November

Ke asafo mi nikɔtɔma amɛ ngɛ nɔ ko nɛ a je lɛ kɛ je asafo ɔ mi ɔ ye buae ɔ, a bɔɔ mɔde kaa a maa kase Yehowa mi mi sami ɔ. Kaa nɔ hyɛmi nɔ́ ɔ, Yehowa mlɛ we konɛ Israelbi nɛ a tsɔ atuã a nɛ́ a tsake a tsui loko ji e ye bua mɛ. Mohu ɔ, e tsɔ e gbali ɔmɛ kɛ ya a ngɔ si abɔ loko a bɔni a tsui tsakemi. E ngɛ mi kaa gbalɔ Hosea yo ɔ ya nɔ nɛ e pee yayami mohu lɛɛ, se Yehowa de lɛ kaa e ngɔ e yo ɔ he yayami kɛ ke lɛ, nɛ e kɛ lɛ nɛ hi si ekohu. Yehowa gu blɔ nɛ ɔ nɔ kɛ tsɔɔ e we bi kaa e mi mi sãa lɛ wawɛɛ ngɛ e sɔmɔli a he. (Hos. 3:1; Mal. 3:7) Jã nɔuu kɛ̃ nɛ asafo mi nikɔtɔma amɛ hu suɔ wawɛɛ kaa yayami peelɔ ɔ nɛ tsake e tsui nɛ e kpale kɛ ba asafo ɔ mi. Enɛ ɔ he ɔ, a pee we nɔ́ ko nɛ ma ha nɛ e he nɛ wa ha yayami peelɔ ɔ kaa e maa kpale kɛ ba. Ngɛ nɔ́ he tomi nɔ́ nɛ kɔɔ bi nɛ laa a he nɛ Yesu kɛ tsu ní ɔ mi ɔ, bitsɛ ɔ “kɛ fo ya fua [e bi ɔ], nɛ e fĩɔ e nya he.” (Luka 15:20) Mo kadi kaa tsɛ ɔ mlɛ we nɛ e bi ɔ nɛ ba kpa lɛ pɛɛ loko e kɛ e he yayami ɔ nɛ ke lɛ. Mohu ɔ, benɛ e na e bi ɔ nɛ e ma a, e ma fo kɛ ya e ngɔ ejakaa e suɔ lɛ. w24.08 28 ¶7-8

Kaa bɔ nɛ mwɔnɛ ɔ ngmami ɔ tsɔɔ ɔ, Yehowa haa wɔ juɛmi. E jeɔ e tsui mi faa nɛ e haa nihi e nile ɔ eko. Jehanɛ hu ɔ, mo kadi kaa ke Yehowa ha wɔ juɛmi nɛ je e ngɔ ɔ eko ɔ, e ‘kã we wa hɛ mi,’ aloo e ‘hla we tɔmi ngɛ wa he.’ Ke wa bi Yehowa blɔ tsɔɔmi ko ɔ, e sume nɛ waa hao. Ngɛ anɔkuale mi ɔ, e suɔ kaa wa bi lɛ yemi kɛ buami. (Abɛ 2:​1-6) Mɛni blɔ nɔ wa maa gu kɛ kase Yehowa konɛ wa ha nɛ nihi nɛ a ná nile nɛ wa ngɛ ɔ he se? (La 32:8) Yehowa we bi guɔ blɔhi fuu a nɔ kɛ haa nɛ nihi náa níhi nɛ a kaseɔ ɔ he se. Kaa nɔ hyɛmi nɔ́ ɔ, a tsɔseɔ ni hehi ngɛ fiɛɛmi mi. Asafo mi nikɔtɔmahi toɔ a tsui si kɛ yeɔ buaa asafo mi sɔmɔli kɛ nyɛmimɛ nyumuhi kpahi nɛ a baptisi mɛ ɔ konɛ a nyɛ nɛ a tsu ní tsumi slɔɔtohi nɛ a kɛ woɔ a dɛ ngɛ asafo ɔ mi ɔ. Jehanɛ hu ɔ, nyɛmimɛ nɛ a he be ngɛ asafo ɔ tsuhi a mami kɛ a dlami mi ɔ yeɔ buaa kɛ tsɔseɔ ni hehi konɛ a nyɛ nɛ a tsu ní tsumihi kaa jã. w24.09 28-29 ¶11-12

Loko nyɛminyumu ko ma nyɛ ma sɔmɔ kaa asafo mi nɔkɔtɔma a, e sɛ nɛ ‘sé ko nɛ hi e he.’ Enɛ ɔ tsɔɔ kaa e sa nɛ nyɛmimɛ ɔmɛ nɛ a na kaa e baa e je mi saminya, nɛ nɔ ko be nyɛe maa ná nɔ́ ko nɛ e maa da nɔ kɛ wo e he munyu. (1 Tim. 3:2) Jehanɛ hu ɔ, e sa nɛ nihi nɛ a ngɛ se ɔ nɛ a ye e he odase kpakpa. Ngɛ anɔkuale mi ɔ, nihi nɛ a sɔmɔ we Yehowa a ma nyɛ maa tu munyu kɛ si wa hemi kɛ yemi ɔ. Se e sɛ nɛ a na nɔ́ ko nɛ a maa da nɔ kɛ tsɔɔ kaa e yi anɔkuale niinɛ loo e bɛ e je mi saminya. (Dan. 6:​4, 5) Mo bi o he ke: ‘Anɛ nihi nɛ a ngɛ asafo ɔ mi kɛ nihi nɛ a be asafo ɔ mi ɔ tsuo naa mi kaa i ngɛ biɛ kpakpa lo?’ Ke o “suɔ nɔ́ kpakpa” a, o naa su kpakpahi nɛ ni kpahi ngɛ ɔ, nɛ o jeɔ a yi ngɛ he. (Tito 1:8) Jehanɛ hu ɔ, o suɔ kaa o maa pee nihi kpakpa, nɛ o peeɔ níhi nɛ nihi hyɛ we blɔ kaa o maa pee po. Mɛni he je nɛ e he hia nɛ asafo mi nikɔtɔmahi nɛ a je su nɛ ɔ kpo ɔ? Nɔ́ he je ji kaa a ngɔɔ be babauu kɛ yeɔ buaa nyɛmimɛ ngɛ asafo ɔ mi nɛ a woɔ mɛ he wami. Jehanɛ hu ɔ, a tsuɔ ní tsumihi nɛ a kɛ wo a dɛ ngɛ asafo ɔ mi ɔ a he ní. (1 Pet. 5:​1-3) E ngɛ mi kaa a ní tsumi ɔ be gbɔjɔɔ mohu lɛɛ, se e haa nɛ a bua jɔɔ wawɛɛ.—Níts. 20:35. w24.11 20-21 ¶3-5

Asafo mi sɔmɔli tsuɔ ní tsumihi nɛ a he hia ngɛ asafo ɔmɛ a mi. Ngɛ anɔkuale mi ɔ, bɔfo Paulo bua jɔ nyumuhi anɔkualetsɛmɛ nɛ ɔmɛ a he wawɛɛ. Kaa nɔ hyɛmi nɔ́ ɔ, benɛ e ngma sɛ womi kɛ ya ha Kristofohi nɛ a ngɛ Filipi ɔ, e nga asafo mi sɔmɔli ɔmɛ kɛ nikɔtɔma amɛ tsuo. (Filip. 1:1) Nyɛmimɛ nɛ a ji nihewi kɛ nyɛmimɛ nyumuhi nɛ a wa ngɛ jeha mi nɛ a baptisi mɛ ɔ bua jɔɔ kaa a ngɛ sɔmɔe kaa asafo mi sɔmɔli. Kaa nɔ hyɛmi nɔ́ ɔ, Devan ba pee asafo mi sɔmɔlɔ benɛ e ye jeha 18. Nɛ nyɛminyumu Luis hu ba pee asafo mi sɔmɔlɔ benɛ e ye jeha 50 kɛ se bɔɔ. Benɛ e ba pee asafo mi sɔmɔlɔ ɔ, kɛ e nu he ha kɛɛ? E de ke: “Ye bua jɔ wawɛɛ kaa i ngɛ nyɛmimɛ ɔmɛ ngɛ asafo ɔ mi ɔ sɔmɔe ngɛ blɔ nɛ ɔ nɔ. A je suɔmi kpo kɛ tsɔɔ mi, nɛ amlɔ nɛ ɔ, imi hu ma nyɛ ma je suɔmi kpo kɛ tsɔɔ mɛ.” Ngɛ anɔkuale mi ɔ, asafo mi sɔmɔli fuu nuɔ he jã nɔuu! Ke o ji nyɛminyumu nɛ́ a baptisi mo nɛ o ba pee we asafo mi sɔmɔlɔ lolo ɔ, anɛ o kɛ ma nyɛ maa pee oti kaa o ma sɔmɔ kaa asafo mi sɔmɔlɔ lo? w24.11 14 ¶1-3

Benɛ Matsɛ Hezekia nɛ e je Yuda a ye jeha 39 ɔ, hiɔ ko nɛ nya wa fia lɛ. Gbalɔ Yesaya ngɔ sɛ gbi nɛ je Yehowa ngɔ ɔ kɛ ya ha Hezekia kaa e ma gbo. (2 Ma. 20:1) E ngɛ kaa nɔ́ nɛ Hezekia be hɛnɔkami ko kulaa. Benɛ Hezekia nu munyu nɛ ɔ, e fo ya nɛ e hí kpatami. Enɛ ɔ ha nɛ e je e tsui mi nɛ e sɔle nɛ e kpa Yehowa pɛɛ. Yehowa mi mi sã lɛ ngɛ Hezekia he nɛ e bu e sɔlemi ɔ tue, nɛ e de lɛ ke: “I nu o kue fami ɔ, nɛ i na o hɛ mi vonyu ɔ. Hyɛ, ma tsa mo.” Yehowa gu Yesaya nɔ kɛ ha nɛ Hezekia le kaa e maa na lɛ mɔbɔ nɛ e maa hi si be kɛkɛɛ, nɛ e ma kpɔ̃ Yerusalem kɛ je Asiriabi ɔmɛ a dɛ mi. (2 Ma. 20:​4-6) Anɛ o nu hiɔ ko nɛ e be tsaba lo? Ke jã a, moo sɔle ha Yehowa. Ke e ma bi nɛ o fo ya po ɔ, moo pee jã. Baiblo ɔ ha wɔ nɔ mi mami kaa ke waa kɛ kahi ngɛ kpee ɔ, wa “Tsɛ mɔbɔ nalɔ, kɛ bua womi tsuo Mawu ɔ” maa wo wa bua.—2 Kor. 1:​3, 4. w24.12 24 ¶15-17

E maa pee bua jɔmi wawɛɛ kaa wa ma nya nihi nɛ a ma tle mɛ si kɛ ba wami mi ɔ a he! Moo po he foni nɛ o hyɛ: Ke o kase Yehowa he ní fuu kɛ gu adebɔ níhi nɛ o ma pue o yi mi tɛ ngɛ he ɔ nɔ ɔ, o bua maa jɔ saminya. (La 104:24; Yes. 11:9) Nɛ nɔ́ nɛ pe kulaa a, waa kɛ bua jɔmi ma sɔmɔ Yehowa, nɛ wa he nile be wɔ fɔ bue hu! Anɛ o ma ha nɛ “yayami mi ngɔɔmi nɛ se kɛ we ɔ” nɛ tsi mo blɔ nɛ o nine nɛ ko su jɔɔmihi nɛ se be nɛ o ma ná hwɔɔ se ɔ nɔ lo? (Heb. 11:25) E ngɛ heii kaa o be jã pee! Jɔɔmi nɛ ɔmɛ nɛ wa ma ná a he jua wa kulaa pe níhi tsuo nɛ waa kɛ maa sã afɔle amlɔ nɛ ɔ. Mo kai kaa Paradeiso ɔ nɛ wa ngɛ he munyu tue ɔ pi nɔ́ nɛ wa maa hi blɔ hyɛe kɛ ya daa. E maa ba mi kokooko. Ní nɛ ɔmɛ tsuo maa ba mi, ejakaa Yehowa je suɔmi mi nɛ e ha wɔ nike ní nɛ ji kpɔmi nɔ́ ɔ! w25.01 29 ¶12

A tu nihi fuu nɛ a ná hemi kɛ yemi ngɛ Yehowa mi ɔ a he munyu ngɛ Hebri ngmami ɔ mi. Nimli nɛ ɔmɛ a kpɛti nɔ kake ji Mose. (Heb. 3:​2-5; 11:​23-25) Mose ngɔ e hɛ kɛ fɔ Yehowa nɔ. Jã nɛ e pee ɔ ha we nɛ e nine nɛ nyɛ si, ejakaa Yehowa gu nyakpɛ blɔ nɔ kɛ ha e we bi ɔmɛ niye ní kɛ nyu ngɛ nga a nɔ. (2 Mose 15:​22-25; La 78:​23-25) E ngɛ mi kaa Mose ngɛ hemi kɛ yemi nɛ mi wa mohu lɛɛ, se benɛ Yehowa gu nyakpɛ blɔ nɔ kɛ kpɔ̃ Israelbi ɔmɛ maa pee jeha kake se ɔ, Mose yi mi pee lɛ enyɔɔnyɔ ke ji Yehowa ma nyɛ ma ha e we bi ɔmɛ de lo kaa bɔ nɛ e wo si ɔ. Akɛnɛ Israelbi ɔmɛ a he hiɛ wawɛɛ, nɛ́ niye ní hu be nga a nɔ he je ɔ, Mose susu kaa eko ɔ, Yehowa be nyɛe ma ha e we bi ɔmɛ tsuo muɔ lo nɛ maa su mɛ. Enɛ ɔ he ɔ, Yehowa bi Mose ke: “Anɛ Yehowa nine ngɛ kpiti lo?” (4 Mose 11:​21-23) Ngɛ blɔ ko nɔ ɔ, Yehowa ngɛ Mose bie ke, ‘Anɛ o susu kaa i be nyɛe ma pee nɔ́ nɛ i de ɔ lo?’ w25.03 26 ¶1-2

Anɛ e sa nɛ waa na nɔ́ fɛɛ nɔ́ nɛ ya nɔ ngɛ Nyu Kpekpemi ɔ mi ɔ kaa e ji nɔ́ ko nɛ maa ya nɔ hwɔɔ se lo? Dɛbi. Mɛni he je? Ejakaa Baiblo ɔ de we nɔ́ ko kaa jã. Yesu ngɔ bɔ nɛ níhi ya nɔ ngɛ “Noa ligbi ɔmɛ a mi” ɔ kɛ to be nɛ e maa ba a he, se e de we kaa nɔ́ fɛɛ nɔ́ nɛ ya nɔ ngɛ Nyu Kpekpemi ɔ mi ɔ daa si ha nɔ́ ko nɛ maa ya nɔ hwɔɔ se. Kaa nɔ hyɛmi nɔ́ ɔ, e de we kaa daka a sinya a nɛ Yehowa nga a ji gbami nɛ maa ba mi hwɔɔ se. (Mat. 24:​37-39) Benɛ Noa nu Yehowa kɔkɔ bɔmi ɔ, kɛ e pee e ní ha kɛɛ? E kpɛ daka a kɛ tsɔɔ kaa e ngɛ hemi kɛ yemi ngɛ Yehowa mi. (Heb. 11:7; 1 Pet. 3:20.) Jã kɛ̃ nɛ e sa nɛ nihi nɛ a nu Mawu Matsɛ Yemi ɔ he sane kpakpa a nɛ a ngɔ a ní peepee kɛ tsɔɔ kaa a ngɛ hemi kɛ yemi ngɛ Yehowa mi. (Níts. 3:​17-20) Petro tsɛ Noa ke “dami fiɛɛlɔ.” Mwɔnɛ ɔ, wa bɔɔ mɔde kaa wa maa fiɛɛ ha nihi tsuo ngɛ je ɔ mi, nɛ waa kɛ kã peeɔ jã hulɔ. Se bɔ fɛɛ bɔ nɛ ji ɔ, wa be nyɛe maa fiɛɛ ha nɔ fɛɛ nɔ loko nyagbe ɔ maa ba. w24.05 9-10 ¶3-5

E sa nɛ wa hla blɔhi a nɔ nɛ wa maa gu kɛ je mi mi jɔmi kɛ bumi kpo kɛ tsɔɔ Yehowa huɛmɛ. (Rom. 12:10) La 15:4 ɔ tsɔɔ kaa ke Yehowa huɛ ko ‘wo si nɛ lɔ ɔ maa pee nyagba ha lɛ po ɔ, e kpale we e nya se.’ Ke wa wo si nɛ wa yi nɔ ɔ, e ma nyɛ maa hao ni kpahi. (Mat. 5:37) Kaa nɔ hyɛmi nɔ́ ɔ, Yehowa hyɛɔ blɔ kaa nihi nɛ a ngɛ e bo tsu ɔ mi nɛ a sɛ gba si himi mi ɔ nɛ a ye kita nɛ a kã a sibi ɔ nɔ. Jehanɛ hu ɔ, Yehowa bua jɔɔ ke fɔli bɔ mɔde kaa a maa ye si nɛ a woɔ a bimɛ ɔmɛ a nɔ. Suɔmi nɛ wa ngɛ kɛ ha Mawu kɛ ni kpahi ɔ woɔ wɔ he wami nɛ wa yeɔ wa si womi nɔ. Blɔ kpa nɛ wa ma nyɛ maa gu nɔ kɛ je bumi kpo kɛ tsɔɔ wa nyɛmimɛ ɔmɛ ji kaa wa maa pee mɛ nubwɔ loo wa ma ná be kɛ ha mɛ. (Rom. 12:13) Ke waa kɛ wa nyɛmimɛ ɔmɛ pee kake kɛ je wa hɛ ja a, lɔ ɔ ma ha nɛ huɛ bɔmi nɛ ngɛ waa kɛ mɛ kɛ Yehowa wa kpɛti ɔ mi maa wa. Jehanɛ hu ɔ, ke wa peeɔ wa nyɛmimɛ nubwɔ ɔ, lɔ ɔ tsɔɔ kaa wa ngɛ Yehowa kasee. w24.06 12 ¶15-16

Yehowa haa nɛ nihi nɛ a baa a he si ɔ leɔ anɔkuale ɔ. (Mat. 11:25) Wa je he si bami mi nɛ wa kplɛɛ nɔ nɛ a kɛ wɔ kase anɔkuale ɔ. (Níts. 8:​30, 31) Se kɛ̃ ɔ, e sa nɛ waa hyɛ saminya nɛ wa ko wo wa he nɔ. Ke wa wo wa he nɔ ɔ, lɔ ɔ ma ha nɛ wa ná juɛmi ɔ kaa wa susumi da pe Baiblo sisi tomi mlaahi kɛ blɔ tsɔɔmi nɛ jeɔ Yehowa asafo ɔ ngɔ ɔ. Loko wa ma nyɛ maa ya nɔ maa ba wa he si ɔ, e sa nɛ wa kai kaa ke a kɛ wɔ to Yehowa he ɔ, wa ngɛ kaa tatu. (La 8:​3, 4) Jehanɛ hu ɔ, wa ma nyɛ maa sɔle kɛ ha Yehowa konɛ waa ba wa he si wawɛɛ nɛ waa kplɛɛ nɛ a tsɔɔ wɔ ní. Yehowa maa ye bua wɔ nɛ wa maa na kaa níhi nɛ wa kaseɔ ngɛ Baiblo ɔ mi, kɛ blɔ tsɔɔmi kpahi nɛ asafo ɔ kɛ haa wɔ ɔ nɔ kuɔ kulaa pe wa susumi. Ke o ngɛ Baiblo ɔ kanee ɔ, mo hla níhi nɛ tsɔɔ kaa Yehowa suɔ he si bali, se e bua jɔɛ nihi nɛ a woɔ a he nɔ, nɛ a peeɔ pupuupu ɔ a he. Ke o nine su he blɔ ko nɔ ngɛ asafo ɔ mi nɛ ha nɛ nihi jeɔ o yi wawɛɛ po ɔ, moo hyɛ nɛ hi nɛ o ko wo o he nɔ. w24.07 10 ¶8-9

Kɛ je jeha 1919 ɔ, Yesu guɔ nyumuhi bɔɔ komɛ nɛ a pɔ mɛ nu ɔ a nɔ kɛ toɔ fiɛɛmi ní tsumi ɔ he blɔ nya, nɛ a haa Mawu we bi mumi mi niye ní. (Luka 12:42) E ngɛ heii kaa Yehowa ngɛ ní tsumi nɛ nyumu nɛ ɔmɛ ngɛ tsue ɔ nɔ jɔɔe. (Yes. 65:​13, 14) Ngɛ anɔkuale mi ɔ, kaa a tui Yehowa we bi a he blɔ nya a, jinɛ wa be nyɛe ma tsu ní tsumi nɛ Yesu kɛ wo wa dɛ ɔ. (Mat. 28:​19, 20) Kaa nɔ hyɛmi nɔ́ ɔ, ke pi nɛ a gba zugba kpɔ ɔmɛ kɛ ha asafo ɔmɛ ɔ, jinɛ nɔ fɛɛ nɔ ko fiɛɛ ngɛ he fɛɛ he nɛ e suɔ. Eko ɔ, lɔ ɔ ma ha nɛ waa fiɛɛ wawɛɛ ngɛ he pɔtɛɛ komɛ, nɛ wa ma si zugba kpɔ kpahi kɛ fɔ si. Mo susu blɔ kpahi a nɔ nɛ wa náa Kristofohi a he blɔ nya nɛ a to ɔ he se. Benɛ Yesu ngɛ zugba a nɔ ɔ, e to e se nyɛɛli ɔmɛ a he blɔ nya saminya, nɛ jã nɔuu nɛ e ngɛ pee mwɔnɛ ɔ. w24.04 8-9 ¶2-4

Adam kɛ Hawa ngɔ yayami kɛ sã a kekleekle binyumu nɛ ji Kain ɔ. Jehanɛ hu ɔ, Baiblo ɔ de ngɛ Kain he ke: “Lɛ nitsɛ e ní tsumi ɔmɛ ji ní tsumi yayamihi.” (1 Yoh. 3:12) Eko ɔ, lɔ ɔ he je nɛ benɛ Kain sã afɔle ɔ, Yehowa “bua jɔɛ Kain kɛ e we afɔle ɔ he kulaa” a nɛ. Jinɛ e sa nɛ Kain ko pee tsakemi, se e pee we jã, mohu ɔ, e “mi mi fu wawɛɛ, nɛ e hao.” Mɛni Yehowa pee ngɛ lɔ ɔ se? E kɛ Kain tu munyu. (1 Mose 4:​3-7) Mo kadi kaa Yehowa je mi mi jɔmi mi nɛ e kɛ Kain susu níhi a he, nɛ e de lɛ kaa e maa jɔɔ lɛ ke e pee nɔ́ nɛ da. Jehanɛ hu ɔ, Yehowa bɔ Kain kɔkɔ kaa abofu nɛ e ná a ma nyɛ maa ngɔ lɛ kɛ wo haomi mi. Aywilɛho sane ji kaa Kain bui Yehowa tue fɛɛ. E ha we nɛ Yehowa nɛ ye bua lɛ nɛ e tsake e tsui. Se ngɛ nɔ́ nɛ Kain pee ɔ he je ɔ, anɛ Yehowa ma e juɛmi nya si kaa e be ni kpahi ye buae konɛ a tsake a tsui lo? Dɛbi! w24.08 10 ¶8

Mose kai Israelbi ɔmɛ kaa a nine maa su si himi kpakpa ko nɔ hwɔɔ se. Yehowa ko jɔɔ Israelbi ɔmɛ nɛ a ko nyɛ hi si jehahi babauu ngɛ Si Womi Zugba a nɔ. Ngɛ anɔkuale mi ɔ, jamɛ a zugba a baa ní saminya! Mose kale bɔ nɛ Si Womi Zugba a ngɛ ha kɛ ha Israelbi ɔmɛ. E de ke: “Ma nguahi nɛ a ngɛ fɛu nɛ pi mo nitsɛ nɛ o po, wehi nɛ a mi hyi tɔ kɛ ní kpakpa slɔɔtohi fuu nɛ pi mo nɛ o tsu ní kɛ ná, nyu tomi muɔhi nɛ pi mo nɛ o tsua, kɛ wai ngmɔhi kɛ oliv tsohi nɛ pi mo nɛ o du.” (5 Mose 6:​10, 11) Mose bɔ Israelbi ɔmɛ kɔkɔ hulɔ. Loko Israelbi ɔmɛ maa ya nɔ maa hi zugba kpakpa nɛ Yehowa kɛ ha mɛ ɔ nɔ ɔ, ja a bu Yehowa fami ɔmɛ tue. Mose de mɛ hu kaa a ‘ngɔ wami.’ Enɛ ɔ tsɔɔ kaa e sa nɛ a bu Yehowa tue nɛ a “mɛtɛ e he.” (5 Mose 30:20) Se Israelbi ɔmɛ kua ga womi nɛ ɔ, nɛ a bui Yehowa tue fɛɛ. Enɛ ɔ he ɔ, Mawu ngmɛ blɔ nɛ Asiriabi ɔmɛ ye a nɔ kunimi, nɛ pee se hu ɔ, Babilonbi ɔmɛ hu ye a nɔ kunimi, nɛ a nuu mɛ kɛ ho nyɔguɛ tso mi ya ngɛ Babilon.—2 Ma. 17:​6-8, 13, 14; 2 Kron. 36:​15-17, 20. w24.11 9 ¶5-6

Nihi fuu nɛ a tsɛɛ a he ke Kristofohi ɔ susuɔ kaa ke a ‘he Yesu ye’ kɛkɛ, nɛ a tsɛ lɛ kaa a kpɔlɔ ɔ, a ma he a yi wami. (Yoh. 6:​29, King James Version) Se ngɛ anɔkuale mi ɔ, e biɔ babauu pe jã. Nihi fuu nɛ a ngɛ Galilea nɛ sisije ɔ, a he Yesu ye ɔ po kua lɛ. Mɛni he je? Nihi babauu ɔ nyɛɛ Yesu se, ejakaa Yesu ha mɛ nɔ́ nɛ a suɔ. A suɔ nɛ Yesu nɛ gu nyakpɛ blɔ nɔ kɛ tsa mɛ, e ha mɛ niye ní loo e de mɛ níhi nɛ a suɔ nɛ a nu ɔ pɛ. Se kɛ̃ ɔ, Yesu ha nɛ a le kaa loko nɔ ko ma nyɛ maa pee e kaselɔ nitsɛnitsɛ ɔ, e biɔ babauu. Yesu bɛ zugba a nɔ konɛ e ba ha nihi a he lo nya hiami níhi pɛ kɛkɛ, mohu ɔ, e ba konɛ e ba tsɔɔ adesahi níhi nɛ e sa nɛ a pee konɛ a nyɛ nɛ a pee e kaseli nitsɛnitsɛ. E sa nɛ ‘a ba e ngɔ,’ nɛ ji kaa a bu lɛ tue, nɛ a nyɛɛ e se.—Yoh. 5:40. w24.12 12 ¶12-13

Ke huno ko peeɔ e yo yiwutso ní aloo e kɛ e he woɔ ní peepeehi nɛ sɛ mi ɔ, mɛni maa ye bua lɛ konɛ e kpa? E sa nɛ e bɔ mɔde wawɛɛ nɛ e kase Yesu. Bɔ nɛ e kɛ e kaseli ɔmɛ hi si ha a ji nɔ hyɛmi nɔ́ kpakpa nɛ hunomɛ ma nyɛ maa kase. Moo hyɛ nɔ́ nɛ hunomɛ ma nyɛ maa kase ngɛ bɔ nɛ Yesu kɛ e bɔfo ɔmɛ hi si ha, kɛ bɔ nɛ e kɛ mɛ tu munyu ha a mi. Yesu kɛ e bɔfo ɔmɛ hi si ngɛ mi mi jɔmi kɛ bumi mi. Yesu wɛ e kaseli ɔmɛ yi mi, nɛ e kɛ mɛ tu we munyu basabasa hulɔ. Yesu ngɔɛ he blɔ nɛ e ngɛ ɔ kɛ pee nɔ́ ko nɛ ma ha nɛ a ye lɛ gbeye, nɛ a na lɛ kaa e nɔ kuɔ pe mɛ. Mohu ɔ, e je he si bami mi nɛ e sɔmɔ mɛ. (Yoh. 13:​12-17) E de e kaseli ɔmɛ ke: “Nyɛɛ kase mi, ejakaa ye he jɔ, nɛ i baa ye he si kɛ jeɔ ye tsui mi, nɛ nyɛ he mi maa jɔ nyɛ.” (Mat. 11:​28-30) Mo kadi kaa Yesu ji nɔ ko nɛ e he jɔ. Ke nɔ ko he jɔ ɔ, lɔ ɔ tsɔɔ we kaa e gbɔjɔ. Mohu ɔ, e tsɔɔ kaa nɔ ɔ nyɛɔ nɛ e yeɔ e he nɔ. Ke a wo e mi mi la a, e peeɔ kpoo nɛ e yeɔ e he nɔ. w25.01 10 ¶10-11

Be mi nɛ wa ngɛ je yaya nɛ ɔ nyagbe ɔ he sue haa nɛ ɔ, wa ma nyɛ maa hyɛ blɔ kaa níhi a mi maa wa wawɛɛ, ejakaa a maa hi nɔ yeli ɔmɛ tsakee, nɛ ta, oslaahi, kɛ gbenɔ hiɔhi nɛ sãa nɔ ɔ maa pɔ he. Enɛ ɔ ma nyɛ ma ha nɛ wa ní tsumi, wa weto níhi loo wa we nɛ je wa dɛ, nɛ e he ma nyɛ maa wa ha wɔ kaa wa nine maa su wa hiami níhi a nɔ. Mɛni maa ye bua wɔ konɛ waa mwɔ yi mi kpɔhi nɛ tsɔɔ kaa wa ngɛ hemi kɛ yemi ngɛ Yehowa mi? Nɔ́ titli nɛ maa ye bua mo ji sɔlemi. Ke o de Yehowa o haomi ɔmɛ ɔ, e maa ye bua mo wawɛɛ. Mo de Yehowa nɛ e ha mo juɛmi nɛ o hia a konɛ o nyɛ nɛ o mwɔ yi mi kpɔhi nɛ da, nɛ e ye bua mo nɛ o “kpa yeyeeye peemi kɛ tsui yemi” ngɛ o si fɔfɔɛ ɔ he. (Luka 12:​29-31) Yaa nɔ nɛ o de lɛ konɛ e ye bua mo nɛ o je hɛsa kpo ngɛ o hiami níhi nɛ e haa mo ɔ a he. (1 Tim. 6:​7, 8) Mo hla níhi a mi ngɛ wa womi ɔmɛ a mi kɛ kɔ bɔ nɛ o ma plɛ kɛ da sika he nyagba nya ha a he. Videohi kɛ munyuhi nɛ ngɛ jw.org ɔ nɔ nɛ kɔɔ bɔ nɛ wa ma plɛ kɛ da sika he nyagba nya a he ɔ ye bua nihi fuu. w25.03 28-29 ¶10-11

Benɛ be su nɛ Yehowa ma ha nɛ Ma Jeli nɛ a pui mɛ ɔ nɛ a ba piɛɛ e we bi a he ɔ, e tsɔ bɔfo Petro konɛ e ya fiɛɛ ha Kornelio. Kornelio piɛɛ Ma Jeli nɛ a ba pee Kristofohi kekleekle ɔ a he. Yudabi kɛ Ma Jeli ɔmɛ yi kulaa. Enɛ ɔ he ɔ, e sa nɛ Petro nɛ tsake e susumi bɔ nɛ pee nɛ e nyɛ nɛ e fiɛɛ kɛ ha Ma Jeli ɔmɛ. Benɛ Petro yɔse bɔ nɛ Yehowa naa Ma Jeli ɔmɛ ha a, e tsake e susumi. Enɛ ɔ ha nɛ Petro pee kaa bɔ nɛ Yehowa fã lɛ ɔ, nɛ e kɛ ‘nɔ́ ko je we e nya.’ (Níts. 10:​28, 29) E ya fiɛɛ kɛ ha Kornelio kɛ e we mi bimɛ ɔmɛ nɛ a baptisi mɛ. (Níts. 10:​21-23, 34, 35, 44-48) Jeha komɛ a se ɔ, Petro wo e nyɛmimɛ Kristofo ɔmɛ he wami kaa a ha nɛ a “susumi nɛ kɔ.” (1 Pet. 3:​8, sisi ningma.) Wa naa bɔ nɛ Yehowa susuɔ níhi a he ha ngɛ e Munyu ɔ mi. Enɛ ɔ he ɔ, ke wa pueɔ wa yi mi tɛ ngɛ bɔ nɛ Yehowa susuɔ níhi a he ha a he ɔ, lɔ ɔ ma ha nɛ waa kɛ wa nyɛmimɛ ɔmɛ a susumi ma kɔ. w25.03 9-10 ¶7-8

Bɔ nɛ nihi susuɔ níhi a he ha a je ekpa kulaa ngɛ bɔ nɛ Yehowa susuɔ níhi a he ha a he. (Abɛ 17:15) Enɛ ɔ he ɔ, e sa nɛ wa yɔse susumihi nɛ dɛ nɛ nihi hɛɛ ɔ, nɛ waa yu wa he kɛ je he. E sɛ nɛ waa ngmɛ blɔ nɛ nihi nɛ a teɔ si kɛ woɔ wɔ ɔ nɛ a jɔ̃ wa kɔni mi nɛ wa kpa Yehowa sɔmɔmi. E sa nɛ waa ngɔ ga nɛ bɔfo Paulo wo Hebribi nɛ a ji Kristofohi ɔ kaa a ya nɔ nɛ a wa ngɛ mumi mi ɔ kɛ tsu ní. Loko wa ma nyɛ maa wa ngɛ mumi mi ɔ, e sa nɛ waa kase Baiblo ɔ, nɛ waa le Yehowa saminya, nɛ waa le e susumi ngɛ níhi a he. Ke wa jɔɔ wa he nɔ nɛ a baptisi wɔ po ɔ, e sa nɛ waa ya nɔ nɛ waa pee jã. Wa ba asafo ɔ mi kɛ jio, lingmi nɛ ɔ nɛ wa ba mi jio, e he hia nɛ wɔ tsuo waa kane Mawu Munyu ɔ daa, nɛ waa kase hulɔ. (La 1:2) Ke wa kaseɔ ní be fɛɛ be ɔ, lɔ ɔ maa ye bua wɔ nɛ wa hemi kɛ yemi ɔ mi maa wa. Enɛ ɔ ji su nɛ Paulo de Hebribi ɔmɛ kaa e he hia nɛ a ná a nɛ.—Heb. 11:​1, 6. w24.09 10 ¶7-8

Ke wa naa Yehowa kaa nɔ ko nɛ ngɛ nitsɛnitsɛ ɔ, e be yee kaa wa maa ye lɛ anɔkuale be fɛɛ be. Enɛ ɔ ba mi ngɛ Yosef blɔ fa mi. Akɛnɛ e naa Mawu kaa nɔ ko nɛ e ngɛ nitsɛnitsɛ, nɛ e sume nɛ e gbo e nɔ tue he je ɔ, e pee kã nɛ e yu e he ngɛ ajuama bɔmi he. (1 Mose 39:9) Bɔ nɛ pee nɛ waa na Yehowa kaa nɔ ko nɛ ngɛ nitsɛnitsɛ ɔ, e sa nɛ wa ná be kɛ sɔle ha lɛ, nɛ waa kase e Munyu nɛ ji Baiblo ɔ. Ke wa pee jã a, huɛ bɔmi nɛ ngɛ waa kɛ lɛ wa kpɛti ɔ mi maa wa wawɛɛ. Nɛ kaa bɔ nɛ e ji ngɛ Yosef blɔ fã mi ɔ, wa be nɔ́ ko nɔ́ ko pee kɛ gbo e nɔ tue. Ngɛ anɔkuale mi ɔ, e he be wae kaa nihi nɛ a hɛ jeɔ nɔ kaa Yehowa ji Mawu hɛ kalɔ ɔ maa je e se. Mo susu nɔ́ nɛ ba Israelbi ɔmɛ a nɔ ngɛ nga a nɔ ɔ he nɛ o hyɛ. A le kaa Yehowa ngɛ, se kɛ̃ ɔ, a yi mi pee mɛ enyɔɔnyɔ ke ji Yehowa ma ha mɛ a hiami níhi loo e be mɛ hae. (2 Mose 17:​2, 7) Enɛ ɔ ha nɛ a tsɔ atuã kɛ si Yehowa. E ngɛ heii kaa a sane ɔ ji kɔkɔ bɔmi kɛ ha wɔ. Wa sume nɛ waa pee nɔ́ ko kaa jã.—Heb. 3:12. w24.06 24 ¶14-15

Je nɛ ɔ nyagbe su si haa, nɛ wa ma nyɛ maa hyɛ blɔ kaa waa kɛ haomihi fuu nɛ ma ha wa fo ya a maa kpe. Ke wa ngɛ ya foe ɔ, Yehowa naa, nɛ lɛ hu e haoɔ. Ngɛ anɔkuale mi ɔ, wa vonyu ɔmɛ a he jua wa ha lɛ wawɛɛ. Enɛ ɔ he ɔ, ke waa kɛ si fɔfɔɛhi nɛ a mi wa ngɛ kpee ɔ, e sa nɛ waa sɔle ha Yehowa nɛ wa de lɛ nɔ́ nɛ ngɛ wa tsui mi. E ko ba kaa wa ma tsɔ wa he kɛ je wa nyɛmimɛ ɔmɛ nɛ a suɔ wɔ wawɛɛ ɔ a he kɔkɔɔkɔ. Nyɛ ha nɛ waa ya nɔ nɛ waa kane Baiblo ɔ konɛ Yehowa munyuhi nɛ ngɛ mi ɔ nɛ wo wa bua. Wa ma nyɛ ma ná nɔ mi mami kaa ke wa fĩ si nɛ wa ye Yehowa anɔkuale ɔ, e maa jɔɔ wɔ wawɛɛ. E ma tsu wa hɛ mi vonyu ɔmɛ tsuo. Nɔ ko nɔ ko be aywilɛho yee, nɛ nɔ ko nɔ ko be hiɔ nue hulɔ. Nɔ fɛɛ nɔ maa ye e nyɛmi anɔkuale. (Kpoj. 21:4) Kɛkɛ ɔ, wa bua maa jɔ hluu po kaa wa ma fo ya. w24.12 20 ¶3; 25 ¶19

Yehowa hla wɔ kaa e we Odasefohi, nɛ e wo si kaa e maa ye bua wɔ nɛ waa pee kã. (Yes. 43:​10, 11) Mo susu blɔ eywiɛ komɛ a nɔ nɛ e guɔ kɛ peeɔ jã a he nɛ o hyɛ. Kekleekle ɔ, be fɛɛ be nɛ wa maa fiɛɛ sane kpakpa a, Yesu piɛɛɔ wa he. (Mat. 28:​18-20) Enyɔne, Yehowa haa nɛ bɔfohi yeɔ buaa wɔ. (Kpoj. 14:6) Etɛne, Yehowa haa wɔ e mumi klɔuklɔu ɔ konɛ e kai wɔ níhi nɛ wa kase ɔ. (Yoh. 14:​25, 26) Eywiɛne, Yehowa ha wɔ nyɛmimɛ nyumuhi kɛ yihi nɛ a ye bua wɔ ngɛ fiɛɛmi mi. Akɛnɛ Yehowa kɛ wa nyɛmimɛ ɔmɛ suɔ wɔ nɛ a yeɔ buaa wɔ he je ɔ, wa ma nyɛ maa pee kã nɛ waa ya nɔ nɛ waa fiɛɛ. Se ke o ya fiɛɛmi nɛ o ya nɛ nihi fuu ngɛ we mi, nɛ o kɔni mi jɔ̃ ɔ, mo bi o he ke: ‘Jije nihi nɛ a ngɛ ye zugba kpɔ ɔ mi ɔ ho?’ (Níts. 16:13) ‘Anɛ a ho ní tsumi ya aloo a ho jua ya?’ Ke jã ji sane ɔ, anɛ o ma nyɛ ma ya fiɛɛ ngɛ gbɛjegbɛ ɔmɛ a he kaa o maa na nihi fuu lo? w24.04 17 ¶10-11

Ke o ji huno nɛ o suɔ nɛ o he nɛ su nɛ o sɔmɔ kaa asafo mi nɔkɔtɔma a, e sa nɛ o weku mi bimɛ ɔmɛ hu nɛ a pee nɔ hyɛmi nɔ́ kpakpa kɛ ha ni kpahi. Enɛ ɔ he ɔ, e sa nɛ ‘o hyɛ mo nitsɛ o we mi bimɛ a nɔ ngɛ blɔ kpakpa nɔ.’ Enɛ ɔ tsɔɔ kaa o maa je suɔmi mi kɛ hyɛ o weku ɔ nɔ, nɛ o mwɔ yi mi kpɔhi nɛ sa kɛ ha o weku ɔ. E sa nɛ o kɛ o weku ɔ nɛ pee weku Mawu jami, nɛ nyɛɛ ya Kristofohi a kpehi, nɛ o ye bua mɛ konɛ a kɛ kã nɛ tsu fiɛɛmi ní tsumi ɔ. Ke o ji bitsɛ ɔ, e sa nɛ o bimɛ nɛ a yi jeha 18 lolo ɔ nɛ ‘a ba a he si saminya kɛ ha mo.’ (1 Tim. 3:4) E sa nɛ o je suɔmi mi kɛ tsɔɔ mɛ ní, nɛ o tsɔse mɛ. E ngɛ mi kaa o suɔ nɛ o bimɛ ɔmɛ a bua nɛ jɔ, nɛ a fiɛ kaa bɔ nɛ jokuɛwi kpahi peeɔ ɔ mohu lɛɛ, se e he hia nɛ o tsɔse mɛ nɛ a bu mo tue, nɛ a je bumi kpo kɛ tsɔɔ ni kpahi, nɛ a ba a je mi saminya. Jehanɛ hu ɔ, e sa nɛ o ye bua o bimɛ ɔmɛ konɛ huɛ bɔmi kpakpa nɛ hi a kɛ Yehowa a kpɛti, a hi si ngɛ Baiblo sisi tomi mlaahi a nya, nɛ a kɛ pee oti kaa a ma ha nɛ a baptisi mɛ. w24.11 22 ¶10-11

Ke o pee babauu ngɛ Yehowa sɔmɔmi mi ɔ, o maa na bɔ nɛ Yehowa maa ye bua mo ha, nɛ enɛ ɔ ma ha nɛ hɛ kɛ nɔ fɔmi nɛ o ngɛ ngɛ e mi ɔ mi maa wa. (1 Kor. 3:9) Mo kai kaa Yehowa ngɔɛ nɔ́ nɛ o nyɛɔ peeɔ ɔ kɛ to nɔ́ nɛ ni kpahi nyɛɔ peeɔ ɔ he. E le nɔ́ nɛ ngɛ o tsui mi. Ke e na bɔ nɛ o jeɔ o tsui mi nɛ o jeɔ hɛsa kpo ngɛ nike ní nɛ se be nɛ ji kpɔmi nɔ́ ɔ he ɔ, e bua jɔɔ wawɛɛ. (1 Sam. 16:7; Maak. 12:​41-44) Kpɔmi nɔ́ ɔ he je ɔ, Yehowa ngɔɔ wa yayami ɔmɛ kɛ keɔ wɔ, huɛ bɔmi kpakpa hiɔ waa kɛ lɛ wa kpɛti, nɛ wa ngɛ hɛnɔkami kaa wa maa hi si kɛ ya neneene. Nyɛ ha nɛ wɔ tsuo waa ngɔ wa ní peepee kɛ tsɔɔ kaa wa hɛ sa suɔmi nɛ Yehowa je kpo kɛ tsɔɔ wɔ ɔ. Suɔmi nɛ ɔ ji nɔ́ nɛ wo lɛ he wami nɛ e to jɔɔmi nɛ ɔmɛ a he blɔ nya kɛ ha wɔ ɔ nɛ. (1 Yoh. 4:19) Jehanɛ hu ɔ, nyɛ ha nɛ waa tsɔɔ kaa wa bua jɔ Yesu he, ejakaa e suɔ wɔ, nɛ e ngɔ e wami kɛ ha ngɛ wa he je! w25.01 31 ¶16-18

Mo susu nɔ́ nɛ Baiblo ɔ de ngɛ nɔ nɛ ngma La 73 ɔ he ɔ he nɛ o hyɛ. E na kaa nihi nɛ a sɔmɔ we Yehowa a plɔke, a ná ní, nɛ e pee kaa nɔ́ nɛ haomi ko be a kuɛ nɔ. (La 73:​3-5, 12) Benɛ e na kaa níhi ngɛ nɔ yae ha mɛ saminya a, e nu he kaa nile be yi mi kpɔ nɛ e mwɔ kaa e ma sɔmɔ Yehowa a mi. Enɛ ɔ ha nɛ e kɔni mi jɔ̃, nɛ e “hao ligbi ɔ tsuo.” (La 73:​13, 14) Mɛni ye bua lɛ nɛ e nyɛ nɛ e da jamɛ a si fɔfɔɛ ɔ nya? La polɔ ɔ ya Yehowa sɔlemi we ɔ. (La 73:​16-18) Benɛ e ya lejɛ ɔ, e nyɛ nɛ e susu níhi a he saminya. E na kaa e ngɛ mi kaa ni komɛ a si himi ma nyɛ maa pee gbɔjɔɔ mohu lɛɛ, se jamɛatsɛmɛ ɔmɛ be hɛnɔkami ko hwɔɔ se. Enɛ ɔ ye bua lɛ nɛ e ná tue mi jɔmi, ejakaa e ba le kaa Mawu jami nɛ e kɛ maa pee nɔ́ titli ngɛ e si himi mi ɔ ji nɔ́ ko nɛ se be. Lɔ ɔ he ɔ, e mwɔ e yi mi kpɔ kaa e maa ya nɔ ma sɔmɔ Yehowa.—La 73:​23-28. w24.10 27 ¶11-12

Yehowa hla wɔ kaa e we ‘Odasefohi.’ (Yes. 43:​10-12) Jeha komɛ nɛ be ɔ, sɛ womi ko nɛ je Blɔ Tsɔɔmi Ajla Toli ɔmɛ a ngɔ ɔ de ke: “He blɔ nɛ se be nɛ wa kpɛti nɔ ko ma nyɛ ma ná ji kaa a ma tsɛ lɛ ke Yehowa Odasefono.” Mɛni he je? Mo susu nɔ́ he tomi nɔ́ nɛ ɔ he nɛ o hyɛ. Ke o ngɛ hlae nɛ nɔ ko nɛ ye odase ha mo ngɛ kojomi he ɔ, anɛ o maa hla nɔ ko nɛ o he we lɛ yi lo? Ngɛ anɔkuale mi ɔ, o be jã pee kulaa. E ngɛ heii kaa o maa hla nɔ ko nɛ o le lɛ saminya nɛ o he lɛ ye, nɛ e ngɛ biɛ kpakpa ngɛ nihi a hɛ mi. Akɛnɛ Yehowa hla wɔ kaa e we Odasefohi he je ɔ, lɔ ɔ tsɔɔ kaa Yehowa le wɔ saminya, nɛ e ngɛ hɛ kɛ nɔ fɔmi ngɛ wa mi kaa ma nyɛ maa ye e he odase kaa lɛ ji anɔkuale Mawu ɔ nɛ. E ji he blɔ ngua nɛ wa ná kaa wa ji e we Odasefohi. Enɛ ɔ he ɔ, nyɛ ha nɛ waa ngɔ he blɔ fɛɛ he blɔ nɛ wa ma ná a kɛ tsɔɔ nihi Mawu biɛ ɔ, nɛ a na kaa níhi tsuo nɛ Satan de ngɛ e he ɔ ji lakpa. Ke wa pee jã a, lɔ ɔ tsɔɔ kaa wa ngɛ biɛ nɛ fɔɔ si ngɛ wa nɔ, nɛ ji Yehowa Odasefohi ɔ nya ní tsue!—Rom. 10:​13-15. w24.05 18 ¶13

Ni kpahi nɛ Yesu sɔmɔ ɔ ha nɛ e ná bua jɔmi nɛ se be. Be ko benɛ Yesu tsɔɔ asafo kuu ko ní se ɔ, e pee nɔ́ kpa ko hu kɛ ye bua mɛ. E ha mɛ a he lo nya hiami níhi. E gu nyakpɛ blɔ nɔ kɛ ha mɛ niye ní, nɛ e de e kaseli ɔmɛ kaa a gba kɛ ha mɛ. (Maak. 6:41) E gu jã nɛ e pee ɔ nɔ kɛ tsɔɔ e kaseli ɔmɛ bɔ nɛ a ma sɔmɔ ni kpahi ha. Jehanɛ hu ɔ, e tsɔɔ mɛ kaa ní tsumihi kaa jã nɛ a ma tsu ɔ he hia. Moo hyɛ bɔ nɛ kaseli ɔmɛ a bua maa jɔ ha kaa a ná he blɔ kɛ gba niye ní nɛ Yesu gu nyakpɛ blɔ nɔ kɛ pee ɔ kɛ ha ni ɔmɛ kɛ ya si “mɛ tsuo a ye nɛ a tɔ”! (Maak. 6:42) Ngɛ anɔkuale mi ɔ, pi si fɔfɔɛ nɛ ɔ mi pɛ nɛ Yesu ngɔ ni kpahi a hiami níhi nɛ́ e ma tsu he ní ha mɛ ɔ kɛ sɛ hlami. E ngɔ e wami be ɔ tsuo kɛ sɔmɔ ni kpahi benɛ e ngɛ zugba a nɔ ɔ. (Mat. 4:23) Akɛnɛ Yesu tsɔɔ ni kpahi ní nɛ e je e tsui mi kɛ tsu a hiami níhi a he ní ha mɛ he je ɔ, e bua jɔ, nɛ e tsui hu nɔ e mi. w24.11 16 ¶10-11

Be mi nɛ níhi a mi ngɛ wae ‘ngɛ nyagbe ligbi nɛ ɔmɛ a mi ɔ,’ wa ma ná he blɔhi fuu kɛ ye bua wa nyɛmimɛ ɔmɛ nɛ wa ha mɛ a hiami níhi. Jehanɛ hu ɔ, wa ma nyɛ maa wo a bua nɛ wa je suɔmi kpo kɛ tsɔɔ mɛ. Blɔ kake nɛ wa ma nyɛ maa gu nɔ kɛ pee jã ji kaa wa ma nya a he ke a ba Matsɛ Yemi Asa a nɔ. Enɛ ɔ he ɔ, ke wa nyɛmimɛ ɔmɛ ba asafo mi kpe ɔ, e sa nɛ waa pee nɔ́ fɛɛ nɔ́ nɛ wa ma nyɛ nɛ wa je suɔmi kpo kɛ tsɔɔ mɛ, nɛ waa wo mɛ he wami. Asafo mi nikɔtɔmahi ma nyɛ maa pee wesa he kɛ ha nyɛmimɛ ɔmɛ ngɛ asafo ɔ mi ngɛ haomi behi a mi. Ke oslaa ko ba loo hiɔ ko fia nɔ ko tlukaa a, asafo mi nikɔtɔma amɛ kɛ oya yemi toɔ blɔ nya nɛ a yeɔ buaa nɔ ɔ. Jehanɛ hu ɔ, a daa Baiblo ɔ nɔ kɛ woɔ asafo mi bimɛ ɔmɛ he wami. Ke asafo mi nɔkɔtɔma ko he jɔ, e buɔ nihi tue, nɛ e bɔɔ mɔde kaa e maa nu nihi sisi ɔ, nyɛmimɛ ɔmɛ maa hɛ kɛ su e he wawɛɛ. Su nɛ ɔmɛ haa nɛ nyɛmimɛ ɔmɛ nuɔ he kaa asafo ɔ suɔ mɛ, nɛ ke asafo mi nɔkɔtɔma ko da Baiblo ɔ nɔ kɛ wo mɛ ga a, e yi kulaa kaa a kɛ ma tsu ní.—1 Tɛs. 2:​7, 8, 11. w24.06 29 ¶12-13

E sɛ nɛ wa susu gblee kaa akɛnɛ Yehowa ji Mawu ope he je ɔ, nɔ́ dɔɛ lɛ! E bɔ wɔ ngɛ e subai nɔ, nɛ e ha wɔ nyɛmi nɛ́ waa kɛ nuɔ nɔ́ he. Lɔ ɔ he ɔ, e ngɛ heii kaa Yehowa hu nuɔ nɔ́ he. Baiblo ɔ de ngɛ e he ke, e “ye e tsui” nɛ e “ye aywilɛho.” (La 78:​40, 41) Yehowa ye aywilɛho benɛ e na nɛ a sɛu e Bi ɔ ngɛ sɛumi tso nɔ nɛ e na nɔ́ kɛ gbo ɔ! Kpɔmi nɔ́ ɔ ha nɛ wa na kaa nɔ ko nɔ ko be nɛ e suɔ wɔ kaa Yehowa. E suɔ wɔ wawɛɛ pe bɔ nɛ wa wekuli loo wa huɛmɛ nɛ nyu bi ngɛ waa kɛ mɛ wa kpɛti ɔ po suɔ wɔ. (Rom. 8:​32, 38, 39) Wa ma nyɛ ma ná nɔ mi mami kaa Yehowa suɔ wɔ pe bɔ nɛ wa suɔ wɔ nitsɛmɛ wa he po. Anɛ o suɔ kaa o maa hi si kɛ ya neneene lo? Yehowa suɔ wawɛɛ kaa o hi si kɛ ya neneene. Anɛ o suɔ nɛ a ngɔ o tɔmi ɔmɛ kɛ ke mo lo? Yehowa suɔ kaa e kɛ maa ke mo hluu tsɔ. Nɔ́ nɛ Yehowa ngɛ blɔ hyɛe ngɛ wa dɛ pɛ ji kaa wa je hɛsa kpo ngɛ nike ní nɛ se be nɛ e kɛ ha wɔ ɔ he, nɛ wa ná hemi kɛ yemi ngɛ e mi, nɛ waa bu lɛ tue. Kpɔmi nɔ́ ɔ nɛ Yehowa kɛ ha wɔ ɔ tsɔɔ kaa e suɔ wɔ niinɛ.—Fiɛɛ. 3:11. w25.01 22-23 ¶8-9

Be komɛ ɔ, wɔ tsuo wa daa nɔ́ nɛ wa naa, nɔ́ nɛ wa nuɔ, kɛ wa he numi nɔ kɛ mwɔɔ yi mi kpɔhi. Níhi nɛ wa nuɔ ɔ ma nyɛ maa mlɔɔ wɔ. Ke wa da níhi nɛ wa naa kɛ níhi nɛ wa nuɔ ɔ nɔ kɛ mwɔɔ yi mi kpɔ ɔ, eko ɔ, wa maa pee nɔ́ ko nɛ Yehowa sume kaa waa pee. (Fiɛɛ. 11:9; Mat. 24:​37-39) Se ke wa nyɛɛɔ ngɛ hemi kɛ yemi nya a, e ngɛ heii kaa wa maa mwɔ yi mi kpɔhi nɛ maa “sa Nyɔmtsɛ ɔ hɛ mi.” Ke waa kɛ Mawu ga womihi tsu ní ɔ, wa tue mi maa jɔ wɔ nɛ wa ma ná bua jɔmi nitsɛnitsɛ. (La 16:​8, 9; Yes. 48:​17, 18) Nɛ ke wa ya nɔ nɛ wa nyɛɛ ngɛ hemi kɛ yemi nya a, hwɔɔ se ɔ, wa ma ná neneene wami. (2 Kor. 4:18) Kɛ wa ma plɛ kɛ le kaa wa ngɛ nyɛɛe ngɛ hemi kɛ yemi nya loo wa nyɛɛ we ngɛ hemi kɛ yemi nya ha kɛɛ? E he hia nɛ wɔ tsuo wa bi wa he ke: “Mɛni nɔ i daa kɛ mwɔɔ yi mi kpɔhi? Anɛ i daa níhi nɛ i naa nɔ pɛ kɛ mwɔɔ ye yi mi kpɔ aloo i haa nɛ Yehowa blɔ tsɔɔmi kudɔɔ mi?” w25.03 20-21 ¶3-4

Wa kpɛti nɔ fɛɛ nɔ ngɛ blɔ nya ní tsumi ko nɛ e sa kaa e tsu kɛ ye bua nihi konɛ a ba piɛɛ wa he ngɛ mumi mi paradeiso ɔ mi. Wa ma nyɛ ma tsu blɔ nya ní tsumi nɛ ɔ ke wa kase Yehowa. Yehowa nyɛ we nihi a nɔ kaa a ba e we asafo ɔ mi. Mohu ɔ, e ‘gblaa’ nihi bɔɔbɔɔbɔɔ kɛ baa e ngɔ. (Yoh. 6:44; Yer. 31:3) Tsui kpakpatsɛmɛ nɛ a kaseɔ Yehowa suɔmi ɔ kɛ su kpakpahi nɛ e ngɛ ɔ he ní ɔ hɛɔ kɛ suɔ e he. Mɛni blɔ nɔ nɛ wa su, kɛ wa je mi bami kpakpa a gblaa nihi kɛ baa mumi mi paradeiso ɔ mi? Nɔ́ kake nɛ wa ma nyɛ maa pee ji kaa wa ma je suɔmi kɛ mi mi jɔmi kpo kɛ tsɔɔ wa nyɛmimɛ ɔmɛ. Ke ni hehi ba wa kpe ɔmɛ ɔ, wa suɔ nɛ a nu he kaa bɔ nɛ eko ɔ, nihi nɛ a he we yi nɛ a ya kpehi nɛ a pee ngɛ blema Korinto ɔ nu he ɔ. A de ke: “Mawu ngɛ nyɛ kpɛti niinɛ.” (1 Kor. 14:​24, 25; Zak. 8:23) Enɛ ɔ he ɔ, e sa nɛ waa kɛ ga womi nɛ ngɛ mwɔnɛ ɔ ngmami ɔ mi ɔ nɛ tsu ní. w24.04 23-24 ¶16-17