Asʋ̃ Gyehova Kediye Mɩ Mpayɩ a?

1-2. Mɩnla ti mɔɔ ebiye a yɛkɛdɩ nɣanlɩ kɛɛ Gyehova iádiye yɛ mpayɩ a?

“DI FƐLƐKƲ̃ kezile wɔ Gyehova nu na ɩkɛva mɔɔ ɩla wʋ ahʋnlɩnɩ zʋ ɩkɛma wʋ.” (Ndw. 37:4) Kila kezimɔ anʋhʋba eyi kã ahʋnlɩnɩ! Naasʋ̃ ɩsɛ kɛɛ yekila ɔhʋanɩ kɛɛ, Gyehova kɛva mɔɔ yebizia bela kɛma yɛ wɔ kɛnɩ la a? Mɩnla ti mɔɔ odwokɔɣizialɛ eyi nwʋ hyinyia a? Bɛmá yezunzu bʋwabɩlɛ azʋlɔtʋ eyi nwʋ. Eliyema baalɛ sigyianii be ɩbɔ mpayɩ kɛɛ bɔdʋ́ salɛ bɔvʋlɔ yɩ ma ɩhɔ Odwokɔbadɛlɛlɛmaa Sukuulu yi be. Alʋbɔ sʋ̃maa dua nu naasʋ̃ bɔlɔ́fʋlɔlɩ yɩ. Eliyema abɩlantɩyɛ be bɔ mpayɩ kɛɛ Gyehova ɩyɩ́ adimakɛlɛ ɛyɛlɛ ɛyɛlɛ be wɔ yɩ zʋ ama ɩahʋla ɩayɛ sʋ̃maa wɔ asafʋ yi nu. Naasʋ̃ yɩ nwʋ ɩádɔ yɩ kyɩ̃. Awʋvʋlɔ be bɔ mpayɩ kɛɛ Gyehova ɩwʋwa bɛ ɣa ma ɩhɔlɩ zʋlɔ ɩwʋwa nɔhʋanlɛ yɩ nu. Naasʋ̃ kuakula yɩ yiaki Gyehova yɩ ɔzʋ̃mɩnlɛ.

² Ebiye a wʋzawʋ sʋ̃ eɣizia debe wɔ Gyehova kɛ, naasʋ̃ wʋ sa ɩlɛ́kanlɩ. Eyi ti ebiye a ekenyia adwɩnɩ kɛɛ Gyehova tiye abiyemmɔ bɛ mpayɩ naasʋ̃ iádiye wʋ dɩyɛ yɩ. Anzɛnyɩɩ ebiye a ekenyia adwɩnɩ kɛɛ ɛyɛ tanɩ be. Eliyema baalɛ be mɔɔ bɔfʋlɛ yɩ Janiceb dɩlɩ nɣanlɩ zɔ. Nɩ ɩ nɩɩ yi hũ pɛ kɛɛ bɔkɔ bɔsʋ̃mɩ wɔ Bɛtɩlɩ, meti bɔwɔlɩ mpayɩ kɛɛ Gyehova ɩwʋwa bɛ. Ɩhanlɩ kɛɛ: “Nɩ mide midi paa kɛɛ ɩlɛ́kyɛ na ɩahɔ ɩazʋ̃mɩ wɔ Bɛtɩlɩ.” Naasʋ̃ alʋbɔ sʋ̃maa dualɩ numɔ mɔɔ nɩ bɔlɔ́fʋlɔlɩ agyiahʋnlɩmaa yɩ. Janice hanlɩ kɛɛ: “Mɩ ɛɣɛɛlɛ wɔlɩ na mɩadwɩnɩ duli vʋlalɩ. Nɩ ɩyɛ mɩ kɛɛ gyama mɩyɛ debe midiya Gyehova. Nɩ mɩhyɛda mʋwɔ nwʋmɔ mpayɩ mbɔmɩ sʋ̃maa kɛɛ, mʋkɔhɔ mʋkɔzʋ̃mɩ wɔ Bɛtɩlɩ. Meti, mɩnla ti mɔɔ dadampɔ yɩ ilétiyeli mɩ mpayɩ yɩ a?”

3. Mɩnla yɛ yɛbazunzu nwʋmɔ a?

³ Ɩyɛ a, ebiye a yekenyia adwɩnɩ kɛɛ gyama Gyehova ɩádɩ mpayɩ mɔɔ yɛbɔ nɩ. Nɔhʋanlɛmaa mɔɔ bɔwʋwalɩ azɩ wɔ ɔwɔkɩ mmɩlɩ nu po, bo nu be dɩlɩ nɣanlɩ zɔ. (Dwb. 30:20; Ndw. 22:2; Hab. 1:2) Kɛ ɩkɛyɛ na wʋanyia anwʋlazʋ kɛɛ Gyehova tiye wʋ mpayɩ a? (Ndw. 65:2) Mɔɔ ɩkɔwʋwa ma ekenyia eyi nwʋ munwalɩyɛ nɩ, ma yelí bɔmʋnlɩ yezunzu nninyeni asã eyimmɔ nwʋ: (1) Mɩnla yɛ Gyehova kɛyɛ a? (2) Mɩnla yɛ Gyehova pɛ kɛɛ yɛyɛ a? (3) Mɩnla ti mɔɔ ebiye a nwʋmɔ kehyinyia kɛɛ yɛyɛ yɛ dɩyɛzianlɛ yi nu nzɩnzanlɩyɛ a?

MƖNLA YƐ GYEHOVA KƐYƐ A?

4. Kɛmɔ Gyɛlɩmaya 29:12 kã nɩ, mɩnla yɛ Gyehova wɔ anʋhʋba kɛɛ ɩkɛyɛ a?

⁴ Gyehova bɔ anʋhʋba kɛɛ ikediye yɛ mpayɩ. (Kɩnga Gyɛlɩmaya 29:12.) Yɛ Nyamɩnlɩ yɩ ɩdɔ yɩ azʋ̃mɩvʋlɔ nɔhʋanlɛmaa, meti ilóbu yɩ anyɩ ikogua bɔ mpayɩ zʋ kyɩ̃. (Ndw. 10:17; 37:28) Naasʋ̃ eyi iáhile kɛɛ dɩyɛ bela mɔɔ yekeɣizia nɩ, ɩkɛyɛ ɩkɛma yɛ. Ebiye a ikehyinyia kɛɛ yɛkɛlɩkɛ kɔbʋmɩ oyuwadɩ fʋlɔ yɩ nu ansaana yɛ sa ɩahã nwʋmɔ munwalɩyɛ.

5. Mɩnla yɛ Gyehova sunzu nwʋmɔ ansaana iadiye yɛ mpayɩwɔlɛ a? Kilehile numɔ.

⁵ Gyehova kila kezimɔ yɛ mpayɩ nɩ falɩ yi tile nu pɔkɔ nwʋ. (Ayɩ. 55:​8, 9) Ɔzɔ tile nu pɔkɔ yɩ be yɛ lɛ kɛɛ mmenii mɔɔ bɛyɛ ɔkʋ̃ mɔɔ bɛfa anyɩnlɩlelɛ betiye yɩ nɩ kɛhyɛ azɩlɛ yɩ zʋ manlɩ. Naasʋ̃ Setanɩ kile kɛɛ sɛ adasamaa bɛzabɛ bedi bɔ nwʋ zʋ a, ikezi bɔ bʋwɔ. (Gyn. 3:​1-5) Mɔɔ ɩkɛyɛ na yɛanwʋ kɛɛ mɔɔ Abɔnsamɩ hanlɩ nɩ ɩ́dɩ nɔhʋanlɛ nɩ, Gyehova ma ɔhʋanɩ ma mmenii bedii bɔ nwʋ zʋ. Naasʋ̃ adasamaa bo tumililɛ nɩ ɩva ɔhawʋ sʋ̃maa ɩɣa azɩlɛ yɩ zʋ. (Odw. 8:9) Yezi kɛɛ Gyehova ɩlɛ́yɩ ɔhawʋ eyi munwatĩĩ wɔ kɛnɩ kakɩ yɩ. Iluwakɛɛ sɛ ɩyɛ zɔ a abiyemmɔ kɔhʋla kenyia adwɩnɩ kɛɛ adasamaa di bɔ nwʋ zʋ a, isi bɔ bʋwɔ amba.

6. Mɩnla ti mɔɔ ɩsɛ kɛɛ yenyia anwʋlazʋ kɛɛ Gyehova kɛyɛ yɩ dɩyɛ wɔ ɔlɔlɛ nɩɩ ɛdɩnɣɛlɛ ɔhʋanɩ zʋ a?

⁶ Sɛ mmenii sʋ̃maa bɔ dɩyɛ ɔkʋ̃ nwʋ mpayɩ a, ebiye a ɔsʋnɩ kezimɔ Gyehova keli numɔ bela nwʋ egyima. Kɛ ndianwʋ nɩ, mmɩlɩ mɔ Bulombunli Hɛzɩkaya nwʋ balɩ yɩ kezile nɩ, izianlɩ Gyehova kɛɛ ɩzá yɩ adimakɛlɛ. Na Gyehova sʋ̃ ɩzalɩ yɩ adimakɛlɛ. (2 Aw. 20:​1-6) Naasʋ̃ mmɩlɩ mɔ sʋ̃mavʋlɔ Pɔɔlʋ wɔlɩ Gyehova mpayɩ kɛɛ ɩyɩ́ “debe mɔɔ iwula yɩ nnwʋnlamɩ nu mɔɔ ɩma ɩtɩ ɛyɛkɛ,” mɔɔ ebiye a nɩ ɩdɩ adimakɛlɛ nɩ, Gyehova ɩáyɛ. (2 Kɔl. 12:​7-9) Akʋ̃ sʋ̃, bɛmá yehila sʋ̃mavʋlɔ Gyemisi nɩɩ Pita be ndianwʋ yɩ. Nɩ Bulombunli Hɛlɔdʋ ɩpɛ kɛɛ ikũ bɛzabɛ anwɩ̃ yɩ. Asafʋ yɩ wɔlɩ mpayɩ manlɩ Pita na ebiye a bɔwɔlɩ ebiye bɛmanlɩ Gyemisi sʋ̃. Naasʋ̃ bohunli Gyemisi na Pita mɛyɩ bɔvʋlɔ be ɩɣa ileli yi. (Egy. 12:​1-11) Ebiye a yekeɣizia yɛ nwʋ kɛɛ, ‘Mɩnla ti mɔɔ Gyehova leli Pita na iáde Gyemisi yɩ a?’ Bayɩbʋlʋ yɩ ɩáhã.c Naasʋ̃ yɛkɔhʋla yekenyia anwʋlazʋ kɛɛ “ndɛnɩhyɩyɩalɛ bela” íni yɩ ɔhʋanɩ nu. (Dit. 32:4) Yezi kɛɛ nɩ Gyehova dɔ Pita nɩɩ Gyemisi munwala. (Yik. 21:14) Ɩyɛ a Gyehova ilóbuwa yɛ mpayɩwɔlɛ nɩ kezimɔ yekilaa yɩ ɔhʋanɩ. Naasʋ̃ iluwakɛɛ yede yedi kɛɛ Gyehova zʋ̃ ɔlɔlɛ nɩɩ ɛdɩnɣɛlɛ nu kowuwa yɛ mpayɩ nɩ ti, ɩádɩndɛ yetiyia ɔhʋanɩ mɔɔ iduwa zʋ ibuwa yɛ mpayɩ nɩ.—Dwb. 33:13.

7. Mɩnla yɛ íni kɛɛ yɛyɛ a, na mɩnla ti a?

⁷ Ɩsɛ kɛɛ yɛbɔ mmɔdɩnɩ kɛɛ yɛlɛ́fa yɛ bʋwabɩlɛ yekedindiã mvʋlɔ bɛ dɩyɛ nwʋ. Kɛ ndianwʋ nɩ, ebiye a yekeziã Gyehova kɛɛ ɩwʋwa yɛ wɔ ɔhʋanɩ pɔkyɩɩ be zʋ, naasʋ̃ yɛ sa ɩlɛ́kã mɔɔ yɛwɔlɩ nwʋmɔ mpayɩ yɩ. Aɣinzi yi yɛkɛdɩ nɩ, nɩ abiye ɣizia ɔzɔ dɩyɛ ɔkʋ̃ yɩ la be, naasʋ̃ nɩ Gyehova ɩyɛ ɩma yɩ. Eyi be dʋlɩ eliyema baalɛ be mɔɔ bɔfʋlɔ yɩ Anna. Ɩwɔlɩ mpayɩ kɛɛ Gyehova ɩzá yi hũ Matthew mɔɔ ɩwɔ kansa nɩ adimakɛlɛ. Wɔ ɔzɔ mmɩlɩ yɩ nu la, nɩ kansa ididee mmeliyema mmaalɛ anwɩ̃ be sʋ̃. Anna wɔlɩ mpayɩ ɛzɩzɩbɛ ɛzɩzɩbɛ manlɩ yi hũ Mattew nɩɩ mmeliyema mmaalɛ anwɩ̃ yɩ. Mmeliyema mmaalɛ anwɩ̃ yɩ dɩlɩ pɔkɔ naasʋ̃ Mattew mɛyɩ, iwuli. Bɔmʋnlɩ nɩ, Anna nyianlɩ adwɩnɩ kɛɛ Gyehova yɛ ɩwʋwalɩ mmeliyema mmaalɛ anwɩ̃ yɩ ma bɔ nwʋ dɔlɩ bɛ a. Na sɛ ɔzɔ a, mɩnla ti mɔɔ iátiye mpayɩ mɔɔ ɩwɔlɩ kɛɛ ɩma yi hũ nwʋ ɩdɔ yɩ nɩ a? Nɔhʋanlɛ nu nɩ, yézi sianti mɔɔ mmeliyema mmaalɛ anwɩ̃ yɩ bɔ nwʋ dɔlɩ bɛ. Naasʋ̃ yezi kɛɛ Gyehova kɛyɩ yɛ amanɩyɛnwʋnlɛ munwatĩĩ wɔ kɛnɩ, na yɩ ɛɣɛɛlɛ dɔ paa kɛɛ ikodunwo yɩ ɔhɔnwʋmmɔ mɔɔ bowuwu nɩ.—Dwb. 14:15.

8. (a) Kɛmɔ Ayɩzaya 43:2 kile nɩ, mɩnla ɔhʋanɩ zʋ yɛ Gyehova bʋwa yɛ a? (b) Mɩnla ɔhʋanɩ zʋ yɛ mpayɩwɔlɛ kɔhʋla kɔwʋwa yɛ mmɩlɩ mɔ yeyiyiaa odwohilalɛ nɩ a? (Kila vidiyo mɔɔ ise Mpayɩwɔlɛ Ɩbʋwa Yɛ Ma Yekyina Ye Ndwokɔzɩzɩbɛ Yi Munwa.)

⁸ Gyehova kɔwʋwa yɛ mmɩlɩ munwala. Kɛ Ɛzɩlɛ mɔɔ ɩwɔ ɔlɔlɛ nɩ, Gyehova anyɩ iáleli nwʋmɔ kɛɛ ɩkɔnwʋ kɛɛ yɛnwʋʋ amanɩyɛ. (Ayɩ. 63:9) Ɩwɔ numɔ, kɛ mmɩlɩ munwala yɛ ɩbɔ yɛ nwʋ banɩ wɔ ye odwohilalɛ mɔɔ ɩdɩ kɛɛ nzulo anzɛnyɩɩ sɩnɩ nɩ nwʋ a. (Kɩnga Ayɩzaya 43:2.) Naasʋ̃ ɩbɔ anʋhʋba kɛɛ ɩkɛma anwʋzɩzɩbɛ yɛ ma yɛkɛva “yekoluwa numɔ.” Na ɩávalɩ nwʋmɔ odwohilalɛ bela mɔɔ yekeyiyia yɩ kakɩ nɩ, ɩkɔhɔ zʋ ɩkɔwʋwa yɛ na ama yɛ nɩɩ yɩ avinli abusunwawɔlɛ nɩ ɩázɩkɛlɩ. Gyehova iduwa yɩ sunzuma nwanzanwanza yi tumi zʋ ɩbʋwa yɛ ma yekyina pindinyii. (Lk. 11:13; Fɩl. 4:13) Iluwa eyi ti sa yɛkʋla yenyia anwʋlazʋ kɛɛ, yɛ sa kɛhã mmʋwalɩyɛ pɔkyɩɩ mɔɔ yehyinyia na ama ɩahʋla yeagyina pindinyii na ɩahɔ zʋ ɩava nɔhʋanlɛlilɛ ɩazʋ̃mɩ yɩ.d

MƖNLA YƐ GYEHOVA PƐ KƐƐ YƐYƐ A?

9. Mɩnla ɔhʋanɩ zʋ yɛ Gyemisi 1:​6-8 ɩbʋwa yɛ ma yɛnwʋ sianti mɔɔ ɩsɛ kɛɛ yenyia anwʋlazʋ kɛɛ Gyehova kɔwʋwa yɛ a?

⁹ Gyehova pɛ kɛɛ yede yi yedi. (Hib. 11:6) Ɩyɛ a, sa yɛkʋla yɛtɩ nɣanlɩ kɛɛ, ye ndwokɔzɩzɩbɛ be wɔ kɛnɩ a yɛlɔ́kʋla yekegyina yi munwa kyɩ̃. Na ebiye a yɛkɔwɔ yɩ tʋ yekenyia adwɩnɩ be kɛɛ, gyama Gyehova ɩlɔ́kʋla ɩkɔwʋwa yɛ po. Naasʋ̃ Bayɩbʋlʋ yɩ hyɛ yɛ ɛzɩzɩbɛ kɛɛ, Nyamɩnlɩ kɛma anwʋzɩzɩbɛ mɔɔ yɛkɔhʋla kɛva “kɔvʋ banɩ.” (Ndw. 18:29) Meti kɛ ankɩ yɛkɛma yɛ adwɩnɩ kɛyɛ yɛ anwɩ̃ anwɩ̃ nɩ, ɩsɛ kɛɛ yɛfa dedi kezile yɛbɔ mpayɩ, na yenyia anwʋlazʋ kɛɛ Gyehova kediye yɛ mpayɩwɔlɛ nɩ.—Kɩnga Gyemisi 1:​6-8.

10. Ma ndianwʋ fa kile mɔɔ ɩsɛ kɛɛ yɛyɛ mmɩlɩ mɔ yeziã Gyehova kɛɛ ɩwʋwa yɛ wɔ debe nu nɩ.

¹⁰ Gyehova pɛ kɛɛ yɛyɛ yɛ mpayɩ nwʋ egyima. Kɛ ndianwʋ nɩ, ebiye a eliyema be kɔwɔ mpayɩ kɛɛ Gyehova ɩwʋwa yɩ ma bɛma ɔhʋanɩ yɩ wɔ yɩ egyima yi nu na ama ɩahʋla ɩahɔ manlɩ-avinli ayiyialɩyɛ. Mɩnla yɛ ebiye a Gyehova kɛyɛ kɛva kowuwa ɔzɔ mpayɩ nɩ a? Ebiye a ɩkɛma eliyema yɩ akɛnɣazɩzɩbɛ mɔɔ ihyinyia na ɩahʋla ɩahã nwʋmɔ odwokɔ iahile yi egyima niibenyia. Naasʋ̃ ikehyinyia kɛɛ eliyema yɩ yɩzayɩ ɩkɔ yi egyima niibenyia yɩ kɛnɩ ɩkɔ isiã ɔhʋanɩ. Ebiye a ikehyinyia kɛɛ ibizia yɩ mbɔmɩ sʋ̃maa. Na sɛ ɩkɛyɛ bʋwɔ po a, ɩ nɩ yɩ ɔhɔnwʋ egyimayɛlɛnii be bɛazɩnza eɣile mɔɔ bɛfa bɛyɛ egyima yɩ. Anzɛnyɩɩ ebiye a ɩkɛhã kɛɛ ɔzɔ eɣile yi mɔɔ ɩlɛ́ba egyima yɩ, bɛdɩ́ wɔ yɩ akatuwa nu.

11. Mɩnla ti mɔɔ ɩsɛ kɛɛ yɛkɔ zʋlɔ yɛbɔ mɔɔ ihyinyia yɛ nɩ nwʋ mpayɩ a?

¹¹ Gyehova pɛ kɛɛ yɛkɔ zʋlɔ yɛbɔ mɔɔ ihyinyia yɛ nɩ nwʋ mpayɩ. (1 Tɛs. 5:17) Gyisɛsɩ hanlɩ kɛɛ yɛ dɩyɛzianlɛ be wɔ kɛnɩ a, yelényia nwʋmɔ munwalɩyɛ wɔ kɛnɩ la. (Lk. 11:9) Meti máma wʋ padi kolɔ! Ɔzʋ̃ wʋ ahʋnlɩnɩ nu bɔ mpayɩ mbɔmɩ sʋ̃maa. (Lk. 18:​1-7) Sɛ yɛkɔ zʋlɔ yɛbɔ debe nwʋ mpayɩ a, ɩma Gyehova nwʋ kɛɛ dɩyɛ ɔkʋ̃ nɩ nwʋ hyinyia yɛ baaba. Akʋ̃ sʋ̃ ikile kɛɛ yɛwɔ yi nu dedi kɛɛ ɩkɔhʋla ɩkɔwʋwa yɛ.

MINLA TI MƆƆ EBIYE A IKEHYINYIA KƐƐ YƐYƐ NZƖNZANLƖYƐ WƆ MƆƆ YƐBƆ NWƲMƆ MPAYƖ NƖ NU A?

12. (a) Mɩnla yɛ ɩsɛ kɛɛ yebizia yɛ nwʋ a, na mɩnla ti a? (b) Kɛ ɩkɛyɛ na yɛahile kɛɛ yebu Gyehova mmɩlɩ mɔ yɛbɔɔ mpayɩ nɩ a? (Kila alɩka mɔɔ ise “Asʋ̃ Mɩ Mpayɩwɔlɛ Kile Kɛɛ Mubu Gyehova a?”)

¹² Sɛ yɛbɔ mpayɩ na sɛ yeányia nwʋmɔ munwalɩyɛ a, ebiye a yekeɣizia yɛ nwʋ ndwokɔ asã eyimmɔ. Mɔɔ ili bɔmʋnlɩ, ‘Asʋ̃ mɔɔ mihyinyia ankasa yɛ mʋbɔɔ nwʋmɔ mpayɩ a?’ Mbɔmɩ sʋ̃maa nɩ, yɛ adwɩnɩ yɛ yɛ kɛɛ yezi mɔɔ ɩdɩ baaba ɩma yɛ. Naasʋ̃ nninyeni mɔɔ yebizia nɩ, kɛ mɛyɩ yɛ ɩkɔwʋwa yɛ ankasa. Ebiye a nɩ yɛbɔɔ mpayɩ kɛɛ Gyehova ɩwʋwa yɛ ma yelí yɛ ɔhawʋ be nwʋ egyima wɔ ɔhʋanɩ pɔkyɩɩ be zʋ. Naasʋ̃ ebiye a nɩ ɔhʋanɩ baaba be wɔ kɛnɩ mɔɔ yekoluwa zʋ yekeli nwʋmɔ egyima. Nninyeni mɔɔ yɛbɔ nwʋmɔ mpayɩ nɩ, ebiye wɔ kɛnɩ a ɩ nɩɩ Gyehova yɩ apɛdɩ iáyia. (1 Dwɔ. 5:14) Kɛ ndianwʋ nɩ, bɛmá yehila awʋvʋlɔ mɔɔ yeli bɔmʋnlɩ yɛhã bɔ nwʋ odwokɔ yɩ. Bezianlɩ Gyehova kɛɛ ɩwʋwá bɛ ɣa yɩ ma ɩwʋwa nɔhʋanlɛ yɩ nu. Ebiye a ɩkɛyɛ yɛ kɛɛ dɩyɛzianlɛ eyi ɩdɩ yɩ ɔhʋanɩ zʋ. Naasʋ̃, odwokɔ yɩ yɛ lɛ kɛɛ Gyehova ɩáhyɛ ye nu bela kɛɛ yɛzʋ̃mɩ yɩ. Ɩpɛ kɛɛ yɛ nɩɩ ye nnwuakula munwala yesi pɔkɔ kɛɛ yɛkɔzʋ̃mɩ yɩ. (Dit. 10:​12, 13; 30:​19, 20) Meti ankɩ awʋvʋlɔ yɩ kɔhʋla keziã Gyehova kɛɛ, ɩwʋwá bɛ ma behilehile bɛ ɣa yɩ bʋwɔ, na ɩahã yɩ ma ɩalɔ Gyehova na ɩava yɩ ɔhɔnwʋ.—Ɛɣɛ. 22:6; Ɛfɩ. 6:4.

13. Kɛmɔ Hibulumaa 4:16 kile nɩ, mɩnla mmɩlɩ yɛ Gyehova kɔwʋwa yɛ a? Kilehile nu.

¹³ Mɔɔ ɩtɔ zʋlɔ anwɩ̃ yɛ lɛ kɛɛ, ‘Asʋ̃ ɩdɩ mmɩlɩ mɔɔ ɩfata kɛɛ Gyehova kowuwa mɩ mpayɩ a?’ Ebiye a yɛkɛdɩ nɣanlɩ kɛɛ yehyinyia yɛ mpayɩ yɩ nwʋ munwalɩyɛ ndɛndɛ zʋ. Naasʋ̃ Gyehova izi mmɩlɩ mɔ ɩfata kɛɛ ɩbʋwa yɛ. (Kɩnga Hibulumaa 4:16.) Naasʋ̃ sɛ yeányia nwʋmɔ munwalɩyɛ wɔ kɛnɩ la a, yekenyia adwɩnɩ kɛɛ Gyehova iátiye. Naasʋ̃ ebiye a nɩ Gyehova pɛ kɛɛ yɛdɩkɛ ɛgyɩkɩ̃ɩ̃. Kɛ ndianwʋ nɩ, kakɛ eliyema mɔɔ izianlɩ Gyehova kɛɛ ɩzá yɩ adimakɛlɛ nɩ. Sɛ Gyehova luwalɩ nnwʋánlɩ ɔhʋanɩ zʋ zalɩ yɩ adimakɛlɛ a, ankɩ Setanɩ kɔhʋla kɛhã kɛɛ iluwakɛɛ Gyehova zalɩ yɩ adimakɛlɛ yi ti mɔɔ ɩsʋ̃mɩɩ yɩ a. (Dwb. 1:​9-11; 2:4) Akʋ̃ sʋ̃, Gyehova wɔ mmɩlɩ mɔ ɩkɛva ɩkɛyɩ ɔhawʋ munwatĩĩ wɔ kɛnɩ. (Ayɩ. 33:24; Yik. 21:​3, 4) Kɔbʋmɩ kɛɛ ɔzɔ mmɩlɩ yɩ kɛɣa nɩ íni kɛɛ yekila ɔhʋanɩ kɛɛ Gyehova kɛza yɛ adimakɛlɛ wɔ nnwʋánlɩ ɔhʋanɩ zʋ. Meti ankɩ eliyema yɩ kɔhʋla keziã Gyehova kɛɛ ɩma anwʋzɩzɩbɛ yɩ, na ɩma yɩ adwɩnɩ igyina na ɩahʋla iagyina yɩ adimakɛlɛ yɩ yi munwa, na ɩahɔ zʋ ɩazʋ̃mɩ Gyehova wɔ nɔhʋanlɛlilɛ nu.—Ndw. 29:11.

14. Mɩnla yɛ osuma wɔ Janice yi ozumanlɛnwʋnlɛ yi nu a? (Kila mfonyini yi sʋ̃)

¹⁴ Bɛmá yezunzu Janice mɔɔ ɩwɔlɩ mpayɩ kɛɛ ɩkɔhɔ ɩkɔzʋ̃mɩ wɔ Bɛtɩlɩ yɩ odwokɔ yɩ nwʋ ɛgyɩkɩ̃ɩ̃. Alʋbɔ anlu dualɩ numɔ ansaana ɩbanwʋ kɛɛ ntʋlɔnkʋdɩ Gyehova diyeli yɩ mpayɩ. Ɩhanlɩ kɛɛ: “Gyehova valɩ ɔzɔ mmɩlɩ nɩ ɩwʋwalɩ mɩ ma muzumanlɩ nninyeni sʋ̃maa na mɩɣa mɩyɛlɩ Kilisinyianii baaba. Nɩ ihyinyia kɛɛ minyia dedi kezile wɔ yi nu. Nɩ ɩsɛ kɛɛ mutu mpʋnɩ wɔ mɩzamɩ mɩ dɩyɛzumanlɛ nu. Akʋ̃ sʋ̃ muzumanlɩ kɛɛ sa mʋkʋla minyia anyɩnlɩlelɛ ɩávalɩ nwʋmɔ dɩka bela mɔɔ mʋsʋ̃mɩɩ Gyehova nɩ.” Aɣinzi yi, bɔdʋlɩ salɛ bɔvʋlɔlɩ Janice nɩɩ yi hũ kɛɛ bɔhɔ bɛyɛ mansini egyima yɩ. Kakɩ yɩ, Janice kã kɛɛ: “Gyehova diyeli mɩ mpayɩ, naasʋ̃ nɩ ɩ́dɩ kezimɔ mikilaa yɩ ɔhʋanɩ nɩ. Ileli mmɩlɩ ɛgyɩkɩ̃ɩ̃ ansaana mɩbanwʋ kɛɛ, kezimɔ Gyehova wuwalɩ yɛ mpayɩ nɩ, ɩdɩ akyɛdɩ na mɩ anyɩ sɔ ɔlɔlɛ nɩɩ kunlumiba mɔɔ ɩla yɩ ali ihile yɛ nɩ.”

15. Mɩnla ti mɔɔ íni kɛɛ yɛbɔ dɩyɛ ɔkʋ̃ pɛ nwʋ mpayɩ a?

¹⁵ Mɔɔ ɩtɔ zʋlɔ asã, ‘Mʋwɔ́ debe fʋlɔ nwʋ mpayɩ a?’ Ɩwɔ numɔ kɛɛ ɩyɛ a ɩsɛ kɛɛ yɛbɔ debe pɔkyɩɩ mɔɔ ihyinyia yɛ nɩ nwʋ mpayɩ dɩyɛ, naasʋ̃ ɩyɛ a ɩkɛyɛ baaba kɛɛ yɛlɛ́fa yɛ adwɩnɩ yekeziye dɩyɛ ɔkʋ̃ zʋ mfomi yɛkɔwɔ mmɔdɩnɩ kɛɛ yɛkɔnwʋ mɔɔ Gyehova pɛ yɩ. Bɛmá yehila eliyema baalɛ sigyianii mɔɔ nɩ ɩbɔɔ mpayɩ kɛɛ bɔkɔvʋlɔ yɩ ma ɩkɔhɔ Odwokɔbadɛlɛlɛmaa Sukuulu yi be nɩ. Nɩ ɩpɛ kɛɛ ɩkɔ sukuulu yi be na ama ɩahɔ ɩazʋ̃mɩ wɔ dɩka mɔɔ mmʋwalɩyɛ nwʋ hyinyia. Meti mmɩlɩ mɔ ɩwɔlɩ mpayɩ na ɩdɩkɛɛ kɛɛ bɔkɔvʋlɔ yɩ ma ɩkɔhɔ sukuulu yi nɩ, ankɩ sa ɩkʋla sʋ̃ isiã Gyehova kɛɛ ɩwʋwá yɩ ma ɩnwʋ ɔhʋanɩ mvʋlɔ mɔɔ ikoluwa zʋ ɩkɛdɛlɛ yɩ ɔzʋ̃mɩnlɛ egyima yɩ nu. (Egy. 16:​9, 10) Ankɩ sa ɩkʋla ibizia yɩ mansini zʋ ehilalɛvʋlɔ yɩ kɛɛ asafʋ be wɔ kɛnɩ mɔɔ behyinyia ɔhʋanɩbukolɛmaa sʋ̃maa a, na ɩava ɩayɛ yɩ mpayɩ nwʋ egyima. Anzɛnyɩɩ ankɩ sa ɩkʋla ɩkɛlɛ ɩkɔ Bɛtɩlɩ na iaɣizia kɛɛ ɛhɩnla dɩka yɛ behyinyia ɛlawulowɔlɛmaa sʋ̃maa a.e

16. Mɩnla anwʋlazʋ yɛ yɛkɔhʋla yekenyia a?

¹⁶ Kɛmɔ yɛɣa yezuma nɩ, sa yɛkʋla yenyia anwʋlazʋ kɛɛ Gyehova ɩzʋ̃ ɔlɔlɛ nɩɩ ɛdɩnɣɛlɛ nu ikediye yɛ mpayɩwɔlɛ. (Ndw. 4:3; Ayɩ. 30:18) Ɩyɛ a ilóbuwa yɛ mpayɩ kezimɔ yekilaa yɩ ɔhʋanɩ dɩyɛ, naasʋ̃ Gyehova ilóbu yɩ anyɩ ikogua yɛ mpayɩ zʋ kyɩ̃. Ɩdɔ yɛ baaba na iléyiaki yɛ kyɩ̃. (Ndw. 9:10) Meti kɔ zʋlɔ “fa wʋ nwʋ tiã yɩ zʋ daabaa,” na kã wʋ ahʋnlɩnɩ nu odwokɔ kile yi wɔ mpayɩwɔlɛ nu.—Ndw. 62:8.