March

E ngɛ mi kaa je ehe ɔ bɛ lolo mohu lɛɛ, se mo susu ní komɛ kaa dodoehi, tsohi, lohwehi kɛ adesahi a he nɛ o hyɛ. Jinɛ be ko nɛ be ɔ, ní nɛ ɔmɛ be, se amlɔ nɛ ɔ wa naa ní nɛ ɔmɛ tsuo. Nɔ́ he je nɛ wa naa ní nɛ ɔmɛ ji kaa Yehowa lɛ bɔ mɛ. (1 Mose 1:​1, 26, 27) Jã kɛ̃ nɛ wa Mawu ɔ wo si kaa e ma ha nɛ je ehe ko maa ba, nɛ e maa ye si womi nɛ ɔ nɔ kokooko. Ngɛ je ehe ɔ mi ɔ, wa ma ná nɔmlɔ tso mi he wami kpakpa, nɛ wa maa hi si kɛ ya neneene. Wa ma nyɛ ma ná nɔ mi mami kaa je ehe ɔ maa ba ngɛ be nɛ Mawu to ɔ nya. (Yes. 65:17; Kpoj. 21:​3, 4) Kɛ yaa si be nɛ je ehe ɔ maa ba a, moo ngɔ he blɔ fɛɛ he blɔ nɛ o ma ná a kɛ pee níhi nɛ ma ha nɛ o hemi kɛ yemi ɔ mi maa wa. Moo na kpɔmi nɔ́ ɔ kaa nɔ́ ko nɛ he jua wa. Mo susu he wami nɛ Yehowa ngɛ ɔ he. Moo pee níhi nɛ ma ha nɛ huɛ bɔmi nɛ ngɛ o kɛ Yehowa nyɛ kpɛti ɔ mi maa wa. Ke o pee jã a, mo hu o maa piɛɛ “nihi nɛ kɛ gu hemi kɛ yemi kɛ tsui si tomi nɔ ɔ, a nine su si womi ɔmɛ a nɔ ɔ” a he.—Heb. 6:​11, 12. w23.04 31 ¶18-19

Yesu wo e yi nɔ nɛ e sɔle ngɛ ni ɔmɛ a hɛ mi. Yesu pee jã ejakaa e suɔ nɛ a le kaa Yehowa ji nɔ nɛ maa ye bua lɛ kɛ tle Lazaro si ɔ nɛ. Lɔ ɔ se ɔ, e kpa ngmlaa ke: “Lazaro, jee kpo!” (Yoh. 11:43) Nɛ e je kpo kɛ je yɔkɔ ɔ mi. Yesu pee nɔ́ nɛ nihi fuu susu kaa e be hie peemi ɔ. Sane nɛ ɔ haa nɛ hemi kɛ yemi nɛ wa ngɛ ngɛ gbogboehi a si tlemi ɔ mi ɔ mi waa. Ngɛ mɛni blɔ nɔ? Anɛ o kai si nɛ Yesu wo Maata a lo? E de lɛ ke: “O nyɛminyumu ɔ maa te si.” (Yoh. 11:23) Kaa bɔ nɛ e ji ngɛ Yehowa blɔ fa mi ɔ, Yesu hu suɔ nɛ e ye jamɛ a si womi ɔ nɔ, nɛ e ngɛ he wami ɔ nɛ e kɛ maa pee jã hulɔ. Ya nɛ Yesu fo ɔ ha nɛ wa na kaa e suɔ wawɛɛ kaa e maa po gbenɔ kɛ aywilɛho nɛ gbenɔ ngɔɔ kɛ baa a se. Lazaro si nɛ Yesu tle ɔ tsɔɔ kaa e ngɛ he wami nɛ e kɛ ma tle nihi nɛ a gbo ɔ si. Jehanɛ hu ɔ, mo kai nɔ́ nɛ Yesu de Maata ngɛ mwɔnɛ ɔ ngmami ɔ mi ɔ. Enɛ ɔ he ɔ, wa ma nyɛ ma ná nɔ mi mami nɛ mi wa kaa Mawu ma tle nihi nɛ a gbo ɔ si kɛ ba wami mi kokooko. w23.04 11-12 ¶15-16

Ke wa ba le Yehowa suɔmi nya ní saminya a, e he maa hia nɛ wa tsake níhi nɛ wa sɔleɔ ngɛ he ɔ. E sa nɛ e hi wa juɛmi mi kaa Yehowa hu ngɛ yi mi tomi komɛ, nɛ e ma tsu a he ní ngɛ be nɛ e to ɔ nya. Yi mi tomi nɛ ɔmɛ eko ji kaa e ma je níhi tsuo nɛ ngɛ wɔ haoe mwɔnɛ ɔ kɛ je kulaa. Nyagba nɛ ɔmɛ ekomɛ ji adebɔ mi oslaa, hiɔ, kɛ gbenɔ. Yehowa ma tsu e yi mi tomi nɛ ɔmɛ a he ní kɛ gu e Matsɛ Yemi ɔ nɔ. (Dan. 2:44; Kpoj. 21:​3, 4) Se amlɔ nɛ ɔ lɛɛ, Yehowa ngmɛ Satan blɔ nɛ e ngɛ je ɔ nɔ yee. (Yoh. 12:31; Kpoj. 12:9) Ke Yehowa tsu adesahi a nyagbahi a he ní kɛ ha mɛ amlɔ nɛ ɔ, e ma ha nɛ e pee kaa Satan ngɛ je ɔ nɔ yee saminya. Akɛnɛ wa ngɛ mlɛe nɛ Yehowa nɛ ye e si womi pɔtɛɛ komɛ a nɔ he je ɔ, eko ɔ, wa maa nu he kaa e ngmɛɛ wa he kɛ fɔ si. Se pi jã kulaa ji sane ɔ. Yehowa maa ye bua wɔ. w23.05 8 ¶4; 9-10 ¶7-8

Mɛni wa ma nyɛ maa pee kɛ ye bua ni kpahi konɛ a ná Kaimi ɔ he se? Kekleekle nɔ́ nɛ wa ma nyɛ maa pee ji kaa wa maa fɔ mɛ nine. Wa ma nyɛ maa fɔ nihi nɛ waa kɛ kpeɔ ngɛ fiɛɛmi mi be fɛɛ be ɔ nine. Jehanɛ hu ɔ, wa ma nyɛ maa ngma nihi nɛ wa le mɛ ɔ a biɛ kɛ fɔ si konɛ waa fɔ mɛ nine. Nimli nɛ ɔmɛ ma nyɛ maa pee wa weku li, nihi nɛ waa kɛ mɛ tsuɔ ní, kɛ nihi nɛ waa kɛ mɛ yaa sukuu kɛ ni kpahi. Ke wa be nine fɔmi womi ɔ nɛ a print ɔ fuu po ɔ, wa ma nyɛ maa ngɔ womi ɔ link ɔ kɛ mane mɛ. Ngɛ anɔkuale mi ɔ, eko ɔ, a kpɛti nihi fuu maa kplɛɛ nine fɔmi ɔ nɔ nɛ a maa ba Kaimi ɔ. (Fiɛɛ. 11:6) O hɛ nɛ hi nɔ kaa nihi nɛ wa fɔɔ mɛ nine ɔ ma nyɛ ma bi wɔ sane komɛ, titli ke a bɛ asafo mi kpe gblee. E sa nɛ waa bɔ mɔde wawɛɛ nɛ wa susu sanehi nɛ a ma nyɛ ma bi wɔ ɔ he, nɛ wa dla wa he kaa wa ma ha mɛ heto. Ke a gbe Kaimi ɔ nya hu ɔ, ni hehi nɛ a ba a ma nyɛ ma bi wɔ sane kpa komɛ. Ngɛ Kaimi be ɔ mi ɔ, e sa nɛ waa pee nɔ́ fɛɛ nɔ́ nɛ wa ma nyɛ kɛ ye bua nihi nɛ a ngɛ “su kpakpa” a konɛ a ná Kaimi ɔ he se kɛ pi si.—Níts. 13:48. w24.01 12 ¶13, 15; 13 ¶16

Baiblo ɔ tu nihi kpaanyɔ nɛ a gbo nɛ a tle mɛ si ngɛ zugba a nɔ ɔ a he munyu. Moo kase sane nɛ ɔmɛ saminya. Ke o ngɛ jã pee ɔ, mo hyɛ kaa o ma nyɛ maa kase nɔ́ ko ngɛ a sane ɔ mi lo. Mo susu bɔ nɛ a sane ɔ maa nɔ mi kaa Mawu suɔ nɛ e tle nihi nɛ a gbo ɔ si kɛ ba wami mi ha, kɛ bɔ nɛ e ngɛ he wami nɛ e kɛ maa pee jã a he. Mo susu Yesu si tlemi ɔ hu he saminya, ejakaa e nɔ́ ɔ he hia pe kulaa. Mo kai kaa benɛ a tle Yesu si ɔ, nihi lafahi abɔ na lɛ nɛ a ye he odase, nɛ enɛ ɔ woɔ wa hemi kɛ yemi ɔ mi he wami wawɛɛ. (1 Kor. 15:​3-6, 20-22) Wa bua jɔ wawɛɛ kaa Yehowa ha wɔ gbogboehi a si tlemi he hɛ kɛ nɔ fɔmi ɔ. Wa ngɛ nɔ mi mami kaa si womi nɛ ɔ maa ba mi kokooko, ejakaa Yehowa suɔ nɛ e pee jã, nɛ e ngɛ he wami ɔ nɛ e kɛ ma tle nihi nɛ a gbo ɔ si kɛ ba wami mi ekohu. Nyɛ ha nɛ waa fia wa pɛɛ si kaa wa ma ha nɛ hemi kɛ yemi nɛ wa ngɛ ngɛ gbogboehi a si tlemi ɔ mi ɔ mi nɛ wa daa. Ke wa pee jã a, wa maa hɛ kɛ su Mawu he wawɛɛ. Ngɛ blɔ ko nɔ ɔ, e ngɛ wa kpɛti nɔ fɛɛ nɔ dee ke, ‘O suɔli ɔmɛ maa te si!’—Yoh. 11:23. w23.04 8 ¶2; 12 ¶17; 13 ¶20

Tsakpa ngɛ humi peemi kɛ he si bami a kpɛti wawɛɛ. Nɔ nɛ peeɔ e he humi ɔ nɛ e he kaa e he hia pe ni kpahi, nɛ e le níhi nɛ e ma nyɛ maa pee kɛ níhi nɛ e be nyɛe maa pee. Nɔ nɛ baa e he si ɔ buɔ ni kpahi, nɛ e naa mɛ kaa a nɔ kuɔ pe lɛ. (Filip. 2:3) Ke wa ma de ɔ, nɔ nɛ peeɔ e he humi ɔ baa e he si hulɔ. Gideon ba e he si nɛ e pee e he humi. Benɛ Yehowa bɔfo ko de Gideon kaa a hla lɛ kaa e kpɔ̃ Israel bi ɔmɛ kɛ je Media bi nɛ a he wa a dɛ mi ɔ, e kɛ he si bami de ke: “Weku nɛ i je mi ɔ ji weku nyafii pe kulaa ngɛ Manase wɛtso ɔ mi. Tsaatsɛ we ɔ mi hu imi ji jokuɛyo pe kulaa.” (Many. 6:15) E nu he kaa e he sui kɛ ha ní tsumi nɛ ɔ, se Yehowa le kaa e ma nyɛ ma tsu. Yehowa ye bua Gideon nɛ e nyɛ nɛ e tsu ní tsumi ɔ kɛ gbe nya. Asafo mi nikɔtɔmahi bɔɔ mɔde kaa a maa pee a he humi, nɛ a ba a he si ngɛ níhi tsuo a mi. (Níts. 20:​18, 19) A fĩɛ ngɛ níhi nɛ a tsu momo loo níhi a ma nyɛ ma tsu ɔ he, nɛ a susuu we kaa a he be se nami akɛnɛ a tɔ̃ɔ be komɛ ɔ he je. w23.06 3 ¶4-5

Ke e hi kulaa a, jeha 1,000 kɛ se maa be loko a maa ywia Satan yi. (Kpoj. 20:​7-10) Se loko jamɛ a be ɔ maa su ɔ, Baiblo ɔ ha nɛ wa le kaa ní komɛ nɛ sa kadimi maa ya nɔ. Kekleekle ɔ, je ma amɛ maa hi dee ke “tue mi jɔmi kɛ slɔkee si himi ba!” (1 Tɛs. 5:​2, 3) Ke je ma amɛ ba tua lakpa jamihi tsuo ɔ, “si kake too ɔ,” amanehlu ngua a maa je sisi. (Kpoj. 17:16) Lɔ ɔ se ɔ, Yesu maa kojo adesahi, nɛ e ma je jijɔ ɔmɛ ngɛ apletsi ɔmɛ a kpɛti. (Mat. 25:​31-33, 46) Jamɛ a be ɔ mi ɔ, loloolo ɔ, Satan maa ya nɔ maa te si kɛ wo Yehowa. Akɛnɛ Satan sume Mawu we bi he je ɔ, e ma ha nɛ Gog nɛ je Magog ɔ ma tua Yehowa we bi nɛ a jaa lɛ ngɛ anɔkuale mi ɔ. (Eze. 38:​2, 10, 11) Be ko maa su ngɛ amanehlu ngua a mi nɛ a ma bua nihi nɛ a pɔ mɛ nu nɛ a piɛ ngɛ zugba a nɔ ɔ a nya kɛ ho hiɔwe ya, nɛ a ma ya piɛɛ Kristo kɛ bɔfo ɔmɛ a he kɛ hwu Harmagedon ta a ngɛ amanehlu ngua a nyagbe. (Mat. 24:31; Kpoj. 16:​14, 16) Lɔ ɔ se ɔ, Kristo Jeha Akpe Nɔ Yemi ɔ maa je sisi ngɛ zugba a nɔ.—Kpoj. 20:6. w23.10 20-21 ¶9-10

Mwɔnɛ ɔ, Yehowa sɔmɔli fuu ngɛ mahi nɛ a tsi wa ní tsumi ɔ nya ngɛ mi ɔ mi. E ngɛ mi kaa a jeɔ bumi nɛ mi kuɔ kpo kɛ tsɔɔ nɔ yeli ɔmɛ mohu lɛɛ, se kaa bɔ nɛ Obadia pee ɔ, wa nyɛmimɛ nɛ ɔmɛ nɛ wa suɔ mɛ ɔ yaa nɔ nɛ a sɔmɔɔ Yehowa. (Mat. 22:21) A buɔ Mawu tue mohu pe adesa. Jã nɛ a peeɔ ɔ tsɔɔ kaa a yeɔ Mawu gbeye. (Níts. 5:29) A yaa nɔ nɛ a fiɛɛɔ sane kpakpa a nɛ a kpeɔ ngɛ laami mi kɛ sɔmɔɔ Yehowa. (Mat. 10:​16, 28) A bɔɔ mɔde kaa a ma ha nɛ a nyɛmimɛ ɔmɛ a nine nɛ su níhi nɛ a hia a nɔ konɛ a he nɛ wa ngɛ mumi mi. Mo susu nyɛminyumu Henri nɔ hyɛmi nɔ́ ɔ he nɛ o hyɛ. E hi Afrika ngɛ ma ko nɛ a tsi wa ní tsumi ɔ nya ngɛ mi ɔ mi. Benɛ a ngɛ nya tsimi ɔ sisi ɔ, Henri ngɔ e he kɛ ha kaa e ma gba asafo ɔ womihi kɛ ha e nyɛmimɛ Odasefo ɔmɛ. E ngma ke: “I gboɔ zo wawɛɛ nitsɛ. . . . Yehowa ji nɔ́ nɛ ye bua mi nɛ i ná kã kɛ tsu ní tsumi nɛ ɔ.” Anɛ mo hu o ma nyɛ maa pee kã kaa Henri lo? Ee, ke o yeɔ Yehowa gbeye ngɛ blɔ nɛ da nɔ ɔ, o ma nyɛ. w23.06 16 ¶9, 11

Benɛ Adam kɛ Hawa gbo Mawu nɔ tue ɔ, e pee kaa nɔ́ nɛ Satan ha nɛ yi mi nɛ Mawu to kaa adesahi nɛ a ye mluku nɛ a buɔ lɛ tue ɔ ma hyi zugba a nɔ tɔ ɔ be nyɛe maa ba mi. Eko ɔ, Satan susu kaa Yehowa be nyɛe maa ye e si womi ɔ nɔ. Eko ɔ, e susu kaa Mawu ma kpata Adam kɛ Hawa a hɛ mi ngɛ nɔ́ nɛ a pee ɔ he je, konɛ e bɔ nyumu kɛ yo kpa nɛ a ye mluku bɔ nɛ pee nɛ yi mi nɛ e to kɛ ha adesahi ɔ nɛ ba mi. Se kaa Mawu pee jã a, jinɛ Abosiami ko po e nya kaa e ji lakpatsɛ. Mɛni he je? Ejakaa 1 Mose 1:28 ɔ ha nɛ wa na kaa Yehowa wo Adam kɛ Hawa si kaa e ma ha nɛ mɛ nitsɛmɛ a nina ma hyi zugba a nɔ tɔ. Aloo eko ɔ, Satan ma susu kaa Yehowa maa ngmɛɛ Adam kɛ Hawa he konɛ a fɔ bimɛ nɛ a yi mluku, nɛ a bimɛ ɔmɛ be nyɛe maa ye mluku gblee. (Fiɛɛ. 7:20; Rom. 3:23) Ke e ba jã a, e ngɛ heii kaa Abosiami maa po Yehowa nya kaa e nyɛ we nɛ e ye e si womi ɔmɛ a nɔ. Mɛni he je? Ejakaa Yehowa yi mi tomi ji kaa Adam kɛ Hawa a sisi bimɛ nɛ a ye mluku nɛ a buɔ lɛ tue ɔ nɛ a hyi Paradeiso zugba a nɔ tɔ. Lɔ ɔ he ɔ, ke níhi ya nɔ kikɛ nɛ ɔ, lɔ ɔ be hae nɛ yi mi tomi nɛ ɔ nɛ ba mi. w23.11 6 ¶15-16

Yehowa haa wɔ blɔ tsɔɔmihi nɛ ngɛ heii kɛ guɔ e Munyu ɔ kɛ e we asafo ɔ nɔ. E sɛ nɛ waa ngɔ nɔ́ ko kɛ piɛɛ blɔ tsɔɔmi nɛ e kɛ haa wɔ ɔ he. (Abɛ 3:​5-7) Enɛ ɔ he ɔ, e sɛ kaa waa be níhi nɛ a ngma ngɛ Baiblo ɔ mi ɔ he loo waa wo mlaa ngɛ níhi nɛ e sa kaa wa nyɛmimɛ ɔmɛ nɛ a mwɔ a yi mi kpɔ ngɛ he ɔ he. Satan guɔ “yaka sisimi” kɛ “je ɔ mi sisije níhi” a nɔ konɛ e kɛ puɛ kake peemi nɛ ngɛ nihi a kpɛti ɔ. (Kol. 2:8) Kaa nɔ hyɛmi nɔ́ ɔ, ngɛ Kristofohi nɛ a hi si ngɛ kaseli ɔmɛ a be ɔ mi ɔ, Satan ngɔ je mi nile, Yuda bi a tsɔɔmihi nɛ dɛ Ngmami ɔ nɔ, kɛ tsɔɔmi nɛ ji kaa e sa nɛ Kristofohi nɛ a ye Mose Mlaa a nɔ ɔ kɛ tsu ní. Ní nɛ ɔmɛ nɛ Satan kɛ tsu ní ɔ sisi nihi nɛ e je a juɛmi kɛ je Yehowa, nɛ ji nɔ nɛ haa nɔ nile nitsɛnitsɛ ɔ nɔ. Mwɔnɛ ɔ, Satan guɔ tiivi, radio, kɛ Intanɛti ɔ nɔ kɛ gbɛɛ lakpa munyuhi kɛ fĩaa. Jehanɛ hu ɔ, e guɔ ma hɛ mi nyɛɛli a nɔ kɛ gbɛɛ amaniɛ bɔmihi nɛ a pi anɔkuale ɔ kɛ fĩaa. w23.07 16 ¶11-12

E ngɛ heii kaa blɔ nɔ nɛ Yehowa gu kɛ tsu Satan kɛ Adam kɛ Hawa atuã tsɔmi ɔ he ní ɔ ha nɛ Satan nya kpɛ e he wawɛɛ. Yehowa ngmɛ Adam kɛ Hawa blɔ nɛ a fɔ bimɛ, nɛ kɛ gu blɔ nɛ ɔ nɔ ɔ, Yehowa munyu nɛ e tu ɔ ba mi. Enɛ ɔ ha nɛ wa na kaa Yehowa ji anɔkualetsɛ. Jehanɛ hu ɔ, enɛ ɔ tsɔɔ kaa ke Yehowa de nɔ́ ko ɔ, e maa pee, nɛ nɔ́ ko nɔ́ ko be nyɛe maa tsi e nya. Yehowa bɔ mɔde wawɛɛ kaa e ma tsu e yi mi tomi ɔ he ní. Ngɛ mɛni blɔ nɔ? E ngɔ “nina” ko kɛ ha, konɛ e ba kpɔ̃ Adam kɛ Hawa a sisi bimɛ nɛ a buɔ Yehowa tue ɔ. (1 Mose 3:15; 22:18) E ngɛ heii kaa kpɔmi nɔ́ ɔ he blɔ nya nɛ Yehowa to ɔ pee Satan nyakpɛ wawɛɛ! Mɛni he je? Ejakaa kpɔmi nɔ́ ɔ he blɔ nya nɛ Yehowa to ɔ tsɔɔ kaa e ngɛ suɔmi wawɛɛ nɛ e fo we lɛ pɛ e nɔ́ mi. (Mat. 20:28; Yoh. 3:16) Se Satan lɛɛ e foɔ lɛ pɛ e nɔ́ mi. Mɛni maa je kpɔmi nɔ́ ɔ mi kɛ ba? Ngɛ Jeha Akpe Nɔ Yemi ɔ nyagbe ɔ, Adam kɛ Hawa a sisi bimɛ nɛ a buɔ Yehowa tue ɔ maa hi zugba a nɔ ngɛ paradeiso ɔ mi kaa bɔ nɛ Yehowa to kɛ je sisije ɔ. w23.11 6 ¶17

Wa buɔ Yehowa mlaa nɛ tsɔɔ kaa wami kɛ muɔ ngɛ klɔuklɔu ɔ. Mɛni he je? Ejakaa Yehowa tsɔɔ kaa muɔ daa si kɛ ha wami, nɛ e ji nike ní nɛ he jua wa nɛ je e ngɔ. (3 Mose 17:14) Kekleekle be nɛ Yehowa de adesahi kaa a ma nyɛ maa ye lo ɔ, e fã mɛ kaa a ko ye muɔ nɛ ngɛ mi ɔ. (1 Mose 9:4) Yehowa ti mlaa nɛ ɔ nɔuu mi kɛ ha Israel bi ɔmɛ ngɛ Mose Mlaa a mi. (3 Mose 17:10) Jehanɛ hu ɔ, Yehowa gu blɔ tsɔɔmi ajla toli nɛ a hi si ngɛ kaseli ɔmɛ a be ɔ mi ɔ a nɔ kɛ fã Kristofohi tsuo kaa ‘a ya nɔ nɛ a yu a he ngɛ muɔ he.’ (Níts. 15:​28, 29) Ke wa ngɛ yi mi kpɔ mwɔe ngɛ hiɔ tsami he ɔ, waa kɛ mlaa nɛ ɔ tsuɔ ní pɛpɛɛpɛ. Waa kɛ Yehowa mlaahi nɛ kɔɔ ajuama bɔmi he ɔ hu tsuɔ ní sisiisi. Bɔfo Paulo tsɔɔ kaa waa “gbe” wa nɔmlɔ tso ɔ he ní ɔmɛ. Enɛ ɔ tsɔɔ kaa e sa kaa waa bɔ mɔde wawɛɛ nɛ waa hwu kɛ si akɔnɔ yayahi. Lɔ ɔ he ɔ, wa pee we níhi nɛ ma nyɛ ma ha nɛ waa kɛ wa he nɛ wo ajuama bɔmi mi.—Kol. 3:5; Hiob 31:1. w23.07 15 ¶5-6

Eko ɔ, akɛnɛ Samson suɔ Delila wawɛɛ he je ɔ, e nyɛ we nɛ e yɔse nɔ́ nɛ e ngɛ hlae nɛ e pee ɔ. Se bɔ fɛɛ bɔ nɛ e ji ɔ, Delila nyɛ Samson nɔ si abɔ kaa e tsɔɔ lɛ nɔ́ he je nɛ e ngɛ he wami wawɛɛ ɔ. Nɛ nyagbenyagbe ɔ, Samson tsɔɔ lɛ nɔ́ he je. Aywilɛho sane ji kaa nɔ́ nɛ Samson pee ɔ ha nɛ e he wami ɔ je e dɛ, nɛ Yehowa kplɛɛ we e nɔ hu kɛ ya si be ko. (Many. 16:​16-20) Samson kɛ haomi nguahi kpe, ejakaa e he Delila mohu ye pe Yehowa. Filistibi ɔmɛ nu Samson nɛ a ta e hɛ ngmɛ. Lɔ ɔ se ɔ, a wo lɛ tsu ngɛ Gaza, nɛ a ha nɛ e wɛɛ ngma ngɛ he nɛ a wo lɛ tsu ngɛ ɔ. Lɔ ɔ se ɔ, ligbi ko nɛ Filistibi ɔmɛ bua a he nya nɛ a ngɛ gbijlɔ ko yee ɔ, a ya ngɔ Samson kɛ ba lejɛ ɔ nɛ a ye e he fɛu. Filistibi ɔmɛ sã afɔle ngua ko kɛ ha a lakpa mawu nɛ ji Dagon ɔ, ejakaa a susu kaa lɛ nɛ e ye bua mɛ nɛ a nine su Samson nɔ. A ya je Samson ngɛ tsu womi he ɔ kɛ ba, ejakaa a suɔ nɛ e ‘ba wo a nya muɔ bɔɔ,’ nɛ́ a ye e he fɛu.—Many. 16:​21-25. w23.09 5-6 ¶13-14

Eko ɔ, nɔ ko nɛ o kɛ lɛ yaa sukuu loo nɔ ko nɛ o kɛ lɛ tsuɔ ní ɔ bi mo nɔ́ he je nɛ o kɛ Baiblo mlaahi tsuɔ ní. Ke e ba jã a, wa bɔɔ mɔde kaa wa ma fã wa hemi kɛ yemi ɔ he, nɛ́ ngɛ jamɛ a be ɔ mi nɔuu ɔ, wa jeɔ bumi kpo kɛ tsɔɔ nɔ ɔ. (1 Pet. 3:15) Enɛ ɔ he ɔ, e sɛ nɛ waa na sane bimi ɔ kaa nɔ́ ko nɛ e kɛ ngɛ wa he fɛu yee, mohu ɔ, e sa nɛ wa ha nɛ e sane bimi ɔ nɛ ye bua wɔ konɛ waa le nɔ́ nɛ he hia lɛ. Ke nɔ ko bi wɔ sane ko ɔ, e hɛɛ juɛmi nɛ da jio, e hɛɛ we juɛmi nɛ da jio, e sa nɛ waa bɔ mɔde nɛ waa je mi mi jɔmi mi kɛ ha lɛ heto. Eko ɔ, bɔ nɛ wa ma plɛ kɛ ha lɛ heto ha a maa ye bua lɛ konɛ e susu nɔ́ nɛ e de ɔ he ekohu. Kaa nɔ hyɛmi nɔ́ ɔ, ngɔɔ lɛ kaa nɔ ko nɛ o kɛ lɛ tsuɔ ní ɔ bi mo nɔ́ he je nɛ wa yi fɔmi ligbi. Anɛ eko ɔ, e ngɛ susue kaa wa be he blɔ nɛ wa jeɔ wa hɛja lo? Ke e ba jã a, kekleekle ɔ, wa ma nyɛ ma je nɔ ɔ yi kaa e susuɔ ni kpahi a he. Eko ɔ, jã nɛ wa maa pee ɔ ma nyɛ ma ha nɛ wa ná he blɔ nɛ waa kɛ lɛ nɛ sɛɛ ní faa kɛ kɔ nɔ́ nɛ Baiblo ɔ de ngɛ fɔmi ligbi yemi he ɔ he. w23.09 17 ¶10-11

E ji he blɔ ngua nɛ́ wa ná kaa waa kɛ wa be tsuo nɛ piɛɛ ɔ maa ye nihi nɛ a ngɛ je ɔ mi tsuo odase. Bɔfo Petro wo wɔ he wami kaa wa ‘juɛmi nɛ hi’ Yehowa ligbi ɔ bami ɔ nɔ wawɛɛ. (2 Pet. 3:​11, 12) Mɛni blɔ nɔ wa maa gu kɛ pee jã? E sa nɛ daa ligbi ɔ, waa bɔ mɔde kaa wa ma pue wa yi mi tɛ ngɛ jɔɔmihi nɛ wa nine maa su nɔ ngɛ je ehe ɔ mi ɔ he. Moo po he foni kaa o ngɛ kɔɔhiɔ kpakpa ko mue, o ngɛ niye ní kpakpa ko yee, nɛ o ngɛ o suɔli nɛ a gbo nɛ a tle mɛ si ɔ a he nyae, nɛ o ngɛ nihi nɛ a hi si blema nɛ a gbo loko Baiblo gbamihi ba mi ɔ ní tsɔɔe. Ke o pee jã a, lɔ ɔ ma ha nɛ o maa ya nɔ maa hyɛ Yehowa ligbi ɔ blɔ, nɛ e maa ye bua mo nɛ o ná nɔ mi mami kaa e be kɛe nɛ nyagbe ɔ maa ba. Akɛnɛ wa ‘le níhi nɛ maa ba momo’ kɛ kɔ hwɔɔ se he he je ɔ, wa sume nɛ lakpa tsɔɔli nɛ a sisi wɔ nɛ waa “tla blɔ.” w23.09 27 ¶5-6

Nihewi kɛ yihewi “nɛ a bui a fɔli” ɔ bɔle nihewi kɛ yihewi nɛ a ngɛ Yehowa sɔmɔe ɔ. (2 Tim. 3:​1, 2) Mɛni he je nɛ nihi fuu bui a fɔli ɔ? A ti ni komɛ susu kaa a fɔli ɔmɛ ji osatotsɛmɛ. Fɔli komɛ hyɛɔ blɔ kaa a bimɛ nɛ a pee nɔ́ nɛ mɛɛ a nyɛ we nɛ a pee ɔ. Ni kpahi hu naa ga womihi nɛ a fɔli ɔmɛ kɛ haa mɛ ɔ kaa a be be aloo a he hia we, nɛ a ngɛ kpɛii tsɔ. Ke o ji niheyo loo yiheyo ɔ, anɛ jã nɛ o nuɔ he lo? E he wa ha nihi fuu kaa a maa bu fami nɛ ngɛ mwɔnɛ ɔ ngmami ɔ mi ɔ tue. Mɛni maa ye bua mo konɛ o nyɛ nɛ o pee jã? O ma nyɛ maa kase tue bumi he nɔ hyɛmi nɔ́ nɛ se be nɛ Yesu pee ɔ. (1 Pet. 2:​21-24) Yesu ji nɔ ko nɛ e ye mluku, se e fɔli ɔmɛ lɛɛ a yi mluku. Se kɛ̃ ɔ, ke Yesu fɔli ɔmɛ tɔ̃ tɔmi ko loo a nui lɛ sisi be komɛ po ɔ, e buɔ mɛ be fɛɛ be.—2 Mose 20:12. w23.10 7 ¶4-5

Bɔfo Paulo tsɔɔ nya kaa afɔlehi nɛ a sãa ngɛ Mlaa a nya a be nyɛe ma je a he yayami ɔmɛ kɛ je. Enɛ ɔ he je nɛ ‘a po kita momo ɔ mi’ ɔ nɛ. Lɔ ɔ he ɔ, Paulo tsɔɔ mɛ anɔkualehi nɛ a mi kuɔ ɔ ekomɛ. E kai e nyɛmimɛ Kristofo ɔmɛ kaa kɛ gu Yesu kpɔmi afɔle sami ɔ nɔ ɔ, a ma nyɛ ma ná “hɛ kɛ nɔ fɔmi nɛ hi pe kekle nɔ́ ɔ,” nɛ lɔ ɔ ma nyɛ ma ha nɛ a ‘hɛ kɛ su Mawu he.’ (Heb. 7: 19) Paulo ha nɛ e nyɛmimɛ Hebri bi nɛ a ji Kristofohi ɔ na kaa bɔ nɛ a jaa Yehowa ha a nɔ kuɔ kulaa pe bɔ nɛ a ja lɛ blema a. Blɔ nɔ nɛ Yuda bi ɔmɛ gu kɛ ja Yehowa a ji “níhi nɛ maa ba amɛ a nini, se nɔ́ ɔ nitsɛnitsɛ ɔ ji Kristo ɔ nɛ.” (Kol. 2:17) Nini ji nɔ́ ko he foni kɛkɛ, se pi nɔ́ ɔ nitsɛ. Jã kɛ̃ nɛ bɔ nɛ Yuda bi ɔmɛ ja Mawu blema a, ji jami nɛ Kristofohi ma ja Mawu ngɛ anɔkuale mi hwɔɔ se ɔ he nini kɛkɛ. E sa nɛ waa nu blɔ nya nɛ Yehowa to konɛ e nyɛ nɛ e ngɔ wa tɔmihi kɛ ke wɔ ɔ sisi konɛ wa nyɛ nɛ wa ja lɛ bɔ nɛ e suɔ. w23.10 25 ¶4-5

Daniel yi 11 ɔ tu matsɛmɛ enyɔ loo nɔ yemi enyɔ komɛ nɛ a maa te si kɛ wo a sibi ɔ he munyu. Ke wa ngɔ gbami nɛ ɔ kɛ to ekpahi nɛ a ngɛ Baiblo ɔ mi ɔ he ɔ, wa ma nyɛ ma de ke “omleyi je matsɛ ɔ” ji Russia kɛ ma komɛ nɛ a fĩ e se ɔ, nɛ “woyi je matsɛ ɔ” ji Anglo-Amerika nɔ yemi ɔ nɛ. Mwɔnɛ ɔ, a waa Mawu we bi nɛ a ngɛ “omleyi je matsɛ ɔ” nɔ yemi ɔ sisi ɔ yi mi wawɛɛ. A kongoɔ Odasefohi komɛ nɛ a woɔ mɛ tsu ngɛ a hemi kɛ yemi ɔ he je. E ngɛ mi kaa “omleyi je matsɛ ɔ” waa wa nyɛmimɛ ɔmɛ yi mi wawɛɛ mohu lɛɛ, se lɔ ɔ wui a he gbeye, mohu ɔ, lɔ ɔ haa nɛ hemi kɛ yemi nɛ a ngɛ ngɛ Yehowa kɛ e Munyu ɔ mi ɔ mi waa. Mɛni he je? Ejakaa wa nyɛmimɛ ɔmɛ le kaa yi mi nɛ a ngɛ mɛ wae ɔ ha nɛ gbami ko nɛ ngɛ Daniel womi ɔ mi ɔ ngɛ mi bae. (Dan. 11:41) Enɛ ɔ nɛ wa le ɔ hu ma nyɛ maa ye bua wɔ konɛ wa ná hɛ kɛ nɔ fɔmi nɛ mi wa, nɛ waa ya nɔ nɛ waa ye Yehowa anɔkuale. w23.08 11 ¶15-16

Akɛnɛ Yehowa suɔ wɔ he je ɔ, e le bɔ nɛ wa nuɔ he ha, nɛ e suɔ nɛ e po wa he piɛ. Ke wa ngɛ nɔ́ nae ɔ, e dɔɔ lɛ wawɛɛ. Enɛ ɔ he ɔ, wa ma nyɛ ma ná nɔ mi mami kaa ke wa sɔle ha Yehowa kaa e ‘baa wa yi kaa bɔ nɛ nɔ baa lɛ nitsɛ e hɛngmɛ yi ɔ,’ e maa bu wɔ tue. (La 17:8) Hɛngmɛ ji nɔmlɔ tso ɔ he nɔ́ ko nɛ he hia saminya. Enɛ ɔ he ɔ, ke Yehowa ngɔ wɔ kɛ to e hɛngmɛ he ɔ, e ngɛ kaa nɔ́ nɛ e ngɛ wɔ dee ke, ‘Nɔ nɛ maa ye nyɛ awi ɔ, ye imi Yehowa awi.’ Yehowa suɔ nɛ wa ná nɔ mi mami kaa e suɔ wa ti nɔ fɛɛ nɔ. Se e le kaa ngɛ ní komɛ nɛ ya nɔ ngɛ wa si himi mi he je ɔ, eko ɔ, wa ma susu kaa e be nyɛe maa suɔ wɔ. Aloo eko ɔ, waa kɛ si fɔfɔɛ ko ngɛ kpee amlɔ nɛ ɔ, nɛ́ ma nyɛ ma ha nɛ e he nɛ wa ha wɔ kaa wa ma ná nɔ mi mami kaa Yehowa suɔ wɔ. Mɛni maa ye bua wɔ konɛ nɔ mi mami nɛ wa ngɛ ngɛ Yehowa mi ɔ mi nɛ wa? E he hia nɛ waa le bɔ nɛ Yehowa jeɔ suɔmi kpo kɛ tsɔɔ Yesu, nihi nɛ a pɔ mɛ nu ɔ, kɛ wɔ tsuo ha. w24.01 27 ¶6-7

Ezra na bɔ nɛ Yehowa ye bua e we bi ngɛ haomi behi a mi ha. Ngɛ jeha 484 loko a fɔ Kristo ɔ, eko ɔ, Ezra ngɛ Babilon benɛ Matsɛ Ahasuerus fã kaa a kpata Yuda bi ɔmɛ tsuo nɛ a ngɛ Persia a hɛ mi ɔ. (Est. 3:​7, 13-15) Enɛ ɔ he ɔ, Ezra wami ya je oslaa mi wawɛɛ! Benɛ a nu sane nɛ ɔ, Yuda bi tsuo nɛ a ngɛ “kpokpa fɛɛ kpokpa nɔ” ɔ, ha hwɔ nɛ a ye aywilɛho wawɛɛ. Eko ɔ, a sɔle kɛ bi Yehowa blɔ tsɔɔmi po. (Est. 4:3) Moo po he foni nɛ o hyɛ bɔ nɛ Ezra kɛ e nyɛmimɛ Yuda bi ɔmɛ a bua maa jɔ wawɛɛ ha benɛ si fɔfɔɛ ɔ ba tsake nɛ a kpata a he nyɛli ɔmɛ a hɛ mi ɔ! (Est. 9:​1, 2) Haomihi nɛ Ezra kɛ kpe ngɛ jamɛ a be ɔ mi nɛ e da nya a, ye bua lɛ nɛ e nyɛ nɛ e da haomi nguanguahi nɛ e kɛ kpe pee se ɔ nya. E ngɛ heii kaa enɛ ɔ ha nɛ hɛ nɔ kami nɛ e ngɛ kaa Yehowa maa po e we bi a he piɛ ɔ hu mi wa wawɛɛ. w23.11 17 ¶12-13

E ngɛ heii kaa bɔfo Paulo ngɛ “mlaa nya ní tsumihi” nɛ ji Mose Mlaa a nɛ Yehowa kɛ ha ngɛ Sinai Yoku ɔ nɔ ɔ he munyu tue. (Rom. 3:​21, 28) Eko ɔ, ngɛ Paulo be ɔ mi ɔ, e he wa ha Yuda bi nɛ a ji Kristofohi ɔ kaa a maa kplɛɛ nɔ kaa Mose Mlaa a nɛ a kɛ ngɛ ní tsue loloolo ɔ be be. Enɛ ɔ he ɔ, Paulo ngɔ Abraham nɔ hyɛmi nɔ́ ɔ kɛ tsɔɔ mɛ kaa e he hia we nɛ a ye Mose Mlaa a nɔ loko Yehowa maa kplɛɛ a nɔ, mohu ɔ, a hia hemi kɛ yemi. Munyu nɛ ɔ woɔ nɔ bua wawɛɛ ejakaa e tsɔɔ wɔ kaa ke wa ná hemi kɛ yemi ngɛ Mawu kɛ Kristo mi ɔ, wa ma nyɛ maa sa Mawu hɛ mi. Se kɛ̃ ɔ, “ní tsumihi” nɛ a tu he munyu ngɛ Yakobo yi 2 ɔ je ekpa ngɛ “mlaa nya ní tsumihi” nɛ Paulo tu he munyu ɔ he. Yakobo ngɛ ní tsumihi loo níhi nɛ Kristofohi peeɔ daa ligbi ɔ he munyu tue. Ní tsumi nɛ ɔmɛ haa nɛ wa naa ke ji Kristofo no ko ngɛ hemi kɛ yemi nitsɛnitsɛ ngɛ Mawu mi loo e be hemi kɛ yemi. w23.12 3 ¶8; 4-5 ¶10-11

E sa nɛ nyɛmimɛ yihi nɛ a ngɛ he susue kaa o maa sɛ gba si himi mi ɔ nɛ a kɛ nile nɛ hla nyumu nɛ a kɛ lɛ maa hi si ɔ. Mo kai kaa nyumu nɛ o kɛ lɛ maa hi si ɔ ma ba pee o yi. (Rom. 7:2; Efe. 5: 33) Enɛ ɔ he ɔ, mo bi o he ke: ‘Anɛ nyumu nɛ ɔ ji Kristofo no nɛ e nane pi si lo? Anɛ e kɛ mumi mi níhi yeɔ kekle blɔ he ngɛ e si himi mi lo? Anɛ e mwɔɔ yi mi kpɔhi nɛ da lo? Anɛ ke e tɔ̃ ɔ, e kplɛɛɔ nɔ lo? Anɛ e buɔ yihi lo? Anɛ e ma nyɛ maa ye bua mi konɛ huɛ bɔmi nɛ ngɛ i kɛ Yehowa wa kpɛti ɔ mi nɛ wa, nɛ e ha mi ye he lo nya hiami níhi, nɛ e pee ye huɛ kpakpa lo? Ngɛ anɔkuale mi ɔ, ke o suɔ nɛ o ná huno kpakpa hwɔɔ se ɔ, e sa nɛ mo nitsɛ hu o pee yo kpakpa. Yogbayo kpakpa ji “yemi kɛ bualɔ” kɛ “he piɛɛlɔ” kɛ ha e huno. (1 Mose 2:18) Jehanɛ hu ɔ, akɛnɛ yo ɔ suɔ Yehowa he je ɔ, e peeɔ nɔ́ fɛɛ nɔ́ nɛ e ma nyɛ kɛ yeɔ buaa e huno ɔ, nɛ ni kpahi naa e huno ɔ su kpakpa amɛ. (Abɛ 31:​11, 12; 1 Tim. 3:11) Ke o ha nɛ suɔmi nɛ o ngɛ kɛ ha Yehowa a mi wa, nɛ o ye bua o we mi bimɛ kɛ nyɛmimɛ nɛ a ngɛ asafo ɔ mi ɔ, e maa ye bua mo konɛ o pee yogbayo kpakpa hwɔɔ se. w23.12 22-23 ¶18-19

Yehowa wo wɔ si kaa e ma ha wɔ nile bɔ nɛ pee nɛ wa nyɛ nɛ waa mwɔ yi mi kpɔ kpakpahi. Ke wa maa mwɔ yi mi kpɔ ko nɛ ma tsake wa si himi ɔ, wa hia nile nɛ je Yehowa ngɔ. Jehanɛ hu ɔ, e haa wɔ he wami konɛ wa fĩ si ngɛ kahi a mi. Kaa bɔ nɛ Yehowa pee ha bɔfo Paulo ɔ, e ma ha wɔ he wami nɛ wa hia konɛ wa nyɛ nɛ wa fĩ si ngɛ kahi a mi. (Filip. 4:13) E guɔ wa nyɛmimɛ ɔmɛ a nɔ kɛ yeɔ bua wɔ. Gbɔkuɛ nɛ e nɔ jena Yesu ma gbo ɔ, e sɔle wawɛɛ. E kpa Yehowa pɛɛ kaa e je lɛ kɛ je haomi nɛ e kɛ maa kpe ɔ mi konɛ ni kpahi nɛ a ko na lɛ kaa e ji musu bɔlɔ nɛ́ a bu lɛ fɔ. Se Yehowa pee we jã, mohu ɔ, e tsɔ e bɔfo ɔmɛ a kpɛti nɔ kake nɛ e ya wo lɛ he wami. (Luka 22:​42, 43) Enɛ ɔ tsɔɔ kaa Yehowa ma nyɛ maa wo wɔ he wami kɛ gu wa nyɛmimɛ ɔmɛ nɛ e ma ha nɛ a fia wɔ ngɛ tɛlifoo nɔ loo a ba slaa wɔ ɔ nɔ. Wɔ tsuo wa ma nyɛ maa ngɔ he blɔ fɛɛ he blɔ nɛ wa ma ná a kɛ tu “munyu kpakpa” kɛ wo wa nyɛmimɛ ɔmɛ he wami.—Abɛ 12:25. w23.05 10-11 ¶9-11

Eko ɔ, nihi nɛ a kpa asafo mi kpe kɛ fiɛɛmi yami nɛ a maa ba Kaimi ɔ maa ye gbeye kaa ke a ba a asafo mi kpe ɔ, nyɛmimɛ ɔmɛ ma de nɔ́ yaya ko kɛ kɔ a he. Enɛ ɔ he ɔ, ko bi sane ko nɛ ma ha nɛ zo nɛ gbe mɛ loo koo pee nɔ́ ko nɛ maa dɔ mɛ. Mo kai kaa a ji wa nyɛmimɛ Kristofohi. Enɛ ɔ he ɔ, e sa nɛ wa bua nɛ jɔ kaa waa kɛ mɛ ma bla kɛ sɔmɔ Yehowa ekohu! (La 119:176; Níts. 20:35) Anɛ wa bua jɔɛ kaa Yesu to blɔ nya kɛ ha wɔ konɛ wa kai e gbenɔ ɔ daa jeha lo? Ke wa ya Kaimi ɔ, waa kɛ ni kpahi náa he se ngɛ blɔhi fuu a nɔ. (Yes. 48:​17, 18) Suɔmi nɛ wa ngɛ kɛ ha Yehowa kɛ Yesu ɔ mi waa. Wa náa he blɔ kɛ jeɔ hɛsa kpo ngɛ nɔ́ nɛ Yehowa kɛ Yesu pee ha wɔ ɔ he, nɛ huɛ bɔmi nɛ ngɛ waa kɛ wa nyɛmimɛ wa kpɛti ɔ mi waa. Jehanɛ hu ɔ, wa nyɛɔ nɛ wa yeɔ bua ni kpahi konɛ a le bɔ nɛ a ma plɛ kɛ ná kpɔmi nɔ́ ɔ he se ha. Nyɛ ha nɛ wɔ tsuo waa pee nɔ́ fɛɛ nɔ́ nɛ wa ma nyɛ nɛ wa dla wa he kɛ ha jeha nɛ ɔ Kaimi ɔ, ejakaa e ji ligbi nɛ he hia pe kulaa ngɛ jeha a mi! w24.01 14 ¶18-19

Mɛni blɔ nɔ Yehowa guɔ kɛ tsɔɔ wɔ blɔ? E guɔ Baiblo ɔ nɛ ji e Munyu ɔ nɔ titli kɛ tsɔɔ wɔ blɔ. Jehanɛ hu ɔ, e guɔ adesahi a nɔ kɛ peeɔ jã. Kaa nɔ hyɛmi nɔ́ ɔ, e guɔ “tsɔlɔ anɔkualetsɛ kɛ ní lelɔ” ɔ nɔ kɛ haa wɔ mumi mi niye ní, nɛ lɔ ɔ yeɔ bua wɔ nɛ wa mwɔɔ yi mi kpɔhi nɛ da. (Mat. 24:45) Yehowa guɔ nyumuhi nɛ a he su ɔ a nɔ kɛ tsɔɔ wɔ blɔ hulɔ. Kaa nɔ hyɛmi nɔ́ ɔ, kpɔ mi nɔ hyɛli kɛ asafo mi nikɔtɔmahi woɔ wɔ he wami nɛ a tsɔɔ wɔ blɔ. Enɛ ɔ yeɔ buaa wɔ nɛ wa daa nyagbahi nɛ waa kɛ kpeɔ ɔ a nya. Wa bua jɔ kaa Yehowa ngɛ wɔ blɔ tsɔɔe ngɛ nyagbe ligbi nɛ ɔmɛ a mi loko nyagbe ɔ nɛ ba. Enɛ ɔ yeɔ buaa wɔ nɛ huɛ bɔmi kpakpa hiɔ waa kɛ Yehowa wa kpɛti konɛ wa si himi nɛ pee kpakpa amlɔ nɛ ɔ, nɛ́ wa ná neneene wami. Se be komɛ ɔ, e he ma nyɛ maa wa ha wɔ kaa waa kɛ Yehowa blɔ tsɔɔmi ma tsu ní, titli ke blɔ tsɔɔmi ɔ je adesahi nɛ a yi mluku ɔ a ngɔ. Ke e ba jã a, e sa nɛ waa le kaa Yehowa ji nɔ nɛ ngɛ e we bi blɔ tsɔɔe, nɛ ke waa kɛ e blɔ tsɔɔmihi tsu ní ɔ, e maa jɔɔ wɔ. w24.02 20 ¶2-3

Ja wa kase Baiblo ɔ saminya loko suɔmi nɛ wa ngɛ kɛ ha Mawu ɔ mi maa wa. Ke o ngɛ Baiblo mi sane ko kanee ɔ, bɔɔ mɔde kaa o maa na nɔ́ nɛ e tsɔɔ mo ngɛ Yehowa he. Mo bi o he ke: ‘Mɛni blɔ nɔ nɛ sane nɛ ɔ tsɔɔ kaa Yehowa suɔ mi? Nɛ mɛni blɔ nɔ nɛ e maa ye bua mi konɛ ma suɔ Yehowa?’ Nɔ́ kpa ko nɛ wa ma nyɛ maa pee konɛ suɔmi nɛ wa ngɛ kɛ ha Yehowa a mi nɛ wa ji kaa wa maa sɔle ha lɛ kɛ je wa tsui mi. (La 25:​4, 5) Ke wa pee jã a, Yehowa hu ma ha wa sɔlemi ɔmɛ a heto. (1 Yoh. 3:​21, 22) Nɛ suɔmi nɛ wa ngɛ kɛ ha ni kpahi hu mi maa wa. Benɛ Paulo tsake jeha komɛ a se ɔ, e kɛ niheyo ko kpe nɛ a tsɛɛ lɛ ke Timoteo. Timoteo suɔ Mawu kɛ nimli tsuo. Paulo de nyɛmimɛ nɛ a ngɛ Filipi ɔ ke: “I be nɔ kpa ko hu nɛ e su ngɛ kaa [Timoteo] nɔ́ ɔ, nɔ ko nɛ e maa je e tsui mi kɛ susu nyɛ hiami níhi a he.” (Filip. 2:20) E ngɛ heii kaa asafohi nɛ Timoteo ya sɔmɔ mɛ ɔ maa hyɛ blɔ kaa e maa kpale ba slaa mɛ ekohu.—1 Kor. 4:17. w23.07 9 ¶7-10

Mose gbo loko Israel bi ɔmɛ ya su Si Womi Zugba a nɔ. Akɛnɛ Mose gbo he je ɔ, anɛ Yehowa kpa e we bi nɛ a yeɔ anɔkuale ɔ a he piɛ pomi lo? Dɛbi. Ke Israel bi ɔmɛ ya nɔ nɛ a ye anɔkuale ɔ, Yehowa haa mɛ a hiami níhi. Loko Mose ma gbo ɔ, Yehowa de lɛ kaa e hla Yoshua konɛ e nyɛɛ ni ɔmɛ a hɛ mi. E ngɛ heii kaa Mose kɛ jehahi babauu tsɔse Yoshua. (2 Mose 33:11; 5 Mose 34:9) Jehanɛ hu ɔ, nyumuhi babauu ngɛ nɛ a hla mɛ nɛ a hyɛɔ ni ɔmɛ a nɔ. Nyumu nɛ ɔmɛ ekomɛ hyɛɛ nimli akpehi a nɔ, nɛ ekomɛ hyɛɛ nimli lafahi a nɔ, ni kpahi hu hyɛɛ nimli nyingmi enuɔ kɛ nyɔngmahi a nɔ. (5 Mose 1:15) Mawu hyɛ e we bi a nɔ saminya. Eliya sane ɔ hu ji nɔ hyɛmi nɔ́ kpa ko nɛ wa ma susu he. Eliya bɔ mɔde wawɛɛ nɛ e ye bua Israel bi ɔmɛ nɛ a sɔmɔ Yehowa jehahi babauu. Se pee se ɔ, Yehowa ngɔ ní tsumi kpa ko hu kɛ wo e dɛ ngɛ Yuda. (2 Ma. 2:1; 2 Kron. 21:12) Anɛ Yehowa kua Israel bi nɛ a yeɔ anɔkuale nɛ a ngɛ wɛtso nyɔngma a nɔ yemi ɔ mi lo? Dɛbi. Eliya kɛ jehahi babauu tsɔse Elisha. Yehowa ya nɔ nɛ e tsu e yi mi tomihi a he ní nɛ e hyɛ e sɔmɔli anɔkualetsɛmɛ ɔmɛ a nɔ. w24.02 5 ¶12

Efeso bi ɔmɛ nɛ a ji Kristofohi ɔ ba kase Ngmami ɔ mi anɔkuale ɔ, nɛ a ngɛ a je mi bae ngɛ nya. (La 119:105) Efeso bi nɛ ɔmɛ ngmɛɛ lakpa jami mi ní peepeehi kɛ je mi bami yayahi a he. A ba “pee nihi nɛ a kaseɔ Mawu,” nɛ a bɔ mɔde wawɛɛ kaa a ma ja Yehowa ngɛ anɔkuale mi, nɛ a sa e hɛ mi hulɔ. (Efe. 5:1) Jã nɔuu kɛ̃ nɛ e ji mwɔnɛ ɔ. Loko wa ma ba kase anɔkuale ɔ, lakpa jamihi kɛ je mi bami yaya ngɔ wɔ nyɔguɛ. Wa kpɛti ni komɛ ngɔ wa he kɛ wo lakpa jami gbijlɔhi a mi, ni kpahi hu ngɔ a he kɛ wo je mi bami sasɛ mi. Se akɛnɛ wa ba kase Yehowa je mi bami he mlaa amɛ nɛ kɔɔ nɔ́ nɛ da kɛ nɔ́ nɛ dɛ he he je ɔ, wa pee tsakemihi, nɛ waa ba wa je mi ngɛ Yehowa dami mlaa amɛ a nya. Enɛ ɔ ha nɛ wa ná jɔɔmihi babauu ngɛ wa si himi mi. (Yes. 48:17) E ngɛ mi kaa waa kɛ nyagba komɛ kpeɔ mohu lɛɛ, se e sɛ nɛ waa kpale wa se kɛ ya diblii ɔ nɛ wa je mi ɔ mi hu. E sa nɛ ‘waa ya nɔ nɛ waa nyɛɛ kaa la bimɛ.’ w24.03 21 ¶6-7

Eko ɔ, e maa pee mo kaa o pee we klaalo kaa o maa jɔɔ o he nɔ kɛ ha Yehowa nɛ a baptisi mo. E ma nyɛ maa ba kaa e sa nɛ o pee tsakemi komɛ ngɛ o si himi mi nɛ o ba o je mi ngɛ Yehowa mlaa amɛ a nya. Aloo eko ɔ, o hia be babauu konɛ o kɛ ha nɛ o hemi kɛ yemi ɔ mi nɛ wa. (Kol. 2:​6, 7) E slo nihi nɛ waa kɛ kaseɔ Baiblo ɔ a kpɛti nɔ fɛɛ nɔ nyɛmi kɛ e mɔde bɔmi. Enɛ ɔ he ɔ, nihewi kɛ yihewi tsuo be nyɛe maa pee klaalo ngɛ be kake mi konɛ a jɔɔ a he nɔ kɛ ha Yehowa nɛ a baptisi mɛ. Moo bɔ mɔde kaa o maa le tsakemihi nɛ e sa kaa o pee, nɛ o pee níhi nɛ ma ha nɛ o ya o hɛ mi, nɛ o ko ngɔ o he kɛ to ni kpahi a he. (Gal. 6:​4, 5) Ke o yɔse kaa o pee we klaalo kaa o maa jɔɔ o he nɔ kɛ ha Yehowa po ɔ, moo ya nɔ nɛ o kɛ pee oti. Moo sɔle nɛ o bi Yehowa nɛ e ye bua mo konɛ o pee tsakemihi nɛ e sa kaa o pee ngɛ o si himi mi ɔ. (Filip. 2:13) O ma nyɛ ma ná nɔ mi mami kaa Yehowa maa bu o sɔlemi ɔ tue nɛ e ye bua mo.—1 Yoh. 5:14. w24.03 5 ¶9-10

Be ko ɔ, Sara mi mi fu nɛ e kɛ abofu ɔ kple Abraham nɔ, nɛ e pia lɛ ngɛ nyagbahi nɛ ba a he. Abraham le kaa Sara ji yo nɛ baa e he si, nɛ e fĩɔ yi mi kpɔhi nɛ e mwɔɔ ɔ se. E bu Sara tue nɛ e bɔ mɔde nɛ e tsu sane ɔ he ní. (1 Mose 16:​5, 6) Mɛni wa ma nyɛ maa kase ngɛ mi? Hunomɛ, nyɛ ngɛ he blɔ nɛ nyɛ mwɔɔ yi mi kpɔhi kɛ haa nyɛ weku ɔ. (1 Kor. 11:3) Se ke nyɛ maa mwɔ yi mi kpɔhi nɛ maa sa nyɛ yi ɔmɛ a he, nɛ nyɛ je suɔmi mi nɛ nyɛ bi a juɛmi nɛ nyɛ bu mɛ tue saminya a, lɔ ɔ tsɔɔ kaa nyɛ susuɔ a he. (1 Kor. 13:​4, 5) Ligbi ko hu ɔ, Abraham suɔ kaa e maa pee ni komɛ nɛ a ba a ngɔ be mi nɛ a hyɛ we blɔ ɔ nubwɔ. E de Sara kaa e ngmɛɛ nɔ́ nɛ e ngɛ pee ɔ he konɛ e ya hoo ní kɛ ha mɛ. (1 Mose 18:6) Sara kɛ oya yemi pee nɔ́ nɛ Abraham de lɛ ɔ. Yigbayihi, ke nyɛ hunomɛ mwɔ yi mi kpɔ ko ɔ, nyɛ hu nyɛ ma nyɛ maa kase Sara nɛ nyɛ fĩ a se. Ke nyɛ pee jã a, e ma ha nɛ suɔmi nɛ ngɛ nyɛ kpɛti ɔ mi maa wa wawɛɛ.—1 Pet. 3:​5, 6. w23.05 24-25 ¶16-17

Benɛ a hla Gideon kaa kojolɔ ɔ, e he hia nɛ e bu blɔ tsɔɔmi tue nɛ e pee kã. Yehowa hla lɛ kaa e kpata afɔle sami la tɛ nɛ e papaa sã afɔle ngɛ nɔ kɛ ha Baal ɔ hɛ mi. Oslaa ngɛ ní tsumi nɛ ɔ he wawɛɛ. (Many. 6:​25, 26) Pee se benɛ Gideon bua ta buli babauu nya a, Yehowa de lɛ si enyɔ sɔuu kaa e gbɔ a yibɔ ɔ nɔ. (Many. 7:​2-7) Nyagbenyagbe ɔ, Yehowa de lɛ kaa e ya tua e he nyɛli ɔmɛ nyɔ mi ngɛ a sito he ɔ. (Many. 7:​9-11) E sa nɛ asafo mi nikɔtɔmahi nɛ a “pee klaalo kaa [a] maa bu tue.” Asafo mi nɔkɔtɔma nɛ buɔ tue ɔ kɛ blɔ tsɔɔmi nɛ je Ngmami ɔ mi kɛ blɔ tsɔɔmi nɛ Yehowa asafo ɔ kɛ haa a tsuɔ ní oya nɔuu. Jã nɛ e maa pee ɔ maa pee nɔ hyɛmi nɔ́ kpakpa kɛ ha ni kpahi. Se kɛ̃ ɔ, e he ma nyɛ maa wa kaa e maa bu blɔ tsɔɔmi tue be komɛ nɛ e kɛ tsu ní. Kaa nɔ hyɛmi nɔ́ ɔ, e he ma nyɛ maa wa ha lɛ kaa e kɛ blɔ tsɔɔmi nɛ a kɛ ma ha a ma tsu ní. Be komɛ hu ɔ, e ma nyɛ maa nu he kaa nile be blɔ tsɔɔmi ko nɛ a kɛ ha a mi. Aloo eko ɔ, a ma nyɛ ma ha lɛ ní tsumi ko nɛ ma nyɛ ma ha nɛ a nu lɛ kɛ wo tsu mi po. Mɛni blɔ nɔ asafo mi nikɔtɔmahi ma nyɛ maa kase bɔ nɛ Gideon bu Yehowa tue ha a ke a kɛ si fɔfɔɛ kaa jã a kpe? Moo bu blɔ tsɔɔmi tue saminya nɛ o kɛ tsu ní. w23.06 4-5 ¶9-11