Yuiꞈ nyiˇ nehˬ˗ehˇ tsaˬ leˇ dzoeˇ leˇ˗eu

Sheuˬ dahˬ dzaˬ˗eu heu naˇ, nymˇ jiˇ yaw shuiꞈ beh˗eu jeˬ pyeuꞈ meh. Aˬ da aˬ ma˗ahˇ gaˬ˗awˇ yaw zeu baw kʼawꞈ, nymˇ aˇ yehˇ huiˬ dzehˬ˗eu gʼaˬ naˇ, yawˬ ha˗euˬ aˇ gu pyeuꞈ laˇ˗euˬ meh. Naw nyaꞈ teu loꞈ˗ehˇ pyeuꞈ luꞈ gaˇ, aˬ yuiꞈ aˬ nyiˇ deuˬ ya mawˇ ngeh, ha geuꞈ˗eu yaw shaˬ tehꞈ˗a. Ehˇ kʼawꞈ ni, nymˇ jiˇ yaw shuiꞈ beh luꞈ˗eu laꞈ kʼoeˇ, yuiꞈ nyiˇ deuˬ nehˬ˗ehˇ kʼawꞈ tsaˬ leˇ dzoeˇ leˇ nya ni, Jaˇliꞈ zahˇ aˬ dui˗ahˇ caw ba nehˬ nya meh.

1 Yuiꞈ nyiˇ deuˬ nehˬ˗ehˇ dehꞈ tsaˬ˗eu

Jaˇliꞈ ehˇ˗eu: “Nawˬ da nawˬ ma˗ahˇ yaw zeu baw˗awˬ.” (Eˇpeˇsu 6:2) Nawˇ aˇ myaˆ kʼoꞈ byah laˇ kʼawꞈ, aˬ da aˬ ma˗ahˇ ya taˬ huiˬ˗awˇ ya haw piˇ nehˬ meh. Kʼoeˇ loꞈ˗ehˇ duˇ ni nawˬ˗euˬ aˇ gu kʼawꞈ, aˬ yawꞈ˗euˬ aˬ da aˬ ma˗ahˇ ya haw piˇ nehˬ meh lehˇ maˬ ya ngehˇ˗a. “Gaˬ˗eu jeˬ . . . myaˆ maˬ naˆ˗a” lehˇ Jaˇliꞈ laꞈ kʼoeˇ ehˇ taˬ˗euˬ meh. Teu miˇ neh, nawˬ˗euˬ aˇ gu aˬ yawꞈ˗euˬ aˬ da aˬ ma nehˬ˗ehˇ yaw gʼoeˇ gʼoeˇ˗ehˇ dehꞈ gaˇ, nui kʼahˇ maˬ shiˇ ni maˬ ya gʼeh˗a.—1 Gawˇliˬtu 13:4; Gaˬlaˬtiˆ 5:26.

Nawˇ mˇ nya˗eu jeˬ:

• “Nawˬ˗euˬ nymˇ jiˇ, aˬ myah luꞈ ngaˬ˗ahˇ haw teˬ laˇ nga” “Nawˬ ma naˇ˗aˬ, ngaˇ yaw muiˬ mˇ nehˬ kʼawꞈ tiˬ jawˇ˗iˬ yaw muiˬ maˬ baw nga” lehˇ maˬ siˬ˗ehˇ taˬ ngehˬ myaˬ

• Nawˬ˗euˬ aˇ gu˗euˬ nui ma˗ahˇ gʼoˆ shaw nya ni, aˬ yawꞈ˗euˬ jawˇ duˬ˗ahˇ jawˇ˗awˇ shaˇ noeˬ˗awˬ

2 Ngehˬ tsehˆ taˬ˗awˬ

Jaˇliꞈ ehˇ˗eu: “Kʼaˬ dzeˇ zaˬ˗aˬ, yawˬ ha˗euˬ aˬ ma aˬ da˗ahˇ ya gʼawˬ iˇ˗awˇ, yawˬ ha˗euˬ miˬ zaˬ nehˬ˗ehˇ taꞈ leˇ˗eu laꞈ kʼoeˇ, nyiˬ gʼaˬ˗euˬ tiˬ shiˬ tiˬ shaˬ tehꞈ˗ehˇ ya pyeuꞈ laˇ˗eu meh.” (Aˇdahˬbeh˗eu 2:24) Nawˇ nymˇ dahˬ baw dzeuˇ kʼawꞈ, aˬ da aˬ ma tiˬ deuˬ na˗aˬ, nawˬ˗ahˇ kʼahˬ lahˇ˗eu miˇ neh caw ba nehˬ mawꞈ˗eu meh. Ehˇ kʼawꞈ, aˬ yawꞈ maꞈ neh kʼahˬ lahˇ˗euˬ jeˬ heu naˇ, nymˇ jiˇ laꞈ kʼoeˇ suˬ saˬ˗eu jeˬ kʼawꞈ pyeuꞈ laˇ nya˗eu meh.

Nymˇ jiˇ laꞈ kʼoeˇ aˬ da aˬ ma deuˬ aˇ dzehˬ˗ehˇ suˬ saˬ laˇ naˇ, naw nyaꞈ bawˬ dzaˬ˗awˇ, aˬ yawꞈ maꞈ˗ahˇ yaw zeu baw˗eu laꞈ kʼoeˇ dawˇ coe ni ehˇ nehˬ˗awˬ. (Dawˬdaˬ 15:1) Taˬ nyiˇ˗eu jeˬ, gʼawˬ shaˬ gaˬ˗eu jeˬ, nui ma mahˇ˗eu jeˬ, heu deuˬ ahˇ naˇ, nawˬ˗euˬ yuiꞈ nyiˇ deuˬ nehˬ˗ehˇ kʼawꞈ tsaˬ leˇ˗awˇ, “nui ma gʼawˬ mahˇ ni . . . gʼoeˇ˗eu gaˬ˗eu laꞈ kʼoeˇ tiˬ gʼaˬ tiˇ gʼaˬ oˇ” nehˬ nya meh.—Eˇpeˇsu 4:2.

Nawˇ mˇ nya˗eu jeˬ:

• Yuiꞈ nyiˇ deuˬ nymˇ jiˇ laꞈ kʼoeˇ aˇ dzehˬ˗ehˇ suˬ saˬ laˇ˗eu miˇ neh nui ma maˬ saˇ naˇ, gaˇ kawˆ maˬ doˆ laˇ mi na˗ehˇ, nawˬ˗euˬ aˇ gu nehˬ˗ehˇ ja sawˇ˗awˬ

• Gaˇ kawˆ heu deuˬ˗ahˇ aˬ joˆ˗ehˇ jahˇ˗eu lehˇ, nyiˬ gʼaˬ yaw kaˬ ja tsaˬ taˬ˗awˬ