August

Wa sɔlemi ji kaa nihi fuu maa bu kɔkɔ bɔmi nɛ ɔ tue konɛ a ba piɛɛ wa he kɛ sɔmɔ Yehowa. Se nihi nɛ a be kɔkɔ bɔmi nɛ ɔ tue bue ngɛ jamɛ a be ɔ mi ɔ hu nɛɛ? Ke nihi na kaa a kpata Babilon Ngua a hɛ mi ɔ, eko ɔ, a maa pee tsakemi, nɛ Yehowa ma he a yi wami. Ke jã a, lɛɛ e sa nɛ wɔ tsuo waa kɛ hɛdɔ nɛ fiɛɛ nɛ waa bɔ nihi kɔkɔ. Níhi nɛ wa deɔ nihi mwɔnɛ ɔ ma nyɛ ma ha nɛ a kai nɔ́ ko ngɛ jamɛ a be mi. (Kɛ to Ezekiel 33:33 ɔ he.) Eko ɔ, a ma kai kɔkɔ nɛ wa bɔ mɛ be ko nɛ be ɔ, nɛ lɔ ɔ ma ha nɛ a ba piɛɛ wa he kɛ sɔmɔ Yehowa loko fɔmi nɛ su gbongu mi. Benɛ “zugba mimiɛɛmi ko nɛ e nya wa” a ya nɔ se ɔ, nɔ nɛ e hyɛɔ nihi nɛ a wo mɛ tsu ɔ a nɔ ngɛ Filipi ɔ tsake e tsui. Eko ɔ, jã kɛ̃ nɛ ni komɛ nɛ a bui wɔ tue mwɔnɛ ɔ hu maa pee ke a na kaa a kpata Babilon Ngua a hɛ mi.—Níts. 16:​25-34. w24.05 17 ¶9-10

Wa ma nyɛ maa kase nɔ́ ko nɛ he hia ngɛ sɛ womi nɛ bɔfo Paulo ngma kɛ ya ha Hebribi nɛ a ji Kristofohi ɔ mi. Hebribi nɛ ɔmɛ a kpɛti ni komɛ yɛ a hɛ mi konɛ a he nɛ wa ngɛ Mawu jami mi, mohu ɔ, a “kpale ba pee nihi nɛ a hia nyɔ nyu, se pi [mumi mi] niye ní nɛ he wa.” (Heb. 5:12) A kplɛɛ we ní hehi nɛ Yehowa ngɛ mɛ tsɔɔe ngɛ asafo ɔ mi ɔ nɔ. (Abɛ 4:18) Kaa nɔ hyɛmi nɔ́ ɔ, e ngɛ mi kaa jeha 30 nɛ be ɔ, Yesu kpɔmi afɔle sami ɔ ha nɛ Mose Mlaa a ba nyagbe mohu lɛɛ, se Yudabi fuu nɛ a ba pee Kristofohi ɔ kplɛɛ Mose Mlaa a nɔ loloolo. (Tito 1:10) Enɛ ɔ he ɔ, Paulo bɔ mɔde kaa e maa ye bua mɛ konɛ a kplɛɛ anɔkualehi nɛ a mi kuɔ nɛ e ngɛ mɛ tsɔɔe ɔ nɔ. Paulo sɛ womi ɔ ye bua mɛ nɛ a na kaa kɛ gu Yesu kpɔmi afɔle sami ɔ nɔ ɔ, Yehowa to blɔ nya konɛ a ja lɛ ngɛ blɔ ehe ko nɛ hi pe kulaa a nɔ. Jehanɛ hu ɔ, Paulo sɛ womi ɔ ye bua mɛ nɛ a kɛ kã fiɛɛ.—Heb. 10:​19-23. w24.04 6 ¶15

Kɛ je benɛ Adam kɛ Hawa ya piɛɛ Satan he nɛ a tsɔ atuã kɛ si Yehowa Mawu ɔ, nihi babauu gbo. Mɛni hɛnɔkami lɛ ngɛ kɛ ha nihi nɛ a gbo ɔ? A ma tle nihi 144,000 nɛ a ji Kristo se nyɛɛli nɛ a yeɔ anɔkuale ɔ si kɛ ya hiɔwe nɛ a be gboe hu gblegbleegble. (Kpoj. 14:1) Jehanɛ hu ɔ, nyumuhi kɛ yihi anɔkualetsɛmɛ nɛ a suɔ Yehowa a a kpɛti nihi babauu maa piɛɛ ‘nihi nɛ a da nɛ a ma tle mɛ si’ ɔ a he. A maa hi si ngɛ zugba a nɔ kɛ ya neneene, ke a ya nɔ nɛ a ye anɔkuale ngɛ Kristo Jeha Akpe Nɔ Yemi ɔ kɛ nyagbe ka a mi. (Dan. 12:13; Heb. 12:1) Jehanɛ hu ɔ, ngɛ Jeha Akpe Nɔ Yemi ɔ mi ɔ, “nihi nɛ a dɛ,” nɛ ji nihi nɛ a ná we he blɔ kaa a ma sɔmɔ Yehowa aloo nihi nɛ “a pee ní yayamihi ɔ,” ma ná he blɔ nɛ a tsake a je mi bami konɛ a ba sɔmɔ Yehowa ngɛ anɔkuale mi. (Yoh. 5:29; Luka 23:​42, 43) Se ni komɛ ngɛ nɛ a ji yiwutsotsɛmɛ, enɛ ɔ he ɔ, Yehowa mwɔ e yi mi kpɔ kaa e be jamɛatsɛmɛ ɔmɛ si tlee gblegbleegble.—Luka 12:​4, 5. w24.05 2 ¶3; 5 ¶15; 6 ¶17

E sa nɛ nɔ fɛɛ nɔ nɛ e suɔ nɛ Yehowa nɛ kplɛɛ e nɔ ɔ nɛ ‘tu anɔkuale ngɛ e tsui mi.’ (La 15:2) Enɛ ɔ biɔ babauu pe lakpa pɛ nɛ wa be yee. Yehowa suɔ nɛ waa ye anɔkuale ngɛ nɔ́ fɛɛ nɔ́ mi. (Heb. 13:18) Enɛ ɔ he hia wawɛɛ, “ejakaa Yehowa hiɔ nɔ nɛ sisiɔ nɔ, se dali lɛɛ e kɛ mɛ nuɔ huɛ gbagbanii.” (Abɛ 3:32) Nihi nɛ a ‘tuɔ anɔkuale ngɛ a tsui mi’ ɔ, pee we osato, nɛ a sisi we nɔ hulɔ. Behi fuu ɔ, nɔ nɛ sisiɔ nɔ ɔ yi mi ma nyɛ maa pee lɛ enyɔɔnyɔ ngɛ Yehowa mlaa amɛ ekomɛ a he. (Yak. 1:​5-8) Eko ɔ, e kɛ Yehowa mlaahi nɛ e susu kaa a he hia we ɔ be ní tsue. Ke e na kaa nɔ́ yayami ko ji mi kɛ bɛ ɔ, e yaa nɔ nɛ e peeɔ níhi fuu kɛ gboɔ Mawu mlaa a nɔ tue. Nɔ ko kaa jã a ma susu kaa e ngɛ Yehowa jae, se ngɛ anɔkuale mi ɔ, Yehowa be e jami ɔ nɔ kplɛɛe. (Fiɛɛ. 8:11) Enɛ ɔ he ɔ, wa suɔ nɛ waa ye Yehowa anɔkuale ngɛ nɔ́ fɛɛ nɔ́ mi. w24.06 10 ¶7-8

Yehowa sɔmɔli bua jɔ anɔkualehi nɛ a kaseɔ ngɛ Mawu Munyu ɔ mi ɔ he, ejakaa lɔ ɔ nɔ nɛ a hemi kɛ yemi ɔ daa si ngɛ. (Rom. 10:17) Wa ngɛ nɔ mi mami kaa Yehowa lɛ to Kristofohi asafo ɔ sisi kaa “anɔkuale ɔ titima kɛ e se pimi nɔ́ ɔ nɛ.” (1 Tim. 3:15) Satan maa suɔ kaa wa yi mi nɛ pee wɔ enyɔɔnyɔ ngɛ Baiblo ɔ loo blɔ tsɔɔmihi nɛ wa nine suɔ nɔ kɛ jeɔ Yehowa asafo ɔ ngɔ ɔ he. (Efe. 4:14) E be kɛe nɛ Abosiami maa ngɔ sisimi munyuhi kɛ mlɔɔ je ma amɛ tsuo konɛ a te si kɛ wo Yehowa. (Kpoj. 16:​13, 14) Wa ma nyɛ maa hyɛ blɔ kaa Satan maa bɔ mɔde fɛɛ mɔde nɛ e ma nyɛ konɛ e sisi Yehowa we bi hulɔ. (Kpoj. 12:9) Enɛ ɔ he ɔ, e he hia nɛ wa tsɔse wa he konɛ wa nyɛ nɛ waa le slɔɔto nɛ ngɛ anɔkuale kɛ lakpa a kpɛti, nɛ waa nyɛɛ ngɛ anɔkuale ɔ nya. (Rom. 6:17; 1 Pet. 1:22) Enɛ ɔ maa ye bua wɔ konɛ wa nyɛ nɛ waa gblee amanehlu ngua a mi! w24.07 8 ¶1-3

Benɛ Yehowa ngɔ e mlaa a kɛ ha Israelbi ɔmɛ ɔ se ɔ, a wo lɛ si kaa a maa ye e mlaa amɛ a nɔ. Yehowa hu wo mɛ si kaa ke a ye e mlaa amɛ a nɔ ɔ, e maa po a he piɛ, nɛ e maa jɔɔ mɛ. Se ke a yi e mlaa amɛ a nɔ nɛ a mwɔ a yi mi kpɔ kaa a ma ja mawu kpahi ɔ, Yehowa be a he piɛ poe hu, nɛ a maa na nɔ́. Se kɛ̃ ɔ, lɔ ɔ tsɔɔ we kaa Yehowa ma kua mɛ kulaa. A ma nyɛ maa ‘kpale kɛ ba Yehowa a Mawu ɔ ngɔ, nɛ a bu e gbi tue.’ (5 Mose 30:​1-3, 17-20) Enɛ ɔ tsɔɔ kaa a ma nyɛ ma tsake a tsui. Ke a pee jã a, Yehowa hu maa hɛ kɛ su a he nɛ e maa jɔɔ mɛ ekohu. Yehowa we bi tsɔ atuã kɛ si lɛ si abɔ. Enɛ ɔ ha nɛ a na nɔ́ wawɛɛ. Se Yehowa kɔni mi jɔ̃ we ngɛ atuã tsɔli nɛ ɔmɛ a he. E ya nɔ nɛ e tsɔ gbali kɛ ya a ngɔ si abɔ konɛ a wo mɛ he wami nɛ a tsake nɛ a kpale kɛ ba e ngɔ ekohu.—2 Ma. 17:​13, 14. w24.08 9 ¶4-5

Ngɛ Yesu gbenɔ se ɔ, Kristofohi nɛ a ji Hebribi nɛ a ngɛ Yerusalem kɛ Yudea a kɛ haomihi fuu kpe. Benɛ a to Kristofohi asafo ɔ sisi pɛ ɔ, a wa nyɛmimɛ ɔmɛ yi mi wawɛɛ nitsɛ. Jeha 20 se ɔ, Kristo se nyɛɛli ɔmɛ kɛ sika he nyagba kpe wawɛɛ. E ma nyɛ maa ba kaa hwɔ ko nɛ nya wa nɛ ba zugba a nɔ ɔ lɛ ha nɛ a kɛ sika he nyagba nɛ ɔ kpe ɔ nɛ. (Níts. 11:​27-30) Se maa pee jeha 61 ɔ mi ɔ, yi mi wami nɛ Kristofo ɔmɛ kɛ kpe ɔ nya wɛ kaa nɔ́ nɛ a kɛ kpe pee se ɔ. Jamɛ a be ɔ mi ɔ, Yehowa ha nɛ Paulo ngma mɛ sɛ womi ko. Ga womi nɛ ngɛ jamɛ a sɛ womi ɔ mi ɔ dla mɛ kɛ ha kahi nɛ a kɛ kpe pee se ɔ. Ngɛ anɔkuale mi ɔ, sɛ womi nɛ Paulo ngma kɛ ya ha Hebribi ɔmɛ ɔ ba ngɛ be nya wawɛɛ nitsɛ, ejakaa e be kɛe nɛ tue mi jɔmi nɛ a ngɛ ngɛ jamɛ a be ɔ mi ɔ se maa po. Paulo wo Kristofo ɔmɛ ga ko nɛ maa ye bua mɛ konɛ a nyɛ nɛ a fĩ si ngɛ nyagbahi nɛ e be kɛe nɛ a kɛ maa kpe ɔ mi. w24.09 8 ¶1-2

Ke wa ngɛ haoe ɔ, Yehowa guɔ wa nyɛmimɛ Kristofohi a nɔ kɛ jeɔ suɔmi kpo kɛ tsɔɔ wɔ. Ke waa kɛ haomi ngɛ kpee ɔ, wa nyɛmimɛ ɔmɛ ma nyɛ ma ná deka kɛ ha wɔ, nɛ́ a bu wɔ tue. Jã nɛ a maa pee ɔ ma nyɛ maa wo wa bua. A kɛ wɔ ma nyɛ maa sɔle aloo a kɛ wɔ ma susu ngmami ko he. (Rom. 15:4) Be komɛ ɔ, wa nyɛmi ko ma nyɛ ma kai wɔ Yehowa susumi ngɛ níhi a he, nɛ lɔ ɔ ma nyɛ maa ye bua wɔ konɛ wa fĩ si. Jehanɛ hu ɔ, a ma nyɛ maa pee ní komɛ kɛ ye bua wɔ. Kaa nɔ hyɛmi nɔ́ ɔ, a ma nyɛ maa hoo ní ha wɔ ngɛ haomihi behi a mi. Be komɛ ɔ, ke o suɔ nɛ ni kpahi nɛ a ye bua mo ɔ, mo lɛ e sa nɛ o de mɛ. (Abɛ 17:17) Eko ɔ, a be nyɛe maa le bɔ nɛ wa ngɛ he nue ha, kɛ nɔ́ nɛ wa hia. (Abɛ 14:10) Enɛ ɔ he ɔ, o kɛ o huɛmɛ nɛ a nane pi si ngɛ asafo ɔ mi ɔ ma nyɛ maa sɛɛ ní, nɛ o de mɛ bɔ nɛ o ngɛ he nue ha. Mo ha nɛ a le nɔ́ nɛ a ma nyɛ maa pee kɛ ye bua mo. O ma nyɛ nɛ o kɛ asafo mi nɔkɔtɔma kake loo enyɔ nɛ a ji o huɛ ɔ nɛ sɛɛ ní. Ngɛ nyɛmimɛ yihi komɛ a blɔ fa mi ɔ, ke a kɛ nyɛmimɛ yihi nɛ a nane pi si ngɛ asafo ɔ mi ɔ sɛɛ ní ɔ, e yeɔ buaa mɛ wawɛɛ. w24.10 10 ¶15-16

Nihi fuu bɔɔ mɔde kaa a maa ye niye ní kpakpahi nɛ́ a gbɔle a kpɔ mi be fɛɛ be konɛ a hi nɔmlɔ tso mi he wami kpakpa. Se kɛ̃ ɔ, a hyɛ we blɔ kaa a maa hi si kɛ ya neneene. Eko ɔ, a susuɔ kaa adesahi be nyɛe maa hi si kɛ ya neneene. Se kɛ̃ ɔ, Yesu tsɔɔ kaa adesahi ma nyɛ ma “ná neneene wami” kaa bɔ nɛ a tsɔɔ ngɛ Yohane 3:16 kɛ 5:24 ɔ. Ligbi ko ɔ, Yesu gu nyakpɛ blɔ nɔ nɛ e ngɔ abolo kɛ lo bɔɔ ko kɛ lɛ nihi akpehi abɔ. Enɛ ɔ ha nɛ ni ɔmɛ a bua jɔ. Se e nɔ jena a, e de nɔ́ ko nɛ e sa kadimi wawɛɛ kɛ tsɔɔ nihi nɛ a nyɛɛ e se kɛ ya Kapenaum ngɛ he ko nɛ e kɛ Galilea woɔ he kɛ we ɔ, nɛ enɛ ɔ ha nɛ a bua jɔ wawɛɛ nitsɛ. E de mɛ kaa e ma tle nihi nɛ a gbo ɔ si, nɛ a ma ná neneene wami. (Yoh. 6:​39, 40) Munyu nɛ ɔ nɛ Yesu tu ɔ tsɔɔ kaa nihi babauu nɛ a gbo ɔ ma nyɛ maa ba wami mi ekohu, nɛ o kɛ o suɔli tsuo ma nyɛ ma ná neneene wami. w24.12 8 ¶1-2

Lingmi nɛ ɔ, Je ɔ Nɔmlɔ Tso Mi He Wami Nami Blɔ Nya Tomi ɔ bɔ amaniɛ kaa hunomɛ fuu kongoɔ a yihi, a jɛɔ mɛ, nɛ a peeɔ mɛ nisɛ níhi. Behi fuu ɔ, hunomɛ nɛ a peeɔ jã a bua peeɔ a ní kaa a suɔ a yi ɔmɛ ke a ngɛ nihi a kpɛti, se ke mɛ pɛ a ngɛ we mi lɛɛ a waa mɛ yi. Mɛni ji ní komɛ nɛ haa nɛ huno komɛ waa a yi ɔmɛ yi mi? Eko ɔ, a tsɛmɛ nɛ a tsɔse mɛ ɔ a yi mi wa, nɛ enɛ ɔ haa nɛ a susuɔ kaa nyagba ko be he kaa nɔ ko maa pee e yo jã. Ni kpahi hu waa a yi ɔmɛ yi mi ejakaa jã nɛ nyumuhi fuu peeɔ ngɛ he nɛ a tsɔse mɛ ngɛ ɔ. Nyumu nɛ ɔmɛ nuɔ he kaa ke a pee kpɛii ngɛ a yi ɔmɛ a nɔ ɔ, lɔ ɔ ma ha nɛ a na kaa nyumuhi ji mɛ niinɛ, nɛ a ngɛ he blɔ nɛ a yeɔ a yi ɔmɛ a nɔ. Enɛ ɔ ji susumi ko nɛ dɛ kulaa. Nyumu komɛ li bɔ nɛ a maa ye a he numi kɛ a we abofu nɔ ha. Akɛnɛ nyumu komɛ pɔɔ bɔmi nami he fonihi loo videohi hyɛmi he je ɔ, a ná susumi nɛ dɛ ngɛ yihi kɛ bɔmi nami he. Jehanɛ hu ɔ, a bɔ amaniɛ kaa COVID-19 hiɔ ɔ nɛ ba a ha nɛ nyagba nɛ ɔmɛ a mi wa wawɛɛ ngɛ gbahi fuu a mi. Se huno ko be nyɛe maa da ní nɛ ɔmɛ ekoeko nɔ kɛ je e nya kaa lɔ ɔ he je nɛ e waa e yo yi mi ɔ nɛ. w25.01 8 ¶2-3

Yesu tsɔɔ nɔ́ nɛ he hia pe kulaa ngɛ Mawu mlaa amɛ a kpɛti. E de ke: “E sa kaa o suɔ Yehowa o Mawu ɔ kɛ o tsui tsuo kɛ o susuma tsuo kɛ o he wami tsuo kɛ o juɛmi tsuo.” (Luka 10:27) Enɛ ɔ tsɔɔ kaa e sa nɛ waa suɔ Yehowa kɛ wa nɔ́ fɛɛ nɔ́. Wa nɔ́ fɛɛ nɔ́ nɛ waa kɛ maa suɔ Yehowa kɔɔ níhi nɛ wa bua jɔ he, wa he numi kɛ wa he wami tsuo nɛ waa kɛ ma sɔmɔ lɛ ɔ he. Jehanɛ hu ɔ, e kɔɔ bɔ nɛ wa susuɔ níhi a he ha a he. Ngɛ anɔkuale mi ɔ, wa be nyɛe maa nu bɔ nɛ Yehowa susuɔ níhi a he ha a sisi kɛ pi si. Se ke wa kase “Kristo juɛmi ɔ,” wa ma nyɛ maa nu Yehowa susumi ɔmɛ a sisi, ejakaa Yesu kase bɔ nɛ e Tsɛ ɔ susuɔ níhi a he ha a.—1 Kor. 2:16. w25.03 8 ¶1

Yesu ye mluku kaa bɔ nɛ e ji ngɛ Adam blɔ fa mi loko e pee yayami ɔ. (1 Kor. 15:45) Lɔ ɔ he ɔ, kɛ gu Yesu gbenɔ ɔ nɔ ɔ, e nyɛ nɛ e ha kpatami nɔ́ nɛ e kɛ nɔ́ nɛ bɔ Adam ɔ sɔ. (Rom. 5:19) Enɛ ɔ he je nɛ a tsɛɛ Yesu ke “nyagbe Adam ɔ” nɛ. E he hia we nɛ nɔ kpa ko nɛ e ye mluku ɔ nɛ e ba wo nɔ́ nɛ bɔ Adam ɔ he hiɔ, ejakaa Yesu gbo “si kake nyɔngloo.” (Heb. 7:27; 10:12) Mɛni slɔɔto lɛ ngɛ kpatami blɔ nya tomi ɔ kɛ kpɔmi nɔ́ ɔ a kpɛti? Kpatami ɔ ji blɔ nya nɛ Mawu to konɛ e kɛ ha nɛ huɛ bɔmi kpakpa nɛ hi e kɛ adesahi a kpɛti. Kpɔmi nɔ́ ɔ ji hiɔ ɔ nɛ a wo konɛ a kɛ kpata adesahi nɛ a pee yayami ɔ kɛ Yehowa a kpɛti. Yesu ngɔ e wami nɛ ye mluku ɔ kɛ sã afɔle kɛ wo wa yayami ɔmɛ a he hiɔ.—Heb. 9:14. w25.02 5 ¶12-13

Ke wa naa Yehowa kaa Nɔ ko nɛ e hɛ ngɛ ɔ, lɔ ɔ ma ha nɛ wa ma ná juɛmi nɛ da ngɛ kahi nɛ waa kɛ kpeɔ ɔ he. Ngɛ mɛni blɔ nɔ? Lɔ ɔ ma ha nɛ wa maa na kahi nɛ waa kɛ ngɛ kpee ɔ kaa e kɔɔ sane nɛ he hia nɛ ngɛ Yehowa kɛ Satan a kpɛti ɔ he. Abosiami tsɔɔ kaa ke wa ngɛ nɔ́ nae ɔ, wa ma kua Yehowa. (Hiob 1:​10, 11; Abɛ 27:11) Se ke wa da ka ko nya a, lɔ ɔ tsɔɔ kaa wa suɔ Yehowa, nɛ wa haa nɛ Abosiami peeɔ lakpatsɛ. Ke amlaalo ɔ ngɛ si tee kɛ ngɛ mo woe, o kɛ sika he nyagba ngɛ kpee, nihi bui mo tue ngɛ fiɛɛmi mi loo o kɛ ka kpa ko ngɛ kpee ɔ, mo kai kaa si fɔfɔɛ nɛ ɔmɛ ji he blɔ nɛ o ná nɛ o kɛ ma ha nɛ Yehowa tsui nɛ nya. Mo kai hu kaa Yehowa be hae nɛ a ka mo pe bɔ nɛ o ma nyɛ maa da nya. E maa wo mo he wami konɛ o nyɛ nɛ o fĩ si. w24.06 22 ¶9

Anɛ o le ní komɛ nɛ a kaa mo wawɛɛ lo? Ke o ma o hɛ kɛ fɔ o gbɔjɔmihi a nɔ loo o susu kaa o be nyɛe maa pee yayami gblee ɔ, oslaa ngɛ he wawɛɛ. (1 Yoh. 1:8) Paulo tsɔɔ kaa ‘nihi nɛ a he su ngɛ mumi mi ɔ’ po ma nyɛ maa pee nɔ́ nɛ dɛ ke a hyɛ we a he nɔ saminya. (Gal. 6:1) Ngɛ anɔkuale mi ɔ, e sa nɛ waa le wa gbɔjɔmihi kɛ níhi nɛ ma nyɛ ma ha nɛ waa pee yayami. (2 Kor. 13:5) Ke wa ba le si fɔfɔɛhi nɛ ma nyɛ ma ha nɛ waa pee yayami ɔ, mɛni e sa nɛ waa pee? E sa nɛ waa bɔ mɔde wawɛɛ nɛ waa yu wa he ngɛ jamɛ a si fɔfɔɛ ɔmɛ a he! Kaa nɔ hyɛmi nɔ́ ɔ, blema a, he nɛ e he wɛ kulaa ngɛ gbogbohi nɛ a fia kɛ bɔle ma ko he ɔ ji agbo ɔmɛ. Enɛ ɔ he je nɛ buli fuu buɔ agbo ɔmɛ a he konɛ a kɛ po ma a he piɛ ɔ nɛ. Jã nɔuu kɛ̃ nɛ wɔ hu e sa nɛ wa yɔse hehi pɔtɛɛ nɛ wa le kaa wa gbɔjɔ ngɛ konɛ wa hɛ nɛ hi wa he nɔ.—1 Kor. 9:27. w24.07 15 ¶5-7

Sane kpakpa a nɛ wa maa fiɛɛ ɔ hu piɛɛ ní tsumi kpakpa nɛ a tu he munyu ngɛ mwɔnɛ ɔ ngmami ɔ mi ɔ he. Enɛ ɔ he ɔ, ke wa kane Mawu Munyu ɔ nɛ wa pue wa yi mi tɛ ngɛ he ɔ, hemi kɛ yemi nɛ wa ngɛ ngɛ Yehowa mi ɔ mi maa wa, nɛ wa maa le nɔ́ he je nɛ e sa kaa waa fiɛɛ Matsɛ Yemi ɔ he sɛ gbi ɔ. Loko wa ma ná Mawu Munyu ɔ he se wawɛɛ ɔ, e sɛ nɛ waa kane lɛ kɛfokɛfo, mohu ɔ, e sa nɛ waa to wa tsui si nɛ waa kase lɛ saminya, nɛ wa pue wa yi mi tɛ ngɛ he. Ke o na ngmami ko nɛ o nui sisi ɔ, koo je jamɛ a ngmami ɔ he. Mohu ɔ, moo ngɔ Watch Tower Publications Index ɔ loo Yehowa Odasefohi A Níhi A Mi Hlami Womi ɔ kɛ hla níhi a mi ngɛ jamɛ a ngmami ɔ he. Ke o to o tsui si kɛ kase ní ɔ, o ma ná nɔ mi mami nɛ mi wa kaa Mawu Munyu ɔ ji anɔkuale. (1 Tɛs. 5:21) Ke o ná nɔ mi mami nɛ mi wa kaa Mawu Munyu ɔ ji anɔkuale ɔ, lɔ ɔ ma ha nɛ o bua maa jɔ kaa o kɛ ni kpahi maa sɛɛ níhi nɛ o kase ɔ he ní. w24.04 15 ¶4-5

David de ke: “Yehowa, o hi, nɛ o pee klaalo kaa o kɛ yayami maa ke.” (La 86:5) Mika de ke: ‘Yehowa, mawu kpa ko be nɛ kɛ mo sɔ. O ma a nɛ piɛ ɔ, o kɛ a he yayami keɔ mɛ.’ (Mika 7:18) Yesaya hu de ke: ‘Yiwutsotsɛ nɛ kua e blɔ, nɛ yayami peelɔ nɛ e tsake e juɛmi; é kpale kɛ ba Yehowa, nɔ nɛ e maa na lɛ mɔbɔ ɔ ngɔ, é ba wa Mawu ɔ ngɔ, ejakaa e kɛ maa ke lɛ kulaa.’ (Yes. 55:7) Bɔ nɛ pee nɛ Korinto asafo ɔ nɛ kase Yehowa a, e ma bi nɛ a nya yayami peelɔ nɛ e tsake e tsui ɔ he kɛ ba asafo ɔ mi ekohu, nɛ a ha nɛ e le kaa a suɔ lɛ, nɛ a bua jɔ kaa e kpale kɛ ba. Ke a kɛ blɔ tsɔɔmi nɛ ɔ tsu ní ɔ, lɔ ɔ tsɔɔ kaa a “buɔ tue ngɛ níhi tsuo a mi.” E ngɛ mi kaa a je nyumu ɔ kɛ je asafo ɔ mi nyɔhiɔ bɔɔ komɛ pɛ mohu lɛɛ, se e tsake e tsui. Enɛ ɔ he ɔ, e sɛ nɛ asafo mi nikɔtɔma amɛ nɛ a gbla a nane si kaa a maa ngɔ lɛ ngɛ asafo ɔ mi ekohu. w24.08 17-18 ¶12-13

E be kɛe nɛ tsakemi nguahi maa ba ngɛ be nɛ wa ngɛ mi nɛ ɔ mi! E piɛ bɔɔ nɛ Yesu maa kojo adesahi tsuo. Yesu ha nɛ wa le kaa kojomi nɛ ɔ su si ta. Enɛ ɔ he ɔ, e ha e kaseli ɔmɛ “okadi” nɛ maa tsɔɔ kaa e ba, kɛ níhi nɛ ma kadi “níhi a blɔ nya tomi ɔ nyagbe be ɔ” hulɔ. (Mat. 24:3) A tu gbami nɛ ɔ he munyu ngɛ Mateo yi 24 kɛ 25 ɔ. Jehanɛ hu ɔ, a tu he munyu ngɛ Maako yi 13 kɛ Luka yi 21 ɔ. Yesu ngɔ nɔ́ he tomi ní etɛ komɛ kɛ tsu ní konɛ a ye bua wɔ nɛ wa dla wa he kɛ to, nɛ a ji kɔkɔ bɔmi kɛ ha wɔ hulɔ. Kekleekle nɔ́ ɔ kɔɔ jijɔ ɔmɛ kɛ apletsi ɔmɛ a he. Enyɔne ɔ kɔɔ yihewi juɛmitsɛmɛ kɛ yihewi kuasiahi nɛ a li nyumu ɔ a he, nɛ etɛne ɔ kɔɔ talɛnt ɔmɛ a he. Nɔ́ he tomi ní nɛ ɔmɛ eko fɛɛ eko ha nɛ wa na kaa Yesu maa da nihi a ní peepee nɔ kɛ kojo mɛ. w24.09 20 ¶1-2

Mo susu nɔ hyɛmi nɔ́ nɛ pe kulaa nɛ ji Yesu nɔ́ ɔ he nɛ o hyɛ. Suɔmi nɛ e ngɛ kɛ ha e Tsɛ ɔ kɛ ni kpahi ɔ ji nɔ́ nɛ kudɔ lɛ ngɛ nɔ́ fɛɛ nɔ́ nɛ e pee ɔ mi. Suɔmi nɛ ɔ wo lɛ he wami nɛ e tsu ní tsumihi nɛ ni kpahi susu kaa a ba si ɔ. (Mat. 20:28; Yoh. 13:​5, 14, 15) Ke o ji nyɛminyumu, nɛ suɔmi ji nɔ́ nɛ woɔ mo he wami ɔ, lɛɛ Yehowa maa jɔɔ mo nɛ e maa ye bua mo konɛ o nyɛ nɛ o su mumi mi oti nɛ o kɛ ma o hɛ mi kaa o ma sɔmɔ kaa asafo mi sɔmɔlɔ ɔ he. (1 Pet. 5:5) Ngɛ je ɔ mi ɔ, ke nɔ ko peeɔ níhi nɛ ma ha nɛ ni kpahi nɛ a na lɛ kaa e he hia wawɛɛ ɔ, a bua jɔɔ jamɛatsɛ ɔ he. Se Yehowa sɔmɔli lɛɛ a be jã. Ke nyɛminyumu ko suɔ ni kpahi kaa bɔ nɛ Yesu pee ɔ, e be suɔe kaa e maa ye ni kpahi a nɔ loo a na lɛ kaa e he hia. Ke nyɛminyumu ko nɛ e woɔ e he nɔ loo e naa e he kaa e he hia pe ni kpahi ɔ ba pee asafo mi sɔmɔlɔ ɔ, e he maa wa kaa e ma tsu ní tsumihi nɛ a ba si nɛ e sa kaa a tsu kɛ hyɛ Yehowa jijɔhi nɛ a he jua wa a nɔ ɔ. E ma nyɛ maa nu he kaa e nɔ kuɔ pe jamɛ a ní tsumi ɔmɛ.—Yoh. 10:12. w24.11 15 ¶6-7

Ngɛ je ɔ mi tsuo ɔ, wa hia nyumuhi babauu nɛ a sɔmɔ ngɛ asafo ɔ mi. (Efe. 4:8) Ke o ji nyumu nɛ a baptisi mo ɔ, anɛ “e ngɛ o he wami mi kaa o maa ye bua” lo? (Abɛ 3:27) Anɛ o ngɛ mɔde bɔe konɛ o he nɛ su kaa asafo mi sɔmɔlɔ lo? Ke o ngɛ sɔmɔe hu kaa asafo mi sɔmɔlɔ ɔ, anɛ o pee klaalo kaa o ma sɔmɔ kaa asafo mi nɔkɔtɔma lo? Anɛ o ma nyɛ maa pee tsakemihi ngɛ o si himi mi konɛ o ngma Sukuu Kɛ Ha Matsɛ Yemi Sane Kpakpa Fiɛɛli ɔ blɔ bimi womi ɔ nɔ ní lo? Sukuu nɛ ɔ ma dla mo konɛ Yesu kɛ mo nɛ tsu ní wawɛɛ. Ke o susu kaa o be nyɛe maa pee ní nɛ ɔmɛ ɔ, moo sɔle ha Yehowa. Moo sɔle nɛ e ye bua mo kɛ e mumi klɔuklɔu ɔ konɛ o nyɛ nɛ o tsu ní tsumi fɛɛ ní tsumi nɛ a kɛ maa wo o dɛ ɔ he ní saminya. (Luka 11:13) Nyumuhi nɛ a tsuɔ ní wawɛɛ nɛ Yesu kɛ ha kaa ‘nike ní’ ngɛ asafo ɔ mi ɔ tsɔɔ kaa Yesu lɛ ngɛ asafo ɔ hɛ mi nyɛɛe ngɛ nyagbe ligbi nɛ ɔmɛ a mi. (Mat. 28:20) Anɛ o bua jɔɛ kaa wa ngɛ Matsɛ ko nɛ e suɔ wɔ, e mi mi jɔ, nɛ e susuɔ wa he, nɛ e ha wɔ nyɛmimɛ nyumuhi nɛ a he su konɛ a ye bua wɔ lo? w24.10 23 ¶16-17

Se níhi tsuo nɛ haa nɛ Mawu we bi haoɔ nɛ a yeɔ tsui ɔ hu nɛɛ? E be kɛe nɛ jamɛ a ní ɔmɛ ‘maa be kɛ ho, nɛ a be kaie hu, nɛ Mawu hɛ maa je a nɔ pɛsɛpɛsɛ.’ (Yes. 65:16) Yehowa ma je wa nyagba amɛ tsuo kɛ je, nɛ bɔɔbɔɔbɔɔ ɔ, wa be nyagba nɛ ɔmɛ kaie hu. Amlɔ nɛ ɔ po ɔ, asafo mi kpehi nɛ wa yaa a haa nɛ wa tsui nɔɔ wa mi. Ke wa ya asafo mi kpe ɔ, e yeɔ buaa wɔ nɛ wa susuu we níhi nɛ haa nɛ wa haoɔ ngɛ je yaya nɛ ɔ mi ɔ a he. Ke wa wo Mawu mumi ɔ yiblii ɔ nɛ ji suɔmi, bua jɔmi, tue mi jɔmi, mi mi jɔmi kɛ he jɔmi ɔ, lɔ ɔ maa ye bua wa nyɛmimɛ ɔmɛ konɛ a tsui nɛ nɔ a mi. (Gal. 5:​22, 23) E ji he blɔ ngua nɛ wa ná kaa wa piɛɛ Mawu we bi a he! Mawu wo si kaa e maa pee “hiɔwe he kɛ zugba he.” Nihi nɛ a maa ya nɔ maa hi mumi mi paradeiso ɔ mi ɔ maa na si womi nɛ ɔ mi bami. w24.04 22 ¶9-10

Nyɛɛmi kɛ ha gba si himi mi sɛmi ɔ ma nyɛ maa pee bua jɔmi, se kɛ̃ ɔ, e ji nɔ́ ko nɛ hɛdɔ ngɛ he, ejakaa e ma nyɛ ma ha nɛ ni ɔmɛ nɛ a sɛ gba si himi mi. Ngɛ yo kpeemi ligbi ɔ nɔ ɔ, nyumu ɔ kɛ yo ɔ kãa kita ngɛ Yehowa hɛ mi kaa a maa suɔ a he, nɛ a ma je bumi kpo kɛ tsɔɔ a sibi be abɔ nɛ a maa hi wami mi. Loko wa ma kã kita ko ɔ, e sa nɛ wa susu he saminya. Jã nɛ e ji ngɛ gba si himi kita hu blɔ fa mi. Nyɛɛmi nɛ a nyɛɛɔ kɛ haa gba si himi mi sɛmi ɔ yeɔ buaa nyumu ɔ kɛ yo ɔ konɛ a le a sibi nɛ a mwɔ yi mi kpɔ nɛ da. Be komɛ ɔ, a mwɔɔ yi mi kpɔ kaa a maa sɛ gba si himi mi, nɛ be komɛ hu ɔ, a mwɔɔ yi mi kpɔ kaa a maa po nyɛɛmi ɔ mi. Ke nihi nɛ a ngɛ nyɛɛe kɛ ha gba si himi mi sɛmi ɔ po a nyɛɛmi ɔ mi ɔ, lɔ ɔ tsɔɔ we kaa a pee nɔ́ ko nɛ dɛ loo a yi manye. Mohu ɔ, e tsɔɔ kaa a nyɛɛmi ɔ tsu e yi mi tomi ɔ he ní, e ye bua mɛ nɛ a mwɔ yi mi kpɔ nɛ da. Mɛni he je nɛ e sa kaa nihi nɛ a ngɛ nyɛɛe kɛ ha gba si himi mi sɛmi ɔ nɛ a ná juɛmi nɛ da a? Ke a ná juɛmi nɛ da a, a kɛ nɔ ko be nyɛɛe be mi nɛ a pee we a juɛmi kaa a kɛ nɔ ɔ maa sɛ gba si himi mi. w24.05 26-27 ¶3-4

Be komɛ ɔ, e he ma nyɛ maa wa ha Kristofohi nɛ a ji nihewi kɛ yihewi ɔ kaa a ma fã a hemi kɛ yemi ɔ he. Kaa nɔ hyɛmi nɔ́ ɔ, ke a ngɛ bilemi tsɔɔmi ɔ he ní kasee ngɛ klas ɔ, a ma nyɛ maa ye gbeye kaa a maa tsɔɔ sukuubi ɔmɛ nɔ́ nɛ a heɔ yeɔ. Mɛni he je? Eko ɔ, a tsɔɔlɔ ɔ ma fã bilemi tsɔɔmi ɔ he konɛ sukuubi ɔmɛ nɛ a susu kaa e ji anɔkuale. Ke o ji fɔlɔ ɔ, mɛni o ma nyɛ maa pee kɛ ye bua o bimɛ ɔmɛ konɛ a ná nɔ mi mami kaa nɔ́ nɛ a heɔ yeɔ ɔ ji anɔkuale? Mo ha nɛ o bi ɔ nɛ ná nɔ mi mami kaa e sɛ nɛ e pee lɛ zo kaa e le anɔkualehi nɛ kɔɔ adebɔ níhi a he ɔ. Mɛni he je nɛ wa de jã a? Ejakaa je mi si kpali fuu hu le kaa tsa pi nɛ adebɔ níhi bile kɛ ba kɛkɛ. Je mi si kpali na níhi fuu nɛ maa nɔ mi kaa nɔ ko kɛ̃ lɛ bɔ níhi tsuo nɛ a ngɛ nyakpɛ nɛ adesahi a juɛmi kpi he ɔ nɛ. Enɛ ɔ he ɔ, mɛ hu a kplɛɛ we bilemi tsɔɔmi ɔ nɔ. Ke o bi ɔ susu odasehi nɛ a ngɛ heii nɛ ye bua nyɛmimɛ kpahi nɛ a ná nɔ mi kaa Bɔlɔ ko ngɛ ɔ he ɔ, lɔ ɔ ma ha nɛ o bi ɔ ma ná hemi yemi nɛ mi wa kaa Bɔlɔ ko ngɛ, nɛ e maa pee kã. w24.12 18 ¶14-15

Yesu ná nɔ mi mami kaa ni komɛ maa bu sane kpakpa a nɛ e ngɛ fiɛɛe ɔ tue. Enɛ ɔ ye bua lɛ nɛ e kɛ gɛjɛmi tsu e sɔmɔmi ní tsumi ɔ. Kaa nɔ hyɛmi nɔ́ ɔ, kɛ yaa jeha 30 ɔ nyagbe ɔ, Yesu na kaa nihi babauu pee klaalo kaa a maa bu sane kpakpa a tue. Enɛ ɔ he ɔ, e ngɔ mɛ kɛ to ngmɔ nɛ e ba ní nɛ e sa kaa a kpa a he. (Yoh. 4:35) Maa pee jeha kake se ɔ, e de e kaseli ɔmɛ ke: “Ní nɛ a ma kpa a hiɛ.” (Mat. 9:​37, 38) Pee se hu ɔ, e ma nɔ mi kɛ ha mɛ ke: “Ní nɛ a ma kpa a hiɛ . . . Nyɛ kpa Ngmɔtsɛ ɔ pɛɛ konɛ e wo ní tsuli blɔ nɛ a ba kpa ní ha lɛ.” (Luka 10:2) Yesu ya nɔ nɛ e ná hɛnɔkami kaa nihi maa bu sane kpakpa a tue, nɛ benɛ a pee jã a, e bua jɔ wawɛɛ. Yesu tsɔɔ e kaseli ɔmɛ kaa a ya nɔ nɛ a ná juɛmi nɛ da ngɛ sɛ gbi nɛ a ngɛ fiɛɛe ɔ he, nɛ lɔ ɔ maa ye bua mɛ konɛ kã nɛ a ngɛ ɔ nya nɛ ko ba si. w25.03 18-19 ¶15-16

Yehowa ji wesa he. Kaa bɔ nɛ ke ahumi nɛ nya wa ngɛ fiae ɔ, nɔ ko ma nyɛ ma ya laa e he ngɛ tɛ puɔ mi konɛ e ná he piɛ pomi ɔ, jã nɔuu kɛ̃ nɛ Yehowa hu poɔ wa he piɛ ngɛ haomi behi a mi. Yehowa buɔ wa he konɛ huɛ bɔmi nɛ ngɛ waa kɛ lɛ wa kpɛti ɔ nɛ ko puɛ. Jehanɛ hu ɔ, e wo wɔ si kaa hwɔɔ se ɔ, e ma je níhi tsuo nɛ haa nɛ wa naa nɔ́ ɔ kɛ je. (Eze. 34:​25, 26) Nɔ́ kake nɛ wa ma nyɛ maa pee konɛ Yehowa nɛ pee wa Wesa He ji kaa wa maa sɔle kɛ ha lɛ. Ke wa sɔle ɔ, Yehowa haa wɔ “Mawu tue mi jɔmi ɔ” konɛ e po wa tsui kɛ wa juɛmi he piɛ. (Filip. 4:​6, 7) Yehowa ngɛ kɛ ha wɔ be fɛɛ be. Wa ma nyɛ maa ngɔ wa hɛ kɛ fɔ e nɔ, ejakaa e ji “tɛsa ko nɛ ngɛ daa.” (Yes. 26:​3, 4) E maa ye e si womi ɔmɛ a nɔ, e maa bu wa sɔlemi tue, nɛ e maa ye bua wɔ ejakaa e ngɛ kɛ yaa neneene. Jehanɛ hu ɔ, wa ma nyɛ maa ngɔ wa hɛ kɛ fɔ Yehowa nɔ ejakaa e yeɔ nihi nɛ a sɔmɔɔ lɛ ɔ anɔkuale. (2 Sam. 22:26) Yehowa hɛ be nɔ́ nɛ wa peeɔ haa lɛ ɔ nɔ jee gblee, nɛ e maa jɔɔ wɔ be fɛɛ be.—Heb. 6:10; 11:6. w24.06 27 ¶4-6

Hɛja jemi nɛ sɛ ma nyɛ ma ha nɛ waa kɛ wa tsui tsuo be Yehowa sɔmɔe. Jã kɛ̃ nɛ huɛ yaya bɔmi kɛ he lo nya níhi a he susumi ma nyɛ ma puɛ wa tsui ɔ. Ke wa yɔse kaa ní komɛ ha we nɛ waa kɛ wa tsui tsuo nɛ sɔmɔ Yehowa hu ɔ, lɛɛ e sa nɛ waa bɔ mɔde wawɛɛ nɛ waa kɛ oya yemi nɛ tsu he ní. (Mat. 5:​29, 30) E sɛ nɛ wa ha nɛ wa tsui ɔ mi nɛ gba. Wa ma nyɛ maa sisi wa he kaa akɛnɛ wa peeɔ babauu ngɛ Yehowa sɔmɔmi mi he je ɔ, ní yayahi be nyɛe ma ná wa nɔ he wami. Mo susu nɔ́ he tomi nɔ́ nɛ ɔ he nɛ o hyɛ. Ngɔɔ lɛ kaa o dla o tsu mi saminya, nɛ lɔ ɔ se ɔ, o bli o saflɛ ɔ loo o sinya a kɛ fɔ si benɛ kɔɔhiɔ nɛ nya wa ngɛ fiae. Mɛni maa ba? E ngɛ heii kaa bunyuku maa sɛ tsu ɔ mi. Wa ma nyɛ maa ngɔ nɔ́ he tomi nɔ́ nɛ ɔ kɛ to huɛ bɔmi nɛ ngɛ waa kɛ Yehowa wa kpɛti ɔ he. E he hia nɛ waa pee babauu pe nɛ wa maa pee níhi nɛ maa hɛ wɔ kɛ su Yehowa he pɛ. Kaa bɔ nɛ wa be wa sinya loo wa saflɛ blie kɛ fɔ si konɛ bunyuku nɛ sɛ wa tsu ɔ mi ɔ, jã kɛ̃ nɛ wa sume nɛ waa ngmɛ blɔ konɛ nɔ́ ko nɛ gbɔjɔ suɔmi nɛ wa ngɛ kɛ ha Yehowa a mi. Mohu ɔ, e sa nɛ waa kɛ wa tsui tsuo nɛ sɔmɔ Yehowa be fɛɛ be.—Efe. 2:2. w24.07 21 ¶6-7

Wa be nyɛe maa nu bɔ nɛ Yesu na nɔ́ wawɛɛ ha a sisi saminya. E ngɛ mi kaa Yesu na nɔ́ wawɛɛ mohu lɛɛ, se e ya nɔ nɛ e je suɔmi kpo kɛ tsɔɔ Yehowa, nɛ e ye lɛ anɔkuale. Benɛ tabuli ɔmɛ ngɛ lɛ yi mi wae ɔ, e de we Yehowa kaa e gbla a tue, mohu ɔ, e de ke: “Tsaatsɛ, moo ngɔ kɛ pa mɛ, ejakaa a li nɔ́ nɛ a ngɛ pee ɔ.” (Luka 23:34) Ke wa sɔle ha Yehowa kaa e ye bua nihi nɛ a ye wɔ sane yaya a, e maa ye bua wɔ nɛ waa pee kpoo konɛ wa mi mi nɛ ko fu tsɔ. Jehanɛ hu ɔ, e maa ye bua wɔ nɛ wa ná juɛmi nɛ da ngɛ nihi nɛ a ye wɔ sane yaya a he. Akɛnɛ je yaya nɛ ɔ bɛ nyagbe lolo he je ɔ, e sa nɛ waa hyɛ blɔ kaa nihi maa ye wɔ sane yaya. Se bɔ fɛɛ bɔ nɛ e ji ɔ, nyɛ ha nɛ waa sɔle ha Yehowa be fɛɛ be nɛ e ye bua wɔ. Jehanɛ hu ɔ, nyɛ ha nɛ waa kase nɔ hyɛmi nɔ́ kpakpa nɛ Yesu pee benɛ nihi ye lɛ sane yaya a, nɛ waa ya nɔ nɛ waa ngɔ ga womi nɛ ngɛ Mawu Munyu ɔ mi ɔ kɛ tsu ní. Ke wa pee jã a, wa ma nyɛ ma ná nɔ mi mami kaa Yehowa maa jɔɔ wɔ wawɛɛ.—1 Pet. 3:​8, 9. w24.11 6 ¶16; 7 ¶17, 19

Yehowa kplɛɛ we je mi bami saisaa ko nɔ. E hiɔ yayami. (La 5:​4-6) Yehowa hyɛɛ blɔ kaa waa ye e mlaa amɛ nɛ ngɛ Baiblo ɔ mi ɔ nɔ. Ngɛ anɔkuale mi ɔ, Yehowa le kaa akɛnɛ wa yi mluku he je ɔ, wa be nyɛe maa bu lɛ tue kɛ pi si. (La 130:​3, 4) Se kɛ̃ ɔ, Yehowa bua jɔɛ “nihi nɛ a yi Mawu gbeye nɛ a ngɔɔ wa Mawu ɔ dloomi ɔ kɛ jeɔ a nya kɛ ha nɔ buimi ngmlikiti ní peepeehi” ɔ a he. (Jud 4) Ngɛ anɔkuale mi ɔ, Baiblo ɔ tsɔɔ kaa a ma ‘kpata nimli nɛ a yi Mawu gbeye ɔmɛ a hɛ mi’ ngɛ Harmagedon ta a mi. (2 Pet. 3:7; Kpoj. 16:16) Se kɛ̃ ɔ, Yehowa sume nɛ a kpata nɔ ko nɔ ko hɛ mi. Baiblo ɔ tsɔɔ heii kaa Yehowa “suɔ kaa nihi tsuo nɛ a tsake a tsui.” (2 Pet. 3:9) Kaa bɔ nɛ Yehowa peeɔ ɔ, asafo mi nikɔtɔma amɛ hu toɔ a tsui si nɛ a bɔɔ mɔde kaa a maa ye bua yayami peeli konɛ a tsake a tsui nɛ a hɛ kɛ su Yehowa he ekohu. w24.08 26 ¶1-2

Wɔ hu wa ma nyɛ maa kase Yehowa konɛ waa je suɔmi mi kɛ ha nihi a hiami níhi. Kaa nɔ hyɛmi nɔ́ ɔ, anɛ o le nyɛmi ko nɛ e hia niye ní loo tade lo? Yehowa kɛ mo ma nyɛ ma tsu ní kɛ ye bua nɔ ko kaa jã. A le Yehowa we bi kaa ke oslaa ko ba a, a jeɔ mi mi jɔmi kpo wawɛɛ. Kaa nɔ hyɛmi nɔ́ ɔ, benɛ COVID-19 hiɔ ɔ ba a, nyɛmimɛ ngɔ niye ní, tadehi kɛ ní kpahi nɛ a ngɛ ɔ kɛ ye bua ni kpahi. Nyɛmimɛ fuu hu je a tsui mi nɛ a ngɔ sika kɛ fĩ je kɛ wɛ ní tsumi ɔ se. A ngɔ sika nɛ ɔ kɛ ye bua nyɛmimɛ nɛ oslaa ba a nɔ ngɛ je kɛ wɛ ɔ. A ngɔ ngmami nɛ ngɛ Hebri Bi 13:16 kɛ tsu ní. Lejɛ ɔ de ke: “Nyɛ hɛ nɛ ko je kpakpa peemi kɛ níhi nɛ nyɛ ngɛ nɛ nyɛɛ kɛ ni kpahi maa dla a nɔ, ejakaa jamɛ a afɔle sami ɔmɛ saa Mawu hɛ mi saminya.” w24.09 27 ¶6-7

Mo susu si fɔfɔɛ nɛ ɔ he nɛ o hyɛ. Ngɔɔ lɛ kaa o ngɛ ní tsumi hlae konɛ o nyɛ nɛ o hyɛ o weku ɔ nɔ. Kɛkɛ nɛ o nine su ní tsumi enyɔ nɔ ngɛ be kake mi. O susu níhi tsuo nɛ kɔɔ ní tsumi ɔ he ɔ he. Kaa nɔ hyɛmi nɔ́ ɔ, o susu bɔ nɛ ní tsumi ɔ ngɛ ha, be abɔ nɛ a kɛ tsuɔ ní, ngmlɛfia abɔ nɛ e ma he mo loko o ma ya su ní tsumi he ɔ, kɛ ní kpahi a he. Ní tsumi enyɔ ɔmɛ tsuo ji ní tsumi nɛ Kristofono ma nyɛ ma tsu. Eko ɔ, o maa suɔ nɛ o hla ní tsumi ɔ kake ejakaa o suɔ bɔ nɛ e ngɛ ha a, aloo akɛnɛ hiɔwo ɔ ya hɛ mi ɔ he je. Se ní kpa komɛ hu ngɛ nɛ e sa kaa o susu he loko ji o mwɔ yi mi kpɔ nɛ ɔ. Kaa nɔ hyɛmi nɔ́ ɔ, anɛ ní tsumi nɛ ɔmɛ maa ngmɛ mo blɔ konɛ o ya asafo mi kpehi be fɛɛ be lo? Anɛ ní tsumi nɛ ɔmɛ ma ha nɛ o ná deka kɛ ye bua o weku ɔ konɛ a ná bua jɔmi, nɛ a hɛ kɛ su Yehowa he lo? Sane bimi nɛ ɔmɛ maa ye bua mo konɛ o le “níhi nɛ a he hia wawɛɛ ɔ.” Ní nɛ ɔmɛ ekomɛ ji huɛ bɔmi nɛ maa hi o kɛ Yehowa nyɛ kpɛti kɛ o weku ɔ hiami níhi. E sa nɛ o ngɔ ní nɛ ɔmɛ kɛ pee nɔ́ titli ngɛ o si himi mi pe he lo nya níhi. Ke o pee jã a, o ma nyɛ maa mwɔ yi mi kpɔ nɛ maa sa Yehowa hɛ mi. w25.01 17 ¶11-13

Ke ni kpahi kɛ mo hí si saminya po ɔ, o ma nyɛ ma ná nɔ mi mami kaa Yehowa suɔ mo wawɛɛ, nɛ o he jua wa ha lɛ. Ke o “kɔni mi jɔ̃ ɔ,” mo kai kaa Yehowa naa su kpakpahi nɛ o ngɛ ɔ, nɛ lɔ ɔ he je nɛ e gbla mo kɛ ba e ngɔ ɔ nɛ. (Yoh. 6:44) E pee klaalo kaa e maa ye bua mo be fɛɛ be ejakaa o he jua wa wawɛɛ kɛ ha lɛ. Ke wa susu Yesu nɔ hyɛmi nɔ́ ɔ he ɔ, e maa ye bua wɔ konɛ waa le bɔ nɛ Yehowa nuɔ he ngɛ níhi a he ha. Benɛ Yesu ngɛ zugba a nɔ ɔ, e je mi mi jɔmi kpo kɛ tsɔɔ nihi nɛ ni kpahi a ní peepee ha nɛ a nu he kaa a he be se nami ɔ. (Mat. 9:​9-12) Benɛ yo ko nɛ e be he wami wawɛɛ ɔ ná hemi kɛ yemi kaa ke e ta Yesu tade ɔ he ɔ, e ma ná tsami ɔ, e pee jã. Enɛ ɔ ha nɛ Yesu wo e bua, nɛ e je e yi ngɛ e hemi kɛ yemi ɔ he. (Maak. 5:​25-34) Yesu kase e Tsɛ ɔ su ɔmɛ saminya. (Yoh. 14:9) Enɛ ɔ he ɔ, o ma nyɛ ma ná nɔ mi mami kaa o he jua wa ha Yehowa wawɛɛ, nɛ e naa su kpakpahi kaa suɔmi kɛ hemi kɛ yemi nɛ o ngɛ ɔ. w24.10 7 ¶4-5

Ngɛ David si himi mi tsuo ɔ, e kɛ haomihi fuu kpe nɛ ha nɛ e fo ya. Nihi fuu nyɛ lɛ, e huɛmɛ kɛ e wekuli komɛ po je e se, nɛ a bɔ mɔde kaa a maa gbe lɛ po. (1 Sam. 19:​10, 11; 2 Sam. 15:​10-14, 30) Be ko ɔ, e de ke: ‘Kɔmɔ yemi ha nɛ i gbɔjɔ; nyɔ mi tsuo ɔ, i pɔɔ ye sa kɛ vonyu; i foɔ ya kɛ pɔɔ ye sa a tsɔtsɔɔtsɔ.’ Mɛni he je nɛ David pee basaa jã a? Ejakaa ‘nihi fuu ngɛ lɛ haoe.’ (La 6:6) Ngɛ haomihi nɛ David kɛ kpe ɔ tsuo se ɔ, e ngɛ nɔ mi mami kaa Yehowa suɔ lɛ. E ngma ke: “Yehowa maa nu ye ya fomi ɔ he.” (La 6:8) Munyu nɛ ngɛ mwɔnɛ ɔ ngmami ɔ mi ɔ haa nɛ wa naa kaa Yehowa suɔ wɔ nɛ e susuɔ wa he. David nu he kaa nɔ́ nɛ Yehowa ngɛ e vonyu ɔ ngɔe kɛ ngɛ tɔ ko mi woe, aloo e ngɛ ngmae ngɛ womi ko mi. David ngɛ nɔ mi mami kaa Yehowa le nɔ́ nɛ e ngɛ mi gblee ɔ, nɛ e naa e nɔ́ nami ɔ. Se pi lɔ ɔ pɛ. E le kaa ke e ngɛ haoe ɔ, e dɔɔ Yehowa. w24.12 22 ¶11-12