔ kaa pi níhi tsuo nɛ e nu sisi. (1 Tɛs. 5:21) E de ke, “wa ngɛ nile fã kɛ fã,” nɛ e tsa nɔ ke, “wa naa níhi kusuu ngɛ dade ahuhuɛ mi.” (1 Kor. 13:9, 12) Paulo nui nɔ́ fɛɛ nɔ́ sisi, nɛ jã kɛ̃ nɛ wɔ hu wa nui nɔ́ fɛɛ nɔ́ sisi. Se Paulo le sisije tsɔɔmihi nɛ kɔɔ Yehowa he ɔ. E le níhi nɛ ma ha nɛ e ná nɔ mi mami kaa e na anɔkuale ɔ! Blɔ kake nɛ wa ma nyɛ maa gu nɔ kɛ ná nɔ mi mami kaa wa na anɔkuale ɔ ji kaa wa maa ngɔ blɔ nɛ Yesu gu nɔ kɛ ja Mawu ɔ kɛ to blɔ nɛ Yehowa Odasefohi guɔ nɔ kɛ jaa Mawu mwɔnɛ ɔ he. w21.10 18-19 ¶2-4

Nyɛmimɛ nɛ nyɛ wa ngɛ jeha mi, nyɛ ngɛ be tsuo sɔmɔmi ní tsumi ɔ tsue jio, nyɛ tsu we jio, nyɛ ma nyɛ maa pee babauu kɛ ye bua ni kpahi. Ngɛ mɛni blɔ nɔ? Nyɛɛ kplɛɛ si fɔfɔɛ nɛ nyɛ ngɛ mi ɔ nɔ, nyɛɛ ngɔ oti ehehi kɛ ma nyɛ hɛ mi, nɛ nyɛɛ ngɔ nyɛ juɛmi kɛ ma níhi nɛ nyɛ ma nyɛ maa pee ɔ a nɔ mohu pe níhi nɛ nyɛ be nyɛe maa pee ɔ. Matsɛ David suɔ nɛ e ma tsu kɛ ha Yehowa. Se benɛ Yehowa ha nɛ e le kaa niheyo Salomo mohu nɛ a ngɔ he blɔ nɛ ɔ kɛ ha a, David kplɛɛ yi mi kpɔ nɛ Yehowa mwɔ ɔ nɔ, nɛ e je e tsui mi tsuo kɛ fĩ ní tsumi ɔ se. (1 Kron. 17:4; 22:5) David nui he kaa akɛnɛ Salomo ɔ “jokuɛyo ji lɛ [nɛ] e kpa we níhi a si lolo” he je ɔ, lɛ ji nɔ nɛ e sa nɛ e tsu ní tsumi ɔ. (1 Kron. 29:1) David le kaa Yehowa jɔɔmi nɛ ma ha nɛ a gbe ní tsumi ɔ nya ngɛ manye yemi mi, se pi jeha nɛ nihi nɛ a ngɛ ní tsumi ɔ hɛ mi nyɛɛe ɔ ye aloo níhi a si kpami nɛ a ngɛ. Mwɔnɛ ɔ, nyɛmimɛ nɛ a wa ngɛ jeha mi ɔ hu kaseɔ David nɔ hyɛmi nɔ́ ɔ nɛ a yaa nɔ nɛ a tsuɔ ní tsumihi fuu ngɛ Yehowa sɔmɔmi mi ke a ní tsumi tsake po. A le kaa Yehowa maa jɔɔ nihewi nɛ a ngɛ ní tsumi nɛ jinɛ mɛ nɛ a tsuɔ ɔ tsue ɔ. w21.09 9 ¶4; 10 ¶5, 8

Ke waa kɛ otihi ma wa hɛ mi ngɛ Yehowa sɔmɔmi mi ɔ, wa si himi peeɔ kpakpa. Se e sa nɛ waa ngɔ otihi nɛ wa ma nyɛ maa su he ɔ kɛ ma wa hɛ mi. E sɛ nɛ waa ngɔ oti ko kɛ ma wa hɛ mi akɛnɛ ni kpahi kɛ jamɛ a oti ɔ ma a hɛ mi ɔ he je. Ke wa pee jã a, wa kɔni mi ma nyɛ ma jɔ̃, nɛ wa nine maa nyɛ si. (Luka 14:28) Akɛnɛ o ngɛ Yehowa sɔmɔe he je ɔ, o piɛɛ e weku mi bimɛ nɛ a he jua wa a he, nɛ o ngɛ slɔɔto. Yehowa gblɛ mo kɛ bɛ e ngɔ akɛnɛ o bɔɔ mɔde pe ni kpahi ɔ he je. Yehowa gbla mo kɛ ba e ngɔ, ejakaa e hyɛ o tsui mi, nɛ e na kaa o baa o he si, nɛ o suɔ nɛ o ngɔ níhi nɛ e ngɛ mo tsɔɔe ɔ kɛ tsu ní. Mo ná nɔ mi mami kaa e bua jɔɔ ke o kɛ o nyɛmi tsuo sɔmɔ lɛ. O si fimi ɔ, kɛ o anɔkuale yemi ɔ ji odase nɛ tsɔɔ kaa o ngɛ “tsui nɛ hi kɛ tsui kpakpa.” (Luka 8:15) Yaa nɔ nɛ o kɛ o nyɛmi tsuo nɛ sɔmɔ Yehowa. Ke o pee jã a, “[mo] nitsɛ” o ma ná nɔ́ ko nɛ o maa da nɔ kɛ nya.​—Gal. 6:4. w21.07 24 ¶15; 25 ¶20

Behi fuu ɔ, e he maa hia nɛ waa to wa tsui si kɛ hyɛ Yehowa blɔ ke a yi wɔ dami sane. Kaa nɔ hyɛmi nɔ́ ɔ, ke asafo mi nikɔtɔma amɛ ba ná le kaa nɔ ko tɔ̃ tɔmi nɛ hɛdɔ ngɛ he ngɛ asafo ɔ mi ɔ, a sɔleɔ kɛ haa Yehowa konɛ e ha mɛ “juɛmi ɔ nɛ je hiɔwe ɔ” bɔ nɛ pee nɛ a le e juɛmi ngɛ sane ɔ he. (Yak. 3:17) Oti nɛ ngɛ a hɛ mi ji kaa a maa ye bua yayami peelɔ ɔ nɛ ke e maa hi ɔ, e ‘kpale kɛ je e blɔ yayami ɔ’ nɔ. (Yak. 5:19, 20) A suɔ nɛ a pee nɔ́ fɛɛ nɔ́ nɛ a ma nyɛ kɛ po asafo ɔ he piɛ, nɛ a wo nihi nɛ yayami peelɔ ɔ tɔ̃ a nɔ ɔ a bua. (2 Kor. 1:3, 4) Nɛ ke nikɔtɔma amɛ ná le kaa nɔ ko tɔ̃ tɔmi ko nɛ hɛdɔ ngɛ he ɔ, kekleekle ɔ, e sa nɛ a na anɔkuale ɔ tsuo. Enɛ ɔ ma nyɛ ma he be. Jehanɛ hu ɔ, a sɔleɔ, nɛ a daa Ngmami ɔ nɔ kɛ yeɔ bua yayami peelɔ ɔ “bɔ nɛ sa.” (Yer. 30:11) Asafo mi nikɔtɔma amɛ he sɔɛ kɛ kojo. Ke asafo mi nikɔtɔmahi tsu sanehi a he ní saminya a, asafo ɔ tsuo ma ná he se. w21.08 11 ¶12-13

Akɛnɛ hwɔ ba ngɛ Israel he je ɔ, Naomi kɛ e huno ɔ kɛ a bimɛ nyumuhi enyɔ ɔmɛ hia kɛ ho Moab ya. Benɛ a ngɛ lejɛ ɔ, Naomi huno ɔ ba gbo. E bimɛ nyumuhi enyɔ ɔmɛ hu sɛ gba si himi mi, se aywilɛho sane ji kaa mɛ hu a ba gbo. (Rut 1:3-5) Nyagba nɛ ɔmɛ ha nɛ Naomi hao wawɛɛ nitsɛ, nɛ e kɔni mi jɔ̃. Akɛnɛ e kɔni mi jɔ̃ he je ɔ, e susu kaa Yehowa ngɛ si tee kɛ wo lɛ. Mo kadi munyuhi nɛ e tu akɛnɛ e ngɛ nɔ́ nae ɔ he je. E de ke: ‘Sane nɛ Yehowa kɛ mi ye ɔ nya wa.’ “Ope ɔ kɛ mi ye sane nɛ dooɔ tsɔ.” E de hu ke: “Ope ɔ te si wo mi, nɛ e ha i na nɔ́ kikɛ nɛ ɔ.” (Rut 1:13, 20, 21) Yehowa le kaa “yi mi wami ma nyɛ maa wo juɛmitsɛ godo.” (Fiɛlɔ 7:7, NW) E gu Rut nɔ kɛ je suɔmi nɛ se pui kpo kɛ tsɔɔ Naomi. Rut je suɔmi mi nɛ e ye bua e nganyɛ ɔ, nɛ e to e tsui si kɛ ye bua lɛ konɛ e kɔni mi ko jɔ̃, nɛ́ e na hu kaa Yehowa suɔ lɛ loloolo. w21.11 9 ¶9; 10 ¶10, 13

Ke waa kɛ wa nyɛmi tsuo ngɛ ní tsumi nɛ a kɛ wo wa dɛ amlɔ nɛ ɔ tsue po ɔ, anɛ lɔ ɔ tsɔɔ kaa e sɛ nɛ waa pee babauu kɛ piɛɛ he lo? Dɛbi kulaa! E sa nɛ waa ngɔ otihi nɛ maa ye bua wɔ nɛ waa pee fiɛɛli kɛ tsɔɔli nɛ a he be ɔ kɛ ma wa hɛ mi, nɛ waa ye bua wa nyɛmimɛ nyumuhi kɛ yihi hulɔ. Wa ma nyɛ maa su oti nɛ ɔmɛ a he ke waa kɛ nile tsu ní, wa pee wa he humi, nɛ wa ngɔ wa nyɛmimɛ a hiami níhi kɛ ye kekle blɔ he. (Abɛ 11:2; Níts. 20:35) Mɛni otihi nɛ o kɛ ma nyɛ maa ma o hɛ mi? Mo bi Yehowa nɛ e ye bua mo nɛ o na otihi nɛ o ma nyɛ maa su a he. (Abɛ 16:3) Anɛ o kɛ oti nɛ ɔmɛ eko ma nyɛ maa ma o hɛ mi lo? Blɔ gbali a wami ní tsumi ɔ, daa blɔ gbami ní tsumi ɔ, Betel sɔmɔmi, loo asafo ɔ tsu mami ní tsumi ɔ. Aloo eko ɔ, o ma nyɛ maa kase gbi kpa nɛ o fiɛɛ kɛ ha nihi nɛ a ngɛ ma kpahi a nɔ ɔ. w21.08 23 ¶14-15

Suɔmi nɛ se pui he hia Yehowa wawɛɛ. (Hos. 6:6) Yehowa gu gbalɔ Mika nɔ kɛ wo wɔ he wami kaa “waa na mɔbɔ”, nɛ ma nyɛ maa tsɔɔ kaa wa je suɔmi nɛ se pui kpo. (Mika 6:8) Se loko wa ma nyɛ maa pee jã a, e sa nɛ waa le nɔ́ nɛ suɔmi nɛ se pui ɔ tsɔɔ. Mɛni ji suɔmi nɛ se pui? Munyu nɛ ji “suɔmi nɛ se pui” ɔ je kpo maa pee si 230 ngɛ New World Translation of the Holy Scriptures ɔ mi. Mɛni e tsɔɔ? Ke nɔ ko ngɛ suɔmi nɛ se pui ɔ, e tsɔɔ kaa e ngɛ suɔmi nɛ mi wa kɛ ha nɔ ko, nɛ e maa ya nɔ maa ye nɔ ɔ anɔkuale nɛ e hi e kasa nya be fɛɛ be. Behi fuu ɔ, a kɛ suɔmi nɛ ɔ kaleɔ suɔmi nɛ Mawu ngɛ kɛ ha adesahi ɔ, se a kɛ kaleɔ suɔmi nɛ hiɔ adesahi a kpɛti ɔ hulɔ. Yehowa ji nɔ nɛ peeɔ suɔmi nɛ ɔ he nɔ hyɛmi nɔ́ pe kulaa. Enɛ ɔ he je nɛ Matsɛ David de ke: ‘Yehowa, o suɔmi nɛ be nyagbe ɔ kle agbo kaa hiɔwe ɔ tsuo. Yehowa, hyɛ bɔ nɛ o suɔmi nɛ se pui ɔ he jua wa ha!’ (La 36:5, 7) Anɛ wɔ hu wa bua jɔ Mawu suɔmi nɛ se pui ɔ he kaa David lo? w21.11 2 ¶1-2; 3 ¶4

Yesu nɛ ji “kekleekle bi ngɛ bɔ níhi tsuo a kpɛti” ɔ, kɛ bɔfo akpeakpehi abɔ ɔ piɛɛ Yehowa weku ɔ mi bimɛ ɔmɛ a he. (Kol. 1:15; La 103:20) Benɛ Yesu ngɛ zugba a nɔ ɔ, e tsɔɔ kaa adesahi anɔkualetsɛmɛ ma nyɛ ma tsɛ Yehowa ke a Tsɛ. Benɛ Yesu kɛ e kaseli ɔmɛ ngɛ munyu tue ɔ, e tsɔɔ kaa Yehowa ji ‘e Tsɛ kɛ mɛ hu a Tsɛ.’ (Yoh. 20:17) Ke wa jɔɔ wa he nɔ ha Yehowa nɛ a baptisi wɔ ɔ, e tsɔɔ kaa wa ba piɛɛ Yehowa weku nɛ suɔmi ngɛ mi ɔ he. (Maak. 10:29, 30) Yehowa ji Tsɛ nɛ ngɛ suɔmi. Yesu suɔ nɛ waa na Yehowa kaa bɔ nɛ e naa lɛ ɔ. E naa lɛ kaa Tsɛ nɛ ngɛ suɔmi nɛ e mi mi sãa lɛ ngɛ wa he, nɛ́ wa ma nyɛ maa hɛ kɛ su e he. Yehowa a, tsa pi nɔ ko nɛ e mi mi jɔɛ nɛ e deɔ wɔ nɔ́ nɛ e sa kaa waa pee pɛ kɛkɛ. Yesu je sɔlemi nɔ hyɛmi nɔ́ ɔ sisi kɛ munyu nɛ ji: “Wa Tsɛ.” Yesu ko nyɛ ko de wɔ kaa wa tsɛ Yehowa kaa “Ope ɔ,” ‘Bɔlɔ ɔ’ loo “neneene Matsɛ ɔ.” Tɔmi ko be he kaa a kɛ sablai nɛ ɔmɛ ma tsɛ Yehowa, ejakaa Baiblo ɔ kɛ biɛ nɛ ɔmɛ kale lɛ. (1 Mose 49:25; Yes. 40:28; 1 Tim. 1:17) Se Yesu de ke wa tsɛ Yehowa kaa wa “Tsɛ.” w21.09 20 ¶1, 3

Matsɛ Manase kua sɛ gbi ɔ nɛ Yehowa gbalɔ ɔ kɛ ba ha lɛ ɔ. Nyagbenyagbe ɔ, ‘Yehowa ha nɛ Asiria tabo ɔ asafoatsɛmɛ ɔmɛ ba tua Yuda. A kɛ gbowehi nu Manase nɛ a wo lɛ kɔsɔkɔsɔ, nɛ a ngɔ lɛ kɛ ho Babilon ya.’ Benɛ a wo Manase tsu ngɛ Babilon ɔ, e susu níhi nɛ e pee ɔ a he saminya. “E ba e he si . . . ha . . . e nɛmɛ a Mawu ɔ.” E ya nɔ nɛ e pee babauu. Ngmami ɔ tsɔɔ kaa e bɔni Yehowa pɛɛ kpami konɛ e na lɛ mɔbɔ. Ngɛ anɔkuale mi ɔ, Manase “fa kue ha” Yehowa. (2 Kron. 33:10-12) Benɛ be pue mi ɔ, Yehowa bu Matsɛ Manase sɔlemi tue. Níhi nɛ Manase de ngɛ e sɔlemi ɔ mi ɔ ha nɛ Yehowa na kaa e tsake e tsui. Manase kpa Yehowa pɛɛ kaa e ngɔ e tɔmi kɛ ke lɛ nɛ e ha nɛ e ba pee matsɛ ekohu, nɛ Yehowa bu lɛ tue. Manase ya nɔ nɛ e bɔ e he mɔde, nɛ e tsɔɔ kaa niinɛ, e tsake e tsui. w21.10 4 ¶10-11

E sa nɛ Akuila kɛ Priskila nɛ a je he nɛ a ngɛ ɔ nɛ a ya hla we kpa, nɛ a tsa bo tsu lomi ní tsumi ɔ nɔ ngɛ he kpa. Benɛ Akuila kɛ Priskila ya je Korinto ɔ, a kɛ asafo ɔ pee kake, nɛ a kɛ bɔfo Paulo tsu ní kɛ wo nyɛmimɛ ɔmɛ he wami. Pee se ɔ, a hia kɛ ho he ko nɛ a hia fiɛɛli fuu ngɛ ɔ ya. (Níts. 18:18-21; Rom. 16:3-5) E ngɛ mi kaa a be deka mohu lɛɛ, se a bua jɔ ngɛ a si himi mi! Nihi nɛ a sɛ gba si himi mi mwɔnɛ ɔ ma nyɛ maa kase Akuila kɛ Priskila ke a kɛ Matsɛ Yemi ɔ ye kekle blɔ he ngɛ a si himi mi. Be nɛ hi nɛ e sa kaa nihi nɛ a suɔ nɛ a sɛ gba si himi mi ɔ kɛ sɛɛ otihi nɛ a kɛ ma a hɛ mi ɔ a he ní ji be nɛ a ngɛ nyɛɛe kɛ sɛ gba si himi mi ɔ. Ke a sɛ gba si himi mi nɛ a pee kake kɛ mwɔ a yi mi kpɔ nɛ a bɔ mɔde kaa a maa su mumi mi oti komɛ a he ɔ, a maa na bɔ nɛ Yehowa mumi ɔ ma tsu ní ngɛ a si himi ha ngɛ blɔ slɔɔtohi a nɔ.​—Fiɛlɔ 4:12. w21.11 17 ¶11-12

E sa nɛ waa bu fami nɛ Mawu fã wɔ kaa waa bu wa fɔli ɔ tue. Mo kai kaa munyu nɛ ji: ‘Nyɛɛ pee nyɛ he klɔuklɔu, ejakaa imi Yehowa, nyɛ Mawu ɔ, i ngɛ klɔuklɔu’ ɔ. (3 Mose 19:2) Benɛ a ngma jamɛ a munyu ɔ ta a, a ngɔ munyu nɛ ngɛ 3 Mose 19:3 ɔ nɛ tsɔɔ kaa waa bu wa fɔli ɔ kɛ tsa lɔ ɔ nɔ. Ke wa susu blɔ tsɔɔmi nɛ Yehowa kɛ ha kaa waa bu wa fɔli ɔ he ɔ, wa ma nyɛ ma bi wa he ke, ‘Anɛ i buu ye fɔli lo?’ Ke o nu he kaa e sa nɛ o je bumi kpo kɛ tsɔɔ o fɔli wawɛɛ pe bɔ nɛ o peeɔ ɔ, lɛɛ amlɔ nɛ ɔ, moo pee babauu ngɛ lɔ ɔ blɔ fa mi. O be nyɛe ma tsake níhi nɛ o pee kɛ be ɔ, se o ma nyɛ maa bɔ o he mɔde amlɔ nɛ ɔ nɛ o ná be babauu kɛ ha mɛ. O ma nyɛ maa pee níhi fuu kɛ ye bua mɛ. O ma nyɛ ma ha mɛ a he lo nya hiami níhi, o ma nyɛ maa ye bua mɛ nɛ a hɛ kɛ su Yehowa he, nɛ́ a ya nɔ nɛ a sɔmɔ lɛ. Aloo o ma nyɛ maa wo mɛ he wami nɛ o wo a bua. Ke o pee jã a, lɛɛ o kɛ ga womi nɛ ngɛ 3 Mose 19:3 ɔ ngɛ ní tsue. w21.12 4-5 ¶10-12

Matsɛ David tɔ̃ tɔmihi nɛ hɛdɔ ngɛ a he. Kaa nɔ hyɛmi nɔ́ ɔ, e kɛ Batsheba puɛ gba nɛ e ha nɛ a gbe e huno ɔ. (2 Sam. 11:2-4, 14, 15, 24) Nɔ́ nɛ David pee ɔ ngɔ haomi kɛ ba lɛ nitsɛ e nɔ, e weku mi bi ɔmɛ kɛ ni kpahi a nɔ. (2 Sam. 12:10, 11) Be kpa ko hu ɔ, David ngɔɛ e hɛ kɛ fɔ Yehowa nɔ kulaa. E kane Israel ta buli ɔmɛ be mi nɛ Yehowa fã we lɛ kaa e pee jã. Mɛni je mi kɛ ba? Gbenɔ hiɔ gbe Israel bi nɛ a yibɔ maa su 70,000! (2 Sam. 24:1-4, 10-15) Anɛ o ko kojo David kaa e sɛ nɛ Yehowa nɛ ngɔ e tɔmi kɛ ke lɛ lo? Yehowa nɛ lɛ jã. Yehowa ngɔ e juɛmi kɛ ma bɔ nɛ David ye lɛ anɔkuale ha e wami be tsuo kɛ e he nɛ e pia a nɔ. Enɛ ɔ he ɔ, Yehowa ngɔ yayamihi nɛ David pee nɛ hɛdɔ ngɛ he ɔ kɛ ke lɛ. Yehowa le kaa David suɔ lɛ wawɛɛ nɛ e suɔ kaa e maa pee nɔ́ nɛ da. Anɛ o bua jɔɛ kaa Mawu ngɔɔ e juɛmi kɛ maa su kpakpahi nɛ wa ngɛ ɔ nɔ lo?​—1 Ma. 9:4; 1 Kron. 29:10, 17. w21.12 19 ¶11-13

Yesu mi mi sã lɛ ngɛ nihi nɛ a je kpá a he. Mo kai sɛ gbi nɛ Yesu kɛ mane Yohane nɔ Baptisilɔ ɔ. E de ke: “Hɛ yuyuili ngɛ nɔ́ hyɛe, nɛ glɔtsɛmɛ ngɛ nyɛɛe, kpititsɛmɛ a he ngɛ tsɔe, nɛ nihi nɛ a tue nui nɔ́ ɔ ngɛ nɔ́ nue, [nɛ] a ngɛ gbogboehi a si tlee.” Benɛ ni ɔmɛ na nyakpɛ níhi nɛ Yesu pee ɔ, mɛ tsuo “a je Mawu yi.” (Luka 7:20-22) Kristofohi suɔ kaa a maa kase Yesu nɛ a mi mi nɛ sã mɛ ngɛ nihi nɛ a je kpá a he. Enɛ ɔ he ɔ, wa toɔ wa tsui si nɛ wa jeɔ mi mi jɔmi kpo kɛ tsɔɔ nihi kaa jã. Ngɛ anɔkuale mi ɔ, Yehowa ha we wɔ he wami nɛ wa kɛ pee nyakpɛ níhi kaa bɔ nɛ Yesu pee ɔ. Se wa ná he blɔ kaa wa maa fiɛɛ kɛ ha nihi nɛ a hɛngmɛ yu loo nihi nɛ a li Mawu he nɔ́ ko ɔ nɛ wa de mɛ kaa hwɔɔ se ɔ, a ma ná nɔmlɔ tso mi he wami kpakpa ngɛ paradeiso ɔ mi, nɛ huɛ bɔmi kpakpa maa hi a kɛ Mawu a kpɛti. (Luka 4:18) Sane kpakpa nɛ ɔ nɛ wa ngɛ fiɛɛe ɔ ngɛ nihi fuu ye buae nɛ a ngɛ Mawu yi jee. w21.12 9 ¶5

Yakobo ngɔ e tsɔɔmi ɔmɛ kɛ da Ngmami ɔ nɔ. E ngɔ Mawu Munyu ɔ kɛ ye bua e tue buli ɔmɛ nɛ a na kaa Yehowa jɔɔ nihi nɛ a yeɔ anɔkuale kaa Hiob ɔ be fɛɛ be. Yakobo ngɔ munyuhi nɛ a sisi numi yi kɛ tsɔɔ oti ɔmɛ a mi. Kɛ gu jã nɛ e pee ɔ nɔ ɔ, e gbla nihi a juɛmi kɛ ya Yehowa nɔ, se pi lɛ nitsɛ e nɔ. Nɔ́ nɛ wa ma nyɛ maa kase ngɛ mi: Ngɔɔ munyunguhi nɛ a sisi numi yi kɛ tsu ní nɛ o da Mawu Munyu ɔ nɔ kɛ tsɔɔ ní. Ke wa ngɛ ní tsɔɔe ɔ, e sɛ nɛ waa bɔ mɔde kaa wa ma ha nɛ nihi nɛ a na bɔ nɛ wa le ní ha. Mohu ɔ, e sa nɛ wa ha nɛ a le níhi abɔ nɛ Yehowa le kɛ bɔ nɛ e susuɔ a he ha. (Rom. 11:33) Wa ma nyɛ maa su jamɛ a oti ɔ he ke waa kɛ wa ní tsɔɔmi ɔ da Ngmami ɔ nɔ be fɛɛ be. Kaa nɔ hyɛmi nɔ́ ɔ, e sɛ nɛ wa de nihi nɛ waa kɛ mɛ kaseɔ Baiblo ɔ nɔ́ nɛ wa maa pee ke wɔ nɛ wa ngɛ a si fɔfɔɛ ɔ mi ɔ. Mohu ɔ, e sa nɛ waa ye bua mɛ nɛ a susu Baiblo mi nɔ hyɛmi níhi a he, a le Yehowa susumi ngɛ níhi a he kɛ bɔ nɛ e nuɔ he ha. Ke wa pee jã a, lɔ ɔ ma ha nɛ a kɛ nɔ́ nɛ a kase ɔ ma tsu ní, ejakaa a suɔ nɛ a sa Yehowa hɛ mi, se pi wɔ. w22.01 11 ¶9-10

Mawu suɔ nɛ waa kɛ nihi nɛ hi si saminya, se enɛ ɔ biɔ babauu pe nɛ wa be nihi awi yee kɛkɛ. Ke Kristofo no ko suɔ nɛ e sa Mawu hɛ mi ɔ, e sa nɛ e suɔ e nyɛmi nɔmlɔ kaa bɔ nɛ e suɔ lɛ nitsɛ e he ɔ. Yesu tsɔɔ kaa fami nɛ ngɛ 3 Mose 19:18 ɔ he hia wawɛɛ nitsɛ. Be ko ɔ, Farasi no ko bi Yesu ke: “Mɛni ji kita nɛ pe kulaa ngɛ Mlaa a mi?” Yesu ha lɛ heto ke, “kita nɛ pe kulaa kɛ kekleekle nɔ́” ji nɛ wa maa suɔ Yehowa wa Mawu ɔ kɛ wa tsui tsuo, wa susuma tsuo kɛ wa juɛmi tsuo. Kɛkɛ nɛ Yesu tsɛ munyu nɛ ngɛ 3 Mose 19:18 ɔ se nɛ e de ke: “Enyɔne ɔ hu ngɛ kaa jã kɛ̃. Lɔ ɔ ji nɛ ɔ nɛ: ‘E sa nɛ o suɔ o nyɛmi kaa bɔ nɛ o suɔ o he ɔ.’” (Mat. 22:35-40) Blɔhi fuu ngɛ nɛ wa ma nyɛ maa gu nɔ kɛ tsɔɔ kaa wa suɔ ni kpahi. Blɔ kake ji kaa nɛ́ waa kɛ ga womi nɛ ngɛ 3 Mose 19:18 ɔ ma tsu ní. Lejɛ ɔ de ke: “Koo ye mo nitsɛ o he lue, nɛ koo nyɛ . . . nɔ ko.” w21.12 10-11 ¶11-13

Yesu kpa e nine mi nɛ e pɛtɛ Petro he nɛ e he e yi wami. Mo kai kaa benɛ Petro ngɛ Yesu hyɛe ɔ, e nyɛ nɛ e nyɛɛ nyu ɔ hɛ mi. Se benɛ Petro hyɛ kɔɔhiɔ nɛ ngɛ fiae ɔ, e ye gbeye wawɛɛ nɛ e bɔni mumi. (Mat. 14:24-31) Wa ma nyɛ maa kase nɔ́ ko ngɛ Petro nɔ hyɛmi nɔ́ ɔ mi. Benɛ e kple si ngɛ lɛ ɔ mi nɛ e ngɛ nyɛɛe ngɛ wo ɔ hɛ mi ɔ, e susuu we kaa kɔɔhiɔ nɛ ngɛ fiae ɔ maa wo e he gbeye nɛ e ma bɔni mumi. E suɔ nɛ e nyɛɛ nyu ɔ hɛ mi kɛ ya ná Yesu. Se akɛnɛ e kpa Yesu hyɛmi he je ɔ, kɔɔhiɔ nɛ ngɛ fiae ɔ wo e he gbeye. Mwɔnɛ ɔ, wa hia hemi kɛ yemi nɛ wa kɛ da wa nyagba amɛ a nya kaa bɔ nɛ Petro hu hia hemi kɛ yemi nɛ e kɛ maa nyɛɛ nyu ɔ hɛ mi ɔ. Ke wa ngɔɛ wa hɛ kɛ fɔ Yehowa kɛ e si womi ɔmɛ a nɔ ɔ, wa hemi kɛ yemi ɔ mi ma nyɛ ma gbɔjɔ, nɛ e maa pee kaa nɔ́ nɛ wa nyagba amɛ ha nɛ wa ngɛ mue. Ngɛ nyagba saisaa nɛ waa kɛ maa kpe ɔ mi ɔ, e sa nɛ waa ngɔ wa hɛ kɛ fɔ Yehowa kɛ he wami nɛ e ngɛ nɛ e kɛ ma nyɛ maa ye bua wɔ ɔ nɔ. w21.12 17-18 ¶6-7

Sɔlemi, ní kasemi kɛ yi mi tɛ puemi ji wa jami ɔ fã. Be nɛ waa kɛ sɔleɔ ɔ ji be nɛ waa kɛ wa hiɔwe Tsɛ ɔ nɛ e suɔ wɔ ɔ sɛɛɔ ní. Ke wa kase Baiblo ɔ, wa ma ná ‘Mawu nɛ e juɛmi mi kuɔ pe nɔ fɛɛ nɔ ɔ he nile.’ (Abɛ 2:1-5) Ke wa pue wa yi mi tɛ ɔ, wa susuɔ e su kpakpa amɛ a he, nɛ wa kaiɔ ní kpakpahi nɛ e suɔ nɛ e pee ha wɔ kɛ adesahi tsuo ɔ. Enɛ ɔ ji blɔ nɛ hi pe kulaa nɛ wa ma nyɛ maa gu nɔ nɛ waa kɛ wa be nɛ tsu ní saminya. Se mɛni ma nyɛ maa ye bua wɔ konɛ wa nyɛ nɛ waa pee jã? Ke e maa hi ɔ, moo hla he ko nɛ ngmlaa be. Mo susu Yesu nɔ hyɛmi nɔ́ ɔ he nɛ o hyɛ. Loko e maa je e sɔmɔmi ní tsumi ɔ sisi ngɛ zugba a nɔ ɔ, e ya ye ligbi 40 ngɛ nga a nɔ. (Luka 4:1, 2) Akɛnɛ lejɛ ɔ ngɛ dii he je ɔ, Yesu nyɛ nɛ e sɔle ha Yehowa nɛ e pue e yi mi tɛ ngɛ nɔ́ nɛ e Tsɛ ɔ suɔ nɛ e pee ɔ he. Enɛ ɔ ye bua Yesu nɛ e ná nɔ mi mami kaa e pee klaalo kɛ ha kahi nɛ e be kɛe nɛ e kɛ maa kpe ɔ. w22.01 27-28 ¶7-8

Asafo mi nɔkɔtɔma ko loo nyɛminyumu ko nɛ e nane pi si ma nyɛ maa wo wɔ ga ngɛ nɔ́ ko nɛ e sa nɛ waa bɔ he mɔde ɔ he. Ke nɔ ko nɛ e suɔ wa sane da Baiblo ɔ nɔ kɛ wo wɔ ga a, e sa nɛ wa je wa tsui mi kɛ bu tue. Ngɛ anɔkuale mi ɔ, e he ma nyɛ maa wa kaa wa maa bu ga womi tue nɛ wa kɛ tsu ní. Wa mi mi ma nyɛ ma fu ngɛ ga womi ko he po. Mɛni he je? Wa le kaa wa yi mluku, enɛ ɔ he ɔ, e he ma nyɛ maa wa ha wɔ kaa wa maa kplɛɛ ga womi nɔ ke nɔ ko na tɔ̃tɔ̃mi pɔtɛɛ ko ngɛ wa he nɛ e de wɔ. (Fiɛlɔ 7:9) Eko ɔ, wa maa ngɔ ní komɛ kɛ je wa nya. Wa ma nyɛ ma susu kaa nɔ nɛ ngɛ wɔ ga a woe ɔ hɛɛ susumi nɛ dɛ ngɛ wa he, aloo blɔ nɔ nɛ e gu kɛ wo wɔ ga a ma nyɛ ma ha nɛ wa mi mi nɛ fu. Wa ma nyɛ maa na tɔ̃tɔ̃mi komɛ ngɛ nɔ nɛ ngɛ wɔ ga a woe ɔ he nɛ wa ma susu ‘kaa e be he blɔ nɛ e woɔ wɔ ga. E sa nɛ e wo lɛ nitsɛ e he ga kekle!’ Ke wa bua jɔɛ ga womi ɔ he ɔ, waa kɛ be ní tsue loo wa ma bi nɔ kpa nɛ e wo wɔ ga ejakaa wa susu kaa jamɛ a nɔ ɔ ma de wɔ nɔ́ nɛ wa suɔ kaa waa nu. w22.02 8-9 ¶2-4

Anɛ waa kɛ si fɔfɔɛ ko ma nyɛ maa kpe ngɛ Mawu je ehe ɔ mi nɛ ma nyɛ maa ka hemi kɛ yemi nɛ wa ngɛ ngɛ blɔ nɔ nɛ Yehowa guɔ kɛ peeɔ e ní ɔ mi lo? Mo susu nɔ́ nɛ ya nɔ benɛ Israel bi ɔmɛ je nyɔguɛ tso mi ngɛ Egipt be bɔɔ se ɔ he nɛ o hyɛ. A kpɛti ni komɛ bɔni munyu huitihuiti tumi akɛnɛ a hɛ ja ngɛ niye ní nɛ a ye ngɛ lejɛ ɔ he ɔ he je. A bu mana nɛ Yehowa ha mɛ ɔ kaa niye ní gbogboe. (4 Mose 11:4-6; 21:5) Anɛ wɔ hu wa ma nyɛ maa pee nɔ́ ko kaa jã ngɛ amanehlu ngua a se lo? Wa li ní tsumi abɔ nɛ wa ma tsu kɛ dla zugba a nɔ loko bɔɔbɔɔbɔɔ ɔ, e maa pee paradeiso ekohu. E ma nyɛ maa ba kaa sisije ɔ, wa ma tsu ní tsumihi fuu, nɛ wa be níhi náe gbɔjɔɔ. Anɛ wa maa tu níhi nɛ Yehowa ma ha wɔ ngɛ jamɛ a be ɔ mi ɔ he munyu nyanyaanya lo? Nɔ́ kake nɛ wa le ji kaa ke wa hɛ sa níhi nɛ Yehowa haa wɔ amlɔ nɛ ɔ, wa hɛ maa sa níhi nɛ Yehowa ma ha wɔ jamɛ a be ɔ hulɔ. w22.02 7 ¶18-19

Ngɛ gbami nɛ ngɛ Zakaria 8:23 ɔ mi ɔ, munyu nɛ ji “Yuda no” kɛ “nyɛ” ɔ daa si kɛ ha nihi nɛ a pɔ mɛ nu nɛ a piɛ ngɛ zugba a nɔ ɔ. (Rom. 2:28, 29) ‘Nyumuhi nyɔngma nɛ a maa je ma slɔɔtohi a mi’ ɔ daa si kɛ ha jijɔ kpa amɛ. A maa “pɛtɛ” nihi nɛ a pɔ mɛ nu ɔ a tade ɔ he, loo a kɛ anɔkuale yemi maa mɛtɛ a he kɛ sɔmɔ Yehowa. Jã kɛ̃ nɛ bɔ nɛ pee nɛ gbami nɛ ngɛ Ezekiel 37:15-19, 24, 25 ɔ nɛ ba mi ɔ, Yehowa ha nihi nɛ a pɔ mɛ nu ɔ kɛ jijɔ kpa amɛ pee kake kɛ ngɛ ní tsue. Gbami ɔ tu tso enyɔ a he munyu. Nihi nɛ a ngɛ hɛ nɔ kami kaa a maa ya hiɔwe ɔ ngɛ kaa tso nɛ e daa si kɛ ha “Yuda nɔ yemi ɔ,” (nɛ ji wɛtso nɛ a hla Israel matsɛmɛ ɔmɛ kɛ je mi ɔ). Nihi nɛ a ngɛ hɛ nɔ kami kaa a maa hi zugba a nɔ ɔ ngɛ kaa tso nɛ e daa si kɛ ha ‘Israel loo Efraim nɔ yemi ɔ.’ Yehowa ma bla kuu enyɔ nɛ ɔmɛ nɛ e maa pee mɛ “tso kake.” Enɛ ɔ tsɔɔ kaa a kɛ kake peemi ma sɔmɔ ngɛ a Matsɛ kake nɛ ji Yesu Kristo sisi.​—Yoh. 10:16. w22.01 22 ¶9-10

Yesu tu munyu kɛ si nihi nɛ a keɔ ohiatsɛmɛ ní se a haa nɛ ni kpahi naa konɛ a je a yi ɔ. E ngɛ mi kaa kpakpa peemi nɛ ɔmɛ hi mohu lɛɛ se Yehowa bua jɔɛ he. (Mat. 6:2-4) Wa ma nyɛ maa pee nihi kpakpa ke wa fo we wɔ pɛ wa nɔ́ mi. Lɔ ɔ he ɔ, o ma nyɛ ma bi o he ke: ‘Anɛ i le níhi nɛ da nɛ sa kaa ma pee, nɛ i yaa nɔ nɛ i peeɔ jã lo? Mɛni yi mi tomi he je nɛ i peeɔ ní kpakpahi?’ Yehowa ji Mawu nɛ ngɛ he wami nɛ e kɛ peeɔ níhi, nɛ e mumi ɔ hu ji he wami nɛ e kɛ tsuɔ ní. (1 Mose 1:2) Lɔ ɔ mumi ɔ yiblii ɔ eko fɛɛ eko ma nyɛ maa wo wɔ he wami nɛ wa tsu nɔ́ nɛ Yehowa suɔ kaa wa tsu, nɛ e peeɔ jã hulɔ. Kaa nɔ hyɛmi nɔ́ ɔ, kaselɔ Yakobo ngma ke: ‘Hemi kɛ yemi nɛ ní tsumi piɛɛ we he ɔ gbo.’ (Yak. 2:26) Wa ma nyɛ ma de jã ngɛ Mawu mumi ɔ yiblii ɔ fã amɛ eko fɛɛ eko he. Be fɛɛ be nɛ wa ma je mumi ɔ yiblii ɔ kpo ɔ, e ji odase nɛ tsɔɔ kaa Mawu mumi ɔ ngɛ ní tsue ngɛ wa mi. w22.03 11-12 ¶14-16

Eko ɔ, wa ngɛ Yehowa sɔmɔe nɛ wa peeɔ nihi kpakpa, se bɔfo Petro wo Kristofohi he wami kaa a pee nɔ́ kake ko nɛ e he hia wawɛɛ. Loko Petro maa wo wɔ he wami kaa waa pee klɔuklɔu ngɛ je mi bami tsuo mi ɔ, e de ke: “Nyɛɛ pee nyɛ juɛmi klaalo kɛ ha ní tsumi.” (1 Pet. 1:13) Mɛni ji jamɛ a ní tsumi ɔ? Petro tsɔɔ kaa Kristo nyɛmimɛ nɛ a pɔ mɛ nu ɔ maa ‘jaje Nɔ nɛ e tsɛ nyɛ ɔ we agboje ɔ ngɛ he fɛɛ he.’ (1 Pet. 2:9) Ngɛ anɔkuale mi ɔ, Kristofohi tsuo nɛ a ngɛ mwɔnɛ ɔ ná he blɔ kaa a ma tsu ní tsumi nɛ e he hia nɛ e ngɛ nihi ye buae wawɛɛ pe ní tsumihi tsuo ɔ eko. E ji he blɔ ngua nɛ Mawu ni klɔuklɔu ɔmɛ ná kaa a maa fiɛɛ nɛ a tsɔɔ nihi ní kɛ kã be fɛɛ be! (Maak. 13:10) Ke wa bɔ mɔde wawɛɛ nɛ wa tsu ní tsumi nɛ ɔ, lɔ ɔ tsɔɔ kaa waa suɔ wa Mawu ɔ kɛ wa nyɛmimɛ. Nɛ e tsɔɔ hu kaa wa suɔ nɛ waa “pee klɔuklɔu” ngɛ je mi bami tsuo mi. w21.12 13 ¶18

Bɔfo Paulo ná juɛmi nɛ da ngɛ e nyɛmimɛ ɔmɛ a he be fɛɛ be. Paulo le kaa ke nɔ ko pee nɔ́ ko nɛ hí ɔ, lɔ ɔ tsɔɔ we kaa nɔmlɔ yayami ji lɛ. E suɔ e nyɛmimɛ ɔmɛ, nɛ e ngɔ e juɛmi kɛ ma a su kpakpa amɛ a nɔ. Ke e he wa ha e nyɛmimɛ ɔmɛ kaa a maa pee nɔ́ nɛ da a, e ngɔɔ lɛ kaa a hɛɛ juɛmi nɛ da, nɛ yemi kɛ buami pɛ nɛ a hia. Mo susu bɔ nɛ Paulo ye bua nyɛmimɛ yihi enyɔ nɛ a ngɛ Filipi asafo ɔ mi ɔ ha a he nɛ o hyɛ. (Filip. 4:1-3) Eko ɔ, Yodia kɛ Sintike kɛ a sibi kpa we gbi ngɛ níhi a he, nɛ lɔ ɔ ha nɛ huɛ bɔmi nɛ ngɛ a kpɛti ɔ puɛ. Paulo kã we a hɛ mi, mohu ɔ, e kɛ e juɛmi ma a su kpakpa amɛ a nɔ. Yihi anɔkualetsɛmɛ nɛ ɔmɛ kɛ jehahi babauu sɔmɔ Yehowa. Paulo le kaa Yehowa suɔ mɛ. Akɛnɛ Paulo hɛɛ nyɛmimɛ yi nɛ ɔmɛ a he juɛmi kpakpa he je ɔ, e wo mɛ he wami kaa a dla nyagba nɛ ngɛ a kpɛti ɔ. Akɛnɛ Paulo ngɔ e juɛmi kɛ ma su kpakpahi nɛ ni kpahi ngɛ ɔ nɔ he je ɔ, e ya nɔ nɛ e ná bua jɔmi, nɛ e ha nɛ huɛ bɔmi kpakpa hi e kɛ e huɛmɛ nɛ a ngɛ asafo ɔ mi ɔ a kpɛti. w22.03 30 ¶16-18

Tue mi jɔmi nɛ Yehowa haa wɔ ɔ haa nɛ wa tsui nɔɔ wa mi, nɛ wa nyɛɔ nɛ wa susuɔ níhi a he saminya. Jã nɛ e ba ngɛ nyɛmiyo ko nɛ a tsɛɛ lɛ ke Luz ɔ blɔ fa mi. E de ke: “Behi fuu ɔ, i nuɔ he kaa e piɛ mi pɛ. Be komɛ ɔ, lɔ ɔ haa nɛ i susuɔ kaa Yehowa sume mi. Se ke e ba jã a, i deɔ Yehowa bɔ nɛ i ngɛ he nue ha a oya nɔuu. Sɔlemi yeɔ bua mi nɛ i nyɛɔ kudɔɔ ye susumi.” Kaa bɔ nɛ wa na ngɛ nyɛmiyo ɔ níhi a si kpami ɔ mi ɔ, wa ma nyɛ ma ná tue mi jɔmi kɛ gu sɔlemi nɔ. (Filip. 4:6, 7) Wa le kaa Yehowa kɛ Yesu maa ye bua wɔ ke wa suɔlɔ ko gbo. A wo wɔ he wami kaa wa mi mi nɛ sã wɔ ngɛ nihi a he nɛ waa fiɛɛ kɛ ha mɛ, ejakaa Yehowa Mawu kɛ Yesu je su nɛ ɔ kpo. Wa le kaa Yehowa kɛ e Bi nɛ e suɔ lɛ wawɛɛ ɔ le wa gbɔjɔmihi nɛ a suɔ nɛ a ye bua wɔ nɛ wa fĩ si. Enɛ ɔ woɔ wɔ he wami wawɛɛ. Wa ngɛ blɔ hyɛe kaa Yehowa “ma tsu vo nyu fɛɛ vo nyu ngɛ [wa] hɛ mi.”​—Kpoj. 21:4. w22.01 15 ¶7; 19 ¶19-20

Yesu tu agbo enyɔ nɛ kɛ nɔ yaa blɔ enyɔ a nɔ ɔ he munyu. Blɔ nɛ “e bli” kɛ blɔ nɛ “e nɔ nyɛɛmi yee.” (Mat. 7:14) Blɔ etɛne ko be. E sa nɛ wɔ nitsɛmɛ waa hla blɔ ɔmɛ a kpɛti nɔ́ nɛ wa maa nyɛɛ nɔ. Enɛ ɔ ji yi mi kpɔ ko nɛ e he hia pe kulaa nɛ e sa nɛ waa mwɔ, ejakaa blɔ ɔ kake pɛ nɛ e kɛ nɔ yaa neneene wami mi. Nihi fuu ngɛ blɔ nɛ “e bli” ɔ nɔ nyɛɛ ejakaa e nɔ nyɛɛmi yi. Aywilɛho sane ji kaa nihi fuu hla kaa a maa nyɛɛ jamɛ a blɔ ɔ nɔ konɛ a pee a ní kaa bɔ nɛ nihi nɛ a ngɛ jamɛ a blɔ ɔ nɔ nyɛɛe ɔ peeɔ ɔ. A yɔse we kaa Satan Abosiami ji nɔ nɛ ngɛ mɔde bɔe kaa e ma ha nɛ nihi fuu nɛ a nyɛɛ jamɛ a blɔ ɔ nɔ, nɛ jamɛ a blɔ ɔ kɛ nɔ yaa gbenɔ mi. (1 Kor. 6:9, 10; 1 Yoh. 5:19) Blɔ nɛ “e bli” ɔ nɔ nyɛɛmi yi, se blɔ kpa a lɛɛ e “nɔ nyɛɛmi yee” nɛ Yesu de ke nihi bɔɔ pɛ lɛ a ngɛ nɔ nyɛɛe. Mɛni he je? Mo kadi kaa ngɛ kuku nɛ nyɛɛ se ɔ mi ɔ, Yesu bɔ e se nyɛɛli ɔmɛ kɔkɔ ngɛ lakpa gbali a he.​—Mat. 7:15. w21.12 22-23 ¶3-5