Miˬyehˇ˗ahˇ gʼoe naˇ nymˇ jiˇ nui saˇ oꞈ meh

Sheuˬ dahˬ dzaˬ˗eu jeˬ˗ahˇ Yeˬhawˇbaˬa Miˬyehˇ neh behˬ˗euˬ meh. Beh dahˬ beh˗euˬ zaˬ miˬ zaˬ gʼaˬ˗ahˇ, kʼaˬ dzeˇ zaˬ gʼaˬ “jawˇ gaˇ sheuˬ gʼeh”˗euˬ meh lehˇ, Jaˇliꞈ ehˇ˗eu meh. Aˬdaˬ laꞈ kʼaˬ cehˇ dui dui˗awˇ “ngaˬ˗euˬ shaˬ yoeˬ . . . ngaˬ˗euˬ shaˬ jiˇ” lehˇ ehˇ˗eu meh. (Aˇdahˬbeh˗eu 2:22, 23) Yeˬhawˇbaˬ nymˇ keuˆ ni sheuˬ dahˬ dzaˬ˗euˬ deuˬ˗ahˇ, laꞈ kʼaˬ tiˬ cehˇ bi dehꞈ mawꞈ˗eu meh.

Sheuˬ dahˬ dzaˬ ngeh jawˇ, yawˬ jeˬ na luꞈ byah kuꞈ jiˇ maˬ lehˇ noeˬ tehꞈ˗a. Ehˇ kʼawꞈ maˇ diˇ naˇ, gaˬ dui dui˗awˇ yuˇ˗euˬ deuˬ kʼawꞈ shaˬ zahˬ˗ahˇ ya tahˬ puˬ luꞈ˗eu meh. (1 Gawˇliˬtu 7:28) Paˇ dmˬ heu laꞈ kʼoeˇ, Jaˇliꞈ zahˇ yaw myaˬ deuˆ ahˇ˗eu meh. Teu deuˬ˗ahˇ mˇ caw naˇ, nawˬ˗euˬ nymˇ jiˇ nui saˇ oꞈ˗eu jeˬ˗ahˇ za meh.—Ja ceuˬ 19:8-11.

1 Yeˬhawˇbaˬ neh nawˬ˗ahˇ biꞈ nehˬ taˬ˗euˬ gaˇ deuˬ˗ahˇ mˇ caw˗awˬ

Jaˇliꞈ ehˇ˗eu: Kʼaˬ dzeˇ zaˬ naˇ, nymˇ sahˇ aˬ da pyeuꞈ meh.—Eˇpeˇsu 5:23.

Nawˇ kʼaˬ dzeˇ zaˬ pyeuꞈ naˇ,Yeˬhawˇbaˬ Miˬyehˇ nawˬ˗ahˇ, nui ma nahˬ yu ni miˬ zaˬ˗ahˇ bi bo saˆ mawꞈ˗eu meh. (1 Beˬtuˆluˆ 3:7) Miˬ zaˬ˗ahˇ beh˗euˬ heu naˇ, nawˬ˗euˬ dehꞈ cawˬ bi pyeuꞈ˗eu lehˇ meh. Teu miˇ neh, kʼaˬ dzeˇ zaˬ deuˬ miˬ zaˬ˗ahˇ gaˬ˗awˇ yaw zeu ya baw meh. (Aˇdahˬbeh˗eu 2:18) Yawˬ ha˗euˬ mawˇ do˗ahˇ gaˬ˗eu naˆ maˬ tseˇ, yawˬ ha˗euˬ miˬ zaˬ˗ahˇ ya gaˬ meh.—Eˇpeˇsu 5:25-29.

Nawˇ zaˬ miˬ zaˬ pyeuꞈ naˇ, Yeˬhawˇbaˬ nawˬ˗euˬ kʼaˬ dzeˇ zaˬ˗ahˇ, yaw zeu baw dui dui˗eu laꞈ kʼoeˇ, bi caw ba mawꞈ˗eu meh. (1 Gawˇliˬtu 11:3; Eˇpeˇsu 5:33) Kʼaˬ dzeˇ zaˬ neh noeˬ tsehˆ˗euˬ jeˬ˗ahˇ gʼaˬ biꞈ˗awˇ, mehˬ bawˬ gm˗eu laꞈ kʼoeˇ ya mˇ meh. (Gawˇlawˇsehˇ 3:18) Toˆ˗ehˇ naˇ, Yeˬhawˇbaˬ hawˇ˗eu kʼaˬ dzeˇ zaˬ˗euˬ mehˬ shi, aˇ poeˬ baw dui dui˗eu zaˬ miˬ zaˬ tiˬ gʼaˬ pyeuꞈ meh.—1 Beˬtuˆluˆ 3:1-6.

Nawˇ mˇ nya˗eu jeˬ:

• Muiˬ˗eu kʼaˬ dzeˇ zaˬ hawˇ˗eu muiˬ˗eu zaˬ miˬ zaˬ pyeuꞈ nya ni aˬ joˆ˗ehˇ jahˇ paˬ nga lehˇ nyiˬ gʼaˬ yaw kaˬ naˇ haˬ˗awˬ. Aˬ yawꞈ ngehˬ gaˇ yaw muiˬ˗ehˇ naˇ haˬ˗awˇ dehꞈ paˇ˗awˬ

• Oˇ oꞈ˗awˬ. Aˬ jeˬ miˇ neh ehˇ naˇ, tiˬ gʼaˬ tiˇ gʼaˬ laꞈ kʼaˬ bi cehˇ˗eu gʼaˇ duˬ siˬ nya laˇ ni, aˇ yamˬ ya zmˬ˗eu miˇ neh meh

2 Tiˬ gʼaˬ˗euˬ laꞈ taꞈ tiˬ gʼaˬ noeˬ keuˆ˗eu

Jaˇliꞈ ehˇ˗eu: Nawˇ yawˬ ha˗euˬ aˇ gu geuꞈ mawꞈ˗eu jeˬ˗ahˇ ya noeˬ keuˆ nehˬ meh. (Piˇliˇpiˆ 2:3, 4) Pyuˇ shuiˇ˗ahˇ haw piˇ˗eu loꞈ˗ehˇ, yawˬ ha˗euˬ aˇ gu˗ahˇ ya haw piˇ˗eu meh. Yeˬhawˇbaˬ aˬ dui˗ahˇ “nui ma gʼawˬ mahˇ ni” bi gʼeh mawꞈ meh lehˇ maˬ ya ngehˇ˗a. (2 Tiˆmoˇseˬ 2:24) “Dawˬ doeˇ ngehˬ˗eu mi cehˇ coeˇ gaˇ duˇ˗awˇ, tsawˇ gahˇ ahˇ˗eu dawˬ muiˬ, jaˆ gʼaˬ˗ahˇ duˇ˗eu meh.” Kʼoeˇ miˇ neh, maˬ ngehˬ mi na˗ehˇ yaw muiˬ˗ehˇ ya shaˇ noeˬ meh. (Dawˬdaˬ 12:18) Tiˬ gʼaˬ tiˇ gʼaˬ gʼoeˇ˗eu gaˬ˗eu laꞈ kʼoeˇ ngehˬ cawˬ nya ni, Yeˬhawˇbaˬ˗euˬ baoˬ nawˬ˗ahˇ caw ba nehˬ laꞈ tehꞈ˗a. —Gaˬlaˬtiˆ 5:22, 23; Gawˇlawˇsehˇ 4:6.

Nawˇ mˇ nya˗eu jeˬ:

• Yawˬ ha˗euˬ aˇ gu nehˬ˗ehˇ gaˇ kawˆ doˆ laˇ ngeh jawˇ, a lawˆ lawˆ˗ehˇ ja sawˇ nya ni guiˬ lahˬ shaˇ˗awˬ

• Aˬ jeˬ ngehˬ˗eu, aˬ joˆ˗ehˇ ngehˬ paˬ nga lehˇ, maˬ ngehˬ mi na˗ehˇ shaˇ noeˬ˗awˬ

3 Tiˬ gaˇ gm˗awˬ

Jaˇliꞈ ehˇ˗eu: Sheuˬ dahˬ dzaˬ shaw naˇ, nawˬ˗euˬ aˇ gu nehˬ˗ehˇ “tiˬ shiˬ tiˬ shaˬ” tehꞈ˗ehˇ pyeuꞈ laˇ˗euˬ meh. (Maꞈtehˬ 19:5) Ehˇ kʼawꞈ, mawˇ do nyiˬ do lehˇ pyeuꞈ˗eu miˇ neh, nui noeˬ beu gaˇ˗eu meh. Teu miˇ neh, tiˬ gʼaˬ tiˇ gʼaˬ nui noeˬ tiˬ gaˇ duˇ leˇ ni ya leh jeh˗eu meh. (Piˇliˇpiˆ 2:2) Aˬ geu jeˬ noeˬ tsehˆ˗eu maˬ kaˬ, mehˬ bawˬ tiˬ gaˇ ya gm meh. Jaˇliꞈ ehˇ˗eu, bawˬ dzaˬ˗awˇ mˇ naˇ gaˇ pyeuꞈ leˇ meh. (Dawˬdaˬ 20:18) Aˇ yehˇ huiˬ˗eu gaˇ kawˆ deuˬ˗ahˇ noeˬ tsehˆ ngeh, Jaˇliꞈ zahˇ˗ahˇ tiˬ kawˆ loꞈ˗ehˇ zmˬ˗awˬ.—Dawˬdaˬ 8:32, 33.

Nawˇ mˇ nya˗eu jeˬ:

• Gaˇ kawˆ hawˇ˗eu nui noeˬ tehꞈ˗ehˇ maˬ ehˇ nehˬ ni, nawˬ˗euˬ nui ma laꞈ kʼoeˇ pyeuꞈ luꞈ˗eu jeˬ˗ahˇ ehˇ nehˬ˗awˬ

• Maˬ noeˬ tsehˆ mi na˗ehˇ, nawˬ˗euˬ aˇ gu nehˬ˗ehˇ bawˬ dzaˬ˗awˬ