KILISINYIAMAA BƐ ƐBƖLAWƆLƐ
Gyehova Bʋwa Yɛ Wɔ Yɛ Odwohilalɛ Nu
Wɔ mmɩlɩ mɔ ili awielɩyɛ eyi nu nɩ, yeyiyiaa odwohilalɛ mɔɔ numɔ ɩyɛ ɛzɩzɩbɛ sʋ̃maa. Ɩyɛ a yɛtɩ nɣanlɩ kɛɛ, yɛ odwohilalɛ ɩbʋlʋ yɛ anwʋzɩzɩbɛ zʋ nkʋ̃ʋ̃ ma yɛlɔ́kʋla yekegyina yi munwa. Naasʋ̃, sɛ yɛkɔ ɔzʋlɔ yɛtwɩ̃ yebike Gyehova a, ɩkɔwʋwa yɛ ma yekegyina odwohilalɛ mɔɔ numɔ ɩyɛ sɩ paa po munwa. (Ayɩ 43:2, 4) Kɛ ɩkɛyɛ na yɛahwɩ̃ yɛaɣike Gyehova mmɩlɩ mɔ yeyiyiaa odwohilalɛ a?
Mpayɩwɔlɛ. Sɛ yɛkã yɛ ahʋnlɩnɩ nu ndwokɔ munwala yekile Gyehova a, ɩkɛma yɛ azʋ̃ nu ikodwe yɛ na yekenyia anwʋzɩzɩbɛ mɔɔ yɛkɛva yekegyina odwohilalɛ yɩ munwa.—Fɩl 4:6, 7; 1Tɛs 5:17.
Dɩyɛzumanlɛhɔlɛ. Yehyinyia sunzuma ɔfʋã nu alɩyɛ nɩɩ ye mmeliyema mɔɔ yɛ nɩɩ bɛ kɔwɔ wɔ dɩyɛzumalɛ tʋ nɩ baaba tɛla mmɩlɩ bela. (Hib 10:24, 25) Sɛ yesiyeziye yɛ nwʋ yɛma dɩyɛzumanlɛ, yɛkɔ na yɛfa yɛnwʋ yewula numɔ sʋ̃ a, yenyia Gyehova yɩ sunzuma yɩ mmʋwalɩyɛ zʋ mfasʋ sʋ̃maa.—Yik 2:29.
Dasɩlɛlilɛhɔlɛ. Sɛ yɛyɛ mɔɔ yɛkɔhʋla bela wɔ dasɩlɛlilɛ egyima yɩ nu a, ɩkɔwʋwa yɛ ma yɛkɛyɩ yɛ adwɩnɩ wɔ odwohilalɛ yɩ zʋ na yɛava yɛ adwɩnɩ yeaziye nninyeniba nkʋ̃ la zʋ. Akʋ̃ sʋ̃, abusunwawɔlɛ mɔɔ ɩla yɛ nɩɩ Gyehova nɩɩ ye mmeliyema avinli nɩ, numɔ ɩkɛyɛ ɛzɩzɩbɛ.—1Kɔl 3:5-10.
KILÁ VIDIYO MƆƆ ISE GYEHOVA KEHILA WƲ, NA AKƲ̃ YƖ NDWOKƆƔIZIALƐ EYIMMƆ BO MUNWA:
Mɩnla yɛ ɩwʋwalɩ Malu ma iɣikeli Gyehova wɔ yɩ odwohilalɛ yɩ nu a?
Dɩkɛɛ Malu nɩ, mɩnla ɔhʋanɩ zʋ yɛ ndwokɔ mɔɔ ɩwɔ Ndwomi 34:18 kɔhʋla kɛɣɩkyɩ yɛ ɛɣɛɛlɛ mmɩlɩ mɔ yeyiyiaa odwohilalɛ a?
Mɩnla ɔhʋanɩ zʋ yɛ Malu yɩ ozumalɛnwʋnlɛ yɩ ɩma yɛnwʋ kɛɛ, sɛ yeyiyia odwohilalɛ a, Gyehova fa ‘tumi kezile mɔɔ ɩdɩ Nyamɩnlɩ yɩ dɩyɛ’ nɩ ɩma yɛ a?—2Kɔl 4:7