Mɛni Be Nɛ Ta Nɛ A Ngɛ Hwue ɔ Se Maa Po?​—⁠Mɛni Baiblo ɔ De?

António Guterres nɛ e ji United Nations Kuu ɔ Hɛ Mi Nyɛɛlɔ Nɔkɔtɔma a de kɛ kɔ tuami nɛ Iran ya tua Israel ngɛ Hɔ, April 13, 2024 ɔ nɔ ɔ he ke, “Amlɔ nɛ ɔ ji be nɛ e sa nɛ wa ha nɛ si fɔfɔɛ nɛ ngɛ gbeye nɛ́ ha nɛ nihi ngɛ haoe ɔ nya nɛ ba si. Amlɔ nɛ ɔ ji be nɛ e sa nɛ nihi nɛ a ye a he nɔ wawɛɛ.”

Ta nɛ ngɛ nɔ yae ngɛ Middle East ɔ ji nyagbahi nɛ ngɛ nɔ yae ngɛ je kɛ wɛ ɔ a kpɛti kake.

“Tahi nɛ a ngɛ hwue ngɛ wa be nɛ ɔ mi ɔ ya hɛ mi wawɛɛ pe tahi nɛ ya nɔ kɛ je benɛ a hwu Je Mi Ta Enyɔne ɔ, nɛ ta nɛ ɔmɛ ngɔ oslaahi kɛ ba nihi nɛ a yibɔ maa su ayɔ enyɔ ɔ nɔ. Enɛ ɔ tsɔɔ kaa ke a je nɔ eywiɛ fɛɛ nɔ eywiɛ ɔ, a kpɛti nɔ kake ji nɔ nɛ ta a sa e he.”​—United Nations Security Council, January 26, 2023.

Mahi nɛ a ngɛ ta nɛ ɔmɛ hwue ɔ ekomɛ ji Israel, Gaza, Syria, Azerbaijan, Ukraine, Sudan, Ethiopia, Niger, Myanmar, kɛ Haiti.a

Mɛni be nɛ ta nɛ a ngɛ hwue ɔ se maa po? Anɛ ma nɔ yeli ma nyɛ maa ngɔ tue mi jɔmi kɛ ba lo? Mɛni Baiblo ɔ de?

Je nɛ́ a ngɛ ta hwue ngɛ mi

Tahi nɛ ngɛ nɔ yae ngɛ je kɛ wɛ mwɔnɛ ɔ tsɔɔ kaa e be kɛe nɛ tahi tsuo nɛ a ngɛ hwue ɔ se maa po. Tahi nɛ a ngɛ hwue ngɛ wa be nɛ ɔ mi ɔ, ha nɛ Baiblo gbami nɛ kɔɔ be nɛ́ wa ngɛ mi nɛ ɔ he ɔ ngɛ mi bae. Baiblo ɔ tsɛɛ wa be nɛ ɔ ke “níhi a blɔ nya tomi ɔ nyagbe be ɔ.”​—Mateo 24:3.

• “Nyɛ maa nu ta hwumihi kɛ tahi a he amaniɛ bɔmihi a he. . . . Ma maa te si ngɔ wo ma nɛ matsɛ yemi maa te si ngɔ wo matsɛ yemi.”​—Mateo 24:6, 7.

Moo kane munyu nɛ ji “What Is the Sign of ‘the Last Days,’ or ‘End Times’?” ɔ konɛ o na bɔ nɛ tahi nɛ a ngɛ hwue mwɔnɛ ɔ ha nɛ Baiblo gbami ngɛ mi bae ha.

Ta ko nɛ maa po tahi tsuo a se

Baiblo ɔ gba kɛ fɔ si kaa tahi nɛ adesahi ngɛ hwue ɔ se maa po. Mɛni blɔ nɔ enɛ ɔ maa gu kɛ ba? Pi adesa ko mɔde bɔmi, mohu ɔ, enɛ ɔ maa ba kɛ gu Harmagedon ta a nɛ ji “Mawu Ope ɔ ligbi ngua a nɔ ta a” nɔ. (Kpo Jemi 16:14, 16) Ke a hwu ta nɛ ɔ se ɔ, Mawu maa ye si nɛ e wo adesahi kaa a ma ná tue mi jɔmi kɛ ya neneene ɔ nɔ.​—La 37:10, 11, 29.

Ke o suɔ nɛ o le babauu kɛ kɔ ta nɛ Mawu maa gu nɔ kɛ po tahi tsuo a se ɔ he ɔ, moo kane munyu nɛ ji “What Is the Battle of Armageddon?”