Nyamɩnlɩ Yɩ Bulombunlililɛ Yɩ, Mɛyɩ Yɛ Lɛ Mɩnla a?
Mɔɔ Bayɩbʋlʋ yɩ kã
Nyamɩnlɩ yɩ Bulombunlililɛ yɩ dɩ aɣanɩ be mɔɔ Gyehova Nyamɩnlɩ yɩzayɩ yɛ ɩhyɩhyɛlɩ a. Iluwakɛɛ “Nyamɩnlɩ yɩ Bulombunlililɛ” di tumi wɔ sʋlɔ nɩ ti, Bayɩbʋlʋ yɩ sia fʋlɔ yɩ kɛɛ “bulombunlililɛ mɔɔ ɩwɔ sʋlɔ.” (Maakɩ 1:14, 15; Matiyu 4:17, King James Version) Nyamɩnlɩ yɩ aɣanɩ nɩɩ enii aɣanɩ di nsɛ wɔ nninyeni sʋ̃maa nu, naasʋ̃ Nyamɩnlɩ yɩ dɩyɛ yɩ ɩtɛla enii aɣanɩ wɔ debela nu kʋlaa.
Awulombunli. Nyamɩnlɩ ɩyɩ Gyisɛsɩ Kɩlayɩsɩ kɛɛ Bulombunlililɛ yɩ zʋ Bulombunli na ɩva tumi mɔɔ ɩtɛla enii yɩ aɣanɩ bela yɩ dɩyɛ nɩ ɩma yɩ. (Matiyu 28:18) Gyisɛsɩ kɛva yɩ tumililɛ nɩ kɛyɛ dɩyɛ baaba, iluwakɛɛ ɩma yɛnwʋ kɛɛ ɩdɩ Anyunumililɛvʋlɔ mɔɔ yɛkɔhʋla yɛkɛva yɛnwʋ yekediã yɩ zʋ na ɩdwɩnɩ ye nu bela sʋ̃ nwʋ. (Matiyu 4:23; Maakɩ 1:40, 41; 6:31-34; Luuku 7:11-17) Wɔ Nyamɩnlɩ yɩ Bulombunlililɛ yɩ tʋ nɩ, Gyisɛsɩ ba nu ɩyɩ mmenii mɔɔ bɔzʋ̃ amanlɩ bela nu mɔɔ bɛ nɩɩ yɩ bɛali tumi wɔ sʋlɔ na bɛayɛ “awulombunli wɔ azɩlɛ yɩ zʋ.”—Yikile 5:9, 10.
Mmɩlɩ mɔ ikeli. Mbɔmɩ sʋ̃maa nɩ, bɛtaa bɛsɩnza enii aɣanɩ nu ma aɣanɩ fʋlɔ ba siye yɩ agyia nu. Naasʋ̃ Nyamɩnlɩ yɩ Bulombunlililɛ yɩ mɛyɩ “bɛlɛ́sɩnza yɩ kyɩ̃.”—Danɩyɛlɩ 2:44.
Manlɩmaa. Abiyela mɔɔ ɩyɛ Nyamɩnlɩ yɩ apɛdɩ nɩ kenyia yɩ Bulombunlililɛ yɩ zʋ̃ mfasʋ, ɩávalɩ nwʋ kezimɔ ɩdɩ anzɛnyɩɩ dɩka mɔɔ ɩzʋ̃ nɩ.—Egyima 10:34, 35.
Mmɛla. Mmɛla (anzɛnyɩɩ ahyɛdɩ) mɔɔ ɩfalɩ Nyamɩnlɩ yɩ Bulombunlililɛ yɩ nwʋ nɩ ɩádɩndɛ itiyia nninyeni tanɩ nkʋ̃ la, mfomi ɩbʋwa ma manlɩmaa nɩ da subanɩba ali. Kɛ ndianwʋ nɩ, Bayɩbʋlʋ yɩ kã kɛɛ: “‘Fa wʋ ahʋnlɩnɩ munwatĩĩ, wʋ ɛkɛla munwatĩĩ nɩɩ wʋ adwɩnɩ munwatĩĩ dɔ Niibenyia wʋ Nyamɩnlɩ nɩ.’ Eyi yɛ ɩdɩ mmɛla nɩ numɔ kezile baaba mɔɔ ihyinyia a. Mɔɔ ɩtɔ ɔzʋlɔ anwɩ̃ mɔɔ nwʋmɔ ihyinyia baaba baaba nɩ ɩdɩ kɛɛ mɔɔ ili bɔmʋnlɩ nɩ; ise, ‘Dɔ wʋ ɔhɔnwʋ kɛɛ wʋzawʋ wʋ nwʋ.’” (Matiyu 22:37-39.) Ɔlɔlɛ ma Nyamɩnlɩ nɩɩ yɛ ɔhɔnwʋ enii bʋwa Nyamɩnlɩ yɩ Bulombunlililɛ nu maa ma bɛfa mmenii mvʋlɔ bɛ ahyinyiadɩ bedi bɔmʋnlɩ.
Ɛdɩdɩlɛ. Nyamɩnlɩ yɩ Bulombunlililɛ yɩ ma yɛbɔ ɛbɩla baaba, na ikilehile yɛ sʋ̃ ma yenyia subanɩba.—Ayɩzaya 48:17, 18.
Mɔɔ ɩkɛyɛ. Nyamɩnlɩ yɩ Bulombunlililɛ yɩ ɩáma bɛzabɛ mɔɔ bedi tumi wɔ zʋ nɩ besizi bɛzabɛ mɔɔ bowula yɩ tʋ nɩ. Mfomi, ikeli Nyamɩnlɩ yɩ apɛdɩyɛlɛ nwʋ egyima, na yɩ anʋhʋba mɔɔ mɛyɩ la kɛ ɩkɛma bɛzabɛ mɔɔ bɔdɔ yɩ nɩ kɔwʋwa paladayɩsɩ azɩlɛ yɩ zʋ daabaa nɩ kɛɣa nu.—Ayɩzaya 35:1, 5, 6; Matiyu 6:10; Yikile 21:1-4.