Aˬ jeˬ miˇ neh Yeˬhawˇbaˬ Miˬyehˇ˗euˬ gaˇ kawˆ˗ahˇ, dzaw daˆ leꞈ paˬ˗ehˇ gʼeh˗eu nga?

1. Jaˇliꞈ dzaw daˆ leꞈ naˇ, nawˬ˗euˬ gʼaˇ duˬ aˬ jeˬ muiˬ˗eu nga?

Jaˇliꞈ laꞈ kʼoeˇ˗euˬ gaˇ kawˆ uˬ dzah yaw huiˬ deuˬ˗ahˇ shaˇ sawˇ haw ngeh jawˇ, nawˇ Yeˬhawˇbaˬ˗ahˇ gaˬ˗eu nui gaˬ myaˬ dzehˬ laˇ˗eu meh. Teu miˇ neh, nui gaˬ heu hmˬ˗ahˇ yaw muiˬ paˬ˗ehˇ laˆ saˆ daˆ leꞈ˗eu loˬ meh. (1 Beˬtuˆluˆ 2:2) Nawˬ˗euˬ dehꞈ ziˇ noeˬ tmˬ˗eu jeˬ naˇ, Jaˇliꞈ˗ahˇ dzaw geuꞈ˗awˇ, mˇ caw˗eu hawˇ˗eu maˬ mˇ caw˗eu gaˇ iˇ˗eu tehꞈ meh.—Yoˇhaˬ 17:3; Yuˇdaˆ 21-ahˇ gui˗awˬ.

Miˬyehˇ˗euˬ gaˇ kawˆ ngehˬ˗ehˇ siˬ nya laˇ naˇ ngehˬ˗ehˇ, jah˗eu jeˬ ziꞈ laˇ˗eu meh. Jah jeˬ heu naˇ, nawˇ Miˬyehˇ nui ma tsaˬ˗eu jeˬ˗ahˇ mˇ nya ni caw ba nehˬ˗eu meh. (Heˬbyehˇ 11:1, 6) Jah˗eu jeˬ˗aˬ, nawˬ˗euˬ dehꞈ jeˬ dehꞈ kawˆ bi paˇ laˇ nya˗awˇ, dehꞈ ziˇ gaˇ ma yaw muiˬ kahˇ˗ahˇ cah nya ni caw ba nehˬ laꞈ˗eu meh.—Gʼaˬkʼehˇ 3:19-ahˇ gui˗awˬ.

2. Nawˬ neh siˬ nya˗euˬ Miˬyehˇ˗euˬ zaˬ siˬ nui gahˇ, aˬ cawˬ˗ahˇ gaˇ dahˇ tsoeˬ ni aˬ joˆ˗ehˇ zmˬ nmˇ?

Nawˬ neh ya siˬ nya˗euˬ muiˬ˗eu gaˇ kawˆ, aˬ cawˬ˗ahˇ ehˇ nehˬ mawꞈ tehꞈ˗a. Nawˇ Jaˇliꞈ dzaw daˆ leꞈ ngeh jawˇ, muiˬ˗eu gaˇ kawˆ hawˇ˗eu Yeˬhawˇbaˬ˗ahˇ nawˇ jah luꞈ˗eu gaˇ kawˆ deuˬ, aˬ cawˬ˗ahˇ ja mehˬ nehˬ ngeh gʼoˆ shaw leˇ ni, Jaˇliꞈ˗ahˇ aˬ joˆ˗ehˇ ya zmˬ˗eu lehˇ kʼawꞈ, nawˬ˗ahˇ siˬ nya laˇ˗eu meh.—Loˇmaˆ 10:13-15-ahˇ gui˗awˬ.

Tsawˇ haˬ myaˬ ni muiˬ˗eu gaˇ kawˆ˗ahˇ tsaꞈ gaˬ ngeh, yawˬ ha˗euˬ yuiꞈ nyiˇ hawˇ˗eu cawˬ deuˬ˗ahˇ neh dahˬ beh˗eu meh. Ehˇ kʼawꞈ aˬ yawꞈ jeˬ˗ahˇ aˬ yawꞈ ya haw˗eu meh. Aˬ yawꞈ maꞈ jah luꞈ˗eu jeˬ˗ahˇ maˬ tsaˬ nga lehˇ maˬ ehˇ ni, Miˬyehˇ neh saˇ jaˇ dzaˬ taˬ˗euˬ gaˇ kawˆ deuˬ˗ahˇ ehˇ nehˬ˗eu tsaˬ meh. Kʼoeˇ naˆ maˬ tseˇ noeˬ taˬ paˬ˗ehˇ gʼeh˗eu jeˬ naˇ, tsawˇ haˬ zaˬ deuˬ˗aˬ, dawˬ ngehˬ gaˇ naˆ maˬ tseˇ mˇ gaˇ shaˇ gaˇ haw˗eu meh.—2 Tiˆmoˇseˬ 2:24, 25-ahˇ gui˗awˬ.

3. Miˬyehˇ nehˬ˗ehˇ aˬ joˆ˗ehˇ cawˬ cawˬ nmˇ?

Miˬyehˇ˗euˬ dawˬ dzaw˗eu heu naˇ, nawˬ˗euˬ nui jah gʼaˬ kʼaˆ laˇ˗eu meh. Uˬ duˬ duˬ leˇ ngeh, Yeˬhawˇbaˬ nehˬ˗ehˇ cawˬ cawˬ˗eu jeˬ ziꞈ dah ni pyeuꞈ laˇ˗awˇ, Miˬyehˇ nymˇ jiˇ laꞈ kʼoeˇ˗euˬ tsawˇ haˬ tiˬ gʼaˬ pyeuꞈ laˇ nya˗eu meh.—2 Gawˇliˬtu 6:18-ahˇ gui˗awˬ.

4. Miˬyehˇ˗euˬ zaˬ siˬ nui gahˇ paw huiˬ laˇ ni, aˬ joˆ˗ehˇ jahˇ nmˇ?

Jaˇliꞈ˗ahˇ paˇ dzaw daˆ leꞈ˗eu baˬ da neh, Miˬyehˇ˗euˬ zaˬ siˬ nui gahˇ paw huiˬ laˇ mahˇ laˇ˗eu meh. (Heˬbyehˇ 5:13, 14) Jaˇliꞈ aˬ dui˗ahˇ aˬ jeˬ mehˬ˗eu nga? lehˇ ehˇ˗eu paˇ dmˬ hawˇ˗eu Jaˇliꞈ˗ahˇ dzaw geuꞈ˗eu gʼaˇ duˬ, Yeˬhawˇbaˬ Saˇ kiˇ tiˬ gʼaˬ paˬ˗ahˇ kuˇ nya meh. Jaˇliꞈ gaˇ kawˆ ngehˬ˗ehˇ siˬ nya laˇ naˇ ngehˬ˗ehˇ, laꞈ kʼaˬ cehˇ nui saˇ oꞈ˗eu jeˬ za˗eu yaw duˬ baw meh.—Ja ceuˬ 1:1-3; 73:27, 28-ahˇ gui˗awˬ.

Muiˬ˗eu gaˇ kawˆ heu˗aˬ, laꞈ kʼaˬ cehˇ˗eu Yeˬhawˇbaˬ jawˇ gaˇ neh oe˗euˬ meh. Miˬyehˇ˗ahˇ uˬ duˬ tahˬ˗eu deuˬ nehˬ˗ehˇ nawˇ cawˬ cawˬ ngeh jawˇ, Miˬyehˇ˗euˬ dawˬ peh jiˆ peh laˇ˗eu jeˬ pyeuꞈ˗eu meh. (Heˬbyehˇ 10:24, 25) Nawˇ Yeˬhawˇbaˬ nui kʼahˇ shiˇ˗eu jeˬ˗ahˇ mˇ daˆ leꞈ naˇ, mˬ maˬ maˬ byaˆ zaˇ ziˇ dehꞈ˗eu jeˬ˗ahˇ za˗eu meh. Miˬyehˇ dawˬ peh peh leˇ ni mˇ˗eu heu naˇ, nawˬ˗euˬ dehꞈ ziˇ˗ahˇ mˇ nya˗eu yaw myaˬ jeˬ laꞈ kʼoeˇ neh muiˬ dzehˬ˗eu jeˬ pyeuꞈ meh.—1 Tiˆmoˇseˬ 1:11; 6:19-ahˇ gui˗awˬ.