May

Benɛ Yehowa kpɔ̃ e we bi kɛ je nyɔguɛ tso mi ngɛ Egipt ɔ, e hla osɔfohi konɛ a sɔmɔ ngɛ kpe he bo tsu ɔ mi. E hla Levibi ɔmɛ konɛ a tsu ní tsumi kpahi ngɛ kpe he bo tsu ɔ mi. Se anɛ lɔ ɔ tsɔɔ kaa huɛ bɔmi kpakpa hi nihi nɛ a sɔmɔ ngɛ kpe he bo tsu ɔ mi kɛ nihi nɛ a kɛ kpe he bo tsu ɔ he kɛ we ɔ a kpɛti pe ni kpa amɛ lo? Dɛbi! Mɛni he je? Ejakaa Yehowa hlɛ nɔ mi. Huɛ bɔmi kpakpa ma nyɛ maa hi Israel bimɛ tsuo nɛ a ngɛ sito he ɔ kɛ Yehowa a kpɛti. Kaa nɔ hyɛmi nɔ́ ɔ, Yehowa bɔ mɔde kaa e ma ha nɛ Israelbi ɔmɛ tsuo nɛ a na bɔku titima kɛ la titima a nɛ ba daa kpe he bo tsu ɔ yi mi ɔ. (2 Mose 40:38) Ke bɔku ɔ ho he kpa ya a, Israelbi nɛ a kɛ kpe he bo tsu ɔ he kɛ, kɛ nihi nɛ a ngɛ kpe he bo tsu ɔ kasa nya a tsuo naa, nɛ a buaa a tlomi ɔmɛ kɛ a bo tsu ɔmɛ a nya, nɛ mɛ tsuo a jeɔ sito he ɔ. (4 Mose 9:​15-23) Jã nɔuu kɛ̃ nɛ mwɔnɛ hu ɔ, he fɛɛ he nɛ wa ngɛ ɔ, Yehowa hyɛɔ wa nɔ, nɛ e poɔ wa he piɛ nɛ e jeɔ suɔmi kpo kɛ tsɔɔ wɔ. w24.06 4 ¶10-12

David wami ya je oslaa mi. E binyumu Absalom mwɔ e yi mi kpɔ kaa e ma kpɔ̃ matsɛ yemi ɔ ngɛ e dɛ. (2 Sam. 15:​12, 13) E sa nɛ David nɛ e tu fo kɛ je Yerusalem nɔuu! Benɛ David sɔmɔli ɔmɛ ngɛ jee ɔ, e le kaa e sa nɛ a kpɛti nɔ ko nɛ e hi Yerusalem konɛ e ha nɛ e le ga nɛ Absalom ngɛ toe ɔ. Enɛ ɔ he ɔ, David ha nɛ Zadok kɛ osɔfo kpa amɛ kpale kɛ ho Yerusalem ya konɛ a de lɛ níhi nɛ ngɛ nɔ yae ɔ. (2 Sam. 15:​27-29) Enɛ ɔ ma bi nɛ a hyɛ a he nɔ saminya. David de Zadok kɛ Hushai nɛ a ji e huɛmɛ nɛ a yeɔ lɛ anɔkuale ɔ kaa a ye bua lɛ kɛ to ga ko. (2 Sam. 15:​32-37) E sa nɛ Hushai nɛ e pee e ní kaa nɔ́ nɛ e fĩ Absalom se konɛ e wo lɛ ga ngɛ blɔ nɔ nɛ e maa gu kɛ hwu kɛ si David ɔ he. Enɛ ɔ ma ha nɛ David nɛ ná be konɛ e kɛ dla e he saminya. Absalom bu Hushai ga womi ɔ tue, nɛ Hushai hu de Zadok kɛ Abiatar nɔ́ nɛ ba a. (2 Sam. 17:​8-16) Lɔ ɔ se ɔ, nyumu enyɔ nɛ ɔmɛ bɔ mɔde nɛ a ha nɛ David le ga nɛ Absalom to ɔ. Enɛ ɔ ye bua kɛ po David wami he piɛ.—2 Sam. 17:​21, 22. w24.07 4-5 ¶9-10

Yehowa sɔmɔli komɛ ngɛ nɛ a he nile buɔ mɛ fɔ ngɛ yayami ko nɛ a pee loko a baptisi mɛ aloo ngɛ a baptisimi se ɔ he. Se e sɛ nɛ wa hɛ nɛ je nɔ kaa Yehowa suɔ wɔ wawɛɛ. Enɛ ɔ he ɔ, e ngɔ kpɔmi nɔ́ ɔ kɛ ha konɛ e ngɔ wa tɔmi ɔmɛ kɛ ke wɔ. Wa ma nyɛ ma ná nɔ mi mami kaa Yehowa suɔ nɛ wa bua nɛ jɔ kpɔmi nɔ́ ɔ he. Yehowa ha wɔ nɔ mi mami kaa ke ‘wa dla waa kɛ lɛ wa kpɛti’ ɔ, e kɛ wa tɔmi ɔmɛ maa ke wɔ kulaa. Wa bua jɔ wawɛɛ kaa Yehowa nɛ ji wa Tsɛ nɛ ngɛ suɔmi ɔ kɛ wa tɔmi ɔmɛ keɔ wɔ kulaa, nɛ e kaii we hu! Ngɛ jamɛ a be ɔ mi nɔuu ɔ, e hɛ ji ní kpakpahi nɛ wa pee kɛ be ɔ nɔ. (La 103:​9, 12; Heb. 6:10) Ke o ngɛ haoe ngɛ yayami ko nɛ o pee kɛ be ɔ he ɔ, moo bɔ mɔde kaa o maa ngɔ o juɛmi kɛ ma nɔ́ nɛ o ngɛ pee amlɔ nɛ ɔ, kɛ nɔ́ nɛ o ma nyɛ maa pee hwɔɔ se ɔ nɔ. O be nyɛe ma tsake nɔ́ ko nɛ o pee kɛ be ɔ. Se o ma nyɛ maa ya nɔ ma je Yehowa yi nɛ o pee nɔ́ nɛ e suɔ amlɔ nɛ ɔ, nɛ o ma nyɛ ma susu ní kpakpahi nɛ e wo si kaa e kɛ ma ha mo hwɔɔ se ɔ a he hulɔ. w24.10 8 ¶8-9

Ke o ngɛ Baiblo ɔ kanee nɛ o yɔse kaa e he hia nɛ o pee tsakemihi fuu ngɛ ní komɛ a mi ɔ, be komɛ ɔ, o kɔni mi ma nyɛ ma jɔ̃. Kaa nɔ hyɛmi nɔ́ ɔ, moo ngɔ lɛ kaa ligbi ko ɔ, o kane ngmami ko nɛ tsɔɔ kaa e sɛ nɛ waa hyɛ nɔ hɛ mi. (Yak. 2:​1-8) Kɛkɛ nɛ o na kaa o ma nyɛ maa pee tsakemi ngɛ bɔ nɛ o kɛ nihi yeɔ ha a he. Enɛ ɔ he ɔ, o ma nya si kaa o maa pee tsakemi. Se e nɔ jena pɛ ɔ, o kpale kane ngmami ko nɛ tsɔɔ kaa e sa nɛ waa hyɛ wa munyu tutui saminya. (Yak. 3:​1-12) Kɛkɛ nɛ o yɔse kaa be komɛ ɔ, o kɛ mi mi jɔmi tui munyu, nɛ o munyu tutui wui nihi he wami. Enɛ ɔ he ɔ, o fia o pɛɛ si kaa o maa ngɔ o munyu tutui kɛ wo ni kpahi he wami. E nɔ jena a, o kpale kane ngmami ko nɛ tsɔɔ kaa e sɛ nɛ waa kɛ je ɔ nɛ bɔ. (Yak. 4:​4-12) Kɛkɛ nɛ o yɔse hu kaa e sa nɛ o hyɛ nɛ hi saminya ngɛ níhi nɛ o kɛ jeɔ o hɛja a he. E nɔ jena a, eko ɔ, o maa nu he kaa o be nyɛe maa pee tsakemi nɛ ɔmɛ tsuo. O kɔni mi nɛ ko jɔ̃. Mo kai kaa loko o ma nyɛ maa wo su ehe ɔ, e ma he be. w24.09 5-6 ¶11-12

Yesu le kaa Yehowa na nɔ́ nɛ e ngɛ mi gblee ɔ, nɛ e ngɛ nɔ mi mami kaa Yehowa ma tsu sane ɔ he ní ngɛ be nɛ sa mi. Ke nɔ ko ye wɔ sane yaya nɛ wa hyɛ wa munyu tutui kɛ wa ní peepee saminya a, lɔ ɔ tsɔɔ kaa wa ngɛ Yesu kasee. Be komɛ ɔ, ke nɔ ko kɛ wɔ ye ngɛ blɔ nɛ dɛ nɔ ɔ, wa ma nyɛ ma ma wa hɛ kɛ fɔ nɔ ke e be nɔ́ ko puɛe. Aloo wa ma nyɛ maa pee dii, ejakaa ke wa tu munyu ɔ, e ma nyɛ maa ngɔ nyagbahi fuu kɛ ba. (Fiɛɛ. 3:7; Yak. 1:​19, 20) Se ngɛ be kpahi a mi ɔ, ke wa na kaa a ngɛ nɔ ko sane yaya yee ɔ, e ma bi nɛ waa tu munyu, nɛ be komɛ hu ɔ, e ma bi nɛ wa fã wa hemi kɛ yemi ɔ he. (Níts. 6:​1, 2) Ke e he ba hia nɛ waa tu munyu ɔ, e sa nɛ waa je mi mi jɔmi kɛ bumi mi kɛ pee jã. Jehanɛ hu ɔ, ke wa ngɔ wa he kɛ “wo Nɔ nɛ e kojoɔ ngɛ dami mi ɔ dɛ mi” ɔ, lɔ ɔ tsɔɔ kaa wa ngɛ Yesu kasee.—1 Pet. 2:23. w24.11 5-6 ¶10-12

Ke yayami peelɔ ko tsake e tsui ɔ, wa bua jɔɔ saminya! (Luka 15:7) Se ke e ba jã a, mɛnɔ lɛ wa ngɔɔ yi jemi ɔ kɛ haa? Asafo mi nikɔtɔma amɛ lo? Mo kai nɔ́ nɛ bɔfo Paulo ngma kɛ kɔ yayami peeli a he ɔ, e de ke: “Eko ɔ, Mawu ma ha nɛ a tsake a tsui.” (2 Tim. 2:25) Enɛ ɔ he ɔ, wa ngɔɔ yi jemi ɔ kɛ haa Yehowa, se pi adesa ko, ejakaa Yehowa ji nɔ nɛ ye bua Kristofono ɔ nɛ e tsake e susumi kɛ e ní peepee ɔ nɛ. Paulo tsɔɔ kaa ke yayami peelɔ ko tsake e tsui ɔ, ní kpakpahi jeɔ mi kɛ baa. E tsɔɔ kaa jamɛ a nɔ ɔ ma nyɛ ma ná anɔkuale ɔ he nile nitsɛnitsɛ, e hɛ ma nyɛ maa ba e he nɔ, nɛ e maa je Satan klama amɛ a mi. (2 Tim. 2:26) Ke yayami peelɔ ko tsake e tsui ɔ, ajla toli ɔmɛ maa to blɔ nya konɛ a ya slaa lɛ nɛ a fia e hemi kɛ yemi ɔ kɛ ma si, konɛ e hwu kɛ si Satan klama amɛ nɛ e pee nɔ́ nɛ da.—Heb. 12:​12, 13. w24.08 23 ¶14-15

Asafo kuu ɔ nɛ Yesu ha mɛ niye ní ɔ ngɔ a ní peepee kɛ tsɔɔ kaa nɔ́ nɛ he hia mɛ pɛ ji a he lo nya hiami níhi. Mɛni he je nɛ wa de jã a? Benɛ Yesu pee nyakpɛ ní ɔ, e nɔ jena a, a na kaa Yesu kɛ e bɔfo ɔmɛ je. Enɛ ɔ he ɔ, a sɛ lɛhi nɛ a je Tiberia kɛ ba a ekomɛ a mi, nɛ a po mi kɛ ho Kapenaum ya konɛ a ya hla Yesu. (Yoh. 6:​22-24) Ke o hyɛ ɔ, anɛ a suɔ kaa a maa kase babauu kɛ kɔ Mawu Matsɛ Yemi ɔ he, nɛ lɔ ɔ he je nɛ a ngɛ lɛ hlae ɔ lo? Dɛbi. Niye ní loo abolo nɛ a ma ná maa ye ɔ he je nɛ a ho lejɛ ɔ ya a nɛ. Kɛ wa plɛ kɛ le enɛ ɔ ha kɛɛ? Mo kadi nɔ́ nɛ ya nɔ benɛ asafo kuu ɔ ya na Yesu ngɛ Kapenaum kasa nya a. Yesu de mɛ kpoo kaa niye ní pɛ he je nɛ a ngɛ lɛ hlae ɔ nɛ. E ngɛ mi kaa a ye ‘abolo ɔ nɛ a tɔ’ mohu lɛɛ, se Yesu de mɛ ke niye ní nɛ a ye ɔ ji “niye ní nɛ e puɛɔ ɔ.” Lɔ ɔ he ɔ, e wo mɛ he wami kaa a hla “niye ní nɛ e ngɛ daa nɛ e haa nɔ neneene wami” ɔ mohu se blɔ. (Yoh. 6:​26, 27) Yesu tsɔɔ kaa e Tsɛ ɔ lɛ ma ha mɛ jamɛ a niye ní ɔ nɛ. w24.12 5 ¶8-9

Loko o maa pee tsɔɔlɔ nɛ e le ní tsɔɔmi saminya a, ke o ngɛ ní tsɔɔe aloo o ngɛ nyɛmi ko ga woe ɔ, bɔɔ mɔde kaa o kɛ nɔ́ nɛ o ngɛ dee ɔ maa da Mawu Munyu ɔ nɔ. Loko nyɛminyumu ko ma nyɛ maa pee jã a, e sa nɛ e kase Baiblo ɔ, kɛ asafo womi ɔmɛ saminya. (Abɛ 15:28) Ke o ngɛ Baiblo ɔ kasee ɔ, moo bɔ mɔde kaa o ma yɔse bɔ nɛ a tsɔɔ ngmami ɔmɛ a mi ha a saminya, nɛ o kɛ tsu ní ngɛ blɔ nɛ da nɔ. Ke o ngɛ ní tsɔɔe hu ɔ, bɔɔ mɔde wawɛɛ kaa o maa su o tue buli ɔmɛ a tsui he. Jehanɛ hu ɔ, bɔ nɛ pee nɛ o nyɛ nɛ o pee tsɔɔlɔ nɛ e he be ɔ, o ma nyɛ ma bi ga womi kɛ je asafo mi nikɔtɔmahi nɛ a ngɛ níhi a si kpami ɔ a ngɔ. (1 Tim. 5:17) E ngɛ mi kaa e sa nɛ asafo mi nikɔtɔma amɛ nɛ a wo nyɛmimɛ ɔmɛ he wami mohu lɛɛ, se kɛ̃ ɔ, be komɛ ɔ, e he maa hia nɛ a kã nyɛmimɛ ɔmɛ a hɛ mi loo a wo mɛ ga. Se e sa nɛ be fɛɛ be ɔ, a je mi mi jɔmi mi kɛ pee jã. Ke o peeɔ kpoo nɛ o jeɔ suɔmi kpo, nɛ o ngɔɔ o ní tsɔɔmi kɛ daa Baiblo ɔ nɔ ɔ, o ma ba pee tsɔɔlɔ nɛ e he be, ejakaa o ngɛ Tsɔɔlɔ Nɛ Pe Kulaa a nɛ ji Yesu ɔ kasee.—Mat. 11:​28-30; 2 Tim. 2:24. w24.11 24 ¶16

Wa ma nyɛ maa ngɔ wa munyu tutui kɛ wo Yehowa hɛ mi nyami. A woɔ Yehowa we bi he wami konɛ a “la ha Yehowa,” a “je e biɛ ɔ yi,” a “jaje e yi wami hemi ɔ he sane kpakpa a,” nɛ́ a “jaje e hɛ mi nyami ɔ ngɛ je ma amɛ a kpɛti.” (La 96:​1-3) Wa ma nyɛ maa gu blɔ nɛ ɔmɛ tsuo a nɔ kɛ wo wa hiɔwe Tsɛ ɔ hɛ mi nyami. (Níts. 4:29) Wɔ hu wa ma nyɛ maa ngɔ wa níhi nɛ a he jua wa a kɛ wo Yehowa hɛ mi nyami. Kɛ je blema tɔɔ nɛ anɔkuale Kristofohi ngɔɔ a níhi nɛ a he jua wa a kɛ woɔ Yehowa hɛ mi nyami. (Abɛ 3:9) Kaa nɔ hyɛmi nɔ́ ɔ, Israelbi ɔmɛ ngɔ a sika kɛ ní kpahi nɛ a he jua wa a kɛ ha konɛ a kɛ ma sɔlemi we ɔ, nɛ a kɛ hyɛ sɔlemi we ɔ nɔ hulɔ. (2 Ma. 12:​4, 5; 1 Kron. 29:​3-9) Yesu kaseli nɛ a susuɔ nɔ he ɔ ngɔ “mɛ nitsɛmɛ a níhi” kɛ hyɛ Yesu kɛ e bɔfo ɔmɛ a nɔ. (Luka 8:​1-3) Benɛ hwɔ ngua ko ba ngɛ kaseli ɔmɛ a be ɔ mi ɔ, Kristofo ɔmɛ hu ngɔ yemi kɛ buami kɛ ya ha a nyɛmimɛ nɛ a ngɛ hehi nɛ hwɔ ɔ ba ngɛ ɔ. (Níts. 11:​27-29) Mwɔnɛ ɔ, wɔ hu wa ma nyɛ maa wo Yehowa hɛ mi nyami kɛ gu yemi kɛ buami nɛ wa jeɔ wa tsui mi kɛ haa a nɔ. w25.01 4 ¶8; 5 ¶11

Mɛni ye bua Kornelio nɛ e ha nɛ a baptisi lɛ? Baiblo ɔ tsɔɔ kaa, ‘e kɛ e we mi bimɛ ɔmɛ tsuo yeɔ Mawu gbeye.’ Jehanɛ hu ɔ, Kornelio kɛ hɛdɔ sɔleɔ ha Mawu be fɛɛ be. (Níts. 10:2) Benɛ Petro fiɛɛ sane kpakpa a kɛ ha Kornelio ɔ, e kɛ e weku ɔ tsuo ná hemi kɛ yemi ngɛ Kristo mi, nɛ a baptisi mɛ oya nɔuu. (Níts. 10:​47, 48) Kornelio suɔ kaa e maa pee tsakemi saisaa nɛ e he hia kaa e pee ɔ bɔ nɛ pee nɛ e kɛ e weku ɔ tsuo nɛ a nyɛ nɛ a sɔmɔ Yehowa. (Yosh. 24:15; Níts. 10:​24, 33) Jinɛ he blɔ nɛ Kornelio ngɛ ɔ ko nyɛ tsi lɛ blɔ nɛ e ko ba pee we Kristofono. Se Kornelio pee we jã. Anɛ e he maa hia nɛ o pee tsakemi nguahi ngɛ o si himi mi loko o he nɛ su kɛ ha baptisimi lo? Ke jã a, mo ná nɔ mi mami kaa Yehowa maa ye bua mo. Ke o mwɔ yi mi kpɔ kaa o kɛ Baiblo sisi tomi mlaahi ma tsu ní konɛ o nyɛ nɛ o sɔmɔ Yehowa a, e maa jɔɔ o yi mi kpɔ mwɔmi ɔ nɔ. w25.03 5 ¶12-13

Ke o nu lakpa munyu ko kɛ kɔ asafo ɔ loo nyɛmimɛ nɛ a ngɛ asafo ɔ hɛ mi nyɛɛe ɔ a he ɔ, mo kai kaa Mawu he nyɛli gbɛ Yesu kɛ e kaseli ɔmɛ a he lakpa munyuhi kɛ fĩa. Mwɔnɛ ɔ hu ɔ, a ngɛ Yehowa we bi yi mi wae, nɛ a ngɛ a he lakpa munyuhi gbɛe kɛ ngɛ fĩae kaa bɔ nɛ Baiblo ɔ gba kɛ fɔ si ɔ. (Mat. 5:​11, 12) Ke wa yɔse nɔ tutuutu nɛ e hɔɔ si ngɛ lakpa munyu nɛ ɔmɛ a se, nɛ wa pee nɔ́ ko kɛ po wa he piɛ oya nɔuu ɔ, munyu nɛ ɔmɛ be nyɛe maa sisi wɔ. Ke jã a, lɛɛ mɛni e sa kaa waa pee kɛ po wa he piɛ? Mo kua sisimi munyuhi. Bɔfo Paulo tsɔɔ wɔ nɔ́ nɛ e sa kaa waa pee ke wa nu lakpa munyu ko. E de Timoteo konɛ e “fã ni komɛ kaa a ko . . . ngɔ a juɛmi kɛ ma nyaziahi” a nɔ, nɛ a ‘kua munyuhi nɛ wui Mawu hɛ mi nyami ɔ hulɔ. (1 Tim. 1:​3, 4) Wa kuaa lakpa munyuhi ejakaa wa le he nɛ a je, nɛ wa buɔ “munyu kpakpahi” nɛ a ji anɔkuale ɔ tue.—2 Tim. 1:13. w24.04 11 ¶16; 13 ¶17

Mawu suɔ nɛ waa kɛ wa nyɛmimɛ ɔmɛ nɛ pee kake kɛ ja lɛ. Ke wa ya nɔ nɛ wa pɛtɛ anɔkuale ɔ he ɔ, wa ma nyɛ maa pee kake be fɛɛ be. Ke nɔ ko gbɛɔ lakpa munyuhi kɛ fĩaa a, lɔ ɔ ma nyɛ maa ngɔ mi gbami kɛ ba Kristofohi asafo ɔ mi. Enɛ ɔ he je nɛ Mawu bɔ wɔ kɔkɔ kaa waa ‘yu wa he ngɛ a he’ ɔ nɛ. Ke wa pee we jã a, wɔ nitsɛmɛ po wa ma gba kɛ je anɔkuale ɔ he. (Rom. 16:17) Ke wa yɔse anɔkuale ɔ nɛ wa pɛtɛ he saminya a, wa maa hɛ kɛ su Yehowa he wawɛɛ, nɛ wa hemi kɛ yemi ɔ hu mi maa wa. (Efe. 4:​15, 16) Jehanɛ hu ɔ, Satan lakpa tsɔɔmihi nɛ a gbɛ kɛ fĩa a be nyɛe maa sisi wɔ, nɛ Yehowa maa ya nɔ maa po wa he piɛ amlɔ nɛ ɔ, nɛ ngɛ amanehlu ngua a mi hu ɔ, e maa pee jã. Yaa nɔ nɛ o pɛtɛ anɔkuale ɔ he saminya, nɛ “tue mi jɔmi Mawu ɔ kɛ [mo] maa hi si.”—Filip. 4:​8, 9. w24.07 13 ¶16-17

Yesu ngɔ e juɛmi kɛ ma nihi nɛ a kɔni mi jɔ̃ akɛnɛ a ji yayami peeli ɔ nɔ titli, nɛ e de mɛ kaa a ba nyɛɛ e se. Yesu le kaa yayami ji nɔ́ titli nɛ ha nɛ adesahi ngɛ nɔ́ nae. Enɛ ɔ he ɔ, e ye bua nihi nɛ nihi le mɛ wawɛɛ kaa a ji yayami peeli ɔ. Yesu ngɔ nɔ́ he tomi nɔ́ ko kɛ tsu ní, nɛ e de ke: “Nihi nɛ a ngɛ he wami ɔ hia we tsopatsɛ, se ni nɛmɛ nɛ a be he wami lɛɛ a hiaa.” E de hu ke: “I ba konɛ ma ba tsɛ yayami peeli, se pi dali.” (Mat. 9:​12, 13) Ngɛ anɔkuale mi ɔ, Yesu ye nɔ́ nɛ e de ɔ nɔ pɛpɛɛpɛ. Benɛ yo ko ngɔ vo nyu kɛ fɔ Yesu nane he ɔ, Yesu je mi mi jɔmi mi nɛ e kɛ lɛ tu munyu nɛ e ngɔ e yayami ɔmɛ kɛ ke lɛ. (Luka 7:​37-50) E ngɛ mi kaa Yesu le kaa Samaria yo ɔ kɛ nyumu ko nɛ tsa pi e huno ji lɛ ɔ ngɛ mohu lɛɛ, se e tsɔɔ yo ɔ anɔkuale komɛ nɛ a he hia. (Yoh. 4:​7, 17-19, 25, 26) E ngɛ mi kaa adesahi gboɔ akɛnɛ a ji yayami peeli ɔ he je mohu lɛɛ, se Mawu ha Yesu he wami nɛ e kɛ tle nyumuhi, yihi kɛ jokuɛwi kɛ nikɔtɔmahi nɛ a gbo ɔ si.—Mat. 11:5. w24.08 4 ¶9-10

Mɛni blɔ nɔ Yehowa maa gu kɛ wo e biɛ ɔ hɛ mi nyami hwɔɔ se? E maa pee jã kɛ gu dami sane nɛ e maa ye ɔ nɔ. E be kɛe kulaa nɛ Yehowa ma kpata Babilon Ngua a hɛ mi akɛnɛ e gbe e biɛ klɔuklɔu ɔ he guɛ ɔ he je. (Kpoj. 17:​5, 16; 19:​1, 2) Eko ɔ, nihi nɛ a maa na Babilon Ngua a hɛ mi kpatami ɔ a kpɛti ni komɛ ma ba piɛɛ wa he kɛ sɔmɔ Yehowa. Nyagbenyagbe ɔ, Yehowa ma kpata Satan blɔ nya tomihi tsuo a hɛ mi ngɛ Harmagedon ta a mi, nɛ e ma kpata nihi nɛ a teɔ si kɛ woɔ lɛ nɛ a tuɔ musu bɔmi munyu kɛ siɔ e biɛ ɔ a hɛ mi. Se nihi tsuo nɛ a suɔ lɛ nɛ a buɔ lɛ, nɛ a suɔ kaa a maa wo e hɛ mi nyami ɔ lɛɛ, e maa baa a yi. (Maak. 8:38; 2 Tɛs. 1:​6-10) Ngɛ nyagbe ka nɛ maa nyɛɛ Kristo Jeha Akpe Nɔ Yemi ɔ se ɔ mi ɔ, Yehowa ma tsɔ e biɛ ɔ he kɛ pi si. (Kpoj. 20:​7-10) Ngɛ jamɛ a be ɔ mi ɔ, “zugba a nɔ tsuo ma hyi kɛ Yehowa hɛ mi nyami ɔ he nile.” (Hab. 2:14) E ngɛ heii kaa nɔ fɛɛ nɔ nɛ e maa hi wami mi ɔ kɛ hɛ mi nyami nɛ sa Yehowa biɛ ɔ ma ha lɛ. Hyɛ bɔ nɛ enɛ ɔ maa pee bua jɔmi wawɛɛ ha! w25.01 7 ¶15-16

Mɛni ye bua Hebribi nɛ a ji Kristofohi ɔ nɛ a ya nɔ nɛ a fĩ si ngɛ si temi kɛ womi nɛ a kɛ kpe ɔ tsuo se? Bɔfo Paulo le kaa e sa nɛ a ná juɛmi nɛ da ngɛ kahi nɛ a kɛ ngɛ kpee ɔ he. Enɛ ɔ he ɔ, e tsɔɔ kaa ke Kristofohi kɛ kahi ngɛ kpee ɔ, Mawu ma nyɛ maa gu ka nɛ ɔmɛ a nɔ kɛ tsɔse mɛ. Tsɔsemi nɛ ɔ maa ye bua wɔ konɛ waa ya nɔ nɛ wa je Kristofohi a su kpakpahi kpo. Ke Hebribi nɛ a ji Kristofohi ɔ ngɔ a juɛmi kɛ ma ní kpakpahi nɛ ma nyɛ maa je ka nɛ ɔmɛ a mi kɛ ba a nɔ ɔ, e he be wae ha mɛ kaa a ma fĩ si. (Heb. 12:11) Paulo wo Hebribi nɛ a ji Kristofohi ɔ he wami kaa e sa nɛ a pee kã nɛ a kɔni mi nɛ ko jɔ̃ ke a kɛ kahi ngɛ kpee. Ngɛ anɔkuale mi ɔ, loko Paulo ma ba pee Kristofono ɔ, e wa Kristofo ɔmɛ yi mi wawɛɛ, nɛ e na bɔ nɛ nihi kɛ mɛ ye ha. Enɛ ɔ he ɔ, e da blɔ kaa Paulo tsɔɔ nyɛmimɛ ɔmɛ bɔ nɛ a ma plɛ kɛ fĩ si ngɛ yi mi wami mi ha. Jehanɛ ɔ hu ɔ, lɛ nitsɛ hu e le bɔ nɛ a fĩɔ si ngɛ yi mi wami mi ha. Ke e hi kulaa a, benɛ e ba pee Kristofono ɔ, a wa lɛ yi mi si abɔ.—2 Kor. 11:​23-25. w24.09 12-13 ¶16-17

Daa je nɛ maa na a, e sa nɛ waa ngɔ fiɛɛmi ní tsumi ɔ kɛ pee nɔ́ titli ngɛ wa si himi mi. Mɛni he je? Ejakaa be nɛ e piɛ nɛ nyagbe ɔ maa ba a pi kulaa. Mo susu nɔ́ nɛ Yesu de kɛ kɔ fiɛɛmi ní tsumi ɔ he ngɛ nyagbe ligbi ɔmɛ a mi nɛ a ngma ngɛ Maako 13:10 he ɔ he. Ngɛ Mateo womi ɔ mi ɔ, Yesu tsɔɔ kaa a maa fiɛɛ sane kpakpa a ngɛ je ɔ mi tsuo loko “nyagbe ɔ” maa ba. (Mat. 24:14) Munyu nɛ ji “nyagbe ɔ” tsɔɔ be nɛ a kɛ ma kpata Satan je yaya nɛ ɔ hɛ mi. Yehowa to ‘ligbi kɛ ngmlɛfia’ kɛ ha níhi nɛ e be kɛe nɛ maa ya nɔ ɔ. (Mat. 24:36; Níts. 1:7) Daa jenanɛɛ ɔ, wa hɛɔ kɛ suɔ jamɛ a be ɔ he. (Rom. 13:11) Se ngɛ lɔ ɔ tsuo se ɔ, e sa nɛ waa ya nɔ nɛ wa tsu fiɛɛmi ní tsumi ɔ kɛ ya si be nɛ nyagbe ɔ maa ba. Ke wa ngɛ fiɛɛmi ní tsumi ɔ he susue ɔ, e sa nɛ wa bi wa he sane nɛ he hia nɛ ɔ: Mɛni he je nɛ wa fiɛɛɔ sane kpakpa a? Ngɛ anɔkuale mi ɔ, suɔmi lɛ haa nɛ wa fiɛɛɔ. Ke wa tsuɔ fiɛɛmi ní tsumi ɔ, lɔ ɔ tsɔɔ kaa wa bua jɔ sane kpakpa a he, wa suɔ nimli, nɛ nɔ́ nɛ pe kulaa a, wa suɔ Yehowa kɛ e biɛ ɔ. w24.05 14-15 ¶2-3

Fɔli, nyɛɛ wo nyɛ bimɛ ɔmɛ he wami nɛ a susu adebɔ níhi a he. Ke o kɛ o bimɛ ɔmɛ ngɛ nyɛɛe ngɛ kɔpe ko loo nyɛ ngɛ ní tsue ngɛ abɔɔ ko mi ɔ, moo ye bua mɛ nɛ a na bɔ nɛ adebɔ níhi nɛ a ngɛ lejɛ ɔ ngɛ nyakpɛ ha. Ke o pee jã a, e maa ye bua o bimɛ ɔmɛ konɛ a na kaa nɔ ko nɛ́ ngɛ nile wawɛɛ ɔ lɛ to ní nɛ ɔmɛ a he blɔ nya. Kaa nɔ hyɛmi nɔ́ ɔ, ke o to adebɔ níhi fuu a he hɛ ɔ, o maa na kaa a shape loo a patã ngɛ kaa nɔ́ ko nɛ bɔle si si abɔ aloo a yaa kaa nɔ́ ko nɛ ngɛ lokotoo. Je mi si kpali kase patã nɛ ɔmɛ a he ní wawɛɛ. Je mi si kpalɔ ko nɛ a tsɛɛ lɛ ke Nicola Fameli ɔ tsɔɔ kaa ke o hyɛ adebɔ níhi nɛ a patã yaa kaa nɔ́ ko nɛ ngɛ lokotoo ɔ, o maa na kaa mlaa pɔtɛɛ ko lɛ kudɔɔ mɛ tsuo, nɛ a to a nya pɛpɛɛpɛ hulɔ. Bɔ nɛ a to a nya ha pɛpɛɛpɛ ɔ ji nɔ́ nɛ a tsɛɛ ke Fibonacci sequence ɔ nɛ. Wa naa patã nɛ ɔmɛ ngɛ adebɔ níhi fuu a mi. Ekomɛ ji dodoe a kuuhi, ahua he toto, ba mumu komɛ, kɛ mɔmɔ ko nɛ a tsɛɛ ke sunflower a. w24.12 16 ¶7

Mose, David, kɛ Yohane tsuo hi si ngɛ be slɔɔtohi a mi, nɛ a si fɔfɔɛ ɔ hu je ekpa kulaa ngɛ wa nɔ́ ɔ he. Se waa kɛ mɛ sɔ ngɛ blɔhi fuu a nɔ. Kaa nɔ hyɛmi nɔ́ ɔ, a sɔmɔ anɔkuale Mawu ɔ kaa bɔ nɛ wa ngɛ pee ɔ nɔuu. Jehanɛ hu ɔ, kaa bɔ nɛ a pee ɔ, wɔ hu wa sɔleɔ ha Yehowa, waa kɛ wa hɛ fɔɔ e nɔ, nɛ wa biɔ lɛ ga womihi. Nyumuhi anɔkualetsɛmɛ nɛ a hi si blema a ná hemi kɛ yemi ngɛ Yehowa mi nɛ a le kaa Yehowa maa jɔɔ nihi nɛ a buɔ lɛ tue ɔ be fɛɛ be. Wɔ hu wa ngɛ jamɛ a nɔ mi mami ɔ nɔuu. Nyɛ ha nɛ wɔ tsuo waa bu ga womi nɛ nyumu anɔkualetsɛmɛ nɛ wa susu a he ɔ kɛ ha a tue, nɛ waa ye Yehowa mlaa amɛ a nɔ. Ke wa pee jã a, wa maa ye manye ngɛ nɔ́ fɛɛ nɔ́ mi. Ngɛ anɔkuale mi ɔ, wa ma ná wami, nɛ wa “se maa kɛ” ngɛ si himi mi. Ee, wa maa hi si kɛ maa ya neneene! Jehanɛ hu ɔ, wa bua maa jɔ wawɛɛ ejakaa wa le kaa wa pee wa hiɔwe Tsɛ ɔ suɔmi nya ní, nɛ Yehowa hu maa jɔɔ wɔ wawɛɛ pe bɔ nɛ wa ma nyɛ maa hyɛ blɔ.—Efe. 3:20. w24.11 13 ¶20-21

Ngɛ kaseli ɔmɛ a be ɔ mi ɔ, a hla nyɛmimɛ nyumuhi komɛ kaa asafo mi sɔmɔli. (1 Tim. 3:8) Eko ɔ, mɛ ji nihi nɛ a tsu ‘ní tsumihi nɛ a he hia’ nɛ bɔfo Paulo tu he munyu ngɛ mwɔnɛ ɔ ngmami ɔ mi ɔ nɛ. E ngɛ heii kaa asafo mi sɔmɔli tsuɔ ní tsumihi nɛ a he hia wawɛɛ ɔ he ní, bɔ nɛ pee nɛ asafo mi nikɔtɔma amɛ nɛ a nyɛ nɛ a ngɔ a juɛmi kɛ ma ní tsɔɔmi kɛ nyɛmimɛ nɛ a maa slaa mɛ nɛ a wo mɛ he wami ɔ nɔ. Kaa nɔ hyɛmi nɔ́ ɔ, e ma nyɛ maa ba kaa asafo mi sɔmɔli ɔmɛ hyɛ blema Ngmami ɔmɛ a nɔ kɛ ngma eko, aloo a he ní komɛ nɛ a he hia konɛ a kɛ ngma Ngmami ɔmɛ. Mo susu ní tsumi komɛ nɛ a he hia nɛ asafo mi sɔmɔli tsuɔ mwɔnɛ ɔ he nɛ o hyɛ. (1 Pet. 4:10) Ní tsumihi nɛ a tsuɔ ɔ ekomɛ ji nɛ ɔ nɛ: A yeɔ buaa kɛ hyɛɛ asafo ɔ sika nɔ, a toɔ asafo ɔ zugba kpɔ ɔmɛ a he blɔ nya, a sɛɛ womihi kɛ haa asafo ɔ, a tsuɔ audio/video klama amɛ a he ní, a sɔmɔɔ kaa nibwɔhi a kpeeli, nɛ a yeɔ buaa kɛ dlaa Matsɛ Yemi Asa a nɔ hulɔ. Ní tsumi nɛ ɔmɛ tsuo he hia ngɛ asafo ɔ mi, ejakaa e haa nɛ nɔ́ fɛɛ nɔ́ yaa nɔ pɛpɛɛpɛ ngɛ asafo ɔ mi.—1 Kor. 14:40. w24.10 19 ¶4-5

Ke wa kai kaa Yehowa ji Mawu hɛ kalɔ, nɛ e pee klaalo kaa e maa ye bua wɔ ɔ, lɔ ɔ maa wo wɔ he wami nɛ waa da ka fɛɛ ka nya, nyafii jio, ngua jio. Anɔkuale sane ji kaa lɛ ji Ope ɔ nɛ, nɛ e ma nyɛ ma ha wɔ he wami nɛ wa hia a konɛ wa fĩ si. Enɛ ɔ he ɔ, e sa nɛ waa da ka fɛɛ ka nɛ waa kɛ maa kpe ɔ nya. Ke wa na kaa Yehowa ye bua wɔ ngɛ ka nyafinyafihi a mi ɔ, e woɔ wɔ he wami nɛ wa náa nɔ mi mami kaa e maa ye bua wɔ ngɛ ka nguahi hu a mi. Mo susu níhi enyɔ nɛ ha nɛ Matsɛ David ná hemi kɛ yemi nɛ mi wa ngɛ Yehowa mi ɔ he nɛ o hyɛ. Benɛ David ji niheyo nɛ e hyɛɛ e tsɛ ɔ to ɔmɛ a nɔ ɔ, be ko ɔ, osisiblisi ko ba nu jijɔ ɔ eko. Be kpa mi hu ɔ, jata ko hu pee jã nɔuu. Ngɛ si fɔfɔɛ enyɔ nɛ ɔmɛ tsuo a mi ɔ, David pee kã nɛ e fiee lohwe nɛ ɔmɛ a se nɛ e ya kpɔ̃ jijɔ ɔmɛ. Se David ngɔɛ yi jemi ɔ kɛ ha e he, ejakaa e le kaa Yehowa lɛ ye bua lɛ. (1 Sam. 17:​34-37) Be fɛɛ be nɛ David ma pue e yi mi tɛ ngɛ níhi a si kpami nɛ ɔmɛ a he ɔ, e náa nɔ mi mami kaa Mawu hɛ kalɔ ɔ maa wo lɛ he wami hwɔɔ se. w24.06 21 ¶5-6

Kaa nɔ hyɛmi nɔ́ ɔ, ngɔɔ lɛ kaa nɔ ko fɔ mo nine kɛ ha he nya buami ko. Anɛ e sa nɛ o ya lo? Ke o li nɔ nɛ to he nya buami ɔ he blɔ nya aloo o li bɔ nɛ níhi maa ya nɔ ha ngɛ lejɛ ɔ, o ma nyɛ ma bi nɔ nɛ fɔ mo nine ɔ sane komɛ ke: “Jije ní peemi ɔ maa ya nɔ ngɛ, nɛ mɛni be? Anɛ nihi fuu maa ba lo? Mɛnɔ maa hyɛ blɔ nya tomi ɔ nɔ? Mɛnɔmɛ maa ba lejɛ ɔ? Mɛni maa ya nɔ ngɛ lejɛ ɔ? Anɛ a ma gba dã nɛ nyɛ wa lo?” Hetohi nɛ o ma ná kɛ ha sane bimi nɛ ɔmɛ maa ye bua mo konɛ o mwɔ yi mi kpɔ nɛ da. Ke o ba le anɔkualehi nɛ kɔɔ sane ɔ he ta a, mo ná be nɛ o susu si fɔfɔɛ ɔ tsuo he saminya. Kaa nɔ hyɛmi nɔ́ ɔ, ke o ba ná le kaa nihi nɛ a maa ba he nya buami ɔ sisi ɔ be bumi kɛ ha Baiblo sisi tomi mlaahi, loo a ma gba dã nɛ nya wa ngɛ ní peemi ɔ sisi, se a tui blɔ nya konɛ nɔ ko nɛ hyɛ nɛ a ko nu dã kɛ be nɔ ɔ hu nɛɛ? Ke o hyɛ ɔ, he nya buami nɛ ɔ be hoo pee lo? (1 Pet. 4:3) Ke o susu bɔ nɛ níhi maa ya nɔ ha a he ɔ, e maa ye bua mo konɛ o mwɔ yi mi kpɔ nɛ da. w25.01 15 ¶4-5

Yehowa ngɔ nɔ́ he tomi níhi kɛ tsu ní konɛ waa na kaa kɛ gu kpɔmi nɔ́ ɔ nɔ ɔ, e nyɛɔ nɛ e tsuɔ nihi nɛ a tsake a tsui ɔ a he yayamihi kulaa. Ke nɔ́ tsutsuu ko sɛ tade futaa mi ɔ, e jemi yeɔ. Yehowa kɛ nɔ́ he tomi nɔ́ nɛ ɔ tsu ní konɛ wa ná nɔ mi mami kaa e ma nyɛ ma fɔ wa he yayami ɔmɛ kɛ je kulaa. A kɛ yayami to “hiɔ” he hulɔ. (Mat. 6:12; Luka 11:4) Lɔ ɔ he ɔ, be fɛɛ be nɛ wa maa pee yayami kɛ si Yehowa a, e ngɛ kaa nɔ́ nɛ hiɔ nɛ wa ye Yehowa a ngɛ klee. Wa hɛɛ lɛ hiɔ agbo! Se ke Yehowa kɛ wa yayami ke wɔ ɔ, e ngɛ kaa nɔ́ nɛ e po hiɔ nɛ wa hɛɛ lɛ ɔ mi. E hyɛ we blɔ kaa waa wo yayami nɛ e kɛ ke wɔ ɔ he hiɔ. Ke nɔ ko ye hiɔ nɛ a kɛ ke lɛ ɔ, e bua jɔɔ. Jã kɛ̃ nɛ wɔ hu wa bua jɔɔ ke Yehowa ngɔ wa he yayami ɔmɛ kɛ ke wɔ! w25.02 9-10 ¶9-10

Ngɛ anɔkuale mi ɔ, ke fɔli ngɛ wae ɔ, a maa hia yemi kɛ buami ngɛ sika kɛ ní kpahi a blɔ fa mi, nɛ bimɛ fuu kɛ bua jɔmi yeɔ buaa a fɔli ɔmɛ ngɛ enɛ ɔ blɔ fa mi. (1 Tim. 5:4) Se fɔli nɛ a ji Kristofohi ɔ le kaa nɔ́ titli nɛ ma ha nɛ a ná bua jɔmi nɛ se be ji kaa a maa ye bua a bimɛ ɔmɛ konɛ a sɔmɔ Yehowa, mohu pe nɛ a ma tsɔse mɛ kɛ yi mi tomi ɔ kaa ke a wa a, a tsu ní nɛ a ná sika nɛ a kɛ ba hyɛ mɛ. (3 Yoh. 4) Ke o ngɛ o bimɛ ɔmɛ tsɔsee konɛ a nyɛ nɛ a hyɛ a he hwɔɔ se ɔ, moo ngɔ o ní peepee kɛ tsɔɔ kaa o ngɛ hemi kɛ yemi ngɛ Yehowa mi. Ke o bimɛ ɔmɛ wɛ po ɔ, moo ye bua mɛ konɛ a na se nami nɛ ngɛ he kaa a ma tsu ní wawɛɛ. (Abɛ 29:21; Efe. 4:28) Moo ye bua o bimɛ ɔmɛ konɛ a bɔ mɔde wawɛɛ ngɛ sukuu be mi nɛ a ngɛ wae ɔ. Kaa fɔlɔ ɔ, o ma nyɛ ma hla níhi a mi konɛ o na Baiblo sisi tomi mlaahi nɛ maa ye bua o bimɛ ɔmɛ konɛ a mwɔ yi mi kpɔhi nɛ da ngɛ sukuu yami he. Ke o pee jã a, e maa ye bua o bimɛ ɔmɛ konɛ a nyɛ nɛ a hyɛ a he, nɛ a ná be fuu kɛ fiɛɛ loo a ba pee blɔ gbali po. w25.03 30-31 ¶15-16

Yesaya yi 65 ɔ ha nɛ wa le bɔ nɛ si himi maa hi ha ngɛ mumi mi paradeiso ɔ mi. Gbami nɛ ɔ fã ko ba mi ngɛ jeha 537 loko a fɔ Kristo. Ngɛ jamɛ a be ɔ mi ɔ, a ngmɛɛ Yudabi nɛ a ngɛ nyɔguɛ tso mi ngɛ Babilon nɛ a tsake a tsui ɔ a he, nɛ a kpale kɛ ho Yerusalem ya. Yehowa jɔɔ e we bi nɛ e ye bua mɛ nɛ a dla Yerusalem ma nɛ hɛ mi kpata a, nɛ a ma sɔlemi we ɔ ekohu konɛ Israelbi ɔmɛ nɛ a nyɛ nɛ a ja lɛ ngɛ lejɛ ɔ. (Yes. 51:11; Zak. 8:3) Yesaya gbami ɔ mi bami enyɔne ɔ je sisi kɛ je jeha 1919. Ngɛ jamɛ a jeha a mi ɔ, Yehowa we bi nɛ a ngɛ mwɔnɛ ɔ ye a he ngɛ Babilon Ngua a he. Kɛ je lɔ ɔ se ɔ, mumi mi paradeiso ɔ mi bɔni blimi bɔɔbɔɔbɔɔ. Fiɛɛli nɛ a ngɛ kã a to asafohi fuu sisi, nɛ a je su kpakpahi kpo. Nyumuhi kɛ yihi nɛ be ko nɛ be ɔ, a peeɔ yi wu tsu ní nɛ a kɛ a he wo je mi bami yaya mi ɔ “wo su ehe ɔ nɛ a bɔ ngɛ Mawu suɔmi nya” a. w24.04 20-21 ¶3-4

Ngɛ ma komɛ a nɔ ɔ, a hyɛɛ blɔ kaa fɔli loo nikɔtɔmahi ji nihi nɛ e sa nɛ a hla huno loo yo kɛ ha nɔ ko nɛ e ngɛ hlae nɛ e sɛ gba si himi mi. Ngɛ ma kpahi hu a nɔ ɔ, weku li loo huɛmɛ lɛ a hlaa huno loo yo kɛ haa nɔ ko nɛ e ngɛ hlae nɛ e sɛ gba si himi mi, nɛ a toɔ blɔ nya konɛ nyumu ɔ kɛ yo nɛ a kpe nɛ a hyɛ kaa a bua jɔ a sibi a he lo. Enɛ ɔ he ɔ, ke o ná he blɔ kaa o maa to blɔ nya konɛ nyumu ko kɛ yo ko nɛ a bɔni nyɛɛmi loo a sɛ gba si himi mi ɔ, mo susu nyumu ɔ kɛ yo ɔ tsuo a hiami níhi kɛ nɔ́ nɛ a suɔ ɔ he. Ke o yɔse kaa nɔ ko maa pee huno loo yo kpakpa kɛ ha o huɛ loo o weku no ko ɔ, moo bɔ mɔde kaa o maa le nɔ ɔ saminya. Nɔ́ nɛ he hia titli ji kaa o maa hyɛ kaa huɛ bɔmi kpakpa ngɛ nɔ ɔ kɛ Yehowa a kpɛti lo. Huɛ bɔmi kpakpa nɛ maa hi nɔ ko kɛ Yehowa a kpɛti ɔ he hia kulaa pe sika, loo sukuu nɛ nɔ ko ya, loo bɔ nɛ nɔ ɔ he biɛ ha. Mo kai kaa nyumu ɔ kɛ yo ɔ lɛ a maa mwɔ yi mi kpɔ kaa a maa sɛ gba si himi mi loo a be mi sɛe. w24.05 23 ¶11

Wa ma nyɛ maa ngɔ wa munyu tutui kɛ ye bua nihi nɛ a ngɛ nyɛɛe kɛ ha gba si himi mi sɛmi ɔ. Be komɛ ɔ, e ma bi nɛ waa ye wa he nɔ nɛ wa ko de nɔ́ ko kulaa. (Abɛ 12:18) Kaa nɔ hyɛmi nɔ́ ɔ, eko ɔ, wa maa suɔ nɛ wa de ni kpahi kaa asimasi nɛ ɔmɛ ngɛ nyɛɛe kɛ ha gba si himi mi sɛmi, be mi nɛ a de we wɔ kaa wa de nɔ ko. E sɛ nɛ waa ye nihi nɛ a ngɛ nyɛɛe ɔ a he sieku, loo waa tu a hɛ mi munyu ngɛ ní komɛ nɛ a peeɔ ɔ he. (Abɛ 20:19; Rom. 14:10; 1 Tɛs. 4:11) Jehanɛ hu ɔ, e sɛ nɛ wa de níhi loo wa bi mɛ sane komɛ nɛ ma ha nɛ a kɛ oya yemi nɛ sɛ gba si himi mi. Ke nihi ngɛ nyɛɛe kɛ ha gba si himi mi sɛmi, nɛ a ma nya si kaa a maa po mi hu nɛɛ? E sɛ nɛ waa hi a nya mi kolie, loo wa pia a ti nɔ ko. (1 Pet. 4:15) Ke nihi ngɛ nyɛɛe nɛ a po mi ɔ, lɔ ɔ tsɔɔ we kaa a nine nyɛ si. Mohu ɔ, e tsɔɔ kaa a nyɛɛmi ɔ tsu e yi mi tomi he ní, nɛ tsɔɔ kaa e ye bua mɛ nɛ a mwɔ yi mi kpɔ nɛ da. Se kɛ̃ ɔ, ke a mwɔ yi mi kpɔ ko kaa jã a, e ma nyɛ ma jɔ̃ a kɔni mi nɛ a maa ye aywilɛho. Enɛ ɔ he ɔ, e sa nɛ waa hyɛ blɔ nɔ nɛ wa maa gu kɛ ye bua mɛ. w24.05 31 ¶15-16

Ke wa wekuno ko loo wa huɛ ko nɛ nyu bi ngɛ waa kɛ lɛ wa kpɛti ɔ kpa Yehowa sɔmɔmi ɔ, e dɔɔ wɔ wawɛɛ. (La 78:40) Ke huɛ bɔmi nɛ ngɛ waa kɛ nɔ ɔ wa kpɛti ɔ mi wa wawɛɛ ɔ, e he ma nyɛ maa wa ha wɔ wawɛɛ kaa wa ma fĩ si. Ke o kɛ si fɔfɔɛ ko nɛ nya wa kaa jã a kpe ɔ, Zadok anɔkuale yemi he nɔ hyɛmi nɔ́ ɔ ma nyɛ maa wo mo he wami. E ngɛ mi kaa Abiatar nɛ ji Zadok huɛ ɔ yi Yehowa anɔkuale mohu lɛɛ, se Zadok lɛɛ e ya nɔ nɛ e ye Yehowa anɔkuale. Abiatar pee jã benɛ e piɛɛ bɔɔ nɛ David ma gbo ɔ. E binyumu Adoniya bɔ mɔde kaa e ma kpɔ̃ matsɛ yemi ɔ nɛ Yehowa wo si kaa e kɛ ma ha Salomo ɔ. (1 Kron. 22:​9, 10) Abiatar ya fĩ Adoniya se. (1 Ma. 1:​5-8) Enɛ ɔ nɛ Abiatar pee ɔ tsɔɔ kaa e yi Yehowa anɔkuale nɛ e yi David kɛ Zakok hu anɔkuale! Jeha komɛ nɛ be ɔ, Zadok kɛ Abiatar tsuo pee kake kɛ sɔmɔ kaa osɔfohi.—2 Sam. 8:17; 15:29; 19:​11-14. w24.07 6 ¶14-15

Wa ma nyɛ ma ná nɔ mi mami kaa ke wa ya nɔ nɛ wa hwɔɔ ɔ, e maa ye bua wɔ wawɛɛ. E sa nɛ wa kai kaa ‘yayami mi ngɔɔmi se kɛ we,’ se ke waa kɛ Yehowa blɔ tsɔɔmihi tsu ní ɔ, wa bua maa jɔ wawɛɛ. (Heb. 11:25; La 19:8) Enɛ ɔ ji anɔkuale, ejakaa Yehowa bɔ wɔ konɛ waa pee e suɔmi nya ní. (1 Mose 1:27) Ke wa pee jã a, wa ma ná he nile kpakpa, nɛ wa ma ná neneene wami hulɔ. (1 Tim. 6:12; 2 Tim. 1:3; Jud 20, 21) E ngɛ mi kaa “he lo ɔ gbɔjɔ” mohu lɛɛ, se lɔ ɔ tsɔɔ we kaa wa be nyɛe maa pee nɔ ko ngɛ wa gbɔjɔmi ɔmɛ a he. (Mat. 26:41) Yehowa pee klaalo kaa e maa wo wɔ he wami. (2 Kor. 4:7) Mawu ma ha mo “he wami nɛ pe adesahi a nɔ́ ɔ.” Se kekleekle ɔ, e sa nɛ wɔ nitsɛmɛ waa bɔ mɔde nɛ waa hwu kɛ si wa gbɔjɔmi ɔmɛ. Yehowa ma ha wa sɔlemi ɔmɛ a heto, nɛ e ma ha wɔ he wami nɛ wa hia a ngɛ be nɛ sa mi. (1 Kor. 10:13) Niinɛ, Yehowa ma nyɛ maa ye bua wɔ nɛ waa ya nɔ nɛ waa hwu kɛ si wa gbɔjɔmi ɔmɛ. w24.07 19 ¶19-21

Bɔfo Paulo ngma munyu nɛ ngɛ mwɔnɛ ɔ ngmami ɔ mi ɔ kɛ ha Timoteo nɛ lɛ hu e ji asafo mi nɔkɔtɔma a kaa e kã yayami peeli a hɛ mi ngɛ “nihi tsuo a hɛ mi.” Anɛ Paulo ngɛ tsɔɔe kaa a kã yayami peelɔ ɔ hɛ mi ngɛ asafo ɔ tsuo hɛ mi lo? Pi doo. Mohu ɔ, e ngɛ nihi bɔɔ nɛ eko ɔ, a le kaa jamɛ a yayami ɔ ya nɔ ɔ a he munyu tue. E ma nyɛ maa ba kaa nimli nɛ ɔmɛ ji nihi nɛ a ye yayami ɔ he odase, loo nɔ nɛ yayami peelɔ ɔ ya bɔ lɛ amaniɛ benɛ e pee yayami ɔ. Ke e ba jã a, asafo mi nikɔtɔma amɛ ma nyɛ maa bɔ nimli nɛ ɔmɛ pɛ amaniɛ kaa a tsu sane ɔ he ní, nɛ a ye bua yayami peelɔ ɔ. Be komɛ ɔ, ke nɔ ko ya pee yayami nɛ hɛdɔ ngɛ he ɔ, nyɛmimɛ fuu nɛ a ngɛ asafo ɔ mi ɔ nuɔ he, loo a ma nyɛ maa nu he pee se. Ke e ba jã a, “nihi tsuo a hɛ mi” nɛ ngmami ɔ tu he munyu ɔ ma nyɛ maa pee asafo ɔ tsuo. Enɛ ɔ he ɔ, asafo mi nɔkɔtɔma ko maa fia adafi kɛ tsɔɔ asafo ɔ kaa a kã nyɛminyumu loo nyɛmiyo nɛ ɔ hɛ mi. Mɛni he je? Paulo ha heto ke: “Konɛ e pee kɔkɔ bɔmi kɛ ha ni nɛmɛ nɛ a piɛ ɔ,” bɔ nɛ pee nɛ mɛ hu a ko ya pee yayami nɛ hɛdɔ ngɛ he. w24.08 23-24 ¶16-17

E sa nɛ waa kɛ hɛdɔ nɛ tsu ní wawɛɛ ngɛ Yehowa sɔmɔmi mi kɛ ya si nyagbe. E sa nɛ nihi nɛ a pɔ mɛ nu ɔ nɛ a ya nɔ nɛ a hwɔɔ konɛ Yesu nɛ ngɔ mɛ “kɛ ho” hiɔwe ya. (Mat. 24:40) A pee klaalo kɛ ngɛ be nɛ a ‘ma bua a nya kɛ ya Yesu ngɔ’ ngɛ hiɔwe ɔ blɔ hyɛe wawɛɛ. Ngɛ Harmagedon ta a se ɔ, a ma ba pee Yesu ayɛflo ngɛ Jijɔ Bi ɔ yo kpeemi ɔ mi. (2 Tɛs. 2:1) Be nɛ Yesu kɛ maa kojo nihi ɔ ma kɛ fo, se kɛ̃ ɔ, e sɛ nɛ waa ye gbeye. Ke wa ya nɔ nɛ wa ye anɔkuale ɔ, wa hiɔwe Tsɛ nɛ ngɛ suɔmi ɔ ma ha wɔ “he wami nɛ pe adesahi a nɔ́ ɔ” konɛ wa ‘nyɛ nɛ waa da si ngɛ nɔmlɔ Bi ɔ hɛ mi.’ (2 Kor. 4:7; Luka 21:36) Ke wa ngɛ hɛnɔkami kaa wa maa hi zugba a nɔ jio, wa maa ya hiɔwe jio, ke wa bu kɔkɔ bɔmi nɛ ngɛ Yesu nɔ́ he tomi ní ɔmɛ a mi ɔ tue nɛ waa kɛ tsu ní ɔ, wa hiɔwe Tsɛ ɔ bua maa jɔ wa he wawɛɛ. Akɛnɛ Yehowa mi mi jɔ he je ɔ, a maa ngma wa biɛ “ngɛ wami womi ɔ mi.”—Dan. 12:1; Kpoj. 3:5. w24.09 24-25 ¶19-20

Mawu Munyu ɔ ma nyɛ maa ye bua mo konɛ mo hu o ná tue mi jɔmi. Ngɛ mɛni blɔ nɔ? O ma nyɛ ma pue o yi mi tɛ ngɛ ní kpakpahi nɛ o ngɛ, kɛ jɔɔmihi nɛ Yehowa ngɛ mo jɔɔe ɔ he, nɛ o kai kaa Yehowa be nihi nɛ a sɔmɔ we lɛ ɔ ní kpakpa nɛ ɔmɛ hae. Ngɛ nihi nɛ a sɔmɔ we Yehowa a blɔ fa mi ɔ, ke a ná ní tsumi kpakpa ko nɛ a si himi pee gbɔjɔɔ ɔ, a susuɔ kaa lɔ ɔ ji nɔ́ nɛ he hia ngɛ si himi mi, ejakaa a be hwɔɔ se he hɛnɔkami ko. Se moo lɛɛ, Yehowa ngɛ mo jɔɔe amlɔ nɛ ɔ, nɛ e wo si kaa e maa ya nɔ maa pee ní kpakpahi fuu ha mo hwɔɔ se. (La 145:16) Jehanɛ hu ɔ, mo susu enɛ ɔ he nɛ o hyɛ: Kaa o mwɔ yi mi kpɔ kpa ko be ko nɛ be ɔ, jinɛ o ko li bɔ nɛ o si himi ko ji ha mwɔnɛ ɔ. Se anɔkuale sane ji kaa, ke suɔmi nɛ o ngɛ kɛ ha Mawu kɛ ni kpahi ɔ ha nɛ o mwɔ yi mi kpɔ komɛ ɔ, lɛɛ kokooko ɔ, o nine maa su níhi nɛ ma ha nɛ o bua nɛ jɔ ngɛ si himi mi ɔ nɔ be fɛɛ be. w24.10 27 ¶12-13