Gaˇ kawˆ˗ahˇ laˆ piˇ˗eu jeˬ

Naw nyaꞈ nymˇ dahˬ beh ngeh, gaˇ kawˆ yaw myaˬ jeˬ˗ahˇ ya tahˬ puˬ meh. Aˬ jeˬ miˇ neh ehˇ naˇ, noeˬ˗eu jeˬ, nui ma laꞈ kʼoeˇ pyeuꞈ luꞈ˗eu jeˬ, dehꞈ jeˬ dehꞈ kawˆ, heu deuˬ maˬ duˇ leˇ˗eu miˇ neh meh. Maˬ ngeuˇ naˇ, laꞈ nyiˇ paw neh laˇ˗euˬ gaˇ kawˆ hawˇ˗eu maˬ noeˬ gaˇ pyeuꞈ laˇ˗euˬ gaˇ kawˆ deuˬ baˬ da neh meh.

Gaˇ kawˆ kʼaˇ doˆ laˇ ngeh, maˬ ja tsaˬ ni taˬ cah lehˇ, Jaˇliꞈ laꞈ kʼoeˇ gʼaˬ biꞈ taˬ˗euˬ meh. (Maꞈtehˬ 5:23, 24) Jaˇliꞈ zahˇ˗ahˇ zmˬ naˇ, gaˇ kawˆ deuˬ˗ahˇ ja tsaˬ nya˗eu jeˬ ya mawˇ meh.

1 Gaˇ kawˆ˗ahˇ ja sawˇ˗awˬ

Jaˇliꞈ ehˇ˗eu: “Dawˬ ja˗eu yamˬ baw˗eu meh.” (Dawˬtsoˆtsoˆ˗eu 3:1, 7) Aˇ yamˬ yuˇ˗awˇ neh gaˇ kawˆ˗ahˇ ja sawˇ˗awˬ. Nawˇ aˬ joˆ˗ehˇ noeˬ nya, nawˬ˗euˬ nui ma laꞈ kʼoeˇ aˬ joˆ˗ehˇ pyeuꞈ luꞈ nya lehˇ bya cehˆ ni ehˇ nehˬ˗awˬ. Nawˬ˗euˬ aˇ gu˗ahˇ yawˬ jawˇ na luꞈ “yaw tsaˬ yaw dawˇ jeˬ ngehˬ˗awˬ.” (Eˇpeˇsu 4:25) Gaˇ kawˆ ja sawˇ ngeh nui ma pehˇ laˇ kʼawꞈ, maˬ ceh dzaˬ ni a lawˆ lawˆ˗ehˇ ja sawˇ naˇ, gaˇ kawˆ maˬ bi huiˬ laˇ ni laˆ tsaˬ nya meh.—Dawˬdaˬ 15:4; 26:20.

Gaˇ kawˆ tiˬ deuˬ na, nawˬ˗euˬ nui ma˗ahˇ maˬ laˇ˗eu kʼawꞈ, nahˬ yu ni ya ngehˬ nehˬ meh. Nawˬ˗euˬ aˇ gu˗ahˇ nui gaˬ hawˇ˗eu yaw zeu baw˗eu jeˬ mˇ mawˇ nehˬ˗eu maˬ ya ngehˇ˗a. (Gawˇlawˇsehˇ 4:6) Gaˇ kawˆ˗ahˇ yaw kawˇ ma˗ehˇ laˆ tsaˬ nya ni leh jeh˗awˬ, dawˬ maˬ ngehˬ cawˬ ni taˬ gʼeh.—Eˇpeˇsu 4:26.

Nawˇ mˇ nya˗eu jeˬ:

• Gaˇ kawˆ˗ahˇ ja sawˇ˗eu gʼaˇ duˬ aˇ yamˬ tseˇ˗awˬ

• Aˬ yawꞈ ngehˬ gaˇ maˬ ngehˬ bahˬ ni, yaw muiˬ˗ehˇ naˇ haˬ˗awˬ. Aˬ yawꞈ ngehˬ gʼaˬ˗awˇ neh tehꞈ˗ehˇ ngehˬ˗awˬ

2 Naˇ haˬ nehˬ˗awˇ, gʼoˆ shaw nehˬ˗awˬ

Jaˇliꞈ ehˇ˗eu: “Tiˬ gʼaˬ tiˇ gʼaˬ gaˬ˗awˇ, tiˬ gʼaˬ tiˇ gʼaˬ yaw zeu baw˗eu nui ma ahˇ˗awˬ.” (Loˇmaˆ 12:10) Yaw muiˬ paˬ˗ehˇ naˇ haˬ˗eu heu naˇ, aˇ yehˇ huiˬ˗eu jeˬ pyeuꞈ meh. “Gʼawˬ shaˬ gaˬ˗awˇ nui nahˬ nui yu ahˇ”˗eu laꞈ kʼoeˇ, nawˬ˗euˬ aˇ gu aˬ joˆ˗ehˇ noeˬ nga lehˇ gʼoˆ shaw˗eu gʼaˇ duˬ, ya leh jeh meh. (1 Beˬtuˆluˆ 3:8; Yaˬkoˆ 1:19) Nawˇ gaˇ mˇ luꞈ ngeh, nawˬ˗euˬ aˇ gu ngehˬ cawˬ laˇ naˇ, naˇ haˬ˗eu geuꞈ˗awˇ maˬ naˇ haˬ ni taˬ gʼeh. Gʼeh nya naˇ, gaˇ kʼoeˇ naˬ tawˬ˗awˇ ngehˬ cawˬ˗awˬ, maˬ ngeuˇ naˇ, yawˬ poˆ yawˬ ja cawˬ nya meh laˬ lehˇ naˇ haˬ˗awˬ. Nawˬ˗euˬ aˇ gu mˇ ceh ceh˗eu gʼaˬ maˬ ngeuˇ˗a, dehꞈ ziˇ˗euˬ cawˬ le lehˇ noeˬ naˇ, “nui ma pehˇ” laˇ˗eu maˬ tehˬ˗a.—Dawˬtsoˆtsoˆ˗eu 7:9.

Nawˇ mˇ nya˗eu jeˬ:

• Nawˇ maˬ ya leˇ˗eu jeˬ˗ahˇ ya gaˬ kʼawꞈ, nui ma gʼawˬ mahˇ ni taˬ˗awˇ neh, aˬ yawꞈ ngehˬ jiˇ ngeh keuˆ ni naˇ haˬ˗awˬ

• Dawˬ˗ahˇ tehꞈ˗ehˇ maˬ naˇ haˬ ni, aˬ yawꞈ aˬ jeˬ˗ahˇ ehˇ keuˆ mawꞈ˗eu nga lehˇ shaˇ noeˬ˗awˬ

3 Pyeuꞈ leˇ nga laˬ lehˇ pyehˆ tseˇ

Jaˇliꞈ ehˇ˗eu: “Leh jeh˗awˇ mˇ˗eu mehˬ shi guiˬ lahˬ keuˆ˗awˇ, nymˇ gawˬ mehˬ lawꞈ mehˬ shi dzaˬ˗eu maˬ jaˆ˗a.” (Dawˬdaˬ 14:23) Aˬ jeˬ mˇ˗eu lehˇ ja tsehˆ taˬ˗euˬ loꞈ˗ehˇ ya mˇ caw meh. Teu loꞈ˗ehˇ mˇ˗eu yaw awˬ maˬ ngeuˇ˗a, ya leh jeh˗eu meh. Ehˇ kʼawꞈ aˇ poeˬ baw meh. (Dawˬdaˬ10:4) Naw nyaꞈ nyiˬ gʼaˬ tiˬ kawˆ loꞈ˗ehˇ mehˬ bawˬ gm˗awˇ mˇ naˇ, muiˬ˗eu jeˬ “za myaˬ dzehˬ˗eu meh.”—Dawˬtsoˆtsoˆ˗eu 4:9.

Nawˇ mˇ nya˗eu jeˬ:

• Naw nyaꞈ˗euˬ gaˇ kawˆ aˬ joˆ˗ehˇ jahˇ˗eu lehˇ, bawˬ dzaˬ˗awˇ noeˬ tsehˆ taˬ˗awˬ

• Tiˬ kʼehˬ maˬ kaˬ naw nyaꞈ˗euˬ gaˇ kawˆ kʼoeˇ, muiˬ daˆ laˇ nga laˬ lehˇ pyehˆ tseˇ haw˗awˬ