March

Baiblo ɔ ha nɛ wa na kaa ni komɛ nɛ a ji dali ɔ po pee ní komɛ nɛ dɛ. Nimli nɛ ɔmɛ a kpɛti nɔ kake ji Matsɛ Salomo. A tsɔse lɛ kɛ Mawu mlaa a, nɛ Yehowa hu jɔɔ lɛ babauu. Se pee se ɔ, e kpa Yehowa sɔmɔmi nɛ e ya sɔmɔ lakpa mawuhi. Yayamihi nɛ e pee ɔ ha nɛ Yehowa mi mi fu lɛ, nɛ enɛ ɔ ha nɛ e kɛ Israel bi ɔmɛ tsuo na nɔ́ jeha babauu. Se benɛ Salomo gbo ɔ, Baiblo ɔ de ngɛ e he ke “a pu lɛ ngɛ e tsɛ David ma a mi.” (1 Ma. 11:​5-9, 43; 2 Ma. 23:13) Se anɛ he nɛ a pu lɛ ngɛ ɔ tsɔɔ kaa bɔ fɛɛ bɔ nɛ ji ɔ, a ma tle lɛ si hwɔɔ se lo? Baiblo ɔ de we nɔ́ ko kaa jã. Gbogboehi a si tlemi ɔ ji nike ní nɛ je Mawu nɛ ngɛ suɔmi ɔ ngɔ, nɛ e kɛ haa nihi nɛ e suɔ kaa a sɔmɔ lɛ kɛ ya neneene ɔ pɛ. (Hiob 14:​13, 14; Yoh. 6:44) Anɛ Salomo nine maa su nike ní nɛ ɔ nɔ lo? Yehowa pɛ lɛ le heto ɔ, wɔ lɛɛ wa li. Se wa le kaa Yehowa maa pee nɔ́ nɛ da. w24.05 4 ¶9

Blema a, nihi hwɔɔ bo tsuhi a mi konɛ a kɛ po a he piɛ ke pu ngɛ tsoe loo hiɔmi ngɛ nɛe. Ke nɔ ko ya to nɔ ko nubwɔ ngɛ bo tsu nɛ ɔ eko mi ɔ, e hyɛɔ blɔ kaa nɔ nɛ e ya to lɛ nubwɔ ɔ maa hyɛ e nɔ saminya. Ke wa jɔɔ wa he nɔ kɛ ha Yehowa a, wa ba peeɔ nibwɔhi ngɛ e we okadi peemi bo tsu ɔ mi. Wa náa mumi mi niye ní babauu, nɛ waa kɛ nihi nɛ mɛ hu a ngɛ e bo tsu ɔ mi ɔ peeɔ huɛmɛ. Nɔ fɛɛ nɔ ma nyɛ maa hi Yehowa bo tsu ɔ mi. Ke wa yeɔ Yehowa anɔkuale ɔ, wa ma nyɛ maa hi e bo tsu ɔ mi ngɛ he fɛɛ he nɛ wa ngɛ. (Kpoj. 21:3) Nɛ anɔkualetsɛmɛ nɛ a gbo ɔ hu nɛɛ? Anɛ wa ma nyɛ maa ma nya si kaa a ngɛ Yehowa bo tsu ɔ mi lo? Ee! Mɛni he je nɛ wa ma nyɛ ma de jã a? Ejakaa ngɛ Yehowa hɛ mi lɛɛ, a ngɛ wami mi. Yesu de ke: “Ngɛ mio tso ɔ he sane ɔ mi ɔ, Mose po ha nɛ wa le kaa a ma tle gbogboehi a si benɛ e tsɛ Yehowa ke, ‘Abraham Mawu kɛ Isak Mawu kɛ Yakɔb Mawu ɔ.’ E ji hɛ kali ɔmɛ a Mawu, se pi ni gbogboe ɔmɛ a Mawu, ejakaa ngɛ e hɛ mi ɔ, mɛ tsuo a hɛ ngɛ.”—Luka 20:​37, 38. w24.06 3 ¶6-7

Benɛ Zadok ya Hebron ɔ, e dla e he nɛ e pee klaalo kɛ ha ta hwumi. (1 Kron. 12:38) E suɔ kaa e maa nyɛɛ David se kɛ ya ta, konɛ e kɛ po Israelbi ɔmɛ a he piɛ kɛ je a he nyɛli ɔmɛ a dɛ mi. E ngɛ mi kaa Zadok be níhi a si kpami tsɔ ngɛ ta hwumi mi mohu lɛɛ, se e ji nyumu nɛ e ngɛ kã wawɛɛ. Jije osɔfo Zadok kase kã peemi kɛ je? Nyumuhi nɛ a he wa nɛ a ngɛ kã a bɔle lɛ kɛ kpe. Enɛ ɔ he ɔ, e ngɛ heii kaa e kase a nɔ hyɛmi nɔ́ ɔ. Kaa nɔ hyɛmi nɔ́ ɔ, bɔ nɛ David kɛ kã ‘nyɛɛɔ Israel hɛ mi ngɛ ta mi’ ɔ ha nɛ Israelbi ɔmɛ tsuo je a tsui mi kɛ fĩ e se. (1 Kron. 11:​1, 2) Be fɛɛ be nɛ David kɛ e he nyɛli ɔmɛ maa hwu ta a, e ngɔɔ e hɛ kɛ fɔɔ Yehowa nɔ konɛ e ye bua lɛ. (La 138:3) Jehanɛ hu ɔ, Zadok kase nɔ́ ko kɛ je nyumuhi nɛ a ngɛ kã a ngɔ. Nyumu nɛ ɔmɛ a kpɛti ni komɛ ji Yehoyada kɛ e binyumu Benaya nɛ e ji tatsɛ ɔ, kɛ wɛtso nya dali 22 nɛ a fĩ David se ɔ.—1 Kron. 11:​22-25; 12:​26-28. w24.07 3 ¶5-6

Saulo nɛ je Tarso ɔ pee yayamihi fuu nɛ hɛdɔ ngɛ a he. E wa Kristo se nyɛɛli ɔmɛ yi mi wawɛɛ nitsɛ. Kristofo ɔmɛ a kpɛti nihi fuu susu kaa Saulo be nyɛe ma tsake e tsui gblee. Se Yesu nɛ a tle lɛ si ɔ lɛɛ e le kaa Saulo ma nyɛ ma tsake e tsui. Yesu kɛ e Tsɛ ɔ na su kpakpahi nɛ Saulo ngɛ ɔ. Yesu de ke: “Nyumu nɛ ɔ ji buɛ nɛ a hla kɛ ha mi.” (Níts. 9:15) Yesu gu nyakpɛ blɔ nɔ kɛ ha nɛ Saulo pee tsakemi. (Níts. 7:58–8:3; 9:​1-9, 17-20) Saulo nɛ pee se ɔ, a ba tsɛ lɛ ke Paulo ɔ tsake e tsui, nɛ e ba pee Kristofono. Yesu ha nɛ e sɔmɔ kaa bɔfo. Behi fuu ɔ, Paulo jeɔ hɛsa kpo kaa Yesu kɛ Yehowa je mi mi jɔmi kɛ mɔbɔ nami kpo kɛ tsɔɔ lɛ. (1 Tim. 1:​12-15) Be ko ɔ, Paulo nu kaa asafo ɔ nɛ ngɛ Korinto ɔ ngmɛ nyumu ko nɛ e kɛ e he wo ajuama bɔmi mi ɔ blɔ nɛ e ngɛ asafo ɔ mi. Kɛ Paulo tsu sane ɔ he ní ha kɛɛ? Bɔ nɛ e plɛ kɛ tsu sane ɔ he ní ha a tsɔɔ wɔ kaa Yehowa jeɔ suɔmi mi nɛ e tsɔseɔ e sɔmɔli, nɛ e naa mɛ mɔbɔ ke a tsake a tsui, nɛ wɔ hu e sa nɛ waa kase e mɔbɔ nami ɔ. w24.08 13 ¶15-16

Bɔɔbɔɔbɔɔ ɔ, Yehowa tsɔɔ nɔ́ nɛ adesahi nɛ a ji yayami peeli ɔ ma nyɛ maa pee konɛ a hɛ kɛ su e he. Adam kɛ Hawa a binyumu enyɔne nɛ ji Habel ɔ ji nɔ kekleekle nɛ e ná hemi kɛ yemi ngɛ Yehowa mi ngɛ atuã tsɔmi nɛ ya nɔ ngɛ Eden abɔɔ ɔ mi ɔ se. Akɛnɛ Habel suɔ Yehowa nɛ e suɔ nɛ e sa e hɛ mi nɛ e hɛ kɛ su e he he je ɔ, e sã afɔle ha Yehowa. Habel ji to hyɛlɔ, enɛ ɔ he ɔ, e ngɔ e jijɔ ɔmɛ ekomɛ kɛ sã afɔle ha Yehowa. Kɛ Yehowa nu he ha kɛɛ? E “bua jɔ Habel kɛ e we afɔle ɔ he.” (1 Mose 4:4) Ngɛ anɔkuale mi ɔ, Yehowa bua jɔ afɔlehi nɛ ni kpahi nɛ a suɔ lɛ nɛ a heɔ lɛ yeɔ ɔ sã kɛ ha lɛ ɔ he. Nimli nɛ ɔmɛ a kpɛti nɔ kake ji Noa. (1 Mose 8:​20, 21) Akɛnɛ Yehowa kplɛɛ a we afɔle sami ɔmɛ a nɔ he je ɔ, e ha nɛ wa na kaa adesahi nɛ a ji yayami peeli ɔ ma nyɛ maa hɛ kɛ su Yehowa he. w24.08 3 ¶5-6

Ke a ye wɔ sane yaya a, e ma nyɛ maa dɔ wɔ wawɛɛ, nɛ wa maa hao po. (Fiɛɛ. 7:7) Yehowa sɔmɔli anɔkualetsɛmɛ komɛ kaa Hiob kɛ Habakuk hu nu he jã. (Hiob 6:​2, 3; Hab. 1:​1-3) E ngɛ mi kaa tɔmi ko be he kaa nɔ ko maa nu he jã mohu lɛɛ, se e sa nɛ waa hyɛ saminya ngɛ bɔ nɛ wa peeɔ wa ní ha a he konɛ wa ko ya pee nɔ́ ko nɛ nile be mi nɛ ma puɛ sane ɔ kulaa. Ke e pee kaa nɔ́ nɛ nihi nɛ a yeɔ wɔ sane yaya a ná we tue gblami ɔ, wa ma nyɛ ma susu kaa se nami ko be he kaa wa maa pee nɔ́ nɛ da. Jã nɛ la polɔ ko nu he. E na kaa níhi ngɛ nɔ yae saminya ha yiwutsotsɛmɛ, se nihi nɛ a peeɔ nɔ́ nɛ da a lɛɛ a ngɛ nɔ́ nae. Enɛ ɔ ha nɛ e de ke: ‘Ni nɛ ɔmɛ ji yiwutsotsɛmɛ, se be fɛɛ be ɔ, a ngɛ he jɔmi mi.’ (La 73:12) Enɛ ɔ ha nɛ e mi mi fu wawɛɛ, nɛ e susu kaa se nami ko be he kaa e ma sɔmɔ Yehowa. E de ke: “I bɔ mɔde kaa ma nu sisi, se ye juɛmi kpi he.”—La 73:​14, 16. w24.11 3 ¶5-7

Wa woɔ Yehowa hɛ mi nyami ejakaa wa ngɛ bumi nɛ mi kuɔ kɛ ha lɛ. Wa ngɛ yi mi tomihi fuu a he je nɛ e sa kaa wa je bumi kpo kɛ tsɔɔ Yehowa. Yehowa ji ope, nɛ e ngɛ he wami. E he wami ɔ huzu be he. (La 96:​4-7) Bɔ nɛ e juɛmi mi kuɔ ha a jeɔ kpo heii ngɛ e nibɔ ní ɔmɛ a mi. Lɛ nɛ e ha wɔ wami, nɛ lɛ nɛ e baa wa yi. (Kpoj. 4:11) E yeɔ anɔkuale. (Kpoj. 15:4) Nɔ́ fɛɛ nɔ́ nɛ e peeɔ ɔ yeɔ manye, nɛ e yeɔ e si womihi a nɔ be fɛɛ be. (Yosh. 23:14) Enɛ ɔ he je nɛ gbalɔ Yeremia de ngɛ Yehowa he ke: “Je ma amɛ tsuo a kpɛti ɔ, nɔ ko be nɛ kɛ mo sɔ, a ní leli ɔmɛ jio, a matsɛmɛ ɔmɛ jio”! (Yer. 10:​6, 7) Niinɛ, e da blɔ kaa wa maa bu wa hiɔwe Tsɛ ɔ. Se pi bumi pɛ nɛ e sa kaa waa bu Yehowa, e sa nɛ waa suɔ lɛ hulɔ. Se nɔ́ nɛ pe kulaa a, wa woɔ Yehowa hɛ mi nyami ejakaa wa suɔ lɛ wawɛɛ. w25.01 3 ¶5-6

Mawu he nyɛli bɔɔ mɔde kaa a ma ha nɛ waa na ní kpakpahi nɛ yaa nɔ ngɛ Yehowa asafo ɔ mi ɔ kaa ní yayahi. Kaa nɔ hyɛmi nɔ́ ɔ, wa kase ngɛ Ngmami ɔ mi kaa Yehowa suɔ kaa e sɔmɔli tsuo a he nɛ tsɔ ngɛ nɔmlɔ tso mi, ngɛ je mi bami mi, kɛ mumi mi. Yehowa fã kaa a je nihi tsuo nɛ a kɛ a he woɔ je mi bami yaya mi, nɛ a tsakee we a tsui ɔ kɛ je asafo ɔ mi. (1 Kor. 5:​11, 12; 6:​9, 10) Waa kɛ fami nɛ ɔ nɛ je Ngmami ɔ mi ɔ tsuɔ ní. Se kɛ̃ ɔ, wa he nyɛli ɔmɛ deɔ ke wa sume nihi, wa buɔ nihi fɔ, nɛ wa kojoɔ mɛ. E sa nɛ waa le nɔ tutuutu nɛ hɔ wo tuami nɛ ɔ se. Satan Abosiami lɛ hɔɔ si ngɛ lakpa munyuhi nɛ nihi tuɔ ngɛ asafo ɔ he ɔ se. “Lɛ ji lakpa a e tsɛ.” (Yoh. 8:44; 1 Mose 3:​1-5) Enɛ ɔ he ɔ, e sa nɛ waa hyɛ blɔ kaa Satan maa gu ni komɛ a nɔ kɛ gbɛ Yehowa asafo ɔ he lakpa munyuhi kɛ fĩa. w24.04 10-11 ¶13-14

Ngɛ amanehlu ngua a se po ɔ, e ma nyɛ maa ba kaa nihi nɛ a maa na “Babilon Ngua a” hɛ mi kpatami ɔ a kpɛti ni komɛ ma kai kaa jehahi babauu nɛ be ɔ, Yehowa Odasefo ɔmɛ de mɛ kaa nɔ́ nɛ ɔ maa ya nɔ. Anɛ e ma nyɛ maa ba kaa nimli nɛ ɔmɛ ma ba ná hemi kɛ yemi ngɛ Yehowa mi lo? (Kpoj. 17:5) Ke nɔ́ ko kaa jã a ba a, lɛɛ e maa pee kaa bɔ nɛ níhi ya nɔ ngɛ Mose be ɔ mi ngɛ Egipt ɔ. Ngɛ jamɛ a be ɔ mi ɔ, “futufututsɛmɛ babauu” hu piɛɛ Israel bi ɔmɛ a he kɛ je Egipt. Eko ɔ, benɛ nimli nɛ ɔmɛ na kaa kɔkɔ bɔmi nɛ Mose kɛ ha ngɛ Haomi Nyɔngma amɛ a he ɔ ba mi ɔ, a ná hemi kɛ yemi ngɛ Yehowa mi. (2 Mose 12:38) Ke nɔ́ ko kaa jã ya nɔ ngɛ Babilon Ngua a hɛ mi kpatami se ɔ, anɛ e sa nɛ wa kɔni mi nɛ jɔ̃ kaa Yehowa ngmɛ blɔ kaa nihi nɛ a ba piɛɛ wa he be bɔɔ nɛ piɛ loko Harmagedon ta a ma fɛ ɔ lo? E sɛ nɛ e ba jã kulaa! Wa suɔ nɛ waa kase wa hiɔwe Tsɛ ɔ. E ji “Mawu mɔbɔ nalɔ nɛ e mi mi sãã lɛ, nɛ e mi mi fu we mla, nɛ e suɔmi nɛ se pui ɔ kɛ e we anɔkuale yemi ɔ hiɛ babauu ɔ.”—2 Mose 34:6. w24.05 11 ¶12-13

Ke wa ngmɛɛ ‘munyu kpakpahi a he nɔ hyɛmi nɔ́’ ɔ he ɔ, mɛni ma nyɛ maa je mi kɛ ba? Mo susu nɔ hyɛmi nɔ́ nɛ ɔ he nɛ o hyɛ. Ngɛ Kristofohi nɛ a hi si ngɛ kaseli ɔmɛ a be ɔ mi ɔ blɔ fa mi ɔ, a kpɛti ni komɛ gbɛ lakpa munyu kɛ fĩa kaa Yehowa ligbi ɔ ba. Eko ɔ, a nine su sɛ womi ko nɔ kɛ kɔ sane nɛ ɔ he, nɛ a susu kaa bɔfo Paulo lɛ ngma. Kristofohi komɛ nɛ a hi si ngɛ Tɛsalonika a he jamɛ a lakpa munyu ɔ ye, nɛ mɛ hu a gbɛ sane ɔ kɛ fĩa be mi nɛ a li anɔkuale nɛ ngɛ mi. Kaa a kai níhi nɛ Paulo tsɔɔ mɛ benɛ e kɛ mɛ ngɛ ɔ, jinɛ jamɛ a munyu ɔ ko sisi we mɛ. (2 Tɛs. 2:​1-5) Paulo wo e nyɛmimɛ ɔmɛ ga kaa tsa pi munyu fɛɛ munyu nɛ a maa nu ɔ nɛ e sa nɛ a he ye. Bɔ nɛ pee nɛ Paulo nɛ ye bua Tɛsalonikabi ɔmɛ konɛ a ko he lakpa munyu ko nɛ a ye hwɔɔ se ɔ, e mwɔ e sɛ womi enyɔne ɔ nɛ e ngma kɛ ya ha Tɛsalonikabi ɔmɛ ɔ nya ke: “Imi Paulo nɛ́ i kɛ imi nitsɛ ye nine ngma sɛ womi nɛ ɔ ke i biɔ nyɛ, nɛ e ji okadi ngɛ sɛ womi fɛɛ sɛ womi mi; kikɛ nɛ ɔ ji bɔ nɛ i ngmaa ní.”—2 Tɛs. 3:17. w24.07 12 ¶13-14

E sa nɛ Hebribi nɛ a ji Kristofohi ɔ nɛ a fĩ si wawɛɛ, ejakaa e be kɛe nɛ a kɛ amanehlu maa kpe ngɛ Yudea. E ngɛ mi kaa a wa Kristofohi komɛ nɛ a ji Hebribi ɔ yi mi wawɛɛ mohu lɛɛ, se a kpɛti nihi fuu ngɛ nɛ a wɛ mɛ yi mi be mi nɛ a ba na anɔkuale ɔ. Enɛ ɔ he ɔ, bɔfo Paulo de mɛ kaa e sa nɛ a dla a he kɛ ha yi mi wami nɛ maa ba a nɔ pee se ɔ, nɛ a pee klaalo kaa a maa ye anɔkuale kɛ ya si gbenɔ mi kaa bɔ nɛ Yesu pee ɔ. (Heb. 12:4) Akɛnɛ nihi fuu ngɛ Kristofohi asafo ɔ mi bae he je ɔ, Yudabi ɔmɛ a kpɛti nihi fuu a mi mi fu wawɛɛ nɛ a te si kɛ wo Kristofo ɔmɛ. Jehahi bɔɔ komɛ nɛ be ɔ, Yudabi nɛ a hiɛ pe 40 ɔ “kã a he kita kaa a be nɔ́ ko yee, nɛ a be nɔ́ ko hu nue kɛ yaa si be nɛ a maa gbe Paulo.” (Níts. 22:22; 23:​12-14) E ngɛ mi kaa a wa Kristofo ɔmɛ yi mi mohu lɛɛ, se a ya nɔ nɛ a bua a he nya kɛ sɔmɔ Mawu, a fiɛɛ sane kpakpa a, nɛ a ha nɛ a hemi kɛ yemi ɔ mi wa wawɛɛ. w24.09 12 ¶15

Yohane ji bɔfo ko nɛ Yesu Kristo suɔ e sane wawɛɛ. (Mat. 10:2) Yohane piɛɛ Yesu he kɛ tsu e sɔmɔmi ní tsumi ɔ be babauu, nɛ e na nɛ Yesu pee nyakpɛ níhi. Jehanɛ hu ɔ, e ya nɔ nɛ e ye Yesu anɔkuale ngɛ haomi behi a mi. Benɛ a sɛu Yesu ɔ, e na kɛ e hɛngmɛ, nɛ benɛ a tle lɛ si hu ɔ, e na lɛ. Jehanɛ hu ɔ, e hi si be kɛkɛɛ, enɛ ɔ he ɔ, benɛ asafo ɔ ngɛ hɛ mi yae ɔ, e na. E na hu kaa a ‘fiɛɛ sane kpakpa a ngɛ adebɔ níhi tsuo nɛ a ngɛ hiɔwe sisi ɔ a kpɛti.’ (Kol. 1:23) Benɛ e piɛ bɔɔ nɛ Yohane ma gbo ɔ, e ná he blɔ nɛ e ngma Baiblo mi womi nɛ sa kadimi nɛ ji Kpojemi ɔ. (Kpoj. 1:1) Jehanɛ hu ɔ, e ngma Sane Kpakpa womi ɔmɛ a kpɛti kake, nɛ e ngma sɛ womihi etɛ nɛ ji Yohane kekleekle womi ɔ, Yohane womi nɛ ji enyɔne ɔ kɛ etɛne ɔ tsuo. Yohane ngma e sɛ womi etɛne ɔ kɛ ha Kristofono anɔkualetsɛ ko nɛ a tsɛɛ lɛ ke Gayo nɛ́ e naa lɛ kaa e mumi mi bi ɔ. (3 Yoh. 1) Munyu nɛ nyumu anɔkualetsɛ nɛ e wa ngɛ jeha mi ɔ ngma a wo Yesu se nyɛɛli tsuo nɛ a ngɛ jamɛ a be ɔ mi ɔ he wami, nɛ mwɔnɛ ɔ hu ɔ, wa náa he se. w24.11 12 ¶15-16

Huno nɛ e suɔ e yo ɔ naa e yo ɔ kaa e he jua wa. E naa lɛ kaa e ji nike ní nɛ he jua wa nɛ je Yehowa ngɔ. (Abɛ 18:22; 31:10) Nɛ lɔ ɔ haa nɛ e kɛ lɛ yeɔ ngɛ mi mi jɔmi kɛ bumi mi, ke e ba lɛ bɔmi nami blɔ fa mi po. Jehanɛ hu ɔ, e be e yo ɔ nɔ nyɛe kaa e pee nɔ́ ko nɛ e bua jɔɛ he loo e maa hao e he nile, nɛ e be lɛ yi mi wae ke a ngɛ bɔmi náe. Akɛnɛ huno ɔ hu suɔ nɛ e ná he nile kpakpa ngɛ Yehowa hɛ mi he je ɔ, e be nɔ́ ko nɛ maa hao e he nile ɔ pee ke a ngɛ bɔmi náe. (Níts. 24:16.) Hunomɛ, nyɛ ma nyɛ ma ná nɔ mi mami kaa Yehowa naa mɔde nɛ nyɛ ngɛ bɔe kaa nyɛ ma je suɔmi kɛ bumi kpo kɛ tsɔɔ nyɛ yi ɔmɛ ngɛ nɔ́ fɛɛ nɔ́ mi ɔ, nɛ e bua jɔɔ wawɛɛ. Moo fia o pɛɛ si kaa o be nɔ́ ko pee nɛ ma gba o yo ɔ nya kɛ gu suɔmi, bumi kɛ mi mi jɔmi nɛ o ma je kpo kɛ tsɔɔ lɛ ɔ nɔ. Ke o peeɔ jã a, lɔ ɔ tsɔɔ kaa o suɔ lɛ nɛ e he jua wa kɛ ha mo. Mo je suɔmi kɛ bumi kpo kɛ tsɔɔ o yo ɔ. Ke o pee jã a, lɔ ɔ maa po huɛ bɔmi nɛ se be nɛ ngɛ o kɛ Yehowa nyɛ kpɛti ɔ he piɛ.—La 25:14. w25.01 13 ¶17-18

Yehowa sɔmɔli tsuɔ fiɛɛmi ní tsumi ɔ kɛ kã wawɛɛ. Su nɛ ɔ ha nɛ a je ekpa kulaa ngɛ nihi nɛ a tsɛɔ a he ke Kristofohi ɔ a he. Ke jã a, lɛɛ mɛni maa ye bua wɔ konɛ waa ya nɔ nɛ waa fiɛɛ kɛ kã wawɛɛ? Ke wa susu kã nɛ Yesu kɛ fiɛɛ ɔ he ɔ, e maa ye bua wɔ nɛ waa pee kã ngɛ fiɛɛmi mi. Benɛ Yesu ngɛ zugba a nɔ ɔ, e ha we nɛ nɔ́ ko nɛ jɔ̃ e kɔni mi nɛ e kpa fiɛɛmi. Ngɛ anɔkuale mi ɔ, benɛ be ngɛ mi puee ɔ, e ya nɔ nɛ e fiɛɛ wawɛɛ kɛ kã. Yesu ngɔ e fiɛɛmi ní tsumi ɔ kɛ to wai ngmɔ nɔ hyɛlɔ ko he. Wai ngmɔ nɔ hyɛlɔ ɔ ngɔ jeha etɛ kɛ hyɛ fig tso ko nɛ a du ngɛ wai ngmɔ ɔ nɔ saminya, se kɛ̃ ɔ, e nɛ yiblii kake ngmelu po ngɛ fig tso ɔ nɔ. Jã nɔuu kɛ̃ nɛ Yesu hu ngɔ jeha etɛ kɛ fiɛɛ ha Yudabi ɔmɛ, se a kpɛti nihi fuu bui lɛ tue fɛɛ. Se kaa bɔ nɛ wai ngmɔ nɔ hyɛlɔ ɔ kɔni mi jɔ̃ we nɛ e ngɛ hɛnɔkami kaa fig tso ɔ maa wo yiblii ɔ, jã kɛ̃ nɛ Yesu hu kɔni mi jɔ̃ we ngɛ Yudabi ɔmɛ a he. (Luka 13:​6-9) Ke wa kase ní kɛ je níhi nɛ Yesu tsɔɔ kɛ níhi nɛ e pee ɔ mi ɔ, lɔ ɔ maa wo wɔ he wami nɛ waa ya nɔ nɛ waa pee kã. w25.03 14-15 ¶1-4

Ke o na nɔ ko nɛ o susu kaa e ma nyɛ maa pee huno loo yo kpakpa kɛ ha mo ɔ hu nɛɛ? Anɛ e sa nɛ o ya de nɔ ɔ oya nɔuu kaa o bua jɔ e he lo? Baiblo ɔ tsɔɔ kaa nɔ nɛ e hɛ mi tɛ ɔ peeɔ e ní ngɛ nile mi. Enɛ ɔ he ɔ, loko o ma de nɔ ko kaa o bua jɔ e he ɔ, e maa hi kaa o ma he be kɛ le nɔ ɔ kɛ ya si be ko. Kɛ o ma plɛ kɛ to nɔ ko nɛ o ngɛ hlae nɛ o kɛ lɛ nɛ bɔni nyɛɛmi ɔ he hɛ kɛɛ be mi nɛ e li? Ngɛ asafo mi kpehi loo he nya buami komɛ a sisi ɔ, o ma nyɛ ma yɔse ní komɛ ngɛ e he. Ní nɛ ɔmɛ ekomɛ ji, huɛ bɔmi nɛ ngɛ e kɛ Yehowa a kpɛti, e ní peepeehi kɛ e suhi. O maa na nihi nɛ e kɛ bɔɔ, kɛ níhi nɛ e tuɔ he munyu. (Luka 6:45) Anɛ otihi nɛ e kɛ ma e hɛ mi ɔ ngɛ kaa o nɔ́ ɔ lo? O kɛ e we asafo mi nikɔtɔma amɛ loo nyɛmimɛ kpahi nɛ a nane pi si nɛ a le lɛ saminya a ma nyɛ maa sɛɛ ní. (Abɛ 20:18) O ma nyɛ ma bi mɛ ke ji e ngɛ biɛ kpakpa nɛ e baa e je mi saminya lo. (Rut 2:11) Be mi nɛ o ngɛ nɔ ɔ he hɛ toe ɔ, moo hyɛ saminya nɛ o ko pee nɔ́ ko nɛ ma gba e nya. Moo bɔ mɔde kaa o ma susu bɔ nɛ e nuɔ he ha a he. Koo bɔ mɔde kaa o maa hi he fɛɛ he nɛ nɔ ɔ ngɛ loo o le nɔ́ fɛɛ nɔ́ ngɛ e he. w24.05 22 ¶7-8

Asafo mi nikɔtɔma kɛ oya yemi mɛ nya si kaa yayami peelɔ ko be e tsui tsakee. Eko ɔ, kekleekle be nɛ ajla toli ɔmɛ kɛ yayami peelɔ ko maa kpe ɔ, e ma tsake e tsui. Se ngɛ ni kpahi a blɔ fa mi ɔ, eko ɔ, e ma he be saii. Enɛ ɔ he ɔ, eko ɔ, e he maa hia nɛ asafo mi nikɔtɔma amɛ nɛ a to blɔ nya konɛ a kɛ yayami peelɔ ɔ nɛ kpe si abɔ. Kekleekle be nɛ nikɔtɔma amɛ kɛ yayami peelɔ ɔ maa kpe ɔ, eko ɔ, lɔ ɔ se ɔ, yayami peelɔ ɔ ma susu ga nɛ nikɔtɔma amɛ wo lɛ ɔ he. Eko ɔ, lɔ ɔ ma ha nɛ e maa je he si bami mi nɛ e maa sɔle ha Yehowa konɛ e ngɔ e yayami ɔ kɛ ke lɛ. (La 38:18) Enɛ ɔ ma ha nɛ ke a kɛ lɛ kpe ekohu ɔ, eko ɔ, e maa pee tsakemi, nɛ e be e ní pee kaa bɔ nɛ e pee kekleekle be nɛ a kɛ lɛ kpe ɔ. Bɔ nɛ pee nɛ asafo mi nikɔtɔma amɛ nɛ a ye bua yayami peelɔ ɔ konɛ e tsake e tsui ɔ, a bɔɔ mɔde kaa a maa nu he kɛ ha lɛ, nɛ a je mi mi jɔmi kpo kɛ tsɔɔ lɛ. Jehanɛ hu ɔ, a sɔleɔ kɛ haa Yehowa kaa e jɔɔ a mɔde bɔmi ɔ nɔ, konɛ e ye bua yayami peelɔ ɔ nɛ e hɛ nɛ ba e he nɔ, nɛ e tsake e tsui.—2 Tim. 2:​25, 26. w24.08 22-23 ¶12-13

Yehowa sume nɛ nɔ ko nɔ ko hɛ mi nɛ kpata! E suɔ nɛ yayami peeli nɛ a dla a kɛ lɛ a kpɛti. (2 Kor. 5:20) Enɛ ɔ he je nɛ be fɛɛ be ɔ, Yehowa woɔ e sɔmɔli nɛ a kpa lɛ sɔmɔmi ɔ he wami kaa a tsake a tsui nɛ a kpale kɛ ba e ngɔ ɔ nɛ. E ji he blɔ ngua nɛ asafo mi nikɔtɔma amɛ ná kaa a kɛ Yehowa maa pee kake kɛ tsu ní konɛ a ye bua nihi nɛ a pee yayami nɛ hɛdɔ ngɛ he ɔ nɛ a tsake a tsui. (Rom. 2:4; 1 Kor. 3:9) Ke yayami peelɔ ko tsake e tsui ɔ, bua jɔmi baa hiɔwe! Yehowa nɛ ji wa hiɔwe Tsɛ ɔ bua jɔɔ wawɛɛ ke e jijɔ ko nɛ laa a kpale e se kɛ ba asafo ɔ mi. Ke wa pueɔ wa yi mi tɛ ngɛ Yehowa mi mi sami ɔ, kɛ e mɔbɔ nami ɔ, kɛ e dloomi ɔ he ɔ, suɔmi nɛ wa ngɛ kɛ ha lɛ ɔ mi maa wa wawɛɛ.—Luka 1:78. w24.08 31 ¶16-17

Kaa Yesu ngmɛ blɔ nɛ ni ɔmɛ wo lɛ matsɛ ɔ, jinɛ lɔ ɔ ko tsɔɔ kaa e fĩ Yudabi nɛ jamɛ a be ɔ mi ɔ, a ngɛ Roma nɔ yemi ɔ sisi ɔ se, nɛ e kɛ e he wo ma kudɔmi sanehi a mi. Se Yesu pee we jã. “Lɛ pɛ e je kɛ ho yoku ɔ nɔ ya.” E ngɛ mi kaa ni ɔmɛ ngɛ e nɔ nyɛe wawɛɛ mohu lɛɛ, se kɛ̃ ɔ, e kɛ e he wui ma kudɔmi sanehi a mi. Enɛ ɔ ji nɔ́ ko nɛ he hia nɛ wɔ tsuo wa ma nyɛ maa kase! Ngɛ anɔkuale mi ɔ, nɔ ko nɔ ko be wɔ dee kaa waa gu nyakpɛ blɔ nɔ kɛ ha nihi niye ní, wa tsa hiɔtsɛmɛ loo waa ye matsɛ. Se kɛ̃ ɔ, eko ɔ, nihi maa nyɛ wa nɔ kaa waa fɔ sɔ loo wa fĩ nɔ ko nɛ a susu kaa e ma nyɛ ma tsake níhi ngɛ ma a mi ɔ se. Ke e ba jã a, e sa nɛ wa kai Yesu nɔ hyɛmi nɔ́ ɔ. E kɛ e he wui ma kudɔmi sanehi a mi, nɛ pee se po ɔ, e de ke: “Ye Matsɛ Yemi ɔ, pi je nɛ ɔ mi nɔ́.” (Yoh. 17:14; 18:36) Kristofohi nɛ a ngɛ mwɔnɛ ɔ hu bɔɔ mɔde kaa a maa kase Yesu nɔ hyɛmi nɔ́ ɔ. Enɛ ɔ he ɔ, wa fĩɔ Mawu Matsɛ Yemi ɔ se, nɛ wa fiɛɛɔ Matsɛ Yemi ɔ he sɛ gbi ɔ kɛ haa nihi, nɛ wa sɔleɔ kaa Matsɛ Yemi ɔ nɛ ba zugba a nɔ.—Mat. 6:10. w24.12 4 ¶5-6

Ke o kase nɔ́ ko ɔ, mo hla blɔhi a nɔ nɛ o maa gu konɛ o ngɔ nɔ́ nɛ o kase ɔ kɛ tsu ní. Kaa nɔ hyɛmi nɔ́ ɔ, moo kase Yehowa dami sane yemi ɔ kɛ gu nihi a hɛ mi nɛ o be hyɛe ɔ nɔ. Moo kase suɔmi nɛ Yesu ngɛ kɛ ha e Tsɛ ɔ kɛ ni kpahi ɔ kɛ gu o pɛɛ si nɛ o maa fia kaa o maa pee nɔ́ nɛ Yehowa suɔ ɔ nɔ. Jehanɛ hu ɔ, o ma nyɛ maa pee jã kɛ gu nyɛmimɛ kpahi nɛ o maa ye bua mɛ ɔ nɔ, ke jã peemi be gbɔjɔɔ be komɛ po. Ke o fiɛɛ kɛ ha nihi konɛ mɛ hu a ná hemi kɛ yemi ngɛ kpɔmi nɔ́ ɔ mi ɔ, lɔ ɔ hu tsɔɔ kaa o ngɛ Yesu kasee. Ke wa ya nɔ nɛ wa kase kpɔmi nɔ́ ɔ he ní ɔ, suɔmi nɛ wa ngɛ kɛ ha Yehowa kɛ Yesu ɔ mi maa wa wawɛɛ, nɛ mɛ hu a maa ya nɔ maa suɔ wɔ wawɛɛ. (Yak. 4:8) Enɛ ɔ he ɔ, nyɛ ha nɛ waa ngɔ níhi nɛ Yehowa to he blɔ nya kɛ ha wɔ ɔ kɛ tsu ní konɛ waa ya nɔ nɛ waa kase kpɔmi nɔ́ ɔ he ní. w25.01 25 ¶16-17

A ma nyɛ maa tsɔɔ mwɔnɛ ɔ ngmami ɔ sisi hu ke: “O je ye he yayami ɔmɛ tsuo kɛ je o hɛ mi.” Nɔ́ he tomi nɔ́ nɛ ɔ tsɔɔ kaa ke nɔ ko pee yayami nɛ e tsake e tsui ɔ, Yehowa sakeɔ e yayami ɔ kɛ fɔɔ he kulaa nɛ e hyɛ we hu. A ma nyɛ maa tsɔɔ munyu nɛ ɔ sisi hu kaa: “O ha nɛ e pee kaa nɔ́ nɛ [i pee we yayami] ko hyɛ.” Baiblo ɔ ngɔ nɔ́ he tomi nɔ́ kpa ko hu kɛ tsu ní kɛ ma oti nɛ ɔ nɔ mi ngɛ Mika 7:​18, 19 ɔ. Baiblo ɔ de ngɛ lejɛ ɔ kaa Yehowa muɔɔ wa yayami ɔmɛ kɛ ya pueɔ wo ɔ sisi tɔɔ. Ngɛ blema be ɔ mi ɔ, e maa ye kaa nɔ ko ma ya wo nɔ́ ko nɛ a sake kɛ fɔ wo ɔ sisi tɔɔ. Nɔ́ he tomi ní nɛ ɔmɛ ye bua wɔ nɛ wa na kaa ke Yehowa kɛ wa yayami ɔmɛ ke wɔ ɔ, e kɛ keɔ wɔ kulaa, nɛ e he hia we nɛ wa he nile nɛ bu wɔ fɔ hu. Nɔ́ nɛ David de ɔ ji anɔkuale, “nihi nɛ a ngɔ a mlaa nɔ tɔmi ní peepeehi kɛ ke mɛ nɛ́ a ha a yayamihi a nɔ ha mɛ ɔ ngɛ bua jɔmi.” (Rom. 4:7) Enɛ ɔ tsɔɔ kaa Yehowa kɛ tɔmi keɔ kulaa! w25.02 9 ¶7-8

Paradeiso ko ngɛ zugba a nɔ amlɔ nɛ ɔ, nɛ nihi nɛ a ngɛ mi ɔ kɛ hɛdɔ ngɛ ní kpakpahi tsue. Nimli ayɔhi abɔ nɛ a ngɛ paradeiso nɛ ɔ mi ɔ ngɛ tue mi jɔmi nitsɛnitsɛ. Nihi nɛ a ngɛ paradeiso nɛ ɔ mi ɔ fia a pɛɛ si kaa a be mi jee gblegbleegble. Jehanɛ hu ɔ, a suɔ nɛ nihi babauu nɛ a ba piɛɛ a he ngɛ si himi nɛ se be nɛ ɔ mi. Mɛni paradeiso he munyu lɛ wa ngɛ tue ɔ? Lɔ ɔ ji mumi mi paradeiso ɔ nɛ! E ngɛ mi kaa wa ngɛ Satan je yaya nɛ ninyɛ hyi lɛ tɔ ɔ mi mohu lɛɛ, se Yehowa ha nɛ tue mi jɔmi kɛ kake peemi ngɛ e we bi a kpɛti. Enɛ ɔ sa kadimi wawɛɛ! (1 Yoh. 5:19; Kpoj. 12:12) Wa Mawu nɛ e ngɛ suɔmi ɔ naa ní yayahi nɛ ngɛ nɔ yae ngɛ je ɔ mi ɔ, enɛ ɔ he ɔ, e poɔ e sɔmɔli a he piɛ konɛ a ya nɔ nɛ a sɔmɔ lɛ kɛ bua jɔmi. Mawu Munyu ɔ tsɔɔ kaa mumi mi paradeiso ɔ ngɛ kaa “wesa he,” loo “abɔɔ kɛ e mi nyu babauu.” (Yes. 4:6; 58:11) Yehowa jɔɔ nihi nɛ a ngɛ mumi mi paradeiso ɔ mi ɔ wawɛɛ. Enɛ ɔ he ɔ, e ngɛ mi kaa wa ngɛ nyagbe ligbi ɔmɛ a mi mohu lɛɛ, se wa ngɛ slɔkee nɛ wa bua jɔɔ wa he.—Yes. 54:14; 2 Tim. 3:1. w24.04 20 ¶1-2

Ke o suɔ nɛ o sɛ gba si himi mi ɔ, e ngɛ heii kaa o sɔle konɛ Yehowa nɛ ye bua mo nɛ o ná nɔ ko. Ngɛ anɔkuale mi ɔ, Yehowa wui nɔ ko si kaa e ma ha lɛ nɔ ko nɛ e kɛ lɛ nɛ sɛ gba si himi mi. Se e le o hiami níhi kɛ bɔ nɛ o ngɛ he nue ha, nɛ e maa ye bua mo konɛ o na nɔ ko nɛ sa nɛ o kɛ lɛ nɛ sɛ gba si himi mi. Enɛ ɔ he ɔ, yaa nɔ nɛ o de lɛ o hiami níhi kɛ bɔ nɛ o ngɛ he nue ha. (La 62:8) Moo sɔle konɛ Yehowa nɛ ha mo nile kɛ tsui si tomi. (Yak. 1:5) Ke o ná we nɔ ko nɛ sa nɛ o kɛ lɛ maa sɛ gba si himi mi amlɔ nɛ ɔ po ɔ, Yehowa wo si kaa e maa ya nɔ maa hyɛ o nɔ, e ma je suɔmi kpo kɛ tsɔɔ mo, nɛ e ma ha nɛ o bua maa jɔ. (La 55:22) Kɔkɔ bɔmi: Ke o ngɛ hlae nɛ o kɛ nɔ ko nɛ sɛ gba si himi mi ɔ, moo hyɛ saminya nɛ o ko ngɔ lɔ ɔ kɛ pee nɔ́ titli ngɛ o si himi mi. (Filip. 1:10) Ke o sɛ gba si himi mi jio, o sɛ we mi jio, pi lɔ ɔ nɛ maa tsɔɔ kaa o ma ná bua jɔmi nitsɛnitsɛ, mohu ɔ, huɛ bɔmi nɛ ngɛ o kɛ Yehowa nyɛ kpɛti ɔ ji nɔ́ nɛ ma ha mo bua jɔmi nitsɛnitsɛ. (Mat. 5:3) Amlɔ nɛ ɔ nɛ o sɛ we gba si himi mi lolo ɔ, o ma nyɛ ma ná he blɔhi fuu kɛ bli o sɔmɔmi ní tsumi ɔ mi. (1 Kor. 7:​32, 33) Enɛ ɔ he ɔ, o kɛ o be nɛ tsu ní saminya. w24.05 21 ¶4; 22 ¶6

Ke nyɛ ngɛ nyɛɛe kɛ ha gba si himi mi sɛmi ɔ, be enyɛmɛ e sa nɛ e ye? Ke o kɛ oya yemi mwɔ yi mi kpɔ ɔ, o ma nyɛ maa na mi nɔ́. (Abɛ 21:5) Enɛ ɔ he ɔ, nyɛ ha nɛ be nɛ pue mi saii konɛ nyɛɛ le nyɛ sibi saminya. Se kɛ̃ ɔ, e sɛ nɛ nyɛ ha nɛ be nɛ pue mi tsɔ. Baiblo ɔ de ke: “Ke nɔ ko ngɛ nɔ́ ko blɔ hyɛe nɛ e bɛ mi mla a, e haa nɛ nɔ yeɔ tsui.” (Abɛ 13:12) Mɛni nɛ ni kpahi ma nyɛ maa pee kɛ ye bua nihi nɛ a ngɛ nyɛɛe kɛ ha gba si himi mi sɛmi ɔ? Wa ma nyɛ maa fɔ mɛ nine konɛ a ba piɛɛ wa he kɛ ye ní, a kɛ wɔ nɛ ba pee weku Mawu jami loo waa kɛ mɛ nɛ ya je wa hɛja. (Rom. 12:13) Anɛ e he hia nɛ a ha nɛ nɔ ko nɛ piɛɛ a he, loo nɔ ko nɛ ba wo mɛ kɛ lɔle kɛ ya he ko lo? Anɛ e he hia nɛ a ná he ko nɛ mɛ pɛ a ma nyɛ maa sɛɛ ní ngɛ lo? Ke jã a, anɛ o ma nyɛ maa ye bua lo? (Gal. 6:10) Ke ni komɛ ngɛ nyɛɛe, nɛ a ha mo he blɔ kaa ke a yaa he ko ɔ, o piɛɛ a he ɔ, moo na lɛ kaa e ji yemi kɛ buami nɛ se be nɛ o kɛ ngɛ mɛ hae. E ngɛ mi kaa e sɛ nɛ o si mɛ ni enyɔ ɔmɛ pɛ ngɛ he ko mohu lɛɛ, se moo to níhi a he hɛ nɛ o yɔse kaa be komɛ ngɛ nɛ e sa nɛ mɛ pɛ a sɛɛ ní. w24.05 30 ¶13-14

Asafo mi nikɔtɔmahi bɔɔ mɔde kaa a maa le níhi nɛ ya nɔ loko ji nɔ ɔ pee yayami ɔ. Kaa nɔ hyɛmi nɔ́ ɔ, a ma nyɛ ma bi a he sane nɛ ɔmɛ: Mɛni lɛ ha nɛ huɛ bɔmi nɛ ngɛ yayami peelɔ ɔ kɛ Yehowa a kpɛti ɔ gbɔjɔ ɔ? Anɛ e pɔɛ Baiblo ɔ kasemi ngɛ e dɛ he, aloo e pɔɛ fiɛɛmi yami lo? Anɛ e pɔɛ sɔlemi ha Yehowa lo? Anɛ e ngmɛ blɔ nɛ akɔnɔ yaya ngɛ lɛ kudɔe lo? Mɛnɔmɛ ji e huɛmɛ? Mɛni e kɛ jeɔ e hɛja? Kɛ enɛ ɔ ná e nɔ he wami ha kɛɛ? Anɛ e le bɔ nɛ ní nɛ ɔmɛ nɛ e pee ɔ dɔ Yehowa nɛ ji e Tsɛ ɔ ha lo? Asafo mi nikɔtɔma amɛ ma nyɛ ma bi yayami peelɔ ɔ sanehi nɛ ma ha nɛ e susu níhi nɛ puɛ huɛ bɔmi nɛ ngɛ e kɛ Yehowa a kpɛti, nɛ lɔ ɔ ha nɛ e ya pee yayami ɔ he. Se kɛ̃ ɔ, e sa nɛ asafo mi nikɔtɔma amɛ nɛ a je mi mi jɔmi mi nɛ a bi lɛ sane nɛ ɔmɛ, se e sa nɛ a hyɛ nɛ hi nɛ a ko ya bi lɛ sane nɛ maa pee kaa a ngɛ hlae nɛ a le e laami mi sanehi nɛ e he hia we kaa asafo mi nikɔtɔma amɛ nɛ a le ɔ. (Abɛ 20:5) Jehanɛ hu ɔ, asafo mi nikɔtɔma amɛ ma nyɛ maa ngɔ nɔ́ he tomi níhi kɛ ye bua yayami peelɔ ɔ konɛ e susu nɔ́ nɛ e pee ɔ he, nɛ e na nɔ́ he je nɛ nɔ́ nɛ e pee ɔ ji yayami nɛ hɛdɔ ngɛ he ɔ. Eko ɔ, kekle be nɛ nikɔtɔma amɛ kɛ nɔ nɛ pee yayami ɔ maa kpe ɔ, e maa hao wawɛɛ ngɛ nɔ́ nɛ e pee ɔ he. E ma nyɛ maa ba kaa e ma pia e he ngɛ nɔ́ nɛ e pee ɔ he. w24.08 22 ¶9-11

Yesu kɛ kã fiɛɛ “Matsɛ Yemi ɔ he sane kpakpa a,” ejakaa e le kaa lɔ ɔ ji ní tsumi nɛ Mawu suɔ kaa e tsu. Yesu ngɔ fiɛɛmi ní tsumi ɔ kɛ pee nɔ́ titli ngɛ e si himi mi. Benɛ e piɛ bɔɔ nɛ e maa gbe e sɔmɔmi ní tsumi ɔ nya po ɔ, e hia blɔ kɛ “je mahi a mi kɛ ya mahi a mi, kɛ kɔpehi a mi kɛ ya kɔpehi a mi” nɛ e ya tsɔɔ nihi ní. (Luka 13:22) Jehanɛ hu ɔ, e tsɔse kaseli kpa komɛ konɛ mɛ hu a fiɛɛ kɛ kã. (Luka 10:1) Mwɔnɛ hu ɔ, sane kpakpa a nɛ wa maa fiɛɛ ɔ ji nɔ́ titli nɛ Yehowa kɛ Yesu suɔ kaa waa ngɔ wa juɛmi kɛ ma nɔ. (Mat. 24:14; 28:​19, 20) Ke wa naa nihi kaa bɔ nɛ Yehowa naa mɛ ɔ, lɔ ɔ maa ye bua wɔ konɛ waa kɛ kã nɛ tsu fiɛɛmi ní tsumi ɔ wawɛɛ. Yehowa suɔ nɛ nihi fuu nɛ a bu sane kpakpa a tue nɛ a kɛ tsu ní. (1 Tim. 2:​3, 4) Enɛ ɔ he ɔ, e tsɔseɔ wɔ konɛ wa nyɛ nɛ waa fiɛɛ yi wami hemi sɛ gbi ɔ saminya. Ke nihi bui wɔ tue amlɔ nɛ ɔ po ɔ, eko ɔ, a ma ná he blɔ kɛ pee jã pee se loko amanehlu ngua a maa ba nyagbe. w25.03 15-16 ¶5-7

E sa nɛ Kristofono fɛɛ Kristofono nɛ e da e he nile nɛ e kɛ Baiblo ɔ tsɔse ɔ nɔ kɛ mwɔ e yi mi kpɔ ngɛ bɔ nɛ e kɛ nihi nɛ a je mɛ kɛ je asafo ɔ mi ɔ maa hi si ha a he. Ni komɛ ma nyɛ maa ma a juɛmi nya si kaa ke nɔ ko kaa jã ba asafo mi kpe ɔ, a ma nga lɛ loo a ma nya e he. Se e sɛ nɛ waa kɛ lɛ nɛ sɛɛ ní be kɛkɛɛ, loo waa kɛ lɛ nɛ bla kɛ pee ní kpahi. Baiblo ɔ tsɔɔ kaa e sɛ nɛ wa nga yayami peeli pɔtɛɛ komɛ. Ke wa nga nihi kaa jã a, lɔ ɔ tsɔɔ kaa waa ‘kɛ mɛ pee kake ngɛ a ní tsumi yayami ɔmɛ a mi.’ (2 Yohane 9-11) Ngmami nɛ ɔ kɔɔ hemi kɛ yemi kuali kɛ nihi nɛ a woɔ ni kpahi he wami konɛ a pee nɔ́ nɛ dɛ ɔ a he. (Kpoj. 2:20) Enɛ ɔ he ɔ, ke nɔ ko ngɛ hemi kɛ yemi kuali a tsɔɔmihi tsɔɔe loo e ngɛ ni kpahi he wami woe konɛ a pee yayami ɔ, asafo mi nikɔtɔma amɛ be blɔ nya toe kaa a ma ya slaa jamɛatsɛ ɔ. Se kɛ̃ ɔ, hɛnɔkami ngɛ kaa e hɛ maa ba e he nɔ ekohu. Se ke loloolo ɔ, e pee we tsakemi ɔ, lɛɛ e sɛ nɛ wa nga lɛ loo waa fɔ lɛ nine kɛ ba asafo mi kpe. w24.08 30-31 ¶14-15

Benɛ Yesu lɛ asafo kuu ko se ɔ, e ha nɛ e bɔfo ɔmɛ sɛ lɛ mi nɛ a je kpɔ ɔ mi kɛ ho Kapenaum ya. Yesu hu je a he kɛ ho yoku ɔ nɔ ya, konɛ e kɛ yu e he ngɛ asafo kuu ɔ nɛ a ngɛ hlae nɛ a wo lɛ matsɛ ɔ he. (Yoh. 6:​16-20) Benɛ bɔfo ɔmɛ ngɛ wo ɔ nɔ kɛ yaa a, kɔɔhiɔ nɛ nya wa ko fia, enɛ ɔ ha nɛ oslɔke bɔni kumi wawɛɛ. Kɛkɛ nɛ Yesu nyɛɛ wo ɔ nɔ kɛ ba a ngɔ. Nɛ e de bɔfo Petro kaa lɛ hu e nyɛɛ wo ɔ nɔ kɛ ba e ngɔ. (Mat. 14:​22-31) Benɛ Yesu sɛ lɛ ɔ mi ɔ, kɔɔhiɔ nɛ nya wa a kpa fiami. Enɛ ɔ ha nɛ kaseli ɔmɛ a he mi po nɛ a de ke: “Mawu Bi ji mo niinɛ.” (Mat. 14:33) E ngɛ nyakpɛ kaa Yesu kaseli ɔmɛ tu munyu nɛ ɔ benɛ Yesu nyɛɛ wo ɔ nɔ se, se pi benɛ e ha ni ɔmɛ abolo ɔ. Mo kadi nɔ́ nɛ Maako de ngɛ sane nɛ ɔ he ɔ. E ngma ke: “[Bɔfo ɔmɛ] a nya kpɛ a he wawɛɛ nitsɛ, ejakaa a nui nɔ́ nɛ abolo ɔ tsɔɔ ɔ sisi.” (Maak. 6:​50-52) Ngɛ anɔkuale mi ɔ, kaseli ɔmɛ nui sisi kaa Yehowa ha Yesu he wami nɛ e kɛ pee nyakpɛ ní nguanguahi nɛ pã nyakpɛ blɔ nɔ nɛ e gu kɛ lɛ nimli babauu ɔ po. w24.12 5 ¶7

Wa ma nyɛ maa tsɔɔ kaa wa bua jɔ suɔmi nɛ Yehowa je kpo ɔ he ke ji kaa wa maa pee nɔ́ fɛɛ nɔ́ nɛ wa ma nyɛ ngɛ Kaimi be ɔ mi kɛ ha nɛ Yehowa na kaa wa bua jɔ kpɔmi nɔ́ ɔ he. Ngɛ wa he nɛ wa ma dla kɛ ha Kaimi ɔ se ɔ, wa ma nyɛ maa fɔ ní kpahi nine konɛ a ba eko. Moo tsɔɔ nihi nɛ o maa fɔ mɛ nine ɔ níhi nɛ maa ya nɔ ngɛ Kaimi ɔ sisi. O ma nyɛ ma je videohi nɛ ji Mɛni He Je Nɛ Yesu Gbo? kɛ Kai Yesu Gbenɔ ɔ nɛ ngɛ jw.org ɔ nɔ ɔ kɛ tsɔɔ mɛ. E sa nɛ asafo mi nikɔtɔmahi nɛ a bɔ mɔde kaa a maa fɔ nihi nɛ a kpa fiɛɛmi kɛ asafo mi kpehi yami ɔ nine. Ke Yehowa jijɔhi nɛ a laa a kpɛti ni komɛ kpale ba piɛɛ e to kuu ɔ he ɔ, hyɛ bɔ nɛ bua jɔmi maa ba hiɔwe kɛ zugba a nɔ ha! (Luka 15:​4-7) Ke wa ya Kaimi ɔ, nyɛ ha nɛ wa kɛ pee oti kaa wa ma nya nɔ fɛɛ nɔ he, titli ni hehi kɛ nihi nɛ a ba Kaimi ɔ kɛ ɔ. Wa suɔ nɛ a hɛ nɛ mwɔ si!—Rom. 12:13. w25.01 29 ¶15

Kpɔmi nɔ́ ɔ yeɔ buaa wɔ nɛ wa naa kaa Yehowa yeɔ dami sane, se nɔ́ nɛ pe kulaa a, e yeɔ buaa wɔ nɛ wa naa bɔ nɛ suɔmi nɛ Yehowa ngɛ kɛ ha wɔ ɔ mi kuɔ ha. (Yoh. 3:16; 1 Yoh. 4:​9, 10) Kpɔmi nɔ́ ɔ ha nɛ wa na kaa Yehowa suɔ nɛ waa hi si kɛ ya neneene, nɛ waa piɛɛ e weku ɔ he. Mo susu he nɛ o hyɛ: Benɛ Adam pee yayami ɔ, Yehowa fiee lɛ kɛ je e weku ɔ mi. Enɛ ɔ he ɔ, Adam sisi bimɛ tsuo nɛ a fɔ ɔ piɛɛ we Yehowa weku ɔ he. Se kɛ gu kpɔmi nɔ́ ɔ nɔ ɔ, Yehowa ngɔɔ wa yayami kɛ keɔ wɔ, nɛ bɔɔbɔɔbɔɔ ɔ, e maa ngɔ adesahi tsuo nɛ a ngɛ hemi kɛ yemi ngɛ e mi nɛ a buɔ lɛ tue ɔ kɛ ba e weku ɔ mi. Amlɔ nɛ ɔ po ɔ, Yehowa kɛ wa yayami ɔmɛ keɔ wɔ nɛ enɛ ɔ haa nɛ huɛ bɔmi kpakpa hiɔ waa kɛ lɛ kɛ wa nyɛmimɛ Kristofohi wa kpɛti. Ngɛ anɔkuale mi ɔ, Yehowa suɔ wɔ wawɛɛ nitsɛ!—Rom. 5:​10, 11. w25.01 21 ¶6

E ji anɔkuale kaa kpɔmi nɔ́ ɔ ji nike ní nɛ he jua wa wawɛɛ nɛ Yehowa kɛ ha wɔ! (2 Kor. 9:15) Akɛnɛ Yesu ngɔ e wami kɛ sã afɔle he je ɔ, huɛ bɔmi kpakpa ma nyɛ maa hi o kɛ Yehowa Mawu nyɛ kpɛti. Jehanɛ hu ɔ, o ma nyɛ maa hyɛ blɔ kaa o maa hi si kɛ ya neneene. Enɛ ɔ he ɔ, wa ngɛ yi mi tomihi fuu a he je nɛ e sa kaa wa je hɛsa kpo kɛ ha Yehowa ngɛ kpɔmi nɔ́ ɔ nɛ e je suɔmi mi nɛ e kɛ ha wɔ ɔ he je! (Rom. 5:8) Bɔ nɛ pee nɛ waa ya nɔ nɛ wa je hɛsa kpo, nɛ wa ko na kpɔmi nɔ́ ɔ kaa nɔ́ ko nyafii ɔ, Yesu to blɔ nya konɛ a kai e gbenɔ ɔ daa jeha. (Luka 22:​19, 20) Jeha nɛ ɔ, wa ma kai Yesu gbenɔ ɔ So, April 2, 2026. Atsinyɛ jemi ko be he kaa wɔ tsuo wa ngɛ blɔ nya toe nɛ waa ya. Ngɛ Kaimi be ɔ mi ɔ, ke wa ná be kɛ pue wa yi mi tɛ ngɛ nɔ́ nɛ Yehowa kɛ e Bi ɔ pee kɛ ha wɔ ɔ he ɔ, wa ma ná he se wawɛɛ. w25.01 20 ¶1-2

Ke o ya nɔ nɛ o pue o yi mi tɛ ngɛ nɔ́ nɛ Yehowa Mawu kɛ Yesu Kristo pee kɛ ha wɔ ɔ he ɔ, lɔ ɔ maa ye bua mo nɛ o kase níhi fuu kɛ kɔ suɔmi nɛ a ngɛ kɛ ha wɔ ɔ he. Ngɛ jeha nɛ ɔ Kaimi be ɔ mi ɔ, o ma nyɛ ma he be kɛ kane Sane Kpakpa womi ɔmɛ ekomɛ. Koo bɔ mɔde kaa o maa kane ngmamihi fuu ngɛ si himi nya. Mohu ɔ, mo ná tsui kɛ kane ní ɔ, nɛ o hyɛ kaa o maa na yi mi tomi kpahi a he je nɛ e sa kaa o suɔ Yehowa kɛ Yesu. Ke o ngɛ anɔkuale ɔ mi jeha babauu ji nɛ ɔ, o ma nyɛ maa hyɛ ke ji loloolo ɔ, ní hehi ngɛ nɛ e sa nɛ o kase kɛ kɔ Mawu dami sane yemi ɔ, e suɔmi ɔ, kɛ kpɔmi nɔ́ ɔ he lo. Anɔkuale sane ji kaa ní hehi fuu ngɛ nɛ wa ma nyɛ maa kase kɛ kɔ ní nɛ ɔmɛ kɛ ekpahi a he. Lɔ ɔ, moo bɔ mɔde nɛ o kase asafo ɔ womi ɔmɛ konɛ o ná he se. w25.01 24-25 ¶13-15