Ma Ɔlɔlɛ Ɩhã Wʋ Ma Ɔhɔ Zʋlɔ Ɛhã Odwokɔba Yɩ!

1. Mɩnla yɛ bɛhanlɩ nwʋmɔ odwokɔ wɔ yɛ 2023 ɔlʋbɔ ɔlʋbɔ ayiyialɩyɛ yɩ tʋ a?

WƆ YƐ 2023 ɔlʋbɔ ɔlʋbɔ ayiyialɩyɛ yɩ tʋ nɩ,a yɛ sa hanlɩ ye dedi nwʋ ntɩyasɩ mvʋlɔ na yɛdɩlɩ yɛ dasɩlɛlilɛ egyima yɩ nwʋ amanɩyɛwɔlɛ azʋlɔtʋ mɔɔ ɩyɛ anyɩnlɩlelɛ paa. Kɛ ndianwʋ nɩ, yɛɣa yɛnwʋnlɩ kɛɛ wɔ Babilɔnʋ Kezile yi ɩzɩkɛlɛ mɛda po nɩ, mmenii be kenyia ɔnwʋmɔ ɔhʋanɩ kɛɣa kɛhɩnla Nyamɩnlɩ yi mmenii nwʋ. Yɛɣa yɛnwʋnlɩ sʋ̃ kɛɛ, ɔzʋmɩ November 2023 mɔɔ ɩkɔɔ nɩ, Bulombunlililɛ nwʋ ɛlawulowɔlɛmaa lóbu mɔɔ bɛyɛ wɔ dasɩlɛlilɛ nu munwatĩĩ nwʋ ngʋnda. Asʋ̃ nzɩnzanlɩyɛ eyi kile kɛɛ, kakɩ yɩ dasɩlɛlilɛ egyima yɩ nwʋ iáhyinyia na iále ndɛmɩbɛlɛ dɔkʋ̃ a? Anhã!

2. Awulo ɩkyɩ̃ɩ̃ awulo itwoo munwala, nɩ yɛ dasɩlɛlilɛ egyima yɩ idee ndɛmɩbɛlɛ paa, mɩnla ti a? (Maakɩ 13:10)

² Awulo ɩkyɩ̃ɩ̃ awulo itwoo munwala, nɩ yɛ dasɩlɛlilɛ egyima yɩ idee ndɛmɩbɛlɛ paa. Mɩnla ti a? Iluwakɛɛ mmɩlɩ ɩkɔɔ baaba. Mɔwʋ sunzu mɔɔ Gyisɛsɩ hanlɩ valɩ dasɩlɛlilɛ egyima yɩ mɔɔ bɛkɛyɛ wɔ awielɩyɛ mmɩlɩ yɩ nu nɩ nwʋ kila. (Kɩnga Maakɩ 13:10.) Kɛmɔ Matiyu sʋ̃ hɛlɛlɩ nɩ, Gyisɛsɩ hanlɩ kɛɛ bɛkɛhã odwokɔba yɩ wɔ oyuwadɩ dɩka bela ansaana “awielɩyɛ yɩ” ɩaɣa. (Mt. 24:14) Awielɩyɛ mɔɔ bɛkãã nwʋmɔ odwokɔ nɩ yɛ lɛ Setanɩ oyuwadɩ tanɩ eyi yɩ awielɩyɛ. Gyehova hyɛ “eɣile nɩɩ dɔnɩhwɩlɩ” mɔɔ nninyeni mɔɔ ibazizi nɩ kɔwɔ yɩ tʋ. (Mt. 24:36; 25:13; Egy. 1:7) Mmɩlɩ bela mɔɔ awulo kɛhyɩ̃ nɩ, yebike ɔzɔ eɣile yɩ nwʋ. (Wul. 13:11) Kɔbʋmɩ kɛɛ awielɩyɛ nɩ kɛɣa nɩ, ihyinyia kɛɛ yɛkɔ zʋ yɛkã odwokɔba nɩ.

3. Mɩnla yɛ ɩkã yɛ ma yɛkã odwokɔba yɩ a?

³ Naasʋ̃ odwokɔɣizialɛ be wɔ kɛnɩ mɔɔ yɛpɛ kɛɛ ye munwala yesunzu nwʋmɔ: Mɩnla ti mɔɔ yɛkã odwokɔba yɩ a? Sɛ yetuaa yɩ sini a, ɔlɔlɛ yɛ ɩkã yɛ ma yɛkã odwokɔba nɩ a. Sɛ yɛkã odwokɔba yɩ a, ikile kɛɛ yɛdɔ nɔhʋanlɛ yɩ, yɛdɔ mmenii, na mɔɔ ɩtɛla yi munwala nɩ, yɛdɔ Gyehova nɩɩ yi dima. Bɛmá yezunzu nninyeni eyimmɔ nwʋ nkʋ̃kʋ̃ nkʋ̃kʋ̃.

YƐKÃ ODWOKƆBA YƖ ILUWAKƐƐ YƐDƆ NƆHƲANLƐ YƖ

4. Sɛ bɛkã odwokɔba be bekile yɛ a, kɛ yɛyɛ yɛ dɩyɛ yese a?

⁴ Mmɩlɩ mɔ ɛdɩlɩ odwokɔba be wɔ wʋ ɛbɩlawɔlɛ nu, dɩkɛɛ ebiye a ɛdɩlɩ kɛɛ wu busunwanii be ɩwʋ fʋlɔ anzɛnyɩɩ wʋ sa hanlɩ egyima be mɔɔ ɩla wʋ ahʋnlɩnɩ zʋ paa nɩ, kɛ ɛyɛlɩ wʋ dɩyɛ zeli a? Pɩlazunlɛ bela íni nwʋmɔ kɛɛ wʋ anyɩ leli baaba ma ɛhanlɩ nwʋmɔ odwokɔ ehileli wu mmusunwamaa nɩɩ wʋ ɔhɔnwʋmmɔ po. Asʋ̃ ɔzɔ la yɛ ɛdɩlɩ nɣanlɩ mmɩlɩ mɔ ɛdɩlɩ Nyamɩnlɩ Bulombunlililɛ yɩ nwʋ odwokɔ, mɔɔ ɩdɩ odwokɔba mɔɔ ɩtɛla ebiyela nɩ a?

5. Mmɩlɩ mɔ ili bɔmʋnlɩ mɔɔ ozumanlɩ nɔhʋanlɛ yɩ wɔ Nyamɩnlɩ Odwokɔ yi nu nɩ, kɛ ɛdɩlɩ nɣanlɩ zeli a? (Kila mfonyini yi sʋ̃.)

⁵ Kakɛ kezimɔ ɛdɩlɩ nɣanlɩ mmɩlɩ mɔ ili bɔmʋnlɩ mɔɔ ozumanlɩ nɔhʋanlɛ yɩ wɔ Nyamɩnlɩ Odwokɔ yɩ nu nɩ. Ɛɣa nwʋnlɩ kɛɛ, wʋ sʋlɔ Ɛzɩlɛ nɩ dɔ wʋ, ɩpɛ kɛɛ ɛba kɩnla yɩ abusunwa mɔɔ bɔsʋ̃mɩ yɩ nɩ nwʋ, ɩwɔ anʋhʋba kɛɛ ɩkɛyɩ ɛyɛkɛ nɩɩ amanɩyɛnwʋnlɛ wɔ kɛ, na sa ɔkʋla kila ɔhʋanɩ kɛɛ ɔkɔnwʋ wʋ alɔvʋlɔ mɔɔ bowuwu nɩ dɔkʋ̃ wɔ oyuwadɩ fʋlɔ yi nu, nɩɩ sʋ̃maa mɔɔ ɩkɩnlahɩnla nwʋmɔ. (Mk. 10:​29, 30; Dwɔ. 5:​28, 29; Wul. 8:​38, 39; Yik. 21:​3, 4) Mɔɔ ozumanlɩ nɩ hanlɩ wʋ ahʋnlɩnɩ na ɩmanlɩ wʋ anyɩ leli. (Lk. 24:32) Ɛɣa nyianlɩ nɔhʋanlɛ mɔɔ osumaa nɩ nwʋ ɔlɔlɛ, na nɩ ɛpɛ paa kɛɛ ɛkã nwʋmɔ odwokɔ kile mmenii mvʋlɔ.—Fa tindiã Gyɛlɩmaya 20:9 nwʋ.

6. Mɩnla yɛ osuma wɔ Ernest nɩɩ Rose bo ozumanlɛnwʋnlɛ yɩ nu a?

⁶ Mɔwʋ kila ozumanlɛnwʋnlɛ eyi. Eliyema benyia be mɔɔ bɔfʋlɔ yɩ Ernestb lili alʋbɔ bunlu nɩ yɛ yɩ papa wuli a. Ernest kã kɛɛ: “Nɩ mibizia mʋ nwʋ kɛɛ: ‘Asʋ̃ ɩhɔ sʋlɔ a? Anzɛnyɩɩ iwu kʋlakʋla mɔɔ ɩlɛ́ba nnwʋanlɩ nu dɔkʋ̃ a?’ Sɛ mʋnwʋ nnwuakula mɔɔ bɛ papa da azɩ a, nɩ ɩyɛ ɛyɛkɛ mɩ kɛɛ mɩ papa wu.” Nɩ Ernest ta kɔ aziyelɩyɛ kɛnɩ kɔ kua yɩ nakʋlʋba anyunu azɩ wɔ yɩ papa yɩ nna yɩ zʋ ɩbɔ mpayɩ kɛɛ: “Nyamɩnlɩ, misiãã wʋ, mɩpɛ kɛɛ mʋnwʋ dɩka mɔɔ mɩ papa wɔ.” Yɩ papa yi owulo mɛda kɛyɛ alʋbɔ 17 nɩ, belili Ernest dasɩlɛ na ileli idianlɩ numɔ kɛɛ ikozuma Bayɩbʋlʋ yɩ. Mmɩlɩ mɔ ɩɣa zumanlɩ kɛɛ awuvʋlɔ bézi hwɩɩ na ɩdɩ kɛɛ mɔɔ bɛla hatɩɩ, na Bayɩbʋlʋ yɩ bɔ anʋhʋba kɛɛ bokodunwo bɛ nɩ, ɩyɛlɩ yɩ nnwʋánlɩ na yɩ anyɩ leli paa. (Odw. 9:​5, 10; Egy. 24:15) Akʋ̃ dɩyɛ, nɩ inyia yi ndwokɔɣizialɛ mɔɔ ilile yi alʋbɔ sʋ̃maa nɩ nwʋ munwalɩyɛ! Ernest yɩ anyɩ ɣa lelili Bayɩbʋlʋ nu nɔhʋanlɛ mɔɔ nɩ isumaa nɩ nwʋ paa. Yɩ yɩ Rose ɣa hɩnlanlɩ yɩ nwʋ ma bozumanlɩ Bayɩbʋlʋ yɩ, na yɩzayɩ sʋ̃ inyianlɩ ɔlɔlɛ ɩmanlɩ mɔɔ nɩ isumaa nɩ. Bonlumanlɩ wɔ ɔlʋbɔ 1978 nu. Bɛvalɩ ɛhyɩmɛ bɛhanlɩ be dedi mɔɔ ɩla bɛ ahʋnlɩnɩ zʋ nɩ nwʋ odwokɔ behileli bo mmusunwamaa, bɔ ɔhɔnwʋmmɔ nɩɩ abiyela mɔɔ ikediye nɩ. Eyi ti, Ernest nɩɩ Rose bɔhʋla bɔwʋwa mmenii mɔɔ bɔbʋ 70 ma bonluma.

7. Sɛ ɔlɔlɛ mɔɔ yɛwɔ yɛma nɔhʋanlɛ yɩ de ndɩnɩ wɔ yɛ ahʋnlɩnɩ nu a, mɩnla yɛ ɩkã yɛ ma yɛyɛ a? (Luuku 6:45)

⁷ Amba, sɛ ɔlɔlɛ mɔɔ yɛwɔ yɛma nɔhʋanlɛ yɩ de ndɩnɩ wɔ yɛ ahʋnlɩnɩ nu a, yɛlɔ́kʋla kɛhã ye munwa kediã nu. (Kɩnga Luuku 6:45.) Yɛtɩ nɣanlɩ kɛɛ Gyisɛsɩ yɩ adʋwavʋlɔ yɩ mɔɔ bɛhanlɩ kɛɛ: “Amɩyɛ mɛyɩ mɔɔ yɛdɩ nɩɩ mɔɔ yɛnwʋ yɩ nɩ yɛlɔ́kʋla yekeyiaki yɩ ɛhanlɛ.” (Egy. 4:20) Yɛdɔ nɔhʋanlɛ yɩ paa, meti yɛpɛ kɛɛ yɛkã nwʋmɔ odwokɔ yekile mmenii dʋdʋ bela mɔɔ yɛkɔhʋla.

YƐKÃ ODWOKƆBA YƖ ILUWAKƐƐ YƐDƆ MMENII

8. Mɩnla yɛ ɩkã yɛ ma yɛkã odwokɔba nɩ yekile mmenii mvʋlɔ a? (Kila alɩka mɔɔ ise “Dɔ Mmenii—Yɛ Bɛ Adʋwavʋlɔ.”) (Kila mfonyini yi sʋ̃.)

⁸ Yɛdɔ mmenii kɛmɔ Gyehova nɩɩ yɩ Ɣa yɩ dɔ mmenii nɩ. (Ɛɣɛ. 8:31; Dwɔ. 3:16) Ye kunlu yɩba yɛ ma bɛzabɛ mɔɔ “bézi Nyamɩnlɩ” na “béni anyɩnlɩlazʋ” bela nɩ baaba. (Ɛfɩ. 2:12) Oyuwadɩ yi nu ɔhawʋ azʋlɔtʋ kɔhʋla kɛma bɛkɛdɩ nɣanlɩ kɛɛ bowula kuma be mɔɔ numɔ dɔ nu, naasʋ̃ yɛwɔ ɛyɛma mɔɔ yɛkɛva yɛkɔhwɩ̃ bɛ wɔ kuma yɩ nu, mɛyɩ yɛ lɛ Nyamɩnlɩ Bulombunlililɛ yɩ nwʋ odwokɔba yɩ. Ɔlɔlɛ nɩɩ kunlumiyɩbalɛ mɔɔ yɛwɔ yɛma mmenii eyi nɩ yɛ ɩkã yɛ ma yɛbɔ mmɔdɩnɩ kɛɛ yɛkɛhã odwokɔba nɩ yekehile bɛ a. Odwokɔ eyi mɔɔ ɩtʋ bʋlɔ nɩ kɔhʋla kɛma bekenyia anyɩnlɩlazʋ, ɩkɔwʋwa bɛ ma bekenyia azɩwʋwalɛ baaba wɔ nnɛ, na ɩkɛma bekenyia anyɩnlɩlazʋ kɛɛ bekenyia “nnwʋanlɩ mɔɔ íni awielɩyɛ” wɔ Nyamɩnlɩ yɩ oyuwadɩ fʋlɔ yɩ nu.—1 Tim. 6:19.

9. Eɣile be nwʋ kɔkɔwɔlɛ ɛhɩnla dɩyɛ yɛ yɛbɔ a, na mɩnla ti a? (Izikɩyɛlɩ 33:​7, 8)

⁹ Ɔlɔlɛ mɔɔ yɛwɔ yɛma mmenii nɩ sʋ̃ kã yɛ ma yɛbɔ bɛ kɔkɔ kɛɛ oyuwadɩ tanɩ eyi yɩ awielɩyɛ ɣike. (Kɩnga Izikɩyɛlɩ 33:​7, 8.) Ye kunlu yɩba yɛ ma yɛ apaa yɩ nu maa nɩɩ ye mmusunwamaa mɔɔ bɛázʋ̃mɩ Gyehova nɩ. Mmenii sʋ̃maa bɔbɔɔ bɛ ɛbɩla mɔɔ bézi kɛɛ ‘anwʋhyɩlɩlɛ mɔɔ ɔzʋmɩ kɛɛ Nyamɩnlɩ wɔlɩ oyuwadɩ nɩ ebiye ilésili kyɩ̃, na ebiye sʋ̃ ilési dɔkʋ̃ kyɩ̃’ nɩ ɩbʋbɔɔ ɩba. (Mt. 24:21) Yɛpɛ kɛɛ yɛma bɔnwʋ kɛɛ wɔ ndɛnɩwuwalɛ mmɩlɩ yɩ nu nɩ, bɛkɛyɩ awohwizʋ̃mɩnlɛ wɔ kɛ, na bɛazɩkɛ oyuwadɩ nhyɩhyɛlɩyɛ tanɩ eyi wɔ Amagadɔnʋ kʋnɛ yɩ nu. (Yik. 16:​14, 16; 17:​16, 17; 19:​11, 19, 20) Yɛbɔɔ mpayɩ kɛɛ mmenii sʋ̃maa kɛyɛ nwʋmɔ debe na bɛaɣa bɛahɩnla yɛ nwʋ ma yɛazʋ̃mɩ Gyehova nnɛ. Na bɛzabɛ mɔɔ bɛádiye ɔzɔ kɔkɔwɔlɛ yɩ wɔ nnɛ, mɔɔ ye mmusunwamaa mɔɔ yɛdɔ bɛ nɩ kɩnla nwʋmɔ nɩ sʋ̃ ɛ?

10. Mɩnla ti mɔɔ ihyinyia kɛɛ yɛkɔ zʋ yɛbɔ mmenii kɔkɔ wɔ mɔɔ ibazi nɩ nwʋ a?

¹⁰ Kɛmɔ yehilehile numɔ wɔ dɩyɛzumanlɛ mɔɔ ili eyi anyunu nɩ, mmenii mɔɔ bekele Gyehova bekeli mmɩlɩ mɔ bɔnwʋ kɛɛ bɛsɩkɛɛ Babilɔnʋ Kezile yi nɩ, ebiye a Gyehova kele bɔ nnwʋanlɩ. Sɛ ɔzɔ a, mɛyɩ nɩ nnɛ yɛ nwʋmɔ ɣa hyinyia paa kɛɛ yɛkɔ zʋ yɛbɔ bɛ kɔkɔ a. Mɔwʋ dwɩnɩ eyi nwʋ kila: Mɔɔ yɛkɛhã yekehile bɛ wɔ nnɛ nɩ yɛ ebiye a, bɛkɛhakɛ wɔ ɔzɔ mmɩlɩ yɩ a. (Fa tindiã Izikɩyɛlɩ 33:33 nwʋ.) Ebiye a bɛkɛhakɛ kɔkɔwɔlɛ mɔɔ yɛva yɛmanlɩ bɛ nɩ, na ɩahã bɛ ma bɛaɣa bɛahɩnla yɛ nwʋ wɔ nɔhʋanlɛzʋ̃mɩnlɛ yɩ nu ansaana ɩahalɩ aɣinzi. Kɛmɔ “azɩlɛ ɩwʋsʋlɩ kezile” ansaana enii mɔɔ ikila fiyiadɩ zʋ wɔ Fɩlɩpayɩ ɩsɩnzaa yɩ adwɩnɩ nɩ, ɔzɔ la sʋ̃ yɛ ebiye a, mmenii mɔɔ bɛádiye odwokɔ yɩ nnɛ nɩ kɔhʋla kɛzɩnza bɛ adwɩnɩ mmɩlɩ mɔ bɔnwʋ kɛɛ bogua zʋ bɛsɩkɛɛ Babilɔnʋ Kezile nɩ a.—Egy. 16:​25-34.

YƐKÃ ODWOKƆBA YƖ ILUWAKƐƐ YƐDƆ GYEHOVA NƖƖ YI DIMA

11. Mɩnla ɔhʋanɩ zʋ yɛ yɛfa animinyiamɩ, nnililɛ, nɩɩ tumi yɛma Gyehova a? (Yikile 4:11) (Kila mfonyini yi sʋ̃.)

¹¹ Sianti titili ti mɔɔ yɛkã odwokɔba yɩ yɛ lɛ kɛɛ yɛdɔ Gyehova nɩɩ yi dima nwanzanwanza yɩ. Yebu yɛ dasɩlɛlilɛ egyima nɩ kɛɛ ɔhʋanɩ mɔɔ yeduwa zʋlɔ yɛyɩ yɛ Nyamɩnlɩ mɔɔ yɛdɔ yɩ nɩ ayɛlɛ. (Kɩnga Yikile 4:11.) Yɛzʋ̃ yɛ ahʋnlɩnɩ nu munwala yede yetiã numɔ kɛɛ: Gyehova Nyamɩnlɩ yɛ ɩfata kɛɛ yɩ nɔhʋanlɛ azʋ̃mɩvʋlɔ fa animinyiamɩ, nnililɛ nɩɩ tumi munwatĩĩ ma yɩ a. Sɛ yɛma mmenii nwʋ dasɩlɛ petee mɔɔ ikile kɛɛ mɛyɩ yɛ “ɩwɔlɩ nninyeni munwatĩĩ” na mɛyɩ ti yɛ yɛda azɩ a, nɩ yɛlɛ animinyiamɩ nɩɩ annidi yɛmaa yɩ. Sɛ yɛfa yɛ mmɩlɩ, yɛ anwʋzɩzɩbɛ nɩɩ yɛ anwʋnyiadɩ yɛyɛ odwokɔbahanlɛ egyima yɩ kɛmɔ yɛ bʋwabɩlɛ kɛma ɔhʋanɩ a, ikile kɛɛ yɛlɛ ye tumi yɛmaa Gyehova. (Mt. 6:33; Lk. 13:24; Kol. 3:23) Sɛ yetuaa yɩ sini a, yɛ anyɩ deli nwʋmɔ kɛɛ yɛkɛhã Nyamɩnlɩ mɔɔ yɛdɔ yɩ nɩ nwʋ odwokɔ. Akʋ̃ sʋ̃, yenyia ɛpɛ kezile paa kɛɛ yɛkɛhã yi dima nɩɩ mɔɔ yɩ tʋ kile nɩ nwʋ odwokɔ yekehile mmenii mvʋlɔ. Mɩnla ti a?

12. Mɩnla ɔhʋanɩ zʋ yɛ yɛtɩ Gyehova yi dima nwʋ wɔ dasɩlɛlilɛ nu a?

¹² Ɔlɔlɛ mɔɔ yɛwɔ yɛma Gyehova nɩ kã yɛ ma yɛtɩ yi dima nwʋ. (Mt. 6:9) Eyi kile kɛɛ yɛpɛ kɛɛ yɛma mmenii nwʋ kɛɛ ndwokɔ tanɩ mɔɔ Setanɩ hã va gua Gyehova yi dima nwʋ evinli nɩ, ɩ́dɩ nɔhʋanlɛ. (Gyn. 3:​1-5; Dwb. 2:4; Dwɔ. 8:44) Sɛ yɛkãã odwokɔba yɩ a, yekyina Nyamɩnlɩ yɩ ɔfʋã pindinyii na yɛkã yɩ nwʋ nɔhʋanlɛ ndwokɔ yekile mmenii mɔɔ bekediye nɩ. Yɛpɛ kɛɛ abiyela nwʋ yɩ kɛɛ yi subanɩ titili yɛ lɛ ɔlɔlɛ, idi tumi wɔ ɛdɩnɣɛlɛ nɩɩ pɛlɩpɛlɩlilɛ nu, na ɩlɛ́kyɛ ikoluwa yi Bulombunlililɛ yɩ zʋ ɩkɛyɩ amanɩyɛnwʋnlɛ munwatĩĩ wɔ kɛnɩ na ɩava azʋ̃nudwolɩyɛ nɩɩ anyɩnlɩlelɛ ɩaɣɩlɛ adasamaa. (Ndw. 37:​10, 11, 29; 1 Dwɔ. 4:8) Sɛ yɛkã ndwokɔ eyimmɔ yɛfalɩ Gyehova nwʋ yekile mmenii mvʋlɔ a, nɩ yɛtɩɩ yi dima nwʋ. Dɔkʋ̃ sʋ̃, yɛ anyɩ de iluwakɛɛ dima mɔɔ ɩla yɛ zʋ kɛɛ Gyehova Dasɩvʋlɔmaa nɩ, yɛyɛɛ nwʋmɔ egyima. Mɩnla ɔhʋanɩ zʋ a?

13. Ɩdɩ animinyiamɩhyɛlɛ kezile kɛɛ yɛdɩ Gyehova yɩ Dasɩvʋlɔmaa, mɩnla ti a? (Ayɩzaya 43:​10-12)

¹³ Gyehova vʋlɔ yɛ kɛɛ yɛyɛ́ yɩ “dasɩvʋlɔmaa.” (Kɩnga Ayɩzaya 43:​10-12.) Alʋbɔ be mɔɔ idua numɔ nɩ, kɛlɛta be mɔɔ ɩzʋ̃ Ɔhʋanɩhilelɛ Okuwu yi kɛnɩ nɩ hanlɩ kɛɛ: “Ɩdɩ animinyiamɩhyɛlɛ kezile kɛɛ bɔkɔvʋlɔ ye nu bela kɛɛ Gyehova Dasɩvʋlɔ.” Mɩnla ti mɔɔ ɩdɩ ɔzɔ a? Sunzu ndianwʋ eyi nwʋ kila. Sɛ ehyinyia abiye mɔɔ ikeli wʋ nwʋ dasɩlɛ wɔ kɔɔtʋ a, ɛkɛva abiye mɔɔ ezi yi na ede yi edi, na yɩ ɛbɩlawɔlɛ sʋ̃ kɛma bekele dasɩlɛ mɔɔ idii ɩkɛvalɩ wʋ nwʋ nɩ bekeli. Gyehova yɩ yɛ kɛɛ yɩ Dasɩvʋlɔmaa ɩva ihile kɛɛ izi yɛ na ide yɛ idi kɛɛ yekeli yɩ nwʋ dasɩlɛ kɛɛ, mɛyɩ yɛ ɩdɩ nɔhʋanlɛ Nyamɩnlɩ yɩ a. Yɛtɩ nɣanlɩ kɛɛ ɩdɩ annidi kezile paa kɛɛ yɛdɩ yɩ Dasɩvʋlɔmaa, meti ɔnwʋmɔ ɔhʋanɩ bela mɔɔ yekenyia nɩ, yɛfa yɛkã yi dima yɩ nwʋ odwokɔ na yɛma mmenii nwʋ kɛɛ ndwokɔ tanɩ mɔɔ bɛhã bɛvalɩ yɩ nwʋ nɩ, ɩ́dɩ nɔhʋanlɛ. Sɛ yɛyɛ zɔ a, nɩ yɛyɛɛ dima mɔɔ ɩla yɛ zʋ kɛɛ Gyehova Dasɩvʋlɔmaa nɩ nwʋ egyima!—Ndw. 83:18; Wul. 10:​13-15.

YƐKƆHƆ ZƲ YƐKƐHÃ ODWOKƆBA YƖ KƆBƲMƖ KƐƐ AWIELƖYƐ NƖ KƐƔA

14. Mɩnla anyɩnlɩlelɛ ndwokɔ yɛ ɩkɔhʋla kezi wɔ eɣile be a?

¹⁴ Yɛlɛ anyɩnlɩlelɛ yekilaa mɔɔ ɩkɔhʋla ikezi wɔ eɣile be nɩ ɔhʋanɩ! Yɛwɔ anyɩnlɩlazʋ kɛɛ Gyehova keyila dasɩlɛlilɛ egyima yɩ zʋ ma mmenii sʋ̃maa kele nɔhʋanlɛ yɩ ansaana anwʋhyɩlɩyɛ kezile yɩ ɩawɔ yɩ tʋ. Akʋ̃ sʋ̃, ɩyɛ yɛ fɛ paa kɛɛ, wɔ anwʋhyɩlɩyɛ kezile yi mɔɔ ɩdɩ mmɩlɩ mɔ numɔ kɛyɛ sɩ wɔ enii yɩ abakɔsɛmɩ nu po nɩ, mmenii be zʋ̃ Setanɩ yi oyuwadɩ mɔɔ ɩkɔɔ ɛzɩkɛlɛ nu nɩ kɛɣa kɛhɩnla yɛ nwʋ ma yɛkɔzʋ̃mɩ Gyehova!—Egy. 13:48.

15-16. Mɩnla yɛ yɛkɔhɔ zʋ yɛkɛyɛ a, na yɛkɛyɛ kɔhɔ kɔbʋmɩ eɣile sina a?

¹⁵ Naasʋ̃, yɛwɔ egyima be mɔɔ nwʋmɔ hyinyia paa mɔɔ bɛlɛ́yɛ yɩ ebiyekʋ̃ mɔɔ ɩsɛ kɛɛ yɛyɛ. Mɛyɩ yɛ lɛ ɔnwʋmɔ ɔhʋanɩ mɔɔ yɛwɔ kɛɛ yɛbɔ Nyamɩnlɩ Bulombunlililɛ yɩ nwʋ ɛlawulo wɔ oyuwadɩ dɩka bela nɩ. Mmɩlɩ ɔkʋ̃ yɩ la sʋ̃, ɩsɛ kɛɛ yɛkɔ zʋlɔ yɛbɔ mmenii kɔkɔ. Ihyinyia kɛɛ mmenii nwʋ yɩ kɛɛ oyuwadɩ nhyɩhyɛlɩyɛ tanɩ eyi yɩ awielɩyɛ ibikee ndɛndɛ paa. Sɛ yɛyɛ zɔ na ndɛnɩwuwalɛ mmɩlɩ nɩ itwu a, bɔkɔnwʋ kɛɛ odwokɔ mɔɔ yɛhã yehileli bɛ nɩ, ɩzʋ̃ Gyehova Nyamɩnlɩ kɛ.—Izi. 38:23.

¹⁶ Meti mɩnla yɛ yezi yɛ kɛnɣa kɛɛ yɛkɛyɛ a? Yɛpɛ kɛɛ nɔhʋanlɛ yɩ nwʋ ɔlɔlɛ, ɔlɔlɛ mɔɔ yɛwɔ yɛma mmenii, nɩɩ mɔɔ ɩtɛla yi munwala nɩ, Gyehova Nyamɩnlɩ nɩɩ yi dima nwʋ ɔlɔlɛ kã yɛ ma yɛfa ɛhyɩmɛ, ndɛmɩbɛlɛ nɩɩ anyɩnlɩlelɛ yɛkɔ zʋ yɛkã odwokɔba yɩ kɔbʋmɩ kɛɛ Gyehova kɛhã kɛɛ, “Ɩyɛ bʋwɔ!”