Aˬ yawꞈ yawˬ ha˗euˬ tsawˇ jeuˬ˗ahˇ maˬ ngeuˇ˗eu Yeˬhawˇbaˬ˗ahˇ tseˇ

Jaˇliꞈ laꞈ kʼoeˇ “daoˇ aˇ bawˇ dehꞈ˗eu meuˬ” lehˇ kuˇ taˬ˗euˬ Yeˬliˇkoˇ meuˬ˗euˬ meuˬ meuˬ lahˇ kʼoeˇ taˆ, Laˬhaˇ lehˇ kuˇ˗eu meh maˬ laˇ tiˬ gʼaˬ˗euˬ iˇ kahˇ jaˆ˗eu meh. Aˬ yawꞈ˗euˬ iˇ kahˇ˗euˬ laˇ gʼoˆ zaˬ˗ahˇ neh laꞈ nyiˇ paw haw gʼeh naˇ, nahˇ ma yaw shehꞈ tahˬ bya taˬ˗euˬ myaˆ tiˬ haw mawˇ laˇ˗eu meh. (Dawˬmehˬmehˬ˗eu 34:3) Ehˇ kʼawꞈ meuˬ˗euˬ laꞈ kʼoeˇ paw haw gʼeh naˇ, tsawˇ haˬ deuˬ guˆ˗awˇ gʼaˬ baˬ luꞈ gaˇ ya mawˇ˗eu meh. Aˬ yawꞈ maꞈ Yeˬhawˇbaˬ Iˇsaˬleˬlaˆ deuˬ nehˬ˗ehˇ jawˇ˗awˇ aˬ yawꞈ maꞈ˗ahˇ laˆ cawˆ laˇ meh lehˇ siˬ nya˗eu meh. Aˬ yawꞈ maꞈ bi laˆ cawˆ˗eu geuˇ meh.

Iˇsaˬleˬlaˆ tsawˇ haˬ deuˬ Yeˬliˇkoˇ meuˬ˗euˬ dawˬ peh laˇ keuˆ taˬ˗euˬ meh. Dzeuˇ yaꞈ˗euˬ 40 kʼoꞈ˗ahˇ Yeˬhawˇbaˬ Paˬlawˇ hawˇ˗eu guiˇ maꞈ˗ahˇ Iˬ ma laˆ shaˆ Yaw neˇ˗ahˇ laˆ cawˆ˗awˇ, aˬ yawꞈ˗euˬ tsawˇ haˬ deuˬ˗ahˇ ka kʼoꞈ nehˬ˗euˬ meh. Iˇsaˬleˬlaˆ deuˬ bawˇ tsahˬ˗ahˇ tiˬ gaˇ saˇ˗i tiˬ gaˇ cah˗eu deuˬ pyeuꞈ˗awˇ yehˇ maˬ ngeuˇ kʼawꞈ, maˬ myahˇ laˇ˗euˬ heu kaˬ˗ahˇ jiˇ Yeˬhawˇbaˬ aˬ yawꞈ maꞈ˗ahˇ Aˬmawˇliˆ sahˬ paˬ Siˇhoˬ hawˇ˗eu Awˇgaˆ˗ahˇ deuˆ gʼaˬ nya ni caw ba nehˬ˗euˬ meh. Nymˬ˗mˇ aˬ yawꞈ maꞈ Yeˬliˇkoˇ meuˬ˗ahˇ laˇ luꞈ meh. Yeˬhawˇbaˬ yaw haiˬ yaw doeˇ jeˬ mˇ˗eu Yeˬliˇkoˇ meuˬ zaˬ deuˬ˗ahˇ bi laˆ cawˆ˗eu lehˇ gʼeh meh.

Laˬhaˇ aˬ yawꞈ˗euˬ tsawˇ jeuˬ deuˬ aˇ naˆ ni doeˇ˗eu lehˇ siˬ nya meh. Aˬ yawꞈ meh maˬ laˇ maˬ paˇ geuꞈ ni yaw muiˬ˗ehˇ dehꞈ gʼeh ma lehˇ noeˬ luꞈ˗eu paˬ. Aˬ yawꞈ Yeˬhawˇbaˬ˗euˬ gaˇ kawˆ ya siˬ ngeh, guˆ˗eu maˬ ngeuˇ ni noeˬ tmˬ˗eu jeˬ jaˆ laˇ˗euˬ meh. Yeˬhawˇbaˬ naˇ Kaˬnaˬ˗euˬ miˬ yehˇ deuˬ nehˬ˗ehˇ maˬ duˇ ni, aˬ yawꞈ-euˬ tsawˇ haˬ deuˬ˗ahˇ yaw zeu taˬ baw nehˬ˗awˇ haw piˇ nehˬ˗eu meh. Teu miˇ neh aˬ yawꞈ aˬ myah luꞈ tsaˬ˗eu jeˬ tehꞈ˗ehˇ mˇ˗awˇ muiˬ˗eu shawˇ˗eu uˬ taꞈ, aˬ yawꞈ˗euˬ tsawˇ haˬ˗ahˇ haw piˇ nehˬ nya˗eu Yeˬhawˇbaˬ˗ahˇ uˬ duˬ tahˬ mawꞈ laˇ˗euˬ meh.

Tiˬ miˇ daˬ yah nyiˬ gʼaˬ aˬ yawꞈ˗euˬ iˇ kahˇ˗ahˇ yaꞈ le˗euˬ meh. Aˬ yawꞈ teu nyiˬ gʼaˬ naˇ Iˇsaˬleˬlaˆ˗euˬ kʼoeˬ sho haw laˇ˗euˬ tsawˇ haˬ pyeuꞈ nga lehˇ taˆ lehˇ haw doˆ nya˗euˬ meh. Toˆ˗ehˇ siˬ nya˗eu aˬ yawꞈ tehꞈ maˬ ngeuˇ˗a. Yeˬliˇkoˇ˗euˬ sahˬ paˬ aˬ yawꞈ˗euˬ tsawˇ haˬ˗ahˇ kʼehˇ gʼeh˗awˇ kʼoeˬ sho haw laˇ˗euˬ kʼoeˇ nyiˬ gʼaˬ˗ahˇ bi nyehꞈ˗iˇ˗euˬ meh. Teu ngeh Laˬhaˇ aˬ yawꞈ˗euˬ dehꞈ ziˇ˗ahˇ bi paˇ˗iˇ˗eu jeˬ ya noeˬ tsehˆ meh. Haiˬ˗eu doeˇ˗eu aˬ yawꞈ˗euˬ tsawˇ haˬ paw jawˇ˗eu laˬ, maˬ ngeuˇ naˇ Yeˬhawˇbaˬ paw jawˇ˗eu laˬ lehˇ ya tseˇ meh.

Laˬhaˇ kʼaˬ duˬ ni Yeˬhawˇbaˬ˗ahˇ tseˇ˗euˬ meh. Aˬ yawꞈ kʼoeˬ sho haw laˇ˗euˬ kʼoeˇ nyiˬ gʼaˬ˗ahˇ nymˇ mˬ laꞈ taˆ sheuˬ zaꞈ taˬ˗awˇ, sahˬ paˬ˗euˬ tsawˇ haˬ deuˬ˗ahˇ yawˬ paw yawˬ toeˬ ceh nehˬ˗euˬ meh. Aˬ yawꞈ maꞈ iˇ doˆ˗euˬ nehˬ˗ehˇ Laˬhaˇ kʼoeˬ sho haw laˇ˗euˬ kʼoeˇ nyiˬ gʼaˬ˗ahˇ aˬ yawꞈ aˬ jeˬ miˇ neh caw ba˗euˬ gaˇ kawˆ ehˇ nehˬ˗euˬ meh. Aˬ yawꞈ “Miˇ kʼahˬ heu kʼahˬ Sahˬpaˬ Miˬyehˇ neh naw maꞈ˗ahˇ biꞈ gʼaˬ˗euˬ meh lehˇ ngaˇ siˬ nya ma” lehˇ ehˇ nehˬ˗euˬ meh. Aˬ yawꞈ Iˇsaˬleˬlaˆ deuˬ˗euˬ Miˬyehˇ˗ahˇ jah˗eu meh. Kʼoeˇ naˇ, Yeˬliˇkoˇ meuˬ zaˬ deuˬ Iˇsaˬleˬlaˆ deuˬ˗ahˇ guˆ luꞈ˗eu lehˇ aˬ yawꞈ nyaꞈ˗ahˇ gʼaˬ bi ahˇ leˇ˗eu dawˬ ehˇ nehˬ˗awˇ, Yeˬhawˇbaˬ meuˬ heu meuˬ˗ahˇ laˆ cawˆ ngeh nga pehˬ˗euˬ nymˇ jiˇ˗ahˇ haw piˇ nehˬ laꞈ lehˇ tahˬ shaˇ˗euˬ meh.

Kʼoeˬ sho haw laˇ˗euˬ kʼoeˇ nyiˬ gʼaˬ, Laˬhaˇ aˬ yawꞈ nyaꞈ˗ahˇ caw ba˗euˬ miˇ neh, aˬ yawꞈ Yeˬhawˇbaˬ paw jawˇ ngaˇ lehˇ ya siˬ˗euˬ meh. Teu miˇ neh aˬ yawꞈ neh shaˇ˗euˬ loꞈ˗ehˇ mˇ nehˬ˗euˬ meh. Aˬ yawꞈ pehˬ maˬ paˇ ya shiˇ meh. Ehˇ kʼawꞈ, aˬ yawꞈ kʼoeˬ sho haw laˇ˗euˬ gaˇ kawˆ teu ya laˆ zaꞈ taˬ˗eu uˬ taꞈ, laˇ gʼoˆ zaˬ˗ahˇ aˇ caˆ caˆ neˇ ya paꞈ gʼeu taˬ˗awˇ Iˇsaˬleˬlaˆ deuˬ guiˇ deuˆ laˇ ngeh, aˬ yawꞈ pehˬ˗euˬ nymˇ jiˇ iˇ kahˇ laꞈ kʼoeˇ tehꞈ˗ehˇ ya jawˇ˗eu meh. Toˆ˗ehˇ jahˇ˗awˇ neh tehꞈ˗ehˇ aˬ yawꞈ pehˬ˗euˬ nymˇ jiˇ ya buˬ˗iˇ˗eu meh.

Laˬhaˇ laˇ gʼoˆ zaˬ˗ahˇ neh aˇ caˆ pyehˬ ka gʼeh˗awˇ kʼoeˬ sho haw laˇ˗euˬ teu nyiˬ gʼaˬ˗ahˇ bi zaꞈ ka˗iˇ˗euˬ meh. Kʼoeˇ naˇ aˬ yawꞈ nyaꞈ neh kʼaˇ ehˇ˗euˬ loꞈ˗ehˇ mˇ˗euˬ meh. Aˬ yawꞈ laˇ gʼoˆ zaˬ˗ahˇ aˇ caˆ caˆ neˇ paꞈ gʼeu taˬ˗euˬ meh. Kʼoeˬ sho haw laˇ˗euˬ deuˬ˗euˬ gaˇ kawˆ tiˬ gʼaˬ˗ahˇ˗iˬ maˬ ehˇ nehˬ˗aˬ. Toˆ˗ehˇ jahˇ˗eu gʼaˇ duˬ kʼaˬ duˬ ni ya gʼeh meh. Aˬ yawꞈ neh jahˇ˗euˬ jeˬ teu˗ahˇ tiˬ gʼaˬ na siˬ nya naˇ ya shiˇ˗eu yaw duˬ baw meh. Aˬ yawꞈ ehˇ dawˬ naˇ haˬ˗eu laꞈ kʼoeˇ nymˇ jiˇ laꞈ kʼoeˇ˗euˬ deuˬ˗ahˇ iˇ kahˇ˗ahˇ tehꞈ˗ehˇ bi jawˇ˗euˬ meh. Yeˬhawˇbaˬ Iˇsaˬleˬlaˆ deuˬ cah tsehˆ nya ni Yawˇdaˬ lawˇ baˬ bi naˬ leˇ˗euˬ lehˇ ya siˬ ngeh ngehˬ˗ehˇ dzehˬ, aˬ yawꞈ neh noeˬ tsehˆ˗euˬ teu tsaˬ ngaˇ˗a lehˇ noeˬ˗eu yaw duˬ baw meh. Iˇsaˬleˬlaˆ deuˬ Yeˬliˇkoˇ meuˬ˗ahˇ cah jawˬ˗euˬ shiꞈ nah laꞈ kʼoeˇ meuˬ zaˬ deuˬ guˆ˗awˇ yaw dzuˬ dzuˬ˗eu yaw duˬ baw meh. Shiꞈ nah aˬ yawꞈ nah˗ahˇ piˇ ma deuˬ daˇ heh baw˗awˇ Iˇsaˬleˬlaˆ deuˬ guˇ kʼaˆ leꞈ ngeh, meuˬ lahˇ ga byaˆ˗euˬ meh. Ehˇ kʼawꞈ, Laˬhaˇ pehˬ˗euˬ nymˇ jaˆ˗eu meuˬ lahˇ tiˬ pyehˬ naˇ maˬ ga byaˆ˗iˇ˗aˬ. Aˬ yawꞈ pehˬ tiˬ jeˬ˗iˬ maˬ ca laˇ ni ya buˬ˗iˇ˗euˬ meh.

Guiˇ deuˆ gʼaˬ ngeh Yawˇshuˆ neh ehˇ˗euˬ loꞈ˗ehˇ kʼoeˬ sho haw leˇ˗euˬ kʼoeˇ nyiˬ gʼaˬ Laˬhaˇ hawˇ˗eu aˬ yawꞈ˗euˬ nymˇ jiˇ˗ahˇ kuˇ doˆ laˬ˗iˇ˗euˬ meh. Aˇ nah naˇ Laˬhaˇ Iˇsaˬleˬlaˆ tsawˇ jeuˬ laꞈ kʼoeˇ˗euˬ tiˬ gʼaˬ ya pyeuꞈ laˇ˗euˬ meh. Aˬ yawꞈ Iˇsaˬleˬlaˆ tsawˇ haˬ˗ahˇ dahˬ dzaˬ˗iˇ˗awˇ zaˬ jawˇ le˗euˬ meh. Yaw myaˬ yaˇ kʼoꞈ byah laˇ ngeh, miˇ tsaˬ kʼoeˇ taˆ˗ahˇ neh nui kʼaˬ kʼaˇ ahˇ˗eu gʼaˬ pyeuꞈ˗eu Yeˬsuˇ, aˬ yawꞈ˗euˬ aˇ jeuˬ˗ahˇ neh dehꞈ le˗euˬ meh. (Maꞈtehˬ 1:5, 16) Yeˬhawˇbaˬ Laˬhaˇ˗euˬ nui jah hawˇ˗eu kʼaˬ duˬ ni gʼeh˗eu jeˬ˗ahˇ guiˬ lahˬ biꞈ ngaˬ˗aˇ.

Jaˇliꞈ aˇ deuˆ heu deuˬ˗ahˇ gui:

• Yawˇshuˆ 2:1-24; 5:1; 6:14-25

• Heˬbyehˇ 11:30, 31

• Yaˬkoˆ 2:24, 25

Ja sawˇ˗eu gʼaˇ duˬ:

Laˬhaˇ kʼaˬ duˬ ni gʼeh˗eu lehˇ aˬ joˇ joˆ˗ehˇ mˇ mawˇ˗euˬ nga?

Naꞈ suiˇ ni poˆ tseˇ

1. 1. Laˬhaˇ Yeˬliˇkoˇ meuˬ˗ahˇ aˬ joˆ˗ehˇ dehꞈ˗euˬ nga? (w13-SI 11/1 12 ¶4–13 ¶1)

   Dawˬ kʼoꞈ

2. 2. Kʼoeˬ sho haw leˇ˗euˬ teu nyiˬ gʼaˬ, Laˬhaˇ˗euˬ iˇ kahˇ˗ahˇ le˗euˬ teu naˇ, yuꞈ taꞈ jawˇ taꞈ˗eu gʼaˇ duˬ le˗euˬ maˬ ngeuˇ˗eu lehˇ aˬ jeˬ miˇ neh ehˇ nya nga? (it “Meh maˬ laˇ” ¶16-wcgr˗SI)

   Dawˬ kʼoꞈ

3. 3. Laˬhaˇ˗euˬ nymˇ mˬ˗ahˇ aˬ jeˬ miˇ neh dziˬ dziˬ dzahˬ jaˆ˗eu nga? Teu aˬ jeˬ˗euˬ gʼaˇ duˬ zmˬ˗euˬ nga? (it “Dziˬ dziˬ bawˬ” ¶2-4-wcgr˗SI) (Aˇ baˇ 1)

   Dawˬ kʼoꞈ

   

   Thanks for your interest in my photos/Moment Open via Getty Images

4. 4. Laˬhaˇ sahˬ paˬ˗euˬ tsawˇ haˬ˗ahˇ jaˬ myawꞈ myawꞈ˗euˬ heu naˇ aˬ jeˬ miˇ neh yaw lehˬ maˬ ngeuˇ nga? (w04-SI 12/1 8 ¶6) (Aˇ baˇ 2)

   Dawˬ kʼoꞈ

   

Aˬ joˆ˗ehˇ zmˬ˗iˇ nya nga lehˇ shaˇ noeˬ

• Laˬhaˇ meh maˬ laˇ maˬ paˇ geuꞈ ni Yeˬhawˇbaˬ˗ahˇ uˬ duˬ tahˬ laˇ˗eu gʼaˇ duˬ, aˬ jeˬ miˇ neh kʼaˬ duˬ ni ya gʼeh nga? Jaˇliꞈ dzaw zaˬ deuˬ aˬ yawꞈ˗ahˇ aˬ jeˬ dzaw geuꞈ nya nga?

  Dawˬ kʼoꞈ

• Laˬhaˇ˗euˬ kʼaˬ duˬ ni gʼeh˗eu jeˬ˗ahˇ aˬ joˆ˗ehˇ dzaw geuꞈ nya nga siˬ?

  Dawˬ kʼoꞈ

Naꞈ suiˇ ni shaˇ noeˬ

• Gaˇ kawˆ heu Yeˬhawˇbaˬ nehˬ˗ehˇ taꞈ leˇ˗awˇ ngaˬ˗ahˇ aˬ jeˬ bi siˬ laꞈ nga?

  Dawˬ kʼoꞈ

• Gaˇ kawˆ heu miˇ shuiꞈ˗ahˇ Yeˬhawˇbaˬ neh saˇ jaˇ dzaˬ taˬ˗euˬ jeˬ nehˬ˗ehˇ aˬ joˆ˗ehˇ taꞈ nga?

  Dawˬ kʼoꞈ

• Laˬhaˇ gʼoꞈ dehꞈ laˇ ngeh ngaˇ aˬ jeˬ naˇ haˬ paˬ nga?

  Dawˬ kʼoꞈ

Haw lahˬ

Yeˬhawˇbaˬ˗euˬ aˇ nah keuˆ le ngeh ya buˬ˗iˇ˗eu jeˬ nehˬ˗ehˇ taꞈ leˇ˗awˇ Laˬhaˇ˗ahˇ neh aˬ jeˬ ya siˬ nga?

“Aˇ saˬ saˬ˗eu aˇ nah keuˆ le ngeh, nawˇ aˬ gaˇ jawˇ paˬ˗ehˇ gʼeh nga?” (w09-SI 5/15 6-8)

Jaˇliꞈ laꞈ kʼoeˇ˗euˬ gaˇ kawˆ aˇ baˇ boꞈ taˬ˗euˬ jeˬ˗ahˇ zmˬ˗awˇ, zaˬ deuˬ˗ahˇ gaˇ kawˆ heu˗ahˇ gʼoˆ shaw dzehˬ laˇ ni caw ba nehˬ.

“Laˬhaˇ kʼaˇ ehˇ˗euˬ loꞈ˗ehˇ mˇ caw” (ijwis˗SI gaˇ kawˆ 11)