June

Wa ngɛ Yesu kpɔmi afɔle sami ɔ he se náe amlɔ nɛ ɔ. Kaa nɔ hyɛmi nɔ́ ɔ, kɛ gu kpɔmi nɔ́ ɔ nɔ ɔ, Yehowa ngɔɔ wa tɔmihi kɛ keɔ wɔ. Ngɛ anɔkuale mi ɔ, pi doo kaa Yehowa nɛ pee jã, mohu ɔ, lɛ nitsɛ nɛ e suɔ kaa e maa pee jã. (La 103:​3, 10-13) Eko ɔ, ni komɛ ma susu kaa Yehowa kɛ a yayamihi be mɛ kee ejakaa a sɛ. Ngɛ anɔkuale mi ɔ, wɔ tsuo wa sɛ. Bɔfo Paulo tsɔɔ kaa ‘e sɛ kaa a tsɛɔ lɛ bɔfo.’ Se kɛ̃ ɔ, e de hu ke: “Mawu dloomi ɔ lɛ ha nɛ i ngɛ kaa bɔ nɛ i ngɛ nɛ ɔ nɛ.” (1 Kor. 15:​9, 10) Ke wa tsake wa tsui ngɛ yayamihi nɛ wa pee ɔ a he ɔ, Yehowa kɛ maa ke wɔ. Mɛni he je? Pi kaa wa sa, se mohu ɔ, akɛnɛ e suɔ wɔ ɔ he je. Ke o ngɛ he nue kaa o sɛ, nɛ Yehowa be o tɔmihi ngɔe kɛ ke mo ɔ, mo kai kaa Yehowa ngɔ kpɔmi nɔ́ ɔ kɛ ha ngɛ yayami peeli nɛ a tsake a tsui ɔ a he, se pi nihi nɛ a ye mluku ɔ a he.—Luka 5:32; 1 Tim. 1:15. w25.01 26-27 ¶3-4

Wa be nyɛe ma kudɔ nɔ́ nɛ nihi deɔ aloo nɔ́ nɛ a peeɔ kɛ siɔ wɔ ɔ, se wa ma nyɛ ma kudɔ bɔ nɛ wa maa pee wa ní ha. Behi fuu ɔ, nɔ́ nɛ se be nɛ wa ma nyɛ maa pee ji nɛ waa kɛ nihi a he yayami maa ke mɛ. Mɛni he je? Ejakaa wa suɔ Yehowa, nɛ lɛ hu e suɔ nɛ waa ngɔ tɔmi kɛ ke. Ke wa ngɔ nihi a he abofu kɛ wo wa mi nɛ waa kɛ a tɔmi ki mɛ ɔ, lɔ ɔ ma ha nɛ waa pee nɔ́ ko nɛ juɛmi be mi, nɛ wa maa ye wɔ nitsɛmɛ wa he awi. (Abɛ 14:​17, 29, 30) Ke wa ngmɛɛ abofu he ɔ, e poɔ wa tsui he piɛ. Jehanɛ hu ɔ, e maa ye bua wɔ nitsɛmɛ, nɛ waa kɛ wa juɛmi be sane ɔ nɔ mae. Enɛ ɔ ma ha nɛ waa pee níhi nɛ wa peeɔ daa nɛ haa wɔ bua jɔmi ɔ. Ke nɔ ko pee mo nɔdɔ nɔ́ ko ɔ, mɛni maa ye bua mo konɛ o ko hɛɛ abofu ɔ mi? Nɔ́ kake nɛ o ma nyɛ maa pee ji kaa o ma ha nɛ be nɛ pue mi. Ke nɔ ko plaa nɛ a pee tsopa ha lɛ ɔ, e heɔ be loko pa a gboɔ. Jã kɛ̃ nɛ ke nɔ ko tɔ̃ wa nɔ ɔ, e ma bi nɛ wa ha nɛ dɔdɔɛ ɔ kɛ abofu ɔ nya nɛ ba si konɛ wa nyɛ nɛ waa je wa tsui mi nɛ waa kɛ nɔ ɔ tɔmi ɔ nɛ ke lɛ. (Fiɛɛ. 3:3; 1 Pet. 1:22) Moo sɔle nɛ o bi Yehowa konɛ e ye bua mo nɛ o ngɔ nihi a tɔmi kɛ ke mɛ. w25.02 16-17 ¶8-11

Sisije tsɔɔmi ɔmɛ ekomɛ ji tsui tsakemi, hemi kɛ yemi, baptisimi, kɛ gbogboehi a si tlemi ɔ. (Heb. 6:​1, 2) Tsɔɔmi nɛ ɔmɛ ji sisije tsɔɔmi nɛ e sa kaa Kristofohi tsuo nɛ a le nɛ a he ye. Enɛ ɔ he ɔ, benɛ bɔfo Petro ngɛ fiɛɛe ngɛ Pentekoste ligbi ɔ nɔ ɔ, e tu ní nɛ ɔmɛ a he munyu kɛ tsɔɔ e tue buli ɔmɛ. (Níts. 2:​32-35, 38) Ja wa kplɛɛ tsɔɔmi nɛ ɔmɛ a nɔ loko wa ma nyɛ maa pee Kristo kaseli. Kaa nɔ hyɛmi nɔ́ ɔ, Paulo tsɔɔ kaa ke wa be hemi kɛ yemi ngɛ gbogboehi a si tlemi ɔ mi ɔ, wa be nyɛe maa pee Kristo kaseli. (1 Kor. 15:​12-14) Se kɛ̃ ɔ, pi sisije tsɔɔmi nɛ ɔmɛ pɛ nɛ e sa nɛ waa le. Se Baiblo mi anɔkualehi nɛ a mi kuɔ ɔ be kaa sisije tsɔɔmi ɔmɛ. Mumi mi niye ní nɛ he wa a ekomɛ ji Yehowa mlaahi kɛ e sisi tomi mlaahi nɛ yeɔ buaa wɔ nɛ wa naa Yehowa susumi ngɛ níhi a he. Bɔ nɛ pee nɛ wa ná Baiblo mi anɔkualehi nɛ a mi kuɔ ɔ he se ɔ, e sa nɛ waa kase Mawu Munyu ɔ nɛ wa pue wa yi mi tɛ ngɛ he, nɛ waa kɛ nɔ́ nɛ wa kase ɔ nɛ tsu ní saminya. Ke wa pee jã a, e maa ye bua wɔ nɛ waa mwɔ yi mi kpɔhi nɛ maa sa Yehowa hɛ mi. w24.04 5 ¶12-13

Mawu kai Yona kaa Ninevebi ɔmɛ “li kpakpa kɛ yayami a kpɛti slɔɔto.” (Yona 1:​1, 2; 3:10; 4:​9-11) Pee se ɔ, Yesu ngɔ nɔ hyɛmi nɔ́ nɛ ɔ kɛ tsu ní kɛ tsɔɔ kaa Yehowa yeɔ dami sane nɛ e naa nɔ mɔbɔ. Mɛni nɛ Yesu ngɛ tsɔɔe benɛ e de ke Ninevebi ɔmɛ “maa te si ngɛ kojomi ɔ mi” ɔ? Yesu tu “kojomi he gbogboehi a si tlemi” ko nɛ maa ya nɔ hwɔɔ se ɔ he munyu. (Yoh. 5:29) Nɔ́ nɛ Yesu tu he munyu ɔ maa ya nɔ ngɛ e Jeha Akpe Nɔ Yemi ɔ mi. Ngɛ jamɛ a be ɔ mi ɔ, a ma tle “nihi nɛ a da kɛ nihi nɛ a dɛ” ɔ si. (Níts. 24:15) A ma tle nihi nɛ a dɛ ɔ si kɛ ya “kojomi he gbogboehi a si tlemi mi.” Ke a tle mɛ si ɔ, Yehowa kɛ Yesu maa hyɛ kaa a kɛ níhi nɛ a maa tsɔɔ mɛ ɔ ma tsu ní lo. Ke a tle Nineve no ko si nɛ e sume nɛ e ma ja Yehowa a, Yehowa be lɛ blɔ ngmɛe nɛ e ya nɔ nɛ e hi si. (Yes. 65:20) Se a kpɛti nihi tsuo nɛ a maa kplɛɛ nɔ kaa a ma sɔmɔ Yehowa ngɛ anɔkuale mi ɔ ma ná he blɔ kaa a ma hi si kɛ ya neneene!—Dan. 12:2. w24.05 5 ¶13-14

Yesu na nihi mɔbɔ kaa bɔ nɛ Yehowa hu naa nɔ mɔbɔ ɔ. (Yoh. 14:9) Bɔ nɛ Yesu kɛ nihi tu munyu nɛ e kɛ mɛ hi si ha a ha nɛ wa na kaa Yehowa naa nɔ mɔbɔ, nɛ e suɔ adesahi nɛ a ji yayami peeli ɔ, nɛ e suɔ nɛ e ye bua mɛ. Yesu ye bua yayami peeli konɛ a ná suɔmi ɔ kaa a ma tsake a je mi bami nɛ a ba nyɛɛ e se. (Luka 5:​27, 28) Yesu le kaa e be kɛe nɛ e maa ngɔ e wami kɛ sã afɔle. E de e kaseli ɔmɛ si abɔ kaa nɔ ko maa tsɔɔ e se blɔ, nɛ a maa gbe lɛ ngɛ sɛumi tso nɔ. (Mat. 17:22; 20:​18, 19) E le kaa e gbenɔ ɔ ma je adesahi tsuo a yayami kɛ je. Jehanɛ hu ɔ, Yesu tsɔɔ kaa ngɛ e gbenɔ se ɔ, e maa “gbla nimli slɔɔtoslɔɔtohi” kɛ ba e ngɔ. (Yoh. 12:32) Enɛ ɔ he ɔ, adesahi tsuo nɛ a ma ná hemi kɛ yemi ngɛ Yesu mi nɛ a maa bu e fami ɔmɛ tue ɔ ma nyɛ maa sa Yehowa hɛ mi. Ke a pee jã a, a maa ‘ye a he kɛ je yayami he’ kulaa. (Rom. 6:​14, 18, 22; Yoh. 8:32) Enɛ ɔ he ɔ, Yesu pee kã nɛ e je suɔmi mi nɛ e ngɔ e wami kɛ ha ngɛ wa he nɛ e gbo gbenɔ yeyee.—Yoh. 10:​17, 18. w24.08 5 ¶11-12

Kekleekle be nɛ o kase anɔkuale nɛ ngɛ Mawu Munyu ɔ mi ɔ, kɛ o nu he ha kɛɛ? Kaa nɔ hyɛmi nɔ́ ɔ, o ba kase kaa o hiɔwe Tsɛ ɔ suɔ mo wawɛɛ, nɛ e suɔ nɛ o ba piɛɛ e weku ɔ he. Jehanɛ hu ɔ, o ba na kaa Mawu wo si kaa e ma je nɔ́ yeyee kɛ nɔ́ nami kɛ je, nɛ o maa na o suɔli nɛ a gbo ɔ ekohu ngɛ je ehe ɔ mi. (Maak. 10:​29, 30; Yoh. 5:​28, 29; Rom. 8:​38, 39; Kpoj. 21:​3, 4) E ngɛ heii kaa anɔkuale nɛ ɔmɛ nɛ o kase ɔ ha nɛ o tsui nɔ o mi. (Luka 24:32) O bua jɔ níhi nɛ o ngɛ kasee ɔ he, nɛ o suɔ kaa o maa tu he munyu kɛ tsɔɔ nɔ fɛɛ nɔ! (Kɛ to Yeremia 20:9 ɔ he.) Ke wa bua jɔ Baiblo ɔ mi anɔkuale ɔ he ɔ, wa be nyɛe ma ma wa nya kɛ fɔ nɔ. (Luka 6:45) Wa nuɔ he kaa bɔ nɛ Yesu kaseli ɔmɛ nu he ɔ. A de ke: “Wa be nyɛe ma kpa níhi nɛ wa na kɛ níhi nɛ wa nu ɔ he munyu tumi.” (Níts. 4:20) Akɛnɛ wa suɔ anɔkuale ɔ wawɛɛ he je ɔ, wa suɔ nɛ waa kɛ nihi fuu nɛ sɛɛ he ní. w24.05 15 ¶5; 16 ¶7

Yehowa we bi fiɛɛɔ kɛ haa ni kpahi, ejakaa a suɔ a hiɔwe Tsɛ ɔ, nɛ a suɔ nɛ nihi nɛ a ba le lɛ. Se fiɛɛli komɛ hu ngɛ nɛ e he waa ha mɛ kaa a kɛ bua jɔmi ma tsu fiɛɛmi ní tsumi ɔ. Mɛni he je? Eko ɔ, ni komɛ gboɔ zo wawɛɛ, nɛ a nuɔ he kaa a li ní tsɔɔmi kulaa. Ni komɛ hu nuɔ he kaa a be nyɛe maa ya nɔ ko we mi be mi nɛ a fɔ we mɛ nine. Ni kpahi hu yeɔ gbeye kaa nihi ma kua mɛ. Eko ɔ, ni komɛ hu ngɛ nɛ bɔ nɛ a tsɔse mɛ ha he je ɔ, a sume nɛ a pee nɔ́ ko kɛ wo ni kpahi a mi mi la. E he waa ha nyɛmimɛ nɛ ɔmɛ kaa a kɛ nihi nɛ a li mɛ ɔ maa sɛɛ sane kpakpa a he ní. Anɛ be komɛ ɔ, e he waa ha mo kaa o ma ná bua jɔmi ngɛ fiɛɛmi mi ngɛ níhi nɛ wa tu a he munyu kɛ sɛ hlami ɔ he je lo? Ke jã a, lɛɛ o kɔni mi nɛ ko jɔ̃. Eko ɔ, o susuɔ kaa o be kã, se lɔ ɔ mohu tsɔɔ kaa o baa o he si, nɛ o sume nɛ o gbla ni kpahi a juɛmi kɛ ba o nɔ. E tsɔɔ hu kaa o sume nɛ o kɛ nihi nɛ sã nya. Nɔ ko nɔ ko be nɛ e suɔ nɛ nihi nɛ a kua lɛ, titli ke e suɔ nɛ e pee nihi kpakpa. O hiɔwe Tsɛ ɔ le nyagbahi nɛ o kɛ ngɛ kpee ɔ saminya, nɛ e suɔ nɛ e ye bua mo.—Yes. 41:13. w24.04 14 ¶1-2

Ke o ngɛ Baiblo ɔ kanee ɔ, koo bɔ mɔde kaa o maa ngɔ nɔ́ fɛɛ nɔ́ nɛ o kase ɔ kɛ tsu ní si kake. O ma nyɛ maa ngɔ kake loo enyɔ kɛ ma o hɛ mi nɛ o tsu he ní. Moo ka enɛ ɔ nɛ o hyɛ: Moo ngma níhi tsuo nɛ e sa nɛ o tsu he ní ɔ kɛ fɔ si. Lɔ ɔ se ɔ, moo hla kake loo enyɔ ngɛ mi nɛ o tsu he ní kekle, konɛ o tsu ní nɛmɛ nɛ piɛ ɔ a he ní pee se. Mɛni nɛ e sa nɛ o tsu he ní kekle? O ma nyɛ ma kɛ pee oti kaa o maa pee tsakemi nɛ e he be wae ha mo kaa o maa pee ɔ kekle. Aloo o ma nyɛ maa pee tsakemi ngɛ níhi nɛ o susu kaa a he hia wawɛɛ ɔ a he. Ke o hla nɔ́ nɛ o suɔ nɛ o tsu he ní ɔ, mo hla níhi a mi ngɛ wa womi ɔmɛ a mi. Lɔ ɔ se ɔ, moo sɔle ngɛ nɔ́ nɛ o suɔ nɛ o tsu he ní ɔ he, nɛ o bi Yehowa nɛ e ha mo “suɔmi ɔ kɛ he wami ɔ” konɛ o nyɛ nɛ o pee jã. (Filip. 2:13) Lɔ ɔ se ɔ, moo ngɔ nɔ́ nɛ o kase ɔ kɛ tsu ní. Ke o nyɛ nɛ o su kekleekle oti ɔ he ɔ, lɔ ɔ maa wo mo he wami konɛ o su ekpa amɛ a he. Ngɛ anɔkuale mi ɔ, ke o nyɛ nɛ o je Kristofohi a su ko kpo ɔ, e maa ye bua mo konɛ o nyɛ nɛ o pee tsakemi kpahi. w24.09 6 ¶13-14

Eko ɔ, ní komɛ nɛ o pee kɛ be ɔ ye ni komɛ awi, nɛ o haoɔ ngɛ he wawɛɛ. Mɛni ma nyɛ maa ye bua mo? Moo bɔ mɔde wawɛɛ kaa o ma tsu si fɔfɔɛ ɔ he ní, ke e ma bi nɛ o ya kpa pɛɛ po. Mo bi Yehowa nɛ e ye bua nihi nɛ o ní peepee ɔ ye mɛ awi ɔ. E ma nyɛ maa ye bua o kɛ mɛ tsuo konɛ nyɛ fĩ si nɛ nyɛ ná tue mi jɔmi ekohu. Moo kase ní kɛ je yayamihi nɛ o pee kɛ be ɔ mi, nɛ o ha nɛ Yehowa kɛ mo nɛ tsu ní bɔ nɛ e suɔ. Mo susu gbalɔ Yona nɔ hyɛmi nɔ́ ɔ he nɛ o hyɛ. Mawu de lɛ kaa e ya Nineve ma a mi, se Yona ma fo kɛ ho he kpa ya. Yehowa tsɔse Yona, nɛ enɛ ɔ ha nɛ e kase ní kɛ je e tɔmi ɔ mi. (Yona 1:​1-4, 15-17; 2:​7-10) Anɛ Yehowa kɔni mi jɔ̃ ngɛ Yona he lo? Dɛbi. Pee se ɔ, Mawu de lɛ kaa e kpale kɛ ya Nineve, se amlɔ nɛ ɔ lɛɛ, e bu tue oya nɔuu. Yona ha we nɛ yayami nɛ e pee kɛ be ɔ nɛ jɔ̃ e kɔni mi, mohu ɔ, e ya nɔ nɛ e pee nɔ́ nɛ Yehowa de lɛ ke e pee ɔ.—Yona 3:​1-3. w24.10 8-9 ¶10-11

Pi nɛ Yehowa poɔ wa hiɔ ɔmɛ aloo wa yayami ɔmɛ a mi pɛ kɛkɛ, mohu ɔ, e tsuɔ kɛ jeɔ kulaa. Kaa nɔ hyɛmi nɔ́ ɔ, ke nɔ ko ye hiɔ nɛ a ngɔ kɛ ke lɛ ɔ, a ngɔɔ pen kɛ poɔ hiɔ ɔ mi ngɛ womi mi. Se kɛ̃ ɔ, nɔ ɔ naa hiɔ ɔ nɛ a po mi ɔ loloolo ngɛ womi ɔ mi. Se ke a ngma nɔ́ ko ngɛ womi nɔ nɛ tsu ɔ, o be nae hu. Bɔ nɛ pee nɛ waa nu munyu nɛ ɔ sisi saminya a, e sa nɛ wa kai kaa ngɛ blema a, ke a kɛ ink ngma ní ɔ, a ma nyɛ maa ngɔ nyu kɛ tsu. Nɔ ko ma nyɛ maa ngɔ kutsa nɛ pɔ kɛ tsu nɔ́ nɛ a ngma a. Lɔ ɔ he ɔ, ke a “tsu” hiɔ nɛ nɔ ko ye ɔ, e laa kulaa, nɛ nɔ ko nɔ ko be nɔ́ nɛ a ngma a nae hu. E ngɛ kaa nɔ́ nɛ nɔ ɔ yi hiɔ ko gblee. Ngɛ anɔkuale mi ɔ, pi nɛ Yehowa poɔ wa yayami ɔmɛ a mi pɛ kɛkɛ, se e tsuɔ wa yayami ɔmɛ kulaa. Enɛ ɔ haa nɛ wa tsui nɔɔ wa mi!—La 51:9. w25.02 10 ¶11

Ke ni kpahi ye wɔ sane yaya loo a pee wɔ nɔdɔ nɔ́ ko ɔ, wa ma nyɛ ma ná nɔ mi mami kaa Yehowa naa nɔ́ fɛɛ nɔ́. Lemi nɛ wa le kaa hwɔɔ se ɔ, Yehowa ma tsu sanehi tsuo a he ní ɔ woɔ wɔ he wami nɛ wa nyɛɔ nɛ wa fĩɔ si. Ke wa tu nɔ́ fɛɛ nɔ́ kɛ wo Yehowa dɛ mi ɔ, lɔ ɔ be hae nɛ wa mi mi nɛ fu loo waa nyɛ ni kpahi. Ke wa mi mi fu ni kpahi ɔ, e ma ha nɛ waa pee nɔ́ ko nɛ dɛ, nɛ wa bua be jɔe hu. Jehanɛ hu ɔ, huɛ bɔmi nɛ ngɛ waa kɛ Yehowa wa kpɛti ɔ ma puɛ. Ngɛ anɔkuale mi ɔ, wa be nyɛe maa kase Yesu nɔ hyɛmi nɔ́ ɔ pɛpɛɛpɛ. Be komɛ ɔ, eko ɔ, wa ma de nɔ́ ko loo wa ma nyɛ maa pee nɔ́ ko nɛ ma ha nɛ wa pia wa he pee se. (Yak. 3:2) Nɛ be komɛ hu ɔ, bɔ nɛ ni kpahi kɛ wɔ yeɔ ha a ma nyɛ ma ha waa hao wa wami be tsuo. Ke jã nɛ e ji ngɛ o blɔ fa mi ɔ, mo kai kaa Yehowa le nɔ́ nɛ o ngɛ mi gblee ɔ. Nɛ Yesu hu le bɔ nɛ o ngɛ he nue ha a, ejakaa a wa lɛ yi mi hyɛ. (Heb. 4:​15, 16) Ngɛ anɔkuale mi ɔ, wa bua jɔ wawɛɛ kaa Yehowa haa wɔ ga womihi nɛ maa ye bua wɔ konɛ wa nyɛ nɛ wa fĩ si ke a ye wɔ sane yaya. w24.11 6 ¶12-13

E sa nɛ a ná hemi kɛ yemi ngɛ Yesu mi konɛ a “ná neneene wami.” (Yoh. 3:​16-18, 36; 17:3) Yudabi fuu he we yi kaa e sa nɛ a ná hemi kɛ yemi ngɛ Yesu mi. Enɛ ɔ he ɔ, a bi lɛ ke: “Mɛni o maa pee kɛ to okadi konɛ waa na nɛ wa he mo nɛ waa ye?” (Yoh. 6:30) Yudabi nɛ ɔmɛ tsɔɔ kaa a nɛmɛ nɛ a hi si ngɛ Mose be ɔ mi ɔ a nine su mana nɔ daa ligbi, nɛ lɔ ɔ hu ji nyakpɛ ní. (Neh. 9:15; La 78:​24, 25) E ngɛ heii kaa loloolo ɔ, a juɛmi ngɛ abolo nɛ a maa ye nɛ a maa tɔ ɔ pɛ nɔ. Enɛ ɔ he ɔ, benɛ Yesu tu “abolo nitsɛ ɔ nɛ e je hiɔwe,” nɛ e be kaa mana nɛ be nyɛe ma ha nɔ neneene wami ɔ he munyu ɔ, a hɛwi a he po kaa a ma bi lɛ nɛ e tsɔɔ mɛ nɔ́ nɛ e daa si kɛ ha. (Yoh. 6:32) Akɛnɛ a ngɔ a juɛmi kɛ ma a he lo nya hiami níhi a nɔ pɛ he je ɔ, a bui nɔ́ nɛ Yesu ngɛ hlae nɛ e tsɔɔ mɛ kɛ kɔ neneene wami nami he ɔ tue. w24.12 5-6 ¶10-11

Ke o bi ɔ ngɛ je mi kpami he ní kasee ngɛ sukuu ɔ, e ma ba na kaa mlaahi lɛ kudɔɔ patã nɛ ngɛ adebɔ níhi fuu a mi ɔ nɛ. Kaa nɔ hyɛmi nɔ́ ɔ, loko tso ko maa wa nɛ e maa bɔ kusuu ɔ, e nyɛɛɔ blɔ nya tomi ko nɛ yaa nɔ si abɔ ɔ se. Kekleekle ɔ, tso ɔ jeɔ kɔnihi, nɛ kɔni amɛ hu jeɔ gblaahi, nɛ gblaa amɛ hu woɔ bahi. Blɔ nya tomi nɛ ɔ nɛ a tsɛɔ ke fractals ɔ nɛ. Blɔ nya tomi nɛ ɔ yaa nɔ ngɛ adebɔ ní kpahi fuu a mi hulɔ. Mɛnɔ lɛ to ní nɛ ɔmɛ tsuo a he blɔ nya a? Ke o bi ɔ susu nyakpɛ ní nɛ ɔmɛ nɛ Yehowa to he blɔ nya a he kɛ ya tsitsaa a, lɔ ɔ maa ye bua lɛ konɛ e ná hemi kɛ yemi nɛ mi wa ngɛ Bɔlɔ ɔ mi. Be mi nɛ o bi ɔ ngɛ wae ɔ, o ma nyɛ ma bi lɛ kaa “Ke Mawu lɛ bɔ wɔ ɔ, lɛɛ anɛ o susuu we kaa e le nɔ́ nɛ e sa nɛ waa pee konɛ wa ná bua jɔmi ngɛ si himi mi lo?” Lɔ ɔ se ɔ, o ma nyɛ maa tsɔɔ lɛ kaa Mawu ha wɔ Baiblo ɔ konɛ e kɛ tsɔɔ wɔ bɔ nɛ wa ma plɛ kɛ ná bua jɔmi ngɛ si himi mi ha. w24.12 16 ¶8

Mawu mumi ɔ wo bɔfo Paulo he wami nɛ e ngma sɛ womi kɛ ya ha Korinto asafo ɔ, nɛ e de mɛ kaa a je yayami peelɔ ɔ nɛ e tsakee we e tsui ɔ kɛ je asafo ɔ mi. (1 Kor. 5:13) Kɛ e sa nɛ nihi nɛ a ngɛ asafo ɔ mi ɔ nɛ a kɛ lɛ nɛ hi si ha kɛɛ? Paulo de mɛ kaa a kɛ lɛ “nɛ kpa bɔmi.” Kɛ Paulo ngɛ tsɔɔe kɛɛ? Paulo tsɔɔ nya kaa a “kɛ jamɛ a nɔ ɔ nɛ ko ye ní tete po.” (1 Kor. 5:11) Ke o kɛ nɔ ko ngɛ ní yee ɔ, e haa nɛ o náa he blɔ nɛ o kɛ nɔ ɔ sɛɛɔ ní, nɛ enɛ ɔ ma nyɛ ma ha nɛ nyɛɛ pɔ ní sɛɛmi be kpahi a mi. Enɛ ɔ he ɔ, Paulo ngɛ tsɔɔe kaa e sɛ nɛ nihi nɛ a ngɛ asafo ɔ mi ɔ nɛ a kɛ jamɛatsɛ ɔ nɛ bɔ. Enɛ ɔ maa po asafo ɔ he piɛ, konɛ e je mi bami yaya a nɛ ko ná asafo ɔ nɔ he wami. (1 Kor. 5:​5-7) Jehanɛ hu ɔ, enɛ ɔ maa ye bua yayami peelɔ ɔ konɛ e yɔse kaa e pee yayami nɛ hɛdɔ ngɛ he wawɛɛ kɛ si Yehowa, nɛ e maa wo lɛ he wami konɛ e tsake e tsui. w24.08 15 ¶4-5

Israelbi ɔmɛ yeɔ gbijlɔ klɛdɛɛ ko daa jeha. A tsɛɛ lɛ ke Kpatami Ligbi. Ngɛ jamɛ a ligbi ɔ nɔ ɔ, osɔfo nɔkɔtɔma a daa ma a mi bi ɔmɛ a nane mi nɛ e ngɔɔ lohwehi kɛ sãa afɔle. Ngɛ anɔkuale mi ɔ, lohwehi nɛ a kɛ sãa afɔle ɔ pɛ be nyɛe ma je adesahi a he yayami kɛ je kulaa, ejakaa adesahi a nɔ kuɔ pe lohwehi. Se ke Israelbi ɔmɛ tsake a tsui nɛ a sã afɔle nɛ Yehowa ngɛ hlae ɔ, e kɛ a yayami ɔ keɔ mɛ faa. (Heb. 10:​1-4) Blɔ nya tomi nɛ ɔ kaiɔ Israelbi ɔmɛ kaa a ji yayami peeli. Se kɛ̃ ɔ,Yehowa to blɔ nya nɛ e ngɔ e Bi nɛ e suɔ lɛ ɔ “kɛ ha si kake nyɔngloo, konɛ e tloo nihi babauu a he yayamihi.” (Heb. 9:28) Yesu ngɔ “e wami kɛ ha kaa kpɔmi nɔ́ nɛ e kɛ kpɔ̃ nihi babauu.”—Mat. 20:28. w25.02 4 ¶9-10

“Ngɛ anɔkuale mi ɔ, mumi ɔ suɔ wawɛɛ, se he lo ɔ gbɔjɔ.” (Mat. 26:41b) Munyu nɛ ɔ nɛ Yesu tu ɔ tsɔɔ kaa e le kaa wa yi mluku, lɔ ɔ he ɔ, wa ma nyɛ ma tɔ̃ be komɛ. Se e munyu ɔ hu ji kɔkɔ bɔmi kɛ ha wɔ kaa e sɛ nɛ wa he wa he nɛ waa ye tsɔ. Jamɛ a gbɔkuɛ ɔ nɔuu loko Yesu maa tu munyu nɛ ɔ, e kaseli ɔmɛ wo lɛ si kaa a be lɛ kuae gblee. (Mat. 26:35) Ngɛ anɔkuale mi ɔ, kaseli ɔmɛ suɔ kaa a maa pee nɔ́ nɛ da. Se kɛ̃ ɔ, a hɛ je nɔ kaa ke a kɛ si fɔfɔɛ ko nɛ mi wa kpe ɔ, e he ma nyɛ maa wa ha mɛ kaa a maa pee nɔ́ nɛ da. Enɛ ɔ he ɔ, Yesu ngɔ munyu nɛ ngɛ mwɔnɛ ɔ ngmami ɔ mi ɔ kɛ bɔ mɛ kɔkɔ. Aywilɛho sane ji kaa kaseli ɔmɛ nyɛ we nɛ a ya nɔ nɛ a hwɔɔ. Benɛ a nu Yesu ɔ, a nyɛ we nɛ a ya nɔ nɛ a mɛtɛ e he, mohu ɔ, a ye gbeye nɛ a ma fo kɛ je e he, ejakaa a yɛ nɔ nɛ a hwɔɔ. Ngɛ anɔkuale mi ɔ, nɔ́ nɛ kaseli ɔmɛ de Yesu ke a be pee gblegbleegble ɔ, lɔ ɔ mohu nɛ a pee ɔ nɛ. A kua Yesu.—Mat. 26:56. w24.07 14 ¶1-2

Benɛ Adam kɛ Hawa pee yayami ɔ, pi neneene wami pɛ nɛ bɔ mɛ, huɛ bɔmi kpakpa nɛ ngɛ a kɛ a Tsɛ nɛ ji Yehowa a kpɛti ɔ hu bɔ mɛ. Jinɛ Adam kɛ Hawa piɛɛ Mawu weku ɔ he. (Luka 3:38) Se benɛ a gbo Yehowa nɔ tue ɔ, e fiee mɛ kɛ je e weku ɔ mi loko a bɔni fɔmi. (1 Mose 3:​23, 24; 4:1) Enɛ ɔ tsɔɔ kaa a sisi bimɛ tsuo, nɛ wɔ hu wa piɛɛ he ɔ be nyɛe maa hi Yehowa weku ɔ mi. Wa hia yemi kɛ buami loko wa ma nyɛ ma dla waa kɛ Yehowa wa kpɛti. (Rom. 5:​10, 11) E sɛ nɛ waa ya nɔ nɛ waa pee Mawu he nyɛli, mohu ɔ, e sa nɛ waa pee e huɛmɛ. Bua jɔmi sane ji kaa Yehowa lɛ hia nane kekle konɛ e kɛ dla waa kɛ lɛ wa kpɛti. Ngɛ mɛni blɔ nɔ? Kɛ gu kpatami ɔ he blɔ nya nɛ Yehowa to konɛ huɛ bɔmi kpakpa nɛ hi e kɛ adesahi nɛ a ji yayami peeli ɔ a kpɛti ɔ nɔ. w25.02 3-4 ¶7-8

Bɔfo Paulo de ngɛ nyumu ɔ nɛ e kɛ e tsɛ yo ɔ ná bɔmi ɔ he ke: “Nyumu ɔ hɛ mi nɛ nihi hiɛhiɛɛ kã a hiɛ ha lɛ.” (2 Kor. 2:​5-8) Enɛ ɔ tsɔɔ kaa benɛ a je nyumu ɔ kɛ je asafo ɔ mi ɔ, lɛ nitsɛ e yɔse kaa e sa nɛ e tsake e tsui. (1 Kor. 5:1) Akɛnɛ e pee jã he je ɔ, e he be hiae nɛ a ya nɔ nɛ a kã e hɛ mi hu. (Heb. 12:11) Akɛnɛ nyumu ɔ tsake e tsui he je ɔ, Paulo de asafo mi nikɔtɔma amɛ kaa a ngɔ lɛ ngɛ asafo ɔ mi ekohu. Jehanɛ hu ɔ, e de mɛ kaa a ‘je mi mi himi mi nɛ a ngɔ kɛ pa lɛ nɛ́ a wo e bua, nɛ a ma a suɔmi ɔ nɔ mi kɛ ha lɛ.’ Paulo suɔ nɛ nyɛmimɛ ɔmɛ nɛ a ngɔ a ní peepee kɛ a munyu tutui kɛ tsɔɔ kaa a ngɔ nyumu ɔ nɛ e tsake e tsui ɔ yayami ɔ kɛ ke lɛ niinɛ, nɛ a suɔ lɛ. Enɛ ɔ ma ha nɛ nyɛminyumu ɔ maa nu he kaa nyɛmimɛ ɔmɛ bua jɔ kaa e kpale kɛ ba asafo ɔ mi ekohu. w24.08 15 ¶4; 16-17 ¶6-8

Bɔfo Paulo nyɛ nɛ e tu munyu kɛ nɔ mi mami kɛ kɔ bɔ nɛ wa ma plɛ kɛ fĩ si ngɛ kahi a mi ha a he. E kai Kristofo ɔmɛ kaa ke a kɛ kahi ngɛ kpee ɔ, e sɛ nɛ a ngɔ a hɛ kɛ fɔ mɛ nitsɛmɛ a nɔ, mohu ɔ, e sa kaa a ngɔ a hɛ kɛ fɔ Yehowa nɔ. Enɛ ɔ wo Paulo he wami nɛ e kɛ nɔ mi mami de ke: “Yehowa ji ye yemi kɛ bualɔ; i be gbeye yee.” (Heb. 13:6) Amlɔ nɛ ɔ, a ngɛ wa nyɛmimɛ komɛ yi mi wae. Enɛ ɔ he ɔ, wa ma nyɛ maa sɔle kɛ ha mɛ nɛ waa pee ní komɛ kɛ ye bua mɛ kɛ tsɔɔ kaa wa suɔ mɛ wawɛɛ. Baiblo ɔ ha nɛ e pee heii kaa “nihi tsuo nɛ a suɔ wawɛɛ kaa a maa hi si ngɛ Mawu gbeye yemi nya ngɛ Kristo Yesu mi ɔ, mɛ hu a maa wa mɛ yi mi.” (2 Tim. 3:12) Enɛ ɔ he ɔ, e sa nɛ wɔ tsuo wa dla wa he kɛ ha behi nɛ a mi wa nɛ ngɛ wa hɛ mi haa a. Nyɛ ha nɛ waa ya nɔ nɛ wa ná hɛ kɛ nɔ fɔmi nɛ mi wa ngɛ Yehowa mi, nɛ wa ná nɔ mi mami kaa e maa ye bua wɔ nɛ wa fĩ si ngɛ kahi tsuo nɛ waa kɛ maa kpe ɔ mi. Ngɛ be nɛ sa mi ɔ, e ma ha nɛ e sɔmɔli tsuo nɛ a yeɔ lɛ anɔkuale ɔ a he maa jɔ mɛ.—2 Tɛs. 1:​7, 8. w24.09 13 ¶17-18

Mɛni ye bua Korintobi ɔmɛ nɛ a ha nɛ a baptisi mɛ? (2 Kor. 10:​4, 5) Mawu Munyu ɔ kɛ e mumi klɔuklɔu ɔ nɛ e ngɛ he wami ɔ ye bua mɛ nɛ a nyɛ nɛ a pee tsakemi nguanguahi ngɛ a si himi mi. (Heb. 4:12) A ti nihi nɛ a kplɛɛ sane kpakpa a nɛ kɔɔ Kristo he ɔ nɔ ɔ nyɛ nɛ a yu a he ngɛ dã demi, jumi, nyumu kɛ nyumu loo yo kɛ yo a bɔmi nami he. (1 Kor. 6:​9-11) E ngɛ mi kaa e he hia nɛ Korintobi ɔmɛ a kpɛti ni komɛ nɛ a pee tsakemi nguanguahi konɛ a ba pee Kristofohi mohu lɛɛ, se a nɛ tsakemi nɛ ɔmɛ kaa tlomi. A bɔ mɔde wawɛɛ nɛ a nyɛɛ blɔ nɛ nɔ ngɛ tokofii nɛ e kɛ nɔ yaa neneene wami mi ɔ nɔ. (Mat. 7:​13, 14) Anɛ e he wa ha mo kaa o maa pee tsakemi nguanguahi ngɛ o si himi mi konɛ a baptisi mo lo? Ke jã a, lɛɛ o kɔni mi nɛ ko jɔ̃! Mo kpa Yehowa pɛɛ nɛ e ye bua mo kɛ e mumi klɔuklɔu ɔ konɛ o ko pee yayami. w25.03 6 ¶15-17

Yehowa wo si kaa e ma ha wɔ juɛmi konɛ waa le ke ji yi mi kpɔ ko nɛ wa maa mwɔ ɔ maa sa e hɛ mi loo e be e hɛ mi sae. E ngɔɔ juɛmi nɛ ɔ kɛ ‘haa nihi tsuo faa nɛ́ hɛ mi kami be mi.’ Ke o sɔle kɛ bi blɔ tsɔɔmi ngɛ Yehowa ngɔ ta a, moo bɔ mɔde nɛ o yɔse heto nɛ e ma ha mo ɔ. Kaa nɔ hyɛmi nɔ́ ɔ, ke o yaa he ko nɛ o laa blɔ ɔ, eko ɔ, o ma de nɔ ko nɛ e ngɛ jamɛ a kpɔ ɔ mi ɔ konɛ e tsɔɔ mo blɔ. Se anɛ o maa je e he be mi nɛ e ná we nɛ e tsɔɔ mo blɔ ɔ lo? Dɛbi. E ngɛ heii kaa o maa mlɛ konɛ e tsɔɔ mo blɔ ɔ, nɛ o maa bu lɛ tue saminya. Jã nɔuu kɛ̃ nɛ ke o bi Yehowa konɛ e ha mo nile ɔ, e sa nɛ o bɔ mɔde kaa o ma yɔse heto nɛ e ma ha mo ɔ. O ma nyɛ maa pee enɛ ɔ kɛ gu mlaahi kɛ sisi tomi mlaahi nɛ ngɛ Baiblo ɔ mi nɛ kɔɔ o si fɔfɔɛ ɔ he nɛ o maa kase he ní ɔ nɔ. Kaa nɔ hyɛmi nɔ́ ɔ, ke o ngɛ yi mi kpɔ mwɔe kaa o maa ya he nya buami ko ɔ, o ma nyɛ ma susu nɔ́ nɛ Baiblo ɔ de kɛ kɔ he nya buami nɛ ngɛ hoo, huɛ yaya bɔmi, Matsɛ Yemi ɔ nɛ waa kɛ maa pee nɔ́ titli ngɛ wa si himi mi pe níhi nɛ wa bua jɔ a he ɔ he.—Mat. 6:33; Rom. 13:13; 1 Kor. 15:33. w25.01 16 ¶6-7

Yesaya gbami ɔ ha nɛ wa na kaa slɔɔto agbo ngɛ nihi nɛ a ngɛ mumi mi paradeiso ɔ mi kɛ nihi nɛ a be mi ɔ a kpɛti. Yehowa haa e sɔmɔli níhi nɛ a hia konɛ huɛ bɔmi kpakpa nɛ hi a kɛ lɛ a kpɛti daa. E ha wɔ e mumi klɔuklɔu ɔ, e Munyu nɛ ji Baiblo ɔ kɛ asafo ɔ womihi babauu. E pee jã konɛ ‘wa ná ní nɛ waa ye, wa ná nyu nɛ waa nu, nɛ wa nya.’ (Kɛ to Kpo Jemi 22:17 ɔ he.) Se nihi nɛ a be mumi mi paradeiso ɔ mi ɔ lɛɛ ‘hwɔ maa gbe mɛ, kuma maa gbe mɛ nɛ zo maa gbe mɛ’ ejakaa a li Mawu. (Amos 8:11) Yehowa jeɔ mi mi jɔmi mi nɛ e haa e we bi níhi tsuo nɛ a hia konɛ a hemi kɛ yemi ɔ mi nɛ wa. (Yoel 2:​21-24) E peeɔ jã kɛ guɔ Baiblo ɔ, asafo ɔ womi ɔmɛ, wa wɛbsaiti ɔ, asafo mi kpehi, kpɔ mi kpehi kɛ kpokpa nɔ kpehi a nɔ. Wa ma nyɛ ma ná ní nɛ ɔmɛ a he se be fɛɛ be konɛ waa wa ngɛ mumi mi nɛ wa he nɛ jɔ wɔ wawɛɛ. w24.04 21 ¶5-6

Ke o bua jɔ he kaa o kɛ nɔ ko ma bɔni nyɛɛmi kɛ ha gba si himi mi sɛmi ɔ, o ma nyɛ maa to blɔ nya konɛ o kɛ lɛ nɛ sɛɛ ní ngɛ he ko nɛ nihi ma nyɛ maa na nyɛ aloo ngɛ fon nɔ. E sa nɛ o ha nɛ e pee heii ha nɔ ɔ kaa o suɔ lɛ nɛ o maa suɔ nɛ o le lɛ saminya. (1 Kor. 14:9) Ke e maa hi ɔ, mo ha nɔ ɔ be bɔɔ nɛ e kɛ susu he. (Abɛ 15:28) Se ke nɔ ɔ bua jɔɛ o he ɔ, o mi mi nɛ ko fu. Ke nɔ ko de mo kaa e bua jɔ o he ɔ hu nɛɛ? E ngɛ heii kaa nɔ ɔ pee kã loko e nyɛ nɛ e ba de mo ɔ nɛ, lɔ ɔ he ɔ, mo je bumi kɛ mi mi jɔmi kpo kɛ tsɔɔ lɛ. Ke o suɔ nɛ nɔ ɔ nɛ ha mo be bɔɔ konɛ o kɛ susu nɔ́ nɛ e de mo ɔ he ɔ, lɛɛ mo ha nɛ e le. Se kɛ̃ ɔ, moo bɔ mɔde kaa o ma ha lɛ heto mla. (Abɛ 13:12) Ke o be nɔ ɔ he bua jɔmi ɔ, moo je bumi mi nɛ o ha nɛ e le. Se ke o suɔ kaa o kɛ nɔ ɔ maa nyɛɛ kɛ ha gba si himi mi sɛmi ɔ, ha nɛ e le bɔ nɛ o suɔ nɛ níhi nɛ ya nɔ ha ngɛ nyɛ nyɛɛmi ɔ mi. Eko ɔ, níhi nɛ nyɛ ni enyɔ ɔmɛ nyɛ maa hyɛ blɔ ɔ maa je ekpa. w24.05 23-24 ¶12-13

Eko ɔ, benɛ David ji niheyo nɛ e yi jeha 20 lolo ɔ, e ya Israel tabuli ɔmɛ a si to he ɔ. Benɛ e ya su lejɛ ɔ, e na kaa Filistibi ɔmɛ a tatsɛ nɛ ji Goliat ɔ “ngɛ Israel tabo ɔ ahlua bɔe,” nɛ enɛ ɔ ha nɛ sawale nu Israel tabuli ɔmɛ. (1 Sam. 17:​10, 11) Israel tabuli ɔmɛ ngɛ gbeye yee ejakaa a ngɔ a juɛmi kɛ ma bɔ nɛ Goliat je oblai kɛ ahlua bɔmi munyu nɛ e ngɛ tue ɔ nɔ. (1 Sam. 17:​24, 25) Se David lɛɛ e ngɔ e juɛmi kɛ ma nɔ́ kpa ko kulaa nɔ. E na kaa Goliat ngɛ Israelbi ɔmɛ a he fɛu yee, nɛ e ngɛ “Mawu hɛ kalɔ ɔ tabo ɔ ahlua” bɔe hulɔ. (1 Sam. 17:26) David ngɔ e juɛmi kɛ ma Yehowa nɔ. Akɛnɛ Yehowa ye bua David be ko nɛ be ɔ he je ɔ, e ngɛ hɛnɔkami kaa Yehowa maa ye bua lɛ ngɛ si fɔfɔɛ nɛ ɔ mi hulɔ. Ngɛ anɔkuale mi ɔ, akɛnɛ David le kaa Yehowa fĩ e se he je ɔ, e kɛ Goliat ya kpe nɛ e ye e nɔ kunimi!—1 Sam. 17:​45-51. w24.06 21 ¶7

Mo susu bɔ nɛ wa si himi ko pee ha ke wa sɔmɔ we Yehowa a he nɛ o hyɛ. Ke wa sɔmɔ Yehowa a, e maa ye bua wɔ nɛ waa pee nɔ́ nɛ da be fɛɛ be, nɛ wɔ hu wa ma de nɔ́ nɛ la polɔ ɔ de ɔ. E de ke: “E hi ha mi kaa ma hɛ kɛ su Mawu he.” (La 73:28) Wa ma nyɛ maa da ka fɛɛ ka nɛ waa kɛ maa kpe ngɛ nyagbe ligbi nɛ ɔmɛ a mi ɔ nya, ejakaa wa ji “nyɔguɛ kɛ ha anɔkuale Mawu” ɔ. (1 Tɛs. 1:9) Wa Mawu ɔ ji Nɔ nɛ ngɛ nitsɛnitsɛ, nɛ e yeɔ buaa e sɔmɔli be fɛɛ be. E ye bua e sɔmɔli blema, nɛ e maa ye bua wɔ mwɔnɛ ɔ hulɔ. E be kɛe nɛ waa kɛ haomi ngua ko nɛ eko bɛ hyɛ ɔ maa kpe ngɛ zugba a nɔ. Se kɛ̃ ɔ, Yehowa be wɔ sie, mohu ɔ, e maa piɛɛ wa he. Nyɛ ha nɛ wɔ tsuo wa “nɔ gbagba nɛ te, nɛ wa de ke: ‘Yehowa ji ye yemi kɛ bualɔ; i be gbeye yee.’”—Heb. 13:​5, 6. w24.06 25 ¶17-18

Baiblo ɔ tu nyumuhi nɛ a he hiɛ pe 40 nɛ a ye matsɛ ngɛ Israel ɔ a he munyu. Matsɛmɛ nɛ a pee Yehowa suɔmi nya ní ɔ po pee ní yayahi be komɛ. Mo susu David nɛ e ji matsɛ kpakpa a he nɛ o hyɛ. Yehowa de ngɛ e he ke: “Ye sɔmɔlɔ David . . . nyɛɛ ye se kɛ e tsui tsuo, nɔ́ nɛ da pɛ e pee ngɛ ye hɛ mi.” (1 Ma. 14:8) Se kɛ̃ ɔ, David kɛ nɔ ko yo ya ná bɔmi, nɛ e ha nɛ a gbe yo ɔ huno ngɛ ta mi. (2 Sam. 11:​4, 14, 15) Jehanɛ hu ɔ, Baiblo ɔ ha nɛ wa le kaa matsɛmɛ fuu nɛ a pee we Yehowa suɔmi nya ní ɔ hu pee ní kpakpa komɛ ngɛ a si himi mi. Mo susu Rehoboam he nɛ o hyɛ. Ngɛ Yehowa hɛ mi ɔ, e “pee ní yayamihi.” (2 Kron. 12:14) Se kɛ̃ ɔ, benɛ Yehowa de lɛ kaa e kɛ Israel wɛtso nyɔngma amɛ nɛ ko hwu ta, nɛ́ e ngmɛ mɛ blɔ nɛ a hla mɛ nitsɛmɛ a matsɛ ɔ, Rehoboam bu tue. Jehanɛ hu ɔ, e fia gbogbo ngɔ wo mahi babauu nɛ ngɛ e nɔ yemi ɔ sisi ɔ a he konɛ e kɛ po ma bi ɔmɛ a he piɛ ngɛ a he nyɛli ɔmɛ a he. (1 Ma. 12:​21-24; 2 Kron. 11:​5-12) Mɛni nɔ nɛ Yehowa da kɛ tsɔɔ kaa matsɛ ko ye anɔkuale mɔ? E ngɛ heii kaa, e hyɛ kɛ ji kaa matsɛmɛ nɛ ɔmɛ suɔ lɛ kɛ a tsui tsuo, a tsake a tsui, nɛ jehanɛ se hu kɛ ji kaa a maa ya nɔ ma sɔmɔ lɛ ngɛ blɔ nɛ da nɔ lo. w24.07 20 ¶1-3

Se ke nɔ ko nɛ a baptisi lɛ nɛ e yi jeha 18 lolo ɔ pee yayami nɛ hɛdɔ ngɛ he ɔ hu nɛɛ? Asafo mi nikɔtɔma amɛ maa hla nikɔtɔmahi enyɔ konɛ a kɛ jokuɛ ɔ kɛ e fɔli nɛ a ji Kristofohi ɔ nɛ kpe. Nikɔtɔma amɛ ma bi fɔli ɔmɛ nɔ́ nɛ a pee momo kɛ ye bua a bi ɔ konɛ e tsake e tsui. Ke jokuɛ ɔ bu ga womi nɛ e fɔli ɔmɛ kɛ ha lɛ ɔ tue, nɛ e ngɛ mɔde bɔe kaa e maa pee tsakemi ɔ, lɛɛ asafo mi nikɔtɔmahi enyɔ ɔmɛ ma nyɛ maa ma nya si kaa fɔli ɔmɛ nɛ a tsa nɔ nɛ a ye bua jokuɛ ɔ. Ejakaa asafo mi nikɔtɔma amɛ le kaa Yehowa ngɔ he blɔ kɛ ha fɔli kaa a je suɔmi mi nɛ a tsɔse a bimɛ ɔmɛ. (5 Mose 6:​6, 7; Abɛ 6:20; 22:6; Efe. 6:​2-4) Lɔ ɔ se ɔ, nikɔtɔma amɛ maa hi hyɛe kaa fɔli ɔmɛ ngɛ mɔde bɔe kaa a ma ha a bi ɔ yemi kɛ buami nɛ e hia a lo. Se ke jokuɛ ɔ tsakee we e tsui nɛ e ya nɔ nɛ e ngɛ yayami ɔ pee hu nɛɛ? Ke e ba jã a, asafo mi nikɔtɔma amɛ maa hla ajla toli konɛ a kɛ jokuɛ ɔ kɛ e fɔli nɛ a ji Kristofohi ɔ nɛ kpe. w24.08 24 ¶18

Wɔ tsuo wa bua jɔɔ ke a ke wɔ nɔ́ ko. Se wa bua jɔɔ pe jã ke wa ke nɔ ko nɔ́. Akɛnɛ Yehowa bɔ wɔ jã he je ɔ, wa ma nyɛ maa pee níhi nɛ ma ha wɔ bua jɔmi wawɛɛ. Ke wa hla blɔ kpahi nɛ wa ma nyɛ maa gu nɔ kɛ ke nɔ nɔ́ ɔ, wa bua maa jɔ wawɛɛ. Ke wa susu bɔ nɛ Yehowa bɔ wɔ ha a he ɔ, e ngɛ nyakpɛ wawɛɛ! (La 139:14) Akɛnɛ Baiblo ɔ tsɔɔ kaa nihi nɛ a haa nɔ nɔ́ ɔ ngɛ bua jɔmi he je ɔ, e be nyakpɛ kaa Baiblo ɔ tsɛ Yehowa ke “bua jɔmi Mawu.” (1 Tim. 1:11) Kɛ je blema tɔɔ ɔ, Yehowa ji nɔ nɛ haa nɔ nɔ́ pe kulaa. Bɔfo Paulo tsɔɔ kaa kɛ gu Yehowa nɔ ɔ, “wa ngɛ wami, nɛ wa yaa nɛ wa baa, nɛ wa ngɛ.” (Níts. 17:28) “Nike ní kpakpa fɛɛ nike ní kpakpa, kɛ nike ní nɛ hi kɛ pi si fɛɛ nike ní nɛ hi kɛ pi si ɔ” je Yehowa ngɔ. (Yak. 1:17) Wɔ tsuo wa suɔ nɛ waa ke nɔ nɔ́ konɛ wa ná bua jɔmi wawɛɛ. Wa ma nyɛ maa pee jã ke wa kase bɔ nɛ Yehowa haa nɔ nɔ́ faa ha a.—Efe. 5:1. w24.09 26 ¶1-4

Asafo mi sɔmɔli komɛ ma nyɛ maa nu he kaa a be nyɛe ma ba pee asafo mi nikɔtɔmahi, ejakaa a ma nyɛ ma susu kaa suhi nɛ a ngɛ blɔ hyɛe kaa a je lɛ kpo ɔ hyɛ tsɔ. Se ke o ngɛ he nue jã a, mo kai kaa Yehowa kɛ e we asafo ɔ hyɛ we blɔ kaa o je su nɛ ɔmɛ tsuo kpo kɛ pi si. (1 Pet. 2:21) Jehanɛ hu ɔ, Yehowa mumi klɔuklɔu ɔ nɛ ngɛ he wami ɔ lɛ maa ye bua mo konɛ o nyɛ nɛ o je su nɛ ɔmɛ kpo konɛ o he nɛ su kaa asafo mi nɔkɔtɔma. (Filip. 2:13) Anɛ su pɔtɛɛ ko ngɛ nɛ e he waa ha mo kaa o ma je lɛ kpo lo? Ke jã a, moo sɔle ha Yehowa ngɛ he, nɛ o hla níhi a mi kɛ kɔ jamɛ a su ɔ he, nɛ o bi asafo mi nikɔtɔma amɛ a ti nɔ kake nɛ e tsɔɔ mo níhi nɛ o ma nyɛ maa pee konɛ o ya o hɛ mi. Ke o pee jã a, o maa ya o hɛ mi nɛ o ba pee asafo mi nɔkɔtɔma! Mo bi Yehowa nɛ e tsɔse mo, nɛ o ya nɔ nɛ o pee babauu ngɛ e sɔmɔmi mi kɛ e we asafo ɔ mi hulɔ. (Yes. 64:8) Yehowa nɛ jɔɔ mɔde nɛ o ngɛ bɔe konɛ o he nɛ su nɛ o sɔmɔ kaa asafo mi nɔkɔtɔma a nɔ wawɛɛ. w24.11 25 ¶17-18

E sɛ nɛ wa ti nɔ ko nɔ ko nɛ susu kaa akɛnɛ e kɛ jehahi babauu ngɛ Yehowa sɔmɔe he je ɔ, e sa nɛ Yehowa nɛ ngɔ e tɔmihi kɛ ke lɛ. E ji anɔkuale kaa Yehowa hɛ ji níhi tsuo nɛ wa pee ngɛ e sɔmɔmi mi ɔ nɔ. E ha wɔ kpɔmi nɔ́ ɔ kaa nike ní, se pi kaa e kɛ maa wo wɔ hiɔ ngɛ sɔmɔmi nɛ wa ngɛ lɛ sɔmɔe ɔ he. Enɛ ɔ he ɔ, e sɛ nɛ wa susu kaa akɛnɛ wa pee níhi fuu ha Yehowa he je ɔ, e sa nɛ e na wɔ mɔbɔ loo e ngɔ wa yayamihi kɛ ke wɔ. Ke wa susuɔ jã a, lɛɛ wa ngɛ tsɔɔe kaa Kristo gbenɔ ɔ he hia we wɔ. (Kɛ to Galatia Bi 2:21 ɔ he.) Bɔfo Paulo le kaa pi ní tsumi abɔ nɛ e ma tsu ngɛ Yehowa sɔmɔmi mi ɔ nɔ nɛ Yehowa maa da kɛ na lɛ mɔbɔ. Ke jã a, lɛɛ mɛni he je nɛ e tsu ní wawɛɛ ngɛ Yehowa sɔmɔmi mi ɔ? Pi nɛ Paulo pee jã konɛ Yehowa nɛ na lɛ mɔbɔ, mohu ɔ, e pee jã konɛ e kɛ tsɔɔ kaa e bua jɔ kaa Yehowa je mi mi jɔmi kɛ mɔbɔ nami kpo kɛ tsɔɔ lɛ. (Efe. 3:7) Kaa bɔ nɛ Paulo pee ɔ, pi nɛ wa suɔ kaa Yehowa nɛ na wɔ mɔbɔ he je nɛ waa kɛ kã sɔmɔɔ lɛ, mohu ɔ, wa peeɔ jã kɛ tsɔɔ kaa wa bua jɔ nɔ́ nɛ e pee kɛ ha wɔ ɔ he. w25.01 27 ¶5-6