July

Yehowa sɔmɔli komɛ nyɛ we nɛ a pee babauu ngɛ Yehowa sɔmɔmi mi akɛnɛ a wa ngɛ jeha mi, loo a be nɔmlɔ tso mi he wami, aloo a je kpa a he je. Enɛ ɔ ma nyɛ ma ha nɛ a nu he kaa a he be se nami ngɛ Yehowa hɛ mi. Eko ɔ, a ma bi ke, ‘Anɛ loloolo ɔ, ye he hia Yehowa lo?’ Nɔ nɛ ngma La 71 ɔ hu nu he jã. Enɛ ɔ he ɔ, e sɔle ke: “Ko kua mi ke ye he wami ta.” (La 71:​9, 18) E ngɛ mi kaa la polɔ ɔ kɔni mi jɔ̃ mohu lɛɛ, se e ngɛ nɔ mi mami kaa ke e ye Yehowa anɔkuale ɔ, e maa tsɔɔ lɛ blɔ nɛ e maa ye bua lɛ. Kaa bɔ nɛ e ji ngɛ la polɔ ɔ blɔ fa mi ɔ, Yehowa bua jɔɔ nihi nɛ a miaa a hɛ mi kaa a ma sɔmɔ lɛ ngɛ haomihi nɛ a kɛ ngɛ kpee ɔ tsuo se ɔ a he wawɛɛ. (La 37:​23-25) Ke o wa ngɛ jeha mi po ɔ, moo na o si fɔfɔɛ ɔ kaa bɔ nɛ Yehowa naa lɛ ɔ. E ngɛ mi kaa o be nɔmlɔ tso mi he wami mohu lɛɛ, se Yehowa ma nyɛ maa ye bua mo konɛ o ye lɛ anɔkuale. (La 92:​12-15) Moo bɔ mɔde kaa o maa ngɔ o juɛmi kɛ ma níhi nɛ o ma nyɛ maa pee amlɔ nɛ ɔ nɔ, mohu pe nɛ o kɛ o juɛmi maa ma níhi nɛ o be nyɛe maa pee ɔ nɔ. w24.10 28 ¶14-16

Behi fuu ɔ, e he waa ha Kristofohi nɛ a wɛ ngɛ Mawu jami mi ɔ kaa a maa mwɔ yi mi kpɔhi nɛ da ngɛ si fɔfɔɛhi nɛ Baiblo ɔ wui mlaa pɔtɛɛ ko ngɛ he ɔ he. Ke Baiblo ɔ wui mlaa pɔtɛɛ ko ngɛ nɔ́ ko he ɔ, ni komɛ susuɔ kaa a ma nyɛ maa pee nɔ́ nɛ a suɔ. Ni kpahi hu suɔ kaa a wo mɛ mlaa ngɛ nɔ́ ko nɛ he hia we nɛ a wo mlaa ngɛ he ɔ he. Kaa nɔ hyɛmi nɔ́ ɔ, eko ɔ, Kristofohi nɛ a ngɛ Korinto ɔ bi bɔfo Paulo ke ji a ma nyɛ maa ye niye ní nɛ a kɛ sã afɔle ha amagahi ɔ lo. Paulo wui mɛ mlaa ngɛ nɔ́ nɛ e sa nɛ a pee ɔ he, mohu ɔ, e ye bua mɛ nɛ a na kaa nɔ fɛɛ nɔ ngɛ ‘he blɔ nɛ e mwɔɔ e yi mi kpɔ’ ngɛ nɔ́ nɛ e suɔ kaa e maa pee ɔ he ke e he nile maa ngmɛ lɛ blɔ. Paulo tsɔɔ mɛ Baiblo sisi tomi mlaa komɛ nɛ maa ye bua mɛ konɛ a mwɔ yi mi kpɔhi nɛ be hae nɛ a he nile nɛ bu mɛ fɔ, nɛ a ko tɔ̃tɔ̃ ni kpahi a nane hulɔ. (1 Kor. 8:7-9) Paulo ye bua Korinto bi ɔmɛ konɛ a wa ngɛ mumi mi, nɛ a ná juɛmi nɛ a kɛ kɔɔ nɔ́ se bɔ nɛ pee nɛ a ko ngɔ a hɛ kɛ fɔ ni kpahi a nɔ loo a ha nɛ ni kpahi nɛ wo mɛ mlaahi. w24.04 5 ¶14

Ngɛ Yona be ɔ mi ɔ, Ninevebi ɔmɛ lɛɛ a ná he blɔ kɛ pee tsakemi. Jehanɛ hu ɔ, mo kadi nɔ́ nɛ Yesu de kɛ kɔ “kojomi he gbogboehi a si tlemi” ɔ he. E tsɔɔ kaa nihi nɛ a ma tle mɛ si ɔ a kpɛti ni komɛ ji “ni nɛmɛ nɛ a pee ní yayamihi.” (Yoh. 5:29) Enɛ ɔ tsɔɔ kaa eko ɔ, hɛ kɛ nɔ fɔmi ngɛ kɛ ha Sodom kɛ Gomora bi ɔmɛ hulɔ. E ma nyɛ maa ba kaa a ma tle a kpɛti ni komɛ si kɛ ba wami mi, nɛ eko ɔ, wa ma ná he blɔ kɛ tsɔɔ mɛ Yehowa kɛ Yesu Kristo he ní! Yehowa ‘hlaa nimli a juɛmi mi, nɛ e kaa a tsui.’ Ngɛ hwɔɔ se gbogboehi a si tlemi ɔ mi ɔ, e maa ‘wo nɔ fɛɛ nɔ hiɔ ngɛ e ní peepee kɛ e je mi bami he.’ Yehowa maa kojo ngɛ dami mi, se kɛ̃ ɔ, e maa na mɔbɔ ke e he hia nɛ e pee jã. Enɛ ɔ he ɔ, e sɛ nɛ wa susu kaa a be nɔ ko si tlee hwɔɔ se, ja wa ngɛ nɔ mi mami kaa Baiblo ɔ de jã. w24.05 5-6 ¶15-16

Kɛ je blema tɔɔ ɔ, ke Mawu ngɔ ní tsumi ko nɛ he wa kɛ wo e sɔmɔli a dɛ ɔ, e Munyu ɔ woɔ mɛ he wami. Kaa nɔ hyɛmi nɔ́ ɔ, mo susu gbalɔ Yeremia he nɛ o hyɛ. Benɛ Yehowa de lɛ ke e ya fiɛɛ ɔ, sisije ɔ, e gbla e nane si. Yeremia de ke: ‘I li munyu tumi; niheyo kɛkɛ ji mi.’ (Yer. 1:6) Mɛni ye bua lɛ nɛ e pee kã? Sɛ gbi nɛ Mawu kɛ ha lɛ ɔ lɛ wo lɛ he wami. Yeremia de ke: “O sɛ gbi ɔ peeɔ kaa la nɛ ngɛ tsoe ngɛ ye tsui mi, kɛ ye wuhi a mi. I bɔɔ mɔde saminya kaa ma tsi nya, se jehanɛ lɛɛ, i pa nyɛ we hu.” (Yer. 20:​8, 9) E ngɛ mi kaa nihi fuu nɛ Yeremia fiɛɛ kɛ ha mɛ ɔ bui lɛ tue mohu lɛɛ, se sɛ gbi nɛ a de lɛ kaa e fiɛɛ ɔ wo lɛ he wami nɛ e nyɛ nɛ e tsu ní ɔ. Mwɔnɛ ɔ hu ɔ, Mawu Munyu ɔ woɔ Kristofohi he wami. Bɔfo Paulo tsɔɔ kaa ke e nyɛmimɛ ɔmɛ kase anɔkuale nile nɛ ngɛ Mawu Munyu ɔ mi ɔ, e maa wo mɛ he wami konɛ a “nyɛɛ bɔ nɛ sa Yehowa” be mi nɛ a ngɛ nɔ yae nɛ a ngɛ “yiblii woe ngɛ ní tsumi kpakpa fɛɛ ní tsumi kpakpa mi” ɔ.—Kol. 1:​9, 10. w24.04 14-15 ¶2-4

E ngɛ mi kaa Abiatar nɛ ji osɔfo nɔkɔtɔma a yi Yehowa anɔkuale nɛ e ya fĩ David binyumu Adoniya nɛ e to e yi mi kaa e ma kpɔ̃ matsɛ yemi ɔ se mohu lɛɛ, se Zadok lɛɛ e ya nɔ nɛ e ye Yehowa anɔkuale. David le kaa e ma nyɛ ma he Zadok maa ye be fɛɛ be. Benɛ Adoniya ga tomi ɔ yi manye ɔ, David hla Zadok kɛ Natan kɛ Benaya konɛ a pɔ Salomo nu kaa matsɛ. (1 Ma. 1:​32-34) Eko ɔ, Yehowa sɔmɔli anɔkualetsɛmɛ komɛ kaa Natan kɛ ni kpahi nɛ a fĩ Matsɛ David se nɛ Zadok kɛ mɛ bɔ ɔ ji nɔ́ nɛ wo lɛ he wami wawɛɛ ɔ nɛ. Benɛ a wo Salomo matsɛ ɔ, e “ngɔ osɔfo Zadok kɛ da Abiatar nane mi.” (1 Ma. 2:35) Kɛ o ma plɛ kɛ kase Zadok nɔ hyɛmi nɔ́ ɔ ha kɛɛ? Ke nɔ ko nɛ nyu bi ngɛ o kɛ lɛ nyɛ kpɛti ɔ kua Yehowa po ɔ, mo tsɔɔ kaa o yeɔ Yehowa anɔkuale. (Yosh. 24:15) Yehowa ma ha mo he wami kɛ kã nɛ o hia a konɛ o pee nɔ́ nɛ da. Ngɔɔ o hɛ kɛ fɔ Yehowa nɔ, moo sɔle ha lɛ, nɛ o kɛ nihi nɛ a yeɔ Yehowa anɔkuale ɔ pɛ nɛ bɔ. Ke o pee jã a, Yehowa bua maa jɔ o he, nɛ e maa jɔɔ mo.—2 Sam. 22:26. w24.07 6-7 ¶16-17

Ngɛ La 15:2 ɔ, a tsɔɔ kaa Mawu huɛmɛ “nyɛɛɔ ngɛ anɔkuale mi, nɛ [a] peeɔ nɔ́ nɛ da.” Munyu nɛ ji “nyɛɛɔ” kɛ “peeɔ” nɛ a kɛ tsu ní ɔ, tsɔɔ nɔ́ ko nɛ e sa nɛ waa ya nɔ nɛ waa hi pee. Se anɛ wa ma nyɛ maa ‘nyɛɛ ngɛ anɔkuale mi’ lo? Ee. Adesa ko be nɛ e ye mluku, se ke wa bɔ mɔde kaa wa maa bu Yehowa tue ɔ, e maa na wɔ kaa wa “nyɛɛɔ ngɛ anɔkuale mi.” Ke wa jɔɔ wa he nɔ ha Mawu nɛ a baptisi wɔ pɛ ɔ, lɔ ɔ tsɔɔ kaa waa kɛ Mawu bɔni nyɛɛmi. Mo kadi kaa blema a, ke Israelno ji nɔ ko ɔ, lɔ ɔ tsɔɔ we kaa doo ɔ, e maa hi Yehowa bo tsu ɔ mi, ejakaa a ti ni komɛ deɔ ke a ngɛ Yehowa jae, se ‘pi ngɛ anɔkuale mi.’ (Yes. 48:1) E sa nɛ Israelbi nɛ a suɔ nɛ a ja Yehowa ngɛ anɔkuale mi ɔ nɛ a kase Yehowa mlaa amɛ nɛ a kɛ tsu ní. Jã kɛ̃ nɛ mwɔnɛ ɔ hu ɔ, ke wa ngɛ hlae nɛ Yehowa nɛ kplɛɛ wa nɔ ɔ, pi baptisimi nɛ a maa baptisi wɔ, kɛ Kristofohi a kpehi nɛ wa maa ya a pɛ kɛkɛ nɛ e he hia. Mohu ɔ, e sa nɛ waa ya nɔ nɛ waa ‘pee nɔ́ nɛ da.’ w24.06 9 ¶4; 10 ¶6

Ngɛ mɛni blɔhi a nɔ nɛ Yehowa jeɔ mi mi jɔmi kpo? Mo susu nɔ hyɛmi ní komɛ a he nɛ o hyɛ. Yehowa haa wɔ wa he lo nya hiami níhi. Eko ɔ, wa be he lo nya níhi fuu, se Yehowa yeɔ buaa wɔ nɛ wa nine suɔ wa hiami níhi a nɔ be fɛɛ be. Kaa nɔ hyɛmi nɔ́ ɔ, e yeɔ buaa wɔ nɛ wa náa niye ní, heha nɔ́ kɛ hwɔ he. (La 4:8; Mat. 6:​31-33; 1 Tim. 6:​6-8) Anɛ Yehowa haa wɔ wa hiami níhi akɛnɛ e sa kaa e pee jã kɛkɛ he je lo? Pi jã kulaa! Mo susu Yesu munyu nɛ ngɛ Mateo 6:​25, 26 he nɛ o hyɛ. E de ngɛ lohwe pɛlitsɛmɛ a he ke: “A du we ní, nɛ a kpa we ní, nɛ a bua we níhi a nya kɛ wui nito hehi.” Se mo kadi nɔ́ nɛ Yesu de kɛ tsa nɔ ɔ. E de ke: “Nyɛ Tsɛ nɛ e ngɛ hiɔwe ɔ haa mɛ niye ní.” Kɛkɛ nɛ Yesu bi ke: “Anɛ nyɛ he jua wɛ hluu pi mɛ lo?” Mɛni wa kaseɔ ngɛ mi? Ke Yehowa hyɛɛ lohwehi a nɔ ɔ, lɛɛ wa ma nyɛ ma ná nɔ mi mami kaa e maa hyɛ wa nɔ kokooko! Kaa bɔ nɛ tsɛ nɛ e susuɔ e weku mi bimɛ ɔmɛ a he ɔ peeɔ ɔ, Yehowa hu jeɔ suɔmi mi nɛ e haa e sɔmɔli a hiami níhi.—La 145:16; Mat. 6:32. w24.09 26-27 ¶4-6

Asafo mi sɔmɔli ji nyɛmimɛ nyumuhi nɛ a baptisi mɛ, nɛ Mawu kɛ e mumi klɔuklɔu ɔ hla mɛ konɛ a ye bua asafo mi nikɔtɔmahi kɛ tsu níhi nɛ a he hia ngɛ asafo ɔ mi ɔ a he ní. Se nɔ́ nɛ pe kulaa a, asafo mi sɔmɔli ji nyumuhi nɛ a suɔ Yehowa nɛ a kɛ e mlaa amɛ tsuɔ ní. Jehanɛ hu ɔ, a suɔ a nyɛmimɛ ɔmɛ wawɛɛ. (Mat. 22:​37-39) Mɛni nɛ nyɛminyumu ko nɛ a baptisi lɛ ɔ ma nyɛ maa pee konɛ e he nɛ su kaa asafo mi sɔmɔlɔ? Baiblo ɔ tsɔɔ níhi nɛ e sa nɛ nyɛminyumu ko nɛ su he loko e he maa su kaa asafo mi sɔmɔlɔ. (1 Tim. 3:​8-10, 12) O ma nyɛ ma sɔmɔ kaa asafo mi sɔmɔlɔ ke o kase Ngmami ɔ nya hlami ní nɛ ɔmɛ, nɛ o bɔ mɔde kaa o maa su a he. Se kekleekle ɔ, e he hia nɛ o susu yi mi tomi he je nɛ o suɔ nɛ o sɔmɔ kaa asafo mi sɔmɔlɔ ɔ he saminya. w24.11 15 ¶4-5

Ni komɛ deɔ ke a kane Baiblo ɔ si abɔ. Se anɛ a heɔ Baiblo ɔ yeɔ niinɛ lo? Anɛ a kɛ nɔ́ nɛ a kase ngɛ Baiblo ɔ mi ɔ tsuɔ ní ngɛ a si himi mi lo? Aywilɛho sane ji kaa a pee we jã. Se Yehowa we bi lɛɛ, a naa Baiblo ɔ ngɛ blɔ kpa nɔ. Wa bɔɔ mɔde kaa waa kɛ nɔ́ nɛ Baiblo ɔ de ɔ ma tsu ní ngɛ wa si himi mi. Se kɛ̃ ɔ, pi be fɛɛ be nɛ e ngɛ gbɔjɔɔ kaa wa maa kane Baiblo ɔ nɛ waa kɛ e mi munyu ɔ nɛ tsu ní. Be komɛ ɔ, e he ma nyɛ maa wa kaa wa ma ná be kɛ kane Baiblo ɔ. Aloo eko ɔ, wa kaneɔ Baiblo ɔ kɛfokɛfo, enɛ ɔ he ɔ, wa nyɛ we nɛ wa susuɔ nɔ́ nɛ wa kaneɔ ɔ he. Aloo ke wa kane Baiblo ɔ nɛ wa yɔse kaa e sa nɛ waa pee tsakemihi fuu ɔ, wa kɔni mi ma nyɛ ma jɔ̃. Bɔ fɛɛ bɔ nɛ e ji ngɛ o blɔ fa mi ɔ, o ma nyɛ maa ye manye. Yehowa ma nyɛ maa ye bua mo konɛ o ye o gbɔjɔmi ɔ nɔ. Nyɛ ha nɛ wɔ tsuo waa fia wa pɛɛ si kaa wa maa pee Munyu ɔ nɔ yeli, se pi nihi nɛ a nuɔ nɛ a hɛ jeɔ nɔ ɔ. Ngɛ anɔkuale mi ɔ, ke wa ya nɔ nɛ wa kane Mawu Munyu ɔ nɛ waa kɛ tsu ní ɔ, wa bua maa jɔ saminya.—Yak. 1:25. w24.09 7 ¶15-16

Ke wa suɔlɔ ko gbo loo waa kɛ si fɔfɔɛ ko nɛ mi wa kpe ɔ, Yehowa guɔ e mumi klɔuklɔu ɔ nɔ kɛ woɔ wa bua. Ke o kɛ haomi ko nɛ mi wa ngɛ kpee ɔ, moo sɔle ha Yehowa si abɔ, nɛ o de lɛ níhi nɛ ngɛ o tsui mi. (La 86:3; 88:1) Moo ya nɔ nɛ o bi Yehowa konɛ e ha mo e mumi klɔuklɔu ɔ. E be e hɛ mae kɛ fɔ o ní bimi ɔ nɔ gblegbleegble. Anɛ o kɛ haomi ko ngɛ kpee nɛ lɔ ɔ ha nɛ o kɔni mi jɔ̃ lo? Ke jã a, mo ná nɔ mi mami kaa mumi klɔuklɔu ɔ ma nyɛ maa wo mo he wami nɛ o ya nɔ nɛ o kɛ anɔkuale yemi nɛ sɔmɔ Yehowa. (Efe. 3:16) Ke o sɔle kaa Yehowa nɛ ha mo e mumi klɔuklɔu ɔ, mɛni e sa nɛ o pee? Moo pee níhi nɛ ma ha nɛ o nine nɛ su Mawu mumi klɔuklɔu ɔ nɔ. Enɛ ɔ biɔ nɛ o ya asafo mi kpehi nɛ o fiɛɛ kɛ tsɔɔ ni kpahi. Moo kane Mawu Munyu ɔ daa ligbi. Enɛ ɔ maa ye bua mo konɛ o le Yehowa susumi ngɛ níhi a he. (Filip. 4:​8, 9) Ke o ngɛ Baiblo ɔ kanee ɔ, mo kadi nihi nɛ a kɛ haomihi kpe ɔ, nɛ o pue o yi mi tɛ ngɛ bɔ nɛ Yehowa ye bua mɛ ha nɛ a nyɛ nɛ a fĩ si ɔ he. w24.10 9 ¶12-14

Akɛnɛ Yehowa kɛ e Bi ɔ suɔ nimli he je ɔ, wɔ hu wa suɔ nimli. (Abɛ 8:31) Wa mi mi sãa wɔ wawɛɛ ngɛ nihi nɛ a ‘li Mawu,’ nɛ a “be hɛ kɛ nɔ fɔmi” ko ɔ a he. (Efe. 2:12) A kɛ nyagbahi fuu ngɛ kpee, enɛ ɔ he ɔ, a ma nyɛ maa nu he kaa a ngɛ muɔ voo ko mi. Se wa ngɛ kpã nɛ waa kɛ ma nyɛ maa gbla mɛ kɛ je kpo ngɛ muɔ ɔ mi. Lɔ ɔ ji Mawu Matsɛ Yemi ɔ he sane kpakpa a nɛ. Akɛnɛ wa suɔ mɛ nɛ wa mi mi sãa wɔ ngɛ a he he je ɔ, wa peeɔ nɔ́ fɛɛ nɔ́ nɛ wa ma nyɛ konɛ waa fiɛɛ sane kpakpa a kɛ tsɔɔ mɛ. Ke a nu sane kpakpa nɛ ɔ, a ma ná hɛ nɔ kami, nɛ lɔ ɔ maa ye bua mɛ konɛ a ná bua jɔmi amlɔ nɛ ɔ. Jehanɛ hu ɔ, hwɔɔ se ɔ, lɔ ɔ maa ye bua mɛ konɛ a nine nɛ su “wami nitsɛnitsɛ ɔ” nɔ ngɛ Mawu je ehe ɔ mi. (1 Tim. 6:19) Suɔmi nɛ wa ngɛ ha nihi ɔ hu woɔ wɔ he wami nɛ wa bɔɔ mɛ kɔkɔ kaa e be kɛe nɛ a ma kpata je yaya nɛ ɔ hɛ mi. (Eze. 33:​7, 8) Wa suɔ nɛ wa de mɛ nɛ a le nɔ́ nɛ maa ba ngɛ amanehlu ngua a mi. Wa suɔ nɛ a le kaa a ma kpata lakpa jami hɛ mi, nɛ lɔ ɔ se ɔ, a ma kpata je yaya nɛ ɔ tsuo hɛ mi ngɛ Harmagedon.—Kpoj. 16:​14, 16; 17:​16, 17; 19:​11, 19, 20. w24.05 16-17 ¶8-9

Bɔfo Paulo wo Kristofo ɔmɛ he wami kaa a “ngmɛ [Mawu] mi mi fumi ɔ blɔ.” Ke a ye wɔ sane yaya nɛ wa ngmɛɛ sane ɔ he kɛ ha Yehowa konɛ e tsu he ní ngɛ be nɛ sa mi ɔ, lɔ ɔ tsɔɔ kaa wa ngmɛ Yehowa mi mi fumi ɔ blɔ. Benɛ a ye nyɛminyumu ko nɛ a tsɛɛ lɛ ke John ɔ sane yaya a, e de ke: “I ba na kaa e he hia nɛ ma kudɔ ye we abofu ɔ konɛ ma ko ya pee nɔ́ ko nɛ dɛ. Se kɛ̃ ɔ, i ná we lɛ gbɔjɔɔ. Roma Bi 12:19 ɔ ye bua mi nɛ i to ye tsui si, nɛ i ngɔ ye hɛ kɛ fɔ Yehowa nɔ.” Ke a ye wɔ sane yaya nɛ wa ngmɛɛ sane ɔ he kɛ ha Yehowa a, wa náa he se wawɛɛ. Ke wa pee jã a, lɔ ɔ be hae nɛ waa hao loo wa kɔni mi nɛ jɔ̃. Yehowa suɔ nɛ e ye bua wɔ. Enɛ ɔ he ɔ, e de wɔ kaa waa to wa tsui nɛ waa mlɛ lɛ kɛ ya si benɛ e ma tsu dami sane nɛ a yi ɔ he ní. Ke wa he ye kaa Yehowa maa kojo nihi nɛ a yi dami sane ɔ tsuo ɔ, lɛɛ e he hia we nɛ waa ya nɔ nɛ waa hɛɛ abofu ɔ mi, ejakaa wa le kaa Yehowa maa pee nɔ́ nɛ da. w24.11 6 ¶14-15

E sa nɛ waa hyɛ nɛ hi nɛ wa ko ha nɛ he lo nya níhi nɛ a ba pee nɔ́ titli ngɛ wa si himi mi. Sɛ womi nɛ bɔfo Paulo ngma kɛ ha Kristofohi ɔ ma nyɛ maa ye bua wɔ wawɛɛ. E tu nɔ́ yaya nɛ Israelbi ɔmɛ pee ngɛ nga a nɔ kɛ Sinai Yoku ɔ kasa nya a he munyu. E bɔ Kristofohi kɔkɔ kaa a “ko ná ní yayamihi a he akɔnɔ, kaa bɔ nɛ [Israelbi ɔmɛ] ná he akɔnɔ ɔ.” (1 Kor. 10:​6, 7, 11) Yehowa gu nyakpɛ blɔ nɔ kɛ ha Israelbi ɔmɛ niye ní, se akɛnɛ a foɔ mɛ pɛ a nɔ́ mi he je ɔ, ní kpakpahi nɛ Yehowa pee kɛ ha mɛ ɔ tsuo ba pee “ní yayamihi” ngɛ a hɛ mi. (4 Mose 11:​4-6, 31-34) Jehanɛ hu ɔ, benɛ Israelbi ɔmɛ ja sika tsu na bi ɔ, a ye ní nɛ a nu ní nɛ a bua jɔ wawɛɛ. (2 Mose 32:​4-6) Benɛ e piɛ bɔɔ nɛ a ma kpata Yerusalem kɛ sɔlemi we ɔ hɛ mi ngɛ jeha 70 ɔ mi ɔ, Paulo tu nɔ hyɛmi nɔ́ yaya nɛ ɔ he munyu konɛ e kɛ bɔ Kristofo ɔmɛ nɛ a hi si ngɛ jamɛ a be ɔ mi ɔ kɔkɔ. Amlɔ nɛ ɔ, wɔ hu wa ngɛ je yaya nɛ ɔ nyagbe be ɔ mi. Enɛ ɔ he ɔ, e sa nɛ waa bu Paulo kɔkɔ bɔmi ɔ tue saminya. w24.12 6 ¶13

Yehowa ji “bua jɔmi Mawu,” nɛ e suɔ nɛ wɔ hu wa bua nɛ jɔ. (1 Tim. 1:11) E ha wɔ nike ní kpakpahi fuu konɛ wa bua nɛ jɔ ngɛ si himi mi. (Yak. 1:17) Nike ní nɛ ɔmɛ eko ji gba si himi. Ke nyumu kɛ yo sɛ gba si himi mi ɔ, lɔ ɔ tsɔɔ kaa a kã kita kaa a ma je suɔmi kɛ bumi kpo kɛ tsɔɔ a sibi. Ke a ha nɛ huɛ bɔmi kpakpa ngɛ a kpɛti ɔ, lɔ ɔ ma ha nɛ a bua maa jɔ saminya. Se aywilɛho sane ji kaa, nihi babauu nɛ a sɛ gba si himi mi ɔ hɛ je kita nɛ a kã ngɛ yo kpeemi ligbi ɔ nɔ kaa a ma je suɔmi kɛ bumi kpo kɛ tsɔɔ a sibi ɔ nɔ. Enɛ ɔ ha nɛ a be bua jɔmi ko kulaa. Kɛ Yehowa suɔ nɛ huno ko kɛ e yo nɛ hi si ha kɛɛ? Yehowa fã hunomɛ kaa a je bumi kɛ suɔmi kpo kɛ tsɔɔ a yi ɔmɛ. Huno nɛ e jeɔ bumi kpo kɛ tsɔɔ e yo ɔ kɛ lɛ hiɔ si ngɛ mi mi jɔmi kɛ suɔmi mi.—1 Pet. 3:7. w25.01 8 ¶1-2; 9 ¶4-5

Ngɛ anɔkuale mi ɔ, sɛ womi nɛ bɔfo Paulo ngma kɛ ya ha Hebribi ɔmɛ ɔ ye bua mɛ nɛ a dla a he kɛ ha haomihi nɛ e be kɛe nɛ a kɛ maa kpe ɔ. Paulo wo e nyɛmimɛ ɔmɛ he wami kaa e sa nɛ a kase Mawu Munyu ɔ nɛ a nu sisi saminya. Ke a pee jã a, e maa ye bua mɛ konɛ a kua tsɔɔmihi nɛ ma nyɛ ma gbɔjɔ a hemi kɛ yemi ɔ mi ɔ. E wo mɛ he wami kaa a ná hemi kɛ yemi nɛ mi wa konɛ a nyɛ nɛ a ngɔ blɔ tsɔɔmi nɛ je Yesu kɛ nihi nɛ a ngɛ asafo ɔ hɛ mi nyɛɛe ɔ a ngɔ ɔ kɛ tsu ní oya nɔuu. Jehanɛ ɔ hu ɔ, e ye bua mɛ nɛ a na kaa ke a kɛ kahi ngɛ kpee ɔ, a Tsɛ nɛ ngɛ suɔmi ɔ ma nyɛ maa gu jamɛ a ka amɛ a nɔ kɛ tsɔse mɛ. Enɛ ɔ nɛ e pee ɔ ye bua mɛ nɛ a nyɛ nɛ a fĩ si wawɛɛ. Ngɛ anɔkuale mi ɔ, e sa nɛ wɔ hu waa kɛ Baiblo mi ga womi nɛ ɔ nɛ tsu ní. Ke wa pee jã a, e maa ye bua wɔ konɛ waa kɛ anɔkuale yemi nɛ fĩ si kɛ ya si nyagbe.—Heb. 3:14. w24.09 13 ¶17, 19

Baiblo ɔ tsɔɔ kaa kpɔmi nɔ́ ji hiɔ ko nɛ a woɔ konɛ a kɛ kpata nɔ ko aloo a kɛ dla nihi a kpɛti. Mɛni nɛ Yehowa kɛ ha konɛ adesahi a nine nɛ su nɔ́ nɛ bɔ Adam ɔ nɔ ekohu? Mo kai kaa Adam kɛ Hawa ye mluku, nɛ a ngɛ he blɔ kaa a maa hi si kɛ ya neneene. Se akɛnɛ a gbo tue he je ɔ, ní nɛ ɔmɛ bɔ mɛ. Lɔ ɔ he ɔ, e sa nɛ kpɔmi nɔ́ ɔ kɛ nɔ́ nɛ laa a jua nɛ sɔ pɛpɛɛpɛ. (1 Tim. 2:6) Nɔ nɛ ma nyɛ ma tsu nɔ́ nɛ ɔ he ní ji nyumu nɛ e wa, nɛ (1) e ye mluku (2) e ngɛ he blɔ kaa e maa hi si kɛ ya neneene ngɛ zugba a nɔ, kɛ (3) e suɔ kaa e ngɔ e wami kɛ ha aloo e kɛ sã afɔle ha wɔ. Nyɛ ha nɛ wa susu níhi etɛ a he je nɛ Yesu nyɛ nɛ e wo kpɔmi nɔ́ ɔ he waa hyɛ. (1) E ye mluku, nɛ tsɔɔ kaa “e pee we yayami ko.” (1 Pet. 2:22) (2) Akɛnɛ e ye mluku he je ɔ, e ngɛ he blɔ kaa e maa hi si ngɛ zugba a nɔ kɛ ya neneene. (3) E pee klaalo kaa e maa ngɔ e wami kɛ ha ngɛ wa he.—Heb. 10:9. w25.02 4-5 ¶11-12

Yehowa suɔ mo, nɛ e suɔ nɛ o ba piɛɛ e weku ɔ he. Enɛ ɔ ji anɔkuale, nɛ si fɔfɔɛhi nɛ ha we nɛ a baptisi mo ɔ po be nyɛe ma tsake anɔkuale sane nɛ ɔ. Yesu de e kaseli ɔmɛ ke: “Ke nyɛ hemi kɛ yemi ɔ klemi ngɛ kaa sinapi wu ɔ, nyɛ ma de yoku nɛ ɔ ke, ‘Hiaa kɛ je hiɛ ɔ kɛ ya hiɛ ɔ,’ nɛ e maa hia, nɛ nɔ́ ko be nɛ nyɛ be nyɛe maa pee.” (Mat. 17:20) Nihi nɛ Yesu tu munyu nɛ ɔ kɛ tsɔɔ ɔ bɔni e se nyɛɛmi jeha bɔɔ komɛ pɛ, enɛ ɔ he ɔ, e he hia nɛ a hemi kɛ yemi ɔ mi nɛ wa. Se Yesu ha nɛ a ná nɔ mi mami kaa ke a ná hemi kɛ yemi nɛ mi wa saminya a, Yehowa maa ye bua mɛ konɛ a nyɛ nɛ a da nyagbahi nɛ a ngɛ kaa yoku ɔ a nya. Jã kɛ̃ nɛ Yehowa maa ye bua mo hulɔ! Ke o yɔse kaa ní komɛ ngɛ mo blɔ tsie, nɛ e ha we nɛ o he nɛ su nɛ a baptisi mo ɔ, mo tsu he ní oya nɔuu. Moo jɔɔ o he nɔ kɛ ha Yehowa nɛ a baptisi mo. Lɔ ɔ ji yi mi kpɔ nɛ se be nɛ o ma nyɛ maa mwɔ. w25.03 7 ¶18-20

Ke wa kai kaa Mawu hɛ kalɔ ɔ pee klaalo kaa e maa ye bua wɔ ɔ, lɔ ɔ maa wo wɔ he wami nɛ wa ma nyɛ maa da kahi a nya. Wa ma nyɛ ma ná nɔ mi mami kaa Yehowa maa ye bua wɔ ke wa susu níhi nɛ e pee ha wɔ kɛ be ɔ a he. (Yes. 37:​17, 33-37) Jehanɛ hu ɔ, mo susu munyuhi nɛ a ngɛ jw.org wɛbsaiti ɔ nɔ, nɛ tsɔɔ bɔ nɛ Yehowa ye bua wa nyɛmimɛ nyumuhi kɛ yihi ngɛ wa be nɛ ɔ mi ɔ he. Mo susu behi nɛ Yehowa ye bua mo ngɛ o si himi mi ɔ hu he. Eko ɔ, o maa nu he kaa Yehowa pee we nɔ́ ko ha mo nɛ́ ngɛ nyakpɛ tsɔ kaa bɔ nɛ e ye bua David nɛ e gbe osisiblisi kɛ jata a. Ke o nu he jã po ɔ, anɔkuale sane ji kaa Yehowa pee nɔ́ ko ha mo kɛ̃ ngɛ o si himi mi! Ke e hí kulaa a, e gbla mo kɛ ba e ngɔ konɛ o kɛ lɛ nɛ pee huɛ. (Yoh. 6:44) Enɛ ɔ he ɔ, mo bi Yehowa nɛ e ye bua mo konɛ o kai be ko nɛ e ha o sɔlemihi a heto, nɛ e ha mo níhi nɛ o hia ngɛ be nɛ sa mi, loo benɛ e ye bua mo ngɛ si fɔfɔɛ ko nɛ mi wa a mi. Ke o pue o yi mi tɛ ngɛ si fɔfɔɛ nɛ ɔmɛ a he ɔ, o ma ná nɔ mi mami kaa Yehowa maa ya nɔ maa ye bua mo. w24.06 21 ¶8

Eko ɔ, wa fia wa pɛɛ si kaa wa be hae nɛ nɔ́ ko nɔ́ ko nɛ je wɔ kɛ je Yehowa he. Se akɛnɛ wa yi mluku he je ɔ, e he ma nyɛ maa wa ha wɔ kaa wa maa pee nɔ́ nɛ da. (Rom. 7:​21-23) Waa kɛ kahi ma nyɛ maa kpe tlukaa. Loko wa ma nyɛ maa ye Yehowa kɛ e Bi ɔ anɔkuale ɔ, ja waa kɛ ga womi nɛ Yesu kɛ ha wɔ kaa waa ya nɔ nɛ waa hwɔɔ konɛ wa ko sɛ ka mi ɔ tsu ní. Wɔ tsuo waa kɛ kahi kpeɔ. Se e slo wa kpɛti nɔ fɛɛ nɔ kɛ e gbɔjɔmi, enɛ ɔ he ɔ, ní komɛ ma nyɛ maa pee ka kɛ ha wɔ. Kaa nɔ hyɛmi nɔ́ ɔ, e he ma nyɛ maa wa ha nɔ ko kaa e maa yu e he ngɛ ajuama bɔmi he. Se ni komɛ hu ngɛ nɛ e he ma nyɛ maa wa ha mɛ kaa a ma yu a he ngɛ mu ní tsumihi a he. Ní nɛ ɔmɛ ekomɛ ji nɔ nitsɛ e fɔmi níhi a he fiɛmi loo bɔmi nami he foni loo video hyɛmi. Jehanɛ hu ɔ, eko ɔ, ni komɛ yeɔ adesa hɛ mi gbeye, ni komɛ a tsui ngɛ a nguɛ nya, ni komɛ hu woɔ a he nɔ kɛ ekpahi. w24.07 14 ¶3; 15 ¶5

Ke asafo mi nikɔtɔma amɛ ngmɛ́ blɔ nɛ nɔ ko nɛ e tsake e tsui niinɛ ɔ nɛ e kpale kɛ ba asafo ɔ mi ɔ, kɛ e maa nu he ha kɛɛ? Aloo kɛ nɔ ɔ maa nu he ha kɛɛ ke e kpale kɛ ba asafo ɔ mi, se nyɛmimɛ ɔmɛ je we suɔmi kpo kɛ tsɔɔ lɛ ɔ? E ngɛ heii kaa “aywilɛho yemi sɔuu” maa gbe lɛ. Enɛ ɔ ma nyɛ ma ha nɛ e nu he kaa e be nyɛe ma sɔmɔ Yehowa hu, nɛ eko ɔ, e be mɔde bɔe kaa e ma dla huɛ bɔmi nɛ ngɛ e kɛ Yehowa a kpɛti ɔ. Ke wa ngɔɛ yayami peelɔ ko nɛ e tsake e tsui ɔ yayami kɛ ki lɛ ɔ, mɛni ji nɔ́ kpa ko nɛ ma nyɛ maa ba? Ngɛ anɔkuale mi ɔ, lɔ ɔ ma nyɛ ma ha nɛ huɛ bɔmi kpakpa nɛ ngɛ waa kɛ Yehowa wa kpɛti ɔ ma puɛ. Mɛni he je? Ejakaa lɔ ɔ maa tsɔɔ kaa wa kase we Yehowa nɛ e ngɔɔ yayami peeli a he yayamihi kɛ keɔ mɛ ɔ, se mohu wa ngɛ Satan nɛ e yi mi wa nɛ e nɛ nɔ mɔbɔ ɔ kasee. Ke e ba jã a, Abosiami ma nyɛ maa gu wa nɔ kɛ jɔ̃ nyɛmi ɔ kɔni mi konɛ e kpa Yehowa sɔmɔmi.—2 Kor. 2:​10, 11; Efe. 4:27. w24.08 17 ¶7, 10-11

Yesu ngɔ he blɔ kɛ ha nyumu komɛ konɛ a ye bua asafo ɔ ngɛ blɔ kpahi a nɔ. E gu asafo mi nikɔtɔmahi nɛ a ngɛ Yerusalem ɔ a nɔ kɛ ha nɛ Paulo, Banaba kɛ ni kpahi sɔmɔ kaa kpɔ mi nɔ hyɛli. (Níts. 11:22) Mɛni he je? Kaa bɔ nɛ asafo mi sɔmɔli kɛ asafo mi nikɔtɔmahi yeɔ buaa asafo ɔ, jã nɔuu kɛ̃ nɛ kpɔ mi nɔ hyɛli hu fiaa asafo ɔmɛ kɛ maa si. (Níts. 15:​40, 41) Be fɛɛ be ɔ, kpɔ mi nɔ hyɛli ngɛ blɔ hiae. Ni komɛ hiaa blɔ gagaa loko a ya sɔmɔɔ asafohi. Daa otsi ɔ, kpɔ mi nɔ hyɛli tuɔ magbɛ nɔ munyuhi fuu, a slaa nyɛmimɛ ɔmɛ nɛ a woɔ mɛ he wami, a kɛ blɔ gbali ɔmɛ kɛ asafo mi nikɔtɔma amɛ peeɔ kpe, nɛ a hyɛɛ fiɛɛmi yami kpehi a nɔ. A dlaa a he kɛ haa munyu tumihi, nɛ a toɔ kpɔ mi kpehi kɛ kpokpa nɔ kpehi hu a he blɔ nya. A toɔ sukuuhi kɛ kpe klɛdɛɛhi a he blɔ nya kɛ haa blɔ gbali nɛ a ngɛ a kpɔ ɔ mi ɔ, nɛ a tsɔɔ mɛ ní. Jehanɛ se hu ɔ, a tsuɔ ní tsumi kpahi nɛ a he hia nɛ asafo ɔ ní tsumi kɔni ɔ kɛ woɔ a dɛ ɔ, nɛ be komɛ po ɔ, a kɛ oya yemi lɛ tsuɔ ní tsumi nɛ ɔmɛ. w24.10 21 ¶12-13

Yehowa gu gbalɔ Yeremia nɔ kɛ tu munyu nɛ ngɛ mwɔnɛ ɔ ngmami ɔ mi ɔ. Bɔfo Paulo hu tsɛ munyu nɛ ɔ se, nɛ e de ke: “I be a yayami ɔmɛ kaie hu.” (Heb. 8:12) Se mɛni nɛ munyu nɛ ɔ tsɔɔ tutuutu? Ke a kɛ munyu nɛ ji “kai” ɔ tsu ní ngɛ Baiblo ɔ mi ɔ, pi be fɛɛ be nɛ e tsɔɔ kaa nɔ ko ngɛ nɔ́ ko nɛ be ɔ he susue. Mohu ɔ, e ma nyɛ maa tsɔɔ nɔ́ nɛ nɔ ko maa pee. Ojo fialɔ ɔ nɛ a sɛu lɛ ngɛ Yesu kasa nya a de lɛ ke: “Yesu, ke o sɛ o Matsɛ Yemi ɔ mi ɔ, mo kai mi.” (Luka 23:​42, 43) Pi nɛ e ngɛ Yesu dee kaa e kai lɛ ngɛ Matsɛ Yemi ɔ mi pɛ kɛkɛ, mohu ɔ, e ngɛ Yesu bie nɛ e pee nɔ́ ko ha lɛ ngɛ e Matsɛ Yemi ɔ mi. Yesu de ojo fialɔ nɛ ɔ kaa e ma tle lɛ si. Lɔ ɔ he ɔ, ke Yehowa de ke e kaii we wa yayami ɔmɛ hu ɔ, nɔ́ nɛ e ngɛ tsɔɔe ji kaa e kɛ ke wɔ kulaa, nɛ e be wa tue gblae ngɛ wa yayami ɔmɛ a he. w25.02 10-11 ¶14-15

Loko wa ma nyɛ maa nu nɔ́ sisi saminya a, ja wa le Yehowa su kpakpa amɛ, e yi mi tomi, níhi nɛ e suɔ kɛ níhi nɛ e sume. Mo bi o he ke, ‘Ngɛ nɔ́ nɛ i ba kase ngɛ Yehowa he ɔ nya a, mɛni yi mi kpɔ nɛ ke i mwɔ ɔ, e maa sa Yehowa hɛ mi?’ (Efe. 5:17) Be komɛ ɔ, loko wa ma nyɛ maa sa Yehowa hɛ mi ɔ, e ma bi nɛ waa pee ní komɛ nɛ wa huɛmɛ loo wa wekuli a bua be he jɔe. Kaa nɔ hyɛmi nɔ́ ɔ, eko ɔ, fɔli komɛ nɛ a suɔ kaa a bimɛ nɛ a ná si himi nɛ ngɛ gbɔjɔɔ ɔ maa nyɛ a biyo ko nɔ kaa e kɛ nyumu ko nɛ e ngɛ sika wawɛɛ nɛ e ma nyɛ maa hyɛ a nɔ ɔ nɛ sɛ gba si himi mi, ke huɛ bɔmi kpakpa be nyumu ɔ kɛ Yehowa a kpɛti po. E ngɛ mi kaa fɔli ɔmɛ suɔ nɛ a biyo ɔ nɛ e ná si himi kpakpa mohu lɛɛ, se mɛnɔ maa ye bua lɛ konɛ huɛ bɔmi kpakpa nɛ ya nɔ nɛ e hi e kɛ Yehowa a kpɛti? Mɛni ji Yehowa susumi ngɛ sane nɛ ɔ he? Wa maa na heto ɔ ngɛ Mateo 6:33 ɔ. Ngmami nɛ ɔ wo Kristofohi he wami kaa a ya nɔ nɛ a ‘hla Matsɛ Yemi ɔ kekle.’ E ngɛ mi kaa wa suɔ wa fɔli, nɛ wa buɔ nihi nɛ a ngɛ wa kpɔ ɔ mi ɔ mohu lɛɛ, se nɔ́ nɛ e he hia wɔ wawɛɛ ji kaa wa ma ha nɛ Yehowa bua nɛ jɔ. w25.01 17 ¶9-10

Mwɔnɛ ɔ, wa hia Yehowa yemi kɛ buami konɛ wa nyɛ nɛ waa fiɛɛ kɛ kã ke nihi te si kɛ wo wɔ. (Kpoj. 12:17) Mɛni maa ye bua mo konɛ o ná nɔ mi mami kaa Yehowa maa ye bua mo? Mo susu sɔlemi nɛ Yesu sɔle nɛ a ngma ngɛ Yohane yi 17 ɔ he nɛ o hyɛ. Yesu de Yehowa kaa e bu bɔfo ɔmɛ a he, nɛ Yehowa hu ha jamɛ a sɔlemi ɔ heto. Ní Tsumi womi ɔ tsɔɔ bɔ nɛ Yehowa ye bua kaseli ɔmɛ nɛ a kɛ kã fiɛɛ benɛ nihi te si kɛ wo mɛ ɔ. Jehanɛ hu ɔ, benɛ Yesu ngɛ sɔlee ɔ, e kpa Yehowa pɛɛ kaa e bu ni nɛmɛ nɛ a ma ná hemi kɛ yemi ngɛ sane kpakpa a nɛ bɔfo ɔmɛ ngɛ fiɛɛe ɔ mi ɔ a he. Nɛ mo hu o piɛɛ he. Ngɛ anɔkuale mi ɔ, Yehowa ngɛ Yesu sɔlemi nɛ ɔ heto hae loloolo. E maa ya nɔ maa ye bua mo kaa bɔ nɛ e ye bua bɔfo ɔmɛ ɔ. (Yoh. 17:​11, 15, 20) Be mi nɛ wa ngɛ nyagbe ɔ he sue haa nɛ ɔ, e he ma nyɛ maa wa ha wɔ kaa wa maa fiɛɛ sane kpakpa a. Se Yesu ha nɛ wa ná nɔ mi mami kaa Yehowa maa ye bua wɔ konɛ waa kɛ kã nɛ tsu ní tsumi ɔ.—Luka 21:​12-15. w25.03 18 ¶13-14

Mawu we bi ‘ma nya wawɛɛ’ ejakaa a bua jɔ níhi nɛ Yehowa peeɔ kɛ haa mɛ ɔ a he. Baiblo ɔ mi anɔkualehi nɛ woɔ nɔ he wami kɛ Baiblo ɔ mi si womihi nɛ woɔ nɔ bua, kɛ hwɔɔ se he hɛ kɛ nɔ fɔmi nɛ wa ngɛ ngɛ Kristo kpɔmi afɔle sami ɔ mi ɔ haa nɛ wa ‘tsui nɔɔ wa mi.’ Ke waa kɛ wa nihi sɛɛ ní nɛ ɔmɛ a he ní ɔ, e ma ha nɛ wa bua maa jɔ wawɛɛ! (La 34:8; 133:​1-3) Níhi titli enyɔ nɛ́ kadiɔ Yehowa we bi nɛ a ngɛ mumi mi paradeiso ɔ mi ɔ ji suɔmi kɛ kake peemi nɛ ngɛ a kpɛti ɔ. “Kake peemi nɛ ye mluku” nɛ ɔ haa nɛ wa naa bɔ nɛ si himi ɔ maa hi ha ngɛ je ehe ɔ mi. Ngɛ je ehe ɔ mi ɔ, suɔmi kɛ kake peemi nɛ maa hi Mawu we bi a kpɛti ɔ mi maa wa wawɛɛ pe bɔ nɛ e ngɛ ha mwɔnɛ ɔ. (Kol. 3:14) Nɔ fɛɛ nɔ nɛ e suɔ kaa e ná bua jɔmi nitsɛnitsɛ, nɛ́ e bua nɛ jɔ níhi nɛ e ngɛ ɔ he ɔ, e sa nɛ e ba piɛɛ wa he ngɛ mumi mi paradeiso ɔ mi. Ngɛ bɔ nɛ nihi nɛ a ngɛ je ɔ mi ɔ naa wɔ ha a tsuo se ɔ, wa ngɛ biɛ kpakpa ngɛ Yehowa kɛ wa nyɛmimɛ ɔmɛ tsuo a hɛ mi.—Yes. 65:15. w24.04 21 ¶7-8

Mɛni wɔ tsuo wa ma nyɛ maa pee kɛ ye bua nihi nɛ a maa suɔ nɛ a sɛ gba si himi mi ɔ? Nɔ́ kake nɛ wa ma nyɛ maa pee ji kaa wa maa hyɛ wa munyu tutui saminya. (Efe. 4:29) Wa ma nyɛ ma bi wa he ke: ‘Anɛ i yeɔ nihi nɛ a ngɛ hlae nɛ a sɛ gba si himi mi ɔ a he fɛu lo? Ke i na kaa nyɛminyumu ko kɛ nyɛmiyo ko ngɛ ní sɛɛe ɔ, anɛ e sa nɛ ma susu kaa a ná suɔmi kɛ ha a sibi lo?’ (1 Tim. 5:13) Jã kɛ̃ nɛ ke nɔ ko sɛ we gba si himi mi ɔ, e sɛ nɛ wa ha nɛ e nu he kaa se nami ko be e he loo e ngɛ nyagba. Nyɛ ha nɛ waa ngɔ he blɔ fɛɛ he blɔ nɛ wa ma ná a kɛ je nyɛmimɛ nɛ a sɛ we gba si himi mi ɔ a yi!Ke o susu kaa nyɛmiyo ko maa sa nyɛminyumu ko kɛ ha gba si himi hu nɛɛ? Baiblo ɔ woɔ wɔ he wami kaa wa susu bɔ nɛ ni kpahi nuɔ he ha a he. (Rom. 15:2) Nyɛmimɛ komɛ nɛ a sɛ we gba si himi mi ɔ bua jɔɛ he kaa nɔ ko ma hla huno loo yo kɛ ha mɛ, nɛ e sa nɛ waa kplɛɛ nɔ ha mɛ jã. (2 Tɛs. 3:11) Se eko ɔ, ni kpahi a bua maa jɔ he. Ke a bua jɔ he po ɔ, e sɛ nɛ waa kɛ oya yemi nɛ pee jã be mi nɛ a de we wɔ ke waa pee jã.—Abɛ 3:27. w24.05 24-25 ¶14-15

Be komɛ ɔ, waa kɛ nyagba komɛ ma nyɛ maa kpe nɛ ma ha nɛ si himi ɔ mi nɛ wa ha wɔ. Enɛ ɔ ma nyɛ ma tsake wa si himi kulaa. Se bua jɔmi sane ji kaa wa ma nyɛ maa sɔle kɛ ha Yehowa konɛ e ye bua wɔ. Ke Yehowa ye bua wɔ ɔ, wa náa nɔ mi mami kaa “Yehowa hɛ ngɛ!” (La 18:46) Se benɛ David tu munyu nɛ ɔ se ɔ, e tsɛ Mawu ke “ye Tɛsa.” Mɛni he je nɛ David ngɔ Yehowa kɛ to tɛsa nɛ ji adebɔ nɔ́ nɛ wami be mi ɔ he ɔ? Baiblo ɔ ngɔ munyungu nɛ ji “tɛsa” a kɛ tsu ní konɛ wa nyɛ nɛ waa le suhi nɛ Yehowa ngɛ ɔ saminya. Ngɛ Baiblo ɔ mi ɔ, behi fuu ɔ, ke Yehowa sɔmɔli ngɛ e yi jee ngɛ e suhi nɛ a ngɛ nyakpɛ ɔ he ɔ, a kaleɔ lɛ kaa e ji tɛsa. Kekleekle be nɛ a tsɛ Yehowa ke “Tɛsa a” ji benɛ a tu e he munyu ngɛ 5 Mose 32:4 ɔ nɛ. Hana sɔle nɛ e de ke: “Tɛsa ko be nɛ ngɛ kaa wa Mawu ɔ.” (1 Sam. 2:2) Habakuk tsɛ Yehowa ke “ye Tɛsa.” (Hab. 1:12) Nɔ nɛ ngma La 73 ɔ tsɛ Mawu ke: “Tɛsa kɛ ha ye tsui.” (La 73:26) Yehowa hu tsɛ e he ke Tɛsa.—Yes. 44:8. w24.06 26 ¶1, 3

Israel matsɛmɛ nɛ a pee Yehowa suɔmi nya ní ɔ, sɔmɔ lɛ kɛ a tsui tsuo. Baiblo ɔ de ngɛ Yosia he ke: “Matsɛ ko hí si hyɛ nɛ ngɛ kaa lɛ, nɛ́ e kɛ e tsui tsuo . . . kpale kɛ ba Yehowa ngɔ.” (2 Ma. 23:25) Nɛ Salomo nɛ́ pee se ɔ, e je Yehowa se ɔ hu nɛɛ? Baiblo ɔ de ngɛ e he ke “e kɛ e tsui tsuo ha we” Yehowa. (1 Ma. 11:4) Abiya hu ji matsɛ ko nɛ e yi anɔkuale. Baiblo ɔ de ngɛ lɛ hu e he ke: “E kɛ e tsui tsuo ha we Yehowa.” (1 Ma. 15:3) Behi fuu ɔ, ke Baiblo ɔ kɛ munyungu nɛ ji “tsui” tsu ní ɔ, e kɔɔ nɔ tutuutu nɛ wa ji ngɛ wa mi ɔ he. Jehanɛ hu ɔ, e kɔɔ níhi nɛ wa susuɔ he kɛ níhi nɛ wa bua jɔ he, nɛ e kɔɔ wa subai, wa nyɛmi, kɛ otihi nɛ waa kɛ maa wa hɛ mi ɔ hu he. Ke a ke nɔ ko kɛ e tsui tsuo sɔmɔɔ Yehowa a, mɛni lɔ ɔ tsɔɔ? Nɔ nɛ e kɛ e tsui tsuo sɔmɔɔ Mawu ɔ pee we jã akɛnɛ e le kaa e sa nɛ e pee jã kɛkɛ, mohu ɔ, e peeɔ jã akɛnɛ e suɔ Yehowa a he je. E yaa nɔ nɛ e jeɔ suɔmi kɛ bumi nɛ mi kuɔ kpo kɛ tsɔɔ Yehowa ngɛ e si himi mi tsuo. w24.07 21 ¶4-5

Yehowa ngɔ nɔ́ he tomi nɔ́ kpa ko hu kɛ tsu ní kɛ tsɔɔ bɔ nɛ e tsuɔ yayami ha. E de ke: ‘Ma tsu o he yayami ɔ kaa nɔ́ nɛ bɔku lɛ ha nɔ, nɛ ma tsu o tɔmi ɔmɛ kaa nɔ́ nɛ bɔku kpii lɛ ha nɔ.’ (Yes. 44:22) Ke Yehowa ngɔ wa yayami kɛ ke wɔ ɔ, e ngɛ kaa nɔ́ nɛ e ngɔ bɔku kpii ko kɛ ha wa yayami ɔmɛ a nɔ bɔ nɛ pee nɛ nɔ ko nɛ ko na. Mɛni nɛ nɔ́ he tomi nɔ́ nɛ ɔ tsɔɔ? Ke Yehowa kɛ wa yayami ɔmɛ ke wɔ ɔ, e sɛ nɛ wa he nile nɛ ya nɔ nɛ e hi wɔ fɔ bue wa wami be tsuo. Kɛ gu Yesu Kristo muɔ ɔ nɔ ɔ, Yehowa tsu wa hiɔ ɔmɛ tsuo. Ke Yehowa kɛ wa yayami ɔmɛ ke wɔ ɔ, e ngɛ kaa nɔ́ nɛ wa pee we yayami ko. Ke wa pee yayami nɛ wa pia wa he kɛ je wa tsui mi ɔ, bɔ nɛ Yehowa kɛ keɔ wɔ ha ji nɛ ɔ nɛ. Jehanɛ hu ɔ, Yehowa mɔbɔ nami ɔ haa nɛ huɛ bɔmi kpakpa hiɔ waa kɛ lɛ wa kpɛti ekohu, nɛ e yeɔ buaa wɔ nɛ wa he nile bui wɔ fɔ. w25.02 10 ¶11-14

Yehowa hyɛɛ blɔ kaa nikɔtɔmahi nɛ a ma sɔmɔ kaa ajla toli ɔ nɛ a po asafo ɔ he piɛ kɛ je nihi nɛ a kɛ e mlaahi tsu we ní ɔ a he, konɛ asafo ɔ he nɛ tsɔ. (1 Kor. 5:7) Jehanɛ hu ɔ, nikɔtɔma amɛ bɔɔ mɔde kaa a maa pee nɔ́ fɛɛ nɔ́ nɛ a ma nyɛ kɛ ye bua yayami peelɔ ɔ konɛ e tsake e tsui. Enɛ ɔ he ɔ, ke a ngɛ nɔ nɛ e pee yayami ɔ ye buae ɔ, a náa juɛmi nɛ da, nɛ a hyɛɛ blɔ kaa nɔ ɔ maa pee tsakemi. Mɛni he je? Ejakaa “Yehowa mi mi hi wawɛɛ nɛ e ji mɔbɔ nalɔ,” nɛ nikɔtɔma amɛ suɔ nɛ a kase lɛ. (Yak. 5:11) Mo kadi bɔ nɛ bɔfo Yohane kɛ e nyɛmimɛ ɔmɛ hi si ngɛ suɔmi mi ha. E ngma ke: “Ye bimɛ tsɔwi, i ngɛ nyɛ ní nɛ ɔmɛ ngmae konɛ nyɛ ko pee yayami ko. Se kɛ̃ ɔ, ke nɔ ko pee yayami ko po ɔ, wa ngɛ yemi kɛ bualɔ ko ngɛ Tsɛ ɔ ngɔ, lɛ ji Yesu Kristo, dalɔ ɔ nɛ.” (1 Yoh. 2:1) Se dɔmi sane ji kaa be komɛ ɔ, ke Kristofono ko pee yayami nɛ hɛdɔ ngɛ he nɛ a ngɛ lɛ ye buae ɔ, e sume kaa e ma tsake e tsui. Ke e ba jã a, e sa nɛ a je lɛ kɛ je asafo ɔ mi. w24.08 25 ¶19-20

Eko ɔ, o maa ngɔ nɔ́ nɛ o tsuɔ ɔ kɛ to nɔ́ nɛ ni kpahi tsuɔ ɔ he, se e sɛ nɛ o pee jã! Mɛni he je? Ejakaa Yehowa po pee we jã. (Gal. 6:4) Kaa nɔ hyɛmi nɔ́ ɔ, Maria ngɔ nu nɛ he jua wa kɛ ke Yesu. (Yoh. 12:​3-5) Se yalɔyo ohiatsɛ ɔ lɛɛ, e ngɔ sika nyafii enyɔ nɛ a sui nɔ́ ko kulaa a kɛ ya wo daka a mi. (Luka 21:​1-4) Se kɛ̃ ɔ, Yesu na kaa nɔ́ nɛ Maria kɛ yalɔyo ɔ tsuo pee ɔ tsɔɔ kaa a ngɛ hemi kɛ yemi. Akɛnɛ Yesu jeɔ e Tsɛ ɔ su ɔmɛ kpo pɛpɛɛpɛ he je ɔ, o ma nyɛ ma ná nɔ mi mami kaa Yehowa bua jɔɔ nɔ́ fɛɛ nɔ́ nɛ o jeɔ o tsui mi kɛ peeɔ ɔ he, e kle jio, e klee we jio. Ngɛ anɔkuale mi ɔ, be komɛ ɔ, wɔ tsuo wa yi mi peeɔ wɔ enyɔɔnyɔ. Se kɛ̃ ɔ, Baiblo ɔ ma nyɛ maa ye bua wɔ nɛ waa le nɔ́ nɛ wa maa pee. Lɔ ɔ he ɔ, ke o yi mi ngɛ mo pee enyɔɔnyɔ ɔ, o kɔni mi nɛ ko jɔ̃. Ngɛ anɔkuale mi ɔ, Yehowa le mo saminya. E bua jɔ kaa o ngɔ níhi kɛ sã afɔle ngɛ e he je, nɛ e maa jɔɔ mo. Yehowa suɔ e sɔmɔli nɛ a yeɔ lɛ anɔkuale ɔ a kpɛti nɔ fɛɛ nɔ, nɛ e susuɔ a he. w24.10 25 ¶3; 29 ¶17-18