Mɛni He Je Nɛ Nihi Je We Subai Kpakpa Kpo Mwɔnɛ ɔ?​—⁠Mɛni Baiblo ɔ De?

Nihi babauu je we subai kpakpa kpo mwɔnɛ ɔ, nɛ enɛ ɔ ngɛ nɔ yae wawɛɛ. Hiɔtsɛmɛ nɛ a bui nɔ ɔ kpãa ngmlaa kɛ woɔ dɔkitahi nɛ a ngɛ mɛ hyɛe ɔ a yi; ni komɛ nɛ a ya yeɔ ní ngɛ ní yemi hehi ɔ tsuaa nihi nɛ a juaa niye ní kɛ haa mɛ ɔ ní; nihi nɛ a hiɔ ɛloplee mi kɛ hiaa blɔ ɔ a kpɛti ni komɛ peeɔ basabasa kɛ siɔ nihi nɛ a hyɛɔ a nɔ ngɛ ɛloplee ɔ mi ɔ; sukuubi nɛ a bui nɔ ɔ yeɔ a tsɔɔli a he fɛu, a woɔ a he gbeye, nɛ a kongoɔ mɛ; nihi nɛ a nyɛɛ ma kudɔmi kuuhi a hɛ mi ɔ a kpɛti ni komɛ peeɔ zo ní, nɛ a ti ni komɛ hu jeɔ mɛ nitsɛmɛ a yi kaa a ngɛ subai kpakpa.

Baiblo ɔ ji womi nɛ tsɔɔ wɔ bɔ nɛ wa ma plɛ kɛ je subai kpakpa kpo ha. Jehanɛ hu ɔ, e tsɔɔ nɔ́ he je nɛ nihi je we subai kpakpa kpo mwɔnɛ ɔ.

Mɛni he je nɛ nihi je we subai kpakpa kpo mwɔnɛ ɔ?

Nihi babauu ngɛ je kɛ wɛ ɔ je we subai kpakpa kpo mwɔnɛ ɔ, nɛ enɛ ɔ pɔ he wawɛɛ.

• Níhi a mi hlami ko nɛ a pee lingmi nɛ ɔ tsɔɔ kaa, Amerikabi he ye kaa nihi nɛ a ngɛ United States ɔ a je mi bami ngɛ puɛe wawɛɛ amlɔ nɛ ɔ pe jeha 22 nɛ be ɔ.

• Ngɛ níhi a mi hlami kpa ko nɛ a pee nɛ́ a bi nihi nɛ a he hiɛ pe 32,000 nɛ a je mahi 28 a nɔ ɔ munyu ɔ mi ɔ, a kpɛti nihi lafa mi 65 tsɔɔ kaa nihi nɛ a jeɔ subai kpakpa kpo ɔ a yibɔ nɔ ngɛ gbɔe wawɛɛ mwɔnɛ ɔ pe be ko nɛ be ɔ.

Baiblo ɔ gba bɔ nɛ adesahi ngɛ a je mi bae ha mwɔnɛ ɔ kɛ fɔ si.

• “Ngɛ nyagbe ligbi ɔmɛ a mi ɔ, behi nɛ a mi wa nɛ a nya dami maa ye maa ba. Ejakaa adesahi maa pee nihi nɛ a suɔ mɛ nitsɛmɛ a he, sika suɔli, fĩali, he nɔ woli, musu bɔli, nihi nɛ a bui a fɔli, nihi nɛ a li sina, . . . nihi nɛ a be he nɔ yemi, [kɛ] nihi nɛ a hɛ mi jɔɛ.”​—2 Timoteo 3:1-3.

Ke o suɔ nɛ o le babauu kɛ kɔ bɔ nɛ gbami nɛ ɔ ngɛ mi bae ha a he ɔ, moo kane munyu nɛ yi ji “Did the Bible Predict the Way People Think and Act Today?”

Womi nɛ́ maa tsɔɔ mo bɔ nɛ o ma je subai kpakpa kpo ha

Ngɛ je nɛ́ nihi fuu je we subai kpakpa kpo ngɛ mi nɛ ɔ mi ɔ, nihi ayɔhi abɔ ba na kaa Baiblo ɔ ji womi nɛ se be nɛ́ tsɔɔ nihi bɔ nɛ a maa ba a je mi saminya ha. Ga womihi nɛ Baiblo ɔ kɛ ha kɛ kɔ je mi bami he ɔ, ji nɔ́ nɛ wa ‘ma nyɛ maa fĩa kɛ fɔ a nɔ amlɔ nɛ ɔ, kɛ jehanɛ hu kɛ ya neneene.’ (La 111:8) Nɔ hyɛmi ní komɛ ji nɛ ɔ nɛ:

• Nɔ́ nɛ Baiblo ɔ de: “Níhi tsuo nɛ nyɛ suɔ kaa nihi nɛ a pee ngɔ ha nyɛ ɔ, e sa kaa nyɛ hu nyɛɛ pee ngɔ ha mɛ.”​—Mateo 7:12.

  Nɔ́ nɛ e tsɔɔ: E sa nɛ waa kɛ nihi nɛ hi si ngɛ bumi kɛ mi mi jɔmi mi kaa bɔ nɛ wa suɔ kaa nihi kɛ wɔ nɛ hi si ɔ.

• Nɔ́ nɛ Baiblo ɔ de: “Amlɔ nɛ ɔ nɛ nyɛ je lakpa kɛ fɔ he nɛ ɔ, nyɛ ti nɔ fɛɛ nɔ nɛ e kɛ e nyɛmi nɛ tu anɔkuale.”​—Efeso Bi 4:25.

  Nɔ́ nɛ e tsɔɔ: E sa nɛ waa ye anɔkuale ngɛ wa ní peepee kɛ wa munyu tutui mi.

Ke o suɔ nɛ o kase enɛ ɔ he ní fuu ɔ, wa kpa mo pɛɛ nɛ o kane:

• Blɛfo gbi Hwɔɔmi Mɔ nɛ yi ji “Right and Wrong​—A Guide You Can Trust.”

• Munyu nɛ yi ji “Tolerance​—How the Bible Can Help.”