Kezimɔ Gyehova Bʋwa Yɛ Ma Yekyina Pindinyii

1. Mɩnla ti mɔɔ ɩ́la azɩ kɛɛ yekegyina pindinyii a, na aninyia yɛ ɩkɔhʋla kɔwʋwa yɛ a? (1 Pita 5:10)

WƆ AWIELƖYƐ mmɩlɩ eyi mɔɔ nninyeni nu yɛ sɩ nu nɩ, ihyinyia kɛɛ Gyehova yɩ mmenii kyina pindinyii. Adimakɛlɛ ɩtɩdɩɩ bo nu mbiyemmɔ. Abiyemmɔ sʋ̃ bedii bɛ alɔvʋlɔ mɔɔ bowuwu nɩ nwʋ ɛyɛkɛ. Abiyemmɔ beyiyiaa odwodwudiyialɛ wɔ bo mmusunwamaa anzɛnyɩɩ aɣanɩ mbanimbani bɛ kɛnɩ. (Mt. 10:​18, 36, 37) Nyia anwʋlazʋ kɛɛ ɩávalɩ nwʋmɔ ndwokɔzɩzɩbɛ bela mɔɔ eyiyiaa nɩ, Gyehova kɔhʋla kɔwʋwa wʋ ma ekegyina pindinyii.—Kɩnga 1 Pita 5:10.

2. Mɩnla yɛ ɩma yɛkʋla yekyina pindinyii a?

² Sɛ abiye iyiyiaa ndwokɔzɩzɩbɛ, odwodwudiyialɛ anzɛnyɩɩ debe itwee yi ikehila na idi nɔhʋanlɛ a, nɩ ikile kɛɛ ikyinaa pindinyii. Kɛ Kilisinyianii be yɩ anwʋzɩzɩbɛ yɛ ɩma ɩkʋla ikyina pindinyii a, mfomi Gyehova yɛ ɩma “tumi kezile” yɛ ma yɛkʋla yekyina pindinyii a. (2 Kɔl. 4:7) Wɔ dɩyɛzumanlɛ eyi nu nɩ, yekehila nninyeni anla mɔɔ Gyehova va ma yɛ mɔɔ ɩkɔwʋwa yɛ ma yekegyina pindinyii. Yekehila kezimɔ yɛkɛva ɔzɔ nninyeni yi numɔ ɔkʋ̃ bela keli egyima sʋ̃.

MPAYƖWƆLƐ

3. Mɩnla ti mɔɔ yɛkɔhʋla kɛhã kɛɛ mpayɩwɔlɛ yɛ nnwʋánlɩ a?

³ Gyehova yɛ dɩyɛ sʋnʋnkʋ̃ be ma yɛ mɔɔ ɩkɔwʋwa yɛ ma yekegyina pindinyii. Ɩma ɩyɛ bʋwɔ kɛɛ yɛ nɩɩ yɩ kɛdɩndɛ ɩávalɩ nwʋmɔ kɛɛ yɛtɔ sini nɩ. (Hib. 4:16) Mɔwʋ kila: Yɛkʋla yɛbɔ dɩyɛ bela nwʋ mpayɩ wɔ mmɩlɩ bela. Dɩka bela mɔɔ yɛkɔwɔ Gyehova mpayɩ nɩɩ ɛdɩndɛlɛ bela mɔɔ yɛkɛva kɔwɔ mpayɩ nɩ ɩnwʋ yɩ na ɩtɩ ɩtʋ, kɛ yɛwɔ dɩka be mɔɔ ɩdɩ yɩ nwʋ anzɛnyɩɩ fiyiadɩ nɩ. (Dwn. 2:​1, 2; Egy. 16:​25, 26) Sɛ adwɩnɩndwɩnɩ hyɛ yɛ zʋ sʋ̃maa na yɛánwʋ kezimɔ yɛhã kezimɔ yɛtɩ nɣanlɩ nɩ yehilé Gyehova po a, Gyehova tɩ mɔɔ yɛpɛ kɛɛ yɛkã nɩ tʋ. (Wul. 8:​26, 27) Amba, mpayɩwɔlɛ dɩ nnwʋánlɩ ɔhʋanɩ mɔɔ yeduwa zʋ yɛ nɩɩ Gyehova tɩndɛ!

4. Mɩnla ti mɔɔ mpayɩ mɔɔ yɛkɔwɔ kɛɛ Gyehova ɩwʋwá yɛ ma yegyina pindinyii nɩ, ɩ nɩɩ yɩ apɛdɩ yiyia a?

⁴ Wɔ Bayɩbʋlʋ yɩ nu nɩ, Gyehova ma yenyia anwʋlazʋ kɛɛ “sɛ yebizia dɩyɛ bela wɔ yɩ ɛkɛnɩ kɛmɔ ɩpɛ a, itiye yɛ.” (1 Dwɔ. 5:14) Asʋ̃ sa yɛkʋla yebizia Gyehova kɛɛ ɩwʋwá yɛ ma yegyina pindinyii a? Nyɛ! Iluwakɛɛ ɩ nɩɩ yɩ apɛdɩ yiyia. Mɩnla ti mɔɔ yɛkɔhʋla kɛhã zɔ a? Sɛ yekyina odwohilalɛ munwa a, nɩ yɛbʋwaa Gyehova ma ikenyia odwokɔ kowuwa Setanɩ Abɔnsamɩ mɔɔ ɩtɩndɛ itiyia yɩ nɩ. (Ɛɣɛ. 27:11) Mɛyɩ la ahanlɩ a, Bayɩbʋlʋ yɩ kã kɛɛ “ɩkɛva yɩ anwʋzɩzɩbɛ ɩkɔwʋwa bɛzabɛ mɔɔ bɛ ahʋnlɩnɩ di munli wɔ yɩ nwʋ nɩ.” (2 Mm. 16:9) Meti sa yɛkʋla yenyia anwʋlazʋ kɛɛ Gyehova wɔ anwʋzɩzɩbɛ nɩɩ ɛpɛ mɔɔ ɩkɛva kɔwʋwa yɛ ma yekegyina pindinyii.—Ayɩ. 30:18; 41:10; Lk. 11:13.

5. Mɩnla ɔhʋanɩ zʋ yɛ mpayɩ kɔhʋla kɛma yekenyia azʋ̃nudwolɩyɛ a? (Ayɩzaya 26:3)

⁵ Bayɩbʋlʋ yɩ kã kɛɛ, sɛ yɛkɔ zʋ yɛbɔ mɔɔ ididee yɛ nɩ nwʋ mpayɩ a, “Nyamɩnlɩ azʋ̃nudwolɩyɛ nɩ mɔɔ ɩtɛla enii yɩ ntɩyasɩ munwatĩĩ nɩ, ɩkɛma mʋnlʋmmɔ bɛ ahʋnlɩnɩ nɩɩ bɛ adwɩnɩ ikegyina.” (Fɩl. 4:7) Sunzu mɔɔ eyi kile nwʋ. Mmenii mɔɔ bɛázʋ̃mɩ Gyehova nɩ yiyia ndwokɔzɩzɩbɛ sʋ̃maa na boduwa ahʋanɩ azʋlɔtʋ zʋ kɛɛ bekenyia azʋ̃nudwolɩyɛ. Kɛ ndianwʋ nɩ, abiyemmɔ bɔ mmɔdɩnɩ kɛɛ bɛkɛyɛ debe kɛva kɛyɩ dɩyɛ bela wɔ bɛ adwɩnɩ nu na ama bɛ ahʋnlɩnɩ ɩadɔ bo kunlu. Naasʋ̃ eyi yɛ ɛyɛlɛ paa iluwakɛɛ sɛ bɛyɛ ɔzɔ na bɛádwɩnɩndwɩnɩ nninyeni baaba nwʋ a, sa ɩkʋla ɩma azunzuma evinli nyia bɛ adwɩnɩ zʋ tumi. (Fa tindiã Matiyu 12:​43-45 nwʋ.) Mɔɔ ɩdɩ yɛ lɛ kɛɛ, azʋ̃nudwolɩyɛ mɔɔ sɛ yɛbɔ mpayɩ a Gyehova ma yenyia nɩ, ɩtɛla azʋ̃nudwolɩyɛ bela mɔɔ abiye koluwa ɔhʋanɩ fʋlɔ be zʋ̃ kenyia. Sɛ yɛbɔ Gyehova mpayɩ a, nɩ yɛdaa yi ali kɛɛ yɛfa yɛ nwʋ yetiã yɩ zʋ kʋlakʋla na ɩkɛma yekenyia ‘azʋ̃nudwolɩyɛ daabaa’ (Kɩnga Ayɩzaya 26:3.) Ɔhʋanɩ ɔkʋ̃ mɔɔ Gyehova duwa zʋlɔ yɛ ɔzɔ yɛ lɛ kɛɛ ɩbʋwa yɛ ma yɛkakɛ nɔhʋanlɛ ndwokɔ mɔɔ ɩma yenyia anwʋlazʋ wɔ mɔɔ yezuma wɔ yi Odwokɔ yi nu nɩ. Ɔzɔ nɔhʋanlɛ ndwokɔ yɩ ma yɛ ahʋnlɩnɩ tɔ yɛ kunlu, iluwakɛɛ yezi kɛɛ Gyehova dwɩnɩ yɛ nwʋ na ɩpɛ kɛɛ isi yɛ bʋwɔ.—Ndw. 62:​1, 2.

6. Mɩnla yɛ ɔkɔhʋla kɔwɔ nwʋmɔ mpayɩ a? (Kila mfonyini yi sʋ̃.)

⁶ Mɔɔ ɔkɔhʋla kɛyɛ. Mmɩlɩ mɔ ekyinaa wu dedi nwʋ odwohilalɛ munwa pindinyii nɩ, “tʋ wʋ adɩsʋwa kua Gyehova zʋ” na bɔ yɩ mpayɩ kɛɛ ɩmá azʋ̃nudwolɩyɛ wʋ. (Ndw. 55:22) Siã yɩ sʋ̃ kɛɛ ɩmá enyia nɣɛlɛbɛ mɔɔ ehyinyia na ama wʋahʋla wʋagyina wʋ ndwokɔzɩzɩbɛ munwa. (Ɛɣɛ. 2:​10, 11) Mmɩlɩ mɔ ɔbɔɔ mpayɩ kɛɛ ɩwʋwá wʋ ma egyina pindinyii nɩ, máma wʋ ɛɣɛlɛ fi kɛɛ ɛkɛla yɩ asɩ. (Fɩl. 4:6) Pɩbɛ́ dasɩlɛ mɔɔ ikile kɛɛ Gyehova ɩbʋwaa wʋ ma ekegyina wʋ ndwokɔzɩzɩbɛ munwa na da yɩ asɩ wɔ mmʋwalɩyɛ mɔɔ ɩfa ɩma wʋ nɩ nwʋ. Máma wʋ ndwokɔzɩzɩbɛ nɩ sũ wʋ anyɩ wɔ nyilalɛ mɔɔ enyia daada nɩ nwʋ.—Ndw. 16:​5, 6.

NYAMƖNLƖ ODWOKƆ

7. Mɩnla ɔhʋanɩ zʋ yɛ sɛ yesuma Bayɩbʋlʋ yɩ a, ɩkɔhʋla kɔwʋwa yɛ ma yekegyina pindinyii a?

⁷ Gyehova va Bayɩbʋlʋ yɩ ma yɛ kɛɛ ɩwʋwá yɛ ma yegyina pindinyii. Ndwokɔ sʋ̃maa wɔ Bayɩbʋlʋ yɩ nu mɔɔ ɩma yenyia anwʋlazʋ kɛɛ Gyehova kɔwʋwa yɛ. Kila nwʋmɔ ndianwʋ ɔkʋ̃. Matiyu 6:8 kã kɛɛ: “Bɛ Zɩ izi mɔɔ mʋnlʋmmɔ behyinyia ansaana bebizia yɩ.” Gyisɛsɩ yɛ ɩhanlɩ ɔzɔ ndwokɔ eyi a, na izi Gyehova bʋwɔ ɩtɛla abiyela. Meti sa yɛkʋla yenyia anwʋlazʋ kɛɛ sɛ yeyiyiaa ndwokɔzɩzɩbɛ a, Gyehova zi mɔɔ yehyinyia na ɩkɔwʋwa yɛ. Gyehova yɩ anʋhʋba sʋ̃maa wɔ Bayɩbʋlʋ yɩ nu mɔɔ ɩkɔhʋla kɛhyɛ yɛ ɛzɩzɩbɛ ma yekegyina ye ndwokɔzɩzɩbɛ munwa pindinyii.—Ndw. 94:19.

8. (a) Mɩnla Bayɩbʋlʋ nu egyinalɛzʋ-odwokɔ yɛ ɩkɔhʋla kɔwʋwa yɛ ma yekegyina ndwokɔzɩzɩbɛ munwa a? (b) Mɩnla yɛ ɩkɔwʋwa yɛ ma yɛkɛhakɛ Bayɩbʋlʋ nu egyinalɛzʋ-odwokɔ mmɩlɩ mɔ yehyinyia a?

⁸ Bayɩbʋlʋ fa fʋlɔdulɛ mɔɔ ɩkɔhʋla kɔwʋwa yɛ ma yekegyina pindinyii ma yɛ. Ozumalɛdɩyɛ mɔɔ ɩwɔ numɔ nɩ kɛma yekenyia nɣɛlɛbɛ mɔɔ yɛkɛva kezizi abɔkɔ baaba. (Ɛɣɛ. 2:​6, 7) Kɛ ndianwʋ nɩ, Bayɩbʋlʋ hyɛ yɛ ɛzɩzɩbɛ kɛɛ yɛvá yɛ nwʋ yediã Gyehova zʋ eɣile bela na máma yɛdwɩnɩndwɩnɩ mɔɔ ikezi wɔ eɣile be nɩ nwʋ sʋ̃maa. (Mt. 6:34) Sɛ yɛta yɛkɩnga Bayɩbʋlʋ yɩ na yɛdwɩnɩndwɩnɩ nwʋmɔ a, ɩlɛ́yɛ sɩ kɛɛ yɛkɛhakɛ fʋlɔdulɛ eyimmɔ mmɩlɩ mɔ yehyinyia nɩ.

9. Mɩnla ɔhʋanɩ zʋ yɛ mmenii mɔɔ bɔ nwʋ ndwokɔ wɔ Bayɩbʋlʋ yɩ nu nɩ hyɛ anwʋlazʋ mɔɔ yɛwɔ kɛɛ Gyehova kɔwʋwa yɛ nɩ nu ɛzɩzɩbɛ a?

⁹ Mmenii mɔɔ bɛdɩ kɛɛ amɩyɛ la mɔɔ bɛvalɩ bɔ nwʋ bedianlɩ Gyehova zʋ ma ɩwʋwalɩ bɛ nɩ sʋ̃ nwʋ ndwokɔ wɔ Bayɩbʋlʋ yɩ nu. (Hib. 11:​32-34; Gye. 5:17) Sɛ yɛdwɩnɩndwɩnɩ bo ndwokɔ yɩ nwʋ a, ɩkɛma anwʋlazʋ mɔɔ yɛwɔ kɛɛ Gyehova yɛ lɛ “yɛ eɣiandilɛhɔlɛdɩka nɩɩ yɛ anwʋzɩzɩbɛ, bʋwavʋlɔ wɔ anwʋhyɩlɩyɛ mmɩlɩ nu” nɩ kɛyɛ kezi. (Ndw. 46:1) Sɛ yɛnwʋ kezimɔ Gyehova yɩ azʋ̃mɩvʋlɔ lili nɔhʋanlɛ na bɔhɔlɩ zʋlɔ bɔzʋ̃mɩnlɩ yɩ ɩávalɩ nwʋmɔ bɛ ndwokɔzɩzɩbɛ nɩ a, ɩhyɛ amɩyɛ sʋ̃ ɛzɩzɩbɛ kɛɛ yɛyɛ́ ɔzɔ la.—Gye. 5:​10, 11.

10. Kɛ ɩkɛyɛ na wʋanyia Bayɩbʋlʋ yɩ zʋ mfasʋ kezile a?

¹⁰ Mɔɔ ɔkɔhʋla kɛyɛ. Kɩnga Bayɩbʋlʋ yɩ eɣile bela, na yɛ ɛhɛlɛlɛ ndwokɔ mɔɔ osunzu kɛɛ ɩkɔwʋwa wʋ nɩ ndwɩ. Mmenii sʋ̃maa nwʋ yɩ kɛɛ sɛ bɛfa awulohyɩnlɩyɛ odwokɔ yɩ nwɔnɩ bela a, ɩma benyia ndwokɔ mɔɔ ɩhyɛ ɛzɩzɩbɛ mɔɔ bɔkɔhʋla kɔdwɩnɩndwɩnɩ nwʋmɔ wɔ eɣile yi nu. Eliyema baalɛ be mɔɔ bɔfʋlɔ yɩ Mariea nwʋnlɩ yɩ kɛɛ odwokɔ eyi dɩ nɔhʋanlɛ mmɩlɩ mɔ yɩ awʋvʋlɔ nyianlɩ kansa nɩ. Ɩka eziyianɩ ɛgyɩkɩ̃ɩ̃ be ma bowu nɩ, mɩnla yɛ ɩwʋwalɩ yɩ ma igyinanlɩ pindinyii mmɩlɩ mɔ nɩ ikilaa bɛ nɩ a? Ɩkã kɛɛ, “nwɔnɩ bela mɩkɩnga awulohyɩnlɩyɛ odwokɔ yɩ na mʋdwɩnɩndwɩnɩ nwʋmɔ. Ɔzɔ mɔɔ mɩyɛlɩ eɣile bela nɩ wʋwalɩ mɩ ma kɛ ankɩ mɩkɛva mɩ adwɩnɩ mikeziye mʋ ndwokɔzɩzɩbɛ zʋ nɩ, mɩva miziyeli Gyehova nɩɩ nninyeni ngɩnlɩma mɔɔ ikile yɛ wɔ yi Odwokɔ yi nu zʋ mfomi.”—Ndw. 61:2.

YƐ ƆHƆNWƲMMƆ DEDIMAA

11. Sɛ yɛdwɩnɩndwɩnɩ kezimɔ ye mmeliyema bekyinaa bo odwohilalɛ yi munwa nɩ nwʋ a, kɛ ɩma yɛ tɩ nɣanlɩ yese a?

¹¹ Gyehova ma yenyia mmeliyemayɛlɛ okuwu mɔɔ ɩkɔwʋwa yɛ ma yekegyina pindinyii. Sɛ yɛnwʋ yɩ kɛɛ “[ye] mmeliyema dedimaa mɔɔ bɔwɔ oyuwadɩ yɩ nu dɩka bela nɩ, bɔnwʋʋ ɔzɔ amanɩyɛ nɩ be” a, ɩma yɛnwʋ yɩ kɛɛ ɩlɛ́kalɩ yɛzayɛ nkʋ̃. (1 Pit. 5:9) Meti sa yɛkʋla yenyia anwʋlazʋ kɛɛ mɔɔ yeyiyiaa nɩ, ye mmeliyema dedimaa be sʋ̃ beyiyia ebiye na bɔhʋla begyina numɔ. Eyi kile kɛɛ amɩyɛ sʋ̃ sa yɛkʋla yekyina numɔ!—Egy. 14:22.

12. Mɩnla ɔhʋanɩ zʋ yɛ ye mmeliyema dedimaa kɔhʋla kɔwʋwa yɛ a, na mɩnla yɛ yɛkɔhʋla kɛyɛ kɛma bɛ a? (2 Kɔlɛntɩmaa 1:​3, 4)

¹² Yɛ ɔhɔnwʋmmɔ dedimaa kɔhʋla koluwa bɛ nyɛlɩyɛ nɩɩ mɔɔ bɛkã zʋ kɛhyɛ yɛ ɛzɩzɩbɛ ma yekegyina ye ndwokɔzɩzɩbɛ munwa. Sʋ̃mavʋlɔ Pɔɔlʋ nwʋnlɩ kɛɛ eyi dɩ nɔhʋanlɛ. Mmɩlɩ mɔ bedianlɩ yɩ fiyiadɩ wɔ yɩ awudo nɩ, nɩ ɩta ɩbʋbɔ bɛzabɛ mɔɔ bɔwʋwalɩ yɩ nɩ bɛ anlima ɩda bɛ asɩ. Bɛyɩkyɩlɩ Pɔɔlʋ yɩ ɛɣɛɛlɛ, bɛhyɛlɩ yɩ ɛzɩzɩbɛ na bɛvalɩ mɔɔ ihyinyia nɩ sʋ̃ bɛmanlɩ yɩ. (Fɩl. 2:​25, 29, 30; Kol. 4:​10, 11) Nnɛ sʋ̃, ye mmeliyema kɔhʋla kɛyɩkyɩ yɛ ɛɣɛɛlɛ na bɛawʋwa yɛ ma yɛagyina yɛ ndwokɔzɩzɩbɛ munwa. Na amɩyɛ sʋ̃ yɛkɔhʋla kɛyɛ ɔzɔ la kɛma bɛ mmɩlɩ mɔ beyiyia ndwokɔzɩzɩbɛ nɩ.—Kɩnga 2 Kɔlɛntɩmaa 1:​3, 4.

13. Mɩnla yɛ ɩwʋwalɩ eliyema baalɛ be mɔɔ bɔfʋlɔ yɩ Maya ma igyinanlɩ pindinyii a?

¹³ Wɔ 2020 nɩ, abolisimaa hɔlɩ eliyema baalɛ be mɔɔ bɔfʋlɔ yɩ Maya mɔɔ ɩwɔ Russia yɩ awudo aɣilemvile nu, na bɔhɔ behilalɩhilalɩ kɛnɩ. Akʋ̃ bɛ nɩɩ yɩ hɔlɩ kɔɔtʋ iluwa yi dedi ti, na nɩ ɩsɛ kɛɛ ikilehile yi dedi nu wɔ kɔɔtʋ yɩ anyunu. Maya kã kɛɛ: “Nɩ mɩvɛ, adwɩnɩndwɩnɩ hyɛ mʋ zʋ, na nɩ mɩ ɛɣɛɛlɛ wɔ paa. Naasʋ̃ mi mmeliyema mmenyia nɩɩ mmaalɛ yɩ vʋlɔlɩ mɩ wɔ foonu zʋ, abiyemmɔ sʋ̃ hɛlɛlɩ mɛsegyi nɩɩ kɛlɛta bɛmanlɩ mɩ. Bɛmanlɩ mʋnwʋnlɩ kɛɛ bɔdɔ mɩ baaba. Nɩ mizi yi dada kɛɛ mmeliyema yɩ dɔ mɩ na bɛdɩ mɩ abusunwa, naasʋ̃ mɔɔ bɛyɛlɩ bɛmanlɩ mɩ wɔ ɔzɔ mmɩlɩ nɩ manlɩ mʋnwʋnlɩ yɩ kɛɛ bɔdɔ mɩ amba.”

14. Kɛ ɩkɛyɛ na yeanyia ye mmeliyema bɔ mmʋwalɩyɛ zʋ mfasʋ mmɩlɩ mɔ yeyiyiaa ndwokɔzɩzɩbɛ nɩ a? (Kila mfonyini yi sʋ̃.)

¹⁴ Mɔɔ ɔkɔhʋla kɛyɛ. Sɛ eyiyiaa ndwokɔzɩzɩbɛ a, ihyinyia paa kɛɛ ɛ nɩɩ wu mmeliyema kɔwɔ nwʋmɔ nkɔmmɔ na bɛawɔ numɔ bɛayɛ dɩyɛ. Áma ɔtwɩnhwɩ̃ wʋ agyia azɩ kɛɛ ekeɣizia asafʋ nu mbanimbani bɔ mmʋwalɩyɛ. Bɔkɔhʋla kɛyɛ “ɛɣɩntanlɛdɩka wɔ anwʋma mmɩlɩ nu, eziyelɛdɩka wɔ ahũmidulɛ mmɩlɩ nu.” (Ayɩ. 32:2) Kakɛ sʋ̃ kɛɛ, wu mmeliyema Kilisinyiamaa sʋ̃ beyiyiaa ndwokɔzɩzɩbɛ. Meti sɛ ɛda kunlumiba ali kile abiye mɔɔ ihyinyia yɩ a, ɩkɛma wʋ anyɩ kele na ɩkɔwʋwa wʋ ma ekegyina wu ndwokɔzɩzɩbɛ munwa pindinyii.—Egy. 20:35.

YƐ ANYƖNLƖLAZƲ

15. Mɩnla ɔhʋanɩ zʋ yɛ eɣile be nwʋ anyɩnlɩlazʋ wʋwalɩ Gyisɛsɩ a, na mɩnla ɔhʋanɩ zʋ yɛ yɛ eɣile be nwʋ anyɩnlɩlazʋ yɩ bʋwa yɛ a? (Hibulumaa 12:2)

¹⁵ Gyehova ma yenyia anyɩnlɩlazʋ baaba be mɔɔ ɩkɔwʋwa yɛ ma yekegyina yɛ ndwokɔzɩzɩbɛ munwa. (Wul. 15:13) Kakɛ kɛɛ, anyɩnlɩlazʋ mɔɔ nɩ Gyisɛsɩ lɛ yɩ nɩ yɛ ɩwʋwalɩ yɩ ma igyinanlɩ pindinyii mmɩlɩ mɔ nɩ ɩwɔ azɩlɛ yɩ zʋ nɩ a. (Kɩnga Hibulumaa 12:2.) Nɩ Gyisɛsɩ zi kɛɛ, sɛ idi nɔhʋanlɛ a ɩkɔwʋwa ma Gyehova dima nwʋ kɛdɩ. Akʋ̃ sʋ̃, nɩ Gyisɛsɩ ikilaa ɔhʋanɩ kɛɛ ikezia kɔhɔ yɩ Zɩ kɛnɩ wɔ sʋlɔ, nɩɩ mmɩlɩ mɔ ɩ nɩɩ mmenii 144,000 yɩ keli dɩyɛ nɩ. Ɔzɔ la yɛ anyɩnlɩlazʋ mɔɔ yɛwɔ kɛɛ yɛkɔwʋwa azɩ daabaa wɔ Nyamɩnlɩ yi oyuwadɩ fʋlɔ yi nu eɣile be nɩ bʋwa yɛ ma yekyina ndwokɔzɩzɩbɛ mɔɔ Setanɩ oyuwadɩ fa ba yɛ zʋ nɩ munwa a.

16. Mɩnla ɔhʋanɩ zʋ yɛ anyɩnlɩlazʋ wʋwalɩ eliyema baalɛ be ma igyinanlɩ pindinyii a, na mɩnla yɛ osuma wɔ mɔɔ ɩhanlɩ yɩ nu a?

¹⁶ Kila kezimɔ oyuwadɩ fʋlɔ yɩ nwʋ anyɩnlɩlazʋ yɩ wʋwalɩ eliyema baalɛ be mɔɔ ɩwɔ Russia mɔɔ bɔfʋlɔ yɩ Anna nɩ. Bɛhyɩlɩ yi hũ bedianlɩ numɔ mmɩlɩ mɔ nɩ belédili yi odwokɔ. Odwokɔ eyi zili nɩ, Anna hanlɩ kɛɛ: “Mʋwɔlɩ mpayɩ mʋdwɩnɩndwɩnlɩ eɣile be nwʋ anyɩnlɩlazʋ yɩ nwʋ. Eyi ɩáma mi padi kolɔ sʋ̃maa. Mizi kɛɛ dɩyɛ baaba be la mɩ anyunu. Gyehova keli nkunimi na ikeyila yɛ.”

17. Kɛ ɩkɛyɛ na yɛahile kɛɛ yɛ anyɩ sɔ anyɩnlɩlazʋ mɔɔ Gyehova ma yenyia nɩ a? (Kila mfonyini yi sʋ̃.)

¹⁷ Mɔɔ ɔkɔhʋla kɛyɛ. De mmɩlɩ na dwɩnɩndwɩnɩ eɣile be kɩnlɩma mɔɔ Gyehova va wɔ wʋ anʋhʋba nɩ nwʋ. Tua nwʋmɔ mfonyini kɛɛ ɔwɔ oyuwadɩ fʋlɔ yi nu nɩɩ nyilalɛ mɔɔ ekenyia. Na ɩkɛma ndwokɔzɩzɩbɛ bela mɔɔ yeyiyiaa wɔ nnɛ nɩ kɛyɛ ‘ɛyɛkɛ ɛgyɩkɩ̃ɩ̃ mɔɔ yɛtɩɩ yɩ sikalɛpɛyɩ yɩ.’ (2 Kɔl. 4:17) Akʋ̃ sʋ̃, bɔ́ mmɔdɩnɩ kɛɛ ɛkɛhã wu dedi nwʋ odwokɔ kehile mmenii mvʋlɔ. Dwɩnɩ kezimɔ ɛbɩlawɔlɛ yɛ sɩ ma bɛzabɛ mɔɔ bɛázʋ̃mɩ Gyehova nɩ nwʋ. Bɛzabɛ sʋ̃ beyiyiaa ndwokɔzɩzɩbɛ, naasʋ̃ bézi kɛɛ Nyamɩnlɩ wɔ anʋhʋba kɩnlɩma be yɛ. Meti, sɛ ɛ nɩɩ bɛ bɔ Gyehova yi Bulombunlililɛ nwʋ nkɔmmɔ ɛgyɩkɩ̃ɩ̃ po a, ɩkɛma bɛkɛbɛ yɩ kɛɛ bɔkɔnwʋ sʋ̃maa bɛkɛvalɩ nwʋmɔ.

18. Mɩnla ti mɔɔ yɛkɔhʋla kɛva yɛ nwʋ kediã Gyehova yɩ anʋhʋba azʋlɔtʋ yɩ zʋ a?

¹⁸ Mmɩlɩ mɔ Dwoobu valɩ nɔhʋanlɛlilɛ gyinanlɩ ndwokɔzɩzɩbɛ sʋ̃maa nu mɛda nɩ, ɩhanlɩ kɛɛ: “Sikalɛpɛyɩ mʋnwʋ yɩ kɛɛ ɔkʋla ɛyɛ dɩyɛ bela na dɩyɛ bela mɔɔ ɔwɔ wu ti nu kɛɛ ɛkɛyɛ nɩ, ɔkʋla ɛyɛ.” (Dwb. 42:2) Dwoobu zumanlɩ kɛɛ debe la íni kɛnɩ mɔɔ ɩkɔhʋla kezi Gyehova yɩ ɔhʋanɩ kɛɛ ɩkɛma yɩ anʋhʋba kɛɣa numɔ. Ɔzɔ nɔhʋanlɛ odwokɔ yɩ kɔhʋla kɛhyɛ yɛ ɛzɩzɩbɛ ma yekegyina pindinyii. Bɛmá yɛyɛ ndianwʋ be. Fa yɩ kɛɛ baalɛ be mɔɔ yɩ nwʋ ba yɩ padi golɔ iluwakɛɛ ɩhɔ alɔkɩtamaa sʋ̃maa bɛ kɛnɩ naasʋ̃ bɛáhʋla bɛsa yɩ adimakɛlɛ. Naasʋ̃ sɛ inyia dɔkɩta be mɔɔ izi egyima paa ma ɩkã dɩyɛ pɔkyɩɩ mɔɔ ɩyɛ yɩ, nɩɩ kezimɔ ɩkɛza yɩ adimakɛlɛ a, yɩ ahʋnlɩnɩ kɔdɔ yi kunlu ɩávalɩ nwʋmɔ kɛɛ ikele mmɩlɩ ɛgyɩkɩ̃ɩ̃ ansaana yɩ nwʋ ɩdɔ yɩ nɩ. Akʋ̃ dɩyɛ sa ɩkʋla ikyina pindinyii, iluwakɛɛ ɩwɔ anyɩnlɩlazʋ baaba be, mɛyɩ yɛ lɛ kɛɛ ɩkɛdɩ pɔkɔ. Ɔzɔ la sʋ̃ yɛ anyɩnlɩlazʋ mɔɔ yɛwɔ kɛɛ Paladayɩsɩ kɛɣa nɩ, ɩbʋwa yɛ ma yekyina pindinyii.

19. Mɩnla yɛ yehyinyia na ama yɛahʋla yɛagyina pindinyii a?

¹⁹ Kɛmɔ yɛnwʋ yɩ nɩ, Gyehova bʋwa yɛ ma yekyina pindinyii iluwa mpayɩwɔlɛ, yi Odwokɔ, yɛ ɔhɔnwʋmmɔ dedimaa, nɩɩ yɛ anyɩnlɩlazʋ yɩ zʋ. Sɛ yɛfa yi munwatĩĩ yedi egyima a, Gyehova kɔwʋwa yɛ ma yekegyina atɩɩtɩɩ bela mɔɔ yekeyiyia nɩ munwa kɔbʋmɩ kɛɛ Setanɩ oyuwadɩ eyi nɩɩ amanɩyɛnwʋnlɛ munwala kɛɣa awielɩyɛ.—Fɩl. 4:13.