MMƖLƖ MƆ ƆBƆƆ NKƆMMƆWƆLƐ TƲ
OZUMALƐDƖYƐ 5
Ma Wʋ Anyɩ La Kɛ
Egyinalɛzʋ-odwokɔ: “Mʋnlʋmmɔ bɛma bo munwa nu ndwokɔ ɩyɛ fɛlɛkʋ̃.”—Kol. 4:6.
Mɔɔ Pɔɔlʋ Ɩyɛlɩ
1. Kila VIDIYO yi, anzɛnyɩɩ kɩnga Egyima 17:22, 23. Akʋ̃ bozunzu ndwokɔɣizialɛ mɔɔ ilili zʋlɔ yɩ nwʋ:
Kɛ Pɔɔlʋ dɩlɩ nɣanlɩ zeli mmɩlɩ mɔ ɩnwʋnlɩ ɔzʋ̃mɩnlɛ nu nyɛlɩyɛ mɔɔ nɩ ɩkɔlɩɩ zʋlɔ wɔ Atɛnsɩ nɩ a?—Kila Egy. 17:16.
Kɛ ankɩ Pɔɔlʋ kɛdɩndɛ kediyia Atɛnsɩmaa nɩ, mɩnla ɔhʋanɩ zʋ yɛ igyinanlɩ be dedi zʋ ilili bɛ dasɩlɛ a?
Mɩnla Yɛ Yesuma Wɔ Pɔɔlʋ Kɛnɩ a?
2. Sɛ yɛnwʋ mɔɔ yɛkɛhã, yekila kezimɔ yɛkɛhã yɩ nɩɩ mmɩlɩ mɔ yɛkɛhã yɩ a, sa ɩma ɩyɛ mɛlɛkɛ kɛɛ bekediye yɛ.
Sumazuma Pɔɔlʋ
3. Kila ndwokɔ mɔ ɛkɛva keli egyima nɩ bʋwɔ. Kɛ ndianwʋ nɩ, sɛ ɛ nɩɩ abiye mɔɔ ɩ́dɩ Kilisinyianii tɩndɛ a, ebiye a nwʋmɔ kehyinyia kɛɛ ekehila kezimɔ ɛkɛla Bayɩbʋlʋ yɩ ali anzɛnyɩɩ kezimɔ ɛkɛhã Gyisɛsɩ nwʋ odwokɔ nɩ bʋwɔ.
4. Sɛ idi mfʋmɩ be a, áma ɛpɩlɩ wʋ nwʋ kɛɛ ɛkɛdɩnɣɛ yɩ. Ma ɔhʋanɩ yɩ ma ɩzʋ̃ yɩ ahʋnlɩnɩ nu ɩdɩndɛ. Sɛ ɩba yɩ po kɛɛ, ɩkã odwokɔ be mɔɔ ɩ nɩɩ Bayɩbʋlʋ iáyiyia a, bɔ́ mmɔdɩnɩ kɛɛ ɛ nɩɩ yɩ lósũ pɩla. (Gye. 1:19, NWT) Sɛ enyia abʋtalɩ etiye yi a, ɩkɛma ɔkɔnwʋ mɔɔ ide idi nɩɩ sianti mɔɔ ɩlɛ ɔzɔ dedi yi.—Ɛɣɛ. 20:5.
5. Sɛ ɩkã odwokɔ be na sɛ ɛ nɩɩ yɩ yɛ adwɩnɩ a, de tiã numɔ na kamvʋ yɩ. Ebiye a, ide idi paa kɛɛ yɩ ɔzʋ̃mɩnlɛ yɛ bekilehile nɔhʋanlɛ yɩ a. Bɔ mmɔdɩnɩ kɛɛ ɛ nɩɩ yɩ kozunzu odwokɔ be mɔɔ bɛzabɛ anwɩ̃ yɩ bɛ adwɩnɩ yiyia wɔ nwʋmɔ. Na akʋ̃ ngyɩkɩ̃ɩ̃ ngyɩkɩ̃ɩ̃ la bʋwa yɩ ma ɩnwʋ mɔɔ Bayɩbʋlʋ nɩ ikehile wɔ nwʋmɔ.